Yitso Nyɔŋmai Enyɔ
Ha Yehowa Gbi lɛ Ahi Ojwɛŋmɔ Mli Waa
1. Beni okase klɛŋklɛŋ kwraa akɛ kpɔmɔ kɛmiijɛ gbɛjianɔtoo momo nɛɛ mli nidɔɔnii amli lɛ ebɛŋkɛ lɛ, te onu he oha tɛŋŋ?
KLƐŊKLƐŊ nii ni okase kɛjɛ Biblia lɛ mli lɛ ateŋ ekome ji akɛ, Yehowa yiŋtoo ji ni shikpɔŋ lɛ fɛɛ atsɔ paradeiso. Tawuu, efɔŋfeemɔ, ohia, hela, piŋmɔ kɛ gbele sɛɛ baafo yɛ nakai jeŋ hee lɛ mli. Gbohii lɛ po baaba wala mli ekoŋŋ. Mɛɛ miishɛɛ gbɛkpamɔ ni taa mɔ tsuiŋ nɛ! Odaseyeli ni tsɔɔ akɛ ba ni Kristo eba ákɛ Maŋtsɛ ni miiye nɔ, ní anaaa lɛ lɛ je shishi yɛ afi 1914, ni ákɛ kɛjɛ nakai be lɛ mli kɛbaa nɛɛ lɛ wɔbote yiwalɛ jeŋ nɛɛ naagbee gbii lɛ amli lɛ, maa bɔ ni enɛɛmɛi fɛɛ ebɛŋkɛ kpaakpa eha lɛ nɔ mi. Yɛ nɛkɛ naagbee gbii nɛɛ anaagbee mli lɛ, Yehowa baakpata ŋmɛnɛŋmɛnɛ yiwalɛ nibii agbɛjianɔtoo nɛɛ hiɛ, ni ekɛ jeŋ hee ni ewo shi yɛ he lɛ baaba!
2. Mɛni ji “Yehowa gbi lɛ”?
2 Biblia lɛ tsɛɔ hiɛkpatamɔ be ni baa nɛɛ akɛ “Yehowa gbi.” (2 Petro 3:10, NW) Eji “Yehowa mlifu gbi lɛ” ni ekɛbaate shi ewo Satan je lɛ fɛɛ. (Zefania 2:3) Ebaaba enaagbee kwraa yɛ “Nyɔŋmɔ Ofe lɛ gbi wulu lɛ nɔ ta lɛ . . . ni atsɛɔ jɛi yɛ Hebri wiemɔ mli akɛ Harmagedon lɛ” mli, nɔ̃ mli ni abaakpata “maŋtsɛmɛi ni yɔɔ jeŋ muu lɛ fɛɛ lɛ” ahiɛ lɛ. (Kpojiemɔ 16:14, 16) Ani oshihilɛ gbɛ tsɔɔ akɛ oheɔ oyeɔ akɛ nɛkɛ “Yehowa gbi” nɛɛ ebɛŋkɛ?—Zefania 1:14-18; Yeremia 25:33.
3. (a) Mɛɛ be Yehowa gbi lɛ baaba? (b) Yɛ mɛɛ gbɛ nɔ efee nɔ ni sɛɛnamɔ yɔɔ he akɛni Yehowa ejieee “no gbi lɛ kɛ no ŋmɛlɛtswaa lɛ” kpo lɛ hewɔ?
3 Biblia lɛ ekɛɛɛ wɔ be pɔtɛɛ nɔ ni Yesu Kristo baaba ákɛ Yehowa Oblafo ni baate shi ashi Satan nibii agbɛjianɔtoo lɛ. Yesu kɛɛ: “Shi no gbi lɛ kɛ no ŋmɛlɛtswaa lɛ mɔ ko leee; ŋwɛibɔfoi lɛ hu leee, ni bi lɛ tete leee, ja tsɛ lɛ kome kɛkɛ.” (Marko 13:32) Kɛji akɛ mɛi komɛi yɛ ni sumɔɔɔ Yehowa lɛɛlɛŋ lɛ, amɛbaasumɔ ni amɛtsi egbi lɛ amɛto yɛ amɛjwɛŋmɔ mli, koni amɛyadi je lɛŋ nibii asɛɛ. Shi mɛi ni sumɔɔ Yehowa lɛɛlɛŋ lɛ baajɛ amɛsusuma muu fɛɛ mli amɛsɔmɔ lɛ, ní be ni yiwalɛ nibii agbɛjianɔtoo nɛɛ naagbee baaba lɛ kɔɔɔ he eko.—Lala 37:4; 1 Yohane 5:3.
