“Maŋtsɛyeli Jajelɔi ni Yɔɔ Ekãa” Kɛ Mlifilimɔ Ebua Amɛhe Naa

NAAGBAI ni kɔɔ jeŋba, shika, kɛ maŋkwramɔŋ nifeemɔ he lɛ miihao je lɛ. Shi kɛlɛ, yɛ basabasafeemɔ nɛɛ fɛɛ sɛɛ lɛ, Yehowa Odasefoi bua amɛhe naa kɛha gbii etɛ toiŋjɔlɛ “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpeei. Afee henaabuamɔi nɛɛ yɛ je lɛŋ fɛɛ kɛjɛ May 2002 kɛbaa.

Kpokpaa wulu nɔ kpeei lɛ efee mlifilimɔ bei lɛɛlɛŋ. Nyɛhaa wɔtĩa wiemɔ he gbɛjianɔtoo ni tswaa mɔ emaa shi ni damɔ Biblia lɛ nɔ lɛ mli kuku.

Klɛŋklɛŋ Gbi lɛ Maa Yesu Ekãafeemɔ lɛ Nɔ Mi

Kpokpaa wulu nɔ kpee lɛ klɛŋklɛŋ gbi lɛ saneyitso lɛ ji “Kasemɔ Ekãa ni Wɔ-Nuŋtsɔ Yesu Yɔɔ Lɛ.” (Yohane 2:17) Wiemɔ ni ji “Nyɛmli Afilia Nyɛ yɛ Nyɛhe Naa ni Nyɛbabua ákɛ Maŋtsɛyeli Jajelɔi lɛ Hewɔ” lɛ kɛ miishɛɛ fɔ̃ mɛi ni eba lɛ nine koni amɛbaná mlifilimɔ ni kadiɔ Nyɔŋmɔ webii akpokpaa wulu nɔ kpeei be fɛɛ be lɛ mli gbɛfaŋnɔ. (5 Mose 16:15) Nɔ ni nyiɛ wiemɔ nɛɛ sɛɛ ji saji ni abibii sanekpakpa shiɛlɔi ni yɔɔ ekãa lɛ.

Wiemɔ ni ji “Ná Yehowa Diɛŋtsɛ He Miishɛɛ Naakpa” lɛ kɛ wɔ susu Lala 37:1-11 lɛ kuku fɛɛ kuku he. Awo wɔ hewalɛ koni ‘wɔkawo wɔtsui la’ yɛ nɔ ni tamɔ omanye ni mɛi fɔ̃ji lɛ eye lɛ he. Eyɛ mli akɛ ekolɛ mɛi fɔ̃ji baamale wɔhe moŋ, shi etsɛŋ ni Yehowa baatsɔɔ mɛi diɛŋtsɛ ni ji enɔkwafoi lɛ yɛ faŋŋ mli. Wiemɔ ni ji “Nyɛjiea Hiɛsɔɔ Kpo Nyɛtsɔɔa” lɛ tsɔɔ bɔ ni wɔbaanyɛ wɔfee wɔjie hiɛsɔɔ kpo wɔtsɔɔ Nyɔŋmɔ. Esa akɛ Kristofoi fɛɛ kɛ “yijiemɔ afɔle” aha Yehowa. (Hebribii 13:15) Eji anɔkwale akɛ, be falɛ ni wɔtuɔ wɔwoɔ Yehowa sɔɔmɔ mli lɛ damɔ hiɛsɔɔ ni wɔyɔɔ kɛ wɔshihilɛi anɔ.

Wiemɔ krɛdɛɛ lɛ yitso ji “Akɛ Ekãawoo Babaoo Ha Maŋtsɛyeli Jajelɔi.” Etsɔɔ akɛ Yesu Kristo ji ekãa ni wɔfeɔ lɛ he nɔkwɛmɔnɔ ni hi fe fɛɛ. Beni ato ŋwɛi Maŋtsɛyeli lɛ shishi yɛ afi 1914 lɛ, ehe bahia ni anɔkwa Kristofoi kɛ ekãa atswa nakai sanekpakpa lɛ he adafi. Wielɔ lɛ gbala jwɛŋmɔ kɛtee kpee ni afee yɛ Cedar Point, Ohio, U.S.A., ni afee yɛ afi 1922 lɛ nɔ, ni ekai wɔ tsɛmɔ ni he hiaa waa yɛ yinɔsane mli ni ji: “Nyɛtswaa Maŋtsɛ lɛ kɛ e-Maŋtsɛyeli lɛ he adafi” lɛ! Beni be shwieɔ mli lɛ, ekãa ni Nyɔŋmɔ anɔkwa tsuji lɛ yɔɔ lɛ tsirɛ amɛ koni amɛjaje Maŋtsɛyeli lɛ he anɔkwalei ni yɔɔ naakpɛɛ lɛ amɛtsɔɔ jeŋmaji lɛ fɛɛ.

