Ohiɛ Asɔ ‘Hii Ni Akɛhã Akɛ Nikeenii’ Lɛ

 1. Mɛni ji nibii komɛi ni hãa wɔnaa akɛ, Yesu feɔ ejurɔ waa?

ADESA ko bɛ ni feɔ ejurɔ fe Yesu. Be ni Yesu yɔɔ shikpɔŋ lɛ nɔ lɛ, ekɛ hewalɛ ni Yehowa edro lɛ lɛ fee naakpɛɛ nii babaoo kɛye ebua mɛi. (Luka 9:​12-17) Agbɛnɛ hu, ekɛ ewala fɔ̃ shi ehã wɔ, ni enɛ ji nɔ ni fe fɛɛ ni hãa wɔnaa akɛ efeɔ ejurɔ. (Yoh. 15:13) Kɛjɛ be ni atee Yesu shi aahu kɛbashi bianɛ lɛ, etee nɔ efee wɔ ejurɔ. Akɛ nɔkwɛmɔnɔ lɛ, tamɔ bɔ ni ewo shi lɛ, ebi Yehowa ni efɔse mumɔ krɔŋkrɔŋ lɛ eshwie wɔnɔ koni etsɔɔ wɔ nii ni eshɛje wɔmii. (Yoh. 14:​16, 17, shn.; 16:13) Agbɛnɛ hu, eetsɔɔ wɔ nii yɛ wɔsafoŋ kpeei lɛ ashishi koni wɔnyɛ wɔtsɔɔ mɛi Biblia lɛ yɛ je lɛŋ he fɛɛ he, ni wɔye wɔbua amɛ ni amɛbatsɔmɔ ekaselɔi.—Mat. 28:​18-20.

 2. Namɛi ji hii ni awie yɛ Efesobii 4:​7, 8 lɛ akɛ amɛji “nikeenii” lɛ ateŋ mɛi komɛi?

² Naa nɔ kroko ni Yesu efee ehã wɔ ni hãa wɔnaa akɛ efeɔ ejurɔ waa. Bɔfo Paulo kɛɛ be ni Yesu tee ŋwɛi lɛ, “ekɛ hii hã akɛ nikeenii.” (Kanemɔ Efesobii 4:​7, 8.) Paulo kɛɛ Yesu kɛ hii nɛɛ hã koni amɛye amɛbua asafo lɛ yɛ gbɛi srɔtoi anɔ. (Efe. 1:​22, 23; 4:​11-13) Ŋmɛnɛ lɛ, hii ni akɛhã akɛ nikeenii nɛɛ ateŋ mɛi komɛi sɔmɔɔ akɛ asafoŋ sɔɔlɔi, asafoŋ onukpai, kɛ kpokpaa nɔkwɛlɔi.a Nyɛmimɛi nɛɛ yeee emuu, no hewɔ lɛ, amɛtɔ̃ɔ. (Yak. 3:2) Shi wɔ-Nuŋtsɔ Yesu Kristo miitsɔ amɛnɔ eeye eebua wɔ; amɛji nikeenii ni ekɛhã wɔ.

 3. Ani wɔ fɛɛ wɔbaanyɛ wɔye wɔbua nyɛmimɛi hii ni ji nikeenii lɛ? Okɛ nɔkwɛmɔnɔ ko atsɔɔ mli.

³ Yesu kɛ hii nɛɛ hã akɛ nikeenii koni amɛtswa asafo lɛ amɛma shi. (Efe. 4:12) Shi wɔ fɛɛ wɔbaanyɛ wɔye wɔbua amɛ ni amɛtsu nitsumɔ ni he hiaa waa nɛɛ. Wɔbaanyɛ wɔkɛ enɛ ato nɔ ni yaa nɔ kɛ́ aama Maŋtsɛyeli Asa lɛ he. Nyɛmimɛi lɛ ekomɛi maa tsũ lɛ diɛŋtsɛ. Shi nyɛmimɛi lɛ ekomɛi hu hoɔ nii loo amɛtsuɔ nibii krokomɛi kɛyeɔ amɛbuaa mɛi ni maa tsũ lɛ. Nakai nɔŋŋ wɔ fɛɛ wɔbaanyɛ wɔtsɔ wɔwiemɔ kɛ wɔnifeemɔ nɔ wɔye wɔbua asafoŋ sɔɔlɔi, asafoŋ onukpai, kɛ kpokpaa nɔkwɛlɔi. Yɛ nikasemɔ nɛɛ mli lɛ, wɔbaakwɛ bɔ ni wɔnáa deŋme ni nyɛmimɛi hii nɛɛ gboɔ yɛ wɔhe lɛ he sɛɛ wɔhãa kɛ nɔ ni wɔbaanyɛ wɔfee kɛtsɔɔ amɛ kɛ Yesu, mɔ ni kɛ amɛ hã wɔ lɛ, akɛ wɔhiɛ sɔɔ amɛ.

