Nyɛyaa Nɔ Nyɛkɛ Nii ni Nyɛkase lɛ Atsua Nii

“Nii hu ni nyɛkase ni nyɛmɔ mli ni nyɛnu ni nyɛna yɛ mihe lɛ, nomɛi nɔŋŋ nyɛfea, ni hejɔlɛ Nyɔŋmɔ lɛ kɛ nyɛ ahi shi.”—FILIPIBII 4:9.

1, 2. Kɛ́ aawie lɛ, ani Biblia lɛ miiná hewalɛ ko yɛ mɛi ni buɔ amɛhe akɛ amɛji Nyɔŋmɔ jálɔi lɛ ashihilɛ nɔ hewalɛ? Tsɔɔmɔ mli.

“NYƆŊMƆJAMƆ Miiná Hewalɛ, Shi Jeŋba Kpakpa Miifite.” Saneyitso nɛɛ ni je kpo yɛ adafitswaa wolo ni ji Emerging Trends lɛ mli lɛ ji wiemɔ ni mu nɔ ni jɛ niiamlitaomɔ ko ni afee yɛ United States maŋ muu lɛ fɛɛ lɛ mli kɛba lɛ naa. Eyɛ faŋŋ akɛ, mɛi ayibɔ ni yaa sɔlemɔ yɛ nakai maŋ lɛ mli ni kɛɔ akɛ Nyɔŋmɔjamɔ he hiaa yɛ amɛshihilɛ mli lɛ ayifalɛ etee hiɛ. Ni kɛlɛ, amaniɛbɔɔ lɛ kɛɔ akɛ: “Yɛ mɛi babaoo ni sa kadimɔ nɛɛ fɛɛ sɛɛ lɛ, Amerikabii babaoo ayiŋ feɔ amɛ kɔshikɔshi yɛ hewalɛ ni Nyɔŋmɔjamɔ náa yɛ aŋkroaŋkroi kɛ maŋ muu lɛ fɛɛ nɔ lɛ ahe.”

² Shihilɛ nɛɛ eyaaa nɔ yɛ maŋ kome pɛ mli. Yɛ je lɛŋ he fɛɛ he lɛ, mɛi babaoo ni kɛɔ akɛ amɛkpɛlɛɔ Biblia lɛ nɔ ni amɛji Nyɔŋmɔ jálɔi lɛ eŋmɛɛɛ gbɛ ni Ŋmalɛi lɛ aná hewalɛ ko kwraa yɛ amɛshihilɛ nɔ. (2 Timoteo 3:5) Nuu ko ni kwɛɔ niiamlitaomɔ kuu ko nɔ lɛ kɛɛ akɛ: “Wɔbuɔ Biblia lɛ waa akɛ eji nɔ ko ni nɔ kwɔ lolo, shi kɛ aawie be diɛŋtsɛ ni akɛaakane, akɛkase ni akɛtsu nii lɛ he lɛ—eji nɔ ko ni be eho.”

 3. (a) Biblia lɛ náa mɛi ni tsɔmɔɔ anɔkwa Kristofoi lɛ anɔ hewalɛ yɛ mɛɛ gbɛ nɔ? (b) Yesu sɛɛnyiɛlɔi lɛ kɛ Paulo ŋaawoo ni yɔɔ Filipibii 4:9 lɛ tsu nii yɛ mɛɛ gbɛ nɔ?

³ Shi kɛlɛ, shihilɛ lɛ tamɔɔɔ nakai yɛ anɔkwa Kristofoi agbɛfaŋ. Nyɔŋmɔ Wiemɔ lɛ mli ŋaawoo ni amɛkɛtsuɔ nii yɛ amɛshihilɛ mli lɛ eha amɛfee tsakemɔi yɛ amɛsusumɔ kɛ jeŋba mli. Ni mɛi krokomɛi naa sui heei ni amɛjieɔ lɛ kpo lɛ faŋŋ. (Kolosebii 3:5-10) Yɛ Yesu sɛɛnyiɛlɔi lɛ agbɛfaŋ lɛ, Biblia lɛ jeee wolo ko ni akɛtsuuu nii ni mulu yiɔ lɛ yɛ wojiatoohe lɛ. Nɔ ni tamɔɔɔ nakai lɛ, bɔfo Paulo kɛɛ Kristofoi ni yɔɔ Filipi lɛ akɛ: “Nii hu ni nyɛkase ni nyɛmɔ mli ni nyɛnu ni nyɛna yɛ mihe lɛ, nomɛi nɔŋŋ nyɛfea, ni hejɔlɛ Nyɔŋmɔ lɛ kɛ nyɛ ahi shi.” (Filipibii 4:9, wɔma efã ko nɔ mi.) Kristofoi feɔ babaoo fe ni amɛaakpɛlɛ anɔkwale ni yɔɔ Nyɔŋmɔ Wiemɔ lɛ mli lɛ nɔ kɛkɛ. Amɛhiɔ shi yɛ nɔ ni amɛkaseɔ lɛ naa, ni be fɛɛ be lɛ amɛkɛ ŋaawoo ni jɛ Biblia lɛ mli lɛ tsuɔ nii—yɛ weku lɛ mli, yɛ amɛ nitsumɔhei, yɛ asafo lɛ mli, kɛ yɛ shihilɛ gbɛ̀i krokomɛi fɛɛ amli.

