Gbonyo Tsofawoo—Ani Esa Kɛha Kristofoi?
Beni eshwɛ fioo ni blematsɛ anɔkwafo Yakob baagbo lɛ, ebi koni afee naagbee nii nɛɛ aha lɛ akɛ: “Nyɛfua mi nyɛfataa mitsɛmɛi lɛ ahe yɛ tɛkplo ni yɔɔ Hefron, Hitnyo lɛ, abɔɔ lɛŋ lɛ mli, yɛ tɛkplo ni yɔɔ Makpela abɔɔ lɛ mli, yɛ Mamre hiɛ, yɛ Kanaan shikpɔŋ lɛ nɔ lɛ mli.”—1 Mose 49:29-31.
YOSEF tsu etsɛ nibimɔ lɛ he nii pɛpɛɛpɛ kɛtsɔ kusum ni ehé shi yɛ Mizraim yɛ nakai beaŋ lɛ he hegbɛ ni eŋɔ lɛ nɔ. Efã “etsuji tsofatsɛmɛi lɛ akɛ amɛwo etsɛ tsofa.” Taakɛ amaniɛbɔɔ ni yɔɔ Mose Klɛŋklɛŋ Wolo lɛ yitso 50 lɛ tsɔɔ lɛ, tsofawolɔi lɛ kɛ kusum naa gbii 40 lɛ saa gbonyo lɛ. Yakob tsofawoo lɛ ŋmɛ gbɛfalɔi aweku ni nyiɛɔ blɛoo lɛ amli bii babaoo kɛ hiɛnaanɔ mɛi ni yɔɔ Mizraim lɛ agbɛ koni amɛkɛ nɔ ni miihe ashɛ kilomitai 400 afã gbɛ ni amɛkɛ Yakob gbonyo lɛ aya Hebron kɛha fuu.—1 Mose 50:1-14.
Ani eeenyɛ eba akɛ gbi ko lɛ abaana Yakob gbonyo ni awo lɛ tsofa lɛ? Abɛ hiɛnɔkamɔ tsɔ ko ákɛ ekolɛ abaana egbonyo ni awo lɛ tsofa lɛ. Israel kpokpaa lɛ ji he ko ni nugbɔ nɛɔ waa yɛ jɛmɛ jogbaŋŋ, no hewɔ lɛ enɛ tsakeɔ bɔ ni nibii ni akɛ niji fee ni atsaa shi anáa yɛ jɛmɛ lɛ yɔɔ ha lɛ hiɛ. (2 Mose 3:8) Blema dade kɛ tɛ nibii fa yɛ jɛi, shi nibii ni waaa lɛ ateŋ babaoo, tamɔ mama, kooloi awolo, kɛ gbɔmɔtsei ni awo lɛ tsofa lɛ, nyɛko amɛkpee frɔnɔɔfeemɔ kɛ adebɔɔ naa tsakemɔ be ni baa yɛ bei srɔtoi amli lɛ naa.
Mɛni kwraa ji gbonyo tsofawoo? Mɛni hewɔ akɛtsu nii? Ani esa kɛha Kristofoi?
Nɛgbɛ Nifeemɔ lɛ Je Shishi Kɛjɛ?
Abaanyɛ atsɔɔ gbonyo tsofawoo mli jogbaŋŋ akɛ adesa loo kooloo ko gbonyo yibaamɔ. Yinɔsaneŋmalɔi kpɛlɛɔ nɔ akɛ gbonyo tsofawoo je shishi yɛ Mizraim shi agbɛnɛ blema Ashurbii, Persiabii, kɛ Skitebii lɛ hu kɛtsu nii. Ekolɛ gbonyo tsofawoo he miishɛɛ ni aná yɛ mra be mli lɛ, kɛ ekaa-kɛ-kwɛmɔ lɛ je shishi kɛtsɔ gbohii ni ayana ni afu yɛ shia-ŋa nɔ ní fiteee ni jeee gbɔmɔ je gbɛ ebaa yi nakai lɛ. Fũu ni tamɔ nɛkɛ haŋ nu asa gbonyo lɛ he, koni ekafite oya. Mɛi komɛi kaa amɛyiŋ amɛwieɔ akɛ gbonyo tsofawoo je shishi beni ayana gbohii ni abaa yi yɛ natron (sodium carbonate loo nɔ ko ni tamɔ ŋoo), ni ji alkali (nu ko ni kɛji akɛfutu asid mli lɛ etsɔɔ tsofa mli ŋoo), ni fa babaoo yɛ Mizraim kɛ ehewɔ fɛɛ lɛ mli lɛ.
