Yitso Nyɔŋma Kɛ Kpaanyɔ
“Amɛjɛɛɛ Je lɛ Mli”
1. (a) Mɛni Yesu sɔle yɛ he eha ekaselɔi lɛ dani egbo? (b) Mɛni hewɔ ‘je lɛ mli ni ajɛɛɛ lɛ’ he hiaa waa nakai lɛ?
YESU sɔle eha ekaselɔi lɛ gbi gbɛkɛ dani agbe lɛ lɛ. Akɛni Yesu le akɛ Satan kɛ nɔnyɛɛ babaoo baaba amɛnɔ hewɔ lɛ, ekɛɛ e-Tsɛ lɛ akɛ: “Mibiii akɛ ojie amɛ kɛjɛ je lɛ mli, shi moŋ akɛ obu amɛhe yɛ efɔŋ lɛ mli. Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” (Yohane 17:15, 16) Mɛni hewɔ je lɛ ni aaatsi he kɛaajɛ he lɛ he hiaa waa nakai lɛ? Ejaakɛ Satan ji je nɛɛ nɔyelɔ. Kristofoi sumɔŋ ni amɛfee mɛi ni jɛ jeŋ ni yɔɔ ehewalɛ shishi lɛ mli.—Luka 4:5-8; Yohane 14:30; 1 Yohane 5:19.
2. Mɛɛ gbɛ̀i anɔ nɛkɛ Yesu jɛɛɛ je lɛ mli yɛ?
2 Je lɛ mli ni Yesu jɛɛɛ lɛ etsɔɔɔ akɛ ebɛ suɔmɔ kɛha mɛi krokomɛi. Nɔ ni tamɔɔɔ nakai lɛ, etsa helatsɛmɛi, etée gbohii ashi, ni etsɔɔ gbɔmɛi saji ni kɔɔ Nyɔŋmɔ Maŋtsɛyeli lɛ he. Ekɛ ewala po ha yɛ adesai ahewɔ. Shi ebɛ suɔmɔ kɛha mɛi ni jie Satan je lɛ mumɔ kɛ nifeemɔi akpo lɛ sui ni Nyɔŋmɔ gbeyeishemɔ bɛ mli lɛ. No hewɔ lɛ, ebɔ kɔkɔ eshi nibii tamɔ jeŋba shara mli akɔnɔi, heloo gbɛfaŋ nibii asɛɛdii shihilɛ kɛ hiɛnyam taomɔ su keketee lɛ. (Mateo 5:27, 28; 6:19-21; Luka 20:46, 47) Belɛ ebɛ naakpɛɛ mɔ akɛ Yesu tsi ehe hu kɛjɛ je lɛ maŋkwramɔŋ saji ahe. Eyɛ mli akɛ eji Yudanyo moŋ, shi ekɛ ehe wooo maŋkwramɔŋ béi ni kã Roma kɛ Yudafoi lɛ ateŋ lɛ mli.
“Mimaŋtsɛyeli lɛ Jɛɛɛ Je Nɛŋ”
3. (a) Mɛni Yudafoi ajamɔ mli hiɛnyiɛlɔi lɛ kɛfolɔ Yesu naa yɛ Pilato hiɛ, ni mɛni hewɔ? (b) Mɛni tsɔɔ akɛ Yesu bɛ miishɛɛ yɛ adesa maŋtsɛ ni eeetsɔ lɛ he?