 4. Mɛni hewɔ eji kaa ákɛ akɛ Nyɔŋmɔ mlai lɛ aaatsu nii lɛ?

⁴ Nyɔŋmɔ mlai kɛ eshishitoo mlai ní akɛaatsu nii lɛ bɛ mlɛo. Wɔyɛ jeŋ ko ni yɔɔ Satan Abonsam, mɔ ni Biblia lɛ tsɛɔ lɛ akɛ “je nɛŋ nyɔŋmɔ lɛ” hewalɛ kudɔmɔ shishi lɛ mli lɛ mli. (2 Korintobii 4:4; 1 Yohane 5:19) No hewɔ lɛ, ehe miihia ni wɔha wɔhiɛ ahi wɔhe nɔ yɛ nɔ fɛɛ nɔ ni baawo wɔnaji ateŋ ni haŋ wɔhiɛ wɔ emuuyeli lɛ mli wɔha Yehowa Nyɔŋmɔ lɛ he. Te wɔɔfee tɛŋŋ wɔnyɛ wɔtsɔmɔ emuuyeli mlihiɛlɔi lɛ?

Nyɛhiɛa ‘Tsamɔ Wiemɔi lɛ Akadi lɛ’ Mli

 5. Mɛni Yesu wiemɔ, ni ji: ‘Enyiɛ misɛɛ daa’ lɛ tsɔɔ?

⁵ Nii ni wɔkase kɛ nitsumɔ lɛ eko ji ni wɔjɛ anɔkwayeli mli ni wɔhiɛ anɔkwa jamɔ mli, ekɔɔɔ he eko shitee-kɛ-woo ni mɛi ni heee yeee lɛ kɛaaba wɔnɔ lɛ fɛɛ sɛɛ. Tsuishiŋmɛɛ biɔ hiɛmiamɔ. Yesu kɛɛ akɛ: “Kɛji mɔ ko miisumɔ akɛ enyiɛɔ misɛɛ lɛ, ha ni ekwa ehe ni ewó esɛŋmɔtso lɛ ni enyiɛ misɛɛ.” (Mateo 16:24) Yesu ekɛɛɛ akɛ wɔnyiɛ esɛɛ otsi, nyɔɔŋ kome, loo afi kome pɛ. Shi moŋ ekɛɛ akɛ: ‘Enyiɛ misɛɛ daa.’ Nɔ ni ewiemɔ lɛ tsɔɔ ji akɛ, esɛɛnyiɛlɔi ni wɔji lɛ nyɛŋ afee wɔshihilɛ be ko loo wɔhe ni wɔtuu wɔha lɛ yɛ be kukuoo ko mli lɛ pɛ kɛkɛ. Anɔkwa jamɔ ni wɔɔhiɛ mli yɛ anɔkwayeli mli lɛ biɔ ni wɔto wɔtsui shi yɛ shihilɛ gbɛ ni wɔkɔ lɛ mli, ekɔɔɔ he eko nɔ ni baaba. Te wɔɔfee tɛŋŋ wɔfee nakai hu?

