“Nɛkɛ Gbi Nɛɛ Atsɔ Kaimɔ Gbi Aha Nyɛ”

1, 2. Mɛɛ gbi jurɔ esa akɛ ekã Kristofoi fɛɛ atsui nɔ waa, ni mɛni hewɔ?

KƐ́ ONU wiemɔ ni ji gbi jurɔ lɛ, mɛɛ gbi jurɔ baa ojwɛŋmɔ mli? Kɛ́ obote gbalashihilɛ mli lɛ, ekolɛ obaakɛɛ akɛ, “wɔkpeemɔ gbi lɛ he gbi jurɔ.” Yɛ mɛi krokomɛi agbɛfaŋ lɛ, ekolɛ nɔ ni baaba amɛjwɛŋmɔŋ ji gbi ni amɛmaŋ ná heyeli lɛ he gbi jurɔ. Shi ani ole gbi jurɔ ko ni maŋ ko kɛ nɔ ni fe afii 3,500 eye?

² Gbi jurɔ ko yɛ nakai, no ji Hehoo lɛ. Eji gbi jurɔ ni Israelbii lɛ kɛkaiɔ gbi ni amɛye amɛhe kɛjɛ Mizraim nyɔŋyeli shishi lɛ. Esa akɛ gbi jurɔ nɛɛ akã bo hu otsui nɔ. Mɛni hewɔ? Ejaakɛ ekɔɔ nibii komɛi ni he hiaa waa yɛ oshihilɛ mli lɛ ahe. Ekolɛ lɛ obaakɛɛ akɛ: ‘Bɛ Hehoo lɛ, Yudafoi agbi jurɔ ni, shi mi lɛ Kristofonyo ji mi. Mɛni hewɔ esa akɛ masusu gbi jurɔ nɛɛ he?’ Hetoo lɛ yɛ sane ni aŋma yɛ 1 Korintobii 5:7 lɛ ni kɛɔ akɛ, “Agbe wɔ-Hehoo toobi ni ji Kristo lɛ” mli. Bɔni afee ni wɔnu anɔkwa sane nɛɛ shishi lɛ, esa akɛ wɔle Yudafoi lɛ a-Hehoo lɛ he sane, ni wɔkwɛ tsakpaa ni yɔɔ no kɛ famɔ ko ni akɛha Kristofoi fɛɛ lɛ mli.

3, 4. Mɛni ba dani aye klɛŋklɛŋ Hehoo lɛ?

³ Mɛi akpekpei ohai abɔ ni yɔɔ jeŋ fɛɛ ni jeee Yudafoi lɛ le nɔ ni ba dani aye klɛŋklɛŋ Hehoo lɛ he nɔ ko. Ekolɛ amɛkane yɛ Biblia lɛ mli yɛ 2 Mose lɛ mli, agba amɛ, loo amɛkwɛ sini ko ni kɔɔ he.

⁴ Beni Israelbii lɛ kɛ afii babaoo ehi Mizraim akɛ nyɔji lɛ sɛɛ lɛ, Yehowa tsu Mose kɛ enyɛmi nuu Aaron kɛtee Farao ŋɔɔ koni amɛyakɛɛ lɛ ni eŋmɛɛ E-webii lɛ ahe. Nakai Mizraim nɔyelɔ henɔwolɔ lɛ eŋmɛɛɛ Israelbii lɛ ahe, no hewɔ lɛ, Yehowa kɛ haomɔi srɔtoi ni naa wala ba nakai maŋ lɛ nɔ. Naagbee lɛ, Nyɔŋmɔ kɛ haomɔ ni ji nyɔŋma nɔ ni ha kromɔbii fɛɛ ni yɔɔ Mizraim lɛ gboi lɛ ba amɛnɔ, ni no ha Farao ŋmɛɛ Israelbii lɛ ahe.—2 Mose 1:11; 3:9, 10; 5:1, 2; 11:1, 5.

