Yehowa Wiemɔ lɛ Hiɛ Kã

Ezra Wolo lɛ Mli Saji Otii

KRONIKA Wolo ni Ji Enyɔ lɛ mli saji lɛ anɔtsamɔ yɔɔ Ezra wolo ni yɔɔ Biblia lɛ mli lɛ mli. Mɔ ni ŋma Ezra wolo lɛ ji osɔfo Ezra, ni akpɔ ko ni Persia Maŋtsɛ Koresh wo, ní no ha Yudafoi nomii ni eshwɛ yɛ Babilon lɛ ná hegbɛ amɛku amɛsɛɛ kɛtee amɛjakumaŋ lɛ ji nɔ ni ekɛje saji ni eŋmala lɛ shishi. Gbɛjianɔ ni Ezra to koni etsuu mɛi ni kɛ shikpɔŋ nɔ bii lɛ ebule amɛhe lɛ he sane ji nɔ ni ekɛmu emaniɛbɔɔ lɛ naa. Wolo lɛ ŋmaa hé afii 70—kɛjɛ afi 537 D.Ŋ.B. kɛyashi afi 467 D.Ŋ.B.

Yiŋtoo hewɔ ni Ezra ŋma wolo lɛ ji akɛ: koni eha ana gbɛ nɔ ni Yehowa tsɔ eye E-shiwoo akɛ E-baakpɔ̃ E-webii lɛ kɛjɛ Babilon nomŋɔɔ mli, ni E-ha amɛto anɔkwa jamɔ amɛma shi ekoŋŋ yɛ Yerusalem lɛ nɔ. No hewɔ lɛ, nibii ni tee nɔ ní kɔɔ nakai shiwoo lɛ he lɛ pɛ ahe saji Ezra wie. Ezra wolo lɛ bɔɔ wɔ gbɛ ni Nyɔŋmɔ webii lɛ tsɔ nɔ amɛma sɔlemɔwe lɛ ehee, kɛ bɔ ni fee ni amɛto Yehowa jamɔ shishi ekoŋŋ yɛ shitee-kɛwoo ni amɛkɛkpe kɛ emuu hu ni amɛyeee lɛ fɛɛ sɛɛ lɛ he amaniɛ. Wɔyɛ saji nɛɛ ahe miishɛɛ ejaakɛ wɔ hu wɔyɛ be ni abaasaa nibii ekoŋŋ lɛ mli. Mɛi babaoo miiho kɛmiiba “Yehowa gɔŋ lɛ” he, ni etsɛŋ ni “shikpɔŋ lɛ nɔ aaayi tɔ kɛ Yehowa anunyam lɛ lee.”—Yesaia 2:2, 3; Habakuk 2:14.

AMA SƆLEMƆWE LƐ EHEE

(Ezra 1:1–6:22)

Yɛ heyeli he akpɔ ni Koresh wo lɛ naa lɛ, Amralo Zerubabel loo Sheshbazar nyiɛ Yudafoi nomii aaafee 50,000 ahiɛ kɛku amɛsɛɛ kɛtee Yerusalem. Nomii ni ku amɛsɛɛ lɛ ahe fee oya kɛma afɔleshãalatɛ yɛ emaa he lɛ, ni amɛbɔi afɔlei shãa kɛha Yehowa.

