Ani Obuɔ Yehowa Wiemɔ lɛ Waa?

1-3. Mɛni eeenyɛ efee akɛ no kɛ béi ba Evodia kɛ Sintika teŋ lɛ? Ni mɛni baaye abua wɔ koni naagbai ni tamɔ nakai akaba wɔ kɛ wɔnyɛmimɛi lɛ ateŋ? (Kwɛmɔ mfoniri ni yɔɔ nikasemɔ lɛ shishijee lɛ.)

YEHOWA tsuji buɔ Nyɔŋmɔ Wiemɔ ni ji Biblia lɛ waa. Biblia lɛ mli ajɛɔ ajajeɔ wɔ kɛji wɔtɔ̃, ni akɛni wɔyeee emuu hewɔ lɛ, bɔ fɛɛ bɔ ni fee lɛ wɔbaatɔ̃ yɛ be kɛ beiaŋ. No hewɔ lɛ, kɛ́ ajɛ Biblia lɛ mli ajaje wɔ lɛ, te wɔfeɔ wɔnii wɔhãa tɛŋŋ? Susumɔ nyɛmimɛi yei enyɔ komɛi ni afɔ amɛ mu ni hi shi yɛ blema lɛ asane lɛ he okwɛ. Atsɛɔ amɛ Evodia kɛ Sintika. Biblia lɛ kɛɛ béi ba amɛteŋ, shi etsɔɔɔ wɔ nɔ ni kɛ béi lɛ ba. Shi yɛ nikasemɔ nɛɛ mli lɛ, hã wɔŋɔ lɛ akɛ shihilɛ ni nyiɛ sɛɛ nɛɛ ji nɔ ni kɛ béi lɛ ba.

² Evodia fɔ̃ nyɛmimɛi komɛi nine kɛba eshĩa lɛ kɛhã niyeli kɛ sanegbaa, shi etsɛɛɛ Sintika. Sɛɛ mli lɛ, Sintika ná ele akɛ nyɛmimɛi lɛ yaná amɛhewɔŋ miishɛɛ yɛ Evodia shĩa lɛ, ni sane lɛ dɔ lɛ. Ekolɛ ewie yɛ etsui mli akɛ: ‘Bɔ ni mi kɛ Evodia yɔɔ nɛɛ, eefee mi naakpɛɛ waa akɛ etsɛ henaabuamɔ ko ni tamɔ nɛkɛ ni etsɛɛɛ mi!’ No hewɔ lɛ, kɛjɛ nakai gbi lɛ nɔ kɛyaa lɛ, ekɛ Evodia eŋmɔɔɔ, ni esumɔɔɔ ni ebɛŋkɛɔ lɛ po. Sɛɛ mli lɛ, lɛ hu etsɛ nyɛmimɛi ni tee Evodia henaabuamɔ lɛ shishi lɛ kɛba eshĩa lɛ kɛhã niyeli, shi etsɛɛɛ Evodia! Eeenyɛ efee akɛ, naagba nɛɛ ni yɔɔ Evodia kɛ Sintika teŋ lɛ gba nyɛmimɛi krokomɛi anaa, ni kulɛ, eehe efite toiŋjɔlɛ ni yɔɔ asafo lɛ mli lɛ. Biblia lɛ hãa wɔleɔ akɛ, Paulo jɛ suɔmɔ mli ewo amɛ ŋaa yɛ he, ni eeenyɛ efee akɛ amɛbo lɛ toi.​—Fil. 4:2, 3.

³ Ŋmɛnɛ lɛ, shihilɛi ni tamɔ nɛkɛ nyɛɔ efiteɔ nyɛmimɛi ateŋ yɛ asafo lɛ mli. Shi kɛ́ wɔkɛ nibii ni awie yɛ Nyɔŋmɔ Wiemɔ ni ji Biblia lɛ mli lɛ tsu nii lɛ, wɔbaanyɛ wɔtsu naagbai ni baa wɔ kɛ wɔnyɛmimɛi Kristofoi lɛ ateŋ lɛ ahe nii, ni ekomɛi po yɛ ni ebaŋ kwraa. Kɛ́ wɔkɛ gbɛtsɔɔmɔi ni yɔɔ Biblia lɛ mli lɛ tsu nii lɛ, no baatsɔɔ akɛ wɔbuɔ Nyɔŋmɔ Wiemɔ lɛ waa.​—Lala 27:11.