ASAFOŊ SƆƆLƆI TSUƆ “YELIKƐBUAMƆ NITSUMƆI”

 4. Yɛ blema Kristofoi lɛ abeiaŋ lɛ, mɛɛ “yelikɛbuamɔ nitsumɔi” asafoŋ sɔɔlɔi tsu?

⁴ Yɛ blema Kristofoi lɛ abeiaŋ lɛ, ahole nyɛmimɛi hii komɛi asafoŋ sɔɔlɔi. (1 Tim. 3:8) Etamɔ nɔ ni nyɛmimɛi hii nɛɛ ni tsu “yelikɛbuamɔ nitsumɔi” ni Paulo wie he lɛ. (1 Kor. 12:28) Ekã shi faŋŋ akɛ, asafoŋ sɔɔlɔi lɛ tsu nitsumɔi ni he hiaa yɛ asafo lɛ mli lɛ ekomɛi ahe nii koni asafoŋ onukpai lɛ anyɛ amɛkɛ amɛjwɛŋmɔ ama nitsɔɔmɔ kɛ nɔkwɛmɔ nitsumɔ lɛ nɔ. Akɛ nɔkwɛmɔnɔ lɛ, eeenyɛ efee akɛ, asafoŋ sɔɔlɔi lɛ kwɛ Ŋmalɛ ni yɔɔ lɛ nɔ amɛŋmala eko amɛshwie shi, loo amɛyahé nibii ni he baahia lɛ kɛba koni anyɛ afee nakai.

 5. Tsɔɔmɔ nibii komɛi ni asafoŋ sɔɔlɔi ni yɔɔ ŋmɛnɛ lɛ tsuɔ kɛyeɔ amɛbuaa asafo lɛ.

⁵ Hã wɔsusu nibii komɛi ni he hiaa ni asafoŋ sɔɔlɔi ni yɔɔ osafo lɛ mli lɛ tsuɔ lɛ ahe wɔkwɛ. (1 Pet. 4:10) Bei komɛi lɛ, ahãa asafoŋ sɔɔlɔi kwɛɔ asafo lɛ shikpɔŋkuku lɛ loo asafo lɛ shika he akɔntaabuu lɛ nɔ. Bei komɛi hu lɛ, amɛshɛɔ woji amɛhãa asafoŋbii lɛ, amɛkwɛɔ tsɔji ni akɛtswaa lala kɛ tsɔji ni akɛjieɔ vidio lɛ anɔ, amɛsɔmɔɔ akɛ kpeei ashishi sɔɔlɔi (attendants), loo amɛyeɔ amɛbuaa kɛ Maŋtsɛyeli Asa lɛ kuramɔ. Nibii nɛɛ fɛɛ yeɔ ebuaa koni nibii aya lɛ jogbaŋŋ yɛ asafo lɛ mli. (1 Kor. 14:40) Kɛfata he lɛ, asafoŋ sɔɔlɔi komɛi tsuɔ nifeemɔi ahe nii yɛ Wɔshiɛmɔ Kɛ Wɔshihilɛ Kpee lɛ shishi loo amɛhãa maŋshiɛmɔi. Bei komɛi lɛ, abaanyɛ ahã asafoŋ sɔɔlɔ ko aye abua shiɛmɔyaa kuu nɔkwɛlɔ ko. Bei komɛi hu lɛ, asafoŋ onukpa ko baanyɛ ahã asafoŋ sɔɔlɔ ko ni bɔɔ mɔdɛŋ lɛ afata ehe kɛ́ eyaasara nyɛmi ko.

