Mɛni Wɔkaseɔ Yɛ Naakpɛɛ Nii Ni Yesu Fee Lɛ Amli?

 1. Gbaa nɔ ni ba ni hã Yesu fee eklɛŋklɛŋ naakpɛɛ nii.

FEEMƆ sane ko ni ba yɛ afi 29 Ŋ.B. naagbeegbɛ be ni Yesu je esɔɔmɔ nitsumɔ lɛ shishi lɛ he mfoniri okwɛ. Yesu kɛ emami Maria kɛ ekaselɔi lɛ ekomɛi etee yookpeemɔ okpɔlɔŋmɛɛ ko shishi yɛ akrowa ko ni atsɛɔ lɛ Kana ni yɔɔ Yesu maŋ Nazaret lɛ kooyi lɛ. Maria nanemɛi ji ayemforo lɛ kɛ ewu lɛ wekumɛi. No hewɔ lɛ, eeenyɛ efee akɛ etee eeye eebua kɛ gbɔi ni eba lɛ akwɛmɔ. Shi be ni nifeemɔ lɛ yaa nɔ lɛ, nɔ ko ba ni kulɛ ebaanyɛ ewo nuu lɛ kɛ eŋa lɛ kɛ amɛwekumɛi lɛ hiɛgbele waa, wain lɛ tã.b Eeenyɛ efee akɛ, mɛi ni ba yookpeemɔ lɛ fa fe bɔ ni amɛkpaa gbɛ. Maria tee Yesu ŋɔɔ oya nɔŋŋ ni ekɛɛ lɛ akɛ: “Amɛbɛ wain.” (Yoh. 2:1-3) Mɛni Yesu fee? Efee nɔ ko ni yɔɔ naakpɛɛ waa. Ehã nu folo tsɔ “wain kpakpa.”​—Yoh. 2:9, 10.

2-3. (a) Tsɔɔmɔ naakpɛɛ nii komɛi ni Yesu fee. (b) Kɛ́ wɔsusu naakpɛɛ nii ni Yesu fee lɛ ahe lɛ, mɛɛ gbɛ nɔ no baaye abua wɔ?

² Yesu fee naakpɛɛ nii pii be ni eyɔɔ shikpɔŋ lɛ nɔ lɛ.c Ekɛ hewalɛ ni Nyɔŋmɔ kɛdro lɛ lɛ ye ebua mɛi akpei abɔ. Akɛ nɔkwɛmɔnɔ lɛ, be ko lɛ, etsɔ naakpɛɛ gbɛ nɔ elɛ hii 5,000, ni be kroko hu lɛ, elɛ hii 4,000. Kɛ́ akɛ yei kɛ gbekɛbii ni yɔɔ jɛmɛ lɛ fata hii lɛ ahe lɛ, belɛ eeenyɛ efee akɛ, Yesu lɛ mɛi 27,000 kɛ sɛɛ. (Mat. 14:15-21; 15:32-38) Ni bei enyɔ lɛ fɛɛ lɛ, dani ebaalɛ amɛ lɛ etsa amɛteŋ mɛi babaoo ni bɛ hewalɛ. (Mat. 14:14; 15:30, 31) Ŋwanejee ko bɛ he akɛ, bɔ ni Yesu tsɔ naakpɛɛ gbɛ nɔ etsa amɛ ni elɛ amɛ lɛ hã amɛnaa kpɛ amɛhe waa!

³ Wɔbaanyɛ wɔkase nii babaoo yɛ naakpɛɛ nii ni Yesu fee lɛ amli. Yɛ nikasemɔ nɛɛ mli lɛ, wɔbaasusu nibii komɛi ni wɔkaseɔ yɛ naakpɛɛ nii nɛɛ amli ni baanyɛ ahã wɔhemɔkɛyeli lɛ mli awa lɛ ahe. No sɛɛ lɛ, wɔbaakwɛ bɔ ni wɔbaafee wɔba wɔhe shi ni wɔmusuŋ atsɔ wɔ yɛ mɛi ahe tamɔ bɔ ni Yesu feɔ kɛ́ eefee naakpɛɛ nii lɛ.

