Yesu Tee Lazaro Shi

Yesu yɛ nanemɛi etɛ komɛi yɛ Betania, ni esumɔɔ amɛsane waa. Amɛji Lazaro kɛ enyɛmimɛi yei enyɔ, Maria kɛ Marta. Gbi ko be ni Yesu yɔɔ Yordan Faa lɛ sɛɛ yɛ Perea kpokpaa lɛ nɔ lɛ, Maria kɛ Marta tsu ni ayakɛɛ lɛ akɛ: ‘Lazaro bɛ hewalɛ kwraa. Ofainɛ ba oya!’ Shi Yesu eyaaa amrɔ nɔŋŋ. Ehi he ni eyɔɔ lɛ gbii enyɔ, kɛkɛ ni ekɛɛ ekaselɔi lɛ akɛ: ‘Nyɛhãa wɔyaa Betania. Lazaro miiwɔ, ni miiya jɛmɛ ni miyatsĩɛ lɛ.’ Bɔfoi lɛ kɛɛ lɛ akɛ: ‘Kɛ́ Lazaro miiwɔ lɛ, no lɛ ehe baawa lɛ.’ No hewɔ lɛ, Yesu hã amɛna nɔ ni etsɔɔ lɛ. Ekɛɛ amɛ akɛ: ‘Lazaro egbo.’

Be ni Yesu yashɛ Betania lɛ, gbii ejwɛ eho kɛjɛ be ni afũ Lazaro lɛ, ni mɛi pii eba Marta kɛ Maria ŋɔɔ koni amɛbashɛje amɛmii. Be ni Marta nu akɛ Yesu eba lɛ, ejo foi kɛtee ni ekɛ lɛ yakpe ni ekɛɛ lɛ akɛ: “Nuŋtsɔ, eji oyɛ biɛ kulɛ, minyɛmi nuu lɛ náaa agbo.” Yesu kɛɛ lɛ akɛ: ‘Onyɛmi nuu lɛ baaba wala mli ekoŋŋ. Ani oheɔ enɛ oyeɔ, Marta?’ Marta here nɔ akɛ: ‘Miheɔ miyeɔ akɛ ebaate shi yɛ gbohiiashitee lɛ mli.’ Yesu kɛɛ lɛ akɛ: “Miji gbohiiashitee lɛ kɛ wala lɛ.”

TMarta tee eyakɛɛ Maria akɛ: ‘Yesu eba ee.’ Maria jo foi kɛtee Yesu ŋɔɔ, ni mɛi ni eba jɛmɛ lɛ hu nyiɛ esɛɛ. Eho egbee Yesu naji anaa ni eefo ni ehiii lɛ kpatamɔ. Ekɛɛ Yesu akɛ: ‘Nuŋtsɔ, eji oyɛ biɛ kulɛ, benɛ nɛɛ minyɛminuu lɛ yɛ wala mli lolo!’ Bɔ ni Maria ehao lɛ hã Yesu hu bɔi yaafo. Be ni asafoku lɛ na ni Yesu miifo lɛ, amɛwie akɛ: ‘Kwɛ bɔ ni Yesu sumɔɔ Lazaro sane.’ Shi mɛi komɛi bi akɛ: ‘Mɛni hewɔ ehereee enaanyo lɛ yiwala?’ Mɛni Yesu baafee?

Yesu tee gbonyobu lɛ naa. No mli lɛ, akɛ tɛ agbo ko etsĩ bu lɛ naa. Efã mɛi ni yɔɔ jɛmɛ lɛ akɛ: ‘Nyɛjiea tɛ lɛ.’ Marta kɛɛ lɛ akɛ: ‘Gbii ejwɛ nɛ ni afũ lɛ! Benɛ nɛɛ eeje fu.’ Shi amɛjie tɛ lɛ, ni Yesu sɔle akɛ: ‘Ataa, miida bo shi akɛ obo mi toi. Mile akɛ oboɔ mi toi daa, shi miiwie waa koni mɛi nɛɛ ana akɛ bo otsu mi.’ Kɛkɛ ni ekɛ gbee ni wa bo ekɛɛ: “Lazaro, jee kpo!” Nɔ ko ni yɔɔ naakpɛɛ ba: Lazaro je kpo kɛjɛ gbonyobu lɛ mli, ní akɛ mamai ebala lɛ. Yesu wie akɛ: “Nyɛfɛnea lɛ ni nyɛhãa eyaa.”

Mɛi ni na naakpɛɛ nii nɛɛ ateŋ mɛi pii he Yesu nɔ amɛye. Shi mɛi komɛi tee ni amɛyakɛɛ Farisifoi lɛ. Kɛjɛ nakai gbi lɛ nɔ kɛyaa lɛ, Farisifoi lɛ kpɛ amɛyiŋ akɛ amɛbaagbe Lazaro kɛ Yesu fɛɛ. Yuda Iskariot, ni ji bɔfoi 12 lɛ ateŋ mɔ kome, tee Farisifoi lɛ aŋɔɔ nigii ni eyabi amɛ akɛ: ‘Kɛ́ miye mibua nyɛ ni nyɛnine shɛ Yesu nɔ lɛ, shika enyiɛ nyɛbaahã mi?’ Amɛkpɛlɛ akɛ amɛbaahã lɛ jwiɛtɛi kapɛji 30. No hewɔ lɛ, Yuda tao hegbɛ ni sa koni ejie Yesu ehã Farisifoi lɛ.