 6. Mɛɛ gbɛ nɔ wɔnáa nitsumɔ ni asafoŋ sɔɔlɔi lɛ tsuɔ lɛ he sɛɛ? Ni te enɛ hãa wɔnuɔ he wɔhãa tɛŋŋ?

⁶ Mɛɛ gbɛ nɔ wɔnáa nitsumɔ ni asafoŋ sɔɔlɔi lɛ tsuɔ lɛ he sɛɛ? Nyɛmi yoo ko ni yɔɔ Bolivia, ni atsɛɔ lɛ Beberlyb lɛ wie akɛ: “Asafoŋ sɔɔlɔi ni yɔɔ wɔsafo lɛ mli lɛ tsuɔ nii waa, ni no hewɔ lɛ, mináa asafoŋ kpeei lɛ ahe sɛɛ waa. Amɛnitsumɔi kpakpai lɛ ahewɔ lɛ, minyɛɔ miláa, mihãa saji ahetoo, minuɔ wiemɔi ni ahãa lɛ, ni mináa vidioi kɛ mfonirii lɛ ahe sɛɛ. Amɛkwɛɔ koni mɛi fɛɛ ni yɔɔ Maŋtsɛyeli Asa lɛ nɔ lɛ afee shweshweeshwe, ni amɛyeɔ amɛbuaa mɛi ni kɔnɛtiɔ asafoŋ kpeei lɛ kɛjɛɔ shĩa lɛ. Kɛ́ akpa asafoŋ kpeei lɛ, amɛyeɔ amɛbuaa ni asaa Maŋtsɛyeli Asa lɛ nɔ, amɛkwɛɔ asafo lɛ shika he akɔntaabuu lɛ nɔ, ni kɛ́ wɔmiitao wolo ko lɛ, amɛhãa wɔ. Mináaa amɛ po!” Nyɛmi yoo ko ni yɔɔ Colombia, ni atsɛɔ lɛ Leslie, ni ewu sɔmɔɔ akɛ asafoŋ onukpa lɛ wie akɛ: “Asafoŋ sɔɔlɔi lɛ yeɔ amɛbuaa miwu. Eji amɛbɛ kulɛ, enitsumɔ baafa waa diɛŋtsɛ. No hewɔ lɛ, eŋɔɔ minaa waa akɛ amɛyɛ ekãa ni amɛmiisumɔ ni amɛye amɛbua lɛ.” Ŋwanejee ko bɛ he akɛ, bo hu ohiɛ sɔɔ asafoŋ sɔɔlɔi lɛ waa yɛ nitsumɔi ni amɛtsuɔ lɛ ahewɔ.—1 Tim. 3:13.

 7. Mɛni wɔbaanyɛ wɔfee kɛtsɔɔ asafoŋ sɔɔlɔi akɛ wɔhiɛ sɔɔ amɛ? (Kwɛmɔ mfoniri lɛ hu.)

⁷ Ekã shi faŋŋ akɛ, wɔhiɛ sɔɔ nitsumɔ kpakpa ni asafoŋ sɔɔlɔi lɛ tsuɔ lɛ. Shi Biblia lɛ woɔ wɔ hewalɛ ni wɔfee nɔ kroko wɔfata he; no ji, wɔhã amɛle akɛ wɔhiɛ sɔɔ amɛ. (Kol. 3:15) Naa nɔ ni asafoŋ onukpa ko ni yɔɔ Finland ni atsɛɔ lɛ Christopher lɛ feɔ kɛtsɔɔ akɛ ehiɛ sɔɔ asafoŋ sɔɔlɔi lɛ. Ewie akɛ: “Miŋmaa ŋmalɛ yɛ kaadi nɔ ni mikɛhãa amɛ loo mikɛ ŋmalɛ lɛ sɛndiɔ amɛ tɛs mɛseji ni miŋmaa nɔ ko pɔtɛɛ ni amɛfee ni ewo mi hewalɛ loo nɔ hewɔ ni mihiɛ sɔɔ nɔ ni amɛtsuɔ lɛ mifataa he.” Nyɛmi nuu ko ni yɔɔ New Caledonia, ni atsɛɔ lɛ Pascal lɛ kɛ eŋa, Jael, sɔleɔ amɛhãa asafoŋ sɔɔlɔi yɛ be kɛ beiaŋ. Pascal wie akɛ: “Gbii etɛ nɛɛ, wɔsɔleɔ wɔhãa asafoŋ sɔɔlɔi ni yɔɔ wɔsafo lɛ mli lɛ waa. Wɔdaa Yehowa shi akɛ ekɛ amɛ edro wɔ, ni wɔkpaa lɛ fai ni efata amɛhe ni eye ebua amɛ.” Yehowa boɔ sɔlemɔi ni tamɔ nɛkɛ toi, ni asafo muu lɛ fɛɛ náa he sɛɛ.—2 Kor. 1:11.

