Weku Jamɔ Ehe Miihia Kɛha Yibaamɔ!

“NYƆŊMƆ Ofe lɛ gbi wulu lɛ nɔ ta lɛ” baafee gbeyei naakpa! (Kpoj. 16:14) Gbalɔ Mika kɛ mfonirifeemɔŋ wiemɔi ni yɔɔ faŋŋ tsu nii ni eŋma yɛ nakai gbi lɛ he akɛ: “Gɔji lɛ aaasere . . . , ni jɔɔi lɛ amli aaagbalagbalai, tamɔ wo agbaku sereɔ yɛ la hiɛ, tamɔ nu ní hoɔ shwimshwim yɛ he ko ní ema enaa shi.” (Mika 1:4) Te mɛi ni jaaa Yehowa lɛ ahiɛkpatamɔ lɛ aaaba lɛ aha tɛŋŋ? Nyɔŋmɔ Wiemɔ lɛ kɛɛ akɛ: “Mɛi ní Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbeehe kome kɛaatee shikpɔŋ lɛ naagbeehe kroko lɛ.”—Yer. 25:33.

Yɛ kɔkɔbɔi nɛɛ ahewɔ lɛ, esa akɛ wekuyitsei—ní amɛteŋ mɛi babaoo ji fɔlɔi ni bɛ hefatalɔi lɛ—abi amɛhe akɛ, ‘Ani mibii ní eshɛ he ni abaanyɛ akɛ amɛ susu nii ahe lɛ baanyɛ afo Harmagedon?’ Biblia lɛ tsɔɔ akɛ kɛ́ wekukpaa kpakpa yɛ amɛ kɛ Yehowa teŋ bɔ ni sa afii abɔ ni amɛye lɛ, no lɛ amɛbaanyɛ amɛfo Harmagedon.—Mat. 24:21.

Nɔ Hewɔ ni Ehe Hiaa ni Ato Be Kɛha Weku Jamɔ

Ákɛ fɔlɔ lɛ, esa akɛ obɔ mɔdɛŋ fɛɛ ni ooonyɛ ni otsɔse obii lɛ “yɛ Nuŋtsɔ [Yehowa] tsɔsemɔ kɛ ŋaawoo lɛ mli.” (Efe. 6:4) Ehe miihia waa ni okɛ obii lɛ akase Biblia lɛ. Wɔmiisumɔ ni wɔbii lɛ afee amɛnii tamɔ Kristofoi ni hi Filipi ní Paulo jie amɛyi akɛ amɛjɛ amɛtsui mli amɛbo Yehowa toi lɛ. Eŋma akɛ: “Nyɛ mɛi ni misumɔɔ, taakɛ bɔ ni nyɛboɔ toi daa nɛɛ, jeee beni mikɛ nyɛ yɔɔ lɛ kɛkɛ, shi moŋ titri lɛ agbɛnɛ ni mibɛ nyɛŋɔɔ nɛɛ hu lɛ: nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ lɛ he nii.”—Fili. 2:12.

Ani obii lɛ yeɔ Yehowa mlai lɛ anɔ kɛ́ obɛ amɛmasɛi? Ni kɛ́ amɛtee skul hu? Te ooofee tɛŋŋ oye obua obii lɛ koni amɛna akɛ Yehowa mlai lɛ hi, bɔni afee ni amɛha mlai nɛɛ akudɔ amɛ kɛ́ obɛ amɛmasɛi po?

Weku jamɔ baanyɛ aye abua obi lɛ koni ená hemɔkɛyeli ni mli wa ni baaha eye Yehowa mlai lɛ anɔ kɛ́ obɛ emasɛi po. Enɛ hewɔ lɛ, ha wɔsusu nibii titrii etɛ ni baaha oweku Biblia mli nikasemɔ lɛ aye omanye lɛ he wɔkwɛ.

Nyɛkafolɔa Mli

Hebri wiemɔ ni atsɔɔ shishi yɛ Hiob 1:6 lɛ akɛ “gbi ko” yɛ Ga Biblia lɛ mli lɛ tsɔɔ akɛ ŋwɛi bɔfoi lɛ baa Nyɔŋmɔ hiɛ kɛ́ be ni ato aha amɛ lɛ shɛ. Okɛ obii lɛ afee nakai nɔŋŋ. Nyɛtoa gbi kɛ be pɔtɛɛ ni nyɛkɛbaafee gbɛkɛ Weku Jamɔ lɛ ní nyɛye nɔ. Kɛfata he lɛ, nyɛtoa be kroko ni nyɛbaanyɛ nyɛkɛye najiaŋ akɛni nibii komɛi baanyɛ aba trukaa lɛ hewɔ.