3 Susumɔ nɔ ni ba beni Yudafoi ajamɔ mli hiɛnyiɛlɔi lɛ ha amɔ Yesu ni akɛ lɛ tee Pontio Pilato, Roma amralo lɛ hiɛ lɛ he okwɛ. Yɛ anɔkwale mli lɛ, nakai hiɛnyiɛlɔi lɛ hao ejaakɛ Yesu ekpa amɛ osatofeemɔ lɛ he mama. Bɔni afee ni amɛha amralo lɛ afee nii ashi Yesu lɛ, amɛfolɔ enaa akɛ: “Wɔna nuu nɛɛ ni eewo maŋ lɛ yiŋ ni eegu oniatsumɔ kɛ Kaisare hamɔ, ni ekɛɔ akɛ lɛ diɛŋtsɛ ji Kristo, maŋtsɛ lɛ.” (Luka 23:2) Eyɛ faŋŋ akɛ eji amale, ejaakɛ yɛ afi ni tsɔ hiɛ lɛ mli, beni gbɔmɛi lɛ taoɔ amɛwó Yesu maŋtsɛ lɛ, ekpɛlɛɛɛ nɔ. (Yohane 6:15) Ele akɛ ebaaye Maŋtsɛ yɛ ŋwɛi wɔsɛɛ be ko. (Luka 19:11, 12) Agbɛnɛ hu, jeee gbɔmɛi baawo lɛ maŋtsɛ, shi moŋ Yehowa baafee nakai.
4. Mɛni ji Yesu subaŋ yɛ toowoo he?
4 Gbii etɛ pɛ dani aaamɔ Yesu lɛ, Farisifoi lɛ bɔ mɔdɛŋ ni amɛha Yesu akɛɛ nɔ ko ni baafimɔ lɛ yɛ tooyeli he sane lɛ he. Shi ekɛɛ akɛ: “Nyɛkɛ denario [Roma shika] abaa ni makwɛa! Namɔ mfoniri kɛ ŋmalɛ yɔɔ nɔ nɛɛ?” Beni amɛha hetoo akɛ, “Kaisare nɔŋ” lɛ, eha amɛ hetoo akɛ: “Belɛ nyɛŋɔa Kaisare nii nyɛhaa Kaisare; shi Nyɔŋmɔ nii lɛ nyɛŋɔhaa Nyɔŋmɔ!”—Luka 20:20-25.
5. (a) Mɛɛ nikasemɔ Yesu tsɔɔ ekaselɔi lɛ beni amɔ lɛ lɛ? (b) Te Yesu tsɔɔ yiŋtoo ni ha efee nɔ ni efee lɛ mli eha tɛŋŋ? (d) Mɛni jɛ nakai saneyeli lɛ mli ba?
5 Dabi, Yesu etsɔɔɔ akɛ atse atua ashi je lɛŋ nɔyelii. Beni asraafoi kɛ hii krokomɛi ba koni amɛbamɔ Yesu lɛ, Petro gbala klante ni efo hii lɛ ateŋ mɔ kome toi. Shi Yesu kɛɛ lɛ akɛ: “Ŋɔɔ oklante lɛ oto etoohe; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.” (Mateo 26:51, 52) Enɔ jetsɛremɔ lɛ, Yesu tsɔɔ enifeemɔi lɛ amli etsɔɔ Pilato akɛ: “Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ.” (Yohane 18:36) Pilato kpɛlɛ nɔ akɛ, “minaaa fɔbuu sane ko” yɛ Yesu he. Shi akɛni Pilato kpɛlɛ asafo yuu lɛ ni feɔ basabasa lɛ nibimɔ lɛ nɔ hewɔ lɛ, eha asɛŋ Yesu.—Luka 23:13-15; Yohane 19:12-16.
Kaselɔi lɛ Nyiɛ Yesu Hiɛnyiɛmɔ Sɛɛ
6. Yɛ mɛɛ gbɛ nɔ mra be mli Kristofoi lɛ tsɔɔ yɛ akɛ amɛkpoɔ je lɛ mumɔ lɛ shi kɛlɛ amɛsumɔɔ gbɔmɛi?
6 No hewɔ lɛ, Yesu kaselɔi lɛ nu nɔ ni je lɛ mli ni ajɛɛɛ lɛ tsɔɔ lɛ shishi. Etsɔɔ je lɛ mumɔ kɛ enifeemɔi ni Nyɔŋmɔ gbeyeishemɔ bɛ mli lɛ ni aaakpoo, ni nɔ ni fata he ji yiwalɛ kɛ jeŋba shara mli hiɛtserɛjiemɔ ni yaa nɔ yɛ Roma shwɛmɔhei kɛ hiɛtserɛjiemɔhei lɛ. Akɛni kaselɔi lɛ kɛ amɛhe wooo nifeemɔi nɛɛ amli hewɔ lɛ, atsɛ́ amɛ adesai ahenyɛlɔi. Shi ákɛ mɛi ni bɛ nyɛ̃ɛɛ ko kwraa kɛha amɛnanemɛi gbɔmɛi lɛ, amɛtsu nii waa moŋ, koni amɛkɛye amɛbua mɛi krokomɛi ni Nyɔŋmɔ gbɛjianɔtoo kɛha yiwalaheremɔ lɛ he aba sɛɛnamɔ kɛha amɛ.