 4. Naakpɛɛ nii ni Yesu fee lɛ tsɔɔ wɔ namɔ kɛ namɔ he nii?

⁴ Naakpɛɛ nii ni Yesu fee lɛ tsɔɔ wɔ nibii pii yɛ ehe ni baanyɛ ahã wɔhemɔkɛyeli lɛ mli awa. Shi amɛtsɔɔ wɔ nibii pii yɛ Yehowa hu he. Mɛni hewɔ? Ejaakɛ Yehowa ji mɔ ni hã Yesu hewalɛ lɛ ni ekɛfee naakpɛɛ nii lɛ. Bɔfoi 10:38 lɛ wie yɛ Yesu he akɛ: “Nyɔŋmɔ kɛ mumɔ krɔŋkrɔŋ kɛ hewalɛ fɔ lɛ mu, ni eyakpa shikpɔŋ lɛ nɔ efee ekpakpa ni etsa mɛi fɛɛ ni Abonsam haoɔ amɛ lɛ, ejaakɛ Nyɔŋmɔ kɛ lɛ yɛ.” Kaimɔ hu akɛ, Yesu susu nii ahe tamɔ e-Tsɛ lɛ ni ena nibii tamɔ bɔ ni e-Tsɛ lɛ naa lɛ lɛ, ni anaa enɛ yɛ nɔ fɛɛ nɔ ni ewie kɛ nɔ fɛɛ nɔ ni efee, ni naakpɛɛ nii ni efee lɛ hu fata he lɛ amli. (Yoh. 14:9) Hã wɔkwɛ nibii etɛ komɛi ni wɔbaanyɛ wɔkase yɛ naakpɛɛ nii ni Yesu fee lɛ amli.

 5. Mɛni tsirɛ Yesu ni efee naakpɛɛ nii? (Mateo 20:30-34)

⁵ Klɛŋklɛŋ nɔ lɛ ji, Yesu kɛ e-Tsɛ lɛ sumɔɔ wɔ waa. Be ni Yesu yɔɔ shikpɔŋ lɛ nɔ lɛ, nɔ kome ni efee kɛtsɔɔ akɛ esumɔɔ mɛi waa ji, etsɔ naakpɛɛ gbɛ nɔ eye ebua mɛi ni piŋɔ lɛ. Kadimɔ nɔ ni ba be ko be ni shwilafoi enyɔ komɛi kpa lɛ fai waa ni eye ebua amɛ lɛ. (Kanemɔ Mateo 20:30-34.) Ŋmalɛ lɛ kɛɛ, “Yesu musuŋ tsɔ lɛ yɛ amɛhe” ni etsa amɛ. Suɔmɔ ni Yesu yɔɔ lɛ ni hã emusuŋ tsɔ lɛ yɛ amɛhe lɛ, ni nakai musuŋtsɔlɛ lɛ nɔŋŋ ni tsirɛ lɛ ni elɛ mɛi ni hɔmɔ yeɔ amɛ lɛ ni etsa kpitiyelɔ ko lɛ. (Mat. 15:32; Mar. 1:41) Wɔle akɛ, Yehowa, Nyɔŋmɔ ni musuŋ tsɔɔ lɛ waa lɛ, kɛ e-Bi lɛ sumɔɔ wɔ waa, ni kɛ́ amɛna ni wɔmiipiŋ lɛ edɔɔ amɛ. (Luka 1:78; 1 Pet. 5:7) Amɛmiishwe waa ni amɛjie nɔ fɛɛ nɔ ni hãa adesai piŋɔ lɛ kɛje shihilɛ mli.