4. Mɛni Yesu wie akɛ kɔkɔbɔɔ wiemɔ?
4 Yesu kɛɔ yɛ kɔkɔbɔɔ wiemɔ ni ekɛha mɛi ni sumɔɔ Yehowa lɛ mli akɛ: “Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be [ni ato, NW] lɛ shɛɔ.” (Marko 13:33-37) Ewoɔ wɔ hewalɛ koni wɔkaŋmɛ gbɛ ni niyeli kɛ ninumɔ loo “shihilɛ mli naagbai” (NW) miihe wɔjwɛŋmɔ babaoo ni wɔhiɛ je bɔ ni be lɛ he hiaa waa ha lɛ nɔ.—Luka 21:34-36; Mateo 24:37-42.
5. Taakɛ Petro tsɔɔ mli lɛ, Yehowa gbi lɛ kɛ mɛni baaba?
5 Nakai nɔŋŋ Petro woɔ wɔ ŋaa koni wɔha ‘ba ni Yehowa gbi lɛ eba lɛ, nɔ̃ mli ni ŋwɛi ni aaahere kɛ la lɛ aaashã ní nibii ni edɔ waa lɛ baasere lɛ’ ahi wɔjwɛŋmɔ mli waa. Abaakpata adesa nɔyelii fɛɛ, ni ji—‘ŋwɛii lɛ’—hiɛ, taakɛ abaafee adesa yiwalɛ gbɛjianɔtoo lɛ fɛɛ, ni ji—‘shikpɔŋ lɛ’—kɛ emli ‘nibii’ lɛ ni ji jeŋ fɔŋ nɛɛ mli susumɔi kɛ nifeemɔi, tamɔ esubaŋ ni ji ehe ni etsi kɛjɛ Nyɔŋmɔ he lɛ kɛ ejeŋba shara kɛ heloo gbɛfaŋ nibii asɛɛdii shihilɛ lɛ. Akɛ “ŋwɛi hee [Nyɔŋmɔ ŋwɛi Maŋtsɛyeli lɛ] kɛ shikpɔŋ hee [adesa shikpɔŋ nɔ weku hee]” ni “jalɛ hiɔ mli lɛ” baato enɛɛmɛi anajiaŋ. (2 Petro 3:10-13) Nɛkɛ saji nɛɛ ni hosoɔ je lɛ baaje shishi trukaa yɛ gbi kɛ ŋmɛlɛtswaa ni akpaaa gbɛ nɔ.—Mateo 24:44.
Ha Ohiɛ Ahi Okadi lɛ Nɔ
6. (a) Hetoo ni Yesu kɛha ekaselɔi lɛ asanebimɔ lɛ kɔɔ Yudafoi agbɛjianɔtoo lɛ naagbee he kɛyashɛɔ nɛgbɛ? (b) Mɛɛ Yesu hetoo lɛ fãi komɛi gbalaa jwɛŋmɔ kɛyaa saji ni baa kɛ subaŋi anɔ kɛjɛ afi 1914 kɛyaa?
6 Yɛ bei ni wɔyɔɔ mli nɛɛ hewɔ lɛ, esa akɛ wɔle okadi ni feɔ nibii pii lɛ fɛɛ ni haa ayɔseɔ naagbee gbii lɛ—“nibii agbɛjianɔtoo lɛ naagbee lɛ” mli nibii lɛ fɛɛ fitsofitso. Ha ahi ojwɛŋmɔ mli akɛ, beni Yesu ha ekaselɔi lɛ asanebimɔ ni aŋma afɔ̃ shi yɛ Mateo 24:3 (NW) lɛ hetoo lɛ, nibii ni etsɔɔ mli yɛ kuku 4 kɛyashi 22 lɛ ekomɛi ná amɛmlibaa bibioo yɛ Yudafoi agbɛjianɔtoo lɛ nɔ kɛjɛ afi 33 kɛyashi 70 Ŋ.B. Shi gbalɛ lɛ ná emlibaa ni da kɛjɛ afi 1914, yɛ Kristo “ba ni eba lɛ kɛ nibii agbɛjianɔtoo lɛ naagbee” be lɛ mli. Mateo 24:23-28 gbaa nɔ ni baaba mli kɛjɛ afi 70 Ŋ.B. kɛyashi beni Kristo eba lɛ. Nibii ni baaya nɔ ni atsɔɔ mli yɛ Mateo 24:29–25:46 lɛ baa mli yɛ naagbee be lɛ mli.