 5. Mɛni abi ni Israelbii lɛ afee dani amɛye amɛhe kwraa? (Kwɛmɔ mfoniri ni yɔɔ nikasemɔ lɛ shishijee lɛ.)

⁵ Shi mɛni ehe bahia ni Israelbii lɛ afee dani aŋmɛɛ amɛhe? Shihilɛ nɛɛ tee nɔ aaafee March naagbee gbɛ yɛ afi 1513 D.Ŋ.B., yɛ Hebribii lɛ anyɔɔŋ ni ji Abib, ni sɛɛ mli lɛ abatsɛ lɛ akɛ Nisan lɛ nɔ.a Nyɔŋmɔ kɛɛ Israelbii lɛ ni amɛbɔi amɛhe saamɔ yɛ Nisan 10 lɛ nɔ kɛha nɔ ko ni baaya nɔ yɛ Nisan 14 lɛ nɔ hulu shinyɔɔ mli. Mɛni hewɔ nifeemɔ lɛ baaya nɔ yɛ hulu shinyɔɔ mli lɛ? Ejaakɛ, Hebribii lɛ agbi lɛ jeɔ shishi beni hulu enyɔ shi ni egbeɔ naa enɔ jetsɛremɔ beni hulu enyɔ shi. Abi ni weku fɛɛ weku agbe too nuu (gwantɛŋ loo abotia), ni amɛkɛ elá lɛ adiki amɛshinaatsei lɛ kɛ yiteŋ nɔ lɛ he yɛ Nisan 14 lɛ nɔ. (2 Mose 12:3-7, 22, 23) Ni akɛɛ amɛ ni amɛshã too lɛ ni amɛkɛ aboloo akpiti kɛ baji komɛi aye. Nyɔŋmɔ bɔfo baakpa Mizraim shikpɔŋ lɛ nɔ fɛɛ, ni ebaagbe Mizraim kromɔbii fɛɛ, shi egbeŋ Israelbii ni baabo gbɛtsɔɔmɔ lɛ toi lɛ akromɔbii lɛ. No sɛɛ lɛ, Israelbii lɛ baaye amɛhe kwraa.—2 Mose 12:8-13, 29-32.

 6. Mɛni hewɔ esa akɛ Israelbii lɛ aye Hehoo lɛ daa afi lɛ?

⁶ Enɛ ji nɔ ni tee nɔ, ni abi ni Israelbii lɛ akai gbi ni akpɔ̃ amɛ nɛɛ yɛ afii ni baanyiɛ sɛɛ lɛ fɛɛ amli. Nyɔŋmɔ kɛɛ amɛ akɛ: “Nɛkɛ gbi nɛɛ atsɔ kaimɔ gbi aha nyɛ, ni nyɛye lɛ gbi jurɔ nyɛha Yehowa nyɛ kɛ nyɛseshibii fɛɛ, ni etsɔ naanɔ akpɔ eha nyɛ.” Kɛ́ amɛye Hehoo lɛ yɛ Nisan 14 lɛ nɔ amɛtã lɛ, gbi ni nyiɛ sɛɛ lɛ nɔ nɔŋŋ lɛ, amɛbaasaa amɛkɛ gbii kpawo aye gbi jurɔ kroko ni atsɛɔ lɛ Akpiti Gbi Jurɔ lɛ. Nisan 14 lɛ ji gbi tuuntu ni ayeɔ Hehoo lɛ, shi anyɛɔ atsɛɔ gbii kpaanyɔ ni akɛyeɔ gbi jurɔ nɛɛ fɛɛ akɛ Hehoo. (2 Mose 12:14-17; Luka 22:1; Yoh. 18:28; 19:14) Hehoo lɛ ji gbii juji ni abi ni Hebribii lɛ aye daa afi lɛ ateŋ ekome.—2 Kron. 8:13.

 7. Mɛɛ nifeemɔ Yesu to shishi beni ekɛ esɛɛnyiɛlɔi lɛ ye naagbee Hehoo lɛ?

⁷ Akɛni Yesu kɛ ebɔfoi lɛ ji Yudafoi hewɔ lɛ, amɛye Mose Mla lɛ nɔ, ni amɛye daa afi Hehoo lɛ eko. (Mat. 26:17-19) Yɛ naagbee nɔ ni Yesu kɛ esɛɛnyiɛlɔi lɛ ye lɛ shishi lɛ, eto nifeemɔ ko ni esa akɛ aye daa afi lɛ shishi, no ji Nuŋtsɔ lɛ Gbɛkɛ Niyenii lɛ. Shi mɛɛ gbi nɔ esa akɛ amɛye?