 6. Mɛni Nyɔŋmɔ ehã Yesu hewalɛ akɛ efee?

⁶ Nɔ ni ji enyɔ lɛ, Nyɔŋmɔ ehã Yesu hewalɛ ni ekɛtsu adesai anaagbai fɛɛ ahe nii. Naakpɛɛ nii ni Yesu fee lɛ hãa wɔnaa akɛ eyɛ hewalɛ ni ebaanyɛ ekɛtsu naagbai ni wɔnyɛŋ amɛhe nii wɔtsu lɛ ahe nii. Akɛ nɔkwɛmɔnɔ lɛ, eyɛ hewalɛ lɛ ni ekɛbaajie esha, ni ji nɔ titri ni hãa helai mɔmɔɔ wɔ, wɔgboiɔ, ni wɔnáa naagbai krokomɛi lɛ kɛje jɛmɛ. (Mat. 9:1-6; Rom. 5:12, 18, 19) Naakpɛɛ nii ni efee lɛ hãa wɔnaa akɛ, ebaanyɛ etsa ‘helai srɔtoi fɛɛ’ ni etee gbohii ashi po. (Mat. 4:23; Yoh. 11:43, 44) Agbɛnɛ hu, ehãa wɔnaa akɛ eyɛ hewalɛ yɛ kɔɔyɔi ni naa wa kɛ mumɔi fɔji po anɔ. (Mar. 4:37-39; Luka 8:2) Ani eŋɔɔɔ onaa akɛ Yehowa ehã e-Bi lɛ lɛ hewalɛ ni ekɛtsu nibii nɛɛ fɛɛ?

7-8. (a) Mɛni naakpɛɛ nii ni Yesu fee lɛ hãa wɔnáa hemɔkɛyeli akɛ ebaaba? (b) Te naakpɛɛ nii ni baaya nɔ yɛ jeŋ hee ni etsɛŋ ebaaba lɛ mli lɛ ateŋ nɔ ni okpaa gbɛ waa?

⁷ Nɔ ni ji etɛ lɛ, wɔbaanyɛ wɔná hemɔkɛyeli ni mli wa akɛ nibii kpakpai ni awo shi akɛ Nyɔŋmɔ Maŋtsɛyeli lɛ baafee ehã wɔ wɔsɛɛ lɛ baaba mli. Naakpɛɛ nii ni Yesu fee be ni eyɔɔ shikpɔŋ lɛ nɔ lɛ hãa wɔnaa naakpɛɛ nii wuji ni ebaafee yɛ shikpɔŋ lɛ nɔ fɛɛ kɛ́ ebɔi shikpɔŋ lɛ nɔ yeli. Susumɔ nibii kpakpai ni etsɛŋ wɔbaaná mli ŋɔɔmɔ yɛ e-Nɔyeli lɛ shishi lɛ ekomɛi ahe okwɛ. Wɔbaaná gbɔmɔtsoŋ hewalɛ kpakpa, ejaakɛ ebaajie helai srɔtoi fɛɛ kɛ gbɔmɔtsoŋ gbɔjɔmɔi fɛɛ ni haoɔ adesai lɛ kɛje jɛmɛ. (Yes. 33:24; 35:5, 6; Kpo. 21:3, 4) Hɔmɔ yeŋ wɔ dɔŋŋ, ni adebɔɔ naa oshãrai hu asɛɛ baafo. (Yes. 25:6; Mar. 4:41) Wɔwekumɛi kɛ wɔnanemɛi ni yɔɔ “gbohii abui” lɛ amli lɛ baaba wala mli ekoŋŋ ni wɔbaaná miishɛɛ waa. (Yoh. 5:28, 29) Te naakpɛɛ nii ni baaya nɔ yɛ jeŋ hee ni etsɛŋ ebaaba lɛ mli lɛ ateŋ nɔ ni okpaa gbɛ waa?

⁸ Yesu ba ehe shi waa ni emusuŋ tsɔ lɛ yɛ mɛi ahe be ni efeɔ enaakpɛɛ nii lɛ, ni esa akɛ wɔkase lɛ ni wɔ hu wɔjie sui nɛɛ akpo. Nyɛhãa wɔsusua enɛ he nɔkwɛmɔnii enyɔ komɛi ahe. Hã wɔkɛ naakpɛɛ nii ni efee yɛ yookpeemɔ okpɔlɔŋmɛɛ lɛ shishi yɛ Kana lɛ aje shishi.