7. (a) Mɛni hewɔ esa akɛ wɔ diɛŋtsɛ wɔha wɔhiɛ ahi bɔ ni shihilɛi ni yaa nɔ bianɛ lɛ haa okadi lɛ baa mli lɛ nɔ lɛ? (b) Ha sanebimɔi ni yɔɔ kuku nɛɛ naagbee lɛ ahetoo, ní okɛtsɔɔ bɔ ni okadi lɛ eba mli eha kɛjɛ afi 1914 lɛ.
7 Ehe miihia ni wɔ diɛŋtsɛ lɛ wɔyoo nibii kɛ subaŋi ni baa ni haa okadi lɛ baa mli lɛ. Nɛkɛ nibii nɛɛ ni wɔkɛaato Biblia mli gbalɛ he lɛ baaye abua wɔ ni wɔha Yehowa gbi lɛ ahi wɔjwɛŋmɔ mli waa. Agbɛnɛ hu ebaaye ebua wɔ ni wɔtsɔ mɛi ayiŋ yɛ be mli ni wɔbɔɔ mɛi krokomɛi kɔkɔ yɛ bɔ ni nakai gbi lɛ ebɛŋkɛ kpaakpa eha lɛ he lɛ. (Yesaia 61:1, 2) Akɛni otii nɛɛ yɔɔ wɔjwɛŋmɔ mli hewɔ lɛ, nyɛhaa wɔtia sanebimɔi ni nyiɛ sɛɛ ni maa okadi lɛ fãi komɛi anɔ mi lɛ amli, taakɛ aŋma afɔ̃ shi yɛ Mateo 24:7 kɛ Luka 21:10, 11 lɛ.
Mɛɛ gbɛ ni yɔɔ srɔto nɔ ‘maŋ aaate shi awo maŋ ni maŋtsɛyeli hu aaate shi awo maŋtsɛyeli’ ni agba afɔ̃ shi lɛ ba mli kɛjɛ afi 1914? Yɛ nɔ ni kɔɔ tawuu he lɛ, mɛni eba kɛjɛ nakai be lɛ mli kɛbaa?
Mɛɛ tsɛŋemɔ hela gbe gbɔmɛi yɛ afi 1918 fe Jeŋ Ta 1? Yɛ tsofafeemɔ he nilee ni gbɔmɔ yɔɔ lɛ fɛɛ sɛɛ lɛ, mɛɛ helai gbeɔ gbɔmɛi akpekpei abɔ lolo?
Hɔmɔ eba shikpɔŋ lɛ nɔ kɛyashɛ nɛgbɛ, yɛ jeŋ nilee mli nɔyaa ni ba yɛ afii oha ni ho lɛ mli lɛ fɛɛ sɛɛ?
Mɛni haa oheɔ oyeɔ akɛ jeee bɔ ni shihilɛ yɔɔ daa lɛ 2 Timoteo 3:1-5, 13 tsɔɔ mli lɛ, shi moŋ bɔ ni shihilɛi gbohii amli woɔ wu yɛ be mli ni wɔbɛŋkɛɔ naagbee gbii lɛ anaagbee lɛ?
Gbɔmɛi Amligbalamɔ
8. (a) Mɛni hu ni atsɔɔ mli yɛ Mateo 13:24-30, 36-43, Yesu kɛto nibii agbɛjianɔtoo lɛ naagbee lɛ he? (b) Mɛni ji Yesu abɛbua lɛ shishinumɔ?
