Amɛkɛ Amɛhe Hã Yɛ Amɛsuɔmɔ Naa​—Yɛ Turkey

KLƐŊKLƐŊ AFII 100 lɛ mli Kristofoi lɛ bɔ mɔdɛŋ fɛɛ ni amɛbaanyɛ koni amɛshiɛ “Maŋtsɛyeli lɛ he sane kpakpa” lɛ amɛhã mɛi babaoo. (Mat. 24:14) Amɛteŋ mɛi komɛi po fã gbɛ kɛtee maji krokomɛi anɔ amɛyashiɛ, tamɔ bɔfo Paulo nɛkɛ. Etee he ni ŋmɛnɛŋmɛnɛ beiaŋ maŋ ni atsɛɔ lɛ Turkey lɛ yɔɔ lɛ, ni ekɛ be babaoo shiɛ waa yɛ nakai kpokpaa lɛ nɔ.a Yɛ afi 2014 lɛ, ato shiɛmɔ he tafãa krɛdɛɛ ko he gbɛjianɔ yɛ Turkey. Mɛni hewɔ ato tafãa nɛɛ he gbɛjianɔ? Ni namɛi kɛ amɛhe wo mli?

Mɛi akpekpei 79 yɔɔ Turkey, ni shiɛlɔi 2,800 kɛ sɛɛ yɔɔ jɛmɛ. Ni tsɔɔ akɛ, esa akɛ shiɛlɔ fɛɛ shiɛlɔ ashiɛ ahã mɛi aaafee 28,000 sɔŋŋ. Enɛ hewɔ lɛ, mɛi fioo pɛ nyɛmimɛi lɛ enyɛ amɛshiɛ amɛhã. Ato shiɛmɔ he tafãa krɛdɛɛ lɛ he gbɛjianɔ koni anyɛ ashiɛ ahã mɛi babaoo yɛ be kukuoo ko mli. Nyɛmimɛi aaafee 550 ni wieɔ Turkey wiemɔ lɛ jɛ maji krokomɛi anɔ amɛbafata nyɛmimɛi ni yɔɔ Turkey lɛ ahe kɛhã tafãa nɛɛ. Mɛni amɛnyɛ amɛtsu?

Aye mɛi babaoo odase. Nyɛmimɛi ni yɔɔ asafo ko ni yɔɔ Istanbul lɛ wie akɛ: “Mɛi ni na wɔ lɛ bi akɛ: ‘Ani nyɛmiifee kpee krɛdɛɛ ko yɛ biɛ? Wɔmiina Yehowa Odasefoi yɛ he fɛɛ he!’” Nyɛmimɛi ni yɔɔ asafo ko ni yɔɔ Izmir maŋ lɛ mli lɛ hu bɔ amaniɛ akɛ: “Nuu ko ni miitsu nii yɛ he ko ni awóɔ taksi yɛ lɛ bi asafoŋ onukpa ko akɛ, ‘Mɛni yaa nɔ? Etamɔ nɔ ni nyɛhiɛ edɔ fe daa!’” Amaniɛbɔi nɛɛ hãa wɔnaa akɛ, mɛi yɔse nɔ ni nyɛmimɛi lɛ tsuɔ lɛ.

Nyɛmimɛi ni jɛ maŋsɛɛ ni kɛ amɛhe wo tafãa lɛ mli lɛ ná miishɛɛ waa. Steffen, ni jɛ Denmark lɛ wie akɛ: “Mikɛ mɛi ni leee Yehowa he nɔ ko nɔ ko kpe daa gbi yɛ shiɛmɔ nɔ. Minu he waa akɛ miihã mɛi miile Yehowa gbɛ́i lɛ.” Jean-David, ni jɛ France lɛ hu wie akɛ: “Wɔye ŋmɛlɛtswai abɔ yɛ he ko bibioo ni ahã wɔ lɛ. Wɔná miishɛɛ waa! Mɛi lɛ pii leee po akɛ mɛi komɛi yɛ ni atsɛɔ amɛ Yehowa Odasefoi. Etamɔ nɔ ni yɛ shinaa fɛɛ shinaa naa lɛ, abo wɔ toi, wɔnyɛ wɔjie wɔvidioi lɛ eko, ni wɔshi wolo wɔhã shĩatsɛ lɛ.”