 9. Mɛni Yesu fee yɛ yookpeemɔ okpɔlɔŋmɛɛ lɛ shishi? (Yohane 2:6-10)

⁹ Kanemɔ Yohane 2:6-10. Be ni wain lɛ tã yɛ yookpeemɔ okpɔlɔŋmɛɛ lɛ shishi lɛ, ani doo akɛ Yesu afee nɔ ko yɛ he? Dabi. Gbalɛ ko bɛ ni tsɔɔ akɛ Mesia lɛ baatsɔ naakpɛɛ gbɛ nɔ efee wain. Shi bo lɛ, susumɔ he okwɛ, kɛ́ bo oŋmɛɔ okpɔlɔ yɛ oyookpeemɔ lɛ sɛɛ ni dãa lɛ tã trukaa lɛ, te obaanu he ohã tɛŋŋ? Ekolɛ obaahao waa. Ŋwanejee ko bɛ he akɛ, Yesu nu he ehã weku lɛ, titri lɛ, nuu lɛ kɛ eŋa lɛ, ni esumɔɔɔ ni amɛhiɛ shwieɔ shi, no hewɔ efee naakpɛɛ nii ni awie he yɛ nikasemɔ nɛɛ shishijee lɛ. Ehã nu aaafee galɔn 103 tsɔ wain kpakpa. Ekolɛ Yesu fee lɛ pii koni eko ashwɛ koni sɛɛ mli lɛ amɛkɛfee nɔ kroko loo amɛhɔ̃ɔ po. Kwɛ bɔ ni enɛ baahã nuu lɛ kɛ eŋa lɛ amii ashɛ amɛhe ahã!

10. Mɛni ji nibii komɛi ni sa kadimɔ yɛ sane ni abɔ he amaniɛ yɛ Yohane yitso 2 lɛ mli lɛ he? (Kwɛmɔ mfoniri lɛ hu.)

¹⁰ Hã wɔsusu nibii komɛi ni sa kadimɔ yɛ sane nɛɛ ni abɔ he amaniɛ yɛ Yohane yitso 2 lɛ mli lɛ ahe wɔkwɛ. Ani oyɔse akɛ Yesu diɛŋtsɛ eyayɛɛɛ nu ewooo tɛ nugbɛ́i lɛ amli, shi moŋ ehã tsuji lɛ ni fee nakai? (Kuku 6, 7) Agbɛnɛ hu, ani oyɔse akɛ be ni ehã nu lɛ tsɔ wain lɛ egbe naa lɛ, lɛ diɛŋtsɛ eyɛɛɛ eko eyahãaa okpɔlɔŋmɛɛ lɛ nɔkwɛlɔ lɛ, shi moŋ ehã tsuji lɛ kɛyahã lɛ? (Kuku 8) Mɛni hewɔ efeee nibii nɛɛ? Ejaakɛ esumɔɔɔ ni mɛi ajwɛŋmɔ baa enɔ. Ŋwanejee ko bɛ he akɛ, Yesu wooo kɔɔpoo ni etsɔ wain lɛ eko ewo mli ni ewó nɔ yɛ mɛi ni eba yookpeemɔ lɛ shishi lɛ ahiɛ ni eshwã akɛ, ‘Nyɛsaa wain ni mifee bianɛ nɔŋŋ lɛ naa nyɛkwɛa.’

