Okɛ Ohiɛ Afɔ̃ Yehowa nɔ Be Fɛɛ Be!

1-3. Mɛni hewɔ Paulo ná nɔmimaa akɛ ebaanyɛ ekɛ ehiɛ afɔ̃ Yehowa nɔ lɛ? (Kwɛmɔ mfoniri ni yɔɔ nikasemɔ lɛ shishijee lɛ.)

YƐ KLƐŊKLƐŊ afii 100 lɛ mli lɛ, Romabii lɛ wa Kristofoi lɛ ayi waa. Amɛshwa Kristofoi lɛ akɛ amɛji mɛi ni hã la ko ni kpãtã nii ahiɛ waa lɛ je yɛ Roma, ni amɛfolɔ amɛnaa akɛ amɛmiihi gbɔmɛi. Amɔmɔ Kristofoi babaoo. Akɛ amɛteŋ mɛi komɛi hã kooloi awuiyelɔi, ni amɛtserɛ amɛmli. Akala amɛteŋ mɛi komɛi hu akpɛtɛ tsei ahe be ni je ena, ni ashã amɛ hiɛkalɔi, koni amɛtso akɛ kanei. Eji oyɛ Roma, ni Kristofonyo ji bo kulɛ, shihilɛ baafee gbeyei ahã bo waa. Kulɛ gbi fɛɛ gbi lɛ, otsui baafã, ejaakɛ oleee be ni nibii nɛɛ eko baaba onɔ.

² Nɛkɛ be ni jaraa nɛɛ mli awo bɔfo Paulo tsuŋ lɛ. Ekolɛ ebi ehe kɛji enyɛmimɛi Kristofoi lɛ baaba amɛbaye amɛbua lɛ, ejaakɛ be ko ni eho ni ekɛ shihilɛ ko ni tamɔ nakai kpe lɛ, mɔ ko mɔ ko ebawaaa lɛ. Shi Yehowa ye ebua lɛ kɛtsɔ Nuŋtsɔ Yesu nɔ. Paulo ŋma akɛ: “Nuŋtsɔ lɛ damɔ mimasɛi ni ewo mi hewalɛ.” Hɛɛ, Yesu wo Paulo hewalɛ. Paulo ŋma po akɛ ajie lɛ “yɛ jata lɛ daaŋ.”​—2 Timoteo 4:16, 17.a (Kwɛmɔ shishigbɛ niŋmaa lɛ.)

³ Paulo kai bɔ ni Yehowa ye ebua lɛ lɛ. No hewɔ lɛ, ená nɔmimaa akɛ Yehowa baawaje lɛ koni enyɛ efi shi yɛ jaramɔ shihilɛ ni ekɛkpeɔ lɛ kɛ nɔ ni ekɛbaakpe wɔsɛɛ lɛ fɛɛ mli. Ená nɔmimaa aahu akɛ eŋma akɛ: “Nuŋtsɔ lɛ baajie mi kɛjɛ nitsumɔ fɔŋ fɛɛ nitsumɔ fɔŋ mli.” (2 Timoteo 4:18) Paulo kase akɛ, kɛ́ ekɛ shihilɛ ko kpe, ni enyɛmimɛi lɛ ebayeee amɛbuaaa lɛ po lɛ, ebaanyɛ ekɛ ehiɛ afɔ̃ Yehowa kɛ Yesu nɔ akɛ, amɛbaaye amɛbua lɛ. Eyiŋ efeee lɛ kɔshikɔshi yɛ enɛ he kwraa!

4, 5. (a) Namɔ baanyɛ aye abua bo be fɛɛ be ni obaayaje shihilɛ ko ni jaraa mli? (b) Te obaafee tɛŋŋ ohã wekukpaa ni yɔɔ okɛ Yehowa teŋ lɛ mli awa?

