Ani Ole Ohenyɛlɔ Lɛ Jogbaŋŋ?

 1. Mɛni Yehowa hã ale yɛ wɔhenyɛlɔ lɛ he yɛ Eden abɔɔ lɛ mli?

ADAM le jogbaŋŋ akɛ onufui ewieee. No hewɔ lɛ, be ni ená ele akɛ onufu ko kɛ Hawa ewie lɛ, eeenyɛ efee akɛ, ekɔ sɛɛ akɛ mumɔ ko ni kɛ Hawa wie lɛ. (1 Mo. 3:1-6) Nɔ ko fioo pɛ Adam kɛ Hawa le yɛ mumɔ nɛɛ he. Fɛɛ sɛɛ lɛ, Adam kpɛ eyiŋ akɛ ebaaje Yehowa, ni ji e-Tsɛ ni yɔɔ ŋwɛi ni sumɔɔ lɛ waa lɛ sɛɛ ni eyafata gbɔ nɛɛ he koni amɛte shi amɛwo Yehowa. (1 Tim. 2:14) Nɔŋŋ kɛkɛ ni Yehowa bɔi henyɛlɔ ni hã Adam kɛ Hawa gbo enɔ toi lɛ he sane kpojiemɔ fiofio. Ewo shi akɛ wɔsɛɛ lɛ, ebaakpãtã nakai mɔ fɔŋ lɛ hiɛ. Shi Yehowa hã ale hu akɛ, nakai mumɔŋ gbɔmɔ ni tsɔ onufu lɛ nɔ ewie lɛ baate shi ewo mɛi ni sumɔɔ Nyɔŋmɔ lɛ kɛyashi be ko, ni no sɛɛ lɛ, abaakpãtã ehiɛ.​—1 Mo. 3:15.

2, 3. Mɛni eeenyɛ efee akɛ no ji yiŋtoo hewɔ ni be ni Mesia lɛ bako lɛ Yehowa hãaa ale Satan he saji pii lɛ?

² Yehowa hiɛ kã shi waa, ni no hewɔ lɛ, etsɔko wɔ ŋwɛibɔfo nɛɛ ni tse ehiɛ atua lɛ gbɛ́i diɛŋtsɛ yɛ he ko he ko.a Be ni ŋwɛibɔfo nɛɛ tse atua lɛ sɛɛ aaafee afii 2,500 dani Nyɔŋmɔ tsɔɔ adesai mɔ ni ŋwɛibɔfo nɛɛ ji. (Hiob 1:6) Gbɛ́i ni akɛle lɛ ji “Satan,” ni eshishi ji, “Shiteekɛwolɔ.” Yɛ Hebri Ŋmalɛ lɛ mli fɛɛ lɛ, gbɛ́i nɛɛ jeɔ kpo yɛ woji etɛ pɛ amli; 1 Kronika, Hiob, kɛ Zakaria. Be ni Mesia lɛ bako lɛ, Nyɔŋmɔ hãaa wɔle wɔhenyɛlɔ lɛ he saji babaoo. Mɛni hewɔ?

³ Yehowa ewieee Satan kɛ nibii ni efeɔ lɛ he sane fitsofitso yɛ Hebri Ŋmalɛ lɛ mli, ejaakɛ jeee no hewɔ ehã aŋma Hebri Ŋmalɛ lɛ. Nɔ titri hewɔ ni ehã aŋma Hebri Ŋmalɛ lɛ ji, koni eye ebua mɛi ni amɛna mɔ ni ji Mesia lɛ ni amɛnyiɛ esɛɛ. (Luka 24:44; Gal. 3:24) Be ni Yesu, ni ji Mesia lɛ ba lɛ, Yehowa tsɔ lɛ kɛ ekaselɔi lɛ anɔ ehã wɔle Satan kɛ ŋwɛibɔfoi ni yafata ehe lɛ ahe saji babaoo.b Enɛ sa jogbaŋŋ, ejaakɛ Yesu kɛ mɛi ni afɔ amɛ mu lɛ anɔ Yehowa baatsɔ ekpãtã Satan kɛ esamaŋfoi lɛ ahiɛ.​—Rom. 16:20; Kpo. 17:14; 20:10.