8 Nibii krokomɛi ni sa kadimɔ yɛ ni Yesu kɛto nibii agbɛjianɔtoo lɛ naagbee lɛ he. Enɛɛmɛi ateŋ ekome ji “maŋtsɛyeli lɛŋ bii lɛ” ni ajieɔ amɛ kɛjɛɔ “mɔ fɔŋ lɛ bii lɛ” ateŋ lɛ. Yesu wie enɛ he yɛ ebɛbua ko ni kɔɔ ŋmãa abɔɔ ko ni henyɛlɔ ko yadu jwɛi ni fá babaoo ewo mli lɛ he lɛ mli. Yɛ ebɛbua lɛ mli lɛ, “ŋmãa lɛ” damɔ shi kɛha anɔkwa Kristofoi ni afɔ amɛ mu lɛ. “Jwɛi lɛ” damɔ shi kɛha mɛi ni kwaa amɛfeɔ amɛhe Kristofoi, shi anaa amɛ akɛ “mɔ fɔŋ lɛ bii,” akɛni amɛkɛ amɛhe kpɛtɛɔ jeŋ ni enɔyelɔ ji Abonsam lɛ he gbagbalii lɛ hewɔ. Ajieɔ mɛnɛɛmɛi kɛjɛɔ “[Nyɔŋmɔ] maŋtsɛyeli lɛŋ bii lɛ” ateŋ ni akadiɔ amɛ kɛhaa hiɛkpatamɔ. (Mateo 13:24-30, 36-43) Ani enɛ eba mli diɛŋtsɛ?
9. (a) Yɛ Jeŋ Ta I sɛɛ lɛ, mɛɛ gbɔmɛi amligbálamɔ kpeteŋkpele ko tee nɔ yɛ mɛi fɛɛ ni kɛɔ akɛ Kristofoi ji amɛ lɛ ateŋ? (b) Mɛɛ gbɛ Kristofoi ni afɔ amɛ mu lɛ tsɔ nɔ amɛye odase akɛ amɛji Maŋtsɛyeli lɛ he anɔkwa tsuji?
9 Yɛ Jeŋ Ta I sɛɛ lɛ, agbála gbɔmɛi fɛɛ ni kɛɔ akɛ amɛji Kristofoi lɛ amli awo kui enyɔ mli: (1) Kristendom osɔfoi lɛ kɛ amɛsɛɛnyiɛlɔi, ni fi Jeŋmaji Akpaŋmɔ lɛ (amrɔ nɛɛ Jeŋmaji Ekomefeemɔ lɛ) sɛɛ waa, yɛ be mli ni amɛkɛ amɛhe kpɛtɛɔ anɔkwa ni amɛyeɔ amɛjakumaŋ he lolo lɛ, kɛ (2) anɔkwa Kristofoi ni hi shi yɛ nakai ta be lɛ sɛɛ, ni kɛ amɛsɛɛfimɔ fɛɛ ha Nyɔŋmɔ Mesia Maŋtsɛyeli lɛ, shi jeee je nɛŋ maji lɛ. (Yohane 17:16) Mɛnɛɛmɛi jie amɛhe kpo akɛ Nyɔŋmɔ Maŋtsɛyeli lɛ anɔkwa tsuji, kɛtsɔ “maŋtsɛyeli lɛ he sanekpakpa nɛɛ” shiɛmɔ yɛ shikpɔŋ muu lɛ fɛɛ nɔ lɛ nɔ. (Mateo 24:14) Mɛni jɛ mli ba?
10. Mɛni jɛ Maŋtsɛyeli shiɛmɔ nitsumɔ lɛ mli ba klɛŋklɛŋ kwraa?
10 Klɛŋklɛŋ lɛ, abua mɛi ni akɛ Nyɔŋmɔ mumɔ lɛ efɔ amɛ mu lɛ ateŋ shwɛɛnii, ni yɔɔ hiɛnɔkamɔ akɛ amɛkɛ Kristo baahi ŋwɛi akɛ ŋwɛi Maŋtsɛyeli lɛ fã lɛ anaa. Eyɛ mli akɛ mɛnɛɛmɛi egbɛ amɛshwã jeŋmaji lɛ ateŋ moŋ, shi akɛ amɛ ba gbɛjianɔtoo ni efee ekome mli. Mɛi ni afɔ amɛ mu nɛɛ anaasɔomɔ lɛ miiba naagbee.—Kpojiemɔ 7:3, 4.
11. (a) Mɛɛ naabuamɔ nitsumɔ yaa nɔ, ni ekɛ mɛɛ gbalɛ kpãa gbee? (b) Gbalɛ nɛɛ mlibaa tsɔɔ mɛni?