 8. Mɛni ekolɛ mɛi komɛi baabi yɛ Hehoo lɛ kɛ Nuŋtsɔ lɛ Gbɛkɛ Niyenii lɛ he?

⁸ Yesu kɛ gbɛtsɔɔmɔi ni tsɔɔ bɔ ni esa akɛ aye Nuŋtsɔ lɛ Gbɛkɛ Niyenii lɛ aha lɛ ha yɛ naagbee Hehoo ni ekɛ ebɔfoi lɛ ye lɛ sɛɛ nɔŋŋ. Enɛ tsɔɔ akɛ, gbi ni aye Hehoo lɛ, nakai gbi lɛ nɔŋŋ nɔ aye Nuŋtsɔ lɛ Gbɛkɛ Niyenii lɛ. Shi ekolɛ oyɔse akɛ, esoro gbi ni Yudafoi ni yɔɔ ŋmɛnɛ lɛ kɛyeɔ Hehoo lɛ yɛ gbi ni akɛkaiɔ Kristo gbele lɛ he. Mɛni hewɔ? Fãmɔ ni Nyɔŋmɔ kɛha Israelbii lɛ ni tsɔɔ be ni esa akɛ amɛje Hehoo gbi jurɔ lɛ yeli shishi lɛ baaye abua wɔ ni wɔna nɔ hewɔ. Beni Mose kɛɛ esa akɛ “Israel asafo muu lɛ agbegbee” tooi lɛ sɛɛ lɛ, etsɔɔ amɛ be tuuntu ni esa akɛ amɛgbegbee tooi lɛ yɛ Nisan 14 lɛ nɔ.—Nyɛkanea 2 Mose 12:5, 6.

 9. Taakɛ 2 Mose 12:6 lɛ tsɔɔ lɛ, mɛɛ be esa akɛ agbe Hehoo toobi lɛ? (Kwɛmɔ akrabatsa ni yitso ji “Mɛɛ Be yɛ Gbi lɛ Mli?” lɛ hu.)

⁹ Wolo ko (The Pentateuch and Haftorahs) ni wieɔ Yudafoi lɛ ajamɔ he lɛ fee lɛ faŋŋ akɛ, 2 Mose 12:6 lɛ wie akɛ esa akɛ agbe too lɛ yɛ “gbɛkɛnaashi kɛ gbɛkɛ teŋ.” Biblia shishitsɔɔlɔi komɛi kɛ nakai wiemɔi lɛ nɔŋŋ tsu nii. Atsɔɔ shishi yɛ Biblia krokomɛi ni wɔ-Ga Bibliai lɛ hu fata he lɛ mli akɛ, “gbɛkɛnaashi.” Bibliai shishitsɔɔlɔi krokomɛi hu tsɔɔ shishi akɛ, “beni hulu enyɔ shi,” “beni je ebɔi namɔ,” loo “hulu shinyɔɔ beaŋ.” No hewɔ lɛ, esa akɛ agbe too lɛ yɛ Nisan 14 lɛ shishijee mli, ni ji be ni hulu enyɔ shi, shi duŋ woko lɛ.