 6. Mɛni ji tsamɔ wiemɔi lɛ akadi ní klɛŋklɛŋ afii oha lɛ mli Kristofoi lɛ kase kɛjɛ Paulo dɛŋ lɛ?

⁶ Paulo wo Timoteo, ni ji ehefatalɔ nitsulɔ lɛ hewalɛ akɛ: “Hiɛmɔ tsamɔ wiemɔi ni onu yɛ minaa lɛ akadi lɛ mli yɛ hemɔkɛyeli kɛ suɔmɔ ni yɔɔ Kristo Yesu mli lɛ mli.” (2 Timoteo 1:13) Te Paulo tsɔɔ tɛŋŋ? Hela wiemɔ ni atsɔɔ shishi akɛ “akadi” ni akɛtsu nii yɛ biɛ lɛ shishitsɔɔmɔ diɛŋtsɛ ji nitɛŋmɔ ni nitɛŋlɔ ko efee he mfoniri. Eyɛ mli akɛ agbeko nitɛŋmɔ lɛ naa moŋ, shi nitɛŋmɔ he mfoniri ni tamɔ nakai lɛ baaye abua nikwɛlɔi ni yɔɔ sɛɛyoomɔ lɛ ni amɛbaanyɛ amɛna bɔ ni mfoniri lɛ baatamɔ aha kɛji agbe etɛŋmɔ naa. Nakai nɔŋŋ hu anɔkwale lɛ he akadi ni Paulo tsɔɔ Timoteo kɛ mɛi krokomɛi lɛ jeee ni ekɛ hetoo pɔtɛɛ aha sanebimɔ fɛɛ sanebimɔ ni abaanyɛ abi lɛ. Ni kɛlɛ, nitsɔɔmɔ gbɛ̀i nɛɛ kɛ gbɛtsɔɔmɔ ni fa bɔ ni sa haa—kɛ́ wɔɔkɛɛ lɛ, gbɛ ko nɔ ni atsɔ̃ɔ afeɔ nɔ ko—bɔni afee ni mɛi ni hiɛ tsui kpakpa lɛ anyɛ ana nɔ ni Yehowa biɔ yɛ amɛdɛŋ. Yɛ anɔkwale mli lɛ, bɔni afee ni amɛsa Nyɔŋmɔ hiɛ lɛ, ebaabi ni amɛhiɛ anɔkwa tsɔɔmɔ ni tsaa mɔ lɛ mli daa kɛtsɔ nɔ ni amɛkaseɔ lɛ ní amɛkɛaatsu nii lɛ nɔ.

 7. Te Kristofoi aaafee tɛŋŋ amɛkɛ tsamɔ wiemɔi lɛ akadi lɛ atsu nii lɛ?

⁷ Yɛ klɛŋklɛŋ afii oha lɛ mli lɛ, aŋkroaŋkroi tamɔ Himeneo, Aleksandro, kɛ Fileto jie susumɔi komɛi ni kɛ “tsamɔ wiemɔi . . . lɛ akadi lɛ” kpãaa gbee kpo. (1 Timoteo 1:18-20; 2 Timoteo 2:16, 17) Te mra be mli Kristofoi lɛ aaafee tɛŋŋ ni amɛkaha hemɔkɛyeli kwalɔi miilaka amɛ? Kɛtsɔ niŋmaai ni ajɛ mumɔŋ aŋmala lɛ ní amɛaakase jogbaŋŋ ni amɛkɛaatsu nii yɛ shihilɛ mli lɛ nɔ. Mɛi ni nyiɛɔ yɛ Paulo kɛ anɔkwafoi krokomɛi anɔkwɛmɔnɔ lɛ naa lɛ nyɛ amɛyɔse ni amɛkpoo nɔ fɛɛ nɔ ni kɛ anɔkwa tsɔɔmɔ ni tsaa mɔ ni atsɔɔ amɛ lɛ kpãaa gbee lɛ. (Filipibii 3:17; Hebribii 5:14) Yɛ nɔ najiaŋ ni amɛaafee mɛi ni ‘he miiye yɛ jwɛŋmɔŋ yɛ ŋwanejeei kɛ naataamɔi ahe’ lɛ, amɛyaa nɔ amɛhiɛɔ jwɛŋmɔ kpakpa ni amɛyɔɔ yɛ Nyɔŋmɔjamɔ hetuu-kɛhamɔ nifeemɔ gbɛ he lɛ mli. (1 Timoteo 6:3-6) Wɔfeɔ nakai nɔŋŋ kɛji wɔtee nɔ wɔkɛ anɔkwalei ni wɔkase lɛ tsu nii lɛ. Kwɛ bɔ ni ewoɔ mɔ hemɔkɛyeli hewalɛ ehaa akɛ wɔɔna ni mɛi akpekpei abɔ ni jáa Yehowa ni yɔɔ shikpɔŋ lɛ nɔ lɛ hiɛ Biblia mli anɔkwale he akadi ni tsaa mɔ ni atsɔɔ amɛ lɛ mli kpɛŋŋ.—1 Tesalonikabii 1:2-5.

Kwa “Adesãi”

 8. (a) Mɛɛ gbɛ nɔ Satan tsɔɔ koni ekɛfite wɔhemɔkɛyeli lɛ ŋmɛnɛ? (b) Mɛɛ kɔkɔbɔɔ ní Paulo kɛha anaa yɛ 2 Timoteo 4:3, 4?