Enɔ afi lɛ, Israelbii lɛ to Yehowa we lɛ shishi. Henyɛlɔi tee nɔ amɛgba amɛnaa yɛ tsũ hee ni amɛmaa lɛ hewɔ, ni naagbee lɛ, henyɛlɔi nɛɛ tsɔ gbɛ ko nɔ amɛha maŋtsɛ ko fã ni akpa tsũ lɛ maa. Eyɛ mli ákɛ akɛ nine fɔ̃ sɔlemɔwe lɛ maa nɔ moŋ, shi gbalɔi ni ji Hagai kɛ Zakaria wo maŋbii lɛ hewalɛ koni amɛyatsa nɔ amɛma. Beni amɛtsaa nitsumɔ lɛ nɔ lɛ, amɛhenyɛlɔi lɛ na, shi amɛnyɛɛɛ amɛyatsĩ nitsulɔi lɛ anaa, ejaakɛ amɛshe gbeyei akɛ kɛji amɛfee nakai lɛ, no baatsɔɔ akɛ amɛmiite shi amɛmiiwo akpɔ ni Koresh wo kɛtsɔ hiɛ yɛ Persia, ní mɔ ko bɛ hegbɛ akɛ etsakeɔ lɛ. Nibii amli ni maŋ onukpai lɛ bote lɛ ha amɛyana akpɔ ni Koresh wo yɛ “Nyɔŋmɔ we ni yɔɔ Yerusalem lɛ he.” (Ezra 6:3) No sɛɛ lɛ, nitsumɔ lɛ tee nɔ jogbaŋŋ kɛyashi agbe tsũ lɛ naa.

Ŋmalɛ Naa Sanebimɔi ni Aha Hetoo:

1:3-6—Ani Israelbii ni ekuuu amɛsɛɛ kɛyaaa amɛjakumaŋ lɛ anifeemɔ lɛ tsɔɔ akɛ amɛgbɔjɔ yɛ hemɔkɛyeli mli? Ekolɛ amɛteŋ mɛi komɛi ekuuu amɛsɛɛ kɛyaaa Yerusalem yɛ heloonaa nibii asɛɛ ni amɛyadi kɛ hiɛsɔɔ hu ni amɛyanáaa amɛhaaa anɔkwa jamɔ lɛ hewɔ, shi jeee nakai sane lɛ ji yɛ amɛteŋ mɛi ni ekuuu amɛsɛɛ lɛ fɛɛ agbɛfaŋ. Klɛŋklɛŋ lɛ, nakai gbɛ ni afã kɛtee Yerusalem lɛ jɛkɛmɔ ji kilomitai 1,600, ni ehé mɛi ni tee lɛ aaafee nyɔji ejwɛ loo enumɔ dani amɛyashɛ. Kɛfata he lɛ, ebaabi koni mɛi ni baayahi shikpɔŋ ni ekã shi amaŋfɔ afii 70 lɛ nɔ, ní amɛye amɛbua kɛtsu nii lɛ afee mɛi ni yɔɔ gbɔmɔtsoŋ hewalɛ. No hewɔ lɛ, ekã shi faŋŋ akɛ nibii tamɔ hela, gbɔlɛ, kɛ weku sɔ̃i ahe nitsumɔ eyahaaa amɛteŋ mɛi komɛi anyɛ aku amɛsɛɛ kɛya amɛmaŋ.

2:43—Namɛi ji sɔlemɔwe sɔɔlɔi (Netinim) lɛ? Amɛji mɛi ni sɔmɔ yɛ sɔlemɔwe lɛ, shi amɛjeee Israelbii. Amɛteŋ mɛi komɛi ji Gibeonbii ni hi shi yɛ Yoshua gbii lɛ amli lɛ aseshibii, ni mɛi krokomɛi hu ji sɔɔlɔi “ní David kɛ lumɛi lɛ ŋɔ amɛ eha ni amɛsɔmɔ Levibii lɛ” aseshibii.—Ezra 8:20.

2:55—Namɛi ji Salomo tsuji abii lɛ? Amɛjeee Israelbii, shi akɛ hegbɛi krɛdɛɛi komɛi wo amɛdɛŋ koni amɛtsu he nii yɛ Yehowa sɔɔmɔ mli. Ekolɛ amɛtsu nii akɛ woloŋmalɔi loo mɛi ni kwɛ woji ni aŋmala lɛ anɔ ni amɛŋmala ekomɛi amɛshwie shi, aloo amɛfata mɛi ni kwɛɔ nii ni atsuɔ yɛ sɔlemɔwe lɛ nɔ lɛ ahe.

