“Mikɛ Nyɛ Yɛ”
“Mɛi pii aaakane fitsofitso, ni [anɔkwa] nilee aaafá.”—DAN. 12:4.
TE OBAAHA HETOO OHA TƐŊŊ?
Mɛɛ gbɛ nɔ ‘anɔkwa nilee lɛ’ ebafee faŋŋ yɛ wɔbei nɛɛ amli?
Mɛni hewɔ abaanyɛ akɛɛ akɛ “mɛi pii” ekpɛlɛ anɔkwale lɛ nɔ lɛ?
Mɛɛ gbɛi anɔ aha anɔkwa nilee lɛ ‘efá’?
1, 2. (a) Te wɔfeɔ tɛŋŋ wɔleɔ akɛ Yesu kɛ ekaselɔi lɛ yɛ amrɔ nɛɛ, ni ekɛ amɛ baahi shi wɔsɛɛ lɛ? (b) Taakɛ Daniel 12:4 lɛ tsɔɔ lɛ, mɛni baajɛ Ŋmalɛi lɛ ni abaakase fitsofitso lɛ mli kɛba?
FEEMƆ ohe mfoniri akɛ oyɛ Paradeiso. Gbi fɛɛ gbi kɛ́ ote shi lɛ, onuɔ he akɛ oyɛ jogbaŋŋ, ni ofee klalo kɛha gbi lɛ mli nitsumɔi lɛ. Onuuu he akɛ ohe ko miiwa ohe. Helai ni gbaa onaa lɛ fɛɛ sɛɛ efo. Ohenumɔ nii lɛ fɛɛ—bɔ ni onaa nii, onuɔ nii, ofuɔ nii, otaa nii ahe, kɛ bɔ ni osaa nii anaa ohaa lɛ miitsu nii jogbaŋŋ. Oyɛ hewalɛ, omii shɛɔ onitsumɔ he, oyɛ nanemɛi pii, ni nɔ ko gbaaa onaa dɔŋŋ. Enɛɛmɛi ji jɔɔmɔi ní obaaná yɛ Nyɔŋmɔ Maŋtsɛyeli lɛ shishi lɛ ekomɛi. Kristo Yesu, ni ji Maŋtsɛ ni ahala lɛ, baajɔɔ eshishi bii lɛ, ni ebaatsɔɔ amɛ Yehowa he nii.
2 Yehowa kɛ etsuji anɔkwafoi lɛ baahi shi beni amɛtsuɔ nakai jeŋ muu fɛɛ tsɔsemɔ nitsumɔ ni baaya nɔ wɔsɛɛ lɛ. Nyɔŋmɔ kɛ e-Bi lɛ eye ebua anɔkwafoi afii ohai abɔ. Dani Yesu baaya ŋwɛi lɛ, ewo ekaselɔi anɔkwafoi lɛ shi akɛ ekɛ amɛ baahi shi. (Nyɛkanea Mateo 28:19, 20.) Bɔni afee ni hemɔkɛyeli ni wɔyɔɔ yɛ shiwoo nɛɛ mli lɛ mli awa lɛ, nyɛhaa wɔpɛia wiemɔ ko ni yɔɔ gbalɛ ko ni Nyɔŋmɔ ha aŋma yɛ blema Babilon nɔ ni fe afii 2,500 ni eho nɛ lɛ mli wɔkwɛa. Gbalɔ Daniel ŋma yɛ “naagbee be” ni wɔyɔɔ mli amrɔ nɛɛ he akɛ: “Mɛi pii aaakane fitsofitso, ni [anɔkwa] nilee aaafá.” (Dan. 12:4) Akɛ Nyɔŋmɔ Wiemɔ lɛ he anɔkwa nilee baajɔɔ mɛi ni kaseɔ Ŋmalɛi lɛ fitsofitso lɛ. Gbalɛ lɛ tsɔɔ mli hu akɛ mɛi pii baaná nakai ‘anɔkwa nilee lɛ.’ Kɛfata he lɛ, nakai nilee lɛ baafá. Mɛi ni baaná nilee nɛɛ baatsɔɔ mɛi babaoo yɛ he fɛɛ he. Beni wɔpɛiɔ bɔ ni gbalɛ nɛɛ eba mli eha lɛ mli lɛ, wɔbaana akɛ Yesu kɛ ekaselɔi lɛ yɛ ŋmɛnɛ, ni ákɛ Yehowa baaha eshiwoi fɛɛ aba mli.