11. Mɛni wɔbaanyɛ wɔkase yɛ Yesu he be ni efee naakpɛɛ nii lɛ?

¹¹ Mɛni wɔkaseɔ yɛ Yesu he be ni ehã nu tsɔ wain yɛ naakpɛɛ gbɛ nɔ lɛ? Wɔkaseɔ akɛ esa akɛ wɔba wɔhe shi. Yesu kɛ naakpɛɛ nii ni efee lɛ eshwãaa shi kome po. Anɔkwa, ekɛ nibii ni enyɛ etsu lɛ eko eko eshwãaa. Moŋ lɛ, etee nɔ eba ehe shi ni ekɛ anunyam lɛ kɛ yijiemɔ lɛ fɛɛ hã e-Tsɛ lɛ. (Yoh. 5:19, 30; 8:28) Kɛ́ wɔkase Yesu lɛ, wɔ hu wɔbaaba wɔhe shi ni wɔkɛ nibii ni wɔnyɛ wɔtsu lɛ eko eko eshwãŋ. Nɔ najiaŋ ni wɔbaashwã yɛ nibii ni wɔnyɛ wɔtsu yɛ Yehowa sɔɔmɔ lɛ mli lɛ ahewɔ lɛ, nyɛhãa wɔshwãa yɛ hegbɛ ni wɔná akɛ wɔmiisɔmɔ Yehowa, Nyɔŋmɔ ni he yɔɔ naakpɛɛ lɛ moŋ hewɔ. (Yer. 9:23, 24) Nyɛhãa wɔkɛ yijiemɔ lɛ fɛɛ ahãa lɛ, ejaakɛ kɛ́ Yehowa yeee ebuaaa wɔ lɛ, nɔ ko kwraa bɛ ni wɔbaanyɛ wɔfee lɛ jogbaŋŋ.​—1 Kor. 1:26-31.

12. Mɛni ji nɔ kroko ni kɛ́ wɔfee lɛ ebaatsɔɔ akɛ wɔmiiba wɔhe shi tamɔ Yesu? Okɛ enɛ he nɔkwɛmɔnɔ ahã.

¹² Mɛni ji nɔ kroko ni kɛ́ wɔfee lɛ ebaatsɔɔ akɛ wɔmiiba wɔhe shi tamɔ Yesu? Ŋɔɔ lɛ akɛ, asafoŋ onukpa ko he be babaoo kɛye ebua asafoŋ sɔɔlɔ ko ni edako be ni oblanyo lɛ saa ehe koni ehã eklɛŋklɛŋ maŋshiɛmɔ lɛ. Oblanyo lɛ hã maŋshiɛmɔ lɛ jogbaŋŋ ni asafoŋbii lɛ ná he miishɛɛ diɛŋtsɛ. Be ni akpa lɛ, nyɛmi ko kɛɛ asafoŋ onukpa lɛ akɛ: ‘Ashimashi bɔ mɔdɛŋ waa, aloo onaaa?’ Ani ehe miihia ni asafoŋ onukpa lɛ akɛɛ akɛ: ‘Hɛɛ, shi ehe mi be pii dani minyɛ miye mibua lɛ ni efee lɛ nakai’? Aloo ebaajɛ heshibaa mli ewie nɔ ko tamɔ: ‘Hɛɛ, ebɔ mɔdɛŋ waa.’ Kɛ́ wɔbaa wɔhe shi lɛ, no lɛ, kɛ́ wɔfee nii wɔhã mɛi lɛ, wɔsumɔŋ ni wɔgbala mɛi ajwɛŋmɔ kɛba wɔnɔ. Moŋ lɛ, wɔbaahã ehi wɔjwɛŋmɔ mli akɛ, Yehowa na nɔ ni wɔfee lɛ ni eyɛ he miishɛɛ. (Okɛto Mateo 6:2-4 lɛ he; Heb. 13:16) Kɛ́ wɔkase Yesu ni wɔba wɔhe shi lɛ, Yehowa náa he miishɛɛ waa.​—1 Pet. 5:6.

13. Be ni Yesu bɛŋkɛ Nain maŋ lɛ agbó lɛ naa lɛ, mɛni ena? Ni mɛni efee yɛ he? (Luka 7:11-15)

¹³ Kanemɔ Luka 7:11-15. Feemɔ shihilɛ nɛɛ ni ba yɛ afi 31 Ŋ.B. lɛ he mfoniri okwɛ. Yesu tee Nain, ni ji Galilea maŋ ko ni kɛ Shunem teŋ jekɛɛɛ lɛ. Kɛ́ obaakai lɛ, Shunem ji he ni gbalɔ Elisha tee yoo ko binuu shi yɛ aaafee afii 900 dani afɔ Yesu. (2 Maŋ. 4:32-37) Be ni Yesu shɛ maŋ lɛ agbó lɛ naa lɛ, ena ni atere gbonyo ko kɛmiije kpo. Nɔ ni ena lɛ yɛ awerɛho waa. Yoo ko bi kome pɛ ni eyɔɔ lɛ egbo. No mli lɛ, mɛi babaoo fata yoo lɛ he ni amɛmiiye awerɛho. Yesu wa mɛi ni tere gbonyo lɛ edamɔ shi ni efee nɔ ko ni yɔɔ naakpɛɛ ehã yoo nɛɛ. Etee ebinuu lɛ shi. Yɛ Sanekpakpai lɛ amli lɛ, abɔ amaniɛ akɛ Yesu tee mɛi etɛ ashi, ni yoo nɛɛ binuu lɛ ji amɛteŋ klɛŋklɛŋ mɔ.