⁴ Ani okɛ shihilɛ ko ni jaraa ekpe pɛŋ ni onu he akɛ mɔ ko mɔ ko bɛ ni baaye abua bo? Ekolɛ onitsumɔ je odɛŋ loo okɛ naagbai kpe yɛ skul. Ekolɛ hela ko bamɔ bo waa aloo okɛ shihilɛ kroko ko ni jaraa kpe. Ekolɛ obi mɛi ni amɛye amɛbua bo, shi amɛnyɛɛɛ amɛfee nakai, ni no hã onijiaŋ je wui. Anɔkwa, naagbai komɛi yɛ ni adesai nyɛŋ atsu he nii. Kɛ́ okɛ naagbai nɛɛ ekomɛi kpe lɛ, mɛni obaafee? Biblia lɛ kɛɔ akɛ, “okɛ ohiɛ afɔ̃ Yehowa nɔ.” (Abɛi 3:5, 6) Kɛ́ okɛ ohiɛ fɔ̃ Yehowa nɔ lɛ, bɔ fɛɛ bɔ ni fee lɛ, ebaaye ebua bo! Saji babaoo yɛ Biblia lɛ mli ni hãa wɔnaa faŋŋ akɛ Yehowa yeɔ ebuaa etsuji lɛɛlɛŋ.

⁵ Kɛ́ okɛ naagbai miikpe, ni mɛi yeee amɛbuaaa bo lɛ, omli akafũ amɛ. Moŋ lɛ, taakɛ Paulo fee lɛ, ŋɔɔ lɛ akɛ hegbɛ ni oná ni okɛ ohiɛ baafɔ̃ Yehowa nɔ kwraa. Yehowa hu baatsɔ shihilɛ lɛ nɔ ehã ona akɛ esusuɔ ohe waa. Enɛ baahã hemɔkɛyeli ni oyɔɔ yɛ emli lɛ mli awa, ni wekukpaa ni yɔɔ okɛ lɛ teŋ lɛ hu mli baawa.

 6. Mɛni hewɔ ebɛ mlɛo akɛ wɔkɛ wɔhiɛ baafɔ̃ Yehowa nɔ kɛ́ wɔkɛ naagba ko miikpe lɛ?

⁶ Ekolɛ naagba ko ni okɛmiikpe lɛ miiwo omli la waa. Ofee nɔ fɛɛ nɔ ni obaanyɛ yɛ he, shi loloolo lɛ naagba lɛ yɛ. Kɛ́ eba lɛ nakai lɛ, mɛni baanyɛ aye abua bo ni otsɛ otsui oŋmɛ omli? Sɔlemɔ ohã Yehowa, ní okɛ ohiɛ afɔ̃ enɔ akɛ ebaaye ebua bo. Kɛ́ ofee nakai lɛ, otsui baanyɔ omli. (Kanemɔ Lala 62:9; 1 Petro 5:7.) Kɛ́ oosumɔ ni wekukpaa kpakpa ahi okɛ Yehowa teŋ lɛ, ehe miihia ni okɛ ohiɛ afɔ̃ enɔ. Shi jeee be fɛɛ be enɛ feemɔ yɔɔ mlɛo. Mɛni hewɔ? Yiŋtoo kome ji akɛ, jeee be fɛɛ be Yehowa hãa wɔsɔlemɔi ahetoo amrɔ nɔŋŋ.​—Lala 13:2, 3; 74:10; 89:47; 90:13; Habakuk 1:2.

