Sanekpakpa Lɛ Yɛ Wiemɔi 500 Amli

BENI awuɔ maŋ ta yɛ Rwanda lɛ, wiemɔ shishitsɔɔmɔ kuu ko kɛ emli bii fioo ko jo foi kɛjɛ hei ni amɛyɔɔ lɛ ni amɛshi amɛnibii. Shi kɛlɛ, amɛbɔ mɔdɛŋ ni amɛloo amɛlaptɔp kɔmpiutai lɛ ni amɛkɛtee abobalɔi ŋsarai lɛ amli. Mɛni hewɔ? Koni amɛnyɛ amɛya nɔ amɛtsɔɔ Biblia kasemɔ woji ashishi kɛya Kinyarwanda wiemɔ mli.

Oblayoo ko ni yɔɔ Asia Wuoyi-bokagbɛ lɛ kɛ ekɔmpiuta lɛ tsuɔ nii kɛtsɔɔ wiemɔ shishi kɛyashiɔ nyɔɔŋ, ni etɔɔ lɛ waa, latsaa tsaa lɛ, ni akɛni akɔɔ kane yɛ be kɛ beaŋ hewɔ lɛ, ehaaa nitsumɔ lɛ aya lɛ bɔ ni etaoɔ. Mɛni ji oti ni ma ehiɛ? Bɔni afee ni egbe naa dani be ni akɛbaakala wolo lɛ ashɛ.

Wiemɔ shishitsɔɔlɔi nɛɛ fata wiemɔ shishitsɔɔlɔi aaafee 2,300 ni kɛ amɛhe eha kɛtsuɔ nii yɛ hei ni fa fe 190 yɛ jeŋ fɛɛ lɛ ahe. Amɛye kɛjɛ afii 20 kɛmiihe ashɛ afii 90, ni amɛtsuɔ nii dɛŋdɛŋ bɔni afee ni mɛi anine anyɛ ashɛ miishɛjemɔ wiemɔi ni yɔɔ Biblia lɛ mli lɛ anɔ yɛ wiemɔi 500 amli.—Kpojiemɔ 7:9.

Atsɔɔ Shishi Kɛyaa Wiemɔi Srɔtoi Babaoo Amli

Yɛ nyɛsɛɛ afii nɛɛ amli lɛ, Yehowa Odasefoi etsɔɔ woji babaoo ashishi bɔ ni anako enɔ dã. Ákɛ nɔkwɛmɔnɔ lɛ, yɛ afi 1985 lɛ, no mli lɛ akalaa Buu-Mɔɔ lɛ yɛ wiemɔi 23 amli ni fɛɛ kɛ blɔfo nɔ̃ lɛ baa shikome—enɛ ji hiɛyaa ni sa kadimɔ waa yɛ nakai beaŋ. Ŋmɛnɛ lɛ, akalaa Buu-Mɔɔ lɛ yɛ wiemɔi 176 amli, ni fɛɛ jeɔ kpo shikome bɔni afee ni mɛi ni yɔɔ je lɛŋ he fɛɛ he ni kaneɔ lɛ anyɛ akase saji ni yɔɔ mli lɛ yɛ be kome too mli.

Buu-Mɔɔ lɛ pɛ ji wolo ni akalaa daa yɛ wiemɔi aaafee 50 amli. Mɛni hewɔ? Ejaakɛ woji akalamɔ nitsumɔhei ni kalaa woji amɛhɔ̃ɔ lɛ bɛ shika babaoo ni amɛkɛaakala woji yɛ maji anɔ wiemɔi srɔtoi amli. Shi Yehowa Odasefoi ni yɔɔ je lɛŋ fɛɛ lɛ jɛɔ amɛsuɔmɔ mli amɛtsuɔ onia kɛfiɔ amɛnitsumɔ lɛ sɛɛ koni anyɛ akala Nyɔŋmɔ Wiemɔ lɛ kɛ Biblia kasemɔ woji krokomɛi aha mɛi fɛɛ ni ehe miihia ni amɛnine ashɛ woji nɛɛ ekomɛi anɔ lɛ.—2 Korintobii 8:14.