Oti ni ma gbonyo tsofawolɔ lɛ hiɛ kɛkɛ ji ni etutua muawai anifeemɔ ni jeɔ shishi yɛ ŋmɛlɛtswai komɛi amli yɛ gbele mli, ni haa gbonyo lɛ fiteɔ lɛ. Kɛji abaanyɛ atsĩ nɛkɛ nifeemɔ nɛɛ naa lɛ, fitemɔ sɛɛ baafo loo kɛ hoo lɛ ebaaba shi saŋŋ. Nibii etɛ ji nɔ ni he hiaa: gbonyo lɛ yibaamɔ tamɔ nɔ ni eyɛ wala mli, ni abaatsĩ kpɔtɔmɔ naa, kɛ gbonyo lɛ ni abaafee lɛ bɔ ni haŋ kooloi bibii afite lɛ.
Blema Mizraimbii lɛ woɔ amɛgbohii lɛ tsofa titri yɛ jamɔ mli yiŋtoi ahewɔ. Amɛkɛ jwɛŋmɔ ni amɛhiɛ ni kɔɔ gbele sɛɛ wala he lɛ etsa shwe ni mɛi ni egboi lɛ shweɔ koni amɛya nɔ amɛkɛ je lɛ aná sharamɔ lɛ. Amɛheɔ amɛyeɔ akɛ akɛ amɛgbohii lɛ baatsu nii kɛya naanɔi anaanɔ ni akɛ wala baawo amɛmli ekoŋŋ. Eyɛ mli akɛ gbonyo tsofawoo yaa nɔ waa yɛ nakai beaŋ moŋ, shi kɛbashi amrɔ nɛɛ, anako Mizraim amaniɛbɔɔ ko ni tsɔɔ bɔ ni afeɔ lɛ ahaa. Amaniɛbɔɔ ni hi fe fɛɛ lɛ ji Hela yinɔsaneŋmalɔ Herodotus nɔ̃ ni eŋma yɛ afii ohai enumɔ D.Ŋ.B. lɛ. Shi kɛlɛ, abɔ amaniɛ akɛ, mɔdɛŋ ni abɔ koni asaa aná nɔ ni jɛ nii amlitaomɔ lɛ mli ba lɛ ekoŋŋ kɛtsɔ gbɛtsɔɔmɔi ni Herodotus kɛha lɛ kɛ nitsumɔ nɔ lɛ yeko omanye jogbaŋŋ.
Ani Esa Kɛha Kristofoi?
Mɛi ni jamɔ mli hemɔkɛyelii tamɔɔɔ Yakob nɔ̃ lɛ wo amɛgbonyo tsofa. Ni kɛlɛ, wɔnyɛŋ wɔsusu he akɛ beni Yosef kɛ etsɛ gbonyo lɛ ha tsofawolɔi lɛ, ebi ni akɛɛ sɔlemɔi ni afee kusumii ni ekolɛ akɛtsuɔ nii ahaa gbohii babaoo ni awoɔ amɛ tsofa yɛ Mizraim yɛ nakai beaŋ lɛ. Yakob kɛ Yosef fɛɛ ji hii ni yɔɔ hemɔkɛyeli ni mli wa. (Hebribii 11:21, 22) Eyɛ mli akɛ eyɛ faŋŋ akɛ jeee Yehowa ni kɛ famɔ lɛ ha moŋ, shi awieee Yakob gbonyo lɛ yibaamɔ he akɛ nɔ ni akpɛlɛɛɛ nɔ yɛ Ŋmalɛi lɛ amli. Awooo Yakob gbonyo tsofa koni akɛfee nɔkwɛmɔnɔ kɛha Israel maŋ lɛ loo kɛha Kristofoi asafo lɛ. Yɛ anɔkwale mli lɛ, gbɛtsɔɔmɔi pɔtɛɛ komɛi bɛ sane nɛɛ he yɛ Nyɔŋmɔ Wiemɔ lɛ mli. Beni awo Yosef diɛŋtsɛ gbonyo tsofa yɛ Mizraim sɛɛ lɛ, Ŋmalɛ lɛ eyaaa nɔ etsiii nifeemɔ nɛɛ tã dɔŋŋ.—1 Mose 50:26.