⁸ Satan bɔɔ mɔdɛŋ akɛ ebaafite wɔ emuuyeli lɛ kɛtsɔ nibii ni atsɔɔ wɔ lɛ he yiŋkɔshikɔshifeemɔ ni eeetee lɛ shi yɛ wɔmli lɛ nɔ. Ŋmɛnɛ, taakɛ eji yɛ klɛŋklɛŋ afii oha lɛ mli lɛ, hemɔkɛyeli kwalɔi kɛ mɛi krokomɛi taoɔ ni amɛfite mɛi ni yeɔ anɔkwa lɛ ahemɔkɛyeli lɛ. (Galatabii 2:4; 5:7, 8) Bei komɛi lɛ, amɛkɛ adafitswaa nitsumɔhei lɛ tsuɔ nii ni amɛkɛgbɛɔ saji ni ejaaa loo amalei diɛŋtsɛ po ni kɔɔ Yehowa webii anifeemɔi loo amɛyiŋtoi ahe lɛ amɛshwãa. Paulo bɔ kɔkɔ akɛ mɛi komɛi baakpalaŋ kɛjɛ anɔkwale lɛ he. Eŋma akɛ: “Be ko baaba ni amɛkpɛlɛŋ tsamɔ tsɔɔmɔ lɛ dɔŋŋ, shi moŋ amɛaabua tsɔɔlɔi anaa amɛwo amɛhe yɛ amɛ diɛŋtsɛ amɛkɔnɔi lɛ anaa, ejaakɛ amɛtoiiaŋ miifɛ̃lɛ̃ amɛ; ni amɛaakpala anɔkwale lɛ yɛ amɛtoii asɛɛ, ni amɛkpale amɛyabo adesãi moŋ atoi.”—2 Timoteo 4:3, 4.

 9. Beni Paulo tsɛ “adesãi” ayisɛɛ lɛ, no mli lɛ ekolɛ mɛni ji nɔ ni yɔɔ ejwɛŋmɔ mli?

⁹ Yɛ nɔ najiaŋ ni amɛaahiɛ tsamɔ wiemɔi lɛ akadi lɛ mli lɛ, akɛ “adesãi” laka amɛteŋ mɛi komɛi. Mɛni ji nɛkɛ adesãi nɛɛ? Ekolɛ Paulo miisusu adesãi ni aka yiŋ aŋmala he, tamɔ Tobit wolo ni haa mɛi ayiŋ feɔ amɛ kɔshikɔshi lɛ ji lɛ.a Nɔ ni baanyɛ afata adesãi lɛ ahe hu ji saji ni ŋɔɔ kɛ nɔ ni aka yiŋ awie. Agbɛnɛ hu, ekolɛ eeenyɛ eba akɛ mɛi ni susuɔ Nyɔŋmɔ shishitoo mlai lɛ ahe akɛ eji nɔ ni ŋmɛɔ nɔ fɛɛ nɔ feemɔ gbɛ, loo ni feɔ veveeve fe nine yɛ mɛi ni nyiɛɔ hiɛ yɛ asafo lɛ mli ahe lɛ tsɔ̃ ŋaa gbɛ nɔ amɛlaka mɛi komɛi hu—“yɛ amɛ diɛŋtsɛ amɛkɔnɔi lɛ anaa.” (3 Yohane 9, 10; Yuda 4) Gbɛtsii nii fɛɛ gbɛtsii nii ni tsĩ amɛnaa lɛ, eka shi faŋŋ akɛ mɛi komɛi yasumɔ amale lɛ moŋ fe Nyɔŋmɔ Wiemɔ lɛ mli anɔkwalei lɛ. Etsɛɛɛ ni amɛkpa nibii ni amɛkase lɛ kɛ nitsumɔ, ni enɛ ha amɛye amɛhe awui diɛŋtsɛ yɛ mumɔŋ.—2 Petro 3:15, 16.

10. Mɛni ji ŋmɛnɛŋmɛnɛ beaŋ adesãi lɛ, ni mɛɛ gbɛ nɔ Yohane ma bɔ ni ehe hiaa ni wɔkwɛ jogbaŋŋ lɛ nɔ mi yɛ?

¹⁰ Wɔbaanyɛ wɔtsi wɔhe kɛjɛ adesãi ahe ŋmɛnɛ kɛji wɔpɛi nɔ ni wɔboɔ toi ni wɔkaneɔ lɛ mli jogbaŋŋ ni wɔhala mli lɛ. Ákɛ nɔkwɛmɔnɔ lɛ, bei pii lɛ adafitswaa nitsumɔhei lɛ woɔ jeŋba shara he hewalɛ. Mɛi babaoo woɔ hé ni aheɔ ayeɔ akɛ Nyɔŋmɔ bɛ, kɛ le ní akɛɛ anyɛɛɛ ale akɛ Nyɔŋmɔ yɛ loo ebɛ lɛ he hewalɛ. Mɛi ni wieɔ shiɔ Biblia lɛ yeɔ kɛɛmɔ ni Biblia lɛ kɛɔ akɛ ajɛ ŋwɛi aŋma lɛ he fɛo. Ni ŋmɛnɛŋmɛnɛ beaŋ hemɔkɛyeli kwalɔi bɔɔ mɔdɛŋ koni amɛdu yiŋkɔshikɔshifeemɔ wui bɔni afee ni amɛfite Kristofoi ahemɔkɛyeli lɛ. Yɛ nɔ ni kɔɔ oshara ni tamɔ enɛ nɔŋŋ ni apasa gbalɔi ni hi shi yɛ klɛŋklɛŋ afii oha lɛ mli lɛ kɛba lɛ he lɛ, bɔfo Yohane bɔ kɔkɔ akɛ: “Suɔmɔmɛi, nyɛkahea mumɔ fɛɛ mumɔ nyɛyea; shi moŋ nyɛkaa mumɔi lɛ nyɛkwɛa akɛ Nyɔŋmɔ mli amɛjɛ lo; ejaakɛ amale gbalɔi pii eje kpo kɛba je lɛ mli.” (1 Yohane 4:1) No hewɔ lɛ, ehe miihia ni wɔkwɛ jogbaŋŋ.