10. Mɛɛ be mɛi komɛi susuɔ akɛ agbe Hehoo toobi lɛ, shi mɛɛ sanebimɔ enɛ teɔ lɛ shi?

¹⁰ Sɛɛ mli lɛ, Yudafoi komɛi susu akɛ ebaahe be dani abaanyɛ agbe tooi ni akɛba sɔlemɔwe lɛ fɛɛ. Enɛ hewɔ lɛ, amɛnu wiemɔ ni ji “gbɛkɛnaashi kɛ gbɛkɛ teŋ” ni akɛtsu nii yɛ 2 Mose 12:6 lɛ shishi akɛ, be ni Nisan 14 lɛ miiba naagbee, ni ji be ni hulu lɛ ebɔi shi nyɔɔ kɛyashi be ni hulu lɛ nyɔɔ shi kwraa lɛ. Shi kɛ́ nakai ji sane lɛ, belɛ mɛɛ be amɛyeɔ Hehoo niyenii lɛ mɔ? Woloŋlelɔ ko (Jonathan Klawans) kɛɛ akɛ: “Kɛ́ hulu lɛ nyɔ shi lɛ, belɛ gbi kroko eje shishi, no hewɔ lɛ, agbeɔ too lɛ yɛ gbi ni ji 14 lɛ nɔ moŋ, shi Hehoo lɛ kɛ niyeli lɛ jeɔ shishi yɛ gbi ni ji 15 lɛ nɔ, eyɛ mli akɛ awieko be nɛɛ he tɛ̃ɛ yɛ 2 Mose lɛ mli.” Ekɛfata he hu akɛ, nibii ni Yudafoi ajamɔŋ tsɔɔlɔi lɛ ŋmala lɛ etsɔɔɔ bɔ ni aye Hehoo lɛ aha dani afi 70 Ŋ.B., ni ji afi nɔ ni akpata sɔlemɔtsu lɛ hiɛ lɛ shɛ.—Wɔ ni wɔkpa emli wiemɔi lɛ ekomɛi afã.

11. (a) Mɛni ba Yesu nɔ yɛ Hehoo gbi lɛ nɔ yɛ afi 33 Ŋ.B.? (b) Mɛni hewɔ atsɛ afi 33 Ŋ.B. Nisan 15 lɛ akɛ, Hejɔɔmɔ Gbi “wulu” lɛ? (Kwɛmɔ shishigbɛ niŋmaa lɛ.)

¹¹ Kɛ́ nakai lɛ, belɛ mɛɛ be aye Hehoo lɛ yɛ afi 33 Ŋ.B.? Yɛ Soo shwane, Nisan 13, beni be ni akɛbaagbe Hehoo toobi lɛ miihe ashɛ lɛ, Kristo kɛɛ Petro kɛ Yohane akɛ: “Nyɛyaa ni nyɛyasaa Hehoo niyenii lɛ nyɛtoa wɔ, koni wɔbaye.” (Luka 22:7, 8) Agbɛnɛ, “beni ŋmɛlɛtswaa lɛ shɛ” kɛha Hehoo niyenii lɛ yeli, ni ji nakai Soo lɛ nɔŋŋ gbɛkɛnaashi mli yɛ Nisan 14 lɛ nɔ lɛ, Yesu kɛ ebɔfoi lɛ ye Hehoo lɛ, ni no sɛɛ lɛ, eto Nuŋtsɔ lɛ Gbɛkɛ Niyenii lɛ shishi. (Luka 22:14, 15) Nakai gbi lɛ gbɛkɛ lɛ, amɔ lɛ ni ayaye esane. Enɔ jetsɛremɔ Sohaa, Nisan 14 lɛ, asɛŋ lɛ aaafee shwane ŋmɛlɛ nyɔŋma kɛ enyɔ mli, ni egbo nakai shwane lɛ nɔŋŋ. (Yoh. 19:14) No hewɔ lɛ, “agbe wɔ-Hehoo toobi ni ji Kristo lɛ” yɛ Nisan 14, ni ji gbi ni agbe Hehoo toobi lɛ nɔŋŋ nɔ. (1 Kor. 5:7; 11:23; Mat. 26:2) Afũ Yesu dani Nisan 15 lɛ je shishi.b—3 Mose 23:5-7; Luka 23:54.

12, 13. Mɛɛ gbɛ nɔ Israel gbekɛbii lɛ ná Hehoo lɛ he sɛɛ?

¹² Beni aye klɛŋklɛŋ Hehoo lɛ yɛ Mizraim lɛ, Nyɔŋmɔ fã Israelbii lɛ akɛ amɛye gbi jurɔ nɛɛ daa afi, “ní etsɔ naanɔ akpɔ” eha amɛ. Daa afi kɛ́ amɛmiiye Hehoo lɛ, gbekɛbii lɛ biɔ amɛfɔlɔi nɔ hewɔ ni amɛyeɔ nakai gbi jurɔ lɛ. (Nyɛkanea 2 Mose 12:24-27; 5 Mose 6:20-23) No hewɔ lɛ, Hehoo lɛ baatsɔ “kaimɔ” ni gbekɛbii po baanyɛ akase nɔ ko kɛjɛ mli.—2 Mose 12:14.