2:61-63—Ani nomii ni ku amɛsɛɛ lɛ kɛ urim kɛ tumim ni atsɔɔ nɔ abiɔ Yehowa susumɔ yɛ sane ko he lɛ tsu nii? Kulɛ abaanyɛ akɛ urim kɛ tumim lɛ atsu nii ni akɛna kɛji akɛ nɔ ni mɛi ni kɛɛ amɛjɛ osɔfoyeli wekui amli shi anaaa wolo ni amɛweku lɛ gbɛi yɔɔ mli lɛ wieɔ lɛ ji anɔkwale. Ezra tsĩ tã akɛ no ji gbɛ kome ni abaanyɛ atsɔ nɔ ana sane lɛ naa. Nɔ ko kwraa bɛ Ŋmalɛi lɛ amli ni tsɔɔ ákɛ akɛ urim kɛ tumim lɛ tsu nii yɛ nakai beaŋ kɛ yɛ no sɛɛ fɛɛ hu. Yudafoi ablema saji tsɔɔ ákɛ akɛ urim kɛ tumim lɛ kpa nitsumɔ beni akpata sɔlemɔwe lɛ hiɛ yɛ afi 607 D.Ŋ.B.

3:12—Mɛni hewɔ “hiimeji ní na klɛŋklɛŋ shia” ni ama aha Yehowa lɛ jwa yaafo lɛ? Nakai hiimeji lɛ kai bɔ ni sɔlemɔwe ni Salomo ma lɛ yɔɔ nyam ha lɛ. Sɔlemɔwe hee lɛ shishitoo nɔ̃ lɛ “jeee nɔ ko yɛ [amɛ]hiŋmɛii amli” kɛ́ amɛkɛto tsutsu nɔ̃ lɛ he. (Hagai 2:2, 3) Ani amɛ mɔdɛŋbɔɔ baanyɛ aha sɔlemɔwe hee lɛ afee nɔ ni yɔɔ nyam tamɔ tsutsu nɔ̃ lɛ? Ekolɛ enɛ hesusumɔ kumɔ hiimeji lɛ atsui, ni no ha amɛjwa yaafo lɛ.

3:8-10; 4:23, 24; 6:15, 16—Afii enyiɛ aye ni akɛma sɔlemɔwe hee lɛ? Ato sɔlemɔwe lɛ shishi beni ‘amɛku amɛsɛɛ amɛba lɛ nɔ afi ni ji enyɔ lɛ’ mli, yɛ afi 536 D.Ŋ.B. Akpa tsũ lɛ maa fioo yɛ Maŋtsɛ Artashasta gbii lɛ amli yɛ afi 522 D.Ŋ.B. Akɛ nine fɔ̃ nitsumɔ lɛ nɔ kɛyashi Maŋtsɛ Dario nɔyeli afi ni ji enyɔ lɛ nɔ yɛ afi 520 D.Ŋ.B. Agbe sɔlemɔwe lɛ maa naa yɛ enɔyeli afi ni ji ekpaa lɛ mli aloo yɛ afi 515 D.Ŋ.B. (Kwɛmɔ akrabatsa ni yitso ji “Persia Maŋtsɛmɛi ní Ye Nɔ Kɛjɛ Afi 537 D.Ŋ.B. Kɛyashi Afi 467 D.Ŋ.B.” lɛ mli.) No hewɔ lɛ, sɔlemɔwe lɛ maa hé aaafee afii 20.

4:8–6:18—Aŋmala ŋmalɛ kukuji nɛɛ yɛ Aramaik wiemɔ mli. Mɛni ha eba lɛ nakai? Saji ni yɔɔ ŋmalɛi kukuji nɛɛ amli kpotoo ji woji ni nɔyeli mli onukpai ŋmala kɛyaha maŋtsɛmɛi, kɛ nɔ ni maŋtsɛmɛi lɛ hu ŋmala amɛ. Woji nɛɛ ní akɛto maŋ wojiatoohe lɛ anɔ Ezra kwɛ eŋmala amɛmli saji lɛ eshwie shi, ni aŋmala nakai woji lɛ yɛ Aramaik wiemɔ ni ji wiemɔ ni akɛtsu nii yɛ jarayeli kɛ nɔyelii awoji aŋmalamɔ mli yɛ nakai beaŋ lɛ mli. Aŋmala Biblia fãi komɛi tamɔ Ezra 7:12-26, Yeremia 10:11, kɛ Daniel 2:4b–7:28 lɛ hu yɛ nakai blema Aramaik wiemɔ lɛ mli.