11. Mɛni ji gbɛ kome ni wɔbaanyɛ wɔtsɔ nɔ wɔka wɔhe wɔkwɛ kɛji akɛ wɔyɛ hemɔkɛyeli lɛ mli?

¹¹ Paulo wie yɛ enɛ gbɛfaŋ akɛ: “Nyɛkaa nyɛ diɛŋtsɛ nyɛhe nyɛkwɛa akɛ nyɛyɛ hemɔkɛyeli lɛ mli lo.” (2 Korintobii 13:5) Bɔfo Paulo wo wɔ hewalɛ koni wɔya nɔ wɔka wɔhe wɔkwɛ akɛ wɔkpɛtɛ Kristofoi ahemɔkɛyelii muu lɛ fɛɛ he lo. Kɛ́ wɔsumɔɔ ni wɔbo mɛi ni hiɛ esɔɔɔ nii lɛ atoi lɛ, no lɛ ehe miihia ni wɔkɛ sɔlemɔ apɛi wɔmli jogbaŋŋ. (Lala 139:23, 24) Ani wɔsumɔɔ ni wɔtao Yehowa webii ahe tɔmɔi? Kɛ́ nakai ni lɛ, mɛni hewɔ? Ani mɔ ko wiemɔi loo enifeemɔi eye wɔ awui? Kɛ́ nakai ni lɛ, ani wɔmiikwɛ nii yɛ gbɛ ni ja nɔ? Amanehulu fɛɛ amanehulu ni wɔkɛkpeɔ yɛ nibii agbɛjianɔtoo lɛ mli lɛ ehiŋ shi daa. (2 Korintobii 4:17) Kɛ́ wɔkɛ kaai komɛi kpe yɛ asafo lɛ mli po lɛ, mɛni hewɔ esa akɛ wɔfɔ̃ɔ Nyɔŋmɔ sɔɔmɔ? Kɛ́ wɔmli fu yɛ nɔ ko he lɛ, ani ejeee nɔ ni hi jogbaŋŋ akɛ wɔbaafee nɔ ni wɔɔnyɛ koni wɔtsu sane lɛ he nii ni no sɛɛ lɛ wɔshi wɔha Yehowa?—Lala 4:5; Abɛi 3:5, 6; Efesobii 4:26.

12. Beroiabii lɛ fee nɔkwɛmɔnɔ kpakpa amɛfɔ̃ shi amɛha wɔ yɛ mɛɛ gbɛ nɔ?

¹² Yɛ nɔ najiaŋ ni wɔɔwie nii ahe keketee lɛ, nyɛhaa wɔhiɛa wɔmumɔŋ shidaamɔ lɛ mli jogbaŋŋ yɛ saji ni wɔnine shɛɔ nɔ kɛtsɔ teemɔŋ nikasemɔ kɛ asafoŋ kpeei ashishi lɛ nɔ lɛ hewɔ. (1 Korintobii 2:14, 15) Ni yɛ nɔ najiaŋ ni wɔɔje Nyɔŋmɔ Wiemɔ lɛ he ŋwane lɛ, kwɛ bɔ ni nilee yɔɔ mli jogbaŋŋ akɛ wɔɔná klɛŋklɛŋ afii oha lɛ mli Beroiabii lɛ asu lɛ, mɛi ni pɛi Ŋmalɛi lɛ amli jogbaŋŋ lɛ! (Bɔfoi lɛ Asaji 17:10, 11) Belɛ, nyɛhaa wɔfea wɔnii yɛ nɔ ni wɔkaseɔ lɛ naa, ni wɔkpoo adesãi, ni wɔkpɛtɛ anɔkwale lɛ he.

