Yitso 74

Ŋaawoo Kɛha Marta, kɛ Sɔlemɔ He Gbɛtsɔɔmɔ

BENI Yesu tsuɔ esɔɔmɔ nitsumɔ lɛ yɛ Yudea lɛ, etee Betania akrowa lɛ mli. Biɛ ji he ni Marta, Maria kɛ amɛnyɛmi nuu Lazaro yɔɔ. Ekolɛ Yesu kɛ mɛi etɛ nɛɛ kpe mra mli yɛ esɔɔmɔ nitsumɔ lɛ mli no hewɔ lɛ amɛnaanyo waa diɛŋtsɛ ji lɛ. Shi kɛlɛ, Yesu tee Marta shia lɛ ni ehere lɛ hiɛmɛɛ.

Marta he miitswa shi akɛ eeeha Yesu nii ni eyɔɔ lɛ mli nɔ kpakpa fe fɛɛ. Yɛ anɔkwale mli lɛ, eji woo kpele diɛŋtsɛ akɛ mɔ ko aaana Mesia ni awo shi yɛ ehe lɛ abasra lɛ yɛ eshia! No hewɔ lɛ Marta hiɛ badɔ ni ebɔi niyenii hoomɔ yɛ be mli ni ekwɛɔ nibii krokomɛi ni he hiaa ni baaha jɛmɛ ni Yesu eba lɛ aŋɔɔ enaa ni ehe ajɔ lɛ lɛ hu ni etsuɔ lɛ.

Shi yɛ gbɛ kroko nɔ lɛ, Marta nyɛmi yoo Maria ta shi yɛ Yesu naji anaa eebo lɛ toi. Yɛ be fioo sɛɛ lɛ, Marta ba Yesu ŋɔɔ ni ebakɛɛ lɛ akɛ: “Nuŋtsɔ, okwɛɛɛ akɛ minyɛmi lɛ eshi mi ni mikome misɔmɔɔ nɛɛ? No hewɔ lɛ kɛɛmɔ lɛ, ni lɛ hu ebafata mihe.”

Shi Yesu ekɛɛɛ Maria nɔ ko nɔ ko. Shi moŋ, ewo Marta ŋaa yɛ bɔ ni ehiɛ dɔɔ heloonaa nibii ahe fe nine lɛ he. Ekɛ mlihilɛ kã lɛ akɛ: “Marta, Marta oogba ohe naa ni oohao ohe yɛ nibii pii ahewɔ; shi nɔ kome ehia.” Yesu miikɛɛ akɛ ehe ehiaaa ni efite be babaoo ni ekɛmiihoo niyenii sɔrɔtoi ni abaaye. Fioo ko aloo niyenii kome ko pɛ fa.

Jwɛŋmɔ ni Marta hiɛ lɛ ja; eetao ni efee shianyɛ ni toɔ mɔ gbɔ. Shi kɛlɛ, bɔ ni ehiɛ dɔɔ waa yɛ heloonaa nibii ahe hewɔ lɛ, hegbɛ ni amɛna akɛ amɛna gbɛtsɔɔmɔ kɛjɛ Nyɔŋmɔ diɛŋtsɛ Bi lɛ ŋɔɔ tɛɛ lɛ miiŋmɛɛ lɛ! No hewɔ lɛ Yesu mu naa akɛ: “Nɔ ni hi lɛ Maria ekɔ lɛ, ni no lɛ ashɔŋ yɛ edɛŋ.”

Yɛ sɛɛ mli be kroko mli lɛ, kaselɔ ko bi Yesu akɛ: “Nuŋtsɔ, tsɔɔmɔ wɔ sɔlemɔ, tamɔ bɔ ni Yohane hu tsɔɔ ekaselɔi lɛ.” Ekolɛ eeefee akɛ kaselɔ nɛɛ bɛ jɛmɛ aaafee afi kɛ fã ni eho nɛ beni Yesu kɛ sɔlemɔ he nɔkwɛmɔ nɔ lɛ ha yɛ e-Gɔŋ nɔ Shiɛmɔ lɛ mli lɛ. No hewɔ lɛ Yesu ti gbɛtsɔɔmɔ lɛ mli ekoŋŋ ni etee nɔ egba amɛ abɛbua ko ni ekɛma bɔ ni ehe hiaa ni aya nɔ be fɛɛ be yɛ sɔlemɔ mli lɛ nɔ mi.