 7. Mɛni hewɔ jeee be fɛɛ be Yehowa hãa wɔsɔlemɔi ahetoo amrɔ nɔŋŋ lɛ?

⁷ Jeee be fɛɛ be Yehowa hãa wɔsɔlemɔi ahetoo amrɔ nɔŋŋ. Mɛni hewɔ? Biblia lɛ kɛɔ akɛ Yehowa ji wɔ-Tsɛ, ni ebii ji wɔ. (Lala 103:13) Jeee nɔ fɛɛ nɔ ni gbekɛ ko biɔ etsɛ lɛ ni enine shɛɔ nɔ, loo akɛhãa lɛ amrɔ nɔŋŋ. Ekolɛ tsɛ lɛ le akɛ gbekɛ lɛ jwɛŋmɔ baanyɛ atsake. Agbɛnɛ hu, ele nɔ ni hi hã gbekɛ lɛ, ni ele bɔ ni nɔ ni ebiɔ lɛ baanyɛ asa mɛi krokomɛi ahe ahã. Ele nɔ ni he hiaa gbekɛ lɛ kɛ be ni esa akɛ ekɛhã lɛ. Kɛ́ tsɛ lɛ hãa gbekɛ lɛ nɔ fɛɛ nɔ ni ebiɔ lɛ lɛ amrɔ nɔŋŋ lɛ, belɛ ebatsɔ gbekɛ lɛ nyɔŋ. Yehowa, ni ji wɔ-Tsɛ ni yɔɔ ŋwɛi lɛ sumɔɔ wɔ. Akɛ wɔ-Bɔlɔ ni hiɛ kã shi lɛ, ele nɔ ni he hiaa wɔ, ni ekɛduroɔ wɔ yɛ be ni sa mli. No hewɔ lɛ, ehi akɛ wɔɔmɛ Yehowa, ni wɔkwɛ bɔ ni ebaahã wɔsɔlemɔi lɛ ahetoo.​—Okɛto Yesaia 29:16; 45:9 lɛ he.

 8. Mɛɛ shi Yehowa ewo yɛ kaa ni wɔkɛbaakpe lɛ he?

⁸ Kaimɔ hu akɛ, Yehowa le mɔ fɛɛ mɔ kɛ naagbai ni ebaanyɛ edamɔ naa. (Lala 103:14) No hewɔ lɛ, eyeɔ ebuaa wɔ be fɛɛ be. Eyɛ mli akɛ bei komɛi lɛ wɔnuɔ he akɛ wɔnyɛŋ wɔdamɔ naagbai lɛ anaa dɔŋŋ moŋ, shi Yehowa ewo shi akɛ ehãŋ aka wɔ fe bɔ ni wɔbaanyɛ naa wɔdamɔ. Moŋ lɛ, “ebaaje gbɛ” yɛ kaa lɛ mli ehã wɔ. (Kanemɔ 1 Korintobii 10:13.) Wɔbaanyɛ wɔkɛ wɔhiɛ afɔ̃ Yehowa nɔ, ejaakɛ ele naagbai ni wɔbaanyɛ wɔdamɔ naa. Enɛ ni wɔle lɛ shɛjeɔ wɔmii waa!

 9. Kɛ́ wɔsɔle ni Yehowa aye abua wɔ, shi ehãaa wɔ hetoo amrɔ nɔŋŋ lɛ, mɛni esa akɛ wɔfee?

⁹ Kɛ́ wɔsɔle ni Yehowa aye abua wɔ, shi ehãaa wɔ hetoo amrɔ nɔŋŋ lɛ, nyɛhãa wɔtoa wɔtsui shi. Kaimɔ akɛ Yehowa miishwe ni eye ebua wɔ, shi etoɔ etsui shi ni ehãa wɔ nɔ ni he hiaa wɔ lɛ yɛ be ni sa mli. Biblia lɛ kɛɔ wɔ akɛ: “Yehowa miimɛ̃, koni eduro nyɛ, ni no hewɔ lɛ ewó ehe nɔ, koni ena nyɛ mɔbɔ; ejaakɛ Yehowa lɛ, kojomɔ Nyɔŋmɔ ni; ajɔɔ mɛi fɛɛ ní mɛɔ lɛ lɛ!”​—Yesaia 30:18.

10-12. (a) Mɛɛ naagbai wɔbaanyɛ wɔkɛkpe kɛ́ wɔmiikwɛ weku lɛ mli nyo ko ni he miiye? (b) Kɛ́ okɛ shihilɛ ni jaraa kpe, ni okɛ ohiɛ fɔ̃ Yehowa nɔ lɛ, te ebaasa wekukpaa ni yɔɔ okɛ lɛ teŋ lɛ he tɛŋŋ? Okɛ enɛ he nɔkwɛmɔnɔ ahã.

