Kojomɔ Gbi​—Te Eshishi Hu?

MƐNI baa ojwɛŋmɔ mli kɛ́ atsĩ Kojomɔ Gbi lɛ tã? Mɛi babaoo susuɔ akɛ eji gbi ni abaato gbɔmɛi aŋkroaŋkroi akpekpei akpei abɔ lɛ anaa sɛrɛnɛɛ yɛ Nyɔŋmɔ maŋtsɛsɛi lɛ hiɛ. Kɛkɛ lɛ, akojo amɛ ekomekomei. Akɛ ŋwɛi paradeiso shihilɛ baajwere mɛi komɛi, ni abaabu mɛi krokomɛi hu fɔ́ kɛha naanɔ piŋmɔ. Shi kɛlɛ, Biblia lɛ tsɔɔ nɔ kroko kwraa yɛ nɛkɛ be nɛɛ he. Nyɔŋmɔ Wiemɔ lɛ tsɔɔ mli akɛ ejeee be ni yɔɔ gbeyei, shi moŋ akɛ eji be kɛha hiɛnɔkamɔ kɛ nibii asaamɔ.

Wɔkaneɔ bɔ ni bɔfo Yohane tsɔɔ Kojomɔ Gbi lɛ mli eha yɛ Kpojiemɔ 20:11, 12 lɛ akɛ: “Mina maŋtsɛsɛi yɛŋ ko ni da, kɛ mɔ ni ta nɔ lɛ, ni shikpɔŋ kɛ ŋwɛi jo foi yɛ ehiɛ, ni anáaa gbɛ aha amɛ. Ni mina gbohii lɛ, mɛi bibii kɛ mɛi wuji, damɔ maŋtsɛsɛi lɛ hiɛ, ni agbele woji anaa. Ni agbele wolo kroko ni ji wala wolo lɛ hu naa. Ni akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ.” Namɔ ji Kojolɔ ni awieɔ ehe yɛ biɛ lɛ?

Yehowa Nyɔŋmɔ ji adesai fɛɛ a-Kojolɔ ni fe fɛɛ. Shi kɛlɛ, ekɛ adesai akojomɔ he nitsumɔ lɛ ewo mɔ kroko dɛŋ. Taakɛ Bɔfoi lɛ Asaji 17:31 lɛ tsɔɔ lɛ, bɔfo Paulo kɛɛ akɛ Nyɔŋmɔ “eto gbi ko, nɔ̃ nɔ ni ebaatsɔ nuu ni eto lɛ nɔ ekojo jeŋ muu lɛ fɛɛ yɛ jalɛ naa.” Kojolɔ ni ahala lɛ ji Yesu Kristo ni atée lɛ shi lɛ. (Yohane 5:22) Shi, mɛɛ be Kojomɔ Gbi lɛ jeɔ shishi? Be enyiɛ ebaahe?

Kpojiemɔ wolo lɛ tsɔɔ akɛ Kojomɔ Gbi lɛ baaje shishi yɛ Harmagedon ta ni akɛbaakpata Satan gbɛjianɔtoo ni yɔɔ shikpɔŋ nɔ lɛ hiɛ lɛ sɛɛ.a (Kpojiemɔ 16:14, 16; 19:19–20:3) Yɛ Harmagedon sɛɛ lɛ, abaawo Satan kɛ edaimonioi lɛ atsuŋ yɛ bu kwɔŋkwɔŋ ko mli afii 1000. Nakai afii lɛ amli ji be ni mɛi 144,000 ni ji nanemɛi niyelɔi lɛ baatsɔmɔ kojolɔi ni ‘amɛkɛ Kristo baaye maŋtsɛ afii akpe’ lɛ. (Kpojiemɔ 14:1-3; 20:1-4; Romabii 8:17) Kojomɔ Gbi lɛ jeee ŋmɛlɛtswai 24 mli nifeemɔ ko ni baabi ni akɛ oyaiyeli atsu he nii. Ebaahé afii 1000.

Yesu Kristo ‘baakojo hiɛkalɔi kɛ gbohii lɛ’ yɛ nakai afii 1000 lɛ mli. (2 Timoteo 4:1) “Hiɛkalɔi” lɛ ji “asafo babaoo” ni baaje Harmagedon mli shweshweeshwe lɛ. (Kpojiemɔ 7:9-17) Bɔfo Yohane na “gbohii lɛ [hu] . . . damɔ maŋtsɛsɛi [kojomɔ sɛi] lɛ hiɛ.” Taakɛ Yesu wo shi lɛ, ‘mɛi ni yɔɔ gbohiiabui lɛ amli lɛ baanu Kristo gbee, ni amɛaaje kpo’ kɛtsɔ gbohiiashitee lɛ nɔ. (Yohane 5:28, 29; Bɔfoi lɛ Asaji 24:15) Shi mɛni nɔ abaadamɔ akojo mɔ fɛɛ mɔ?

