Biblia ni Akɛ Wiemɔi ni Mɛi Kɛfɔɔ Nitsumɔ Daa Tsɔɔ Shishi

WOLOŊLELƆ ko ni atsɛɔ lɛ Alan S. Duthie lɛ ŋma yɛ ewolo ko (Bible Translations and How to Choose Between Them) mli akɛ: “Kɛ́ oheɔ oyeɔ akɛ Biblia lɛ ji wiemɔ ni jɛ Nyɔŋmɔ ŋɔɔ kɛhã adesai lɛ, belɛ etsɔɔ akɛ Nyɔŋmɔ kɛ wɔ miiwie. . . . Kɛ́ jamɔ ni oyɔɔ mli lɛ ji nɔ ni hãa onaa bɔ ni esa akɛ ohi shi ohã lɛ, belɛ esa akɛ wiemɔi ni akɛtsɔɔ [Biblia lɛ] shishi lɛ afee wiemɔi ni mɛi kɛfɔɔ nitsumɔ daa.”

Mɛi ni sumɔɔ Nyɔŋmɔ Wiemɔ lɛ kɛ lɛ kpãa gbee waa. Amɛheɔ amɛyeɔ akɛ “Ŋmalɛ lɛ fɛɛ jɛ Nyɔŋmɔ mumɔ lɛŋ, ni ehe yɛ sɛɛnamɔ kɛhã nitsɔɔmɔ, kɛhã mɔkunemɔ, kɛhã nibii ajajemɔ, kɛhã tsɔsemɔ yɛ jalɛ mli.” (2 Timoteo 3:16) Biblia lɛ jeee blema wolo ko kɛkɛ. ‘Ehiɛ kã ni eyɛ hewalɛ,’ ni etsɔɔ bɔ ni wɔɔfee wɔtsu naagbai ni wɔkɛkpeɔ ŋmɛnɛ lɛ babaoo ahe nii. (Hebribii 4:12) No hewɔ lɛ, bɔ ni afee ni mɛi ni kaneɔ wolo krɔŋkrɔŋ nɛɛ anu shishi ni amɛnyɛ amɛkɛtsu nii lɛ, esa akɛ akɛ wiemɔi ni akɛfɔɔ nitsumɔ daa lɛ atsɔɔ shishi. Nɔ hewɔ ji akɛ, Hela wiemɔ ni mɛi kɛfɔɔ nitsumɔ daa ni atsɛɔ lɛ Koine lɛ ji nɔ ni akɛŋma nɔ ni mɛi tsɛɔ lɛ Kpaŋmɔ Hee lɛ, shi jeee Hela wiemɔ ni mɛi ni le woloŋ waa yɛ nakai beiaŋ, tamɔ Plato kɛ mɛi krokomɛi lɛ kɛtsu nii lɛ. Anɔkwa, aŋma Biblia lɛ koni mɛi foji anyɛ akane, ní amɛnu shishi.

Enɛ hewɔ lɛ, nyɛsɛɛ nɛɛ, akɛ wiemɔi ni mɛi kɛfɔɔ nitsumɔ ŋmɛnɛ lɛ etsɔɔ Biblia lɛ shishi kɛtee wiemɔi srɔtoi amli. Enɛ eye ebua waa yɛ gbɛi babaoo nɔ. Ehã mɛi babaoo nine eshɛ Biblia lɛ eko nɔ. Shi fɛɛ sɛɛ lɛ, bɔ ni Biblia shishitsɔɔlɔi nɛɛ ekomɛi etsɔɔ wiemɔi lɛ ekomɛi ashishi lɛ ejaaa ni ekomɛi hu ashishinumɔ bɛ faŋŋ. Akɛ nɔkwɛmɔnɔ lɛ, ekomɛi hãaa anu Biblia mli tsɔɔmɔ ni mli kã shi faŋŋ ni kɔɔ mɛi ni egboi lɛ ahe lɛ shishi jogbaŋŋ, ni amɛhãaa mɛi ale anɔkwa Nyɔŋmɔ lɛ gbɛ́i diɛŋtsɛ.

