Biblia Mli Tsɔsemɔ Tswaa Hemɔkɛyeli Emaa Shi
BENI afeɔ Buu-Mɔɔ Biblia Gilead Skul klas ni ji 122 lɛ skul naagbee nifeemɔ lɛ, klasbii lɛ anajiaŋdamɔlɔ ko kɛɛ akɛ: “Mɛɛ hegbɛ kpele po eji kɛha wɔ nɛkɛ akɛ wɔkɛ nyɔji enumɔ ni eho lɛ aaabo wɔ-Bɔlɔ lɛ susumɔi atoi, ní wɔna nibii tamɔ bɔ ni enaa amɛ ehaa lɛ!” March 10, 2007 lɛ baafee gbi ko ní klasbii 56 ní etsɛŋ ni amɛbaaje amɛmaŋsɛɛ sanekpakpa jajemɔ nitsumɔ lɛ shishi yɛ maji 26 ní aha amɛ nitsumɔ yɛ mli lɛ ahiɛ kpaŋ nɔ.
Beni Theodore Jaracz ni fata Nɔyeli Kuu lɛ he lɛ kɛ miishɛɛ here toibolɔi 6,205 lɛ atuu sɛɛ lɛ, ekɛɛ akɛ: “Wɔyɛ nɔmimaa akɛ skul lɛ naagbee nifeemɔ ni nyɛba nɛɛ baaha wekukpãa ni kã nyɛkɛ Nyɔŋmɔ teŋ lɛ mli awa, ni ebaatswa nyɛhemɔkɛyeli lɛ ema shi.” Etsɛ́ wielɔi ejwɛ ni kɛ Biblia mli hewalɛwoo wiemɔi kɛ ŋaawoo ni yɔɔ amɛbe naa baaha skulbii lɛ koni eye ebua amɛ ní amɛye omanye yɛ amɛmaŋsɛɛ sanekpakpa jajemɔ nitsumɔ lɛ mli lɛ agbɛi kɛtsara nɔ.
Awo Nikaselɔi lɛ Hewalɛ Koni Amɛtswa Mɛi Krokomɛi Ahemɔkɛyeli Amɛma Shi
Leon Weaver, ni fata United States Nitsumɔhe Nine Ajinafoi Akuu lɛ he lɛ wie saneyitso ni ji “Nyɛyaa nɔ Nyɛfea Ekpakpa” lɛ he. Ekai nikaselɔi lɛ akɛ kɛ́ aja mli lɛ amɛteŋ mɔ fɛɛ mɔ kɛ afii 13 etsu be fɛɛ sɔɔmɔ nitsumɔ lɛ, ni amɛkɛ Biblia mli tsɔsemɔ etswa mɛi ahemɔkɛyeli amɛ ma shi. Ekɛɛ akɛ: “Eji nitsumɔ kpakpa ejaakɛ ehereɔ mɛi ayiwala, ni nɔ ni fe fɛɛ lɛ, ewoɔ Yehowa, ni ji wɔŋwɛi Tsɛ lɛ hiɛ nyam.” Nyɛminuu Weaver wo nikaselɔi lɛ hewalɛ koni amɛya nɔ ‘amɛdũ nii yɛ mumɔ mli,’ ní ‘amɛkaha ekpakpafeemɔ miitɔ amɛ.’—Galatabii 6:8, 9.
David Splane, ni fata Nɔyeli Kuu lɛ he lɛ wie saneyitso ni ji “Jee Onitsumɔ lɛ Shishi Jogbaŋŋ” lɛ he, ni ekɛ kaimɔi ni he yɔɔ sɛɛnamɔ waa ha. Nyɛminuu Splane wo maŋsɛɛ sanekpakpa jajelɔi heei lɛ hewalɛ koni amɛje amɛnitsumɔ lɛ shishi jogbaŋŋ kɛtsɔ nibii ni nyiɛ sɛɛ nɛɛ ní amɛaafee lɛ nɔ: “Nyɛnáa su kpakpa. Nyɛkamua saji anaa oya. Nyɛjiea naanyobɔɔ su kpo. Nyɛkawie nyɛshia mɛi. Nyɛbaa nyɛhe shi, ni nyɛbua nyɛmimɛi ni yɔɔ heei ni nyɛbaaya lɛ.” No sɛɛ lɛ, ekɛɛ akɛ: “Kɛ́ nyɛyimɔ shi yɛ kɔɔyɔɔŋ lɛji lɛ amli lɛ, nyɛjea nyɛnitsumɔ lɛ shishi jogbaŋŋ, ni Yehowa aaajɔɔ nyɛnaji ni yɔɔ fɛo lɛ, beni amɛkɛ ‘nɔ kpakpa ko he sanekpakpa’ yahaa mɛi lɛ.”—Yesaia 52:7, NW.