‘ANƆKWA NILEE LƐ’ BAFEE FAŊŊ
3. Yɛ bɔfoi lɛ agbele sɛɛ lɛ, mɛni ba ‘anɔkwa nilee lɛ’ nɔ?
3 Yɛ bɔfoi lɛ agbele sɛɛ lɛ, hemɔkɛyeli kwamɔ ni agba akɛ ebaaba yɛ anɔkwa Kristofoi ateŋ lɛ gbɛ eshwã oyayaayai tamɔ la. (Bɔf. 20:28-30; 2 Tes. 2:1-3) No sɛɛ afii ohai abɔ lɛ, mɛi ni leee Biblia lɛ he nɔ ko kɛ mɛi ni tsɛɔ amɛhe Kristofoi lɛ fɛɛ kɛ ‘anɔkwa nilee lɛ’ teŋ bajɛkɛ. Eyɛ mli akɛ Kristendom hiɛnyiɛlɔi lɛ kɛɔ akɛ amɛheɔ Ŋmalɛi lɛ amɛyeɔ moŋ, shi amɛtsɔɔ jamɔŋ amalei—“daimonioi atsɔɔmɔi” ni wooo Nyɔŋmɔ hiɛ nyam. (1 Tim. 4:1) Mɛi babaoo yɛ mumɔŋ duŋ mli nakai beaŋ. Hemɔkɛyeli kwamɔ tsɔɔmɔi lɛ ekomɛi ji, Nyɔŋmɔ ji Triniti, susuma lɛ gbooo, apiŋɔ susumai lɛ ekomɛi yɛ hɛl la mli kɛyaa naanɔ, ni enɛɛmɛi fɛɛ ji apasa tsɔɔmɔi.
4. Mɛɛ gbɛ nɔ Kristofoi akuu fioo ko ni hi shi yɛ afi 1870 kɛyashi 1879 afii lɛ amli lɛ bɔi ‘anɔkwa nilee lɛ’ taomɔ?
4 Shi yɛ afi 1870 afii lɛ amli—aaafee afii 40 dani “naagbee gbii lɛ” baaje shishi lɛ—anɔkwa Kristofoi akuu fioo ko ni yɔɔ Pennsylvania yɛ U.S.A. lɛ kpe koni amɛkase Biblia lɛ fitsofitso, ní amɛtao ‘anɔkwa nilee lɛ.’ (2 Tim. 3:1) Gbɛ́i ni amɛŋɔfɔ̃ amɛnɔ ji Biblia Kaselɔi. Amɛjeee “ŋaalɔi kɛ nilelɔi” ni Yesu kɛɛ abaaŋɔ nilee atee amɛ lɛ. (Mat. 11:25) Amɛji humii ni miitao amɛfee Nyɔŋmɔ suɔmɔnaa nii lɛɛlɛŋ. Amɛsɔle ni amɛkɛ hiɛdɔɔ kane Ŋmalɛi lɛ, amɛsusu he, ni amɛjwɛŋ nɔ. Agbɛnɛ hu amɛkɛ Biblia mli saji lɛ eko to eko he, ni amɛpɛi nibii ni mɛi krokomɛi ni fee niiamlitaomɔ ni tamɔ nakai lɛ eŋmala lɛ amli. Fiofio lɛ, Biblia Kaselɔi nɛɛ banu anɔkwalei ni shishinumɔ wa kɛha mɛi afii ohai abɔ lɛ shishi.