Nibii ni Wɔkaseɔ Kɛjɛɔ Mli:

1:2. Nibii ni Yesaia tsɔ hiɛ egba efɔ̃ shi aaafee afii 200 lɛ ba mli. (Yesaia 44:28) Gbalɛi ni yɔɔ Yehowa Wiemɔ lɛ mli lɛ ateŋ eko bɛ ni baŋ mli.

1:3-6. Taakɛ eba lɛ yɛ Israelbii ni tee nɔ amɛhi shi yɛ Babilon lɛ agbɛfaŋ lɛ, Yehowa Odasefoi lɛ ateŋ mɛi babaoo nyɛɛɛ amɛkɛ amɛhe awo be-fɛɛ sɔɔmɔ nitsumɔ lɛ mli, aloo amɛsɔmɔ yɛ hei ni hiamɔ lɛ da yɛ. Kɛlɛ, amɛyeɔ amɛbuaa mɛi ni nyɛɔ nakai amɛfeɔ lɛ, ni amɛwoɔ amɛ hewalɛ, ni asaŋ amɛjɛɔ amɛsuɔmɔ mli amɛtsuɔ onia koni akɛlɛɛ Maŋtsɛyeli shiɛmɔ kɛ kaselɔfeemɔ nitsumɔ lɛ mli.

3:1-6. Nomii anɔkwafoi ni ku amɛsɛɛ lɛ shã amɛ klɛŋklɛŋ afɔle yɛ afi 537 D.Ŋ.B. nyɔŋ ni ji kpawo lɛ nɔ (Tishri nyɔŋ lɛ gbeɔ September kɛmɔ October). Babilonbii lɛ bote Yerusalem yɛ afi 607 D.Ŋ.B. yɛ nyɔŋ ni ji enumɔ lɛ nɔ (Ab nyɔŋ lɛ gbeɔ July kɛmɔ August), ni nyɔji enyɔ sɛɛ lɛ, akpata maŋ lɛ hiɛ. (2 Maŋtsɛmɛi 25:8-17, 22-26) Yerusalem kã shi amaŋfɔ afii 70 taakɛ agba afɔ̃ shi lɛ pɛpɛɛpɛ. (Yeremia 25:11; 29:10) Gbalɛi ni yɔɔ Yehowa Wiemɔ lɛ mli lɛ baa mli yɛ amɛbei naa pɛpɛɛpɛ.

4:1-3. Nomii anɔkwafoi lɛ ná hegbɛ akɛ amɛ kɛ apasa jálɔi aaafee jamɔŋ kpaŋmɔ, shi amɛkpoo. (2 Mose 20:5; 34:12) Nakai nɔŋŋ Yehowa jálɔi ni yɔɔ ŋmɛnɛ lɛ hu kɛ amɛhe wooo futufutu hemɔkɛyeli kuu ko mli.

5:1-7; 6:1-12. Yehowa baanyɛ ekudɔ saji bɔni afee ni ewebii aye kunim.

6:14, 22. Mɛi ni kɛ ekãa tsuɔ Yehowa nitsumɔ lɛ náa ehiɛ duromɔ, ni ejɔɔ amɛ hu.

6:21. Bɔ ni no mli lɛ Yehowa nitsumɔ lɛ yaa hiɛ ní Samariabii ni yɔɔ Yudafoi lɛ ajakumaŋ lɛ mli, kɛ nomii ni kɛ amɛhe yawo wɔŋjamɔ nifeemɔi amli lɛ na lɛ, ye bua amɛ ni amɛfee tsakemɔi ni he hiaa ni amɛfee yɛ amɛshihilɛ mli lɛ. Ani esaaa akɛ wɔkɛ ekãa tsuɔ nitsumɔ ni Nyɔŋmɔ kɛwo wɔdɛŋ, ní Maŋtsɛyeli shiɛmɔ nitsumɔ lɛ hu fata he lɛ he nii?