Shihilɛ ni ehiii mli ni ayana gbohii yɛ, yɛ gbohiiabui ni yɔɔ Palestina lɛ amli lɛ tsɔɔ akɛ ejeee Hebribii akusum ákɛ awo gbohii tsofa, kɛ hoo kwraa lɛ jeee yibaamɔ ni sɛɛ tsɛɔ. Ákɛ nɔkwɛmɔnɔ lɛ, awooo Lazaro gbonyo tsofa. Eyɛ mli akɛ akɛ mama bala lɛ moŋ, shi mɛi ni kwɛɔ enɛ lɛ jie mɔ hesusumɔ kpo beni abaakoklo tɛ ni akɛtsĩ egbonyobu lɛ naa lɛ. Akɛni Lazaro gbo gbii ejwɛ ni tsɔ hiɛ lɛ hewɔ lɛ, enyɛmi yoo lɛ yɛ nɔmimaa akɛ jɛmɛ baaje fu kɛji agbele gbonyobu lɛ naa.—Yohane 11:38-44.
Ani awo Yesu Kristo gbonyo tsofa? Amaniɛbɔi ni Sanekpakpa lɛ kɛha lɛ fiii sane naamuu nɛɛ sɛɛ. Yɛ nakai beaŋ lɛ, Yudafoi lɛ akusum ji ni asaa gbonyo lɛ kɛ tsofa-kɛ-ŋma kɛ mu ni jeɔ ŋma dani ayafũ lɛ. Ákɛ nɔkwɛmɔnɔ lɛ, bɔni afee ni asaa Yesu gbonyo lɛ, Nikodemo kɛ tsofa-kɛ-ŋma babaoo ha kɛha yiŋtoo nɛɛ he nitsumɔ. (Yohane 19:38-42) Mɛni hewɔ ekɛ tsofa-kɛ-ŋma babaoo ha nɛkɛ? Ekolɛ suɔmɔ ni jɛ tsuiŋ kɛ bulɛ ni eyɔɔ kɛha Yesu lɛ tsirɛ lɛ koni ekɛ nii ni tamɔ nɛkɛ aha. Esaaa akɛ wɔmuɔ sane naa akɛ yiŋtoo hewɔ ni akɛ tsofa-kɛ-ŋma ni tamɔ nɛkɛ tsu nii lɛ ji koni akɛbaa gbonyo lɛ yi.
Ani Kristofonyo baakpoo kusum nifeemɔ ni ji gbonyo tsofawoo? Yɛ anɔkwale mli lɛ, gbonyo tsofawoo ji be ni afiteɔ yɛ nɔ ni anyɛŋ atsĩ naa lɛ he kɛkɛ. Sũ mli wɔjɛ, ni sũ mli wɔɔku wɔ sɛɛ kɛaatee kɛ́ wɔgboi. (1 Mose 3:19) Shi be enyiɛ ebaahe kɛjɛ be mli ni agbo lɛ kɛyashi yarafeemɔ lɛ mli? Kɛji wekumɛi kɛ nanemɛi miijɛ shɔŋŋ aba ni amɛmiishwe akɛ amɛbaakwɛ gbonyo lɛ, no lɛ ŋwanejee ko bɛ he akɛ esa akɛ awo gbonyo lɛ tsofa bɔ ni sa.
Belɛ, yɛ Ŋmalɛ naa lɛ, ehe ehiaaa ni efee naagba kɛji akpɔ ni awo yɛ he ni nyɛyɔɔ lɛ biɔ ni awo gbonyo lɛ tsofa aloo kɛ́ wekumɛi miishwe ni afee nakai. Gbohii lɛ ‘leee nɔ ko nɔ ko.’ (Jajelɔ 9:5) Kɛji amɛyɛ Nyɔŋmɔ kaimɔ mli lɛ, abaatee amɛ shi kɛba wala mli yɛ jeŋ hee ni ewo shi lɛ mli.—Hiob 14:13-15; Bɔfoi lɛ Asaji 24:15; 2 Petro 3:13.