Wiemɔ ni ji “Nyɛkashea Gbeyei Akɛni Nyɛle akɛ Yehowa Kɛ Wɔ Yɛ lɛ Hewɔ” lɛ, ni aha yɛ klɛŋklɛŋ gbi lɛ nɔ shwane mli lɛ tsɔɔ akɛ Nyɔŋmɔ webii ji mɛi titri ni Satan kɛ ehiɛ eka amɛ waa. Shi kɛlɛ, yɛ shitee-kɛ-woo ni wɔkɛkpeɔ lɛ fɛɛ sɛɛ lɛ, hemɔkɛyeli he nɔkwɛmɔnii babaoo ni wɔsusuɔ he, ni anaa yɛ Biblia lɛ mli lɛ kɛ ŋmɛnɛŋmɛnɛ beaŋ nɔ̃ lɛ, haa wɔnáa ekãa ni wɔkɛaadamɔ amanehului kɛ kaai anaa ni wɔsheee gbeyei.—Yesaia 41:10.

Nɔ ni ba sɛɛ mli yɛ wiemɔ he gbɛjianɔtoo lɛ mli ji wiemɔ ni ahaa kɛtsaraa nɔ, ni hiɛ fãi etɛ ni yitso ji “Mika Gbalɛ lɛ Kanyaa Wɔ ni Wɔnyiɛ Yehowa Gbɛi Amli.” Klɛŋklɛŋ wielɔ lɛ kɛ Mika gbii lɛ amli jeŋba fitemɔ, jamɔŋ hemɔkɛyeli kwamɔ, kɛ heloonaa nii asɛɛdii lɛ to wɔbei nɛɛ ahe. Ekɛɛ akɛ: “Hiɛnɔkamɔ ni wɔyɔɔ kɛha wɔsɛɛ be lɛ baaba mli diɛŋtsɛ kɛji wɔná toiboo tsui ni wɔkwɛ akɛ wɔsu yɛ krɔŋŋ ni wɔshihilɛ eyi obɔ kɛ nifeemɔi ni Nyɔŋmɔ gbeyeishemɔ kɛ hetuu-kɛhamɔ yɔɔ mli—ni kɛ́ wɔhiɛ kpaaa nɔ akɛ Yehowa gbi lɛ baaba lɛ.”—2 Petro 3:11, 12.

Wiemɔ ni ahaa kɛtsaraa nɔ lɛ wielɔ ni ji enyɔ lɛ kadi bɔ ni Mika bu Yuda hiɛnyiɛlɔi lɛ fɔ́ lɛ. Amɛwa ohiafoi ni nyɛɛɛ amɛhe amɛfã lɛ ayi. Shi Mika gba anɔkwa jamɔ kunimyeli lɛ hu efɔ̃ shi. (Mika 4:1-5) Akɛni Yehowa mumɔ krɔŋkrɔŋ lɛ woɔ wɔ hewalɛ hewɔ lɛ, wɔtswa wɔfai shi akɛ wɔbaajaje nɛkɛ hiɛnɔkamɔ he shɛɛ sane ni haa mɔ hejɔɔmɔ nɛɛ. Shi kɛ́ wɔnuɔ he akɛ helai eŋmɛɛɛ wɔ gbɛ loo wɔmiinu he akɛ nɔ kroko miigba wɔnaa yɛ gbɛ ko nɔ hu? Wielɔ ni ji etɛ lɛ kɛɛ akɛ: “Nilee yɛ Yehowa taomɔ nii lɛ amli, ni abaanyɛ ashɛ he hu.” Etee nɔ egba Mika 6:8 lɛ fãi srɔtoi lɛ ahe sane, he ni wɔkaneɔ yɛ akɛ: “Ajaje nɔ ni . . . Yehowa biɔ yɛ odɛŋ atsɔɔo: no ji akɛ ofee nɔ ni ja gbɛ, ni osumɔ ejurɔfeemɔ, ni okɛ o-Nyɔŋmɔ lɛ anyiɛ yɛ heshibaa mli” lɛ.