 4. Mɛni hewɔ esaaa akɛ wɔsheɔ Abonsam gbeyei?

⁴ Bɔfo Petro tsɛ Satan Abonsam akɛ “jata ni miihũu,” ni Yohane hu tsɛ lɛ “onufu” kɛ “drako.” (1 Pet. 5:8; Kpo. 12:9) Shi esaaa akɛ wɔsheɔ Abonsam gbeyei, ejaakɛ hewalɛ ni eyɔɔ lɛ yawaa he ko. (Kanemɔ Yakobo 4:7.) Yehowa, Yesu, kɛ ŋwɛibɔfoi anɔkwafoi lɛ yɛ wɔsɛɛ, ni amɛbaaye amɛbua wɔ ni wɔwu wɔshi wɔhenyɛlɔ Abonsam. Loloolo lɛ, esa akɛ wɔná sanebimɔi etɛ komɛi ni he hiaa waa lɛ ahetoo, nomɛi ji: Mɛi enyiɛ yɔɔ Satan kudɔmɔ shishi? Mɛɛ gbɛi anɔ Satan tsɔɔ enáa mɛi anɔ hewalɛ? Ani nibii komɛi yɛ ni Satan nyɛŋ afee? Wɔbaahã sanebimɔi nɛɛ ahetoo ni wɔkwɛ nɔ ni wɔbaanyɛ wɔkase yɛ mli.

5, 6. Mɛni hewɔ adesai anɔyelii nyɛŋ amɛkɛ tsakemɔi ni he hiaa adesai fe fɛɛ lɛ aba?

⁵ Dani Nu Afua lɛ baaba lɛ, Satan laka ŋwɛibɔfoi komɛi ni ehã amɛkɛ yei baná bɔlɛ yɛ shikpɔŋ lɛ nɔ. Amrɔ nɛɛ, ŋwɛibɔfoi atuatselɔi nɛɛ ebaje Satan hewalɛ shishi. Be ni Biblia lɛ wieɔ sane nɛɛ he lɛ, ekɛ ŋwɛibɔfoi lɛ to ŋulamii ahe, ni ewie akɛ, be ni drako lɛ tse ehe kɛje Yehowa weku lɛ he lɛ, ekɛ elei gbala ŋwɛi ŋulamii amlijai etɛ mli ekome kɛnyiɛ esɛɛ. (1 Mo. 6:1-4; Yuda 6; Kpo. 12:3, 4) Be ni ŋwɛibɔfoi nɛɛ tse amɛhe kɛje Nyɔŋmɔ weku lɛ he lɛ, amɛyafata Satan he akɛ Nyɔŋmɔ henyɛlɔi. Shi kaasusu akɛ atuatselɔi nɛɛ ateŋ mɔ fɛɛ mɔ feɔ nɔ ni esumɔɔ kɛkɛ ni atoko amɛhe gbɛjianɔ. Satan hu yɛ maŋtsɛyeli, ni lɛ ji nakai maŋtsɛyeli lɛ nɔ maŋtsɛ. Eyɛ mli akɛ wɔnaaa kɛ wɔhiŋmɛi moŋ, shi Satan eto daimonioi lɛ ahe gbɛjianɔ ewo nɔyelii ashishi, ehã amɛ hegbɛi, ni efee amɛ jeŋ nɔyelɔi.​—Efe. 6:12.

⁶ Satan tsɔɔ egbɛjianɔtoo lɛ nɔ ekudɔɔ adesai anɔyelii fɛɛ. Te wɔfeɔ tɛŋŋ wɔleɔ enɛ? Be ni Satan kɛ “shikpɔŋ lɛ nɔ maŋtsɛyelii lɛ fɛɛ” tsɔɔ Yesu lɛ, lɛ diɛŋtsɛ ekɛɛ Yesu akɛ: “Mikɛ hegbɛ nɛɛ fɛɛ kɛ amɛnunyam lɛ baahã bo ejaakɛ akɛhã mi, ni mɔ fɛɛ mɔ ni misumɔɔ ni mikɛhã lɛ, lɛ mikɛhãa.” (Luka 4:5, 6) Kɛ̃lɛ, adesai anɔyelii babaoo feɔ nibii kpakpai amɛhãa amɛshishibii lɛ, ni nɔyelɔi lɛ ekomɛi miisumɔ ni amɛye amɛbua amɛmaŋbii lɛ. Fɛɛ sɛɛ lɛ, adesa nɔyeli loo nɔyelɔ ko bɛ ni baanyɛ ekɛ tsakemɔi ni he hiaa adesai fe fɛɛ lɛ aba.​—Lala 146:3, 4; Kpo. 12:12.

