Apokrifa Sanekpakpai—Ani Amɛji Yesu he Anɔkwalei ni Aŋɔtee?

“ENƐ lɛ sane wulu nɛ. Ebaaha mɛi pii ahiɛ afee amɛ yaa.” “Enɛ baatsake shishinumɔ ni wɔhiɛ yɛ mra be mli Kristofoi ajamɔ lɛ he lɛ.” Enɛ ji wiemɔi ni sa kadimɔ waa ní nilelɔi komɛi ní nya “Yuda Sanekpakpa” lɛ he lɛ wie (no yɔɔ yiteŋgbɛ lɛ), ni asusu akɛ wolo nɛɛ laaje fe afii 1500.

Mɛi ebɔi apokrifa sanekpakpai nɛɛ ahe miishɛɛ namɔ ekoŋŋ. Mɛi komɛi kɛɔ akɛ niŋmai nɛɛ haa aleɔ Yesu wala shihilɛ mli saji kɛ enitsɔɔmɔi ni sa kadimɔ waa ni aŋɔtee be kplaŋŋ lɛ. Shi mɛni ji apokrifa sanekpakpai lɛ? Ani amɛbaanyɛ amɛtsɔɔ wɔ Yesu kɛ Kristofoi ajamɔ he anɔkwalei ni bɛ Biblia lɛ mli?

Sanekpakpai ni Jɛ Mumɔŋ kɛ Apokrifa Sanekpakpai

Kɛjɛ afi 41 Ŋ.B. kɛyashi afi 98 Ŋ.B. lɛ, Mateo, Marko, Luka, kɛ Yohane ŋmala ‘Yesu Kristo he yinɔsane’ amɛfɔ̃ shi. (Mateo 1:1) Bei komɛi lɛ, atsɛɔ amaniɛbɔi nɛɛ akɛ Yesu Kristo he “sanekpakpa lɛ.”—Marko 1:1.

Eyɛ mli akɛ ekolɛ ayɛ blema saji kɛ nibii krokomɛi ni aŋmala yɛ Yesu he moŋ, shi Sanekpakpai ejwɛ nɛɛ pɛ abuɔ akɛ amɛjɛ Nyɔŋmɔ mumɔ lɛŋ, ni esa akɛ akɛfataa Ŋmalɛi Krɔŋkrɔŋi lɛ ahe—amɛmaa nɔ mi akɛ nibii ni kɔɔ Yesu shihilɛ yɛ shikpɔŋ lɛ nɔ, kɛ etsɔɔmɔi lɛ ahe lɛ ji “anɔkwale.” (Luka 1:1-4; Bɔfoi lɛ Asaji 1:1, 2; 2 Timoteo 3:16, 17) Atsĩɔ Sanekpakpai ejwɛ nɛɛ atã yɛ blema woji ni aŋmala Kristofoi a-Hela Ŋmalɛi lɛ agbɛ́i yɛ mli lɛ fɛɛ amli. Ŋwanejee ko bɛ he akɛ amɛja, ni amɛfata Nyɔŋmɔ Wiemɔ ni ajɛ mumɔŋ aŋma lɛ he.

Shi beni be shwie mli lɛ, niŋmai krokomɛi bɔi puemɔ, ni mɛi komɛi kɛɛ nomɛi hu ji sanekpakpai. Atsɛ sanekpakpai krokomɛi nɛɛ akɛ apokrifa.a

Beni afi 100 afii lɛ ba naagbee lɛ, Irenaeus ni jɛ Lyon lɛ ŋma akɛ, mɛi ni etse amɛhe kɛjɛ Kristofoi ajamɔ he lɛ yɛ “apokrifa niŋmai kɛ amale niŋmai krokomɛi babaoo,” kɛ sanekpakpai hu ní “amɛdiɛŋtsɛ amɛŋmala, koni amɛkɛfutu mɛi ni leee nii lɛ ayiŋ.” Enɛ ha ababu apokrifa sanekpakpai lɛ akɛ nɔ ko ni yɔɔ gbeyei akɛ aaakane, loo aaahiɛ eko po.

Shi hii osɔfoi kɛ niŋmalɔi komɛi ni hi shi aaafee afi 500 kɛyashi afi 1500 Ŋ.B. lɛ baa woji nɛɛ ayi. Yɛ afi 1800 afii lɛ amli lɛ, mɛi pii nya apokrifa sanekpakpai lɛ ahe, ni abaná apokrifa niŋmai srɔtoi, kɛ sanekpakpai krokomɛi hu. Ŋmɛnɛ lɛ, ayɛ apokrifa niŋmai pii yɛ wiemɔi titrii ni awieɔ yɛ wɔbei nɛɛ amli lɛ amli.