Akɛni je lɛŋ jeŋba ni efite lɛ baanyɛ aná Kristofoi anɔ hewalɛ hewɔ lɛ, wɔ fɛɛ wɔná wiemɔ ni ji “Nyɛhiɛa Hetsemɔ Mli Kɛtsɔ Nyɛtsuii Ahe ni Nyɛaabu lɛ Nɔ” lɛ he sɛɛ. Ákɛ nɔkwɛmɔnɔ lɛ, hetsemɔ mli ni wɔɔhiɛ lɛ baaye abua koni wɔná gbalashihilɛ ni miishɛɛ yɔɔ mli. Ákɛ Kristofoi lɛ, esaaa akɛ wɔnáa susumɔ po akɛ wɔkɛ wɔhe baawo bɔlɛnamɔ mli jeŋba shara mli kɔkɔɔkɔ.—1 Korintobii 6:18.

Wiemɔ ni ji “Kwɛmɔ Ohe Nɔ Jogbaŋŋ yɛ Mɔ Lakamɔ He” lɛ tsɔɔ akɛ, wɔkɛ nilee abu wiemɔi ni ejaaa, anɔkwalei fã-kɛ-fã, kɛ amalei ni mli wa ni hemɔkɛyeli kwalɔi gbɛɔ shwãa lɛ akɛ eji ebɔɔ. (Kolosebii 2:8) Nakai nɔŋŋ hu esaaa akɛ wɔlakaa wɔhe akɛ wɔbaanyɛ wɔná wɔhe eshai amli akɔnɔi lɛ mli ŋɔɔmɔ ni naagbai ni naa wa jɛɛɛ mli kɛbaaa.

“Já Anɔkwa Nyɔŋmɔ Kome Pɛ Lɛ” ji klɛŋklɛŋ gbi lɛ naagbee wiemɔ lɛ yitso. Yɛ be mli ni jeŋ shihilɛi lɛ mli woɔ wu be fɛɛ be lɛ, kwɛ bɔ ni ebafeɔ hewalɛwoo akɛ etsɛŋ ni Yehowa kɛ ejalɛ jeŋ hee lɛ baaba! Namɛi baahi mli? Mɛi ni jáa Yehowa lɛ pɛ. Wielɔ lɛ jie nikasemɔ wolo hee lɛ ni ji Já Anɔkwa Nyɔŋmɔ Kome Lɛ kpo koni eye ebua wɔ, wɔbii, kɛ wɔ Biblia mli nikaselɔi koni amɛnine ashɛ oti nɛɛ nɔ. Kwɛ miishɛɛ ni wɔná akɛ wɔnine shɛ nɔ!

Gbi ni Ji Enyɔ lɛ Maa Ekãa Kɛha Ekpakpafeemɔ Nɔ Mi

Kpokpaa wulu nɔ kpee lɛ gbi ni ji enyɔ lɛ hiɛ saneyitso ni ji “Nyɛnáa Ekãa yɛ Ekpakpafeemɔ He.” (1 Petro 3:13) Klɛŋklɛŋ wielɔ lɛ kɛ wɔ susu gbi lɛ Biblia ŋmalɛ lɛ he. Ema nɔ mi akɛ, daa gbi ŋmalɛ ni asusuɔ he daa ni shishinumɔ yɔɔ he lɛ haa ekãa ni wɔyɔɔ lɛ mli waa.