 7. Mɛɛ gbɛ nɔ Satan tsɔɔ amale jamɔi kɛ je nɛŋ jarayeli gbɛjianɔtoi lɛ hu anɔ elakaa mɛi? (Kwɛmɔ mfoniri ni yɔɔ nikasemɔ lɛ shishijee lɛ.)

⁷ Shi jeee je lɛŋ nɔyelii lɛ pɛ anɔ Satan tsɔɔ elakaa mɛi. Etsɔɔ amale jamɔi kɛ je nɛŋ jarayeli gbɛjianɔtoi lɛ hu anɔ elakaa “shikpɔŋ muu lɛ fɛɛ.” (Kpo. 12:9) Satan tsɔɔ amale jamɔi anɔ egbɛɔ Yehowa he amalei eshwãa, ni eebɔ mɔdɛŋ fɛɛ ni ebaanyɛ koni ehã Nyɔŋmɔ gbɛ́i lɛ alaaje kwraa koni mɛi akale. (Yer. 23:26, 27) Enɛ hewɔ lɛ, mɛi pii susuɔ akɛ amɛmiijá Nyɔŋmɔ, shi yɛ anɔkwale mli lɛ, Satan elaka amɛ ni amɛmiijá daimonioi. (1 Kor. 10:20; 2 Kor. 11:13-15) Satan tsɔɔ je nɛŋ jarayeli gbɛjianɔtoi lɛ hu anɔ egbɛɔ amalei eshwãa. Akɛ nɔkwɛmɔnɔ lɛ, jarayeli gbɛjianɔtoi nɛɛ ehã mɛi ená jwɛŋmɔ lɛ akɛ, ja amɛná shika kpɔtɔɔ kɛ heloonaa nibii babaoo dani amɛbaaná miishɛɛ. (Abɛi 18:11) Mɛi ni ehe amale nɛɛ amɛye lɛ etsɔmɔ nyɔji amɛhã “Ninámɔ,” moŋ fe Nyɔŋmɔ. (Mat. 6:24) Ni kɛ́ amɛtsa nɔ nakai lɛ, suɔmɔ fioo ni amɛyɔɔ kɛhã Nyɔŋmɔ lɛ po baatã kwraa.​—Mat. 13:22; 1 Yoh. 2:15, 16.

8, 9. (a) Mɛɛ nibii enyɔ wɔkaseɔ yɛ gbɛ ni Adam, Hawa, kɛ ŋwɛibɔfoi atuatselɔi lɛ kɔ lɛ mli? (b) Mɛɛ gbɛ nɔ wɔnáa le ni wɔle akɛ Satan ji mɔ ni kudɔɔ je lɛ he sɛɛ?

⁸ Mɛni wɔkaseɔ yɛ gbɛ ni Adam, Hawa, kɛ ŋwɛibɔfoi atuatselɔi lɛ kɔ lɛ mli? Kɛ́ hooo kwraa lɛ, wɔkaseɔ nibii enyɔ ni he hiaa waa. Klɛŋklɛŋ lɛ, wɔkaseɔ akɛ, mɔ fɛɛ mɔ ni bɛ Yehowa sɛɛ lɛ yɛ Satan sɛɛ, ni mɔ fɛɛ mɔ ni bɛ Satan sɛɛ lɛ, yɛ Yehowa sɛɛ; mɔ ko mɔ ko nyɛŋ ekɛɛ akɛ ebɛ Yehowa sɛɛ ni ebɛ Satan hu sɛɛ. (Mat. 7:13) Nɔ ni ji enyɔ lɛ, eyɛ mli akɛ efeɔ tamɔ nɔ ni mɛi ni yafiɔ Satan sɛɛ lɛ náa he sɛɛ yɛ gbɛ ko nɔ, tamɔ bɔ ni Adam kɛ Hawa ná hegbɛ akɛ amɛ diɛŋtsɛ amɛbaatsɔɔ nɔ ni hi kɛ nɔ ni ehiii, ní daimonioi lɛ hu ná hegbɛ yɛ adesai anɔyelii anɔ lɛ moŋ, shi be fɛɛ be lɛ, naagbai ni amɛnáa lɛ faa kwraa fe sɛɛnamɔi lɛ.​—1 Mo. 3:22; Hiob 21:7-17; Gal. 6:7, 8.

