NIKASEMƆ 37

Nɔ Ni Biblia Lɛ Wieɔ Yɛ Nitsumɔ Kɛ Shika He

Nɔ Ni Aprinti

Ani oye otsui yɛ nitsumɔ loo shika he pɛŋ? Ebɛ mlɛo akɛ wɔbaatsu nii kɛkwɛ wɔhe ni nakai beiaŋ nɔŋŋ lɛ, wɔjá Yehowa bɔ ni ekpaa gbɛ lɛ. Enɛ he ŋaawoi kpakpai yɛ Biblia lɛ mli.

1. Mɛni Biblia lɛ wieɔ yɛ nitsumɔ he?

Nyɔŋmɔ sumɔɔ ni wɔnitsumɔ ahã wɔná miishɛɛ. Biblia lɛ kɛɛ “nɔ kpakpa ko bɛ kɛhã gbɔmɔ fe enɛ, akɛ . . . ená nii ni etsuɔ waa lɛ mli ŋɔɔmɔ.” (Jajelɔ 2:24) Yehowa tsuɔ nii waa. Kɛ́ wɔkase lɛ ni wɔtsu nii waa lɛ, wɔbaahã ená miishɛɛ ni wɔtsui baanyɔ wɔmli.

Nitsumɔ he hiaa. Shi esaaa akɛ wɔhãa nitsumɔ he hiaa wɔ fe jamɔ ni wɔbaajá Yehowa lɛ kɔkɔɔkɔ. (Yohane 6:27) Ewo shi akɛ, kɛ́ wɔhã jamɔ ni wɔbaajá lɛ lɛ he hia wɔ fe nɔ fɛɛ nɔ lɛ, ebaahã wɔ wɔhiamɔ nii.

2. Te esa akɛ wɔna shika wɔhã tɛŋŋ?

Biblia lɛ kɛɛ “shika buɔ mɔ he,” shi ebɔɔ wɔ kɔkɔ hu akɛ, shika pɛ hãŋ wɔná miishɛɛ. (Jajelɔ 7:12) Enɛ hewɔ lɛ, Biblia lɛ woɔ wɔ hewalɛ ni wɔkasumɔ shika, shi moŋ ‘wɔmii ashɛ nibii ni wɔyɔɔ amrɔ nɛɛ ahe.’ (Kanemɔ Hebribii 13:5) Kɛ́ wɔmii shɛ nibii ni wɔyɔɔ lɛ ahe lɛ, wɔyeŋ wɔtsui be fɛɛ be akɛ nɔ ni wɔyɔɔ lɛ faaa bɔ ni sa. Wɔfiliŋ nii kɛkɛ ni wɔyafaŋ shika kɛkɛ. (Abɛi 22:7) Wɔkɛ wɔhe woŋ asɔshwɛmɔ mli, ni wɔkɛ wɔshika hu woŋ nifeemɔi ni akɛɛ ehãa mɔ náa shika oya lɛ amli. Ni wɔnáŋ naagbai ni jɛɔ nibii nɛɛ amli kɛbaa lɛ eko.

3. Mɛɛ gbɛ nɔ wɔbaanyɛ wɔkɛ wɔshika afee ejurɔ?

Yehowa ji Nyɔŋmɔ ni feɔ ejurɔ waa, hewɔ lɛ kɛ́ ‘wɔfee ejurɔ, ni wɔsumɔ nihãmɔ’ lɛ, belɛ wɔmiikase lɛ ji no. (1 Timoteo 6:18) Kɛ́ wɔkɛ wɔshika fĩ asafo lɛ sɛɛ ni wɔkɛye wɔbua mɛi ni ehia amɛ, titri lɛ, wɔnyɛmimɛi Kristofoi lɛ, no tsɔɔ akɛ, wɔkɛ wɔshika miifee ejurɔ. Jeee shika abɔ ni wɔkɛfeɔ ejurɔ lɛ Yehowa kwɛɔ, shi moŋ nɔ hewɔ ni wɔfeɔ lɛ. Kɛ́ wɔjɛ wɔtsuiŋ wɔfee ejurɔ lɛ, wɔmii baashɛ wɔhe, ni Yehowa hu baaná wɔhe miishɛɛ.—Kanemɔ Bɔfoi 20:35.

KASEMƆ PII OFATA HE

Obaana nɔ hewɔ ni esa akɛ wɔná jwɛŋmɔ ni ja yɛ nitsumɔ he, ni wɔmii ashɛ nibii ni wɔyɔɔ lɛ ahe hu lɛ.