No sɛɛ lɛ, akɛ wiemɔ ni ahaa kɛtsaraa nɔ ni ji “Maŋtsɛyeli Jajelɔi ni Woɔ Amɛsɔɔmɔ lɛ Hiɛ Nyam” lɛ ha. Klɛŋklɛŋ fã lɛ ma bɔ ni ehe hiaa ni aja Nyɔŋmɔ Wiemɔ lɛ mli pɛpɛɛpɛ lɛ nɔ mi. (2 Timoteo 2:15) Biblia lɛ ni wɔkɛaatsu nii jogbaŋŋ lɛ gbeleɔ gbɛ koni ‘ená hewalɛ’ yɛ gbɔmɛi ashihilɛ ‘nɔ.’ (Hebribii 4:12) Esa akɛ wɔgbala mɛi ajwɛŋmɔ kɛya Biblia lɛ nɔ, ni wɔkɛsusu nii ahe bɔ ni ebaakɔne mɔ yiŋ. Wiemɔ ni ahaa kɛtsaraa nɔ lɛ fã ni ji enyɔ lɛ wo wɔ hewalɛ koni wɔsaa wɔya mɛi ni yɔɔ wiemɔ lɛ he miishɛɛ lɛ aŋɔɔ shii abɔ. (1 Korintobii 3:6) Hesaamɔ kɛ ekãafeemɔ he miihia koni asaa aya mɛi fɛɛ ni yɔɔ wiemɔ lɛ he miishɛɛ lɛ aŋɔɔ amrɔ nɔŋŋ. Fã ni ji etɛ lɛ wo ŋaa koni wɔbu mɔ fɛɛ mɔ ni wɔkɛkpeɔ lɛ akɛ mɔ ko ni baanyɛ atsɔ kaselɔ, ni etsɔɔ mli akɛ hegbɛ ni wɔkɛaaha koni wɔkɛ mɛi afee Biblia mli nikasemɔ yɛ klɛŋklɛŋ saramɔ lɛ mli lɛ baanyɛ eha wɔná mlifilimɔ ni jɛɔ yelikɛbuamɔ ni akɛhaa aŋkroaŋkroi koni amɛtsɔmɔ kaselɔi lɛ mli baa lɛ.

“Nɔ Hewɔ ni Esa akɛ ‘Asɔle ni Akafɔ̃ɔ’” ji wiemɔ ni nyiɛ sɛɛ lɛ saneyitso. Biblia lɛ woɔ Kristofoi hewalɛ koni amɛkwɛ Nyɔŋmɔ gbɛ kɛha gbɛtsɔɔmɔ yɛ shihilɛ gbɛ̀i srɔtoi fɛɛ mli. Ehe miihia ni wɔto be kɛha teemɔŋ sɔlemɔ. Kɛfata he lɛ, esa akɛ wɔfĩ shi shiŋŋ yɛ sɔlemɔ mli, ejaakɛ ekolɛ Yehowa baaha wɔya nɔ wɔsɔle kɛyashi be ko dani hetoo ni ekɛbaaha lɛ baafee faŋŋ.—Yakobo 4:8.

Wiemɔ ni ji “Mumɔŋ Sanegbaa Tswaa Mɔ Emaa Shi” lɛ wo wɔ hewalɛ koni wɔkɛ wɔwiemɔ ni ji nikeenii lɛ atsu nii koni wɔ kɛ mɛi krokomɛi aná he sɛɛ. (Filipibii 4:8) Ehe miihia ni gbalashihilɛ mli hefatalɔi kɛ gbekɛbii aná mumɔŋ sanegbaa ko daa gbi. Enɛ hewɔ lɛ, esa akɛ kɛ hoo kwraa lɛ wekui abɔ mɔdɛŋ ni amɛfee ekome kɛye niyenii kutuu shikome gbi fɛɛ gbi, koni no aŋmɛ gbɛ kɛha sanegbaa ni tswaa mɔ emaa shi.

Leebi wiemɔ gbɛjianɔtoo lɛ ba naagbee kɛ wiemɔ ni taa mɔ tsuiŋ ni ji “Bɔ ni Henɔjɔɔmɔ kɛ Baptisimɔ kɛ Mɔ Yaa Yiwalaheremɔ Mli.” Mɛi ni abaabaptisi amɛ lɛ ená nilee, hemɔkɛyeli, amɛtsake amɛtsui, amɛje gbɛ fɔŋ nɔ, ni amɛjɔɔ amɛhe nɔ amɛha Nyɔŋmɔ. Wielɔ lɛ kɛɛ akɛ, kɛ́ abaptisi amɛ lɛ, esa akɛ amɛya nɔ amɛdara yɛ mumɔŋ ni amɛhiɛ amɛ emuuyeli kɛ jeŋba kpakpa lɛ mli.—Filipibii 2:15, 16.