Taakɛ ninaa ni ajie lɛ kpo atsɔɔ bɔfo Yohane lɛ tsɔɔ lɛ, “agbele woji anaa,” ni “akojo gbohii lɛ yɛ nibii ni aŋma yɛ woji lɛ amli lɛ anaa, bɔ ni sa amɛnitsumɔi lɛ.” Ani gbɔmɛi atsutsu nifeemɔi lɛ ji nibii ni aŋmala ashwie shi yɛ woji nɛɛ amli lɛ? Dabi, jeee nibii ni mɛi fee yɛ bei ni eho lɛ amli dani amɛgboi lɛ anɔ abaadamɔ akojo amɛ. Te wɔfeɔ tɛŋŋ wɔleɔ enɛ hu? Biblia lɛ kɛɔ akɛ: “Mɔ ni egbo lɛ, abu lɛ bem kɛjɛ esha lɛ mli.” (Romabii 6:7) No hewɔ lɛ, mɛi ni abaatée amɛ shi lɛ baaba wala mli ákɛ mɛi ni Nyɔŋmɔ hiɛ ekpa amɛtsutsu nishaianii lɛ anɔ. Belɛ, nibii ni aŋmala yɛ woji nɛɛ amli lɛ damɔ shi kɛha Nyɔŋmɔ taomɔ nii krokomɛi. Kɛji akɛ mɛi ni baafo Harmagedon lɛ kɛ mɛi ni abaatée amɛ shi lɛ fɛɛ baahi shi kɛya naanɔ lɛ, no lɛ esa akɛ amɛfee toiboo amɛha Nyɔŋmɔ kitai lɛ, ní nɔ ni fata he ji taomɔ nii heei fɛɛ ni Yehowa baajie lɛ kpo atsɔɔ yɛ afii 1000 lɛ mli lɛ. No hewɔ lɛ, abaadamɔ nɔ ni mɔ aŋkro fɛɛ aŋkro feɔ be mli ni Kojomɔ Gbi lɛ yaa nɔ lɛ nɔ akɛkojo lɛ.

Kojomɔ Gbi lɛ baaha mɛi akpekpei akpei abɔ aná hegbɛ klɛŋklɛŋ kwraa ni amɛkɛkase Nyɔŋmɔ suɔmɔnaa nii koni amɛhi shi yɛ naa. Enɛ tsɔɔ akɛ abaatsu tsɔsemɔ nitsumɔ kpele ko he nii. Hɛɛ, ‘je lɛŋ bii lɛ baakase jalɛ.’ (Yesaia 26:9) Kɛlɛ, jeee mɔ fɛɛ mɔ baasumɔ ni ehi shi yɛ Nyɔŋmɔ suɔmɔnaa nii kɛ gbeekpamɔ naa. Yesaia 26:10 lɛ kɛɔ akɛ: “Kɛ́ aduro efɔŋfeelɔ tete lɛ, ekaseee jalɛ; shi moŋ eyeɔ saji fɔji yɛ jalɛ shikpɔŋ lɛ nɔ, ni ekwɛɛɛ Yehowa agbojee lɛ.” Abaakpata efɔŋfeelɔi nɛɛ ahiɛ kwraa yɛ Kojomɔ Gbi lɛ mli.​—Yesaia 65:20.

Beni Kojomɔ Gbi lɛ baaba enaagbee lɛ, no mli lɛ adesai ni amɛnyɛ amɛhi shi kɛyashi nakai beaŋ lɛ ‘eba wala mli’ ákɛ adesai ni eye emuu. (Kpojiemɔ 20:5) Enɛ tsɔɔ akɛ, abaatsɔ Kojomɔ Gbi he gbɛjianɔtoo lɛ nɔ akɛ adesai aku sɛɛ kɛba emuuyeli shihilɛ ni adesai aweku lɛ ná mli ŋɔɔmɔ yɛ shishijee lɛ mli ekoŋŋ. (1 Korintobii 15:24-28) No sɛɛ lɛ akɛ naagbee kaa baaba. Abaaŋmɛɛ Satan he kɛjɛ etsuŋwoohe lɛ, ni abaaha lɛ hegbɛ ni ji naagbee nɔ̃ kwraa koni eka akɛ eeenyɛ elaka adesai lo. (Kpojiemɔ 20:3, 7-10) Biblia mli shiwoo nɛɛ baaba mli kwraa yɛ mɛi ni baawu ashi emɔdɛŋbɔi lɛ anɔ, nɔ ni kɛɔ akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.” (Lala 37:29) Hɛɛ, Kojomɔ Gbi lɛ baafee jɔɔmɔ be kɛha adesai anɔkwafoi fɛɛ!