4, 5. Mɛɛ ŋaa Nyɔŋmɔ Wiemɔ lɛ woɔ wɔ yɛ mlifu he?

⁴ Ewaaa akɛ wɔbaakɔ tsui kɛji wɔnu he akɛ mɔ ko ewie wɔhe bɔ ni esaaa loo eye wɔ sane fɔŋ ko. Kɛ́ mɔ ko kɛ wɔ yeee jogbaŋŋ yɛ he ni wɔjɛ, wɔhewolonɔ su, loo nɔ kroko ni yɔɔ wɔhe lɛ hewɔ lɛ, eyɛ dɔlɛ waa, titri lɛ, kɛji nakai mɔ lɛ ji wɔ diɛŋtsɛ wɔnyɛmi Kristofonyo! Shi Nyɔŋmɔ Wiemɔ lɛ baanyɛ aye abua wɔ ni wɔkpee shihilɛi nɛɛ anaa.

⁵ Yehowa le adesai jogbaŋŋ, ni ele akɛ kɛ́ wɔmli fu lɛ, bei pii lɛ, wɔfeɔ nibii ni esaaa. Saji komɛi baanyɛ awo wɔmli la aahu akɛ, wɔbaawie loo wɔbaafee nɔ ko, kɛkɛ lɛ, sɛɛ mli lɛ, wɔshwa wɔhe. No hewɔ lɛ, nilee yɛ mli waa akɛ wɔbaabo ŋaawoo nɛɛ ni yɔɔ Biblia lɛ mli lɛ toi, akɛ: “Kaahã omumɔ mli miifũ oya.” (Kanemɔ Abɛi 16:32; Jajelɔ 7:9.) Esa akɛ wɔ fɛɛ wɔkase tsuishitoo, ni wɔle bɔ ni akɛ tɔmɔi keɔ. Yesu wie akɛ Yehowa kɛ wɔhe eshai ekeŋ wɔ kɛji wɔkɛ mɛi ni tɔ̃ɔ wɔnɔ lɛ ahe ekeee amɛ. (Mat. 6:14, 15) Ani tsuishitoo babaoo he miihia bo? Ani okɛ mɛi fɛɛ ni tɔ̃ɔ onɔ lɛ ahe keɔ amɛ oya?

 6. Kɛ́ wɔbɛ mɛi wɔwo wɔmli lɛ, mɛni baanyɛ ajɛ mli kɛba?

⁶ Bei pii lɛ, mɛi ni mli fuɔ mramra lɛ bɛɔ mɛi amɛwoɔ amɛmli, ni amɛhe tsɛ̃ɔ mɛi. Kɛ́ nyɛmi ko he tsɛ̃ nyɛmi kroko lɛ, ebaanyɛ ewie ehe efɔŋ etsɔɔ nyɛmimɛi krokomɛi yɛ asafo lɛ mli. Ekolɛ, ebaafee enii tamɔ nɔ ni naagba ko kwraa bɛ ekɛ mɔ ko mɔ ko teŋ yɛ asafo lɛ mli, shi kɛ́ ejieee susumɔ gbonyo ni ehiɛ yɛ enyɛmi lɛ he lɛ yɛ etsui mli lɛ, nyɛmimɛi lɛ baayoo lɛ kɛ̃, ni amɛbaatsi amɛhe kɛje ehe. (Abɛi 26:24-26) Kɛ́ asafoŋ onukpai lɛ yɔse akɛ wɔbɛ mɔ ko wɔwo wɔmli, wɔhe miitsɛ̃ lɛ, loo wɔmiinyɛ lɛ lɛ, amɛbaaye amɛbua wɔ kɛ Nyɔŋmɔ Wiemɔ lɛ ni wɔna akɛ, wɔnyɛŋ wɔkɛ sui gbohii nɛɛ ahi Yehowa asafo lɛ mli. (3 Mose 19:17, 18; Rom. 3:11-18) Ani wɔbaabo Biblia mli gbɛtsɔɔmɔi ni amɛbaahã wɔ lɛ toi?