Nakai shwane lɛ, ama saji otii enyɔ komɛi anɔ mi yɛ wiemɔ ni ji “Bá Ohe Shi, ni Oha Ohiŋmɛi Nɔ Atse” lɛ mli. Heshibaa tsɔɔ akɛ ni wɔɔyɔse he ni wɔnyɛmɔi yashɛɔ kɛ gbɛhe ni wɔyɔɔ yɛ Nyɔŋmɔ hiɛ lɛ. Heshibaa yeɔ ebuaa wɔ koni wɔha wɔhiŋmɛi ‘nɔ atse’ be fɛɛ be—ni wɔkɛ wɔjwɛŋmɔ ama Nyɔŋmɔ Maŋtsɛyeli lɛ nɔ, shi jeee heloonaa nibii anɔ. Kɛ wɔfee enɛ lɛ, ehe ehiaaa ni wɔfee yeyeeye, ejaakɛ Yehowa baaha wɔ nibii ni he hiaa wɔ.—Mateo 6:22-24, 33, 34.

Wielɔ ni nyiɛ sɛɛ lɛ tsɔɔ nɔ hewɔ ni esa akɛ “Okɛ Ohiɛ Afɔ̃ Yehowa Nɔ Kwraa yɛ Haomɔ Bei Amli.” Te wɔɔfee tɛŋŋ wɔdamɔ nibii ni tamɔ nɛkɛ ni ji mɔ diɛŋtsɛ gbɔjɔmɔ kɛ shika he gbɛjianɔtoo loo hela mli naagbai lɛ anaa? Nyɛhaa wɔbia Yehowa koni eha wɔ anɔkwa nilee ni wɔbi mɛi krokomɛi adɛŋ yelikɛbuamɔ. Yɛ nɔ najiaŋ ni wɔɔŋmɛ gbɛ ni wɔha tsuifaa loo nijiaŋwujee aná wɔnɔ hewalɛ lɛ, esa akɛ wɔha hemɔkɛyeli ni wɔyɔɔ yɛ Nyɔŋmɔ mli lɛ mli awa kɛtsɔ e-Wiemɔ lɛ kanemɔ nɔ.—Romabii 8:35-39.

Kpokpaa wulu nɔ kpee lɛ mli wiemɔ ni ahaa kɛtsaraa nɔ lɛ mli naagbee nɔ̃ lɛ hiɛ saneyitso ni ji “Wɔhemɔkɛyeli Salɛ lɛ ni Aka Akwɛ Kɛtsɔ Kaai Srɔtoi Anɔ.” Klɛŋklɛŋ fã lɛ kai wɔ akɛ awaa anɔkwa Kristofoi fɛɛ ayi. Efeɔ odaseyeli, ewajeɔ wɔhemɔkɛyeli, ni ehaa wɔnáa hegbɛ ni wɔkɛaatsɔɔ anɔkwa ni wɔyeɔ Nyɔŋmɔ. Eyɛ mli akɛ wɔfiteee wɔshihilɛi bɔ ni esaaa moŋ, shi wɔkɛ gbɛ ni damɔɔɔ ŋmalɛ nɔ tsuŋ nii kɛtsĩ yiwaa naa kɔkɔɔkɔ.—1 Petro 3:16.

Wiemɔ ni ahaa kɛtsaraa nɔ nɛɛ wielɔ ni ji enyɔ lɛ ha sanebimɔi ni kɔɔ maŋkwramɔŋ saji ni akɛ he wooo mli lɛ he lɛ hetoo. Mra be mli Kristofoi lɛ jeee mɛi ni tutuaa tawuu, shi amɛyɔse akɛ Nyɔŋmɔ ji mɔ ni esa akɛ amɛye lɛ anɔkwa jogbaŋŋ kɛmɔ shi. Nakai nɔŋŋ ŋmɛnɛ, Yehowa Odasefoi kɛ shishitoo mla nɛɛ tsuɔ nii jogbaŋŋ kɛmɔɔ shi, nɔ ni kɛɔ akɛ: “Nyɛjɛɛɛ je lɛŋ.” (Yohane 15:19) Akɛni maŋkwramɔŋ saji ni wɔkɛ wɔhe wooo mli lɛ he kaai baanyɛ ate shi amrɔ nɔŋŋ hewɔ lɛ, esa akɛ wekui lɛ ato be koni amɛtĩ Biblia mli gbɛtsɔɔmɔi ni kɔɔ sane nɛɛ he lɛ mli. Taakɛ wiemɔ ni ahaa kɛtsaraa nɔ nɛɛ mli wiemɔ ni ji etɛ lɛ tsɔɔ mli lɛ, oti ni Satan kɛma ehiɛ lɛ jeee koni ekpata wɔhiɛ diɛŋtsɛ, shi moŋ koni enyɛ wɔnɔ ni wɔkaye anɔkwa. Kɛ wɔkɛ anɔkwayeli ŋmɛ wɔtsui shi yɛ hefɛoyeli, nɔnyɛɛi kɛha jeŋba shara, henumɔŋ piŋmɔ, kɛ helai amli lɛ, wɔkɛ yijiemɔ bahaa Yehowa.