Apokrifa Sanekpakpai lɛ Nyɛŋ Afee Yesu He Anɔkwa Saji Kɔkɔɔkɔ

Bei pii lɛ, apokrifa sanekpakpai lɛ gbalaa jwɛŋmɔ kɛyaa mɛi ni awie amɛhe fioo, loo awieee amɛhe kwraa yɛ Sanekpakpai ni jɛ mumɔŋ lɛ mli lɛ anɔ titri. Aloo amɛwieɔ Yesu gbekɛbiiashi he saji ni mɛi efo amɛtã lɛ ahe. Naa enɛ he nɔkwɛmɔnii komɛi.

◼ “Sanekpakpa ni akɛɛ Yakobo ŋma,” ní atsɛɔ lɛ hu akɛ “Maria Fɔmɔ Lɛ” wieɔ Maria fɔmɔ kɛ egbekɛbiiashi, kɛ agbɛnɛ hu ekɛ Yosef gbalashihilɛ lɛ he. Awieɔ wolo nɛɛ he yɛ gbɛ ni ja nɔ akɛ eji jamɔŋ adesã loo sane ko ni afo atã. Wolo lɛ haa mɛi náa susumɔ lɛ akɛ, Maria hi shi akɛ oblayoo fro kɛyashi egbo, ni aje gbɛ aŋma koni akɛwo ehiɛ nyam.—Mateo 1:24, 25; 13:55, 56.

◼ “Gbekɛbiiashi Sanekpakpa ni Toma Ŋma” lɛ wieɔ Yesu gbekɛbiiashi he titri—beni eye kɛjɛ afii 5 kɛyashi afii 12 lɛ—ni etsɔɔ akɛ Yesu fee naakpɛɛ nibii pii, shi enɛɛmɛi nyɛŋ afee anɔkwale kɔkɔɔkɔ. (Kwɛmɔ Yohane 2:11.) Wolo nɛɛ wieɔ Yesu he akɛ eji gbekɛ fɔŋ, ní mli etsɛɛɛ fumɔ, ní kɛ sane ekeee, ní kɛ hewalɛ ni eyɔɔ ni ekɛfeɔ naakpɛɛ nii lɛ tɔɔ tsɔɔlɔi, akutsoŋbii, kɛ gbekɛbii krokomɛi ahe owele, ni eshwilaa mɛi nɛɛ ateŋ mɛi komɛi, ehaa mɛi komɛi hu tsɔmɔɔ akpakei, ni egbeɔ mɛi komɛi po.

◼ Apokrifa sanekpakpai lɛ ekomɛi, tamɔ “Petro Sanekpakpa” lɛ wieɔ Yesu sane ni aye, egbele, kɛ eshitee lɛ he titri. Ekrokomɛi tamɔ “Pilato Nitsumɔi,” ni ji “Nikodemo Sanekpakpa” lɛ fã ko lɛ gbalaa jwɛŋmɔ kɛyaa mɛi ni ná nakai nifeemɔi lɛ amli gbɛfaŋnɔ lɛ anɔ. Akɛni nibii ni amɛwieɔ he lɛ bɛ mli, ni mɛi lɛ hu ehi ko shi dã hewɔ lɛ, anyɛŋ amu afɔ̃ niŋmai nɛɛ anɔ. “Petro Sanekpakpa” lɛ tsɔɔ akɛ Pontio Pilato yeɔ bem, ni ewieɔ Yesu shitee lɛ he tamɔ adesã ko kɛkɛ.

Apokrifa Sanekpakpai kɛ Kristojamɔŋ Hemɔkɛyeli Kwamɔ Lɛ

Yɛ December 1945 lɛ, okwaafoi komɛi yana adaa woji 13 ní akɛ niji ŋmala, ní ŋmalɛi 52 yɔɔ mli yɛ he ko ni bɛŋkɛ Nag Hammadi, yɛ Egypt Kooyigbɛ. Asusuɔ akɛ jamɔŋ kɛ jeŋ nilelɔi akuu ko ji mɛi ni ŋmala woji nɛɛ yɛ afi 300 afii lɛ amli, ni atsɛɔ kuu nɛɛ atsɔɔmɔ lɛ yɛ Blɔfo mli akɛ Gnosticism. Kuu nɛɛ kɛ jamɔŋ tsɔɔmɔi ni anuuu shishi, wɔŋjamɔ, Hela jeŋ nilee, Yudafoi ahemɔkɛyelii, kɛ Kristofoi ahemɔkɛyelii futuɔ, ni amɛná mɛi ni kɛɛ amɛji Kristofoi lɛ ekomɛi anɔ hewalɛ gbonyo.—1 Timoteo 6:20, 21.