7. (a) Akɛni mra be mli kaselɔi lɛ jɛɛɛ je lɛ mli hewɔ lɛ, mɛni ba amɛnɔ? (b) Te amɛsusu maŋkwramɔŋ nɔyelɔi lɛ kɛ oniatsumɔi ahe amɛha tɛŋŋ, ni mɛni hewɔ?
7 Awa Yesu sɛɛnyiɛlɔi lɛ ayi taakɛ afee lɛ lɛ, bei pii lɛ nɔyeli lɛ mli onukpai ni alaka amɛ ji mɛi ni feɔ nakai. Kɛlɛ, bɔfo Paulo ŋma wolo yɛ aaafee afi 56 Ŋ.B. eyaha Kristofoi ni yɔɔ Roma lɛ ni ekɛwo amɛ hewalɛ ni ‘amɛba amɛhe shi amɛha hegbɛi ni yeɔ nɔ [maŋkwramɔŋ nɔyelɔi] lɛ. Ejaakɛ hegbɛ ko bɛ ni jɛɛɛ Nyɔŋmɔ ŋɔɔ.’ Jeee akɛ Yehowa toɔ je lɛŋ nɔyelii, shi moŋ eŋmɛɔ amɛ gbɛ ni amɛhi shi kɛyashi be mli ni e-Maŋtsɛyeli lɛ pɛ aaaye shikpɔŋ muu lɛ fɛɛ nɔ. Yɛ gbɛ ni ja nɔ lɛ, Paulo wo Kristofoi lɛ ŋaa ni amɛkɛ woo aha nɔyeli lɛ mli onukpai lɛ ni amɛtsu oniai.—Romabii 13:1-7; Tito 3:1, 2.
8. (a) Esa akɛ Kristofoi aba amɛhe shi amɛha hegbɛi ni yeɔ nɔ lɛ kɛyashi nɛgbɛ? (b) Mra be mli Kristofoi lɛ nyiɛ Yesu nɔkwɛmɔnɔ lɛ sɛɛ yɛ mɛɛ gbɛ nɔ?
8 Shi kɛlɛ, heshibaa kɛha maŋkwramɔŋ nɔyelɔi lɛ baafee nɔ ko ni husu yɔɔ he, jeee nɔ ni husu bɛ he. Kɛji akɛ naataomɔ ko ba Yehowa mlai kɛ gbɔmɔ mlai ateŋ lɛ, mɛi ni sɔmɔɔ Yehowa lɛ baabo E-mlai atoi. Kadimɔ nɔ ni wolo ni ji, On the Road to Civilization—A World History wieɔ yɛ mra be mli Kristofoi lɛ ahe lɛ: “Kristofoi kpoo akɛ amɛkɛ amɛhe aaawo nitsumɔi komɛi ni Romabii lɛ tsuɔ lɛ mli. Kristofoi lɛ . . . nu he akɛ eji amɛhemɔkɛyeli lɛ mlikuu akɛ amɛkɛ amɛhe aaawo asraafoi anitsumɔ mli. Amɛkpɛlɛŋ maŋkwramɔŋ gbɛhe ko nɔ. Amɛjaŋ maŋtsɛ lɛ.” Beni Yudafoi akojomɔhe wulu lɛ ‘wo kita dikadika’ akɛ kaselɔi lɛ akpa shiɛmɔ lɛ, amɛha hetoo akɛ: “Esa akɛ aboɔ Nyɔŋmɔ moŋ toi fe gbɔmɛi.”—Bɔfoi lɛ Asaji 5:27-29.