EZRA TEE YERUSALEM

(Ezra 7:1–10:44)

Be ni wɔwieɔ he nɛɛ, no mli lɛ afii 50 eho kɛjɛ be ni ajɔɔ Yehowa shia hee lɛ nɔ. Ni afi lɛ ji afi 468 D.Ŋ.B. Ezra ŋɔ Nyɔŋmɔ webii ni shwɛ yɛ Babilon lɛ ateŋ mɛi komɛi efata ehe ni amɛŋɔ onia ni nomii ni yɔɔ jɛmɛ lɛ tsu lɛ, ni amɛyiŋ kɛtee Yerusalem. Mɛni eyana yɛ jɛmɛ?

Onukpai lɛ kɛɛ Ezra akɛ: “Israel maŋ lɛ kɛ osɔfoi lɛ kɛ Levibii tseko amɛhe kɛjɛko shikpɔji lɛ anɔ bii lɛ ahe, yɛ amɛnihii nii ní amɛfeɔ lɛ agbɛfaŋ.” Kɛfata he lɛ, “onukpai lɛ kɛ nɔyelɔi lɛ anine yɔɔ mli ni afá yɛ nɛkɛ mlatɔ̃mɔ nɛɛ mli.” (Ezra 9:1, 2) Ezra he jɔ̃ ehe. Awo lɛ hewalɛ koni “[e]ná nuu tsui ni efee!” (Ezra 10:4) Ezra to gbɛjianɔ ni ejaje nibii, ni gbɔmɛi lɛ hu fĩ esɛɛ.

Ŋmalɛ Naa Sanebimɔi ni Aha Hetoo:

7:1, 7, 11—Ani Artashasta ni ŋmalɛi kukuji nɛɛ fɛɛ wieɔ ehe lɛ ji mɔ ni kɛ enine fɔ̃ sɔlemɔwe lɛ maa lɛ nɔ lɛ? Dabi. Artashasta ji gbɛi loo sabala ni akɛtsɛ́ɔ Persia maŋtsɛmɛi enyɔ komɛi. Amɛteŋ mɔ ni kɛ enine fɔ̃ sɔlemɔwe lɛ maa nɔ yɛ afi 522 D.Ŋ.B. lɛ gbɛi diɛŋtsɛ ji Bardiya loo Gaumata. Artashasta ni yeɔ nɔ beni Ezra tee Yerusalem lɛ ji Artashasta Longimanus.

7:28–8:20—Mɛni hewɔ Yudafoi ni yɔɔ Babilon lɛ ateŋ mɛi babaoo eyanáaa he miishɛɛ akɛ amɛaafata Ezra he kɛya Yerusalem lɛ? Eyɛ mli akɛ afii 60 eho kɛjɛ be ni Yudafoi lɛ ateŋ mɛi ni shi klɛŋklɛŋ kɛtee amɛjakumaŋ lɛ shi moŋ, shi no mli lɛ mɛi komekomei pɛ yɔɔ Yerusalem. Ni tsɔɔ akɛ amɛsɛɛ ní amɛbaaku kɛya Yerusalem lɛ baabi ni amɛyaje shihilɛ shishi ehee yɛ shihilɛi ni mli wawai ni yɔɔ oshara hu mli. Ni no mli hu lɛ, Yerusalem maŋ lɛ mli hilɛ efeee Yudafoi ni yɔɔ Babilon ni ekolɛ amɛmiishwere yɛ jɛmɛ lɛ akɔnɔ ejaakɛ nibii bɛ maŋ lɛ mli. Gbɛ ni atsɔɔ nɔ kɛyaa lɛ hu nɔ yɛ oshara. No hewɔ lɛ, dani mɛi ni baaku amɛsɛɛ lɛ baanyɛ ashi lɛ, ebaabi ni amɛfee mɛi komɛi ni yɔɔ hemɔkɛyeli ni mli wa yɛ Yehowa mli, ní hiɛ dɔɔ yɛ anɔkwa jamɔ mli, ní asaŋ amɛyɔɔ ekãa. Ezra po waje ehe kɛtsɔ Yehowa dɛŋ yelikɛbuamɔ nɔ. Yɛ hewalɛ ni Ezra wo mɛi lɛ hewɔ lɛ, wekui 1,500 ní ekolɛ mɛi aaafee 6,000 yɔɔ mli kpɛlɛ akɛ amɛbaaku amɛsɛɛ kɛya amɛjakumaŋ. Ezra to gbɛjianɔ kroko, ni yɛ nakai gbɛjianɔtoo lɛ sɛɛ lɛ, Levibii 38 kɛ sɔlemɔwe sɔɔlɔi (Netinim) 220 hu kpɛlɛ akɛ amɛbaaku amɛsɛɛ.