5. Mɛni ji oti hewɔ ni akala dɛhiɛmɔ wolo ni atsɛɔ lɛ The Old Theology lɛ?
5 Eyɛ mli akɛ nibii ni Biblia Kaselɔi lɛ kaseɔ lɛ ha amɛmii shɛ amɛhe moŋ, shi amɛhaaa nilee hee ni amɛná lɛ aha amɛwó amɛhe nɔ; ni asaŋ amɛŋɔɔɔ yijiemɔ amɛhaaa amɛhe akɛ amɛna nɔ ko hee. (1 Kor. 8:1) Yɛ no najiaŋ lɛ, amɛkala dɛhiɛmɔ wolo ko ni atsɛɔ lɛ The Old Theology lɛ kɛtsara nɔ. Oti ni ma amɛhiɛ ji ni amɛha mɛi ni kaneɔ lɛ ale Ŋmalɛ mli anɔkwalei ni yɔɔ Biblia lɛ mli lɛ. Dɛhiɛmɔ wolo nɛɛ klɛŋklɛŋ nɔ̃ ni akala lɛ ha ana “saji komɛi ni kɛ́ akane lɛ ebaaye ebua yɛ Biblia lɛ kasemɔ mli, koni akɛjie adesai ablemasaji fɛɛ kɛya, ní akɛ wɔ-Nuŋtsɔ lɛ kɛ bɔfoi lɛ atsɔɔmɔi lɛ aye najiaŋ.”—The Old Theology, No. 1, April 1889, bf. 32.
6, 7. (a) Mɛɛ anɔkwalei aye abua wɔ ni wɔnu shishi kɛjɛ afi 1870 afii lɛ amli kɛbaa? (b) Mɛɛ anɔkwalei ohiɛ esɔ waa akɛ okase?
6 Kɛjɛ beni mɛi fioo lɛ je shishi nɔ ni fe afii 100 nɛ lɛ, wɔnu anɔkwalei babaoo shishi!a Anɔkwalei nɛɛ jeee saji ni shishinumɔ wa ni sɛɛnamɔ bɛ he, ní ebaabi ni Nyɔŋmɔjamɔ he nilelɔi agbá ŋwane yɛ he. Amɛji anɔkwalei ni nɔ bɛ ni haa mɔ yeɔ ehe, ní haa wɔbaa wɔjeŋ jogbaŋŋ, ni amɛhaa wɔnáa miishɛɛ kɛ hiɛnɔkamɔ. Amɛyeɔ amɛbuaa wɔ ni wɔleɔ Yehowa—esui kpakpai kɛ eyiŋtoi lɛ. Agbɛnɛ hu, amɛhaa wɔleɔ mɔ ni Yesu ji, amɛtsɔɔ wɔ nɔ hewɔ ni ehi shi kɛ nɔ hewɔ ni egbo, ni amɛhaa wɔleɔ nɔ ni efeɔ amrɔ nɛɛ. Anɔkwalei ni nɔ bɛ nɛɛ haa wɔnaa nɔ hewɔ ni Nyɔŋmɔ ŋmɛɔ efɔŋfeemɔ gbɛ, nɔ hewɔ ni wɔgboiɔ, gbɛ nɔ ni esa akɛ wɔtsɔ wɔsɔle, kɛ bɔ ni wɔɔfee wɔná anɔkwa miishɛɛ.
7 Amrɔ nɛɛ, wɔnuɔ gbalɛi ni ‘atsimɔ nɔ’ afii abɔ shi amɛmiiba mli yɛ naagbee be nɛɛ mli lɛ ashishi. (Dan. 12:9) Ekomɛi ji nɔ ni anaa yɛ Ŋmalɛi lɛ amli fɛɛ, titri lɛ nɔ ni yɔɔ Sanekpakpai lɛ kɛ Kpojiemɔ wolo lɛ mli lɛ. Yehowa eye ebua wɔ ni wɔnu nifeemɔi ni wɔkɛ wɔhiŋmɛi enaaa—beni awó Yesu maŋtsɛ lɛ, ta ni te shi yɛ ŋwɛi lɛ, kɛ Satan ni ashɛ lɛ afɔ̃ shikpɔŋ lɛ nɔ lɛ po shishi. (Kpoj. 12:7-12) Kɛfata he lɛ, Nyɔŋmɔ eha wɔnu nibii ni wɔbaanyɛ wɔkɛ wɔhiŋmɛi ana—tai, shikpɔŋhosomɔi, tsɛŋemɔ helai, hɔji, kɛ mɛi fɔji ni haa “jaramɔ bei” nɛɛ amli woɔ wu lɛ ashishi.—2 Tim. 3:1-5; Luka 21:10, 11.
