Okɛ Osusuma Fɛɛ Atsũ!
1 Wɔyɛ yiŋtoi babaoo ni wɔɔdamɔ nɔ wɔjie hiɛsɔɔ kpo wɔtsɔɔ Yehowa. Nɔ ni fata enɛɛmɛi ahe ji nibii ni etsu be ko ni eho, kɛ nɔ ni efeɔ bianɛ, kɛ nɔ ni ebaafee eha wɔ lolo yɛ wɔsɛɛ be mli. Mɛni esa akɛ hiɛsɔɔ ni wɔyɔɔ lɛ atsirɛ wɔ koni wɔfee? David lala ko haa hetoo akɛ: “Majie Yehowa yi daa nɛɛ, eyijiemɔ aaakã midaaŋ be fɛɛ be.”—Lala 34:2.
2 Biblia lɛ tsɔɔ faŋŋ akɛ afa wɔ akɛ wɔshiɛ. Enɛ ji nitsumɔ ni wɔtsuɔ kɛ wɔ “susuma fɛɛ akɛ Yehowa wɔtsuɔ wɔhaa.”—(Kol. 3:23, NW) Enyiɛ wɔbaanyɛ wɔtsu yɛ shiɛmɔ nitsumɔ lɛ mli, kɛ wɔkɛ wɔ susuma fɛɛ miitsu lɛlɛŋ? Kɛ wɔsusu suɔmɔ ni Yehowa yɔɔ kɛha wɔ lɛ he lɛ, eka shi faŋŋ akɛ wɔtsui tsirɛɔ wɔ koni wɔtu wɔhe wɔha koni wɔkɛna mɛi krokomɛi ni wɔɔgba amɛ lɛ kɛ eyiŋtoi kpakpai lɛ ahe sane lɛ mli gbɛfaŋnɔ! Etsirɛɔ wɔ koni wɔfee bɔ ni wɔɔnyɛ.
3 Eeefee nɔ ni shishinumɔ yɔɔ mli akɛ wɔɔkpa gbɛ akɛ mɔ ni kɛ esusuma fɛɛ tsuɔ nii lɛ baasumɔ ni ekɛ ejwɛŋmɔ ama sɔɔmɔ krɔŋkrɔŋ lɛ nɔ. Lalatsɛ ni nu he nakai yɛ faŋŋ mli lɛ, jaje akɛ: “Mijieɔ oyi shii kpawo jenamɔ.” (Lala 119:164) Mɛi ni nuɔ he tamɔ lalatsɛ lɛ sumɔɔ ni amɛkɛ hegbɛi ni amɛkɛaajie Yehowa yi lɛ atsu nii kɛmɔ shi. Yɛ be mli ni amɛ shihilɛi ŋmɛɔ gbɛ lɛ, amɛkɛ ekãa sɔmɔɔ bɔ ni amɛaanyɛ.
4 Hegbɛi ni Wɔkɛaajie Yehowa Yi lɛ Ebɔle Wɔ Kɛkpe: Esaaa akɛ wɔmɛɔ ni wɔkɛ wɔhe awo shinaai anaa nitsumɔ mli dani wɔshiɛ sanekpakpa lɛ. Ehe miihia ni wɔ nanemɛi nitsulɔi, skulbii, wekumɛi, kɛ nanemɛi fɛɛ anu Maŋtsɛyeli shɛɛ sane lɛ. Kɛ wɔmiifa gbɛ lɛ, wɔbaanyɛ wɔje sanegbaai ni baanyɛ aha wɔye nanemɛi gbɛfalɔi, gbɔiatoohe nitsulɔi, niyeli hei amli nitsulɔi, pɛtro hɔɔlɔi, loo taksi draivafoi odase lɛ shishi. Be mli ni wɔyɔɔ shia lɛ, wɔbaanyɛ wɔye nanemɛi loo mɛi ni kpaa shi amɛhɔɔ nii lɛ odase. Kɛ ahe wɔ afɔ helatsamɔ he lɛ, helatsɛmɛi akwɛlɔi, datrɛfoi, kɛ helatsɛmɛi krokomɛi yɛ ni wɔbaanyɛ wɔye amɛ odase trukaa.
5 Trukaa Odaseyeli Woɔ Yibii: Gbi ko lɛ, Odasefoi enyɔ miiho yɛ shwɛmɔ he ko ni amɛkɛ obalanyo ko ni kɛ ebi miishera shi je sanegbaa shishi. Yɛ naagbee lɛ, lɛ kɛ eŋa fɛɛ mɔ anɔkwale lɛ mli. Sɛɛ mli lɛ obalanyo lɛ ha ale akɛ beni eshwɛ fioo ni ekɛ Odasefoi enyɔ lɛ aaakpe klɛŋklɛŋ lɛ, no mli lɛ esɔle eha Nyɔŋmɔ, ni eebi akɛ, ‘Kɛ oyɛ lɛ, ofainɛ ha male bo.’ Ebuɔ kpe ni ekɛ amɛ kpe yɛ shwɛmɔ he lɛ akɛ hetoo ni Yehowa kɛha esɔlemɔ lɛ.
6 Mɛi ni kɛ amɛ susuma fɛɛ tsuɔ nii yɛ suɔmɔ ni amɛyɔɔ akɛ amɛaaye amɛbua mɛi krokomɛi yɛ mumɔŋ lɛ amli filiɔ amɛ waa diɛŋtsɛ. Amɛle akɛ “tsui muu . . . fɛɛ” ni akɛsɔmɔɔ nɛkɛ lɛ saa Yehowa hiɛ.—1 Kron. 28:9.