14. Mɛni ji nibii komɛi ni sa kadimɔ yɛ sane ni abɔ he amaniɛ yɛ Luka yitso 7 lɛ mli lɛ he? (Kwɛmɔ mfoniri lɛ hu.)

¹⁴ Nyɛhãa wɔsusua nibii komɛi ni sa kadimɔ yɛ sane nɛɛ ni abɔ he amaniɛ yɛ Luka yitso 7 lɛ mli lɛ ahe wɔkwɛa. Ani oyɔse akɛ, klɛŋklɛŋ lɛ, Yesu “hiŋmɛi gba” yoo lɛ ni binuu lɛ egbo lɛ nɔ, ni no sɛɛ lɛ, “emusuŋ tsɔ lɛ yɛ ehe”? (Kuku 13) Ekolɛ, ena bɔ ni yoo lɛ fóɔ waa kɛnyiɛ ebinuu lɛ gbonyo lɛ hiɛ lɛ, ni enɛ hã enu he waa ehã yoo lɛ. Jeee nu kɛkɛ Yesu nu he ehã yoo lɛ, shi efee nɔ ko kɛtsɔɔ akɛ emusuŋ tsɔ lɛ yɛ ehe. Klɛŋklɛŋ lɛ, Yesu kɛ yoo lɛ wie ni eshɛje emii. Ekɛɛ lɛ akɛ: “Kpa yaafo.” No sɛɛ lɛ, efee nɔ kroko kɛye ebua yoo lɛ. Etee oblanyo lɛ shi ni ‘ekɛ lɛ hã enyɛ.’​—Kuku 14, 15.

15. Mɛni wɔbaanyɛ wɔkase yɛ Yesu he yɛ naakpɛɛ nii ni efee lɛ mli?

¹⁵ Mɛni wɔbaanyɛ wɔkase yɛ Yesu he be ni etee yoo okulafo lɛ binuu lɛ shi lɛ? Wɔkaseɔ akɛ, esa akɛ wɔnu he wɔhã mɛi ni agboi yɛ amɛnɔ lɛ. Wɔnyɛŋ wɔtee gbohii ashi tamɔ Yesu fee lɛ, shi kɛ́ wɔkɛ wɔhiɛ fɔ̃ shi lɛ, wɔbaana nibii ni baahã wɔmusuŋ atsɔ wɔ yɛ mɛi ni agboi yɛ amɛnɔ lɛ ahe tamɔ bɔ ni Yesu musuŋ tsɔ lɛ lɛ. Ni kɛ́ wɔmusuŋ tsɔ wɔ lɛ, wɔbaanyɛ wɔwie nɔ ko loo wɔfee nɔ ko kɛye wɔbua amɛ ni wɔkɛshɛje amɛmii.d (Abɛi 17:17; 2 Kor. 1:3, 4; 1 Pet. 3:8) Nɔ ko fioo ni wɔbaawie loo nɔ ko fioo ni wɔbaafee lɛ po baanyɛ awo amɛ hewalɛ ni eshɛje amɛmii.

