Tsuishiŋmɛɛ Yɛ Miishɛɛ Mli Yɛ Yiwaa Fɛɛ Sɛɛ
“Nyɛhaa wɔnyaa beni wɔyɔɔ amanehului amli, akɛni wɔle akɛ amanehulu kɛ tsuishiŋmɛɛ baa; ni tsuishiŋmɛɛ hu, nɔkpɛlɛmɔ shidaamɔ; nɔkpɛlɛmɔ shidaamɔ hu, hiɛnɔkamɔ, ni hiɛnɔkamɔ lakaaa mɔ.”—Romabii 5:3-5, NW.
1. Mɛni anaa yɛ yi ni awaa Kristofoi yɛ nɛkɛ “naagbee gbii” nɛɛ amli lɛ hewɔ?
1 YEHOWA webii aniiashikpamɔi yɛ nɛkɛ “naagbee gbii” nɛɛ amli lɛ eha Yesu wiemɔi lɛ efee anɔkwale: “Ajɔɔnyɛ, kɛji mɛi aaanyɛnyɛ, ni amɛkɛnyɛ aaatserɛ mIi ni amɛaajɛnyɛ, ni amɛaagbe nyɛgbɛi akɛ gbɛi fɔŋ yɛ gbɔmɔ bi lɛ hewɔ lɛ. Nyɛnyaa yɛ nakai gbi lɛ nɔ ni nyɛtumɔa; ejaakɛ naa, nyɛnyɔmɔwoo fa yɛ ŋwɛi; ejaakɛ nakai nɔŋŋ amɛtsɛmɛi lɛ fee gbalɔi lɛ.” (Luka 6:22, 23; 2 Timoteo 3:1) Hɛɛ, Nyɔŋmɔ tsuji baanyɛ ato amɛtsui shi yɛ yiwaa sɔrɔtoi fɛɛ mli yɛ anɔkwayeli mli, ni amɛfee nakai hu yɛ miishɛɛ mli.
2. (a) Ani mɛi ni awaa amɛ yi babaoo lɛ nine shɛɔ nyɔmɔwoo ko ni da nɔ? (b) Mɛni ji sɛɛnamɔi ni jɛɔ tsui shi ni aŋmɛɔ yɛ yiwaa mli yɛ omanyeyeli mli baa lɛ ekomɛi?
2 Jeee akɛ wɔmii shɛɔ yiwaa he, ejaakɛ yiwaa eŋɔɔɔ ni ekɛ piŋmɔ baa. Jeee yiwaa lɛ diɛŋtsɛ, shi moŋ nɔ ni baajɛ mli aba lɛ ji nɔ ni haa wɔnaa miishɛɛ. (Yakobo 1:2, 3) Kristofoi sumɔɔɔ ni awa amɛ yi. Amɛbɔɔɔ mɔdɛŋ akɛ amɛaafee amɛhe lá odasefoi, ni amɛmiisusu akɛ amɛtsuishiŋmɛɛ babaoo yɛ yiwaa shishi lɛ haa amɛfeɔ mɛi ni sa yɛ amɛ-ŋwɛi Tsɛ lɛ hiɛ. Mɛi ni awaa amɛ yi babaoo lɛ anine shɛɛɛ nyɔmɔwoo ni da nɔ, ni asaŋ etsɔɔɔ hu akɛ amɛyeɔ anɔkwale babaoo fe mɛi ni amɛnine eshɛ yiwaa ni faaa nɔ lɛ. Shi kadimɔ yibii ni baa be mli ni Kristofonyo lɛ eŋmɛ etsui shi yɛ amanehulu mli yɛ omanyeyeli mli lɛ: “Amanehulu lɛ tsɛɔ tsuishiŋmɛɛ kɛbaa; ni tsuishiŋmɛɛ hu, nɔkpɛlɛmɔ shidaamɔ; ni nɔkpɛlɛmɔ shidaamɔ hu, hiɛnɔkamɔ, ni hiɛnɔkamɔ lakaaa mɔ.”—Romabii 5:3-5, NW.
