Sanebimɔi ni Jɛ Kanelɔi Adɛŋ

Ani esa akɛ Kristofonyo ko ake maŋ nitsulɔ ko nɔ ko yɛ nitsumɔ ni etsu eha lɛ lɛ hewɔ, aloo abaanyɛ abu enɛ akɛ nyɔɔŋnihamɔ?

Kristofoi bɔɔ mɔdɛŋ koni amɛkɛ ŋaalee atsu shihilɛi ni yɔɔ he ni amɛyɔɔ lɛ ahe nii, ni amɛhaa ehiɔ amɛjwɛŋmɔ mli akɛ, nɔ ni akpɛlɛɔ nɔ ní mla hu ŋmɛɔ gbɛ yɛ maŋ ko mli lɛ baanyɛ afee nɔ ni akpɛlɛɛɛ nɔ, ni mla hu eŋmɛɛɛ gbɛ kwraa yɛ maŋ kroko mli. (Abɛi 2:6-9) Yɛ anɔkwale mli lɛ, esa akɛ Kristofonyo aha ehi ejwɛŋmɔ mli be fɛɛ be akɛ mɔ fɛɛ mɔ ni miisumɔ koni ‘ehi Yehowa buu lɛŋ’ lɛ ahi nyɔɔŋnihamɔ.—Lala 15:1, 5; Abɛi 17:23.

Mɛni ji nyɔɔŋnihamɔ? Taakɛ The World Book Encyclopedia lɛ tsɔɔ mli lɛ, “nyɔɔŋnihamɔ tsɔɔ nɔ ko ni jara wa ni akɛaaha loo akɛaake . . . mɔ ko ni yɔɔ hegbɛ, koni eku ehiɛ eshwie mla lɛ loo nɔ ni esa akɛ etsu lɛ nɔ ní ehe aba sɛɛnamɔ kɛha mɔ ni ke lɛ nii lɛ.” No hewɔ lɛ ekɔɔɔ he eko he ni mɔ oyɔɔ, kɛji akɛ oha kojolɔ, polisinyo, loo mɛi ni kwɛɔ koni akɛ mla lɛ atsu nii lɛ shika loo oke amɛ nii koni amɛkaye jalɛ sane, loo ní amɛku amɛhiɛ amɛshwie tɔmɔ loo mla mlikuu ko nɔ lɛ, eji nyɔɔŋnihamɔ. Eji nyɔɔŋnihamɔ hu akɛ wɔɔke nii koni akɛ wɔ aye jogbaŋŋ, ákɛ nɔkwɛmɔnɔ lɛ koni akɛ wɔgbɛi aye mɛi ni yɔɔ he ko momo lɛ anɔ hiɛ loo aha wɔbaye mɛi ni eto srɛnɛɛ lɛ ahiɛ. Nifeemɔ ni tamɔ nɛkɛ baatsɔɔ hu akɛ wɔbɛ suɔmɔ.—Mateo 7:12; 22:39.

Shi ani eji nyɔɔŋnihamɔ akɛ mɔ ko aaake maŋ nitsulɔ ko nii loo eha lɛ shika koni etsu nii jogbaŋŋ eha lɛ loo ni mɔ lɛ kɛ lɛ akaye yɛ gbɛ gbonyo nɔ? Ákɛ nɔkwɛmɔnɔ lɛ, yɛ maji komɛi amli lɛ kɛ́ ahaaa onukpai lɛ nɔ ko lɛ, ekolɛ amɛbasumɔŋ akɛ amɛaahe gbekɛbii lɛ yɛ skul, amɛhé mɔ amɛfɔ shi yɛ helatsamɔhe, loo ni amɛkadi woji ni baaha mɔ anyɛ ahi maŋ ko mli lɛ nɔ. Loo amɛbaagbala gbɛŋmɛɛ woji ni asaa afeɔ lɛ ehee lɛ afeemɔ sɛɛ.

Bɔ ni mɛi feɔ amɛnii amɛhaa yɛ nikee ni tamɔ nɛkɛ he lɛ yɛ srɔto yɛ he fɛɛ he. Yɛ hei ni nikee ni tamɔ nɛkɛ lɛ ji nɔ ni akpɛlɛɔ nɔ loo akpaa gbɛ lɛ, ekolɛ Kristofoi komɛi baanu he akɛ kɛ́ amɛke onukpa ko nii koni etsu nɔ ko lɛ, no etsɔɔɔ akɛ amɛmiiku Biblia shishitoo mlai amli, akɛni eteee shi ewooo maŋ lɛ mla hewɔ. Yɛ hei komɛi lɛ, ekolɛ mɛi komɛi baabu nikeei nɛɛ akɛ shika ni amɛkeɔ maŋ nitsulɔ lɛ koni ekɛfata enyɔmɔwoo ni faaa lɛ he. Ha ehi ojwɛŋmɔ mli akɛ srɔtofeemɔ yɛ nii ni akeɔ yɛ nitsumɔ ni atsu yɛ mla naa lɛ, kɛ nyɔɔŋnii ni ahaa koni atsu nitsumɔ ni kɛ mla kpaaa gbee lɛ teŋ.

Yɛ gbɛ kroko nɔ lɛ, kɛ́ Yehowa Odasefoi lɛ ateŋ mɛi komɛi miibi koni atsu mla naa nɔ ko aha amɛ lɛ, amɛkpooɔ akɛ amɛaake mɛi ni kwɛɔ koni aye mla lɛ nɔ, mɛi ni kwɛɔ gbɛfalɔi anibii amli, loo nitsulɔi krokomɛi anii, kɛ́ afɔɔ nikeei ni tamɔ nɛkɛ po. Akɛni ale Odasefoi lɛ yɛ he ni amɛyɔɔ lɛ akɛ amɛkɛ shiŋŋfeemɔ tsuɔ enɛ he nii, ni amɛyeɔ anɔkwa hewɔ lɛ, bei komɛi lɛ afeɔ nibii ni mɛi keɔ nii dani amɛnine shɛɔ nɔ lɛ ahaa amɛ.—Abɛi 10:9; Mateo 5:16.

Kɛ́ wɔbaafo lɛ kuku lɛ, esa akɛ Yehowa tsulɔ fɛɛ tsulɔ diɛŋtsɛ akpɛ eyiŋ kɛji akɛ ebaake nɔ ko koni atsu nii jogbaŋŋ aha lɛ loo ní akɛ lɛ akaye yɛ gbɛ gbonyo nɔ. Nɔ ni he hiaa fe fɛɛ lɛ, esa akɛ efee nii ni gbaŋ ehenilee kpakpa lɛ naa, ní egbeŋ Yehowa gbɛi lɛ he guɔ, ní etɔtɔŋ mɛi krokomɛi anane.—Mateo 6:9; 1 Korintobii 10:31-33; 2 Korintobii 6:3; 1 Timoteo 1:5.