Mɔ ni Hiɛ Kã Shi lɛ, Ehe Jɔ

BE KROKO ni Antonia tee jɛmɛ lɛ, yoo lɛ saa ejɛ lɛ ekoŋŋ. Mɛni Antonia fee? Ewie akɛ: “Sane lɛ gba minaa waa, ejaakɛ mifeko lɛ nɔ ko.” Kɛ̃lɛ, ekpa lɛ fai shi kome ekoŋŋ, ni ekɛɛ lɛ akɛ enuɔ eshihilɛ lɛ shishi.

Eji bo ji Antonia kulɛ, mɛni obaafee? Ani omli baafu yoo lɛ waa ni ofee lɛ nɔ ko kɛtse? Aloo obaato otsui shi? Anɔkwa, kɛ́ mɔ ko wo wɔmli la loo efee wɔ nɔ ko ni yɔɔ dɔlɛ, tamɔ nɔ ni yoo lɛ fee Antonia lɛ, bei pii lɛ ebɛ mlɛo akɛ wɔbaato wɔtsui shi ni wɔkɛ lɛ aye yɛ mlijɔlɛ mli.

Biblia lɛ woɔ Kristofoi hewalɛ ni amɛmli ajɔ, ni ehãa wɔleɔ akɛ mɛi ni hiɛ kã shi lɛ amli jɔ. Yakobo wie akɛ: “Namɔ ji hiɛshikalɔ kɛ saneshishinulɔ yɛ nyɛteŋ? Etsɔ ejeŋba kpakpa lɛ nɔ ehã ana akɛ ekɛ mlijɔlɛ ni jɛɔ hiɛshikamɔ mli kɛbaa lɛ tsuɔ enitsumɔi.” (Yak. 3:13) Mɛni hewɔ Ŋmalɛi lɛ kɛɔ akɛ mɛi ni mli jɔ loo mɛi ni he jɔ lɛ, ahiɛ kã shi lɛ? Ni mɛni baaye abua wɔ ni wɔjie su kpakpa nɛɛ kpo?

Mlijɔlɛ kuɔ mlifu naa. “Naajɔlɛ hetoo kuɔ mlila naa; shi wiemɔ ní wa teɔ mlifu shi.”​—Abɛi 15:1.

Kɛ́ mɔ ko jije wɔnaa, ni wɔmli fu ni wɔfee lɛ nɔ ko kɛtse lɛ, bei pii lɛ no moŋ hãa sane lɛ mli woɔ wu. (Abɛi 26:21) Shi kɛ́ wɔye wɔmumɔ nɔ, ni wɔwie kɛ naajɔlɛ lɛ, sane lɛ eyaŋ shɔŋŋ, ni ekolɛ mɔ ni mli efu wɔ lɛ po tsui he baajɔ.

Antonia ná enɛ mli niiashikpamɔ. Bɔ ni ekɛ yoo ni jɛ lɛ lɛ wie kɛ naajɔlɛ lɛ hã yoo lɛ jwa yaafo. Ekɛɛ Antonia akɛ, eyɛ naagbai pii, lɛ diɛŋtsɛ enɔ kɛ eweku lɛ mli nɔ. Antonia ye yoo lɛ odase jogbaŋŋ, ni ekɛ lɛ bɔi Biblia lɛ kasemɔ. Eji Antonia eyanáaa tsui ni ekɛ mlifu hã yoo lɛ hetoo kulɛ, ani nibii baaya lɛ bɔ ni etee lɛ lɛ?

Kɛ́ wɔmli fuuu mra lɛ, wɔbaaná miishɛɛ. “Mɛi ni he jɔ lɛ yɛ miishɛɛ, ejaakɛ amɛbaaná shikpɔŋ lɛ.”​—Mat. 5:5.

Mɛni hewɔ mɛi ni he jɔ lɛ yɔɔ miishɛɛ lɛ? Mɛi pii ni be ko ni eho lɛ, amɛmli fuɔ mramra lɛ baakɛɛ bo akɛ, no mli lɛ amɛbɛ miishɛɛ. Shi amrɔ nɛɛ ni amɛtsake lɛ, amɛyɛ miishɛɛ, ejaakɛ amɛbaa amɛjeŋ jogbaŋŋ, ni amɛyɛ hiɛnɔkamɔ akɛ wɔsɛɛ lɛ, amɛbaahi shi kɛya naanɔ. (Kol. 3:12) Nyɛmi nuu ko ni atsɛɔ lɛ Adolfo, ni amrɔ nɛɛ esɔmɔɔ akɛ kpokpaa nɔkwɛlɔ yɛ Spain lɛ niiashikpamɔ lɛ maa enɛ nɔ mi.