11 Kɛkɛ ni, yɛ Kristo gbɛtsɔɔmɔ shishi lɛ, aje shishi akɛ aabua “asafo babaoo . . . ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” lɛ anaa. Mɛnɛɛmɛi feɔ “tooi krokomɛi” ni baaje “amanehulu kpeteŋkpele lɛ” mli shweshweeshwe kɛyabote Nyɔŋmɔ jeŋ hee lɛ mli lɛ. (Kpojiemɔ 7:9, 14; Yohane 10:16) Nɛkɛ nitsumɔ ni ji Nyɔŋmɔ Maŋtsɛyeli lɛ shiɛmɔ dani naagbee lɛ aba lɛ, etee nɔ kɛbashi ŋmɛnɛŋmɛnɛ be nɛɛ mli. Asafo babaoo lɛ ni ji tooi krokomɛi lɛ ni amrɔ nɛɛ amɛyifalɛ shɛɔ akpekpei abɔ lɛ kɛ anɔkwayeli yeɔ buaa shwɛɛnii ni afɔ amɛ mu lɛ koni amɛjaje Maŋtsɛyeli shɛɛ sane ni he hiaa lɛ amɛtsɔɔ. Aanu shɛɛ sane nɛɛ yɛ jeŋmaji fɛɛ mli.
Mɛni Baaba Wɔsɛɛ?
12. Shiɛmɔ enyiɛ esa akɛ aya nɔ ashiɛ lolo dani Yehowa gbi lɛ aba?
12 Odaseyelii ni wɔna nɛɛ fɛɛ tsɔɔ akɛ, wɔbɛŋkɛ naagbee gbii lɛ anaagbee lɛ he, ni ákɛ Yehowa gbi lɛ ebɛŋkɛ kpaakpa. Shi ani gbalɛi komɛi yɛ lolo ni baaba mli dani nakai gbi ni he yɔɔ gbeyei lɛ aje shishi? Hɛɛ. Nɔ kome ji akɛ, gbɔmɛi ni agbálaa amɛmli yɛ Maŋtsɛyeli lɛ he sane lɛ he lɛ bako naagbee lolo. Hei komɛi ni tsutsu ko lɛ akɛ shitee-kɛ-woo ni naa wa waa ba yɛ jɛmɛ afii pii lɛ, amrɔ nɛɛ aná kaselɔi heei babaoo yɛ jɛmɛ. Yɛ hei ni gbɔmɛi kpooɔ sanekpakpa lɛ yɛ po lɛ, ajieɔ Yehowa mɔbɔnalɛ lɛ kpo kɛtsɔɔ odase ni wɔyeɔ lɛ nɔ. No hewɔ lɛ, nyɛyaa nɔ yɛ nitsumɔ lɛ mli! Yesu maa nɔ mi kɛhaa wɔ akɛ, kɛ atsu nitsumɔ lɛ agbe naa lɛ, naagbee lɛ baaba.
13. Taakɛ aŋma afɔ̃ shi yɛ 1 Tesalonikabii 5:2, 3 lɛ, mɛni ni sa kadimɔ waa yɔɔ lolo ni baaba, ni mɛni enɛ baatsɔɔ kɛha wɔ?
13 Biblia mli gbalɛ kroko ni sa kadimɔ waa gba akɛ: “Be mli ni amɛaakɛɛ akɛ: Hejɔlɛ yɛ ni wɔyɛ shweshweeshwe! lɛ, no mli nɔŋŋ hiɛkpatamɔ aaabatua amɛ trukaa, tamɔ kɔɔmɔ tuaa yoo ni musu eda lɛ, ni amɛjeŋ mli kɔkɔɔkɔ.” (1 Tesalonikabii 5:2, 3) Bɔ ni nakai ‘hejɔlɛ kɛ shweshweeshwe’ jajemɔ lɛ aaaba aha lɛ, be baatsɔɔ. Shi eka shi faŋŋ akɛ etsɔɔŋ akɛ je lɛŋ hiɛnyiɛlɔi lɛ ená tsabaa diɛŋtsɛ kɛha adesai anaagbai lɛ. Nakai sanejajemɔ lɛ lakaŋ mɛi ni haa Yehowa gbi lɛ hiɔ amɛjwɛŋmɔ mli waa lɛ. Amɛle akɛ, yɛ no sɛɛ nɔŋŋ lɛ, hiɛkpatamɔ ni baa trukaa baaba.