Nyɛmimɛi 550 ni kɛ amɛhe wo tafãa nɛɛ mli lɛ hã woji aaafee 60,000 yɛ otsii enyɔ pɛ mli! Anɔkwa, tafãa lɛ hã anyɛ aye mɛi babaoo odase.

Mɛi pii kɛ ekãa babaoo shiɛ. Tafãa krɛdɛɛ lɛ ná nyɛmimɛi ni yɔɔ Turkey lɛ anɔ hewalɛ. Amɛteŋ mɛi babaoo to gbɛjianɔ koni amɛkɛ amɛhe awo be fɛɛ sɔɔmɔ lɛ mli. Tafãa lɛ sɛɛ lɛ, aná gbɛgbalɔi hei 82 sɔŋŋ yɛ Turkey yɛ afi kome pɛ mli.

Be ni tafãa lɛ ba naagbee lɛ, nyɛmimɛi ni jɛ maŋsɛɛ amɛbaye amɛbua lɛ ku amɛsɛɛ kɛtee amɛmaji lɛ anɔ. Shi nibii ni amɛkase yɛ tafãa be lɛ mli lɛ miiye eebua amɛ lolo. Nyɛmi yoo ko ni jɛ Germany, ni atsɛɔ lɛ Şirin lɛ wie akɛ: “Mihiɛ gboɔ akɛ maye odase be ni minyiɛɛɛ shiɛmɔ nɔ, shi ewaaa kwraa kɛhã nyɛmimɛi ni yɔɔ Turkey lɛ akɛ amɛbaafee nakai. Yɛ tafãa krɛdɛɛ lɛ mli lɛ, amɛnɔkwɛmɔnɔ kpakpa lɛ, kɛ sɔlemɔ ni misɔle waa lɛ ye ebua mi ni miye gbɔjɔmɔ nɛɛ nɔ. Minyɛ mishiɛ ni mihã tratii yɛ oketekei adaamɔhe lɛ po! Amrɔ nɛɛ, mihiɛ gbooo tamɔ be ko ni eho.”

Johannes ni jɛ Germany lɛ wie akɛ: “Mikɛ nibii komɛi ni mikase lɛ miitsu nii yɛ shiɛmɔ nitsumɔ lɛ mli. Nyɛmimɛi ni yɔɔ Turkey lɛ bɔɔ mɔdɛŋ waa akɛ amɛbaashiɛ amɛhã mɛi fɛɛ yɛ he fɛɛ he. Amɛŋɔɔ hegbɛ fɛɛ hegbɛ ni amɛbaaná lɛ kɛshiɛɔ. Mikpɛ miyiŋ akɛ, kɛ́ miku misɛɛ mitee Germany lɛ, mi hu mafee nakai. Amrɔ nɛɛ mishiɛɔ mihãa mɛi babaoo fe be ko ni eho.”

Nyɛmiyoo Zeynep ni jɛ France lɛ wie akɛ: “Tafãa nɛɛ sa bɔ ni mitsuɔ shiɛmɔ nitsumɔ lɛ mihãa lɛ he waa. Ehã mifee ekãa ni mikɛ mihiɛ fɔ̃ Yehowa nɔ waa fe tsutsu lɛ po.”

Nyɛmimɛi lɛ jie suɔmɔ kpo amɛtsɔɔ amɛhe. Eyɛ mli akɛ nyɛmimɛi ni kɛ amɛhe wo tafãa nɛɛ mli lɛ jɛ maji srɔtoi anɔ moŋ, shi bɔ ni amɛfee ekome kɛhi shi yɛ suɔmɔ mli lɛ sa kadimɔ waa. Nyɛminuu Jean-David ni wɔtsĩ etã kɛtsɔ hiɛ lɛ wie akɛ: “Nyɛmimɛi lɛ fee wɔ gbɔ diɛŋtsɛ. Amɛkɛ wɔ hi shi akɛ amɛnanemɛi kɛ amɛwekumɛi. Amɛhã wɔbahi amɛŋɔɔ. Mile akɛ wɔyɛ nyɛmimɛi yɛ je lɛŋ fɛɛ, ejaakɛ mikane he sane shii abɔ yɛ wɔwoji lɛ amli. Shi enɛ lɛ, mi diɛŋtsɛ miná mli niiashikpamɔ. Ehã miná miishɛɛ waa akɛ mifata Yehowa webii lɛ ahe, ni miida lɛ shi waa akɛ ehã mi hegbɛ ni nɔ bɛ nɛɛ.”