¹³ Beni yinɔ yaa ni yinɔ baa lɛ, Israelbii lɛ tsɔɔ amɛbii lɛ nibii ni he hiaa yɛ Hehoo lɛ he. Nibii ni he hiaa nɛɛ ateŋ ekome ji akɛ, Yehowa baanyɛ ebu ejálɔi lɛ ahe. Gbekɛbii lɛ kase akɛ Yehowa ji mɔ ko ni yɔɔ diɛŋtsɛ, eji Nyɔŋmɔ ni hiɛ kã ni susuɔ ewebii ahe ni ebuɔ amɛhe. Eha ana enɛ faŋŋ beni ebu Israelbii lɛ akromɔbii lɛ ahe ni ebaa amɛyi “beni etswia Mizraimbii anii lɛ.”

14. Mɛni fɔlɔi ni ji Kristofoi lɛ baanyɛ atsɔ sane ni kɔɔ Hehoo lɛ he lɛ nɔ amɛtsɔɔ amɛbii?

¹⁴ Ŋmɛnɛ lɛ, afãko fɔlɔi ni ji Kristofoi lɛ akɛ amɛgba amɛbihii kɛ amɛbiyei Hehoo lɛ he sane daa afi. Shi ani nyɛ hu nyɛtsɔɔ nyɛbii lɛ akɛ Nyɔŋmɔ buɔ ewebii lɛ ahe, taakɛ blema Israelbii lɛ tsɔɔ amɛbii lɛ? Ani nyɛhaa amɛnaa akɛ nyɛheɔ nyɛyeɔ akɛ Yehowa yɛ lɛɛlɛŋ, ni ekã he eebu ewebii lɛ ahe lolo? (Lala 27:11; Yes. 12:2) Ani nyɛkɛ amɛ gbaa enɛɛmɛi ahe sane kɛ miishɛɛ aloo nyɛwieɔ tsaralaa oookɛɛ nyɛmiiha wiemɔ? Kɛ́ okɛ oweku lɛ susu saji nɛɛ ahe lɛ, ebaaye ebua amɛ ni amɛná hekɛnɔfɔɔ ni mli wa yɛ Yehowa mli.

15, 16. Mɛni sane ni kɔɔ Hehoo lɛ he kɛ nɔ ni yɔɔ 2 Mose yitso 12-15 lɛ tsɔɔ wɔ yɛ Yehowa he?

¹⁵ Jeee nyɛmɔ ni Yehowa yɔɔ ni ekɛbuɔ ewebii ahe lɛ pɛ wɔkaseɔ kɛjɛɔ sane ni kɔɔ Hehoo lɛ he lɛ mli. Ekpɔ̃ Israelbii lɛ, kɛtsɔ jiemɔ ni ‘ejie amɛ kɛjɛ Mizraim’ lɛ nɔ. Bo lɛ susumɔ nɔ ni enɛ bi ni efee lɛ he okwɛ. Etsɔ atatu kɛ la kutuu nɔ etsɔɔ amɛ gbɛ. Ŋshɔ Tsuru lɛ mli gba enyɔ ni emamɔ shi tamɔ gbogbo yɛ amɛbɛku kɛ amɛnine jurɔ nɔ, ni amɛtsɔ shikpɔŋ gbiŋ nɔ kɛfo. Beni amɛfo shweshweeshwe lɛ, amɛna ni nui lɛ ekumɔ eshwie Mizraim ta lɛ nɔ. Kɛkɛ ni Israelbii ni akpɔ̃ amɛ lɛ wó amɛgbee nɔ amɛlá akɛ: “Mala maha Yehowa . . . Okpɔŋɔ kɛ enɔtalɔ lɛ etsirɛ amɛ eshwie ŋshɔŋ. Mihewalɛ kɛ lala ji Yehowa, ni etsɔ miyiwalaheremɔ.”—2 Mose 13:14, 21, 22; 15:1, 2; Lala 136:11-15.