⁹ Mɛɛ gbɛ nɔ wɔnáa le ni wɔle akɛ Satan ji mɔ ni kudɔɔ je lɛ he sɛɛ? Klɛŋklɛŋ lɛ, eyeɔ ebuaa wɔ ni wɔnáa jwɛŋmɔ ni ja yɛ amralofoi lɛ ahe. Agbɛnɛ hu, ekanyaa wɔ ni wɔshiɛɔ sane kpakpa lɛ. Wɔle akɛ, Yehowa miisumɔ ni wɔbu amralofoi lɛ. (1 Pet. 2:17) Eesumɔ ni wɔye mlai ni amɛwoɔ lɛ anɔ, shii abɔ ni amɛteee shi amɛwooo egbɛtsɔɔmɔi. (Rom. 13:1-4) Shi yɛ nakai beiaŋ nɔŋŋ lɛ, wɔle akɛ, esaaa akɛ wɔkɛ wɔhe woɔ maŋkwramɔ saji amli, loo wɔnaa maŋkwramɔ kuu ko loo adesa nɔyelɔ ko akɛ ebɔɔ mɔdɛŋ fe mɛi ni eshwɛ lɛ. (Yoh. 17:15, 16; 18:36) Akɛni wɔle akɛ Satan miitao Nyɔŋmɔ gbɛ́i lɛ alaaje kwraa, ni eetao ni mɛi aná Nyɔŋmɔ he jwɛŋmɔ fɔŋ hewɔ lɛ, wɔfeɔ bɔ fɛɛ bɔ ni wɔbaanyɛ koni wɔtsɔɔ mɛi anɔkwalei ni kɔɔ wɔ-Nyɔŋmɔ lɛ he. Eŋɔɔ wɔnaa waa akɛ Nyɔŋmɔ gbɛ́i lɛ kã wɔnɔ, ni wɔkɛ gbɛ́i nɛɛ tsuɔ nii. Wɔsumɔɔ Nyɔŋmɔ, ni wɔle akɛ enɛ he yɛ sɛɛnamɔ kwraa fe ni wɔbaasumɔ shika loo heloonaa nibii.​—Yes. 43:10; 1 Tim. 6:6-10.

10-12. (a) Mɛni ekolɛ Satan fee koni enine ashɛ ŋwɛibɔfoi lɛ ekomɛi anɔ? (b) Mɛni wɔkaseɔ yɛ nɔ ni ba ŋwɛibɔfoi nɛɛ anɔ lɛ mli?

¹⁰ Satan tsɔɔ gbɛi srɔtoi ni mɔɔ shi jogbaŋŋ anɔ enáa mɛi anɔ hewalɛ. Bei komɛi lɛ, ekɛ nibii ni tsɔɔ mɔ naa waa tsuɔ nii koni enine ashɛ mɛi anɔ, ni bei komɛi hu lɛ, ewoɔ mɛi ahe gbeyei koni amɛfee nɔ ni esumɔɔ.