ASAFOŊ ONUKPAI ‘TSUƆ NII WAA’

 8. Mɛni hewɔ eja gbɛ akɛ Paulo wie akɛ enyɛmimɛi asafoŋ onukpai lɛ “tsuɔ nii waa” lɛ? (1 Tesalonikabii 5:​12, 13)

⁸ Yɛ blema Kristofoi lɛ abeiaŋ lɛ, asafoŋ onukpai tsu nii waa kɛye amɛbua asafo lɛ. (Kanemɔ 1 Tesalonikabii 5:​12, 13; 1 Tim. 5:17) ‘Amɛkwɛ asafo lɛ nɔ,’ ni tsɔɔ akɛ, amɛto kpeei ahe gbɛjianɔ ni amɛfee ekome akɛ onukpai akuu kɛkpɛ yiŋ srɔtoi ni kɔɔ asafo lɛ he. Agbɛnɛ hu, amɛwie amɛtsɔɔ amɛnyɛmimɛi Kristofoi lɛ, ni tsɔɔ akɛ, amɛjɛ suɔmɔ mli amɛwo amɛ ŋaa yɛ nibii pɔtɛi ahe koni no aye abua amɛ ni amɛya nɔ amɛsɔmɔ Yehowa jogbaŋŋ. (1 Tes. 2:​11, 12; 2 Tim. 4:2) Kɛfata he lɛ, wɔle akɛ nyɛmimɛi hii nɛɛ tsu nii waa koni amɛnyɛ amɛkwɛ amɛwekui lɛ, ni amɛfee nibii ni baahã amɛhe aya nɔ awa yɛ hemɔkɛyeli lɛ mli.—1 Tim. 3:​2, 4; Tito 1:​6-9.

 9. Tsɔɔmɔ nibii komɛi ni asafoŋ onukpai ni yɔɔ ŋmɛnɛ lɛ tsuɔ.

⁹ Ŋmɛnɛ hu lɛ, asafoŋ onukpai bɛ dekã kwraa. Amɛshiɛɔ sane kpakpa lɛ. (2 Tim. 4:5) Amɛtsuɔ nitsumɔ nɛɛ kɛ ekãa ni amɛkɛfeɔ nɔkwɛmɔnɔ kpakpa amɛhãa asafoŋbii lɛ. Amɛtoɔ gbɛjianɔ koni anyɛ atsu asafo lɛ shikpɔŋkuku lɛ mli nii, ni amɛtsɔɔ wɔ bɔ ni wɔbaafee wɔshiɛ ni wɔtsɔɔ nii jogbaŋŋ. Agbɛnɛ hu, amɛsɔmɔɔ akɛ kojolɔi, ni kɛ́ amɛmiiye sane lɛ, amɛnaa mɔbɔ, ni amɛkwɛɛɛ hiɛiaŋ. Kɛ́ nyɛmi ko fee esha ni yɔɔ hiɛdɔɔ lɛ, asafoŋ onukpai lɛ bɔɔ mɔdɛŋ ni amɛye amɛbua lɛ koni esaa ekɛ Yehowa teŋ. Nakai beiaŋ nɔŋŋ lɛ, amɛbuɔ asafo lɛ he koni asafo lɛ he atse. (1 Kor. 5:​12, 13; Gal. 6:1) Shi nɔ titri ni asafoŋ onukpai lɛ tsuɔ ji, amɛkwɛɔ wɔnɔ. (1 Pet. 5:​1-3) Amɛjɛɔ Biblia lɛ mli amɛhãa wiemɔi ni tswaa mɔ emaa shi, amɛmiaa amɛhiɛ akɛ amɛbaale mɔ fɛɛ mɔ yɛ asafo lɛ mli, ni amɛyasaraa nyɛmimɛi lɛ koni amɛwo amɛ hewalɛ. Asafoŋ onukpai komɛi hu yeɔ amɛbuaa kɛ Maŋtsɛyeli Asai amaamɔ kɛ amɛkuramɔ, amɛtoɔ kpeei wuji ahe gbɛjianɔ, ni amɛsɔmɔɔ akɛ Ajinafoi Akui Ni Kɛ Helatsamɔhei Shãraa (HLC) kɛ Helatsɛmɛi Asaramɔ Kui amli bii. Anɔkwa, asafoŋ onukpai lɛ gboɔ wɔhe deŋme waa!