¹⁶ Kɛ́ oyɛ bii lɛ, ani ooye oobua amɛ ni amɛná hekɛnɔfɔɔ yɛ Yehowa mli akɛ Nyɔŋmɔ ko ni yɛ hewalɛ ni baakpɔ̃ ewebii lɛ? Ani amɛnaa akɛ oyɛ hekɛnɔfɔɔ yɛ Yehowa mli yɛ saji ni okɛ amɛ gbaa kɛ yiŋ srɔtoi ni okpɛɔ lɛ amli? Nyɛbaanyɛ nyɛsusu sane ni yɔɔ 2 Mose yitso 12-15 lɛ he yɛ nyɛ-Weku Jamɔ lɛ mli, ni nyɛwie gbɛ ni Yehowa tsɔ nɔ ekpɔ̃ ewebii lɛ he. Be kroko lɛ, nyɛbaanyɛ nyɛsusu gbɛ ni Yehowa tsɔ nɔ ekpɔ̃ ewebii lɛ he beni nyɛsusuɔ sane ni yɔɔ Bɔfoi lɛ Asaji 7:30-36 loo Daniel 3:16-18, 26-28 lɛ he lɛ. Hɛɛ, esa akɛ wɔ fɛɛ, gbekɛbii kɛ onukpai fɛɛ aná nɔmimaa akɛ, taakɛ Yehowa kpɔ̃ ewebii lɛ yɛ blema lɛ, ebaafee nakai nɔŋŋ wɔsɛɛ.—Nyɛkanea 1 Tesalonikabii 1:9, 10.

17, 18. Mɛni hewɔ Yesu lá lɛ jara wa fe Hehoo toobi lɛ nɔ lɛ?

¹⁷ Anɔkwa Kristofoi yeee Yudafoi a-Hehoo lɛ. Nakai gbijurɔyeli lɛ fata Mose Mla lɛ he, ni wɔbɛ Mla lɛ shishi. (Rom. 10:4; Kol. 2:13-16) Yɛ no najiaŋ lɛ, gbi jurɔ kroko yɛ ni wɔkɛshwɛɛɛ kwraa, no ji Nyɔŋmɔ Bi lɛ gbele lɛ kaimɔ lɛ. Shi nibii pii yɛ ni wɔbaanyɛ wɔkase kɛjɛ Hehoo ni ato shishi yɛ Mizraim lɛ mli.

¹⁸ Toobi lɛ lá ni Israelbii lɛ kɛdiki amɛshinaatsei lɛ kɛ yiteŋ nɔ lɛ he lɛ ha ahere amɛkromɔbii lɛ ayiwala. Ŋmɛnɛ lɛ, wɔkɛ kooloi eshãaa afɔle wɔhaaa Nyɔŋmɔ yɛ Hehoo gbi lɛ loo gbi kroko nɔ. Shi afɔle kroko ko yɛ ni baa mɔ yi kɛyaa naanɔ. Bɔfo Paulo tsɔɔ mli akɛ, Yesu lá lɛ, ni ji “lá ní atsɔɔ ashwãa” lɛ ji nɔ ni haa Kristofoi ni afɔ amɛ mu lɛ náa hegbɛ akɛ amɛbaahi shi kɛya naanɔ yɛ ŋwɛi. Amɛji “kromɔbii ni aŋma amɛgbɛii yɛ ŋwɛi lɛ.” (Heb. 12:23, 24) Yesu lá lɛ nɔŋŋ ji nɔ ni haa tooi krokomɛi lɛ náa hegbɛ akɛ amɛbaahi shikpɔŋ nɛɛ nɔ kɛya naanɔ lɛ. Paulo ŋma akɛ: “Lɛ emli nɔŋŋ wɔná kpɔmɔ lɛ yɛ, ni ji nɔtɔmɔi afaa lɛ, yɛ elá lɛ hewɔ, yɛ eduromɔ falɛ lɛ naa,” ni esa akɛ wɔ fɛɛ wɔha shiwoo nɛɛ ahi wɔjwɛŋmɔ mli daa.—Efe. 1:7.