Enɛ hewɔ lɛ, mɛi ni sumɔɔ Nyɔŋmɔ Wiemɔ lɛ ná miishɛɛ waa be ni ajie New World Translation of the Christian Greek Scriptures lɛ kpo yɛ Ga mli lɛ. Yehowa Odasefoi jie Biblia nɛɛ ni akɛ wiemɔi ni mɛi kɛfɔɔ nitsumɔ ŋmɛnɛ lɛ tsɔɔ shishi lɛ kpo yɛ October 10, 2014. Akɛni mɛi ni tsɔɔ shishi lɛ hãaa jamɔŋ tsɔɔmɔi aná bɔ ni amɛtsɔɔ shishi amɛhã lɛ nɔ hewalɛ hewɔ lɛ, bɔ ni amɛtsɔɔ wiemɔi lɛ ashishi lɛ ja, ni eshishinumɔ yɛ faŋŋ fe Bibliai krokomɛi ni yɔɔ Ga mli lɛ. Shi ekolɛ, obaabi akɛ, namɛi kwɛ ni atsɔɔ Biblia nɛɛ shishi jogbaŋŋ nakai lɛ?

Eyɛ mli akɛ ekolɛ mɛi ni wieɔ Ga lɛ ateŋ mɛi babaoo leee New World Translation of the Christian Greek Scriptures lɛ moŋ, shi shishitsɔɔmɔ nɛɛ yɛ kɛjɛ afi 1950. Yɛ nakai afi lɛ nɔ lɛ, Watch Tower Bible and Tract Society ni ji kuu ko ni ale yɛ jeŋ fɛɛ yɛ Biblia kalamɔ mli lɛ jie lɛ kpo yɛ Blɔfo mli. September 15, 1950 Blɔfo Buu-Mɔɔ lɛ wie akɛ: “Hii ni ji [Biblia nɛɛ] shishitsɔɔmɔ ajinafoi lɛ etsɔɔ akɛ amɛsumɔɔɔ ni . . . aleɔ amɛ, ni titri lɛ amɛsumɔɔɔ ni akalaa amɛgbɛ́i yɛ wolo ko wolo ko mli akɛ mɛi ni tsɔɔ shishi be ni amɛyɔɔ wala mli loo yɛ amɛgbele sɛɛ. Yiŋtoo hewɔ ni atsɔɔ shishi lɛ ji, koni akɛwo anɔkwa Nyɔŋmɔ ni hiɛ kã lɛ gbɛ́i lɛ hiɛ nyam.”

Ajie New World Translation of the Holy Scriptures, ni ji Biblia muu lɛ fɛɛ ni atsɔɔ shishi ni afee lɛ kpo kome lɛ kpo yɛ afi 1961 mli. Ni akɛni atsɔɔɔ mɛi ni tsɔɔ shishi lɛ agbɛ́ii kɛbashi ŋmɛnɛ hewɔ lɛ, mɔ ko nyɛŋ awie ashi jwɛŋmɔ ni amɛhiɛ ni amɛkɛtsɔɔ shishi lɛ loo bɔ ni amɛjáa Nyɔŋmɔ amɛhãa lɛ. Nɔ ni ajie lɛ kpo yɛ afi 2013 lɛ hiɛkpamɔ wiemɔ lɛ tsɔɔ akɛ: “Akɛni wɔle akɛ sane ni yɔɔ Biblia lɛ mli lɛ he hiaa waa hewɔ lɛ, wɔtsake wiemɔi komɛi ni wɔkɛtsu nii yɛ emomo lɛ mli lɛ yɛ shishitsɔɔmɔ nɛɛ mli, shi wɔtsakeko Biblia mli sane lɛ. Wɔnuɔ he akɛ sɔ̃ ni tsii kã wɔnɔ akɛ wɔtsɔɔ Biblia mli sane lɛ shishi yɛ gbɛ ni ja nɔ. . . . Oti ni ma wɔhiɛ kɛjɛ blema ji ni wɔtsɔɔ Biblia lɛ shishi koni ekɛ nɔ ni aŋma klɛŋklɛŋ lɛ anyiɛ pɛpɛɛpɛ, ni agbɛnɛ hu efee nɔ ni mli kã shi faŋŋ ni kanemɔ waaa.”