10. Mɛni hewɔ wɔhiɛ sɔɔ asafoŋ onukpai lɛ waa lɛ?

¹⁰ Yehowa gba akɛ, ebaahã wɔ nɔkwɛlɔi ni baakwɛ wɔnɔ jogbaŋŋ, ni akɛ, ‘wɔsheŋ gbeyei ni wɔtsui hu efaŋ dɔŋŋ.’ (Yer. 23:4) Niiashikpamɔ ni nyɛmi yoo ko ni yɔɔ Finland, ni atsɛɔ lɛ Johanna lɛ ná be ko be ni emami bɛ hewalɛ kwraa lɛ hã ena akɛ sane nɛɛ ji anɔkwale. Ewie akɛ: “Ewa kɛhã mi akɛ magba mɛi minaagbai kɛ bɔ ni minuɔ he mihãa, shi asafoŋ onukpa lɛ to etsui shi ehã mi, eyɛ mli akɛ mileee lɛ jogbaŋŋ. Ekɛ mi sɔle, ni ehã mina akɛ Yehowa sumɔɔ mi. Mikaiii nɔ tuuntu ni ekɛɛ mi, shi mikaiɔ akɛ be ni ekɛ mi wie egbe naa lɛ, mitsui enyɔ mimli, ni misheee gbeyei dɔŋŋ. Mile akɛ, Yehowa tsu lɛ kɛba miŋɔɔ yɛ nakai ŋmɛlɛtswaa lɛ nɔ tuuntu, ejaakɛ ena akɛ yelikɛbuamɔ he miihia mi.” Mɛɛ gbɛ nɔ asafoŋ onukpai ni yɔɔ osafo lɛ mli lɛ eye amɛbua bo?

11. Mɛni wɔbaanyɛ wɔfee kɛtsɔɔ asafoŋ onukpai lɛ akɛ wɔhiɛ sɔɔ amɛnitsumɔ kpakpa lɛ? (Kwɛmɔ mfoniri lɛ hu.)

¹¹ Yehowa miisumɔ ni, yɛ wɔtsuiŋ tɔ̃ɔ lɛ, wɔhiɛ asɔ asafoŋ onukpai lɛ “yɛ nitsumɔ ni amɛtsuɔ lɛ hewɔ.” (1 Tes. 5:​12, 13) Nyɛmi yoo ko ni atsɛɔ lɛ Henrietta, ni lɛ hu eyɔɔ Finland lɛ, wie akɛ: “Eyɛ mli akɛ asafoŋ onukpai lɛ miisumɔ ni amɛye amɛbua mɛi moŋ, shi no etsɔɔɔ akɛ amɛbɛ nɔ ko feemɔ, etɔɔɔ amɛ, loo amɛbɛ naagbai. Bei komɛi lɛ, mikɛɔ amɛ akɛ: ‘Ole nɔ ko? Asafoŋ onukpa kpakpa ji bo. Mile akɛ ole nakai momo, shi miitao makɛɛ bo.’” Nyɛmi yoo ko ni yɔɔ Türkiye,c ni atsɛɔ lɛ Sera lɛ wie akɛ: “Kɛ́ wɔwo asafoŋ onukpai lɛ hewalɛ lɛ, no baaye abua amɛ ni amɛya nɔ amɛtsu amɛnitsumɔ lɛ jogbaŋŋ. No hewɔ lɛ, wɔbaanyɛ wɔŋma nɔ ko yɛ kaadi nɔ ni wɔkɛhã amɛ, wɔfɔ̃ amɛ nine ni amɛba wɔye nii, loo wɔkɛ amɛ atsu nii yɛ shiɛmɔ nitsumɔ lɛ mli.” Ani asafoŋ onukpa ko yɛ ni ohiɛ sɔɔ lɛ waa yɛ nibii pii ni etsuɔ kɛyeɔ ebuaa asafo lɛ hewɔ? Kwɛmɔ akɛ mɛni obaanyɛ ofee kɛtsɔɔ lɛ akɛ ohiɛ sɔɔ enitsumɔ kpakpa lɛ.—1 Kor. 16:18.