9:1, 2—Mɛni hewɔ eyɔɔ oshara waa ákɛ amɛ kɛ shikpɔŋ lɛ nɔ bii lɛ aaabote gbalashihilɛ mli lɛ? Esa akɛ maŋbii ni kuɔ sɛɛ kɛyaa amɛshikpɔŋ nɔ lɛ atsu Yehowa anɔkwa jamɔ he nii kɛyashi Mesia lɛ baaba. No hewɔ lɛ, eyɛ oshara waa ákɛ amɛ kɛ shikpɔŋ nɔ bii krokomɛi aaabote gbalashihilɛ mli. Akɛni amɛteŋ mɛi komɛi kɛ wɔŋjalɔi bote gbalashihilɛ mli hewɔ lɛ, yɛ naagbee mli aahu lɛ, maŋ muu lɛ fɛɛ kɛ wɔŋjalɔi amaji lɛ baafee ekome. Ni nɔ ni baajɛ mli aba ji akɛ, anɔkwa jamɔ baalaaje kwraa yɛ shihilɛ mli. Kɛ́ eba lɛ nakai lɛ, namɛi ahewɔ Mesia lɛ baaba? No hewɔ lɛ, ebɛ naakpɛɛ akɛ shihilɛ ni Ezra yana lɛ ha ehe jɔ̃ ehe!

10:3, 44—Mɛni hewɔ amɛshwie amɛŋamɛi lɛ kɛ bii ni amɛ kɛ amɛ fɔ́ lɛ fɛɛ lɛ? Eji amɛshwie amɛŋamɛi lɛ pɛ kulɛ, yei nɛɛ baanyɛ aku amɛ sɛɛ aba ákɛ amɛmiiba koni amɛbakwɛ amɛbii lɛ. Kɛfata he lɛ, bii lɛ anyɛmɛi ji mɛi titri ni baanyɛ amɛkɛ kwɛmɔ ni he hiaa amɛbii lɛ aha amɛ.

Nibii ni Wɔkaseɔ Kɛjɛɔ Mli:

7:10. Ezra fee nɔkwɛmɔnɔ kpakpa efɔ̃ shi eha wɔ ákɛ mɔ ko ni kɛ hiɛdɔɔ kaseɔ Nyɔŋmɔ Wiemɔ lɛ, ni ehe esa hu kɛ mɛi krokomɛi anitsɔɔmɔ. Esɔle kɛsaa etsui ákɛ ebaatao Yehowa Mla lɛ sɛɛ. Kɛ́ Ezra miikase Mla lɛ, ekɛ ejwɛŋmɔ fɛɛ maa nɔ ni Yehowa kɛɔ lɛ nɔ. Ezra kɛ nibii ni ekase lɛ tsu nii, ni emia ehiɛ etsɔɔ mɛi krokomɛi.

7:13. Yehowa sumɔɔ koni mɛi ajɛ amɛsuɔmɔ mli amɛsɔmɔ lɛ.