¹⁰ Ekolɛ shihilɛ ni okɛkpeɔ lɛ mli baawa aahu akɛ, obaanu he akɛ oyaje “jata lɛ daaŋ,” taakɛ bɔ ni Paulo nu he lɛ. (2 Timoteo 4:17) Kɛ́ eba lɛ nakai lɛ, ehe miihia waa ni okɛ ohiɛ afɔ̃ Yehowa nɔ. Akɛ nɔkwɛmɔnɔ lɛ, kɛ́ oweku lɛ mli nyo ko bɛ hewalɛ ni bo ji mɔ ni kwɛɔ lɛ lɛ, sɔlemɔ ohã Yehowa ní ewaje bo ní eye ebua bo ni ole bɔ ni obaatsu shihilɛ lɛ he nii ohã.b (Kwɛmɔ shishigbɛ niŋmaa lɛ.) Kɛ́ ofee nakai lɛ, ofeŋ yeyeeye, ejaakɛ ole akɛ Yehowa le oshihilɛ lɛ, ni enuɔ bo shishi. Yehowa baaye ebua bo ni onyɛ ofi shi, ní oya nɔ oye lɛ anɔkwa.​—Lala 32:8.

¹¹ Fɛɛ sɛɛ lɛ, bei komɛi lɛ, ekolɛ obaanu he tamɔ nɔ ni Yehowa yeee ebuaaa bo. Ekolɛ datrɛfoi lɛ kɛ amɛhe kpaaa gbee yɛ bɔ ni amɛbaatsu shihilɛ lɛ he nii amɛhã lɛ he. Aloo ekolɛ osusu akɛ owekumɛi baashɛje omii, shi amɛ moŋ amɛmiiwo sane lɛ mli wu. Kɛ́ eba lɛ nakai lɛ, okɛ ohiɛ afɔ̃ Yehowa nɔ koni ewaje bo. Yaa nɔ otsi obɛŋkɛ lɛ. (Kanemɔ 1 Samuel 30:3, 6.) Sɛɛ mli kɛ́ oyɔse bɔ ni Yehowa eye ebua bo lɛ, wekukpaa ni yɔɔ okɛ lɛ teŋ lɛ mli baawa.

¹² Nakai ji bɔ ni eba lɛ yɛ nyɛmi yoo ko ni atsɛɔ lɛ Linda lɛ gbɛfaŋ.c (Kwɛmɔ shishigbɛ niŋmaa lɛ.) Ekɛ be kplaŋŋ kwɛ efɔlɔi ni he miiye lɛ dani amɛgboi. Ewie akɛ: “Be ni mikwɛɔ mifɔlɔi lɛ, eshɛɔ bei komɛi ni mi, miwu, kɛ minyɛmi nuu lɛ leee nɔ ni wɔbaafee. Wɔnu he akɛ wɔnyɛŋ nɔ ko wɔfee dɔŋŋ. Shi amrɔ nɛɛ, kɛ́ wɔsusu nɔ ni tee nɔ yɛ nakai beiaŋ lɛ he lɛ, wɔnaa faŋŋ akɛ Yehowa ye ebua wɔ waa. Be ni efee tamɔ nɔ ni wɔhiɛnɔkamɔ fɛɛ etã po lɛ, ewaje wɔ, ni ehã wɔ nɔ ni he hiaa wɔ lɛ.”