Ani ajinafoi ni tsɔɔ Biblia nɛɛ shishi lɛ sa kɛhã nakai nitsumɔ lɛ? Woloŋlelɔi komɛi ni nyaaa shishitsɔɔmɔ nɛɛ he lɛ ewie akɛ, akɛni atsɔɔɔ mɛi ni fee lɛ agbɛ́ii kɛ bɔ ni amɛle woloŋ amɛhã lɛ hewɔ lɛ, esa akɛ abu shishitsɔɔmɔ nɛɛ akɛ nɔ ko ni mɛi komɛi ni jeee Biblia shishitsɔɔlɔi ni fee. Shi jeee woloŋlelɔi fɛɛ hiɛ susumɔ ni ejaaa nɛɛ. Alan S. Duthie ŋma akɛ: “Kɛji wɔle mɛi ni tsɔɔ Biblia pɔtɛɛ ko shishi loo mɛi ni fee lɛ, ani eyeɔ ebuaa wɔ ní wɔna kɛji nakai shishitsɔɔmɔ lɛ ja loo ejaaa? Dabi. Nɔ ni hi fe fɛɛ ni abaanyɛ adamɔ nɔ ana akɛ eja ji, ni abaapɛi shishitsɔɔmɔ lɛ eko fɛɛ eko mli akwɛ.”a

Kɛbashi amrɔ nɛɛ, afee Jeŋ Hee Shishitsɔɔmɔ muu lɛ fɛɛ loo efã ko ni fa fe 219,929,366 yɛ wiemɔi 128 mli yɛ jeŋ fɛɛ. Mɛni mɛi babaoo ni kaneɔ lɛ eyɔse?

Yesu tsɔɔ ekaselɔi lɛ ni amɛsɔle akɛ: “Wɔ-Tsɛ ni yɔɔ ŋwɛi, ogbɛ́i lɛ he atse.” (Mateo 6:9) Kɛ̃lɛ, yɛ Biblia shishitsɔɔmɔi pii amli lɛ, akɛ Nyɔŋmɔ gbɛ́i lɛ diɛŋtsɛ tsuuu nii, moŋ lɛ akɛ gbɛnaa gbɛ́i tamɔ “Nyɔŋmɔ” loo “Nuŋtsɔ” etsu nii. Shi jeee nakai eji be ni aŋma Biblia lɛ klɛŋklɛŋ kwraa lɛ. Nyɔŋmɔ gbɛ́i diɛŋtsɛ, ni ji Yehowa lɛ, je kpo aaafee shii 7,000 yɛ Hebri Ŋmalɛi lɛ amli. (2 Mose 3:15; Lala 83:19) Yɛ afii komɛi asɛɛ lɛ, susumɔi ni ejaaa ni Yudafoi lɛ ná lɛ hã amɛkɛ Nyɔŋmɔ gbɛ́i lɛ kpa nitsumɔ. Yɛ Yesu bɔfoi lɛ agbele sɛɛ lɛ, susumɔ ni ejaaa nɛɛ bote Kristofoi asafo lɛ hu mli. (Bɔfoi 20:29, 30; 1 Timoteo 4:1) Mɛi ni kwɛ Hela Ŋmalɛi ni aŋmala momo lɛ nɔ amɛŋmala efãi komɛi ekoŋŋ lɛ jie Nyɔŋmɔ gbɛ́i, ni ji Yehowa lɛ yɛ mli ni amɛkɛ Hela wiemɔi Kyʹri·os ni shishi ji “Nuŋtsɔ” kɛ The·osʹ ni shishi ji “Nyɔŋmɔ” lɛ ye najiaŋ.