8. Namɔ shi wɔdaa yɛ nibii ni wɔna ni wɔnu hu lɛ ahewɔ?
8 Ewaaa kwraa akɛ wɔɔnu nɔ ni Yesu kɛɛ ekaselɔi lɛ shishi akɛ: “Ajɔɔ hiŋmɛii ni naa nibii ni nyɛnaa lɛ. Ejaakɛ miikɛɛ nyɛ akɛ gbalɔi kɛ maŋtsɛmɛi pii etao akɛ amɛna nii ni nyɛnaa nɛɛ, ni amɛyanaaa, ni asaŋ amɛnu nii ni nyɛnuɔ nɛɛ, ni amɛyanuuu.” (Luka 10:23, 24) Wɔdaa Yehowa Nyɔŋmɔ shi akɛ eha wɔna nibii nɛɛ, ni wɔnu hu. Wɔhiɛ sɔɔ waa hu akɛ atsu “hefatalɔ lɛ,” ni ji Nyɔŋmɔ mumɔ krɔŋkrɔŋ lɛ, koni ebatsɔɔ Yesu sɛɛnyiɛlɔi lɛ “anɔkwale lɛ fɛɛ mli gbɛ”! (Nyɛkanea Yohane 16:7, 13.) Eba akɛ wɔbaaha ‘anɔkwa nilee lɛ’ akã wɔtsui nɔ be fɛɛ be, ni wɔkɛ mɛi krokomɛi aja faa!
“MƐI PII” MIIKPƐLƐ ‘ANƆKWA NILEE LƐ’ NƆ
9. Mɛɛ ninefɔɔ akɛha yɛ April 1881 Buu-Mɔɔ lɛ mli?
9 Beni akala klɛŋklɛŋ Buu-Mɔɔ lɛ sɛɛ aaafee afii enyɔ yɛ April 1881 lɛ, wolo tɛtrɛɛ nɛɛ kɛ ninefɔɔ ko ha akɛ aatao shiɛlɔi 1,000. Ni ekɛɛ akɛ: “Yɛ mɛi ni baanyɛ amɛkɛ amɛbe lɛ fã loo nɔ ni fa fe nakai atsu Nuŋtsɔ lɛ nitsumɔ lɛ agbɛfaŋ lɛ, wɔsusumɔ ji . . . akɛ: Nyɛya maŋtiasei wuji kɛ bibii amli, yɛ nyɛnyɛmɔ naa, ákɛ Gbɛgbalɔi loo Sanekpakpa Jajelɔi koni nyɛyatao anɔkwa Kristofoi lɛ yɛ he fɛɛ he, mɛi nɛɛ ateŋ mɛi pii hiɛ dɔɔ yɛ Nyɔŋmɔ he, shi jeee anɔkwa nilee naa; nyɛbɔa mɔdɛŋ nyɛhaa mɛi nɛɛ alea wɔ-Tsɛ lɛ duromɔ lɛ, kɛ E-wiemɔ lɛ anunyam lɛ.”
10. Te mɛi here ninefɔɔ akɛ aatao mɛi ni kɛ amɛbe fɛɛ baashiɛ lɛ nɔ amɛha tɛŋŋ?
10 Nakai ninefɔɔ lɛ ha ana akɛ Biblia Kaselɔi lɛ bu sanekpakpa lɛ shiɛmɔ akɛ anɔkwa Kristofoi anitsumɔ ko ni he hiaa waa. Eyɛ mli akɛ aatao be fɛɛ shiɛlɔi 1,000 moŋ, shi anáaa nakai yibɔ lɛ akɛni mɛi ohai fioo komɛi pɛ yaa Biblia Kaselɔi lɛ akpeei yɛ nakai beaŋ lɛ hewɔ. Kɛlɛ, mɛi babaoo ni nine shɛ dɛhiɛmɔ wolo loo wolo tɛtrɛɛ nɔ ni amɛkane lɛ yɔse anɔkwale lɛ, ni amɛhere ninefɔɔ lɛ nɔ amrɔ nɔŋŋ. Ákɛ nɔkwɛmɔnɔ lɛ, nuu ko ni jɛ London yɛ England ni kane Buu-Mɔɔ lɛ kɛ wolo bibioo ko ni Biblia Kaselɔi lɛ kala lɛ ŋma yɛ afi 1882 mli akɛ: “Nyɛfainɛ, nyɛtsɔa mi bɔ ni mafee mashiɛ kɛ nɔ ni esa akɛ makɛɛ, bɔni afee ni matsu nitsumɔ ni yɔɔ nyam ni Nyɔŋmɔ taoɔ akɛ atsu lɛ.”