9. (a) Mɛni hewɔ Kristofoi ni yɔɔ Yerusalem lɛ fee nii ni amɛfee yɛ afi 66 Ŋ.B. lɛ? (b) Yɛ mɛɛ gbɛ nɔ eji nɔkwɛmɔnɔ ni sɛɛnamɔ yɔɔ he waa?
9 Yɛ maŋkwramɔŋ kɛ asraafoi atawuu mli béi amli lɛ, kaselɔi lɛ kɛ amɛhe wooo eko kwraa mli. Yudafoi ni yɔɔ Yudea lɛ tse atua amɛshi Kaisare yɛ afi 66 Ŋ.B. Roma asraafoi lɛ kɛ oyaiyeli gba amɛbɔle Yerusalem. Mɛni Kristofoi ni yɔɔ maŋ lɛ mli lɛ fee? Amɛkai Yesu ŋaawoo akɛ amɛjo foi kɛjɛ maŋ lɛ mli lɛ. Beni Romabii lɛ gbala amɛhe shi fioo lɛ, Kristofoi lɛ jo foi kɛfo Yordan Faa lɛ kɛtee Pella niiaŋ yɛ gɔji lɛ anɔ. (Luka 21:20-24) Amɛhe ni amɛkɛwooo maŋ saji kɛ asraafoi atawuu mli béi amli lɛ, bafeɔ nɔkwɛmɔnɔ kɛhaa anɔkwa Kristofoi ni baa yɛ sɛɛ mli lɛ.
Kristofoi ni kɛ Amɛhe Wooo Maŋ Saji Amli yɛ Naagbee Gbii Nɛɛ Amli
10. (a) Mɛɛ nitsumɔ Yehowa Odasefoi kɛ amɛbe tsuɔ waa kɛ ekãa lɛ, ni mɛni hewɔ? (b) Mɛni amɛkɛ amɛhe wooo mli kwraa lɛ?
10 Ani yinɔsane mli saji ni aŋmala ashwie shi lɛ tsɔɔ akɛ kuu ko yɛ naagbee gbii nɛɛ amli ni amɛdi maŋ saji ni akɛ he wooo mli kwraa lɛ sɛɛ ákɛ nɔ ni amɛkɛmiikase mra be mli Kristofoi lɛ? Hɛɛ, Yehowa Odasefoi efee nakai. Amɛ́tee nɔ amɛshiɛ yɛ nɛkɛ be nɛɛ mli fɛɛ akɛ, Nyɔŋmɔ Maŋtsɛyeli lɛ ji nɔ̃ kome pɛ ni abaatsɔ nɔ akɛ naanɔ toiŋjɔlɛ, shweremɔ kɛ miishɛɛ aba abaha mɛi ni sumɔɔ jalɛ nifeemɔ lɛ. (Mateo 24:14) Shi yɛ béi ni yaa nɔ yɛ jeŋmaji lɛ ateŋ lɛ gbɛfaŋ lɛ, amɛkɛ amɛhe wooo ekoeko kwraa mli.
11. (a) Maŋ saji ni Odasefoi lɛ kɛ amɛhe wooo mli lɛ yɛ srɔto yɛ osɔfoi lɛ anifeemɔi ahe yɛ mɛɛ gbɛ nɔ? (b) Mɛɛ jwɛŋmɔ Yehowa Odasefoi hiɛ yɛ nɔ ni mɛi krokomɛi feɔ yɛ maŋkwramɔ mli lɛ he?
