“Hemɔkɛyeli Nyiɛɔ Sane ni Anu lɛ Sɛɛ Kɛbaa”
1 Kɛ wɔna mɔ ni “hiɛ naanɔ wala he jwɛŋmɔ kpakpa” lɛ, ehe hiaa ni wɔwaje hemɔkɛyeli ni nakai mɔ lɛ yɔɔ yɛ nɔ ni enu lɛ mli lɛ. (Bɔf. 13:48; Rom. 10:17) Yɛ no feemɔ mli lɛ, esa akɛ wɔdi woji tɛtrɛbii ashɛɛ loo woji tɛtrɛbii ni wɔkɛhaa lɛ sɛɛ kɛtsɔ eheei ni baa lɛ ni wɔɔku wɔsɛɛ wɔkɛyaha amɛ lɛ nɔ koni wɔgba sane babaoo. Shi kɛlɛ, ha oti ni ma ohiɛ akɛ okɛ Nilee Ni Kɛ Mɔ Yaa Naanɔ Wala Mli wolo lɛ aaaje nikasemɔ shishi lɛ ahi ojwɛŋmɔ mli. Naa ŋaawoi komɛi ni he baanyɛ aba sɛɛnamɔ:
2 Kɛ oofee sɛɛsaramɔ yɛ he ni nyɛsusu sane ni ji “Nyɛjiea Naanɔ Maŋtsɛ lɛ Yi!” he yɛ lɛ, obaanyɛ oje shishi nɛkɛ:
◼ “Beni wɔgba sane nyɛsɛɛ ko lɛ, wɔtĩ odaseyelii babaoo ni tsɔɔ akɛ Nyɔŋmɔ ofe ko yɛ lɛ mli. Shi, le ni wɔle akɛ eyɛ shihilɛ mli lɛ pɛ kɛkɛ faaa. Ehe miihia ni wɔle egbɛi. Mɛɛ gbɛi okɛtsɛɔ Nyɔŋmɔ? [Ŋmɛɛ gbɛ ni ewie.] Gbɔmɛi akpekpei abɔ tsɛɔ lɛ kɛkɛ akɛ ‘Nuntsɔ’ loo ‘Nyɔŋmɔ,’ ni ji sabalai ni jeee mɔ ko gbɛi lɛ. Kɛfata he lɛ, eesumɔ ni wɔle lɛ kɛ egbɛi. [Kanemɔ Lala 83:19.] Biblia lɛ kɛɔ wɔ nibii babaoo yɛ Yehowa Nyɔŋmɔ he, taakɛ atsɔɔ mli yɛ wolo nɛɛ mli lɛ.” Tsɔɔmɔ lɛ mfoniri ni yɔɔ Nilee wolo lɛ mli baafa 29 lɛ, ni okane mfoniri lɛ he niŋmaa lɛ. Beni nyɛsusu yitso 3 lɛ mli klɛŋklɛŋ kukuji etɛ lɛ he sɛɛ lɛ, okɛ no feemɔ eje nikasemɔ shishi!
3 Yɛ mɛi ni okɛ amɛ susu saneyitso, “Nɔ Hewɔ ni Jamɔ ni Ji Je lɛ Nɔ̃ Baaba Naagbee” lɛ he lɛ, ekolɛ obaasumɔ ni odi miishɛɛ lɛ sɛɛ kɛtsɔ enɛ kɛɛmɔ nɔ:
◼ “Beni okane sane lɛ sɛɛ lɛ, ekolɛ oná anɔkwale ni tsɔɔ akɛ wɔnyɛŋ wɔsusu jamɔi fɛɛ he yɛ gbɛ kome too nɔ lɛ he miishɛɛ. Anɔkwale jamɔ kɛ apasa jamɔi fɛɛ yɛ. Enɛ teeɔ sanebimɔ ni sa jogbaŋŋ nɛɛ shi akɛ, Namɔ jamɔ Nyɔŋmɔ kpɛlɛɔ nɔ? Yesu kɛ hetoo lɛ ha, ni ama nɔ mi yɛ wolo nɛɛ mli.” Gbelemɔ Nilee wolo lɛ yitso 5 lɛ, ni okane kuku 4, ni Yohane 4:23, 24 fata he lɛ. No sɛɛ lɛ bi akɛ, “Ani obaasumɔ ni okpɛlɛ shia Biblia mli nikasemɔ ni aheee nɔ ko lɛ nɔ?” Kɛ ahere nɔ jogbaŋŋ lɛ, gbelemɔ yitso 1 ni oje nikasemɔ lɛ shishi.