Jeŋ Hee Shishitsɔɔmɔ Biblia Ajinafoi lɛ ebɔ mɔdɛŋ amɛkɛ Nyɔŋmɔ gbɛ́i Yehowa lɛ ewo he fɛɛ he ni ejeɔ kpo yɛ, yɛ Kristofoi A-Hela Ŋmalɛi (“Kpaŋmɔ Hee”) lɛ amli, ni eje kpo shii 237 sɔŋŋ yɛ mli. Amɛkaaa amɛyiŋ kɛkɛ kɛfeee enɛ, shi moŋ amɛdamɔ nibii ni amɛje gbɛ amɛpɛi mli ni amɛna, ni nilee yɔɔ mli lɛ anɔ. Akɛ nɔkwɛmɔnɔ lɛ, Luka 4:18 lɛ tsɛ Yesaia 61:1 lɛ mli wiemɔi lɛ yisɛɛ. Gbɛ́i Yehowa lɛ je kpo yɛ klɛŋklɛŋ Hebri niŋmaa lɛ mli yɛ kuku nɛɛ mli yɛ Yesaia wolo lɛ mli.b Enɛ hewɔ lɛ, esa jogbaŋŋ akɛ atsɔɔ Luka 4:18 lɛ shishi yɛ Jeŋ Hee Shishitsɔɔmɔ lɛ mli akɛ: “Yehowa mumɔ lɛ yɛ minɔ ejaakɛ efɔ mi mu koni mijaje sane kpakpa mitsɔɔ ohiafoi.”

Enɛ yeɔ ebuaa mɛi ni kaneɔ Biblia lɛ ni amɛnaa srɔto ni yɔɔ Yehowa Nyɔŋmɔ kɛ e-Bi koome ni ji Yesu Kristo lɛ teŋ. Akɛ nɔkwɛmɔnɔ lɛ, Biblia shishitsɔɔlɔi pii tsɔɔ Mateo 22:44 lɛ shishi akɛ: “Nuŋtsɔ lɛ kɛɛ mi-Nuŋtsɔ lɛ akɛ.” (Ga Biblia) Shi namɔ kɛ namɔ wieɔ lɛ? Atsɛ ŋmalɛ nɛɛ yisɛɛ kɛjɛ Lala 110:1 lɛ, ni yɛ klɛŋklɛŋ Hebri niŋmaa lɛ mli lɛ, Nyɔŋmɔ gbɛ́i lɛ ji nɔ ni akɛtsu nii yɛ jɛmɛ. Enɛ hewɔ lɛ, atsɔɔ Mateo 22:44 lɛ shishi yɛ Jeŋ Hee Shishitsɔɔmɔ lɛ mli akɛ: “Yehowa kɛɛ mi-Nuŋtsɔ lɛ akɛ.” Ebiii ni mɔ ko ale woloŋ kɛya shɔŋŋ dani ena akɛ srɔto yɛ Yehowa Nyɔŋmɔ kɛ e-Bi lɛ teŋ. (Marko 13:32; Yohane 8:17, 18; 14:28) Ja mɔ ko le enɛ dani abaanyɛ ahere eyiwala. Bɔfoi 2:21 lɛ wie akɛ: “Mɔ fɛɛ mɔ ni boɔ tsɛɔ Yehowa gbɛ́i lɛ, abaahere eyiwala.”