Yesu je shishi akɛ: “Nyɛteŋ namɔ ni yɔɔ shieŋtsɛ ni eeetee eŋɔɔ nyɔɔŋ teŋ, ni eyakɛɛ lɛ akɛ: ‘Shieŋtsɛ, faa mi abolooi etɛ, ejaakɛ mishieŋtsɛ ko ejɛ gbɛ ebato mi, ni mibɛ nɔ ko ni mikɛaama ehiɛ;’ ni mɔ ni yɔɔ tsu lɛŋ lɛ aaahere nɔ akɛ: ‘Kaagba minaa; aŋa shinaa lɛ momo, ni mi kɛ mibii jwere saa nɔ, minyɛŋ shi mate ni mahao.’ Miikɛɛ nyɛ akɛ; kɛ ka eshieŋtsɛ ni ji lɛ lɛ hewɔŋ kulɛ eteŋ shi ni eha lɛ, shi enaagbamɔ lɛ hewɔ lɛ eeete shi kɛ̃ ni eeeha lɛ bɔ fɛɛ bɔ ni etaoɔ.”

Yesu kɛ nɛkɛ niiahetoo nɛɛ etsɔɔɔ akɛ no tsɔɔ akɛ Yehowa sumɔɔɔ ni ehaa faikpamɔi ahetoo, taakɛ shieŋtsɛ lɛ taoɔ efee yɛ esane lɛ mli lɛ. Dabi, shi moŋ eetsɔɔ akɛ kɛji shieŋtsɛ ni sumɔɔɔ nakai lɛ po baaha nii ni ayaa nɔ abiɔ lɛ lɛ hetoo lɛ, enyiɛ nɔŋŋ ni wɔŋwɛi Tsɛ ni yɔɔ suɔmɔ lɛ haŋ hetoo babaoo fe nakai! No hewɔ lɛ Yesu tee nɔ akɛ: “Ni mi hu miikɛɛ nyɛ akɛ: Nyɛbia, ni aaaha nyɛ; nyɛtaoa, ni nyɛaana; nyɛshia, ni aaagbele nyɛ. Ejaakɛ mɔ fɛɛ mɔ ni biɔ lɛ, enine shɛɔ nɔ; ni mɔ ni taoɔ lɛ, enaa; ni mɔ ni shiɔ lɛ, aaagbele lɛ.”

Kɛkɛ ni agbɛnɛ Yesu kɛ sane lɛ to adesai tsɛmɛi ni yeee emuu lɛ ahe, ni ekɛɛ: “Shi mɛɛ tsɛ yɔɔ nyɛteŋ ni kɛji ebi bi lɛ aboloo lɛ, eeeha lɛ tɛ, aloo kɛji ebi lɛ loo lɛ, ni eeeŋɔ onufu efee loo eha lɛ? Aloo kɛji ebi wuɔwɔlɔ lɛ, ni eeeha lɛ nyɔŋmɔŋkrakro? Belɛ kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛ-Tsɛ ni yɔɔ ŋwɛi lɛ eŋɔŋ mumɔ krɔŋkrɔŋ ehaŋ mɛi ni biɔ lɛ lɛ?” Lɛlɛŋ, mɛɛ ekaawoo ni kanyaa mɔ Yesu kɛha nɛkɛ bɔni afee ni wɔka he daa yɛ sɔlemɔ mli. Luka 10:38–11:13.

▪ Mɛni hewɔ ni Marta fee babaoo yɛ nibii ni esaa ehaa Yesu lɛ mli lɛ?

▪ Mɛni Maria fee, ni mɛni hewɔ ni Yesu jie eyi fe ni eeejie Marta moŋ yi lɛ?

▪ Mɛni tsirɛ Yesu ni eti sɔlemɔ he gbɛtsɔɔmɔ ni ekɛha lɛ mli ekoŋŋ lɛ?

▪ Mɛɛ gbɛ nɔ Yesu fee bɔ ni ehe hiaa ni wɔya nɔ yɛ sɔlemɔ mli be fɛɛ be lɛ he nɔkwɛmɔ nɔ yɛ?