11 Nɔ ni tamɔɔɔ enɛ kwraa lɛ, je nɛŋ jamɔi amli osɔfoi lɛ kɛ amɛhe ewo maŋkwramɔŋ saji amli vii. Amɛkɛ amɛhe ewo nifeemɔ he gbɛjianɔtoo ni akɛtsuɔ nii yɛ maŋ koni akɛfi mɛi ni abaafɔ̃ oshiki aha amɛ lɛ mli waa kɛ ekãa loo koni amɛkɛte shi amɛwo amɛ lɛ yɛ maji komɛi anɔ. Osɔfoi lɛ ateŋ mɛi komɛi po hiɛ maŋkwramɔŋ gbɛhei amli. Amɛteŋ mɛi krokomɛi hu enyɛ maŋkwralɔi anɔ koni amɛkɛ gbɛjianɔtoi ni osɔfoi lɛ kpɛlɛɔ nɔ lɛ atsu nii. Shi Yehowa Odasefoi kɛ amɛhe wooo maŋkwramɔŋ saji amli. Ni asaŋ amɛkɛ amɛhe wooo nɔ ni mɛi krokomɛi feɔ yɛ maŋkwramɔŋ kui ni amɛkɛ amɛhe woɔ mli, oshiki ni amɛhaa afɔ̃ɔ ahaa amɛ kɛha maŋkwramɔŋ gbɛhei, aloo ni amɛaafɔ̃ oshiki kɛhala mɛi awo maŋkwramɔŋ gbɛhei amli lɛ mli. Yesu kɛɛ akɛ ekaselɔi lɛ baafee mɛi ni jɛɛɛ je lɛ mli, no hewɔ lɛ, Yehowa Odasefoi kɛ amɛhe wooo maŋkwramɔŋ saji amli.
12. Mɛni ejɛ mli eba yɛ maŋ saji ni je nɛŋ jamɔi lɛ kɛ amɛhe woɔ mli lɛ hewɔ?
12 Taakɛ Yesu gba fɔ̃ shi lɛ, jeŋmaji lɛ ewuu tai shii abɔ. Atuatsemɔ kui ni yɔɔ maji srɔtoi amli lɛ po kɛ amɛhe ewuu ta. (Mateo 24:3, 6, 7) Etamɔ nɔ ni jamɔ mli hiɛnyiɛlɔi lɛ etee nɔ amɛfi maŋ kome loo atuatsemɔ kuu kome sɛɛ kɛte shi amɛwo ekroko, ni amɛ́wo amɛsɛɛnyiɛlɔi lɛ hewalɛ ni amɛfee nakai nɔŋŋ. Mɛni ejɛ mli kɛba? Jamɔ kome mli bii gbeɔ amɛhe yɛ tawuu mli yɛ srɔtofeemɔi ni ji maŋ nɔ ni amɛjɛ loo weku mli ni amɛjɛ hewɔ. Enɛ kɛ Nyɔŋmɔ suɔmɔnaa nii kpãaa gbee kwraa.—1 Yohane 3:10-12; 4:8, 20.
13. Mɛni odaseyelii lɛ tsɔɔ yɛ maŋ saji ni Yehowa Odasefoi kɛ amɛhe wooo mli lɛ hewɔ?
13 Shi, Yehowa Odasefoi efee mɛi ni kɛ amɛhe wooo béi ko béi ko kwraa mli. November 1, 1939 The Watchtower lɛ kɛɛ akɛ: “Mɛi fɛɛ ni fiɔ Nuŋtsɔ lɛ sɛɛ lɛ baafee mɛi ni kɛ amɛhe wooo maji ni kɛ amɛhe wuɔ ta lɛ asaji amli.” Yehowa Odasefoi ni yɔɔ maji fɛɛ mli yɛ shihilɛi fɛɛ mli lɛ yaa nɔ amɛhiɛɔ shidaamɔ nɛɛ mli kpɛŋŋ. Amɛŋmɛɛɛ gbɛ koni je lɛŋ maŋkwramɔ ni kɛ mligbalamɔ baa lɛ kɛ je lɛŋ tai lɛ afite amɛ majimaji ateŋ nyɛmifeemɔ lɛ. ‘Amɛkɛ amɛklantei sɔ̃ɔ kɔii ni amɛkɛ amɛkpɔlɔi hu sɔ̃ɔ adedai.’ Akɛni amɛkɛ amɛhe wooo maŋ saji amli hewɔ lɛ, amɛkaseee tawuu dɔŋŋ.—Yesaia 2:3, 4; 2 Korintobii 10:3, 4.