Nibii krokomɛi hu yɛ ni hãa Jeŋ Hee shishitsɔɔmɔ lɛ feɔ shishitsɔɔmɔ ko ni nɔ bɛ. Hela niŋmai ni akpɛlɛɔ nɔ akɛ eja ni Westcott kɛ Hort fee lɛ nɔ adamɔ atsɔɔ Biblia shishitsɔɔmɔ nɛɛ shishi. Kɛ̃lɛ, akwɛ niŋmai krokomɛi ni akpɛlɛɔ nɔ akɛ amɛja tamɔ nɔ ni Nestle kɛ Aland fee lɛ, kɛ nɔ ni United Bible Societies lɛ fee lɛ hu amli. Akwɛ jogbaŋŋ koni anyiɛ klɛŋklɛŋ Hela wiemɔ ni akɛtsu nii kɛŋma Biblia lɛ sɛɛ pɛpɛɛpɛ ní akɛ wiemɔ ni mɛi kɛfɔɔ nitsumɔ ŋmɛnɛ lɛ atsɔɔ shishi. Enɛ ehã anyɛ atsɔɔ Biblia lɛ shishi pɛpɛɛpɛ, ni eye ebua ni anyɛ anu nibii komɛi ni tsutsu ko lɛ anuuu shishi lɛ ashishi jogbaŋŋ.

Mɛi ni tsɔɔ Jeŋ Hee Shishitsɔɔmɔ lɛ shishi lɛ tsɔɔ Hela feemɔwiemɔi lɛ ashishi jogbaŋŋ. Yɛ wiemɔi babaoo ni yɔɔ ŋmɛnɛ lɛ amli lɛ, akɛ feemɔwiemɔ tsuɔ nii yɛ bei srɔtoi amli, tamɔ amrɔ be, eho be, kɛ baaba be. Yɛ Hela mli lɛ, feemɔwiemɔ lɛ hu hãa anaa kɛji nifeemɔ ko ji nɔ ko ni aafee yɛ be kukuoo mli, nɔ ko ni afee agbe naa, loo nɔ ko ni aaya nɔ aafee. Hã wɔkɛ Yesu wiemɔi ni yɔɔ Mateo 6:33 lɛ afee nɔkwɛmɔnɔ. Hela feemɔwiemɔ ni ji “tao” ni akɛtsu nii yɛ ŋmalɛ nɛɛ mli lɛ tsɔɔ nɔ ko ni aaya nɔ aafee. No hewɔ lɛ atsɔɔ shishi akɛ: “Belɛ, nyɛyaa nɔ nyɛtaoa Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ, ni abaaŋɔ nibii krokomɛi nɛɛ fɛɛ afata he ahã nyɛ,” ni enɛ hãa nɔ ni Yesu taoɔ atsɔɔ diɛŋtsɛ lɛ feɔ faŋŋ. Nakai nɔŋŋ atsɔɔ Mateo 7:7 lɛ shishi akɛ: “Nyɛyaa nɔ nyɛbia, ni abaahã nyɛ; nyɛyaa nɔ nyɛtaoa, ni nyɛbaana; nyɛyaa nɔ nyɛshia, ni abaagbele ahã nyɛ.”​—Romabii 1:32; 6:2; Galatiabii 5:15.

Amrɔ nɛɛ ni ajie Kristofoi A-Hela Ŋmalɛi lɛ kpo yɛ Ga mli lɛ, ani akɛbaawa jɛmɛ? Dabi, ato gbɛjianɔ koni atsɔɔ Biblia muu lɛ fɛɛ shishi kɛba Ga mli yɛ be ni sa mli. Shi ani mɛi ni kaneɔ Biblia lɛ baanyɛ aná nɔmimaa akɛ abaatsɔɔ Ga nɔ lɛ shishi pɛpɛɛpɛ ni emli akã shi faŋŋ tamɔ Blɔfo nɔ lɛ ji lɛ?