¹¹ Akɛ nɔkwɛmɔnɔ lɛ, susumɔ bɔ ni Satan fee enine shɛ ŋwɛibɔfoi babaoo anɔ lɛ he okwɛ. Eeenyɛ efee akɛ, ekwɛ amɛ be kplaŋŋ ni ena nɔ ni kɛ́ ekɛtsɔ amɛ lɛ ebaadu amɛ. Eŋaatsɔɔ lɛ du bɔfoi lɛ ekomɛi. Amɛba shikpɔŋ lɛ nɔ ni amɛkɛ yei baná bɔlɛ ni amɛkɛ amɛ fɔ. Bii ni amɛfɔ lɛ batsɔmɔ oblaŋi, ni amɛfee mɛi niseniianii. (1 Mo. 6:1-4) Ekolɛ jeee bɔlɛnamɔ lɛ pɛ Satan kɛtsɔ bɔfoi nɛɛ tsɔne. Ekolɛ ewo amɛ shi akɛ, ebaahã amɛ hegbɛ ni amɛye adesai anɔ. Eeenyɛ efee akɛ, efee nakai kɛ jwɛŋmɔ lɛ akɛ, ebaafite gbɛjianɔ ni Yehowa eto ni kɔɔ ‘yoo lɛ seshi’ lɛ he lɛ, bɔ ni afee ni Yehowa yiŋtoo lɛ akaba mli. (1 Mo. 3:15) Bɔ fɛɛ bɔ ni sane lɛ ji lɛ, Yehowa hãaa Satan aye omanye. Etsɔ Nu Afua lɛ nɔ efite Abonsam kɛ daimonioi lɛ ayiŋtoi lɛ fɛɛ.

¹² Mɛni wɔkaseɔ yɛ sane nɛɛ mli? Nɔ ni ba ŋwɛibɔfoi nɛɛ anɔ lɛ hãa wɔnaa akɛ, Satan yeɔ omanye waa kɛji etsɔ mɛi tsɔne koni amɛkɛ amɛhe awo jeŋba sha mli loo amɛwó amɛhe nɔ. Ŋwɛibɔfoi nɛɛ kɛ Nyɔŋmɔ ehi ŋwɛi afii akpekpei abɔ. Fɛɛ sɛɛ lɛ, amɛshwe nibii fɔji, ni amɛhã nibii nɛɛ ahe akɔnɔi he shi yɛ amɛtsui mli. Ekolɛ wɔ hu wɔkɛ afii pii esɔmɔ Yehowa, shi kɛ́ wɔkwɛɛɛ jogbaŋŋ lɛ, akɔnɔi fɔji baanyɛ ahe shi yɛ wɔtsuii amli. (1 Kor. 10:12) No hewɔ lɛ, ehe miihia ni be fɛɛ be lɛ, wɔpɛi wɔmli wɔkwɛ kɛji akɔnɔ fɔŋ ko miihe shi yɛ wɔtsui mli loo wɔmiiwó wɔhe nɔ lo. Kɛ́ wɔna akɛ nɔ ko nakai yɛ wɔtsui mli lɛ, esa akɛ wɔjie kɛje jɛmɛ oya nɔŋŋ!​—Gal. 5:26; kanemɔ Kolosebii 3:5.

13. Mɛɛ nɔ kroko ni yeɔ omanye waa Satan kɛtsɔɔ mɛi tsɔne? Mɛni esa akɛ wɔfee koni enine akashɛ wɔnɔ?

¹³ Nɔ kroko ni yeɔ omanye waa ni Satan kɛtsɔɔ mɛi tsɔne ji, suɔmɔ ni wɔsumɔɔ ni wɔle nibii ni mumɔi fɔji lɛ feɔ lɛ. Ŋmɛnɛ lɛ, Satan tsɔɔ amale jamɔ, woji, sinii, kɔmpiuta loo mobail foŋ nɔ shwɛmɔi, kɛ nibii krokomɛi ni mɛi kɛjieɔ amɛhiɛtserɛ lɛ anɔ ehãa mɛi nyaa mumɔi fɔji asaji ahe. Mɛni baaye abua wɔ ni wɔkagbee tsɔne nɛɛ mli? Esaaa akɛ wɔkpaa gbɛ akɛ Yehowa asafo lɛ baaŋmala woji, sinii, lalai, loo shwɛmɔi lɛ eko fɛɛ eko he sane ni etsɔɔ wɔ amɛteŋ nɔ ni hi kɛ nɔ ni ehiii. Moŋ lɛ, esa akɛ wɔtsɔse wɔ diɛŋtsɛ wɔhenilee koni wɔnyɛ wɔdamɔ Nyɔŋmɔ shishitoo mlai lɛ anɔ wɔkpɛ yiŋ ni ja yɛ nibii nɛɛ ahe. (Heb. 5:14) Kɛ́ wɔkɛ ŋaa ni mumɔ krɔŋkrɔŋ lɛ tsirɛ Paulo ni ewo, akɛ ‘osato akahi wɔsuɔmɔ lɛ mli’ lɛ tsu nii lɛ, wɔbaakpɛ yiŋ kpakpai. (Rom. 12:9) Kɛ́ esoro nɔ ni mɔ ko feɔ yɛ nɔ ni ekɛɔ mɛi lɛ he lɛ, eefee osato. No hewɔ lɛ, bi ohe akɛ: ‘Ani miihi shi yɛ shishitoo mlai ni mitsɔɔ mɛi krokomɛi akɛ amɛhi shi yɛ naa lɛ anaa? Kɛ́ mi-Biblia mli nikaselɔi lɛ loo mɛi ni mishiɛɔ mihãa lɛ na nibii ni mikɛjieɔ mihiɛtserɛ lɛ, te amɛbaana mi tɛŋŋ?’ Kɛ́ wɔhi shi yɛ shishitoo mlai ni wɔtsɔɔ mɛi akɛ amɛhi shi yɛ naa lɛ anaa lɛ, ebaawa akɛ Satan nine baashɛ wɔnɔ.​—1 Yoh. 3:18.