13. Te wɔɔfee tɛŋŋ wɔgbɛ adesãi wɔshwã ni wɔleee?

¹³ Adesã kroko ko hu yɛ ni esa akɛ wɔtsi wɔhe kɛjɛ he. Saji babaoo ni ŋɔɔ ni agbɛɔ ashwãa, bei pii lɛ kɛtsɔ E-mail nɔ. Nilee yɛ mli akɛ wɔɔkwɛ wɔhe nɔ jogbaŋŋ yɛ nakai saji lɛ ahe, titri lɛ kɛ́ wɔleee he pɔtɛɛ ni sane lɛ jɛ. Kɛji akɛ niiashikpamɔ loo sane ko jɛ Kristofonyo ko ni abuɔ lɛ lɛ po ŋɔɔ lɛ, ekolɛ nakai mɔ lɛ leee anɔkwalei fɛɛ ni kɔɔ sane lɛ he. Enɛ hewɔ ehe hiaa ni wɔkwɛ jogbaŋŋ koni wɔkagba mɛi krokomɛi saji ni aleee emli anɔkwalei lɛ. Eka shi faŋŋ akɛ, wɔsumɔŋ ni wɔgba “adesãi ni Nyɔŋmɔ gbeyeishemɔ bɛ mli,” loo ‘adesãi ni fiteɔ nii ni ji krɔŋkrɔŋ lɛ.’ (1 Timoteo 4:7; New International Version) Akɛni sɔ̃ kã wɔ hu wɔnɔ akɛ wɔwie anɔkwale wɔtsɔɔ mɛi krokomɛi hewɔ lɛ, wɔfeɔ jogbaŋŋ kɛji wɔtsi wɔhe kɛjɛ nɔ fɛɛ nɔ ni baanyɛ aha agbɛ nibii ni jeee anɔkwale kɛji wɔleee po lɛ wɔshwã.—Efesobii 4:25.

Sɛɛnamɔi Kpakpai ni Jɛɔ Anɔkwale lɛ kɛ Nitsumɔ Mli Kɛbaa

14. Kɛ́ wɔkɛ nibii ni wɔkase yɛ Nyɔŋmɔ Wiemɔ lɛ mli lɛ tsu nii lɛ, mɛɛ sɛɛnamɔi wɔbaaná?

¹⁴ Nibii ni wɔkaseɔ yɛ teemɔŋ Biblia mli nikasemɔ kɛ Kristofoi akpeei ashishi ni wɔkɛaatsu nii lɛ baawo yibii pii. Ákɛ nɔkwɛmɔnɔ lɛ, wɔbaana akɛ wɔkɛ mɛi ni wɔkɛyɔɔ hemɔkɛyeli kome mli lɛ ateŋ wekukpaa lɛ baaya hiɛ. (Galatabii 6:10) Kɛ́ wɔkɛ Biblia mli shishitoo mlai tsu nii lɛ, no lɛ wɔ diɛŋtsɛ wɔsu baatsake. (Lala 19:9) Kɛfata he lɛ, kɛ́ wɔkɛ nɔ ni wɔkaseɔ lɛ tsu nii lɛ, ‘wɔwulaa Nyɔŋmɔ nitsɔɔmɔ lɛ’ ni eka shi faŋŋ akɛ ebaagbala mɛi krokomɛi kɛba anɔkwa jamɔ he.—Tito 2:6-10.

15. (a) Mɛɛ gbɛ nɔ gbekɛ ko ná ekãa ni eye odase yɛ skul? (b) Mɛni okase kɛjɛ niiashikpamɔ nɛɛ mli?

¹⁵ Oblahii kɛ oblayei babaoo yɛ Yehowa Odasefoi lɛ ateŋ ni kɛ nɔ ni amɛkaseɔ yɛ teemɔŋ Biblia nikasemɔ mli kɛ Kristofoi awoji amli kɛ agbɛnɛ hu asafoŋ kpeei ashishi ni amɛyaa daa lɛ tsuɔ nii. Amɛjeŋba kpakpa lɛ ji odaseyeli ni mli wa kɛha tsɔɔlɔi kɛ nanemɛi skulbii. (1 Petro 2:12) Susumɔ Leslie, ni ji gbekɛyoo ni eye afii 13 ni yɔɔ United States lɛ he okwɛ. Ekpɛlɛ nɔ akɛ, bei pii lɛ ewaa kɛhaa lɛ akɛ ebaawie ehemɔkɛyeli lɛ he etsɔɔ eskulbii lɛ, shi gbi ko lɛ enɛ tsake. “Skulbii lɛ wie bɔ ni mɛi bɔɔ mɔdɛŋ koni amɛhɔɔ nibii amɛha mɛi lɛ he. Gbekɛyoo ko wo enine nɔ ni etsĩ Yehowa Odasefoi lɛ atã.” Ákɛ Odasefonyo lɛ, te Leslie fee enii eha tɛŋŋ? Ewie akɛ: “Mifã mihemɔkɛyeli lɛ he, ni miheɔ miyeɔ akɛ enɛ ha mɔ fɛɛ mɔ naa kpɛ ehe, ejaakɛ mifɔɔ dioofeemɔ yɛ skul.” Mɛni jɛ Leslie ekãafeemɔ lɛ mli kɛba? Leslie kɛɛ akɛ: “Minyɛ miha skulnyo lɛ wolo bibioo ko kɛ dɛhiɛmɔ wolo ko, akɛni eyɛ sanebimɔi krokomɛi hu lɛ hewɔ.” Kwɛ bɔ ni Yehowa baaná miishɛɛ aha akɛ oblahii kɛ oblayei ni kɛ nɔ ni amɛkaseɔ lɛ tsuɔ nii lɛ náa ekãa kɛyeɔ odase yɛ skul!—Abɛi 27:11; Hebribii 6:10.