7, 8. (a) Mɛɛ gbɛ nɔ Yehowa tsɔɔ ekudɔɔ etsuji ni yɔɔ shikpɔŋ lɛ nɔ lɛ? (b) Tsĩi gbɛtsɔɔmɔi komɛi ni yɔɔ Nyɔŋmɔ Wiemɔ lɛ mli lɛ atã ni otsɔɔ nɔ hewɔ ni esa akɛ wɔbo toi.

⁷ Yehowa tsɔɔ “nyɔŋ anɔkwafo kɛ hiɛshikalɔ lɛ” nɔ etsɔɔ ewebii ni yɔɔ shikpɔŋ lɛ nɔ lɛ gbɛ ni etsɔɔ amɛ nii. (Mat. 24:45-47) Yehowa kɛ nyɔŋ nɛɛ ewo Kristo, ni ji “asafo lɛ yitso” lɛ shishi. (Efe. 5:23) Nyɔŋ lɛ buɔ Biblia lɛ waa, tamɔ bɔ ni klɛŋklɛŋ afii 100 lɛ mli gbɛtsɔɔmɔ kuu lɛ hu bu ŋmalɛi lɛ waa lɛ, ni ekpɛlɛɔ nɔ akɛ nibii fɛɛ ni aŋmala yɛ mli lɛ jɛ Nyɔŋmɔ ŋɔɔ. (Kanemɔ 1 Tesalonikabii 2:13.) Ani ole gbɛtsɔɔmɔi ni yɔɔ Biblia lɛ mli lɛ ekomɛi?

⁸ Biblia lɛ kɛɛ wɔya kpeei daa. (Heb. 10:24, 25) Ewoɔ wɔ hewalɛ ni wɔ fɛɛ wɔhe Biblia mli tsɔɔmɔi kome too lɛ nɔŋŋ wɔye. (1 Kor. 1:10) Ekɛɔ wɔ akɛ wɔya nɔ wɔtao Maŋtsɛyeli lɛ klɛŋklɛŋ. (Mat. 6:33) Ehãa wɔnaa hu akɛ, eji wɔsɔ̃ akɛ wɔshiɛ yɛ shĩai amli, yɛ maŋ lɛ mli, kɛ agbɛnɛ hu, yɛ he fɛɛ he ni wɔkɛ mɛi baakpe yɛ. (Mat. 28:19, 20; Bɔf. 5:42; 17:17; 20:20) Nyɔŋmɔ Wiemɔ lɛ fãa asafoŋ onukpai akɛ, amɛkwɛ ni Nyɔŋmɔ asafo lɛ he atse. (1 Kor. 5:1-5, 13; 1 Tim. 5:19-21) Yehowa ewie hu akɛ, esa akɛ mɛi fɛɛ ni yɔɔ esafo lɛ mli lɛ ahe atse yɛ heloŋ kɛ mumɔŋ fɛɛ.—2 Kor. 7:1.

 9. Mɛni ji gbɛ koome pɛ ni Yesu tsɔɔ nɔ eyeɔ ebuaa wɔ ni wɔnu Nyɔŋmɔ Wiemɔ lɛ shishi?

⁹ Mɛi komɛi susuɔ akɛ amɛ diɛŋtsɛ amɛbaanyɛ amɛkase Biblia lɛ ni amɛnu shishi ni mɔ ko mɔ ko yeee ebuaaa amɛ. Shi Yesu ehala ‘nyɔŋ anɔkwafo lɛ’ ni eye ebua ewebii lɛ ni amɛnu Nyɔŋmɔ Wiemɔ lɛ shishi ni amɛkɛ emli gbɛtsɔɔmɔi lɛ atsu nii, ni nyɔŋ lɛ etsu nitsumɔ nɛɛ kɛjɛ afi 1919. Kɛ́ wɔkɛ gbɛtsɔɔmɔi ni yɔɔ Biblia lɛ mli lɛ tsu nii lɛ, asafo lɛ he baaya nɔ atse, ni toiŋjɔlɛ kɛ ekomefeemɔ baahi mli. No hewɔ lɛ, bi ohe akɛ, ‘Ani miboɔ gbɛtsɔɔmɔi fɛɛ ni Yesu tsɔɔ nyɔŋ anɔkwafo lɛ nɔ ekɛhãa lɛ toi?’