KPOKPAA NƆKWƐLƆI WAJEƆ ASAFOI LƐ

12. Yɛ asafoŋ sɔɔlɔi kɛ asafoŋ onukpai asɛɛ lɛ, namɛi ekoŋŋ Yesu kɛtsu nii kɛwaje asafoi lɛ? (1 Tesalonikabii 2:​7, 8)

¹² Hii ni Yesu kɛhã akɛ nikeenii lɛ ateŋ mɛi komɛi hu yeɔ amɛbuaa asafo lɛ yɛ gbɛ kroko nɔ. Yesu tsɔ onukpai ni yɔɔ Yerusalem lɛ anɔ ehala Paulo, Barnaba, kɛ nyɛmimɛi hii krokomɛi akɛ nɔkwɛlɔi gbɛfalɔi. (Bɔf. 11:22) Mɛni hewɔ? Yiŋtoo hewɔ ni ehã ahole asafoŋ sɔɔlɔi kɛ asafoŋ onukpai yɛ asafoi lɛ amli lɛ, nakai yiŋtoo lɛ nɔŋŋ hewɔ ehã ahala nyɛmimɛi lɛ ekomɛi akɛ nɔkwɛlɔi gbɛfalɔi, ni no ji, koni amɛwaje asafoi lɛ. (Bɔf. 15:​40, 41) Nɔkwɛlɔi gbɛfalɔi nɛɛ kɛ nibii pii shãa afɔle koni amɛnyɛ amɛtsu nitsumɔ ni akɛwo amɛdɛŋ lɛ. Amɛtswa amɛfai shi akɛ, amɛbaatsɔɔ nyɛmimɛi lɛ nii ni amɛwo amɛ hewalɛ, kɛ́ no baahã amɛwala ayaje oshãra mli po.—Kanemɔ 1 Tesalonikabii 2:​7, 8.

13. Tsɔɔmɔ nibii komɛi ni kpokpaa nɔkwɛlɔi tsuɔ.

¹³ Kpokpaa nɔkwɛlɔi taaa he kome. Amɛteŋ mɛi komɛi fãa gbɛ kakadaŋŋ kɛjɛɔ asafo kome mli kɛyaa ekroko mli. Daa otsi lɛ, kpokpaa nɔkwɛlɔ lɛ hãa wiemɔi srɔtoi, eyasaraa nyɛmimɛi ni ewoɔ amɛ hewalɛ, ekɛ gbɛgbalɔi lɛ kpeɔ, ekɛ asafoŋ onukpai lɛ kpeɔ, ni ekwɛɔ kpee kɛhã shiɛmɔyaa nɔ. Agbɛnɛ hu, ekaseɔ wiemɔi ni ebaahã lɛ, ni etoɔ kpokpaa nɔ kpeei kɛ kpeei wuji ahe gbɛjianɔ. Kɛfata he lɛ, etsɔɔ nii yɛ gbɛgbalɔi askul lɛ mli, etoɔ kpee krɛdɛɛ ni akɛ gbɛgbalɔi ni yɔɔ kpokpaa lɛ mli lɛ feɔ lɛ he gbɛjianɔ, ni etsuɔ nibii krokomɛi ni nitsumɔhe nine lɛ kɛwoɔ edɛŋ akɛ etsu lɛ. Nitsumɔi nɛɛ ekomɛi yɛ ni be bɛ he kwraa.

