NIKASEMƆ 11

Bɔ Ni Ooofee Oná Biblia Lɛ He Sɛɛ Jogbaŋŋ

Nɔ Ni Aprinti

Ŋɔɔ lɛ akɛ, ootao otsu nitsumɔ wulu ko, shi oonu he akɛ ewa tsɔ, mɛni obaafee? Ekolɛ obaajara mli bibiibibii ni otsu lɛ fiofio. Nakai nɔŋŋ ekolɛ obaanu he akɛ Biblia lɛ kanemɔ wa. Ekolɛ obaabi ohe akɛ, ‘Te mafee tɛŋŋ maje ekanemɔ shishi lɛ?’ Yɛ nikasemɔ nɛɛ mli lɛ, obaana nibii komɛi ni waaa ni obaanyɛ ofee koni osumɔ Biblia lɛ kanemɔ kɛ ekasemɔ.

1. Mɛni hewɔ esa akɛ wɔkane Biblia lɛ daa lɛ?

Kɛ́ mɔ ko kaneɔ Biblia lɛ, loo “Yehowa mla lɛ” daa lɛ, ebaaná miishɛɛ ni nɔ fɛɛ nɔ ni efeɔ lɛ baaye omanye. (Kanemɔ Lala 1:1-3.) Kɛ́ oosumɔ lɛ, obaanyɛ okane minitii fioo daa gbi kɛje shishi. Be ni oyaa nɔ oleɔ nibii ni yɔɔ Nyɔŋmɔ Wiemɔ lɛ mli lɛ, obaasumɔ ekanemɔ waa.

2. Mɛni baawa bo ni oná Biblia lɛ ni okaneɔ lɛ he sɛɛ?

Kɛ́ wɔkane Biblia lɛ fioo lɛ, esa akɛ wɔwa ni wɔsusu nɔ ni wɔkane lɛ he bɔ ni afee ni wɔná he sɛɛ waa. Enɛ tsɔɔ akɛ, esa akɛ wɔkane ni ‘wɔjwɛŋ nɔ.’ (Yoshua 1:8) Kɛ́ ookane lɛ, bi ohe saji tamɔ: ‘Mɛni enɛ hãa mileɔ yɛ Yehowa Nyɔŋmɔ he? Te mafee tɛŋŋ mikɛ enɛ atsu nii yɛ mishihilɛ mli? Te mafee tɛŋŋ mikɛ ŋmalɛi nɛɛ aye abua mɛi krokomɛi?’

3. Mɛni obaanyɛ ofee koni oná be kɛkane Biblia lɛ?

Ani ewa kɛhã bo akɛ obaaná be kɛkane Biblia lɛ? Ewa kɛhã wɔteŋ mɛi babaoo. Bɔɔ mɔdɛŋ ni ‘okɛ obe atsu nii jogbaŋŋ.’ (Efesobii 5:16) Nɔ ni obaanyɛ ofee ji, ni obaato be pɔtɛɛ ko kɛkane Biblia lɛ daa gbi. Mɛi komɛi kaneɔ lɛ leebi maŋkpa. Mɛi komɛi hu kaneɔ lɛ sɛɛ mli yɛ gbi lɛ mli, ekolɛ be ni amɛba shwane hejɔɔmɔ. Ni mɛi komɛi hu kaneɔ lɛ gbɛkɛ dani amɛyawɔɔ. Kɛ́ okwɛ lɛ, mɛɛ be baahi ehã bo?

KASEMƆ PII OFATA HE

Obaana nɔ ni obaanyɛ ofee koni Biblia lɛ kanemɔ aŋɔɔ onaa. Agbɛnɛ hu, obaana bɔ ni obaafee osaa ohe jogbaŋŋ kɛtsɔ hiɛ, koni oná Biblia lɛ ni akɛ bo kaseɔ lɛ he sɛɛ.

Mfonirii ni ato naa: Fiofio lɛ, gbekɛ nuu ko ebasumɔ niyenii pɔtɛɛ ko yeli. 1. Gbekɛ nuu lɛ kɛ niyenii lɛ miishwɛ. 2. Gbekɛ nuu lɛ hiɛ efa fioo, ni eeye niyenii lɛ. 3. Gbekɛ nuu lɛ hiɛ efa, ni eeye niyenii lɛ kɛ miishɛɛ. — Bɔ ni fiofio lɛ, wɔbaleɔ niyenii srɔtoisrɔtoi yeli lɛ, nakai nɔŋŋ fiofio lɛ, Biblia lɛ kanemɔ baaŋɔɔ wɔnaa

4. Bɔ ni obaafee osumɔ Biblia lɛ kanemɔ

Ekolɛ onáŋ lɛ mlɛo akɛ obaaje Biblia lɛ kanemɔ shishi. Shi tamɔ bɔ ni mɔ ko kaseɔ niyenii hee ko yeli lɛ, nakai nɔŋŋ obaanyɛ ohã Biblia lɛ kanemɔ ‘aba otsine.’ Nyɛkanea 1 Petro 2:2 lɛ, ni nyɛsusua sanebimɔ nɛɛ he:

Kɛ́ okwɛ lɛ, kɛ́ okane Biblia lɛ daa gbi lɛ, ani ekanemɔ baaŋɔɔ onaa ni obaasumɔ ni okane daa?