10. Yɛ Ezekiel wolo lɛ mli lɛ, mɛni he akɛ Yehowa gbɛjianɔtoo lɛ to?

¹⁰ Biblia lɛ wieɔ Yehowa gbɛjianɔtoo lɛ fã ni yɔɔ ŋwɛi lɛ he. Akɛ nɔkwɛmɔnɔ lɛ, yɛ ninaa ko ni Yehowa jie ehã Ezekiel lɛ mli lɛ, ena ni Yehowa ta shwiili ko nɔ, ni he fɛɛ he ni Yehowa mumɔ lɛ baatsɔɔ akɛ shwiili lɛ aya lɛ, jɛmɛ eyaa. (Ezek. 1:4-28) Shwiili nɛɛ damɔ shi kɛhã Yehowa gbɛjianɔtoo lɛ fã ni yɔɔ ŋwɛi lɛ. Bɔ ni Yehowa kudɔɔ egbɛjianɔtoo lɛ fã ni yɔɔ ŋwɛi lɛ ehãa lɛ, saa bɔ ni nibii yaa lɛ ehãa yɛ egbɛjianɔtoo lɛ fã ni yɔɔ shikpɔŋ lɛ nɔ lɛ mli lɛ he. Tsakemɔi babaoo ni wɔna yɛ asafo lɛ mli yɛ afii nyɔŋma ni eho nɛɛ amli lɛ hãa wɔnaa akɛ, Yehowa miiwo shwiili lɛ foi, no ji, eefee tsakemɔi pii yɛ egbɛjianɔtoo lɛ fã ni yɔɔ ŋwɛi lɛ mli. Etsɛŋ, Kristo kɛ ŋwɛibɔfoi krɔŋkrɔŋi lɛ baakpãtã jeŋ fɔŋ nɛɛ hiɛ ni amɛtse Yehowa gbɛ́i krɔŋkrɔŋ lɛ he. Kɛkɛ lɛ, mɛi fɛɛ ni yɔɔ je lɛ mli lɛ baakpɛlɛ nɔ akɛ, Yehowa kome too ji mɔ ni sa akɛ eyeɔ nibii fɛɛ nɔ!

11, 12. Mɛɛ nibii kpakpai komɛi Yehowa asafo lɛ tsuɔ yɛ naagbee gbii nɛɛ amli?

¹¹ Susumɔ nibii ni Nyɔŋmɔ gbɛjianɔtoo lɛ fã ni yɔɔ shikpɔŋ lɛ nɔ lɛ tsuɔ yɛ naagbee gbii nɛɛ amli lɛ he okwɛ. Tsumaa. Nyɛmimɛi ohai abɔ kɛ hiɛdɔɔ tsu nii kɛma Yehowa Odasefoi anitsumɔhe yitso hee ni yɔɔ Warwick, yɛ New York, yɛ U.S.A. lɛ. Nyɛmimɛi akpei abɔ kɛ amɛhe ehã ni amɛmiitsu nii dɛŋdɛŋ kɛmiimamɔ Maŋtsɛyeli Asai hei. Amɛteŋ mɛi komɛi hu miiye amɛmiibua kɛmiilɛɛ nitsumɔhe niji srɔtoi amli. Worldwide Design/Construction Department lɛ ni kwɛɔ nyɛmimɛi nɛɛ fɛɛ anɔ. Ani wɔhiɛ esɔɔɔ nyɛmimɛi babaoo ni jɛɔ amɛtsui mli amɛkɛ amɛhe shãa afɔle kɛtsuɔ nii dɛŋdɛŋ yɛ tsumaa nitsumɔi srɔtoi nɛɛ amli lɛ? Esaaa akɛ wɔhiɛ kpaa nɔ kɔkɔɔkɔ akɛ, Yehowa jɔɔ etsuji ni yɔɔ jeŋ fɛɛ ni jɛɔ heshibaa kɛ anɔkwayeli mli amɛtsuɔ onia kɛfiɔ nitsumɔi srɔtoi nɛɛ asɛɛ lɛ.​—Luka 21:1-4.