13. Mɛɛ gbɛ nɔ Rhonda hiɛ ni ekɛfɔ̃ Yehowa nɔ lɛ ye ebua lɛ ni enyɛ efi shi yɛ naagbai srɔtoi ni ekɛkpe lɛ fɛɛ amli?

¹³ Kɛ́ wɔkɛ wɔhiɛ fɔ̃ Yehowa nɔ kwraa lɛ, no baaye abua wɔ ni wɔnyɛ wɔfi shi kɛ́ wɔkɛ shihilɛi ni jaraa kpe. Nyɛmi yoo ko ni atsɛɔ lɛ Rhonda lɛ ná enɛ mli niiashikpamɔ. No mli lɛ, ewu ni jeee Yehowa Odasefonyo lɛ miitse lɛ gbala. Nakai beiaŋ nɔŋŋ lɛ, enyɛmi nuu hu baye hela ko ni naa wa waa. No sɛɛ nyɔji fioo komɛi lɛ, enyɛmi nuu lɛ ŋa gbo. Be ni Rhonda na esaji anaa fioo lɛ, ebɔi daa gbɛgbamɔ nitsumɔ lɛ. Shi etsɛɛɛ ni enyɛ hu bagbo. Te Rhonda fee tɛŋŋ efi shi yɛ naagbai ni ekɛkpe nɛɛ fɛɛ amli? Ewie akɛ: “Mikɛ Yehowa gba sane daa gbi, ni mikɛ lɛ gba yiŋkpɛi bibii po ahe sane. Nakai ni mifee lɛ hã Yehowa bafee Mɔ ko ni yɔɔ lɛɛlɛŋ kɛhã mi. Ehã mina akɛ, esa akɛ mikɛ mihiɛ afɔ̃ Yehowa nɔ, moŋ fe ni mikɛ mihiɛ baafɔ̃ mi diɛŋtsɛ mihe nɔ loo mɛi krokomɛi anɔ. Yehowa ye ebua mi waa​—ehã mi mihiamɔ nibii fɛɛ. Enɛ ehã mile bɔ ni akɛ Yehowa feɔ ekome kɛtsuɔ nii.”

14. Kɛ́ ashwie oweku lɛ mli nyo ko lɛ, mɛni obaanyɛ oná nɔmimaa akɛ Yehowa baafee ehã bo?

¹⁴ Susumɔ naagba kroko hu he okwɛ. Ekolɛ ashwie oweku lɛ mli nyo ko yɛ asafo lɛ mli. Ole nɔ ni Biblia lɛ kɛɔ yɛ bɔ ni esa akɛ akɛ mɛi ni ashwie amɛ lɛ aye ahã lɛ he. (1 Korintobii 5:11; 2 Yohane 10) Shi akɛni osumɔɔ mɔ ni ashwie lɛ lɛ sane hewɔ lɛ, ekolɛ ebaawa kɛhã bo akɛ obaabo famɔ ni Biblia lɛ kɛhãa lɛ toi. Ani obaaná nɔmimaa akɛ oŋwɛi Tsɛ lɛ baaye abua bo koni oná ekãa kɛbo lɛ toi? Ani obaana shihilɛ nɛɛ akɛ hegbɛ ni oná ni okɛbaatsi obɛŋkɛ Yehowa?

15. Mɛni hewɔ Adam gbo Yehowa nɔ toi lɛ?

¹⁵ Enɛ tamɔ Adam sane lɛ pɛpɛɛpɛ. Biblia lɛ hãa wɔleɔ akɛ ‘alakaaa Adam.’ (1 Timoteo 2:14) Ele akɛ kɛ́ eye aduawa lɛ, ebaagbo. Kɛ́ nakai ni lɛ, mɛni hewɔ egbo Yehowa nɔ toi ni eye mɔ? Adam yasumɔ eŋa lɛ fe Yehowa, ni no hewɔ ebo eŋa lɛ moŋ toi lɛ. Be ni eŋa lɛ kɛ aduawa lɛ hã lɛ, eku ehiɛ eshwie nɔ ni Yehowa ekɛɛ lɛ lɛ nɔ, ni eye.​—1 Mose 3:6, 17.