14. Mɛɛ gbɛ nɔ Satan bɔɔ mɔdɛŋ akɛ ebaawo wɔhe gbeyei? Mɛni baaye abua wɔ ni wɔfi shi shiŋŋ?

¹⁴ Bei komɛi hu lɛ, Satan bɔɔ mɔdɛŋ akɛ ebaawo wɔhe gbeyei koni wɔkafee Yehowa suɔmɔnaa nii. Akɛ nɔkwɛmɔnɔ lɛ, ebaanyɛ ehã amralofoi lɛ atsĩ wɔshiɛmɔ nitsumɔ lɛ naa. Aloo ebaanyɛ ehã mɛi ni wɔkɛtsuɔ nii loo mɛi ni wɔkɛyaa skul lɛ aye wɔhe fɛo akɛni wɔhiɔ shi yɛ Biblia mli shishitoo mlai anaa lɛ hewɔ. (1 Pet. 4:4) Ebaanyɛ ehã wɔwekumɛi ni ekolɛ amɛhiɛɛɛ wɔhe jwɛŋmɔ fɔŋ ko lɛ aje wɔnijiaŋ wui koni wɔkpa asafoŋ kpeei yaa. (Mat. 10:36) Mɛni baaye abua wɔ ni wɔnyɛ wɔdamɔ kai ni tamɔ nɛkɛ lɛ anaa? Klɛŋklɛŋ lɛ, esa akɛ wɔhã ehi wɔjwɛŋmɔ mli akɛ, shihilɛi ni tamɔ nakai lɛ baanyɛ aba, ejaakɛ Satan kɛ wɔ miiwu. (Kpo. 2:10; 12:17) Nɔ ni ji enyɔ lɛ, esa akɛ wɔhã yiŋtoo hewɔ ni Satan feɔ nakai lɛ ahi wɔjwɛŋmɔ mli. Satan kɛɛ akɛni wɔkɛ shihilɛ ni mli wa ekpeko lɛ hewɔ wɔsɔmɔɔ Yehowa lɛ, shi kɛ́ wɔkɛ shihilɛ ni mli wa kpe pɛ, wɔbaakpa Yehowa sɔɔmɔ. (Hiob 1:9-11; 2:4, 5) Agbɛnɛ hu, esa akɛ wɔkɛ wɔhiɛ afɔ̃ Yehowa nɔ, ni wɔkpa lɛ fai ni ewaje wɔ koni wɔnyɛ wɔfi shi. Kaimɔ akɛ, Yehowa kwaŋ wɔ kɔkɔɔkɔ.​—Heb. 13:5.