¹² Nitsɔɔmɔ. Yehowa eto skul srɔtoi ahe gbɛjianɔ koni ekɛtsɔɔ ewebii lɛ nii. (Yes. 2:2, 3) Ekomɛi ji, Gbɛgbamɔ Sɔɔmɔ Skul, Skul Kɛhã Maŋtsɛyeli Sane Kpakpa Jajelɔi, Gilead Skul, Skul Kɛha Mɛi ni Eje Betel Sɔɔmɔ Shishi, Skul Kɛhã Kpokpaa Nɔkwɛlɔi kɛ Amɛŋamɛi, Skul Kɛhã Asafoŋ Onukpai, Maŋtsɛyeli Sɔɔmɔ Skul, kɛ Skul Kɛhã Nitsumɔhe Nine Ajinafoi Akuu mli Bii kɛ Amɛŋamɛi. Skul srɔtoi nɛɛ hãa wɔnaa akɛ, Yehowa miisumɔ ni etsɔɔ ewebii lɛ nii waa! Agbɛnɛ hu, ayɛ Biblia lɛ kɛ woji krokomɛi yɛ wiemɔi ohai abɔ mli yɛ wɔwɛbsaiti, ni ji jw.org lɛ nɔ. Woji nɛɛ yeɔ ebuaa mɛi ni amɛnuɔ Biblia lɛ shishi jogbaŋŋ. Wɛbsaiti lɛ hiɛ fãi srɔtoi. Fã ko yɛ ni kɔɔ gbekɛbii ahe titri, ni fã ko hu yɛ ni kɔɔ wekui ahe, dani ayɛ fã ko ni akɛ amaniɛbɔi srɔtoi woɔ. Ani okɛ jw.org wɛbsaiti lɛ tsuɔ nii kɛ́ otee shiɛmɔ kɛ be ni nyɛfeɔ weku jamɔ?

13. Mɛɛ sɔ̃ kã Yehowa tsuji anɔkwafoi anɔ?

¹³ Eji hegbɛ kpele ni wɔná akɛ wɔyɛ Yehowa gbɛjianɔtoo lɛ mli! Amrɔ nɛɛ ni wɔbale bɔ ni Nyɔŋmɔ miisumɔ ni wɔhi shi wɔhã lɛ, eji wɔsɔ̃ akɛ wɔbo lɛ toi, ni wɔkɛ wɔwiemɔ kɛ wɔnifeemɔ atsɔɔ akɛ, wɔkpɛlɛɔ nɔ akɛ lɛ ji mɔ ni sa akɛ eyeɔ nibii fɛɛ nɔ. Fitemɔ sɔŋŋ je lɛ yaa nɔ efiteɔ, shi esa akɛ wɔya nɔ wɔkase Yehowa, ni ‘wɔnyɛ efɔŋ.’ (Lala 97:10) Esaaa akɛ wɔfeɔ wɔnii tamɔ mɛi ni “tsɛɔ efɔŋ akɛ ekpakpa kɛ ekpakpa hu akɛ efɔŋ” lɛ. (Yes. 5:20) Wɔmiisumɔ ni wɔfee nɔ ni sa Nyɔŋmɔ hiɛ, no hewɔ lɛ, wɔtswa wɔfai shi akɛ, wɔbaahã wɔgbɔmɔtsei, wɔjeŋba, kɛ wɔjamɔ he atse. (1 Kor. 6:9-11) Wɔsumɔɔ Yehowa, ni wɔkɛ wɔhiɛ fɔ̃ɔ enɔ; wɔkpɛ wɔyiŋ akɛ wɔbaaye lɛ anɔkwa ni wɔhi shi yɛ gbɛtsɔɔmɔi ni ekɛhã yɛ Biblia lɛ mli lɛ anaa. Enɛ hewɔ lɛ, wɔbɔɔ mɔdɛŋ fɛɛ ni wɔbaanyɛ koni wɔkɛ egbɛtsɔɔmɔi lɛ atsu nii yɛ asafo lɛ mli, yɛ shĩa, yɛ skul, yɛ nitsumɔhe lɛ, kɛ hei krokomɛi fɛɛ. (Abɛi 15:3) Mɛɛ nibii krokomɛi wɔbaanyɛ wɔfee kɛtsɔɔ akɛ wɔyeɔ Nyɔŋmɔ anɔkwa? Nyɛhãa wɔkwɛa.