Kɛ́ mɛi anine shɛ Biblia mli shɛɛ sane lɛ nɔ yɛ amɛ diɛŋtsɛ amɛwiemɔ mli lɛ, amɛnyaa he waa. Ákɛ nɔkwɛmɔnɔ lɛ, nyɛsɛɛ nɛɛ afee Biblia kasemɔ woji komɛi yɛ Miskito wiemɔ mli, ni wiemɔ nɛɛ ji Nicaraguabii awiemɔ ko ni mɛi aaafee 200,000 wieɔ. Yoo ko bi ni aha lɛ Mi-Wolo ni Gbaa Biblia Mli Sajia lɛ eko yɛ Miskito wiemɔ mli, ni beni enine shɛ wolo nɛɛ nɔ lɛ no mli lɛ amɛsɔfo lɛ yɛ jɛmɛ. Beni osɔfo lɛ hiŋmɛi gba wolo fɛfɛo lɛ nɔ lɛ, ebi ni akɛha lɛ. Osɔfo lɛ ha yoo lɛ kɔfe kɛ kotoku ni tsiimɔ ji kilogram 20 po koni ekɛ wolo lɛ aha lɛ, shi yoo lɛ kɛɛ ekɛhaaa lɛ!

Yɛ afii nyɔŋma ni eho lɛ mli lɛ, atsɔɔ Biblia woji ashishi kɛtee Mexico wiemɔi ni fa fe 12 amli, ni Maya, Nahuatl, kɛ Tzotzil fata he. Yɛ nɔ ni shɛɛɛ afii nyɔŋma mli lɛ, Yehowa Odasefoi asafoi ni yɔɔ Mexico, ni mumuii awiemɔ asafoi hu fata he lɛ ayibɔ etee hiɛ kɛjɛ 72 kɛteke 1,200. Yehowa Odasefoi baanyɛ atɛo Biblia mli shɛɛ sane lɛ yɛ gbɔmɛi atsuii amli, shi amɛshiɔ amɛhaa Nyɔŋmɔ koni eha anɔkwale dumɔwui lɛ ashwere.—1 Korintobii 3:5-7.

Ŋmɛnɛŋmɛnɛ Beaŋ Biblia Shishitsɔɔmɔ ko ni Yɔɔ Wiemɔi 80 Amli

Yɛ nyɛsɛɛ afii nɛɛ amli lɛ, Yehowa Odasefoi etsu nii dɛŋdɛŋ kɛfee New World Translation of the Holy Scriptures muu lɛ fɛɛ loo efã ko yɛ wiemɔi 80 amli. Mɛni ejɛ mli eba? Odasefonyo ko ni yɔɔ South Africa lɛ wie Tswana Biblia lɛ he akɛ: “Eji deŋdade ni nɔ bɛ. Ebaaha manu Nyɔŋmɔ Wiemɔ lɛ shishi jogbaŋŋ fe tsutsu lɛ. Wiemɔi ni akɛtsu nii lɛ akanemɔ waaa ni amɛŋɔɔ hu.” Nuu ko ni jɛ Mozambique ni kaneɔ Tsonga wiemɔ lɛ ŋma akɛ: “Kɛ́ oyɛ Biblia kasemɔ woji krokomɛi lɛ fɛɛ po, shi obɛ Biblia lɛ, etamɔ nɔ ni oonu nugbɔshiimɔi ahe ni oona sarawai miigbala shi nugbɔ enɛɛɛ! Shi beni ajie New World Translation lɛ kpo yɛ Tsonga mli lɛ, ebafee tamɔ nɔ ni nugbɔ ebɔi nɛmɔ.”

Mɛi ni tsɔɔ sanekpakpa ni yɔɔ Biblia lɛ mli lɛ shishi ni ajaraa ahaa mɛi lɛ miiwo blema gbalɛ ko obɔ yɛ gbɛ ni sa kadimɔ waa nɔ. Yesu Kristo diɛŋtsɛ kɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14.—w09-E 11/1.

[Shishigbɛ niŋmaa]

[Akrabatsa ni yɔɔ baafa 25]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

WIEMƆI ABƆ

[Mfonirii ni yɔɔ baafa 24, 25]

Mɛi aaafee 2,300 ni kɛ amɛhe eha lɛ tsɔɔ Biblia kasemɔ woji ashishi kɛyaa wiemɔi 500 amli

BENIN

SLOVENIA

ETHIOPIA

BRITAIN