Gilead tsɔɔlɔ Lawrence Bowen wie saneyitso ni ji “Gboshinii ni Wooo Mɔ Hiɛgbele” lɛ he. Nyɛminuu Bowen kai nikaselɔi lɛ akɛ hekɛnɔfɔɔ kwraa ni ayɔɔ akɛ Yehowa gbalɛ Wiemɔ lɛ baaba mli lɛ ji nɔ ni ha ato Gilead Skul lɛ shishi beni Jeŋ Ta II lɛ yaa nɔ lɛ. (Hebribii 11:1; Kpojiemɔ 17:8) Kɛjɛ no sɛɛ kɛbaa nɛɛ, Gilead Skul lɛ eha skulbii srɔtoi ená hegbɛ amɛkɛwaje amɛhemɔkɛyeli lɛ. Hemɔkɛyeli ni mli wa kanyaa mɛi ni gbeɔ skul lɛ naa lɛ koni amɛkɛ ekãa ayajaje anɔkwale lɛ.
Mark Noumair, ni eji Gilead tsɔɔlɔ kroko lɛ wie saneyitso ni yɔɔ miishɛɛ ni ji “Oha Mikai Mɔ Ko” lɛ he. Egbala jwɛŋmɔ kɛtee nɔkwɛmɔnɔ ni Elisha ní kɛ hemɔkɛyeli kɛ ekãa tsu enitsumɔ lɛ fee lɛ nɔ. Nyɛminuu Noumair wie 1 Kings 19:21 lɛ he, ni ekɛɛ akɛ: “Elisha ná he miishɛɛ akɛ eeefee tsakemɔi yɛ eshihilɛ mli, ekɛ nibii ni enyaa he yeee klɛŋklɛŋ gbɛhe, ni ejaje Yehowa yiŋtoo lɛ etsɔɔ.” Ejie nikaselɔi lɛ ayi akɛ amɛhu amɛfee nakai nɔŋŋ, ni ewo amɛ hewalɛ koni amɛya nɔ amɛfee nakai yɛ hei ni amɛbaaya lɛ.
Hemɔkɛyeli Haa Anáa Wiemɔ Mli Heyeli
Beni afeɔ skul lɛ ní mɛi ni baatsɔmɔ maŋsɛɛ sanekpakpa jajelɔi lɛ tswaa amɛhemɔkɛyeli amɛmaa shi lɛ, amɛshiɛ amɛtsɔɔ mɛi krokomɛi yɛ otsii lɛ anaagbee. Enɛ ha amɛná niiashikpamɔi ni yɔɔ miishɛɛ, ni Wallace Liverance ni eji Gilead tsɔɔlɔ kroko lɛ ha amɛgba enɛɛmɛi amɛtsɔɔ, ni amɛfee he nɔkwɛmɔnii yɛ nifeemɔ lɛ mli. Nyɛminuu Liverance wie saneyitso ni ji “Wɔwieɔ Akɛni Wɔyɛ Hemɔkɛyeli lɛ Hewɔ” lɛ he, ni egbala jwɛŋmɔ kɛtee bɔfo Paulo wiemɔi ni yɔɔ 2 Korintobii 4:13 lɛ anɔ.
Enɛ sɛɛ lɛ, Daniel Barnes kɛ Charles Woody, ni amɛji Betel weku lɛ mli bii lɛ bibii maŋsɛɛ sanekpakpa jajelɔi kɛ mɛi ni etsu eko pɛŋ lɛ saji. Amɛwiemɔi lɛ ma bɔ ni Yehowa kwɛɔ mɛi ni kɛ anɔkwayeli sɔmɔɔ lɛ ní ejɔɔ amɛ hu lɛ nɔ mi. (Abɛi 10:22; 1 Petro 5:7) Maŋsɛɛ sanekpakpa jajelɔ ko kɛɛ akɛ: “Mikɛ miŋa na bɔ ni Yehowa kwɛɔ mɔ nɔ ehaa lɛ kɛtsɔ tsɔsemɔ ni wɔná yɛ Gilead lɛ nɔ. Etswa wɔhemɔkɛyeli lɛ ema shi diɛŋtsɛ. Hemɔkɛyeli he miihia Nyɔŋmɔ tsuji fɛɛ, ni maŋsɛɛ sanekpakpa jajelɔi hu fata he lɛ, ejaakɛ amɛkɛ kaai, naagbai, kɛ shihilɛ mli yeyeeyefeemɔ baakpe.”