11, 12. (a) Mɛɛ oti kome ma wɔ kɛ mra be mli gbɛgbalɔi lɛ fɛɛ ahiɛ? (b) Mɛɛ gbɛ nɔ mra be mli gbɛgbalɔi lɛ tsɔ amɛto “kui,” loo asafoi ni amɛkɛ amɛ kase nii?
11 Beni shɛɔ afi 1885 lɛ, Biblia Kaselɔi aaafee 300 miisɔmɔ akɛ daa gbɛgbalɔi. Oti ni ma nakai be fɛɛ sɔɔlɔi lɛ ahiɛ lɛ nɔŋŋ ji nɔ ni ma wɔ hu wɔhiɛ ŋmɛnɛ—ákɛ afee mɛi Yesu Kristo kaselɔi. Shi esoro gbɛi ni amɛtsɔ nɔ amɛshiɛ lɛ yɛ wɔnɔ lɛ he. Ŋmɛnɛ lɛ, wɔkɛ mɛi kaseɔ Biblia aŋkroaŋkro, ni wɔtsɔɔ amɛ nii. No sɛɛ lɛ wɔfɔ̃ɔ Biblia kaselɔ lɛ nine koni ekɛ asafo ko ni ato shishi momo lɛ abɔ. Mra be mli gbɛgbalɔi lɛ kɛ woji haa mɛi, kɛkɛ lɛ amɛbua mɛi ni yɔɔ wiemɔ lɛ he miishɛɛ lɛ anaa, kɛkɛ lɛ amɛkɛ amɛ ekase Ŋmalɛi lɛ kutuu. Yɛ nɔ najiaŋ ni amɛkɛ aŋkroaŋkroi aaakase nii lɛ, amɛto “kui,” loo asafoi ni amɛkɛ amɛ kase nii.
12 Ákɛ nɔkwɛmɔnɔ lɛ, yɛ afi 1907 lɛ, gbɛgbalɔi akuu ko yakpa maŋtiase ko mli amɛtao mɛi ni yɔɔ Millennial Dawn (ni atsɛɔ lɛ hu akɛ Studies in the Scriptures) wolo lɛ eko. Buu-Mɔɔ lɛ bɔ amaniɛ akɛ: “Abua [mɛi ni yɔɔ wiemɔ lɛ he miishɛɛ] nɛɛ anaa, ni akɛ amɛ fee kpee fioo ko yɛ amɛteŋ mɔ kome shĩa. Gbɛgbalɔ lɛ kɛ amɛ susu sane ko ni ji Divine Plan of the Ages lɛ he Hɔgbaa muu fɛɛ, ni enɔ otsi lɛ ewo amɛ hewalɛ ni amɛba kpeei lɛ daa.” Yɛ afi 1911 lɛ, nyɛmimɛi lɛ tsake gbɛ ni atsɔɔ nɔ ashiɛɔ lɛ mli. Nɔkwɛlɔi gbɛfalɔi krɛdɛi 58 ha maŋshiɛmɔ yɛ United States kɛ Canada fɛɛ. Nyɛmimɛi nɛɛ hé mɛi ni babo wiemɔ lɛ toi lɛ agbɛ́i kɛ amɛdrɛsii, ni amɛto gbɛjianɔ koni amɛkpe kutuu yɛ mɛi ashĩai akɛ “kui” hei. Beni shɛɔ afi 1914 lɛ, ayɛ Biblia Kaselɔi asafoi 1,200 yɛ jeŋ fɛɛ.