4 Kɛ ajie miishɛɛ kpo yɛ April 22 “Awake!” lɛ he lɛ, kɛ oku osɛɛ otee lɛ, obaanyɛ oka gbɛ ni tamɔ nɛkɛ okwɛ ni okɛ “Nilee” wolo lɛ aje nikasemɔ shishi:
◼ “Ekolɛ obaakai akɛ wɔgba sane ko ni kɔɔ hiɛnɔkamɔi ni wɔyɔɔ akɛ yɛ naagbee lɛ wɔɔna jeŋ ko ni tawuu bɛ mli lɛ he. Ewa akɛ ooosusu bɔ ni ebaatamɔ eha diɛŋtsɛ lɛ he. Naa ehe mfoniri ko ni nitɛŋlɔ ko efee. [Okɛ Nilee wolo lɛ mli mfoniri ni yɔɔ baafai 188-9 lɛ atsɔɔ.] Ani efeŋ miishɛɛ akɛ ooonyɛ ona shihilɛ hei nɛɛ amli ŋɔɔmɔ? [Gbelemɔ baafai 4-5, ni okɛ mfoniri lɛ atsɔɔ, ni okane akrabatsa lɛ.] Wolo nɛɛ saneyitso lɛ tamɔ Yesu wiemɔi ni anaa yɛ Yohane 17:3 lɛ nɔŋŋ. [Kanemɔ.] Kɛ manyɛ lɛ, masumɔ ni mafee bɔ ni abaanyɛ akɛ wolo nɛɛ kɛ o-Biblia lɛ aaatsu nii ni akɛna nilee ni hereɔ mɔ yiwala.” Kɛ shiatsɛ lɛ miisumɔ lɛ, okɛ klɛŋklɛŋ yitso lɛ aje nikasemɔ lɛ shishi.
5 Kɛ okɛ mɔ ko ni bɛ dekã gba sane beni otee eŋɔɔ klɛŋklɛŋ lɛ, obaanyɛ okɛɛ enɛ beni oku osɛɛ otee:
◼ “Mibasara bo nyɛsɛɛ nɛɛ ni mishi Buu-Mɔɔ kɛ Awake! woji tɛtrɛbii lɛ eko miha bo. Woji nɛɛ haa anaa bulɛ ahaa Biblia lɛ kɛ emli gbɛtsɔɔmɔ ni ekɛhaa yɛ jeŋba he lɛ hu. Akɛni minuɔ he akɛ ehe miihia ni mɔ fɛɛ mɔ anu Nyɔŋmɔ Wiemɔ lɛ shishi hewɔ lɛ, miba ekoŋŋ koni mibatsɔɔ bo nɔ ko ni baaye abua bo ni ofee nakai.” Okɛ Nilee wolo lɛ atsɔɔ, ni otsɔɔ lɛ emli saji ni yɔɔ baafa 3 lɛ. Bi ni etsɔɔ yitso ni tamɔ nɔ ni baaŋɔɔ jogbaŋŋ lɛ, gbelemɔ jɛmɛ, ni oje nikasemɔ lɛ shishi.
6 Wɔmlifilimɔ lɛ baafa babaoo kɛ wɔnyɛ ‘wɔgbele hemɔkɛyeli shinaa’ ni kɛ mɔ yaa naanɔ wala mli lɛ wɔha ‘mɛi krokomɛi’ lɛ.—Bɔf. 14:27; Yoh. 17:3.