14. Mɛni hewɔ wɔsumɔɔ wɔkpokpaa nɔkwɛlɔi lɛ waa lɛ?

¹⁴ Mɛɛ gbɛ nɔ asafoi lɛ náa nitsumɔ kpakpa ni kpokpaa nɔkwɛlɔi lɛ tsuɔ lɛ he sɛɛ? Nyɛmi nuu ko ni yɔɔ Türkiye lɛ wie akɛ: “Be fɛɛ be ni amɛbaaba amɛbasara wɔ lɛ, ekanyaa mi ni mikɛ be pii aye abua nyɛmimɛi lɛ. Mikɛ kpokpaa nɔkwɛlɔi pii eshãra, ni manyɛ makɛɛ akɛ amɛteŋ mɔ ko mɔ ko bɛ ni tseee ehiɛ ehãaa mɛi loo ehã minu he akɛ ebɛ dekã.” Be ko lɛ, Johanna, mɔ ni wɔtsĩ etã kɛtsɔ hiɛ lɛ, kɛ kpokpaa nɔkwɛlɔ ko tee shiɛmɔ, shi amɛnáaa mɛi. Fɛɛ sɛɛ lɛ, ewie akɛ: “Mihiɛ kpaŋ nakai gbi lɛ nɔ kɔkɔɔkɔ. No mli lɛ, minyɛmimɛi yei enyɔ lɛ efã kɛshi he ni wɔyɔɔ lɛ ni mihiɛ miitse amɛ waa. Kpokpaa nɔkwɛlɔ lɛ wo mi hewalɛ ni ehã mina akɛ, ekolɛ bianɛ lɛ, jeee be fɛɛ be wɔnyɛɔ wɔkɛ wɔwekumɛi kɛ wɔnanemɛi shãraa bɔ ni wɔsumɔɔ ejaakɛ wɔkɛ amɛ bɛ he kome, shi yɛ jeŋ hee lɛ mli lɛ, wɔbaaná hegbɛi pii ni wɔkɛ amɛ ashãra kɛya naanɔ.” Ŋwanejee ko bɛ he akɛ, wɔteŋ mɛi pii sumɔɔ wɔkpokpaa nɔkwɛlɔi lɛ asane waa ejaakɛ amɛye amɛbua wɔ yɛ gbɛi srɔtoi anɔ.—Bɔf. 20:37–21:1.

15. (a) Yɛ nɔ ni aŋma yɛ 3 Yohane 5-8 lɛ naa lɛ, mɛni wɔbaanyɛ wɔfee kɛtsɔɔ akɛ wɔhiɛ sɔɔ kpokpaa nɔkwɛlɔi lɛ? (Kwɛmɔ mfoniri lɛ hu.) (b) Mɛni hewɔ esa akɛ wɔhiɛ asɔ nyɛmimɛi hii ni tsuɔ nii waa yɛ asafo lɛ mli lɛ aŋamɛi lɛ? (Kwɛmɔ akrabatsa ni ji “Ohiɛ Akakpa Amɛŋamɛi Lɛ Anɔ.”)

¹⁵ Bɔfo Yohane wo blema Kristofonyo ko ni atsɛɔ lɛ Gaio lɛ ŋaa akɛ, ehere nyɛmimɛi ni ebasara amɛ koni amɛwo asafoi lɛ hewalɛ lɛ hiɛmɛɛ ni ewo “amɛ gbɛ bɔ ni baasa Nyɔŋmɔ hiɛ.” (Kanemɔ 3 Yohane 5-8.) Kɛ́ kpokpaa nɔkwɛlɔ lɛ basara wɔ lɛ, nɔ kome ni wɔbaanyɛ wɔfee kɛtsɔɔ akɛ wɔmiihere lɛ hiɛmɛɛ ji, ni wɔbaafi gbɛjianɔ ni ato kɛhã eniyeli lɛ sɛɛ. Nɔ kroko ni wɔbaanyɛ wɔfee ji, ni wɔbaaya kpee kɛhã shiɛmɔyaa ni ebaafee lɛ shishi. Leslie ni wɔtsĩ etã kɛtsɔ hiɛ lɛ hu tsɔɔ nibii komɛi ni efeɔ kɛtsɔɔ akɛ ehiɛ sɔɔ nitsumɔ ni kpokpaa nɔkwɛlɔi lɛ tsuɔ lɛ. Ewie akɛ: “Misɔleɔ ni Yehowa ahã amɛ nibii ni he hiaa amɛ lɛ. Agbɛnɛ hu, bei komɛi lɛ, mi kɛ miwu ŋmaa amɛ lɛtai ni wɔkɛɔ amɛ bɔ ni amɛsaramɔ lɛ eye ebua wɔ.” Kpokpaa nɔkwɛlɔi yɛ naagbai tamɔ wɔ nɔŋŋ, ni bei komɛi lɛ, etɔɔ amɛ hu. Hela mɔɔ amɛ, amɛyeɔ amɛtsui, ni bei komɛi po lɛ, amɛnijiaŋ jeɔ wui. Ekolɛ Yehowa baatsɔ miishɛjemɔ wiemɔi loo nɔ ko fioo ko ni obaake kpokpaa nɔkwɛlɔ lɛ nɔ ehã sɔlemɔ ni kpokpaa nɔkwɛlɔ lɛ sɔleɔ kɛhã yelikɛbuamɔ lɛ hetoo.—Abɛi 12:25.