Hɛɛ. Ejaakɛ Yehowa Odasefoi a-Gbɛtsɔɔmɔ Kuu lɛ ji mɛi ni kwɛɔ wiemɔ shishitsɔɔmɔ nitsumɔ lɛ nɔ. Akɛni amɛhiɛ kã shi hewɔ lɛ, amɛkpɛ mli akɛ kɛ́ abaatsɔɔ Biblia lɛ shishi kɛya wiemɔ ko mli lɛ, mɔ kome pɛ akafee, shi moŋ ato kuu yɛ nakai wiemɔ lɛ mli ni amɛ amɛtsɔɔ shishi. Enɛ hewɔ lɛ, ato kui ni tsɔɔ Biblia lɛ shishi yɛ maji srɔtoi amli yɛ jeŋ fɛɛ. Ato nitsumɔhe ko yɛ Yehowa Odasefoi anitsumɔhe yitso lɛ ni atsɛɔ lɛ Translation Services koni eye ebua kui ni tsɔɔ Biblia lɛ shishi lɛ, ni ehã saji fɛɛ ni amɛbaabi lɛ hetoo, ni agbɛnɛ hu amɛkwɛ koni wiemɔ kuu ko Jeŋ Hee Shishitsɔɔmɔ lɛ akafee srɔto yɛ Jeŋ Hee Shishitsɔɔmɔ ni afee yɛ wiemɔi krokomɛi amli yɛ jeŋ fɛɛ lɛ he. Kɛfata he lɛ, ato nɔ ko ni yɔɔ kɔmpiuta nɔ ni atsɛɔ lɛ Watchtower Translation System lɛ he gbɛjianɔ koni eye ebua Biblia shishitsɔɔlɔi lɛ. Shi enɛ etsɔɔɔ akɛ kɔmpiuta lɛ ji nɔ ni tsɔɔ wiemɔ lɛ shishi, moŋ lɛ gbɔmɛi ji mɛi ni tsɔɔ shishi. Kɔmpiuta lɛ hãa efeɔ mlɛo kɛhãa Biblia shishitsɔɔlɔi lɛ akɛ amɛbaashɛ oti ni ma amɛhiɛ akɛ amɛtsɔɔ Jeŋ Hee Shishitsɔɔmɔ lɛ shishi yɛ gbɛ ni ja nɔ ni emli akã shi faŋŋ tamɔ Blɔfo nɔ lɛ nɔŋŋ lɛ he. Nibii ni Watchtower Translation System lɛ tsuɔ lɛ eko ji, ehãa Biblia shishitsɔɔlɔi lɛ naa gbɛi srɔtoi anɔ ni atsɔɔ Hebri loo Hela wiemɔ ko shishi yɛ Blɔfo nɔ lɛ mli, ni no yeɔ ebuaa amɛ ni amɛnaa wiemɔi ni sa ni amɛbaanyɛ amɛkɛtsu nii kɛtsɔɔ nakai Hebri loo Hela wiemɔ lɛ shishi yɛ amɛnɔ lɛ mli.

Nibii kpakpai ni ejɛ mli kɛba lɛ hãa wɔnaa akɛ gbɛjianɔ ni ato nɛɛ sa waa diɛŋtsɛ. Wɔmiiwo bo hewalɛ ni opɛi Kristofoi A-Hela Ŋmalɛi​—Jeŋ Hee Shishitsɔɔmɔ lɛ mli. Obaanyɛ obi mɛi ni fee wolo ni okaneɔ nɛɛ ni amɛhã bo eko. Obaanya nibii srɔtoi ni afee afata he lɛ hu ahe waa, ekomɛi ji: wiemɔi ni akala lɛ faŋŋ ni ekanemɔ waaa; Biblia mli woji lɛ eko fɛɛ eko mli saji otii, ni enɛ hãa onaa saji ni yɔɔ Biblia mli wolo ko mli kɛ agbɛnɛ hu kuku pɔtɛɛ ni sane ko jeɔ kpo yɛ nakai Biblia mli wolo lɛ mli oya. Nɔ ni fe fɛɛ lɛ, kɛ́ ookane Biblia nɛɛ, obaanyɛ oná nɔmimaa akɛ, bɔ ni atsɔɔ shishi lɛ ja, ni eji Nyɔŋmɔ wiemɔi ni akɛ wiemɔ ni mɛi kɛfɔɔ nitsumɔ daa lɛ tsɔɔ shishi.