14. Mɛni nibii baaba yɛ amanehulu kpeteŋkpele lɛ be lɛ mli, ni yɛ mɛɛ gbɛjianɔtoo naa?
14 Yɛ amanehulu kpeteŋkpele lɛ shishijee mli lɛ, nɔyelɔi lɛ baate shi awo Babilon Kpeteŋkpele lɛ, jeŋ apasa jamɔ maŋtsɛyeli lɛ, ni amɛaakpata ehiɛ. (Mateo 24:21; Kpojiemɔ 17:15, 16) Yɛ no sɛɛ lɛ, jeŋmaji lɛ baatsɔ amɛhiɛ amɛha mɛi ni fiɔ Yehowa jeŋ muu fɛɛ maŋtsɛyeli lɛ sɛɛ lɛ, ni amɛkɛ nakai feemɔ baawo Yehowa mlila, ni ebaafɔse emlifu eshwie maŋkwramɔŋ nɔyelii lɛ kɛ amɛ sɛɛfilɔi lɛ anɔ, ni nɔ ni baajɛ mli aba lɛ baafee amɛhiɛkpatamɔ kwraa. No baafee amanehulu kpeteŋkpele lɛ naagbee, ni ji Harmagedon. Kɛkɛ lɛ, akɛ Satan kɛ edaimonioi lɛ baawo bu kwɔŋkwɔŋ lɛ mli, ni amɛnáŋ adesai anɔ hewalɛ dɔŋŋ. Enɛ kɛ Yehowa gbi lɛ baaba naagbee, beni abaawó egbɛi lɛ nɔ gojoo lɛ.—Ezekiel 38:18, 22, 23; Kpojiemɔ 19:11–20:3.
15. Mɛni hewɔ nilee bɛ mli akɛ aaasusu akɛ Yehowa gbi lɛ yɛ shɔŋŋ lolo lɛ?
15 Gbɛjianɔtoo nɛɛ naagbee lɛ baaba yɛ ebe naa pɛpɛɛpɛ, yɛ be ni Nyɔŋmɔ eto lɛ mli. Ekpeŋ sɛɛ. (Habakuk 2:3) Kaimɔ akɛ, Yerusalem hiɛkpatamɔ yɛ afi 70 Ŋ.B. lɛ ba oya, beni Yudafoi lɛ kpaaa gbɛ, yɛ be mli ni amɛsusu akɛ oshara lɛ eho lɛ. Ni blema Babilon hu? Ehe wa, eyɛ hekɛnɔfɔɔ, ni akɛ gbogboi wuji ni wa ebɔle ehe. Shi ekumɔ eshwie shi yɛ gbɛkɛ kome pɛ mli. Nakai nɔŋŋ hu hiɛkpatamɔ ni baa trukaa baaba ŋmɛnɛŋmɛnɛ yiwalɛ gbɛjianɔtoo lɛ nɔ. Kɛ eba lɛ, eba akɛ eeebanina wɔ akɛ wɔfee ekome yɛ anɔkwa jamɔ mli, ni wɔha Yehowa gbi lɛ ehi wɔjwɛŋmɔ mli waa.
Sanegbaa ni Akɛtiɔ Mli
• Mɛni hewɔ ehe hiaa waa akɛ wɔɔha Yehowa gbi lɛ ahi wɔjwɛŋmɔ mli waa lɛ? Te wɔɔfee tɛŋŋ wɔfee nakai?
• Gbɔmɛi amligbalamɔ ni yaa nɔ lɛ saa wɔ diɛŋtsɛ wɔhe yɛ mɛɛ gbɛ nɔ?
• Mɛni kã wɔhiɛ lolo dani Yehowa gbi lɛ aje shishi? No hewɔ lɛ, mɛni esa akɛ wɔ diɛŋtsɛ lɛ wɔya nɔ wɔfee?
[Mfonirii ni yɔɔ baafa 180, 181]
Etsɛŋ ni naagbee gbii lɛ anaagbee baaba, ni abaakpata Satan gbɛjianɔtoo lɛ hiɛ