14. Mɛni fɔlɔi baanyɛ afee kɛtsɔɔ akɛ amɛyeɔ Nyɔŋmɔ anɔkwa?

¹⁴ Bɔ ni wɔtsɔseɔ wɔbii wɔhãa. Gbɛ kome ni fɔlɔi baanyɛ atsɔ nɔ amɛtsɔɔ akɛ amɛyeɔ Yehowa anɔkwa ji, ni amɛkɛ gbɛtsɔɔmɔi ni ekɛhã yɛ Biblia lɛ mli yɛ bii atsɔsemɔ he lɛ baatsu nii. Kristofoi hãaa amɛkusum kɛ susumɔi ni mɛi ni ekaseko Biblia lɛ hiɛ yɛ bii atsɔsemɔ he lɛ aná amɛnɔ hewalɛ. (Efe. 2:2) Akɛ nɔkwɛmɔnɔ lɛ, yɛ maji komɛi anɔ lɛ, yei lɛ ji mɛi ni tsɔɔ bii lɛ nii, no hewɔ lɛ, ekolɛ nyɛmi nuu ko ni yɔɔ bii lɛ baasumɔ ni eshi gbekɛbii lɛ atsɔsemɔ ehã eŋa. Shi Biblia lɛ kɛɔ faŋŋ akɛ: “Tsɛmɛi, . . . nyɛyaa nɔ nyɛkwɛa [nyɛbii lɛ] yɛ Yehowa tsɔsemɔ kɛ ewiemɔkɛtsɔɔmɔ [aloo enitsɔɔmɔ loo egbɛtsɔɔmɔ] lɛ mli.” (Efe. 6:4; sh. niŋ.) Fɔlɔi ni sumɔɔ Yehowa lɛ miisumɔ ni wekukpaa kpakpa ahi amɛbii lɛ kɛ Yehowa teŋ, taakɛ eba lɛ yɛ Samuel gbɛfaŋ kɛjɛ egbekɛbiiashi lɛ.​—1 Sam. 3:19.