Ninefɔɔ ni miishɛɛ yɔɔ mli ni ji “Tsi Obɛŋkɛ Yehowa” lɛ bafee gbi lɛ naagbee wiemɔ lɛ yitso. Yehowa sui titrii lɛ ashishi ni wɔɔnu lɛ gbalaa wɔ kɛbɛŋkɛɔ lɛ. Ekɛ ehewalɛ ni husu bɛ he lɛ tsuɔ nii kɛbuɔ ewebii ahe, titri lɛ, yɛ mumɔŋ. Ejalɛsaneyeli lɛ bɛ kpɛŋŋ, shi etsirɛɔ lɛ koni eha mɔ fɛɛ mɔ ni tsuɔ jalɛ nii lɛ naanɔ wala. Nyɔŋmɔ nilee lɛ jeɔ kpo faŋŋ yɛ gbɛ ni etsɔ nɔ ekɛ adesai ni yeee emuu lɛ tsu nii kɛŋma Biblia lɛ eha lɛ mli. Nɔ ni gbalaa mɔ fe fɛɛ ji esuɔmɔ ni tsirɛ lɛ koni eto gbɛjianɔ kɛha adesai ayiwalaheremɔ kɛtsɔ Yesu Kristo nɔ lɛ. (Yohane 3:16) Wielɔ lɛ mu naa kɛtsɔ wolo hee ni taa mɔ tsuiŋ ni ji Tsi Obɛŋkɛ Yehowa ni ejie lɛ kpo lɛ nɔ.

Gbi ni Ji Etɛ lɛ Gbalaa Jwɛŋmɔ Kɛyaa Ekãa Kɛha Nitsumɔi Kpakpai Anɔ

Kpokpaa wulu nɔ kpee lɛ gbi ni ji etɛ lɛ saneyitso lɛ ji “Gbɔmɛi ni Yɔɔ Ekãa Kɛha Nitsumɔi Kpakpai.” (Tito 2:14) Aje leebi nifeemɔ lɛ shishi jogbaŋŋ kɛ gbi lɛ ŋmalɛ lɛ ni weku ko kɛ wɔ susu he lɛ. Nɔ ni nyiɛ sɛɛ ji wiemɔ ni ji “Ani Oyɛ Hekɛnɔfɔɔ yɛ Yehowa Mli?” Jeŋmaji lɛ kɛ amɛhe efɔ̃ nɔ kroko ni esaaa nɔ kɛtsɔ amɛ diɛŋtsɛ amɛnilee kɛ hewalɛ ni amɛkɛ amɛhe fɔ̃ɔ nɔ lɛ nɔ. Shi kɛlɛ, nɔ ni tamɔɔɔ nakai lɛ, Yehowa tsuji kɛ amɛhe fɔ̃ɔ enɔ kɛ ekãa kɛ mlifilimɔ yɛ amanehului fɛɛ sɛɛ.—Lala 46:2-4, 8-12.

Fã ni yitso ji “Oblahii kɛ Oblayei—Nyɛkɛ Yehowa Gbɛjianɔtoo lɛ Atoa Wɔsɛɛ Be lɛ He Gbɛjianɔ” lɛ bi sane nɛɛ akɛ: Te oblanyo loo oblayoo aaafee tɛŋŋ ni ená nɔ ni hi fe fɛɛ yɛ shihilɛ mli diɛŋtsɛ lɛ? Nine nyɛŋ ashɛ enɛ nɔ kɛtsɔ shika, heloonaa nibii, kɛ hiɛnyamtaomɔ sɛɛtiumɔ nɔ. Wɔ-Bɔlɔ lɛ jɛɔ suɔmɔ mli ewoɔ oblahii kɛ oblayei hewalɛ koni amɛkai lɛ be mli ni amɛdarako lolo lɛ. Wielɔ lɛ bi mɛi komɛi ni amɛtee hiɛ yɛ Kristofoi asɔɔmɔ lɛ mli yɛ be mli ni amɛji oblahii kɛ oblayei lɛ sane, ni wɔnyɛ wɔna bɔ ni amɛmli fili amɛ amɛha. Ni kwɛ sɛɛnamɔ ni yɔɔ he akɛ nine aaashɛ dɛhiɛmɔ wolo hee ni ji Oblahii kɛ Oblayei—Mɛni Nyɛkɛ Nyɛshihilɛ Baafee? lɛ nɔ, nɔ ni ato he gbɛjianɔ ni eye ebua Odasefoi oblahii kɛ oblayei koni amɛkɛ Yehowa gbɛjianɔtoo lɛ afee shishitoo kpakpa amɛha naanɔ wɔsɛɛ shihilɛ lɛ!