15. Ani Satan baanyɛ anyɛ wɔnɔ ni wɔfee nɔ ko ni wɔsumɔɔɔ ni wɔfeɔ? Tsɔɔmɔ mli.

¹⁵ Satan nyɛŋ anyɛ mɛi anɔ ni amɛfee nibii ni amɛsumɔɔɔ ni amɛfeɔ. (Yak. 1:14) Ŋmɛnɛ lɛ, mɛi pii leee akɛ Satan miiná amɛnɔ hewalɛ. Shi kɛ́ amɛkase Biblia lɛ ni amɛbale anɔkwale lɛ, esa akɛ amɛkpɛ amɛyiŋ kɛji amɛbaaya nɔ amɛhi Satan masɛi loo amɛbaashi lɛ ni amɛbafi Yehowa sɛɛ. (Bɔf. 3:17; 17:30) Kɛ́ wɔtswa wɔfai shi akɛ wɔbaafee Nyɔŋmɔ suɔmɔnaa nii lɛ, nɔ ko nɔ ko bɛ ni Satan baanyɛ afee kɛtsĩ wɔnaa.​—Hiob 2:3; 27:5.

16, 17. (a) Mɛɛ nibii krokomɛi Satan kɛ daimonioi lɛ nyɛŋ afee? (b) Mɛni hewɔ esaaa akɛ wɔsheɔ gbeyei akɛ wɔbaasɔle ni eje kpo lɛ?

¹⁶ Nibii krokomɛi hu yɛ ni Satan kɛ daimonioi lɛ nyɛŋ afee. Akɛ nɔkwɛmɔnɔ lɛ, Biblia lɛ ewieko yɛ he ko he ko akɛ amɛbaanyɛ amɛle nibii ni wɔsusuɔ he yɛ wɔjwɛŋmɔ loo wɔtsui mli. Yehowa kɛ Yesu pɛ ni baanyɛ afee nakai. (1 Sam. 16:7; Mar. 2:8) Nakai nɔŋŋ esaaa akɛ wɔsheɔ gbeyei akɛ kɛ́ wɔsɔle loo wɔwie ni eje kpo lɛ, Abonsam kɛ daimonioi lɛ baanyɛ anu ni amɛte shi amɛwo wɔ. Mɛni hewɔ? Susumɔ enɛ he okwɛ: Abonsam naa nibii kpakpai ni wɔtsuɔ yɛ Yehowa sɔɔmɔ lɛ mli lɛ, shi no hãaa wɔkpa nibii nɛɛ feemɔ. Nakai nɔŋŋ esaaa akɛ wɔsheɔ gbeyei akɛ kɛ́ wɔsɔle loo wɔwie ni eje kpo lɛ Abonsam baanu. Nyɔŋmɔ tsuji anɔkwafoi ni sɔle ni anu lɛ ahe saji babaoo yɛ Biblia lɛ mli, shi nɔ ko bɛ ni tsɔɔ akɛ anɔkwafoi nɛɛ she gbeyei akɛ Abonsam baanu amɛsɔlemɔi lɛ. (1 Maŋ. 8:22, 23; Yoh. 11:41, 42; Bɔf. 4:23, 24) Kɛ́ wɔbɔ mɔdɛŋ fɛɛ ni wɔbaanyɛ koni wɔhã wɔwiemɔ kɛ wɔnifeemɔ asa Nyɔŋmɔ hiɛ lɛ, wɔbaanyɛ wɔná nɔmimaa akɛ ehãŋ Abonsam aye wɔ awui kɛya naanɔ.​—Kanemɔ Lala 34:7.

¹⁷ Esa akɛ wɔle wɔhenyɛlɔ lɛ, shi esaaa akɛ wɔsheɔ lɛ gbeyei. Yɛ emuu ni wɔyeee lɛ fɛɛ sɛɛ lɛ, Yehowa baanyɛ aye abua wɔ ni wɔye Satan nɔ kunim. (1 Yoh. 2:14) Kɛ́ wɔte shi wɔwo Abonsam lɛ, ebaajo wɔnaa foi. (Yak. 4:7; 1 Pet. 5:9) Ŋmɛnɛ lɛ, Satan ejie ehiɛ eka oblahii kɛ oblayei. Mɛni amɛbaanyɛ amɛfee koni amɛnyɛ amɛdamɔ etutuamɔi lɛ anaa? Wɔbaasusu sanebimɔ nɛɛ he yɛ nikasemɔ ni nyiɛ sɛɛ lɛ mli.