[Akrabatsa/Mfoniri ni yɔɔ baafa 31]
GBONYO TSOFAWOO—TSUTSU KƐ ŊMƐNƐŊMƐNƐ
Yɛ blema Mizraim lɛ, gbonyo tsofawoo pɔtɛɛ ni akɛtsuɔ nii ahaa gbonyo ko lɛ damɔ shihilɛ mli ni weku lɛ yɔɔ nɔ. Ekolɛ weku ni yɔɔ nii lɛ baahala nifeemɔ gbɛ ni nyiɛ sɛɛ nɛɛ:
Akɛ dade baagbala jwɛŋmɔ lɛ kɛje kpo kɛtsɔ gugɔŋ fɔji lɛ amli. No sɛɛ lɛ, akɛ tsofai ni sa baatsu yitsoŋoŋo lɛ he nii. Nɔ ni nyiɛ enɛ sɛɛ ji gbɔmɔtso lɛ mli nibii ajiemɔ ja tsui lɛ kɛ sabai lɛ pɛ. Bɔni afee ni nine ashɛ musu kotoku lɛ nɔ lɛ, ebiɔ ni agbá gbonyo lɛ fã ko, shi abuɔ enɛ feemɔ akɛ eji esha. Bɔni afee ni aye naataamɔ sane nɛɛ nɔ kunim lɛ, Mizraimbii ni woɔ gbonyo tsofa lɛ halaa mɔ ko ni atsɛɔ lɛ nifolɔ koni lɛ egbá. Ejoɔ foi kɛyaa amrɔ nɔŋŋ kɛji egbe enɛ feemɔ naa, ejaakɛ loomɔi kɛ tɛi atswiamɔ ji toigbalamɔ kɛha nɔ ni abuɔ lɛ akɛ eji nɔ fɔŋ nɛɛ.
Beni ajie musu kotoku lɛ mli nibii fɛɛ sɛɛ lɛ, afɔ́ɔ mli fɛɛ jogbaŋŋ. Yinɔsaneŋmalɔ Herodotus ŋma akɛ: “Amɛkɛ mire ni akpɔ lɛ jogbaŋŋ diɛŋtsɛ woɔ musu kotoku lɛ obɔ, kɛ tsofa-kɛ-ŋma fɛɛ tsofa-kɛ-ŋma ja krɔbɔo pɛ, ni akpɛɔ he ni agbá lɛ.”
Nɔ ni nyiɛ sɛɛ ji, ahaa gbonyo lɛ hiɔ natron mli gbii 70 koni egbi. No sɛɛ lɛ, afɔ́ɔ gbonyo lɛ he ni akɛ klala baláa he fɛfɛo. Kɛkɛ lɛ akɛ nu ni yɔɔ tswãa ni jɛɔ tso mli loo amã henɔ ko ekpa klala lɛ he fɛɛ koni etsu nii akɛ nɔ ni kpɛtɛɔ nii, ni akɛ gbonyo ni awo lɛ tsofa lɛ woɔ tso adeka ko ni hiɛ gbɔmɔ su ni awula lɛ kɛ nibii babaoo lɛ mli.
Ŋmɛnɛ lɛ, abaanyɛ awo gbonyo tsofa yɛ be kukuoo ko mli. Bei pii lɛ atsuɔ enɛ he nii kɛtsɔ nu ko ni akɛwoɔ gbonyo lɛ tsofa bɔ ni sa ni akɛwoɔ fãji ni kɛ lá jɛɔ tsui lɛ mli kɛ fãji ni kɛyaa tsui lɛ mli lɛ mli kɛ agbɛnɛ musu lɛ kɛ kuɛ lɛ hu mli. Yɛ afii ni eho lɛ amli lɛ, áfee nui srɔtoi babaoo ni akɛ nibii efutu, ni akɛtsu nii hu. Shi kɛlɛ, bei pii lɛ akɛ formaldehyde ni ji gas henɔ ko ni naa wa tsuɔ nii ákɛ tsofa ni akɛwoɔ gbohii akɛni ejara waaa ni eyeee mɔ awui lɛ hewɔ.
[Mfoniri]
Maŋtsɛ Tutankhamen gbonyo adeka ni akɛ shika fee lɛ