NYƐMIMƐI HII NI BAANYƐ ASƆMƆ AHE MIIHIA

16. Yɛ nɔ ni aŋma yɛ Abɛi 3:27 lɛ naa lɛ, mɛɛ saji nyɛmimɛi hii baanyɛ abi amɛhe?

¹⁶ Yɛ je lɛŋ fɛɛ lɛ, Yehowa asafo lɛ miitao hii ni baanyɛ asɔmɔ. No hewɔ lɛ, kɛ́ nyɛmi nuu ji bo ni abaptisi bo lɛ, ani ‘eyɛ ohewalɛ mli akɛ obaaye obua’? (Kanemɔ Abɛi 3:27.) Ani okɛma ohiɛ akɛ ootao otsɔ asafoŋ sɔɔlɔ? Ani oomia ohiɛ waa ni oshɛ oti nɛɛ he? Kɛ́ asafoŋ sɔɔlɔ ji bo lɛ, ani oobɔ mɔdɛŋ waa koni oya ohiɛ ni obatsɔ asafoŋ onukpa?d Ani obaanyɛ ofee tsakemɔi yɛ oshihilɛ mli koni onyɛ oya Skul Kɛhã Maŋtsɛyeli Sane Kpakpa Jajelɔi lɛ eko? Nibii ni obaakase yɛ skul nɛɛ mli lɛ baasaa bo jogbaŋŋ koni Yesu anyɛ ekɛ bo atsu nii kɛmɔ shi. Kɛ́ onuɔ he akɛ onyɛŋ oshɛ otii nɛɛ ahe lɛ, sɔlemɔ ohã Yehowa. Kpa lɛ fai koni ekɛ emumɔ krɔŋkrɔŋ lɛ aye abua bo ni onyɛ otsu nitsumɔ fɛɛ nitsumɔ ni akɛbaawo odɛŋ lɛ jogbaŋŋ.—Luka 11:13; Bɔf. 20:28.

17. Mɛni hii ni wɔ-Maŋtsɛ, Yesu Kristo kɛhã wɔ akɛ nikeenii lɛ hãa wɔnaa yɛ ehe?

¹⁷ Nitsumɔ ni nyɛmimɛi hii ni Yesu kɛ amɛ ehã wɔ akɛ “nikeenii” lɛ tsuɔ lɛ yeɔ odase akɛ Yesu nyiɛ wɔhiɛ yɛ naagbee gbii nɛɛ amli. (Mat. 28:20) Ani eŋɔɔɔ onaa akɛ wɔ-Maŋtsɛ lɛ sumɔɔ wɔ ni ekeɔ wɔ nii waa? Yesu le nibii ni he hiaa wɔ, ni ehã wɔ nyɛmimɛi hii ni baanyɛ atsu hiamɔ nii nɛɛ ahe nii amɛhã wɔ. No hewɔ lɛ, nyɛhãa wɔtsɔa wɔwiemɔ kɛ wɔnifeemɔi anɔ wɔhãa nyɛmimɛi hii ni tsuɔ nii waa nɛɛ anaa akɛ wɔhiɛ sɔɔ amɛ. Ni agbɛnɛ hu, wɔda Yehowa shi daa, ejaakɛ lɛ eŋɔɔ “nikeenii kpakpai fɛɛ kɛ nikeenii ni hi kɛwula shi fɛɛ” jɛɔ.—Yak. 1:17.