Nyɛmi yoo ko ni jɛ France, ni atsɛɔ lɛ Claire lɛ wie akɛ: “Denmark wɔjɛ jio, France jio, Germany jio, Turkey jio lɛ, wɔhi shi akɛ weku kome mli bii. Efee tamɔ nɔ ni Nyɔŋmɔ ejie husui fɛɛ ni yɔɔ maji lɛ ateŋ lɛ.”

Nyɛmiyoo Stéphanie, ni lɛ hu ejɛ France lɛ wie kɛfata he akɛ: “Tafãa krɛdɛɛ lɛ hã wɔna akɛ, suɔmɔ ni wɔ fɛɛ wɔyɔɔ kɛhã Yehowa lɛ ni feɔ wɔ ekome, shi jeee wɔkusum loo wɔmaŋ wiemɔ.”

Nyɛmimɛi ni jɛ maŋsɛɛ lɛ ateŋ mɛi babaoo kpɛ amɛyiŋ akɛ, amɛbaato gbɛjianɔ ni amɛfã amɛbahi Turkey koni amɛye amɛbua, ejaakɛ hiamɔ lɛ da waa yɛ jɛmɛ. Amɛteŋ mɛi komɛi efee nakai momo, ni nyɛmimɛi lɛ ahiɛ sɔɔ amɛ waa.

Akɛ nɔkwɛmɔnɔ lɛ, no mli lɛ, asafoŋ onukpa kome pɛ kwɛɔ kuu ko ni etse ehe banee ni shiɛlɔi 25 yɔɔ mli lɛ nɔ, ni ekome etsu nitsumɔ nɛɛ afii pii. No hewɔ lɛ, yɛ afi 2015 lɛ, nyɛmimɛi lɛ ná miishɛɛ waa be ni nyɛmimɛi ekpaa ni jɛ Germany kɛ Netherlands lɛ fã amɛbahi jɛmɛ koni amɛye amɛbua amɛ lɛ!

Nyɛmimɛi ni efã amɛyahi Turkey be saŋŋ nɛ lɛ kɛ naagbai srɔtoi ekpe. Shi ani amɛná fã ni amɛfã kɛtee jɛmɛ lɛ he sɛɛ? Hɛɛ, amɛná he sɛɛ waa. Susumɔ nɔ ni amɛteŋ mɛi komɛi ewie lɛ he okwɛ:

Nyɛminuu Federico jɛ Spain, eye aaafee afii 40 ni ebote gbalashihilɛ mli. Nɔ ni ewie ji akɛ: “Akɛni mibɛ heloonaa nibii pii ni baahe mijwɛŋmɔ hewɔ lɛ, minyɛɔ mikɛ mijwɛŋmɔ maa nibii ni he hiaa diɛŋtsɛ lɛ anɔ.” Federico kɛɛ ebaawo mɛi fɛɛ ni baanyɛ ayasɔmɔ yɛ hei ni hiamɔ lɛ da yɛ lɛ hewalɛ ni amɛfee nakai. Mɛni hewɔ? Ekɛɛ akɛ: “Kɛ́ ofã kɛtee maŋsɛɛ akɛ oyaaye obua mɛi ni amɛle Yehowa lɛ, yɛ anɔkwale mli lɛ, okɛ ohe miiwo edɛŋ. Yehowa baakwɛ bo, ni bo diɛŋtsɛ obaana enɛ faŋŋ.”