3. Taakɛ atsɔɔ yɛ Romabii 5:3 lɛ, yɛ mɛɛ gbɛ nɔ amanehului kɛ tsuishiŋmɛɛ baa? (b) Enɛ woɔ wɔhemɔkɛyeli hewalɛ yɛ mɛɛ gbɛ nɔ? (Hebribii 10:38, 39)
3 Kɛ wɔkane yiwaa ni wɔnanemɛi Kristofoi lɛ ekomɛi miitsɔ mli bianɛ yɛ hei krokomɛi ahe sane lɛ, ebaaha wɔsusu akɛ, “Ani manyɛ maŋmɛ mitsui shi yɛ enɛ mli?” Shi kɛ shitee kɛ woo loo kaai ba wɔnɔ trukaa, ni agbɛnɛ ni wɔɔŋmɛɛ Nyɔŋmɔ sɔɔmɔ he aloo wɔɔjo foi kɛjɛ eŋɔɔ lɛ, wɔtsɔ wɔhe kɛtee eŋɔɔ kɛha yelikɛbuamɔ lɛ, wɔnaa akɛ ehaa wɔsɔlemɔi ahetoo, ni wɔyooɔ bɔ ni amanehului kɛ tsuishiŋmɛɛ baa lɛ. Kɛkɛ lɛ wɔsusuuu akɛ ani wɔɔnyɛ wɔŋmɛ wɔtsui shi yɛ mli lo lɛ he; wɔle akɛ wɔbaanyɛ, yɛ Yehowa hewalɛ naa. Ekolɛ klɛŋklɛŋ kaa lɛ efeŋ nɔ ni mli wa tsɔ, shi kɛ̃lɛ, aka wɔhemɔkɛyeli akwɛ, ni emli wa ni ebaanyɛ edamɔ naa. Ekolɛ kaa ni nyiɛ sɛɛ lɛ mli baawa fe klɛŋklɛŋ nɔ lɛ, shi wɔhemɔkɛyeli mli ewa, ejaakɛ wɔjooo foi kɛjɛɛɛ tsutsu nɔ lɛ naa. No hewɔ lɛ wɔbaanyɛ wɔkpee wɔhemɔkɛyeli kaa lɛ naa yɛ Yehowa hewalɛ mli, akɛni wɔle akɛ eŋmɛŋ gbɛ ni aka wɔ fe bɔ ni wɔbaanyɛ; ni asaŋ ‘ekwaŋ wɔ.’—1 Korintobii 10:13; 2 Korintobii 4:8-10.
4. Mɛɛ yiŋtooi diɛŋtsɛ hewɔ ni wɔnaa miishɛɛ yɛ be mli ni wɔŋmɛ wɔtsui shi yɛ kaai loo yiwaa mli yɛ omanyeyeli mli lɛ?
4 Wɔbaanyɛ wɔdamɔ tsuishiŋmɛɛ yɛ amanehulu mli nɔ wɔha wɔmli afili wɔ diɛŋtsɛ. Wɔbaanyɛ wɔnya akɛ wɔŋmɛɛɛ wɔhe yɛ kaa shishi, shi moŋ wɔmɔ nɔ ni ja lɛ mli kpɛŋŋ. Wɔle akɛ enɛ ji nɔ ni Nyɔŋmɔ kpɛlɛɔ nɔ, no hewɔ lɛ wɔtsuishiŋmɛɛ yɛ omanyeyeli mli lɛ kɛwɔ ebɛŋkɛ ehe kpaakpa, ni enɛ hu ji nɔ ko ni wɔbaanyɛ wɔdamɔ nɔ wɔna miishɛɛ, taakɛ atsɔɔ mli yɛ faŋŋ mli yɛ Yakobo 1:12 lɛ.
Yiwaa Yɛ Gbɛi Sɔrɔtoi Anɔ
5. Te shihilɛ lɛ yɔɔ tɛŋŋ yɛ maji babaoo mli ŋmɛnɛ yɛ yiwaa kɛ naagbai ni akɛbaa wɔnyɛmimɛi lɛ anɔ lɛ hewɔ? Mɛni hewɔ eyɔɔ nakai? (Amos 7:10-17)
5 Ŋmɛnɛ, atsi Yehowa Odasefoi anitsumɔ lɛ naa yɛ shikpɔji fe 40 nɔ, ni ehe ebahia ni Nyɔŋmɔ webii lɛ aŋmɛ amɛtsui shi yɛ kaai kɛ yiwaai ni mli wawai ashishi yɛ hei sɔrɔtoi babaoo akɛni amɛtswa amɛfai shi akɛ amɛbaasɔmɔ amɛ-Nyɔŋmɔ ni ji Yehowa, yɛ anɔkwayeli mli lɛ hewɔ. Hei pii yɛ ni jamɔ mli hiɛnyiɛlɔi lɛ, ni male wɔhe ni wɔkɛwooo maŋkwramɔ mli lɛ ji mɛi ni tsirɛ nɔyeli lɛ yisɛɛ ni agu sɔɔmɔ nitsumɔ lɛ yɛ hei sɔrɔtoi babaoo bɔni afee ni amɛha wɔkpa wɔshiɛmɔ nitsumɔ lɛ. Shi maŋ lɛ mli onukpai ni le nɔ ni yaa nɔ lɛ le akɛ Yehowa Odasefoi jeee maŋjwalɔi aloo mɛi ni he yɔɔ oshara kɛha Maŋ lɛ yɛ gbɛ ko nɔ. Maŋ lɛ mli onukpai ni le nii lɛ le akɛ Odasefoi lɛ ji mɛi ni kɛ amɛhenilee tsuɔ nii, maŋbii ni boɔ mla toi ni feɔ nɔ fɛɛ nɔ ni amɛaanyɛ ni hi fe fɛɛ ni amɛkɛbo maŋ lɛ mlai atoi. Shi kɛ̃lɛ, yɛ Yehowa Odasefoi agbɛfaŋ lɛ, amɛ heshibaa kɛha Nyɔŋmɔ baa klɛŋklɛŋ. No hewɔ lɛ, amɛkɛ amɛhe wooo maŋkwramɔ mli yɛ maŋ ko kwraa mli. No hewɔ lɛ kɛji akɛ sane ko ba Nyɔŋmɔ mlai ahe lɛ amɛ, tamɔ bɔfoi lɛ, “boɔ Nyɔŋmɔ moŋ toi fe gbɔmɛi.”—Bɔfoi lɛ Asaji 5:29.