Adolfo wie akɛ: “No mli lɛ, miyɛ kɛkɛ, ni mibɛ hiɛnɔkamɔ ko kwraa. Mimli fuɔ oyayaayai, ni kɛ́ mimli fu lɛ, mifeɔ basabasa. Ebashɛ he ko po ni minanemɛi sheɔ gbeyei akɛ mapila amɛ. Shi gbi ko lɛ, mikɛ mɔ ko yanɔ ni atsurɔ mi kakla shii ekpaa. Lá ho mi waa, ni shwɛ sharao kulɛ migbo. Enɛ hã mina akɛ esa akɛ matsake misubaŋ.”

Ŋmɛnɛ lɛ, Adolfo etsake kwraa. Amrɔ nɛɛ etsɔɔ ewiemɔ kɛ enifeemɔ nɔ eyeɔ ebuaa mɛi koni amɛ hu amɛkɛ mɛi ahi shi yɛ toiŋjɔlɛ mli. Mɛi pii sumɔɔ esane, ejaakɛ ekɛ mɔ fɛɛ mɔ ŋmɔɔ. Adolfo kɛɛ eŋɔɔ enaa waa akɛ enyɛ etsake esubaŋ, ni eeda Yehowa shi akɛ eye ebua lɛ ni ekase bɔ ni akɛ mɛi yeɔ yɛ mlijɔlɛ mli.

Kɛ́ wɔmli jɔ lɛ, Yehowa tsui nyɔɔ emli. “Mibi, feemɔ ohe nilelɔ, ní ohã mitsui anyɔ mimli, ní maná hetoo mahã mɔ ni bɔɔ mi ahora lɛ.”​—Abɛi 27:11.

Satan Abonsam, ni ji Yehowa henyɛlɔ ni fe fɛɛ lɛ, jɛɔ lɛ daa. Kulɛ Yehowa mli baanyɛ afu yɛ sopamɔ ni Abonsam sopaa lɛ lɛ hewɔ. Shi Biblia lɛ kɛɔ akɛ, Yehowa ‘toɔ etsui shi.’ (2 Mose 34:6) Kɛ́ wɔkase Nyɔŋmɔ, ni wɔ hu wɔto wɔtsui shi ni wɔmli fuuu mramra lɛ, etsɔɔ akɛ wɔhiɛ kã shi, ni no baahã Yehowa tsui anyɔ emli waa.​—Efe. 5:1.

Ŋmɛnɛ lɛ, “shwãlɔi, henɔwolɔi, musubɔlɔi, . . . mɛi-aheguɔgbelɔi, mɛi ni nyɛɛɛ amɛhe nɔ amɛye,” kɛ “mɛi ni hiɛ yɔɔ la” eyi je lɛŋ obɔ. No hewɔ lɛ, ewaaa akɛ mɛi baafee nibii ni baanyɛ awo wɔmli la. (2 Tim. 3:2, 3) Fɛɛ sɛɛ lɛ, esa akɛ wɔjie mlijɔlɛ kpo, ejaakɛ Yehowa tsuji ji wɔ. Nyɔŋmɔ Wiemɔ lɛ kɛɔ akɛ: “Hiɛshikamɔ ni jɛ ŋwɛi lɛ . . . esumɔɔ toiŋjɔlɛ, enuɔ nii ashishi.” (Yak. 3:17) Mɛi ni hiɛ kã shi lɛ amli fuuu mra. Amɛnuɔ nii ashishi, ni amɛkɛ mɛi hiɔ shi yɛ toiŋjɔlɛ mli. Kɛ́ wɔjie su kpakpa nɛɛ kpo lɛ, wekukpaa ni yɔɔ wɔ kɛ Yehowa, ni ji hiɛshikamɔ fɛɛ Jɛɛhe lɛ teŋ lɛ mli baaya nɔ awa daa.