Beni bei shwieɔ mli lɛ, kwɛmɔ koni nyɛkafolɔ mli. Kaimɔ akɛ obii lɛ ji mɛi ni he hiaa fe fɛɛ ni esa akɛ okɛ amɛ akase Biblia lɛ. Ni kɛlɛ, Satan baajie ehiɛ eka amɛ. (1 Pet. 5:8) Kɛ́ oŋmɛ gbɛ ni nyɛkɛ TV kwɛmɔ loo nɔ̃ kroko ni he ehiaaa tsɔ̃ ye gbɛkɛ Weku Jamɔ ni he hiaa waa nɛɛ najiaŋ lɛ, no tsɔɔ akɛ Satan nine eshɛ nyɛ nɔ.—Efe. 5:15, 16; 6:12; Fili. 1:10.

Okɛ Nibii ni He Baaba Sɛɛnamɔ Afata He

Esaaa akɛ gbɛkɛ Weku Jamɔ lɛ feɔ tamɔ nɔ ko kɛkɛ ni aakase. Bɔɔ mɔdɛŋ ni oha ehe aba sɛɛnamɔ aha amɛ. Yɛ mɛɛ gbɛ nɔ? Bei komɛi lɛ, ehi akɛ okɛ obi lɛ asusu saji ni kɔɔ shihilɛi ni ebaanyɛ ekɛkpe yɛ gbi lɛ loo otsi lɛ mli lɛ ahe. Ákɛ nɔkwɛmɔnɔ lɛ, nyɛkɛ be lɛ eko akasea bɔ ni afeɔ ashiɛɔ, ni nyɛfee he nɔkwɛmɔnɔ. Gbekɛbii nyaa he akɛ amɛaafee nibii ni amɛle feemɔ jogbaŋŋ lɛ. Kɛ́ afee shiɛmɔ wiemɔ lɛ he nɔkwɛmɔnɔ, ni agbɛnɛ asusu bɔ ni aaafee atsu shiteekɛwoo ni akɛkpeɔ yɛ shiɛmɔ nitsumɔ lɛ mli lɛ he nii lɛ, ebaaye ebua gbekɛbii lɛ ni amɛkɛ amɛhe awo Maŋtsɛyeli shiɛmɔ nitsumɔ lɛ fãi srɔtoi lɛ fɛɛ amli kɛ ekãa.—2 Tim. 2:15.

Agbɛnɛ hu, nyɛbaanyɛ nyɛfee bɔ ni gbekɛbii lɛ baafee amɛdamɔ tipɛŋfoi anɔnyɛɛ naa lɛ he nɔkwɛmɔnɔ. Nyɛweku lɛ baanyɛ asusu Questions Young People Ask—Answers That Work, Kpo 2 lɛ, yitso 15 lɛ he. “Peer-Pressure Planner” (Saamɔ Ohe Oto Tipɛŋfoi Anɔnyɛɛ) ni yɔɔ baafa 132 kɛ 133 lɛ kɛ ŋaawoi haa, ni ehaa obi lɛ tsɔɔ bɔ ni ebaafee enii eha kɛ́ ekɛ shihilɛi komɛi kpe. Wiemɔ ko ni yɔɔ baafa 133 lɛ shishigbɛ lɛ woɔ oblahii kɛ oblayei hewalɛ akɛ: “Feemɔ bɔ ni obaafee onii oha lɛ otsɔɔ ofɔlɔ loo onaanyo ko ni eda yɛ mumɔŋ.” Nyɛbaanyɛ nyɛfee enɛ yɛ gbɛkɛ Weku Jamɔ lɛ mli yɛ be kɛ beaŋ.

Fɔlɔi baanyɛ atsɔ Weku Jamɔ nɔ amɛha amɛbii lɛ ale akɛ sɛɛnamɔ yɛ he akɛ amɛkɛ mumɔŋ otii aaamamɔ amɛhiɛ. Enɛ he saji ni sa jogbaŋŋ yɛ Young People Ask, Kpo 2, yitso 38 lɛ, saneyitso ni ji “What Will I Do With My Life?” (Mɛni Mikɛ Miwala Baafee?) lɛ mli. Kɛ́ okɛ obi lɛ miisusu nakai saneyitso lɛ he lɛ, ye obua lɛ ni ena akɛ Yehowa sɔɔmɔ ni ekɛaafee oti yɛ eshihilɛ mli lɛ ji gbɛ ni hi fe fɛɛ. Ye obua obi lɛ ni ená shwelɛ akɛ eeesɔmɔ akɛ gbɛgbalɔ, eeesɔmɔ yɛ Betel, eeeya Sɔɔmɔ Tsɔsemɔ Skul lɛ eko, loo ekɛ ehe aaawo be fɛɛ sɔɔmɔ nitsumɔ lɛ fã ko mli.