13. Mɛni onyaa he waa yɛ he ni ‘anɔkwa nilee lɛ’ eyashɛ ŋmɛnɛ lɛ he?
13 Ŋmɛnɛ lɛ, ayɛ asafoi aaafee 109,400 yɛ jeŋ fɛɛ, ni nyɛmimɛi hii kɛ yei 895,800 miisɔmɔ akɛ gbɛgbalɔi. Mɛi ni miihe ashɛ akpekpei kpaanyɔ ekpɛlɛ ‘anɔkwa nilee lɛ’ nɔ, ni amɛkɛmiitsu nii yɛ amɛshihilɛ mli. (Nyɛkanea Yesaia 60:22.)b Enɛ sa kadimɔ waa, ejaakɛ Yesu gba akɛ “mɛi fɛɛ aaanyɛ” esɛɛnyiɛlɔi lɛ yɛ egbɛ́i lɛ hewɔ. Ekɛfata he akɛ, abaawa esɛɛnyiɛlɔi lɛ ayi, abaawo amɛ tsuŋ, ni abaagbe amɛ po. (Luka 21:12-17) Yɛ shiteekɛwoo ni Satan, edaimonioi lɛ, kɛ adesai kɛbaa lɛ fɛɛ sɛɛ lɛ, Yehowa webii lɛ eye kunim babaoo ni akpaaa gbɛ yɛ amɛkaselɔfeemɔ nitsumɔ lɛ mli. Ŋmɛnɛ lɛ, amɛmiishiɛ yɛ “je nɛŋ fɛɛ,” kɛjɛ kooi amli kɛtee shikpɔji ni kamɔ shi kplanaa anɔ, yɛ gɔji anɔ, yɛ shia ŋãi anɔ, yɛ maŋtiasei amli, kɛ maji ni etse amɛhe banee lɛ amli. (Mat. 24:14) Anyɛŋ atsu nitsumɔ ni tamɔ nɛkɛ kɛ́ Nyɔŋmɔ sɛɛfimɔ bɛ mli.
‘ANƆKWA NILEE LƐ EFÁ’
14. Mɛɛ gbɛ nɔ mɛi ebale ‘anɔkwa nilee lɛ’ yɛ hei babaoo kɛtsɔ woji ni akalaa lɛ nɔ?
14 Kɛtsɔ mɛi babaoo ni jajeɔ sanekpakpa lɛ anɔ lɛ, ‘anɔkwa nilee lɛ’ efá. Woji ni akalaa lɛ hu eha efá. Yɛ July 1879 lɛ, Biblia Kaselɔi lɛ kala wolo tɛtrɛɛ nɛɛ klɛŋklɛŋ nɔ̃ kwraa lɛ, ni gbɛ́i ni kã nɔ ji Zion’s Watch Tower and Herald of Christ’s Presence. Aha nitsumɔhe ko ni kalaa woji kala nakai nɔ̃ lɛ 6,000, ni akala yɛ Blɔfo mli pɛ. Ahala Charles Taze Russell, ni no mli lɛ eye afii 27 lɛ akɛ nɔkwɛlɔ, ni Biblia Kaselɔi enumɔ ni edara yɛ mumɔŋ ye amɛbua lɛ. Amrɔ nɛɛ akalaa Buu-Mɔɔ lɛ yɛ wiemɔi 195 mli. No ji wolo tɛtrɛɛ ni aja fe fɛɛ yɛ shikpɔŋ lɛ nɔ, ni eko fɛɛ eko yibɔ ni akalaa ji 42,182,000. Nɔ ni nyiɛ sɛɛ ni aja fe fɛɛ ji ehefatalɔ ni ji Awake! lɛ, ni eko fɛɛ eko yibɔ ni akalaa ji 41,042,000 yɛ wiemɔi 84 mli. Kɛfata he lɛ, daa afi lɛ akalaa woji kɛ Bibliai aaafee akpekpei 100.