16. Teokrase Sɔɔmɔ Skul lɛ he eba sɛɛnamɔ kɛha Odasefonyo gbekɛ ko yɛ mɛɛ gbɛ nɔ?

¹⁶ Nɔkwɛmɔnɔ kroko hu kɔɔ Elizabeth he. Beni eye afii kpawo, kɛ yɛ eshishijee skul be lɛ mli fɛɛ lɛ, be fɛɛ be ni ebaaná nifeemɔ yɛ Teokrase Sɔɔmɔ Skul lɛ mli lɛ, nɛkɛ gbekɛyoo fioo nɛɛ fɔ̃ɔ etsɔɔlɔi lɛ anine kɛbaa Maŋtsɛyeli Asa lɛ nɔ. Kɛ́ tsɔɔlɔ ko nyɛɛɛ aba lɛ, Elizabeth hiɔ shi yɛ skul kpamɔ sɛɛ ni efeɔ enifeemɔ lɛ etsɔɔ tsɔɔlɔ lɛ. Beni eshwɛ afi ni Elizabeth baagbe nɔtsamɔ skul lɛ naa lɛ, eŋma amaniɛbɔɔ ko ni hé wolo baafai nyɔŋma yɛ sɛɛnamɔi ni yɔɔ Teokrase Sɔɔmɔ Skul lɛ he ni ewie he yɛ tsɔɔlɔi akui ejwɛ komɛi ahiɛ. Afɔ̃ lɛ nine hu koni ebafee bɔ ni ahaa wiemɔ yɛ Teokrase Sɔɔmɔ Skul lɛ mli lɛ he nɔkwɛmɔnɔ, ni ehala saneyitso ni ji “Mɛni Hewɔ Nyɔŋmɔ Ŋmɛɔ Efɔŋfeemɔ Gbɛ?” Elizabeth ená tsɔsemɔ he gbɛjianɔtoo ni Yehowa Odasefoi kɛhaa yɛ Teokrase Sɔɔmɔ Skul lɛ mli lɛ he sɛɛ. Eji Kristofoi oblahii kɛ oblayei babaoo ni jieɔ Yehowa yi kɛtsɔ nibii ni amɛkase kɛjɛ e-Wiemɔ lɛ mli ní amɛkɛtsuɔ nii lɛ ateŋ mɔ kome.

17, 18. (a) Mɛɛ ŋaawoo Biblia lɛ kɛhaa yɛ anɔkwayeli he? (b) Yehowa Odasefoi ateŋ mɔ kome jeŋba kpakpa lɛ na nuu ko nɔ hewalɛ yɛ mɛɛ gbɛ nɔ?

¹⁷ Biblia lɛ woɔ Kristofoi hewalɛ koni amɛba amɛjeŋ jogbaŋŋ yɛ nibii fɛɛ mli. (Hebribii 13:18) Anɔkwa ni ayeee lɛ baanyɛ afite wɔkɛ mɛi krokomɛi ateŋ wekukpaa lɛ, ni nɔ ni fe fɛɛ lɛ, wɔkɛ Yehowa teŋ wekukpaa lɛ diɛŋtsɛ. (Abɛi 12:22) Anɔkwayeli sui ni wɔjieɔ lɛ kpo lɛ yeɔ odase akɛ wɔkɛ nibii ni wɔkase lɛ miitsu nii, ni eha mɛi babaoo ená bulɛ ni mli kwɔ kɛha Yehowa Odasefoi.