14. Akɛni Yehowa Odasefoi etsi amɛhe kɛjɛ je lɛ he hewɔ lɛ, mɛni eba amɛnɔ?
14 Mɛni ji nɔ kome ni ejɛ maŋ saji ni amɛkɛ amɛhe wooo mli lɛ mli eba? Yesu kɛɛ: “Akɛni nyɛjɛɛɛ je . . . lɛŋ lɛ, . . . je lɛ nyɛ̃ɔ nyɛ.” (Yohane 15:19) Áwo Yehowa Odasefoi lɛ ateŋ mɛi pii tsuŋ yɛ Nyɔŋmɔ tsuji ni amɛji hewɔ. Ápiŋ mɛi komɛi, ni agbe amɛ po, tamɔ bɔ ni eba lɛ yɛ klɛŋklɛŋ afii oha lɛ mli Kristofoi lɛ anɔ̃ lɛ nɔŋŋ. Nɔ hewɔ ni enɛ baa lɛ nakai ji akɛ, Satan ni ji ‘nibii agbɛjianɔtoo nɛɛ nyɔŋmɔ’ lɛ teɔ shi ewoɔ Yehowa tsuji ni jɛɛɛ agbɛjianɔtoo lɛ mli lɛ.—2 Korintobii 4:4; Kpojiemɔ 12:12.
15. (a) Jeŋmaji fɛɛ miishi ako kɛmiiya nɛgbɛ, ni mɛni Yehowa Odasefoi kwɛɔ jogbaŋŋ koni amɛkwa? (b) Mɛni hewɔ je lɛ ni atsiɔ he kɛjɛɔ he lɛ ji sane ni hiɛdɔɔ yɔɔ mli nakai lɛ?
15 Yehowa tsuji yɛ miishɛɛ akɛ amɛjɛɛɛ je lɛ mli, ejaakɛ emli maji lɛ fɛɛ miishi ako kɛmiiya amɛnaagbee yɛ Harmagedon. (Daniel 2:44; Kpojiemɔ 16:14, 16; 19:11-21) Wɔbaaje nakai hiɛkpatamɔ lɛ mli ejaakɛ wɔji mɛi ni etsi amɛhe kɛjɛ je lɛ he. Ákɛ gbɔmɛi ni efee ekome yɛ jeŋ fɛɛ lɛ, wɔyeɔ Nyɔŋmɔ ŋwɛi Maŋtsɛyeli lɛ anɔkwa. Lɛɛlɛŋ, akɛni wɔjɛɛɛ je lɛ mli hewɔ lɛ, wɔbatsɔmɔ mɛi ni ayeɔ amɛhe fɛo ni awaa wɔyi. Shi etsɛŋ kwraa ni enɛ baaba naagbee, ejaakɛ abaakpata ŋmɛnɛŋmɛnɛ jeŋ fɔŋ nɛɛ ni yɔɔ Satan kudɔmɔ shishi lɛ hiɛ kɛya naanɔ. Shi yɛ gbɛ kroko nɔ lɛ, mɛi ni sɔmɔɔ Yehowa lɛ baahi shi kɛya naanɔ yɛ ejalɛ jeŋ hee ni yɔɔ Nyɔŋmɔ Maŋtsɛyeli lɛ shishi lɛ mli.—2 Petro 3:10-13; 1 Yohane 2:15-17.
Sanegbaa ni Akɛtiɔ Mli
• Te Yesu tsɔɔ bɔ ni ‘je lɛ mli ni ajɛɛɛ’ lɛ tsɔɔ lɛ mli eha tɛŋŋ?
• Mɛni ji mra be mli Kristofoi lɛ asubaŋ yɛ (a) je lɛ mumɔ loo esubaŋ lɛ he, (b) je lɛŋ nɔyelɔi lɛ ahe, (d) kɛ onia ni atsuɔ lɛ he?
• Mɛɛ gbɛ̀i anɔ nɛkɛ Yehowa Odasefoi ni yɔɔ ŋmɛnɛŋmɛnɛ beaŋ lɛ kɛ odaseyeli eha ni tsɔɔ akɛ amɛji Kristofoi ni kɛ amɛhe wooo maŋ saji amli lɛ?
[Mfoniri ni yɔɔ baafa 165]
Yesu tsɔɔ mli akɛ lɛ kɛ esɛɛnyiɛlɔi lɛ ‘jɛɛɛ je lɛŋ’