“Toma Sanekpakpa,” “Filipo Sanekpakpa,” kɛ “Anɔkwale Sanekpakpa” lɛ fata nibii ni ana yɛ “Nag Hammadi Blema Nibiiatoohe” lɛ he, ni amɛwieɔ Gnostic tsɔɔmɔi ni anuuu shishi lɛ babaoo he oookɛɛ amɛji Yesu tsɔɔmɔi. Abuɔ “Yuda Sanekpakpa” ni ana nyɛsɛɛ nɛɛ hu ashiɔ Gnostic sanekpakpai lɛ anɔ. Ewieɔ Yuda he ekpakpa akɛ lɛ pɛ ji Yesu bɔfo ni le mɔ ni Yesu ji jogbaŋŋ. Sanekpakpa nɛɛ he nilelɔ ko wie Yesu he akɛ eji “tsɔɔlɔ kɛ mɔ ni jieɔ ŋaalee kɛ nilee kpo, shi jeee yiwalaherelɔ ni gbo yɛ je lɛŋ bii ahe eshai ahewɔ.” Shi Sanekpakpai ni ajɛ mumɔŋ aŋmala lɛ tsɔɔ akɛ Yesu gbo afɔleshaa gbele yɛ je lɛŋ bii ahe eshai ahewɔ. (Mateo 20:28; 26:28; 1 Yohane 2:1, 2) Eyɛ faŋŋ akɛ, aŋmala Gnostic sanekpakpai lɛ koni akɛfite hemɔkɛyeli ní mɛi yɔɔ yɛ Biblia lɛ mli lɛ, shi jeee ni akɛwaje lɛ.—Bɔfoi lɛ Asaji 20:30.

Sanekpakpai ni Jɛ Mumɔŋ lɛ Anɔ Bɛ

Nibii ni wɔsusu he yɛ apokrifa sanekpakpai lɛ ahe lɛ efee lɛ faŋŋ akɛ amɛji amale. Kɛ́ akɛto Sanekpakpai ni jɛ mumɔŋ lɛ ahe lɛ, anaa faŋŋ akɛ jeee Nyɔŋmɔ mumɔ lɛŋ ajɛ aŋmala. (2 Timoteo 1:13) Akɛni mɛi ni ŋmala lɛ leee Yesu, loo ebɔfoi lɛ hewɔ lɛ, amɛnyɛŋ amɛha ale Yesu, kɛ Kristofoi ajamɔ lɛ he anɔkwale ko ni aŋɔtee kɔkɔɔkɔ. Moŋ lɛ, amɛji amaniɛbɔi ni ejaaa, ní aka yiŋ awie, ní nyɛŋ aha wɔle Yesu kɛ etsɔɔmɔi lɛ ahe nɔ ko kwraa.—1 Timoteo 4:1, 2.

Nɔ ni tamɔɔɔ nakai lɛ, Mateo kɛ Yohane fata Yesu bɔfoi 12 lɛ ahe; Marko kɛ bɔfo Petro bɔ gbagbalii, ni Luka hu kɛ bɔfo Paulo bɔ. Nyɔŋmɔ kɛ emumɔ krɔŋkrɔŋ lɛ tsirɛ amɛ ni amɛŋmala Sanekpakpai ní amɛgbɛ́i kamɔ nɔ lɛ. (2 Timoteo 3:14-17) No hewɔ lɛ, nɔ fɛɛ nɔ ni he hiaa ni baaha mɔ ahe aye akɛ “Yesu ji Kristo, Nyɔŋmɔ bi lɛ” yɛ Sanekpakpai ejwɛ nɛɛ amli.—Yohane 20:31.

[Shishigbɛ niŋmaa]

[He ni Mfoniri lɛ Jɛ ni yɔɔ baafa 18]

Kenneth Garrett/National Geographic Stock