Yaa nɔ Oha Biblia Mli Nitsɔɔmɔ ni Tswaa Mɔ Hemɔkɛyeli Emaa Shi lɛ Aya Hiɛ
Samuel Herd, ni eji Nɔyeli Kuu lɛ mlinyo lɛ ha wiemɔ ni yitso ji “Nyɛyaa nɔ Nyɛtswaa Nyɛnyɛmimɛi lɛ Nyɛmaa Shi,” ni ekɛ wiemɔ ni sa jogbaŋŋ nɛɛ mu gbɛjianɔtoo lɛ fɛɛ naa. Mɛni ji yiŋtoo ni yɔɔ tsɔsemɔ ni skulbii lɛ nine shɛ nɔ lɛ sɛɛ? Nyɛminuu Herd tsɔɔ mli akɛ “Yiŋtoo hewɔ ni akɛ tsɔsemɔ nɛɛ ha ji ni atsɔɔ nyɛ bɔ ni nyɛaafee nyɛkɛ nyɛlilɛii ajie Yehowa yi, ni nyɛtsɔɔ mɛi krokomɛi ni yɔɔ shikpɔŋkuku hee ni akɛha nyɛ lɛ enɔkwalei lɛ, kɛ agbɛnɛ ni nyɛkɛtswa nyɛhe nyɛma shi yɛ hemɔkɛyeli lɛ mli.” Shi ekai skulbii lɛ hu akɛ, abaanyɛ akɛ lilɛi lɛ atsu nii kɛfite nii. (Abɛi 18:21; Yakobo 3:8-10) Ewo skulbii lɛ hewalɛ ni amɛkase Yesu yɛ bɔ ni amɛkɛ amɛlilɛi lɛ baatsu nii amɛha lɛ mli. Be ko beni Yesu kaselɔi lɛ bo lɛ toi lɛ, amɛkɛɛ akɛ: “Ani wɔtsui he edɔɔɔ la yɛ wɔmli beni . . . etsɔɔ wɔ ŋmalɛi lɛ anaa lɛ?” (Luka 24:32) Nyɛminuu Herd kɛɛ akɛ: “Kɛ́ nyɛwiemɔi tswaa mɔ emaa shi lɛ, nyɛnyɛmimɛi ni yɔɔ hei ni nyɛbaayasɔmɔ yɛ lɛ baaná he miishɛɛ.”
No sɛɛ lɛ, akɛ skulbii lɛ ayijiemɔ woji ha amɛ. Kɛkɛ ni akane wolo ni skulbii lɛ ŋma ni amɛkɛmiijie amɛhiɛsɔɔ kpo lɛ. Aŋma yɛ mli akɛ: “Wɔnuɔ he akɛ sɔ̃ kã wɔnɔ akɛ wɔjɛ anɔkwayeli mli wɔkɛ nɔ ni wɔkase lɛ atsu wɔmaŋsɛɛ sanekpakpa jajemɔ nitsumɔ lɛ jogbaŋŋ. Amrɔ nɛɛ ni wɔfee klalo akɛ wɔbaaya shikpɔŋ lɛ naagbee hei lɛ, wɔsɔlemɔ ji akɛ wɔmɔdɛŋbɔi lɛ kɛ yijiemɔ kpele baaba ha Yehowa Nyɔŋmɔ, ni ji wɔ-Tsɔɔlɔ Kpeteŋkpele lɛ.” Toibolɔi lɛ kɛ miishɛɛ tswa amɛdɛ. Hɛɛ, nifeemɔ nɛɛ tswa mɛi fɛɛ ni tee shishi lɛ ahemɔkɛyeli lɛ ema shi.
[Wiemɔ ni akɔ ni akɛmiitsu nii ni yɔɔ baafa 17]
“Kɛ́ nyɛwiemɔi tswaa mɔ emaa shi lɛ, nyɛnyɛmimɛi ni yɔɔ hei ni nyɛbaayasɔmɔ yɛ lɛ baaná he miishɛɛ”
[Akrabatsa ni yɔɔ baafa 15]
KLASBII LƐ AHE SAJI
Maji srɔtoi anɔ ni amɛjɛ kɛba: 9
Maji srɔtoi ni aha amɛ nitsumɔ yɛ mli: 26
Nikaselɔi lɛ ayifalɛ: 56
Afii abɔ ni amɛye lɛ mlijaa: 33.4
Afii abɔ ni amɛkɛhi anɔkwale lɛ mli lɛ mlijaa: 16.8
Afii abɔ ni amɛkɛhi be fɛɛ sɔɔmɔ nitsumɔ lɛ mli lɛ mlijaa: 13
[Mfoniri ni yɔɔ baafa 16]
Buu-Mɔɔ Biblia Gilead Skul Klasbii ni Ji 122 ni Gbe Nikasemɔ Naa
Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.
(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.