15. Kɛ́ wɔmiikpɛ wɔyiŋ yɛ shihilɛ mli saji ni he hiaa lɛ ahe lɛ, mɛni wɔbaanyɛ wɔfee kɛtsɔɔ akɛ wɔyeɔ Yehowa anɔkwa?

¹⁵ Yiŋ srɔtoi ni wɔkpɛɔ. Kɛ́ wɔhã gbɛtsɔɔmɔi ni Yehowa kɛhã kɛtsɔ e-Wiemɔ lɛ kɛ esafo lɛ nɔ lɛ kudɔ wɔ be ni wɔkpɛɔ wɔyiŋ yɛ shihilɛ mli saji ni he hiaa waa lɛ ahe lɛ, no hu tsɔɔ akɛ wɔyeɔ lɛ anɔkwa. Akɛ nɔkwɛmɔnɔ lɛ, mɛi komɛi ni efã gbɛ kɛtee maŋsɛɛ koni amɛyatsu nii lɛ kɛ amɛbii yahãa amɛwekumɛi, bɔ ni afee ni amɛná hejɔlɛ kɛtsu nii yɛ maŋsɛɛ he ni amɛtee lɛ. Eyɛ mli akɛ fɔlɔi lɛ diɛŋtsɛ ni baakpɛ amɛyiŋ yɛ sane ni tamɔ nɛkɛ lɛ he moŋ, shi esa akɛ amɛkai akɛ, wɔ fɛɛ wɔbaabu yiŋ srɔtoi ni wɔkpɛɔ lɛ ahe akɔntaa wɔhã Nyɔŋmɔ. (Kanemɔ Romabii 14:12.) Wɔ diɛŋtsɛ wɔnyɛŋ ‘wɔjaje wɔnajifaamɔi.’ No hewɔ lɛ, ani nilee yɛ mli akɛ wɔbaaku wɔhiɛ wɔshwie gbɛtsɔɔmɔi ni wɔ-Tsɛ Yehowa kɛhã wɔ yɛ Biblia lɛ mli lɛ anɔ be ni wɔkpɛɔ wɔyiŋ yɛ saji ni tamɔ nɛkɛ lɛ ahe? Dabi kwraa!​—Yer. 10:23.

16. Mɛni ehe bahia ni yoo ko akpɛ eyiŋ yɛ he? Mɛni ye ebua lɛ ni ekpɛ yiŋ ni ja?

¹⁶ Be ko lɛ, yoo ko ni yɔɔ maŋsɛɛ lɛ kɛ ewu kpɛ amɛyiŋ akɛ, amɛkɛ amɛbinuu ni amɛfɔ lɛ baayahã nuu lɛ fɔlɔi yɛ maŋ nɔ he ni amɛjɛ lɛ. Nakai beiaŋ nɔŋŋ ni Yehowa Odasefoi kɛ yoo lɛ bɔi Biblia lɛ kasemɔ. Etee ehiɛ waa yɛ nikasemɔ lɛ mli, ni ebana akɛ, eji esɔ̃ akɛ etsɔɔ ebi lɛ Yehowa he nii. (Lala 127:3; Abɛi 22:6) No hewɔ lɛ, oblayoo nɛɛ sɔle yɛ sane lɛ he, taakɛ Ŋmalɛi lɛ woɔ wɔ hewalɛ ni wɔfee lɛ, ni ekpa Yehowa fai ni eye ebua lɛ. (Lala 62:8, 9) Kɛfata he lɛ, ekɛ sane lɛ fɔ̃ nyɛmi yoo ni kɛ lɛ kaseɔ nii lɛ kɛ mɛi krokomɛi ni yɔɔ asafo lɛ mli lɛ ahiɛ. Enɛ ye ebua lɛ ni enyɛ ekpɛ yiŋ ni ja yɛ sane nɛɛ he. Eyɛ mli akɛ ewekumɛi kɛ enanemɛi nyɛ enɔ ni ekɛ gbekɛ lɛ ayahã ewu lɛ fɔlɔi lɛ moŋ, shi efeee nakai. Nyɛmimɛi ni yɔɔ esafo lɛ mli lɛ ye amɛbua lɛ kɛ gbekɛ lɛ fɛɛ, ni enɛ ta ewu lɛ tsuiŋ waa. Ekpɛlɛ ni akɛ lɛ bɔi Biblia lɛ kasemɔ ni lɛ hu ebɔi asafoŋ kpeei yaa. Te osusuɔ akɛ yoo nɛɛ baanu he ehã tɛŋŋ? Ŋwanejee ko bɛ he akɛ, emii shɛ ehe waa, ejaakɛ ena faŋŋ akɛ, Yehowa ehã esɔlemɔi lɛ ahetoo.