16. Namɔ esa akɛ wɔsumɔ fe mɔ fɛɛ mɔ? Ni mɛni hewɔ?

¹⁶ Adam sane lɛ hãa wɔnaa akɛ, esa akɛ wɔsumɔ Yehowa fe mɔ fɛɛ mɔ. (Kanemɔ Mateo 22:37, 38.) Kɛ́ wɔsumɔɔ Yehowa waa lɛ, wɔbaanyɛ wɔye wɔbua wɔwekumɛi lɛ jogbaŋŋ, ekɔɔɔ he eko kɛ́ amɛmiisɔmɔ Yehowa loo amɛsɔmɔɔɔ lɛ. No hewɔ lɛ, hã suɔmɔ ni oyɔɔ kɛhã Yehowa lɛ mli aya nɔ awa, ni okɛ ohiɛ afɔ̃ enɔ. Kɛ́ owekunyo ko ni ashwie lɛ lɛ sane miidɔ bo lɛ, sɔlemɔ ohã Yehowa ni ohã ele bɔ ni onuɔ he diɛŋtsɛ.d (Kwɛmɔ shishigbɛ niŋmaa lɛ.) (Romabii 12:12; Filipibii 4:6, 7) Eyɛ mli akɛ sane lɛ miidɔ bo waa moŋ, shi ŋɔɔ lɛ akɛ hegbɛ ni oná ni okɛbaahã wekukpaa ni yɔɔ okɛ Yehowa teŋ lɛ mli awa, ni no baaye abua bo ni okɛ ohiɛ afɔ̃ enɔ. Kɛ́ ofee nakai lɛ, obaana akɛ sɛɛnamɔ yɛ he akɛ abaabo Yehowa toi be fɛɛ be.

17. Kɛ́ wɔkɛ be babaoo tsu shiɛmɔ nitsumɔ lɛ bɔ ni wɔɔnyɛ lɛ, mɛni Yehowa baafee ehã wɔ?

¹⁷ Mɛni hewɔ Yehowa jie Paulo yɛ “jata lɛ daaŋ” lɛ? Paulo tsɔɔ nɔ hewɔ. Ewie akɛ: “Koni atsɔ minɔ atsu shiɛmɔ nitsumɔ lɛ kɛmɔ shi kwraa.” (2 Timoteo 4:17) Wɔ hu Yehowa kɛ “sane kpakpa lɛ” shiɛmɔ ewo wɔdɛŋ, ni etsɛɔ wɔ ‘enanemɛi nitsulɔi.’ (1 Tesalonikabii 2:4; 1 Korintobii 3:9) Kɛ́ wɔkɛ be babaoo tsu nitsumɔ nɛɛ bɔ ni wɔɔnyɛ lɛ, wɔbaanyɛ wɔná nɔmimaa akɛ, Yehowa baahã wɔ nɔ fɛɛ nɔ ni he hiaa wɔ. (Mateo 6:33) No baahã efee mlɛo kɛhã wɔ akɛ wɔɔto wɔtsui shi wɔmɛ Yehowa ni ehã wɔsɔlemɔi lɛ ahetoo.

18. Mɛni baahã hemɔkɛyeli ni oyɔɔ yɛ Yehowa mli kɛ wekukpaa ni yɔɔ okɛ lɛ teŋ lɛ mli aya nɔ awa?

¹⁸ No hewɔ lɛ, hã wekukpaa ni yɔɔ okɛ Yehowa teŋ lɛ mli aya nɔ awa gbi fɛɛ gbi. Kɛ́ okɛ kaa ko kpe ni no hã ofee yeyeeye lɛ, ŋɔɔ lɛ akɛ hegbɛ ni oná ni okɛbaatsi obɛŋkɛ Yehowa. Kanemɔ Nyɔŋmɔ Wiemɔ ni ji Biblia lɛ, kasemɔ, ni ojwɛŋ nɔ. Sɔlemɔ ohã Yehowa daa, ní okɛ be babaoo asɔmɔ lɛ. Kɛ́ ofee nibii nɛɛ, obaanyɛ oná nɔmimaa akɛ Yehowa baaye abua bo ni onyɛ okpee kai ni okɛkpeɔ amrɔ nɛɛ kɛ nɔ ni baaba wɔsɛɛ lɛ fɛɛ anaa.