16. Tamɔ bɔ ni wɔnaa yɛ mfoniri lɛ mli lɛ, mɛni wɔkaseɔ yɛ nyɛmi yoo lɛ ni bi gbo etsɛko lɛ sane lɛ mli?

¹⁶ Naa niiashikpamɔ ko ni ba afii komɛi ni eho nɛ. Aalá yɛ Maŋtsɛyeli Asa lɛ nɔ, ni nyɛmi yoo ko na akɛ nyɛmi yoo ko ni yɔɔ emasɛi gbɛ nɔŋŋ lɛ miifó. No mli lɛ, nyɛmi yoo lɛ ni fóɔ lɛ biyoo gbo etsɛko, ni aawie gbohiiashitee hiɛnɔkamɔ lɛ he yɛ lala ni aláa lɛ mli. Enɛ hewɔ lɛ, nyɛmi yoo lɛ tsi ebɛŋkɛ nyɛmi yoo lɛ ni fóɔ lɛ ni ekɛ enine fɔ̃ ekɔɔŋ nɔ ni ekɛ lɛ fee ekome kɛlá lala lɛ kɛgbe naa. Sɛɛ mli lɛ, nyɛmi yoo lɛ ni fóɔ lɛ wie akɛ: “Mibasumɔ nyɛmimɛi lɛ waa.” Eŋɔɔ enaa waa akɛ etee asafoŋ kpee nakai gbi lɛ. Ewie akɛ: “Maŋtsɛyeli Asa lɛ nɔ ji he ni wɔnáa yelikɛbuamɔ yɛ.” Wɔle akɛ, Yehowa naa nibii bibii po ni wɔfeɔ kɛtsɔɔ akɛ wɔnuɔ he wɔhãa mɛi ni agboi yɛ amɛnɔ ni “werɛ eho amɛhe” lɛ, ni ehiɛ sɔɔ waa.​—Lala 34:18.

17. Mɛni wɔkase yɛ nikasemɔ nɛɛ mli?

¹⁷ Kɛ́ wɔkase naakpɛɛ nii ni Yesu fee ni awie he yɛ Sanekpakpai lɛ amli lɛ ahe nii lɛ, wɔbaaná he sɛɛ waa. Naakpɛɛ nii ni Yesu fee lɛ hãa wɔnaa akɛ, lɛ kɛ Yehowa sumɔɔ wɔ waa, ni akɛ Yesu yɛ hewalɛ lɛ ni ebaanyɛ ekɛfo adesai anaagbai fɛɛ asɛɛ. Amɛhãa wɔnaa hu akɛ, nibii fɛɛ ni awo shi akɛ Maŋtsɛyeli lɛ baafee lɛ baaba mli. Kɛ́ wɔmiikase naakpɛɛ nii nɛɛ ahe nii lɛ, wɔbaanyɛ wɔsusu nɔ ni amɛtsɔɔ wɔ yɛ Yesu he kɛ bɔ ni wɔbaafee wɔkase lɛ lɛ he. Ekolɛ obaanyɛ oto gbɛjianɔ ni okase enɛ he nii fiofio be ni ofeɔ aŋkro nikasemɔ loo be ni nyɛfeɔ Weku Jamɔ lɛ. Kɛ́ ofee nakai lɛ, obaakase nibii pii ni obaanyɛ ogba mɛi krokomɛi ni nyɛkɛtswa nyɛhe nyɛma shi.​—Rom. 1:11, 12.

18. Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁸ Yɛ Yesu sɔɔmɔ nitsumɔ lɛ naagbeegbɛ lɛ, etee naagbee mɔ yɛ mɛi etɛ ni abɔ amaniɛ akɛ etee amɛ shi lɛ shi. Esoro gbohiiashitee nɛɛ kwraa yɛ ekrokomɛi ni abɔ he amaniɛ lɛ ahe, ejaakɛ mɔ ni etee lɛ shi lɛ ji enaanyo ko ni esumɔɔ esane waa. Efee nakai be ni enaanyo lɛ egbo ni eye gbii ejwɛ momo yɛ gbonyobu lɛ mli. Mɛni wɔbaanyɛ wɔkase kɛjɛ nakai naakpɛɛ nii lɛ ni abɔ he amaniɛ yɛ Biblia lɛ mli lɛ mli? Ni mɛni kɛ́ wɔfee lɛ, ebaahã hemɔkɛyeli ni wɔyɔɔ yɛ gbohiiashitee lɛ mli lɛ mli awa? Wɔbaahã sanebimɔi nɛɛ ahetoo yɛ nikasemɔ ni nyiɛ sɛɛ mli.