17. Mɛɛ gbɛtsɔɔmɔi esa akɛ wɔkɛtsu nii kɛ́ wɔkɛ mɛi miikase Biblia lɛ?

¹⁷ Bɔ ni wɔkɛ gbɛtsɔɔmɔi tsuɔ nii wɔhãa. Gbɛ kroko ni he hiaa ni wɔbaanyɛ wɔtsɔ nɔ wɔhã Nyɔŋmɔ ana akɛ wɔyeɔ lɛ anɔkwa ji, ni wɔkɛ gbɛtsɔɔmɔi fɛɛ ni esafo lɛ baahã wɔ lɛ baatsu nii. Akɛ nɔkwɛmɔnɔ lɛ, awo wɔ ŋaa akɛ, kɛ́ wɔkɛ mɛi bɔi Mɛni Biblia lɛ Tsɔɔ Diɛŋtsɛ? wolo lɛ kasemɔ nɔŋŋ lɛ, wɔŋɔ minitii fioo ni wɔkɛwie Yehowa asafo lɛ he wɔtsɔɔ amɛ be fɛɛ be ni wɔkɛ amɛ baakase nii. Wɔbaanyɛ wɔkɛ vidio ni ji Mɛni Yaa Nɔ yɛ Maŋtsɛyeli Asa lɛ Nɔ? lɛ, loo broshuɔ ni ji Namɛi Feɔ Yehowa Suɔmɔnaa Nii Ŋmɛnɛ? lɛ atsu nii kɛfee enɛ. Agbɛnɛ hu, ahã wɔle akɛ, kɛ́ wɔkɛ mɔ ko kase Biblia lɛ Tsɔɔ wolo lɛ wɔgbe naa, ni abaptisi lɛ po lɛ, wɔkɛ lɛ akase ‘Nyɛhia Nyɔŋmɔ Suɔmɔ lɛ Mli’ wolo lɛ, bɔ ni afee ni efi shi shiŋŋ yɛ hemɔkɛyeli lɛ mli. (Kol. 2:7) Ani okɛ ŋaawoi nɛɛ miitsu nii?

18, 19. Mɛni hewɔ Yehowa sa shidaa?

¹⁸ Kɛ́ wɔkɛɛ wɔbaada Yehowa shi ni wɔtsɔɔ nibii ni efee ehã wɔ lɛ, wɔgbeŋ naa! Eduromɔ naa “wɔyɔɔ wala ni wɔtsiɔ wɔhe ni wɔyɔɔ shihilɛ mli yɛ.” (Bɔf. 17:27, 28) Kɛfata he lɛ, ehã wɔ nikeenii ko ni jara wa waa. No ji Biblia lɛ. Wɔhiɛ sɔɔ wolo nɛɛ, ni wɔkɛ Kristofoi ni hi Tesalonika lɛ kpãa gbee akɛ, nibii fɛɛ ni awie yɛ mli lɛ jɛ Nyɔŋmɔ ŋɔɔ.​—1 Tes. 2:13.

¹⁹ Nyɔŋmɔ Wiemɔ lɛ eye ebua wɔ. Ehã wɔtsi wɔbɛŋkɛ Yehowa ni lɛ hu etsi ebɛŋkɛ wɔ. (Yak. 4:8) Wɔ-Tsɛ ni yɔɔ ŋwɛi lɛ ehã wɔ hegbɛ ni nɔ bɛ akɛ wɔhi egbɛjianɔtoo lɛ mli. Wɔhiɛ sɔɔ nibii kpakpai nɛɛ ni efee ehã wɔ lɛ waa! Mɔ ni ŋma Lala 136 lɛ hu hiɛ sɔ nibii ni Yehowa efee ehã lɛ lɛ, ni ewie yɛ elala lɛ mli akɛ: “Nyɛdaa Yehowa shi, ejaakɛ ehi; ejaakɛ naanɔ emɔbɔnalɛ hiɔ shi kɛyaa!” (Lala 136:1) Anɔkwa, etĩ wiemɔ ni ji “naanɔ emɔbɔnalɛ hiɔ shi kɛyaa” lɛ mli yɛ elala lɛ kukuji 26 lɛ eko fɛɛ eko naagbee. Kɛ́ wɔye Yehowa kɛ egbɛjianɔtoo lɛ anɔkwa lɛ, ebaaduro wɔ naanɔ wala, ni wɔbaana akɛ, lɛɛlɛŋ, emɔbɔnalɛ lɛ hiɔ shi kɛyaa naanɔ!