Shi kadimɔ sane nɛɛ jogbaŋŋ: Fɔlɔi kpakpai komɛi gbalaa amɛjwɛŋmɔ kɛyaa nɔ ni amɛsumɔɔ ni amɛbi afee wɔsɛɛ lɛ nɔ tuutu aahu akɛ amɛjieee eyi yɛ mɔdɛŋ ni ebɔɔ amrɔ nɛɛ he. Eji anɔkwale akɛ ehi akɛ ooowo obii lɛ hewalɛ koni amɛkɛ otii kpakpai tamɔ Betel sɔɔmɔ kɛ maŋsɛɛ sanekpakpa jajemɔ nitsumɔ lɛ amamɔ amɛ hiɛ. Shi kɛ́ oofee nakai lɛ, kwɛmɔ jogbaŋŋ koni okɛ ogbɛkpamɔi lɛ akafi enɔ ní no ha emli wo la ní enijiaŋ je wui. (Kol. 3:21) Kaimɔ be fɛɛ be akɛ jeee otsui esa akɛ obi lɛ kɛsumɔ Yehowa shi moŋ lɛ diɛŋtsɛ etsui. (Mat. 22:37) No hewɔ lɛ, jiemɔ obi lɛ yi yɛ mɔdɛŋ ni ebɔɔ amrɔ nɛɛ he, ní okɛ ojwɛŋmɔ akama nibii ni efeee lɛ anɔ tuutu. Ye obua lɛ koni ehiɛ asɔ nibii fɛɛ ni Yehowa efee eha lɛ lɛ. No sɛɛ lɛ, ha obi lɛ diɛŋtsɛ ajɛ etsui mli atsɔɔ akɛ ehiɛ sɔɔ ejurɔ ni Yehowa efee lɛ lɛ.

Ha Efee Nɔ ni Yɔɔ Miishɛɛ

Gbɛkɛ Weku Jamɔ lɛ ní aaaha efee nɔ ni yɔɔ miishɛɛ lɛ ji oti ni ji etɛ ni baaha eye omanye. Mɛɛ gbɛ nɔ oootsɔ ofee enɛ? Nyɛbaanyɛ nyɛbo dramai srɔtoi lɛ ateŋ ekome toi, loo nyɛkwɛ vidioi srɔtoi ni Yehowa Odasefoi efee lɛ ateŋ ekome ní nyɛgba he sane. Aloo nyɛbaanyɛ nyɛja Biblia lɛ fã ko nyɛha weku lɛ mli bii ateŋ mɔ fɛɛ mɔ koni nyɛkane tamɔ bɔ ni afeɔ drama lɛ.

Akɛ saji komɛi ní weku lɛ baanyɛ afee ekome kɛsusu he lɛ woɔ Buu-Mɔɔ kɛ Awake! lɛ mli. Ákɛ nɔkwɛmɔnɔ lɛ, obaanyɛ okɛ sane ni ji “How Would You Answer?” (Te Obaaha Hetoo Oha Tɛŋŋ) ni akɛwoɔ Awake! wolo tɛtrɛɛ lɛ baafa 31 lɛ mli lɛ atsu nii. Akɛ sane ni abaanyɛ akase ni ji “For Our Young People” (Kɛha Oblahii kɛ Oblayei) lɛ woɔ Blɔfo Buu-Mɔɔ lɛ ni ji maŋbii anɔ̃ lɛ mli. Bei komɛi lɛ akɛ sane ni yitso ji “Teach Your Children” (Tsɔɔmɔ Obii lɛ Anii) ni afee kɛha gbekɛbii lɛ yeɔ najiaŋ.

Fɔlɔi ni amɛbii eye kɛjɛ afii 13 kɛyashi 17 lɛ baanya saji ni jeɔ kpo yɛ Awake! lɛ mli ni yitso ji “Young People Ask” lɛ he waa, ni amɛbaanya wolo ni ji Young People Ask, Kpo 2 lɛ hu he. Kɛ́ okɛ nakai wolo lɛ miitsu nii lɛ, kaashi akrabatsa ni yɔɔ yitso fɛɛ yitso naagbee ni ji “What Do You Think?” (Te Osusuɔ Tɛŋŋ?) lɛ. Afeee akrabatsa lɛ koni akɛtĩ saji amli kɛkɛ. Abaanyɛ asusu sanebimɔi ni yɔɔ nakai akrabatsa lɛ mli lɛ ahe yɛ weku nikasemɔ lɛ mli.