Jiemɔ VIDIO lɛ ni okwɛ bɔ ni fee ni Biblia lɛ kanemɔ baŋɔɔ mɛi komɛi anaa. No sɛɛ lɛ, nyɛsusua sanebimɔi ni nyiɛ sɛɛ nɛɛ ahe.

VIDIO: Bɔ Ni Fee Ni Oblahii Kɛ Oblayei Komɛi Ná Nyɔŋmɔ Wiemɔ Lɛ Kanemɔ He Miishɛɛ (5:33)

Mɛɛ naagbai oblahii lɛ kɛ oblayei lɛ ye nɔ?
Mɛni wa amɛ ni amɛtee nɔ amɛkane Biblia lɛ daa?
Mɛni amɛfee ni hã Biblia lɛ kanemɔ baŋɔɔ amɛnaa?

Otii ni baawa bo ni onyɛ oje shishi:

Halamɔ Biblia ni akɛ wiemɔi ni shishinumɔ waaa etsɔɔ shishi jogbaŋŋ. Kɛji Jeŋ Hee Shishitsɔɔmɔ lɛ eko yɛ owiemɔ mli lɛ, kaa okwɛ.
Okɛ Biblia mli wolo ni osusuɔ akɛ obaanya he waa lɛ aje shishi. Ehe ŋaawoi krokomɛi yɛ akrabatsa ni ji, “Bɔimɔ Biblia Lɛ Kanemɔ” lɛ mli.
Kadimɔ nɔ ni okane momo lɛ. Okɛ akrabatsa ni ji, “Kadimɔ Nɔ Ni Okane Lɛ” ni yɔɔ wolo nɛɛ mli lɛ atsu nii.
Okɛ JW Library^® app lɛ atsu nii. Kɛ́ eko yɛ ofoŋ, tablɛt, loo ilɛtrɔnik tsɔne kroko nɔ lɛ, obaanyɛ okane Biblia lɛ loo obo erikɔdiŋ toi yɛ he fɛɛ he.
Okɛ saji krokomɛi ni yɔɔ Jeŋ Hee Shishitsɔɔmɔ lɛ mli lɛ atsu nii. Map srɔtoi, akrabatsai, kɛ wiemɔi titrii amligbalamɔi yɛ jɛmɛ ni baanyɛ ahã onikanemɔ lɛ aŋɔɔ.

5. Saamɔ ohe kɛhã o-Biblia mli nikasemɔ lɛ

Nyɛkanea Lala 119:34 lɛ, ni nyɛsusua sanebimɔ nɛɛ he:

Mɛni hewɔ ehi akɛ obaasɔle dani okane Biblia lɛ loo osaa ohe kɛhã o-Biblia mli nikasemɔ lɛ?

Mɛni esa akɛ ofee koni oná o-Biblia mli nikasemɔi lɛ eko fɛɛ eko he sɛɛ waa? Obaanyɛ otsɔ gbɛ ni nyiɛ sɛɛ nɛɛ nɔ osaa ohe kɛhã nikasemɔi lɛ eko fɛɛ eko:

A. Kanemɔ kukuji ni akɛjeɔ nikasemɔ lɛ shishi lɛ.
B. Gbelemɔ ŋmalɛi lɛ ni okane, ni okwɛ akɛ obaanu bɔ ni amɛkɔɔ sane lɛ he lɛ shishi lo.
D. Kɔlamɔ wiemɔi pɛ ni hãa sanebimɔi lɛ eko fɛɛ eko hetoo lɛ, loo folɔmɔ amɛshishi; enɛ baawa bo be ni okɛ otsɔɔlɔ lɛ gbaa sane lɛ.

Mfonirii ni ato naa: Yoo ko miisaa ehe dani akɛ lɛ akase nii. A. Eekane nikasemɔ lɛ klɛŋklɛŋ baafa lɛ. B. Eekane ŋmalɛi ni atsɛ yisɛɛ lɛ. D. Eekɔla wiemɔi pɛ ni hãa sanebimɔi lɛ hetoo lɛ.

Ani ole akɛ . . .

Yehowa Odasefoi kɛ Biblia shishitsɔɔmɔi srɔtoi tsuɔ nii? Shi wɔsumɔɔ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ waa, ejaakɛ atsɔɔ shishi jogbaŋŋ, eshishinumɔ waaa, ni akɛ Nyɔŋmɔ gbɛ́i lɛ etsu nii yɛ mli.—Kwɛmɔ jw.org lɛ nɔ sane ni yitso ji, “Ani Yehowa Odasefoi yɛ Amɛ Diɛŋtsɛ Amɛ-Biblia?” lɛ.

MƐI KOMƐI KƐƆ AKƐ: “Biblia lɛ kasemɔ wa tsɔ. Mináŋ dekã kɛkase, loo etɔɔ mi fe bɔ ni manyɛ makase.”