7:27, 28; 8:21-23. Ezra jie Yehowa yi, ni dani ebaafã gbɛ ni yɔɔ tɔlɛ kɛ oshara kɛya Yerusalem lɛ, esɔle ekpa lɛ fai kɛha hebuu, ni ekɛ ewala po wo oshara mli bɔni afee ni awo Nyɔŋmɔ hiɛ nyam. Etsɔ nɛkɛ gbɛ nɔ efee nɔkwɛmɔnɔ kpakpa eha wɔ.

9:2. Esa akɛ wɔkɛ hiɛdɔɔ atsu ŋaa ni awoɔ wɔ koni wɔbote gbalashihilɛ mli “yɛ Nuŋtsɔ lɛ [pɛ] mli” lɛ he nii.—1 Korintobii 7:39.

9:14, 15. Naanyobɔɔ fɔŋ baanyɛ aha mɔ hiɛ akaba nyam yɛ Yehowa hiɛ.

10:2-12, 44. Mɛi ni kɛ maŋsɛɛ yei hi shi lɛ jɛ heshibaa mli amɛtsake amɛtsui, ni amɛjaje gbɛ fɔŋ ni amɛkɔ lɛ. Su ní amɛjie lɛ kpo kɛ nɔ ni amɛfee lɛ sa kasemɔ.

Yehowa Yeɔ Eshiwoi Anɔ

Kwɛ bɔ ni Ezra wolo lɛ he yɔɔ sɛɛnamɔ kɛha wɔ! Yehowa ye eshiwoo lɛ nɔ yɛ be naa pɛpɛɛpɛ, ni ekpɔ̃ ewebii lɛ kɛjɛ Babilon nomŋɔɔ mli ni eha amɛyato anɔkwa jamɔ shishi ekoŋŋ yɛ Yerusalem. Ani enɛ haaa hemɔkɛyeli ni wɔyɔɔ yɛ Yehowa kɛ eshiwoi lɛ amli lɛ mli awa?

Susumɔ nɔkwɛmɔnii kpakpai ni yɔɔ Ezra wolo lɛ mli lɛ ahe okwɛ. Ezra kɛ nomii ni shwɛ lɛ ateŋ mɛi ni ku amɛsɛɛ koni amɛyato anɔkwa jamɔ amɛma shi ekoŋŋ yɛ Yerusalem lɛ fee he ní atuɔ ahaa Nyɔŋmɔ lɛ he nɔkwɛmɔnɔ. Ezra wolo lɛ haa anaa hemɔkɛyeli ni maŋsɛɛbii ni sheɔ Nyɔŋmɔ gbeyei lɛ jie lɛ kpo, kɛ heshibaa ni mɛi ni tɔ̃ ni amɛtsake amɛtsui lɛ hu jie lɛ kpo lɛ. Saji ni Nyɔŋmɔ mumɔ tsirɛ Ezra ni eŋmala lɛ haa anaa faŋŋ akɛ “Nyɔŋmɔ wiemɔ hiɛ kã ni eyɛ hewalɛ” lɛɛlɛŋ.—Hebribii 4:12.

[Akrabatsa/Mfoniri ni yɔɔ baafa 18]

PERSIA MAŊTSƐMƐI NÍ YE NƆ KƐJƐ AFI 537 D.Ŋ.B. KƐYASHI AFI 467 D.Ŋ.B.

Koresh Kpeteŋkpele lɛ (Ezra 1:1) gbo yɛ afi 530 D.Ŋ.B.

[Shishigbɛ niŋmaa]

[Mfoniri]

Ahashwerosh

[Mfoniri ni yɔɔ baafa 17]

Koresh

[Mfoniri ni yɔɔ baafa 17]

Tao ni aŋma nii yɛ nɔ: Photograph taken by courtesy of the British Museum

[He ni Sane lɛ Jɛ]

Cyrus Cylinder ni ji tao ni aŋma nii yɛ nɔ lɛ tsɔɔ nɔ hewɔ ni nomii lɛ ku amɛsɛɛ kɛtee amɛjakumaŋ lɛ mli

[Mfoniri ni yɔɔ baafa 20]

Ani ole nɔ ni ha Ezra fee tsɔɔlɔ ni he esa lɛ?