Nifeemɔ ni nyiɛ sɛɛ ji Biblia mli drama ni gbalaa mɔ jwɛŋmɔ waa lɛ ni ji “Nyɛfĩa Shi Shiŋŋ yɛ Haomɔ Bei Amli” lɛ. Etsɔɔ nitsumɔ ni Yeremia kɛ be babaoo tsu kɛjɛ eblahiiaŋ aahu kɛyashi Yerusalem hiɛkpatamɔ ni ekɛ ekãa gba he sane efɔ̃ shi lɛ nɔ. Yeremia susu akɛ ejeee mɔ ni sa kɛha enitsumɔ lɛ, shi etsu he nii beni ateɔ shi awoɔ lɛ lɛ, ni Yehowa jie lɛ.—Yeremia 1:8, 18, 19.

Wiemɔ ni nyiɛ drama lɛ sɛɛ ji “Feemɔ Tamɔ Yeremia—Okɛ Ekãa Ajaje Nyɔŋmɔ Wiemɔ lɛ Otsɔɔ.” Bei pii lɛ, ŋmɛnɛŋmɛnɛ beaŋ Maŋtsɛyeli jajelɔi ji mɛi ni akɛ amale wiemɔi kɛ wiemɔi ni fiteɔ mɔ shiɔ amɛ. (Lala 109:1-3) Shi, taakɛ Yeremia ji lɛ, wɔbaanyɛ wɔtsu nijiaŋwujee he nii kɛtsɔ Yehowa Wiemɔ lɛ he miishɛɛnamɔ nɔ. Ni wɔyɛ nɔmimaa akɛ mɛi ni wuɔ shiɔ wɔ lɛ yeŋ kunim.

Maŋshiɛmɔ ni yitso ji ‘Je Nɛŋ Su lɛ Miitsake’ lɛ ba yɛ ebe naa lɛɛlɛŋ. Tsakemɔ wulu ji nɔ ni ekadi wɔŋmɛnɛŋmɛnɛ be nɛɛ. Biblia lɛ gba efɔ̃ shi akɛ shihilɛi ni tamɔ nɛkɛ, ni nɔ ni fata he ji “hejɔlɛ yɛ ni wɔyɛ shweshweeshwe” he bolɔmɔ lɛ baatée Nyɔŋmɔ kojomɔ gbi ni he yɔɔ gbeyei lɛ shi. (1 Tesalonikabii 5:3) Ekɛ tsakemɔi ni yɔɔ naakpɛɛ baaba—tawuui, basabasafeemɔ, awuiyeli fɛɛ kɛ hela po ni abaafo sɛɛ. Belɛ yɛ nɔ najiaŋ ni okɛ ohe aaafɔ̃ nibii agbɛjianɔtoo nɛɛ nɔ lɛ, be ni okɛaatiu Nyɔŋmɔjamɔ hetuu-kɛhamɔ sɛɛ ni ohiɛ jeŋba ni he tse mli lɛ nɛ.

Nɔ ni nyiɛ otsi lɛ Buu-Mɔɔ nikasemɔ naamuamɔ lɛ sɛɛ ji kpokpaa wulu nɔ kpee lɛ naagbee wiemɔ ni yitso ji, “Nyɛtsua Nitsumɔi Kpakpai Babaoo ákɛ Maŋtsɛyeli Jajelɔi ni Yɔɔ Ekãa.” Wielɔ lɛ tsɔɔ bɔ ni wiemɔ he gbɛjianɔtoo lɛ ekanya wɔ yɛ mumɔŋ eha ni ewo wɔ hewalɛ ni wɔŋɔ wɔhiɛ wɔfɔ̃ Yehowa nɔ. Yɛ naagbee lɛ, awo wɔ hewalɛ koni wɔhe atse, wɔjie suɔmɔ kpo ni wɔtsɔmɔ Nyɔŋmɔ Maŋtsɛyeli jajelɔi ni yɔɔ ekãa.—1 Petro 2:12.