19. Mɛɛ gbɛ nɔ bɔ ni atsu Hehoo toobi lɛ he nii aha lɛ wajeɔ hekɛnɔfɔɔ ni wɔyɔɔ yɛ gbalɛi amli lɛ?

¹⁹ Beni Israelbii lɛ gbe toobi lɛ kɛha Hehoo niyenii lɛ, akɛɛ amɛ ni amɛkajwa ewui lɛ eko. (2 Mose 12:46; 4 Mose 9:11, 12) Ni “Nyɔŋmɔ toobi lɛ” ni bakpɔ̃ wɔ lɛ hu? (Yoh. 1:29) Asɛŋ lɛ yɛ ojotswalɔi enyɔ ateŋ. Yudafoi lɛ kɛɛ Pilato koni eha akumɔ mɛi ni asɛŋ amɛ lɛ awui. Enɛ baaha amɛgboi oya bɔni afee ni akashi amɛ yɛ sɛŋmɔtsei lɛ anɔ kɛyashi Nisan 15, ni ji Hejɔɔmɔ Gbi wulu lɛ. Asraafoi lɛ kumɔ ojotswalɔi enyɔ lɛ anaji, “shi beni amɛshɛ Yesu nɔ ní amɛna akɛ egbo momo lɛ, lɛ lɛ amɛkumɔɔɔ enaji.” (Yoh. 19:31-34) Enɛ kɛ nɔ ni afeɔ Hehoo toobi lɛ nyiɛ pɛpɛɛpɛ. No hewɔ lɛ, Hehoo toobi lɛ bafee afɔle ni Yesu shã yɛ Nisan 14 afi 33 Ŋ.B. lɛ “susuma kɛkɛ.” (Heb. 10:1) Kɛfata he lɛ, enɛ ha wiemɔi ni yɔɔ Lala 34:21 lɛ ba mli, ni esa akɛ enɛ awaje hekɛnɔfɔɔ ni wɔyɔɔ yɛ gbalɛi amli lɛ.

20. Mɛɛ srɔtofeemɔ kome ko yɔɔ Hehoo lɛ kɛ Nuŋtsɔ lɛ Gbɛkɛ Niyenii lɛ teŋ?

²⁰ Shi srɔtofeemɔi komɛi yɛ Hehoo lɛ kɛ Nuŋtsɔ lɛ Gbɛkɛ Niyenii lɛ teŋ. Ni nomɛi haa wɔnaa akɛ Hehoo ni abi ni Yudafoi lɛ akai daa afi lɛ efeee Kristo gbele lɛ ni ekɛɛ esɛɛnyiɛlɔi lɛ akai lɛ he mfoniri. Beni Israelbii lɛ yɔɔ Mizraim lɛ, amɛye toobi lɛ shi amɛnuuu elá lɛ. Ni srɔtofeemɔ yɛ no kɛ nɔ ni Yesu kɛɛ esɛɛnyiɛlɔi lɛ afee lɛ teŋ. Ekɛɛ esa akɛ mɛi ni baaye nɔ “yɛ Nyɔŋmɔ maŋtsɛyeli lɛ mli” lɛ aye aboloo ni amɛnu wein ni damɔ shi kɛha egbɔmɔtso kɛ elá lɛ eko. Wɔbaasusu enɛ he jogbaŋŋ yɛ nikasemɔ ni nyiɛ sɛɛ lɛ mli.—Mar. 14:22-25.

21. Mɛni hewɔ ehe hiaa waa ni wɔkase Hehoo lɛ he nii lɛ?

²¹ Fɛɛ sɛɛ lɛ, ŋwanejee ko bɛ he akɛ Hehoo lɛ ji nifeemɔ ko ni he hiaa waa yɛ Israelbii lɛ ayinɔsane mli, ni wɔteŋ mɔ fɛɛ mɔ baanyɛ akase nibii babaoo kɛjɛ mli. No hewɔ lɛ, eyɛ mli akɛ Yudafoi lɛ ji mɛi ni esa akɛ ‘amɛkai’ Hehoo lɛ shi jeee Kristofoi moŋ, shi esa akɛ wɔ, ni ji Kristofoi lɛ, wɔle ehe saji bɔni afee ni wɔnyɛ wɔkase nibii babaoo kɛjɛ mli, ejaakɛ ‘ŋmalɛ fɛɛ ŋmalɛ jɛ Nyɔŋmɔ Mumɔ lɛŋ.’—2 Tim. 3:16.