Nyɛminuu Rudy jɛ Netherlands, eye aaafee afii 50 ni ebote gbalashihilɛ mli. Nɔ ni lɛ hu ewie ji akɛ: “Kɛ́ wɔbaakɛɛ lɛ, wɔmiisɔmɔ yɛ ta lɛ hiɛ, no ji, wɔmiishiɛ wɔmiihã mɛi babaoo ni leee anɔkwale lɛ he nɔ ko nɔ ko, ni enɛ hãa wɔtsui nyɔɔ wɔmli waa. Kɛ́ wɔna bɔ ni mɛi náa miishɛɛ kɛ́ amɛbamɔ anɔkwale lɛ mli lɛ, ehãa wɔmii shɛɔ wɔhe waa.”

Nyɛminuu Sascha eye aaafee afii 40, ejɛ Germany, ni lɛ hu ebote gbalashihilɛ mli. Nɔ ni ewie ji akɛ: “Be fɛɛ be ni maya shiɛmɔ lɛ, mikɛ mɛi ni leee anɔkwale lɛ he nɔ ko nɔ ko kwraa lɛ kpeɔ. Mitsui nyɔɔ mimli waa akɛ mahã mɛi ni tamɔ nakai lɛ hegbɛ ni amɛbale Yehowa.”

Nyɛmiyoo Atsuko jɛ Japan, eye aaafee afii 35, ni ebote gbalashihilɛ mli. Ewie akɛ: “Be ko ni eho lɛ, mishwe waa ni Harmagedon aba amrɔ nɔŋŋ. Shi kɛjɛ be ni mifã kɛtee Turkey lɛ, midaa Yehowa shi waa akɛ eeto etsui shi lolo. Miina faŋŋ akɛ, Yehowa miikudɔ nibii, ni enɛ ehã mishwe waa akɛ mahã wekukpaa ni yɔɔ mi kɛ lɛ teŋ lɛ mli awa.”

Nyɛmi yoo ko ni jɛ Russia, ni eye aaafee afii 30, ni atsɛɔ lɛ Alisa lɛ wie akɛ: “Gbɛ nɛɛ ni mitsɔɔ nɔ misɔmɔɔ Yehowa lɛ eye ebua mi ni misa enibii kpakpai lɛ fɛɛ anaa mikwɛ.” (Lala 34:9) Ekɛfata he akɛ: “Yehowa ji mi-Tsɛ, shi kɛfata he lɛ, eji mi-Naanyo kpakpa, ni shihilɛi srɔtoi ni mikɛkpeɔ lɛ hãa mileɔ lɛ jogbaŋŋ. Miishɛɛ, niiashikpamɔi kpakpai, kɛ jɔɔmɔi babaoo eyi mishihilɛ mli obɔ!”

Shiɛmɔ tafãa krɛdɛɛ ni ato he gbɛjianɔ yɛ Turkey lɛ hã mɛi babaoo nu sane kpakpa lɛ. Shi hei pii yɛ lolo ni sane kpakpa lɛ shɛko. Daa gbi lɛ, mɛi ni efã kɛtee Turkey koni amɛyasɔmɔ yɛ he ni hiamɔ lɛ da yɛ lɛ kɛ mɛi ni leee Yehowa he nɔ ko kwraa kpeɔ. Ani obaasumɔ ni oshiɛ yɛ shikpɔŋkuku ko ni tamɔ nakai lɛ mli? Kɛ́ nakai ni lɛ, belɛ, wɔmiiwo bo hewalɛ ni ‘ohole ohiŋmɛii anɔ okwɛ ŋmɔji lɛ, akɛ amɛgba futaa ni sa kpamɔ.’ (Yoh. 4:35) Ani obaanyɛ oyasɔmɔ yɛ he ko ni hiamɔ lɛ da yɛ? Kɛ́ hetoo ji hɛɛ lɛ, jee shishi bianɛ ni oto nibii ahe gbɛjianɔ koni onyɛ oshɛ oti nɛɛ he. Ná nɔmimaa akɛ, kɛ́ okɛ obe kɛ ohewalɛ babaoo shã afɔle koni onyɛ oye obua ni ashiɛ sane kpakpa lɛ “kɛyashi shikpɔŋ lɛ nɔ hei ni yɔɔ shɔŋŋshɔŋŋ lɛ,” Yehowa baajɔɔ bo waa!​—Bɔf. 1:8.