Eka shi faŋŋ akɛ wɔkɛ mumɔ ni tamɔ Yehowa tsuji ni yɔɔ Nehemia gbii lɛ amli lɛ anɔ̃ lɛ ku sɛɛ kɛtee shia be mli ni wɔmli efili wɔ, yɛ mumɔŋ jɔɔmɔi ni wɔnine eshɛ nɔ yɛ “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpeei lɛ ashishi lɛ hewɔ. (Nehemia 8:12) Ani nɛkɛ kpokpaa wulu nɔ kpee ni kanyaa mɔ nɛɛ hako mlifilimɔ kɛ faishitswaa ayi omli obɔ koni oya ohiɛ ákɛ Maŋtsɛyeli jajelɔ ni yɔɔ ekãa?

[Akrabatsa/Mfoniri ni yɔɔ baafa 23]

Nikasemɔ Wolo Hee Ko!

Yɛ kpokpaa wulu nɔ kpee lɛ klɛŋklɛŋ gbi lɛ naagbee lɛ, mɛi ni ba lɛ ná miishɛɛ kɛtsɔ wolo hee ko ni yitso ji Já Anɔkwa Nyɔŋmɔ Kome Lɛ ni ajie lɛ kpo lɛ nɔ. Ato he gbɛjianɔ koni akɛ mɛi ni egbe wolo ni ji Nilee Ni Kɛ Mɔ Yaa Naanɔ Wala Mli wolo lɛ kasemɔ naa lɛ akase, ni ŋwanejee ko bɛ he akɛ ebaaha mɛi ní “ajie ato naanɔ wala” lɛ ahemɔkɛyeli mli awa.—Bɔfoi lɛ Asaji 13:48.

[He ni Sane lɛ Jɛ]

Wolo lɛ hiɛgbɛ mfoniri: U.S. Navy photo

[Akrabatsa/Mfonirii ni yɔɔ baafa 24]

Yelikɛbuamɔ ni Akɛaabɛŋkɛ Nyɔŋmɔ

Kpokpaa wulu nɔ kpee gbi ni ji enyɔ lɛ naagbee wielɔ lɛ tswa wolo hee ni ajie lɛ kpo ni yitso ji Tsi Obɛŋkɛ Yehowa lɛ he adafi. Ehiɛ fãi srɔtoi wuji ejwɛ, eko fɛɛ eko kɛha Yehowa sui titrii lɛ ateŋ ekome—hewalɛ, jalɛsaneyeli, nilee, kɛ suɔmɔ. Wolo lɛ fã fɛɛ fã hiɛ yitso ni tsɔɔ bɔ ni Yesu Kristo fee Nyɔŋmɔ sui lɛ kɛ nitsumɔ he nɔkwɛmɔnii ni mli ka shi faŋŋ. Yiŋtoo titri ni yɔɔ wolo hee nɛɛ sɛɛ ji koni eye ebua wɔ kɛ wɔ Biblia mli nikaselɔi lɛ ni wɔkɛ amɛ fɛɛ atsi abɛŋkɛ Yehowa Nyɔŋmɔ kpaakpa yɛ wekukpaa ni mli wa waa mli.

[Akrabatsa/Mfonirii ni yɔɔ baafa 26]

Mumɔŋ Gbɛtsɔɔmɔ Kɛha Oblahii kɛ Oblayei

Nɔ ni kadi kpokpaa wulu nɔ kpee lɛ gbi ni ji etɛ lɛ ji dɛhiɛmɔ wolo krɛdɛɛ ko ni ajie lɛ kpo ni yitso ji Oblahii kɛ Oblayei—Mɛni Nyɛkɛ Nyɛshihilɛ Baafee? Akɛni ato dɛhiɛmɔ wolo hee nɛɛ he gbɛjianɔ koni eye ebua Odasefoi ni darako koni amɛfee yiŋkpɛi ni ja yɛ amɛwɔsɛɛ be he hewɔ lɛ, ekɛ Ŋmalɛ naa ŋaawoo ni tsɔɔ bɔ ni abaafee aná nitsumɔ ni abaatsu daa yɛ Yehowa sɔɔmɔ mli haa.