15. Mɛɛ gbɛ nɔ atsɔɔ akɛ shika fĩɔ wɔwoji akalamɔ nitsumɔ lɛ sɛɛ?
15 Mɛi jɛɔ amɛsuɔmɔ mli amɛtsuɔ onia kɛfĩɔ nitsumɔ wulu nɛɛ sɛɛ. (Nyɛkanea Mateo 10:8.) Enɛ feɔ mɛi ni tsuɔ nii yɛ woji akalamɔhei ni le bɔ ni tsɔnei, woji, inki, kɛ nibii krokomɛi ni akɛkalaa woji nɛɛ ajara wa ha lɛ naakpɛɛ. Nyɛmi nuu ko ni heɔ nibii ehaa Betel nitsumɔhei ni kalaa woji lɛ kɛɛ akɛ: “Guɔyelɔi ni basaraa wɔwoji akalamɔhei lɛ anaa kpɛɔ amɛhe akɛ onia ni ajɛɔ suɔmɔ mli atsuɔ lɛ pɛ akɛfĩɔ woji akalamɔhei ni nɔ bɛ nɛɛ sɛɛ. Ni bɔ ni oblahii kɛ oblayei ji mɛi titri ni tsuɔ nii yɛ Betel, ni amɛyɛ miishɛɛ waa lɛ hu feɔ amɛ naakpɛɛ.”
NYƆŊMƆ HE NILEE BAAYI SHIKPƆŊ LƐ NƆ
16. Mɛɛ yiŋtoo hewɔ ahaa mɛi leɔ ‘anɔkwa nilee lɛ’?
16 ‘Anɔkwa nilee lɛ’ efá yɛ yiŋtoo kpakpa hewɔ. Nyɔŋmɔ miisumɔ ni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:3, 4) Yehowa miisumɔ ni mɛi abale anɔkwale lɛ, bɔni afee ni amɛnyɛ amɛjá lɛ yɛ gbɛ kpakpa nɔ koni ejɔɔ amɛ. Yehowa tsɔ ‘anɔkwa nilee lɛ’ ni eha ale lɛ nɔ ebua Kristofoi ni afɔ amɛ mu lɛ ateŋ shwɛɛnii anɔkwafoi lɛ anaa. Eebua “asafo babaoo” ni yɔɔ hiɛnɔkamɔ akɛ amɛbaahi shikpɔŋ lɛ nɔ kɛya naanɔ, ni jɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” lɛ hu naa.—Kpoj. 7:9.
17. Mɛni bɔ ni anɔkwa jamɔ shwereɔ lɛ tsɔɔ?
17 Bɔ ni anɔkwa jamɔ eshwere yɛ afii 130 ni eho nɛ lɛ mli lɛ tsɔɔ faŋŋ akɛ Nyɔŋmɔ kɛ e-Maŋtsɛ ni ehala, ni ji Yesu Kristo lɛ eye ebua Yehowa tsuji ni yɔɔ shikpɔŋ lɛ nɔ lɛ—ni eetsɔɔ amɛ gbɛ, eebu amɛ he, eeto amɛhe gbɛjianɔ, ni eetsɔɔ amɛ nii. Bɔ ni amɛshwereɔ amɛhaa lɛ hu maa nɔ mi akɛ Yehowa shiwoi kɛha wɔsɛɛ lɛ baaba mli. “Shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” (Yes. 11:9) Kwɛ jɔɔmɔi ni adesai anine baashɛ nɔ!
[Shishigbɛ niŋmai]
a Kɛ́ okwɛ DVD ni ji Jehovah’s Witnesses—Faith in Action, Part 1: Out of Darkness lɛ, kɛ Jehovah’s Witnesses—Faith in Action, Part 2: Let the Light Shine lɛ, obaaná he sɛɛ waa.
[Mfoniri ni yɔɔ baafa 6]
Mra be mli Biblia Kaselɔi lɛ ji humii ni miitao amɛfee Nyɔŋmɔ suɔmɔnaa nii lɛɛlɛŋ
[Mfoniri ni yɔɔ baafa 7]
Yehowa hiɛ sɔɔ mɔdɛŋ ni obɔɔ yɛ Nyɔŋmɔ he ‘anɔkwa nilee lɛ’ gbɛɛ kɛshwamɔ mli lɛ