Shi kwɛmɔ ni weku nikasemɔ lɛ akafee sanebimɔ tsaralaa. Ákɛ nɔkwɛmɔnɔ lɛ, kaanyɛ obi lɛ nɔ akɛ ekane nibii ni eŋmala ewo hei ni ji “My Journal” (He ni Maŋma Mihe Saji Yɛ) lɛ, loo nibii ni eŋmala ewo hei krokomɛi ni wolo lɛ biɔ akɛ eŋmala esusumɔi eshwie shi yɛ lɛ etsɔɔ bo. “A Note to Parents” (Sane Kɛha Fɔlɔi) lɛ wie yɛ wolo lɛ baafa 3 lɛ akɛ: “Bɔni afee ni obii lɛ anyɛ aŋmala nibii amɛwo amɛwoji lɛ amli ní amɛkɛ nɔ ko akatee lɛ, kaayafitsiri nibii ni amɛŋmala lɛ amli. Sɛɛ mli lɛ, ekolɛ amɛ diɛŋtsɛ amɛbaajɛ amɛtsui mli amɛkɛ bo agba nibii ni amɛŋmala lɛ ahe saji.”

Kɛ́ nyɛfolɔɔɔ nyɛweku jamɔ lɛ mli, okɛ oweku lɛ susu nibii ni he baaba sɛɛnamɔ kɛha amɛ lɛ ahe, ni oha nikasemɔ lɛ fee nɔ ni yɔɔ miishɛɛ lɛ, Yehowa baaye abua bo ni oye omanye. Weku jamɔ lɛ baaye abua obii ní osumɔɔ amɛ waa lɛ koni amɛkɛ Yehowa teŋ wekukpaa lɛ mli awa.

[Akrabatsa ni yɔɔ baafa 31]

Tsakemɔ Mli

“Kɛ́ mi kɛ miwu kɛ wɔbiyei bibii lɛ miikase nii lɛ, bei komɛi lɛ wɔkɛ amɛ susuɔ nibii ni abaakase yɛ asafoŋ kpeei ashishi lɛ he, ni no sɛɛ lɛ wɔhaa amɛtɛŋɔ nɔ ni nikasemɔ lɛ tsɔɔ lɛ he mfoniri. Bei komɛi hu lɛ, wɔfeɔ saji komɛi ni Biblia lɛ bɔ he amaniɛ lɛ ahe drama, loo wɔkaseɔ shiɛmɔ wiemɔi, ni wɔfeɔ bɔ ni wɔkɛbaatsu nii wɔha lɛ he nɔkwɛmɔnɔ. Wɔkɛ amɛ kaseɔ nibii ni amɛbaanyɛ amɛnu shishi yɛ amɛfii lɛ anaa, ni wɔhaa nikasemɔ lɛ feɔ nɔ ni yɔɔ miishɛɛ ní woɔ mɔ hewalɛ.”—J.M., United States.

“Bɔni afee ni wɔye wɔbua mi-Biblia mli nikaselɔ ko bi nuu fioo ko ni enu bɔ ni akɛ wolokpo tsu nii aha yɛ Biblia beaŋ lɛ shishi lɛ, wɔprinti Yesaia wolo lɛ, shi wɔjie okadii ni haa anaa yitsei kɛ kukuji lɛ kɛjɛ mli. Wɔtsaratsaraa baafai lɛ fɛɛ ni wɔkota wɔwo paipi rɔbai enyɔ ahe kɛjɛ biɛ kɛ biɛ. Agbɛnɛ wɔha gbekɛ lɛ bɔ mɔdɛŋ koni efee nɔ ni Yesu fee yɛ kpeehe lɛ yɛ Nazaret lɛ. Nɔ ni aŋma yɛ Luka 4:16-21 lɛ tsɔɔ akɛ Yesu ‘gbele Yesaia wolo lɛ mli lɛ ni ena’ he ni etaoɔ akɛ ekane lɛ. (Yes. 61:1, 2) Shi beni gbekɛ lɛ hu ka akɛ eeegbele wolokpo kakadaŋŋ ni aŋmalako yitsei kɛ kukuji lɛ awoko mli lɛ, eyɔse akɛ ewa ha lɛ akɛ eeena he ni Yesaia 61 lɛ yɔɔ. Akɛni gbekɛ lɛ yɔse akɛ etɔɔɔ Yesu kɛ wolokpo lɛ gbelemɔ hewɔ lɛ, ebo ekɛɛ: ‘Yesu he esa waa!’”​—Y.T., Japan.

[Mfoniri ni yɔɔ baafa 30]

Kɛ́ okɛ obii lɛ fee bɔ ni amɛaafee amɛdamɔ tipɛŋfoi anɔnyɛɛ naa he nɔkwɛmɔnɔ lɛ, ebaanyɛ eye ebua amɛ

[Mfoniri ni yɔɔ baafa 31]

Bɔɔ mɔdɛŋ ni oha gbɛkɛ Weku Jamɔ lɛ afee nɔ ni yɔɔ miishɛɛ