¹⁸ Susumɔ asraafonyo ko ni atsɛɔ lɛ Phillip niiashikpamɔ lɛ he okwɛ. Eŋmɛ tsɛk ni ekɛ ewaonaagbɛi ewo shishi shi eŋmako nɔ nii lɛ abɛku, ni eyɔseee enɛ kɛyashi akɛmaje lɛ yɛ post ɔfis adeka mli. Mɔ ni na tsɛk lɛ ji Yehowa Odasefoi lɛ ateŋ mɔ kome, ni wolo bibioo ko ni eŋma kɛfata he lɛ tsɔɔ akɛ mɔ ni na lɛ jamɔ mli hemɔkɛyelii ni kanya lɛ lɛ hã ekɛku esɛɛ lɛ. Phillip naa kpɛ ehe. Ekɛɛ akɛ: “Kulɛ amɛbaanyɛ amɛju mi dɔlai 9,000!” Enijiaŋ eje wui be ko momo beni aju efai yɛ sɔlemɔwe lɛ. Ekolɛ, mɔ ko ni le lɛ lɛ ji mɔ ni kɔ efai lɛ, yɛ be mli ni mɔ ko ni leee lɛ lɛ kɛ tsɛk ni feɔ dɔlai akpei abɔ lɛ eku sɛɛ ebaha lɛ! Eji anɔkwale akɛ, Kristofoi ni yeɔ anɔkwa lɛ woɔ Yehowa Nyɔŋmɔ hiɛ nyam!

Nyɛyaa Nɔ Nyɛkɛ Nɔ ni Nyɛkase lɛ Atsua Nii

19, 20. Kɛ́ wɔtsu nibii ni yɔɔ Ŋmalɛi lɛ amli ní wɔkase lɛ he nii lɛ, wɔbaaná he sɛɛ yɛ mɛɛ gbɛ nɔ?

¹⁹ Mɛi ni kɛ nɔ ni amɛkase kɛjɛ Nyɔŋmɔ Wiemɔ lɛ mli lɛ tsuɔ nii lɛ náa sɛɛnamɔi babaoo. Bɔfo Yakobo ŋma akɛ: “Mɔ ni maa eyi shi ekwɛɔ heyeli mla ni hi kɛwula shi lɛ mli, ni ekãa he, ni ejeee mɔ ni nuɔ ni ehiɛ kpaa nɔ, shi moŋ eji nɔyelɔ ni tsuɔ he nii lɛ, nakai mɔ lɛ aaajɔɔ lɛ yɛ enɔyeli lɛ mli.” (Yakobo 1:25) Hɛɛ, kɛ́ wɔfee wɔnii yɛ gbɛ ni kɛ nibii ni yɔɔ Ŋmalɛi lɛ amli ni wɔkaseɔ lɛ kpãa gbee lɛ, no lɛ wɔbaaná miishɛɛ diɛŋtsɛ ni wɔbaanyɛ wɔkpee shihilɛ mli nɔnyɛɛi lɛ anaa. Nɔ ni fe fɛɛ lɛ, wɔbaana Yehowa dɛŋ jɔɔmɔ kɛ naanɔ wala he gbɛkpamɔ!—Abɛi 10:22; 1 Timoteo 6:6.

²⁰ Belɛ, bɔ fɛɛ bɔ ni fee lɛ, nyɛyaa nɔ ni nyɛkasea Nyɔŋmɔ Wiemɔ lɛ. Nyɛkɛ Yehowa jalɔi akpea be fɛɛ be, ni nyɛbo saji ni akɛhaa yɛ Kristofoi akpeei ashishi lɛ toi jogbaŋŋ. Nyɛkɛ nɔ ni nyɛkaseɔ lɛ atsua nii, nyɛyaa nɔ nyɛkɛtsua nii, ni “hejɔlɛ Nyɔŋmɔ lɛ kɛ nyɛ ahi shi.”—Filipibii 4:9.

[Shishigbɛ niŋmaa]

Ani Okaiɔ?

• Mɛni ji “tsamɔ wiemɔi . . . akadi” lɛ, ni te wɔɔfee tɛŋŋ wɔhiɛ mli?

• Mɛɛ “adesãi” esa akɛ wɔkpoo?

• Mɛɛ sɛɛnamɔ mɛi ni kɛ nɔ ni amɛkase yɛ Nyɔŋmɔ Wiemɔ lɛ mli lɛ tsuɔ nii lɛ náa?

[Mfoniri ni yɔɔ baafa 17]

Mra be mli Kristofoi lɛ baanyɛ atsĩ hemɔkɛyeli kwalɔi anaa koni amɛkaha amɛdu gbɛ yɛ mɛɛ gbɛ nɔ?

[Mfonirii ni yɔɔ baafa 18]

Adafitswaa nitsumɔhei, Internet kɛ ŋmɛnɛŋmɛnɛ beaŋ hemɔkɛyeli kwalɔi duɔ yiŋkɔshikɔshifeemɔ yɛ wɔ mli

[Mfoniri ni yɔɔ baafa 19]

Nilee bɛ mli akɛ aaagbɛ saji ni aleee anɔkwale ni yɔɔ mli lɛ ashwã

[Mfonirii ni yɔɔ baafa 20]

Yehowa Odasefoi kɛ nɔ ni amɛkaseɔ yɛ Nyɔŋmɔ Wiemɔ lɛ mli lɛ tsuɔ nii yɛ nitsumɔhe, skul, kɛ hei krokomɛi hu