4. Tsɔ bɔ ni otsuɔ nii ohãa lɛ nɔ owo Yehowa hiɛ nyam

Esa akɛ naanyobɔɔ ni yɔɔ wɔ kɛ Yehowa teŋ lɛ asa bɔ ni wɔfeɔ wɔnii wɔhãa yɛ nitsumɔ he lɛ he. Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

VIDIO: Okɛ Osusuma Muu Fɛɛ Asɔmɔ Yehowa (4:39)

Mɛni osumɔɔ waa yɛ bɔ ni Jason baa ejeŋ ehãa yɛ he ni etsuɔ nii lɛ yɛ lɛ he?
Mɛni efee ni tsɔɔ akɛ ehiɛ jwɛŋmɔ ni ja yɛ nitsumɔ he?

Nyɛkanea Kolosebii 3:23, 24 lɛ, ni nyɛsusua sanebimɔ nɛɛ he:

Mɛni hewɔ bɔ ni wɔfeɔ wɔnii wɔhãa yɛ nitsumɔ he lɛ he hiaa lɛ?

Mfonirii ni ato naa: Nuu ko eha enitsumɔ efee nɔ ni he hiaa lɛ fe nɔ fɛɛ nɔ. 1. Eetsu nii yɛ ɔfis yɛ gbi lɛ mli. 2. Eetsu nii yɛ ɔfis be ni je ena. 3. Mɛi ni ekɛtsuɔ nii lɛ etee shia, shi eetsu nii lolo. 4. Etee shia, ni ekome too eeye gbɛkɛ niyenii.

Nitsumɔ he hiaa. Shi esaaa akɛ wɔhãa nitsumɔ he hiaa wɔ fe jamɔ ni wɔbaajá Yehowa lɛ kɔkɔɔkɔ

Mfonirii ni ato naa: Nakai nuu lɛ nɔŋŋ ena deka eha nibii ni he hiaa waa. 1. Eetsu nii yɛ ɔfis yɛ gbi lɛ mli. 2. Be ni esa akɛ akpa nitsumɔ eshɛ, ni ekpa eeya shia. 3. Atee asafoŋ kpee, ni ewo enine nɔ. 4. Ekɛ eŋa kɛ ebii enyɔ lɛ efee ekome kɛmiiye gbɛkɛ niyenii.

5. Ehi akɛ wɔmii baashɛ nibii ni wɔyɔɔ lɛ ahe

Mɛi pii bɔɔ mɔdɛŋ koni amɛná shika pii. Shi esoro ŋaa ni Biblia lɛ woɔ wɔ yɛ shika he. Nyɛkanea 1 Timoteo 6:6-8 lɛ, ni nyɛsusua sanebimɔ nɛɛ he:

Mɛɛ ŋaa Biblia lɛ woɔ wɔ?

Kɛ́ wɔbɛ nɔ ko tsɔ po lɛ, wɔmii baanyɛ ashɛ wɔhe. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

VIDIO: ‘Omii Ashɛ Nibii Ni Yɔɔ Amrɔ Nɛɛ He’ (3:20)

Eyɛ mli akɛ wekui nɛɛ bɛ shika tsɔ moŋ, shi mɛni hewɔ amɛyɔɔ miishɛɛ lɛ?

Shi kɛ́ wɔyɛ nii, ni loloolo lɛ wɔmiitao pii wɔfata he hu? Yesu gba nɔkwɛmɔnɔ ko kɛbɔ kɔkɔ yɛ he. Nyɛkanea Luka 12:15-21 lɛ, ni nyɛsusua sanebimɔ nɛɛ he:

Mɛni okase yɛ Yesu nɔkwɛmɔnɔ lɛ mli?—Kwɛmɔ kuku 15 lɛ.

Nyɛkanea Abɛi 10:22 kɛ 1 Timoteo 6:10 lɛ, ni nyɛkɛ ekome ato ekroko lɛ he. No sɛɛ lɛ, nyɛsusua sanebimɔi nɛɛ ahe:

Te nibii enyɔ nɛɛ ateŋ nɔ ni he hiaa waa? Naanyo ni okɛ Yehowa baabɔ aloo shika pii ni obaaná? Mɛni hewɔ okɛɔ nakai?
Kɛ́ be fɛɛ be nɛɛ wɔmiitao wɔná shika pii lɛ, mɛɛ naagbai wɔkɛbaakpe?

6. Yehowa baahã wɔ nibii ni he hiaa wɔ

Kɛ́ wɔkɛ naagbai miikpe yɛ nitsumɔ gbɛfaŋ loo wɔbɛ shika tsɔ lɛ, no baanyɛ ahã wɔna kɛji wɔheɔ Yehowa wɔyeɔ. Jiemɔ VIDIO lɛ koni ona nɔ ni wɔbaanyɛ wɔfee kɛ́ wɔkɛ naagbai nɛɛ kpe, ni nyɛsusua sanebimɔi ni nyiɛ sɛɛ nɛɛ ahe.