6. (a) Mɛni ji yiwaai ni Yehowa Odasefoi eŋmɛ amɛtsui shi yɛ mli lɛ ekomɛi? (b) Ani obaanyɛ ogba shihilɛ ko ni tamɔ nakai nɔŋŋ yɛ ŋmɛnɛŋmɛnɛ be nɛɛ mli?
6 Gbɔmɛi asafoi yuu ni yeee mla nɔ, yɛ bei komɛi amli lɛ, ní jamɔ mli osɔfoi loo mɛi ni eye maŋkwramɔ he sɛkɛ nyiɛ amɛhiɛ efee Yehowa webii efɔŋ babaoo yɛ hei sɔrɔtoi pii. Anyɛ wɔmumɔŋ nyɛmimɛi nɛɛ ateŋ mɛi pii anɔ ni amɛshi amɛshiai kɛ amɛ nibii ni amɛjo foi koni amɛkɛhere amɛyiwala, taakɛ eba yɛ nyɛsɛɛ afii nɛɛ amli yɛ Malawi kɛ Etiopia lɛ. Ashwie mɛi komɛi po kɛjɛ amɛnitsumɔ mli aloo awo amɛ foi kɛjɛ hei ni amɛtsuɔ nii yɛ, ni aha mɛi krokomɛi po eŋamɔ amɛnitsumɔi loo shwapoi akɛni amɛji Yehowa Odasefoi hewɔ. (Kpojiemɔ 13:16, 17) Átee hei ni amɛkpeɔ yɛ akɛ Kristofoi ni amɛkaseɔ Biblia lɛ ni afite nɛkɛ kpeei nɛɛ; atao amɛshiai amli áshɔ̃ Bibliai kɛ Biblia kasemɔ woji fɛɛ yɛ amɛdɛŋ. Anyɛ amɛnɔ ni awo amɛhe gbeyei koni amɛtsɔ no nɔ amɛha ŋmiŋmi amɔmɔ amɛ, ni amɔmɔ mɛi pii ni awo amɛ tsuŋ ni agbe amɛteŋ mɛi komɛi po. Yiwaa mli bawa titri yɛ jeŋ tai lɛ amli shi eeya nɔ bianɛ yɛ shikpɔji babaoo nɔ.
7. Yɛ shikpɔji ni nɔyelɔi waa nyɛmimɛi lɛ ayi waa yɛ jɛmɛ anɔ lɛ, mɛɛ shihilɛi nɛkɛ esa akɛ Nyɔŋmɔ webii pii aŋmɛ amɛtsui shi yɛ mli?
7 Wɔ nyɛmimɛi hii kɛ yei akpei babaoo hu kɛ shitee kɛ woo kɛ yiwaa ni jɛ amɛgbalashihilɛ weku lɛ kɛ wekumɛi krokomɛi aŋɔɔ kpeɔ daa gbi yɛ shikpɔŋ lɛ nɔ he fɛɛ he akɛni amɛsumɔɔ ni amɛsɔmɔ Yehowa akɛ Yesu Kristo kaselɔi hewɔ. Taakɛ Yesu gba fɔ shi lɛ: “Mɔ diɛŋtsɛ shiateŋbii aaatsɔmɔ ehenyɛlɔi.”—Mateo 10:35, 36.
Oti Ni Ma Yiwaa Hiɛ
8. Ani awaa Yehowa Odasefoi ayi akɛni amɛji efɔŋfeelɔi aloo mɛi ni kuɔ mla mli hewɔ?
8 Mɛi ni waa Nyɔŋmɔ webii ayi lɛ ahiɛ ka nɔ akɛ amɛbaaná mɛni? Ani amɛwaa Odasefoi lɛ ayi akɛni amɛji efɔŋfeelɔi loo awuyelɔi? Dabi. Ale Yehowa Odasefoi yɛ jeŋ fɛɛ akɛ gbɔmɛi ni boɔ mla toi ni yɔɔ jeŋba kpakpa. Amɛji nitsulɔi kpakpai, mɛi ni kɛ shihilɛ yɛ he kome ŋɔɔ, mɛi ni hiɛ naanyobɔɔ su, amɛmli hĩ, amɛhiɛ ka shi ni amɛfeee amɛnii tamɔ jamɔ he sɛkɛyelɔi. Yɛ anɔkwale amli lɛ, amɛji gbɔmɛi ni hi jogbaŋŋ ákɛ aaana amɛ akɛ kuuŋbii. (Tito 2:6-10; Galatabii 6:9, 10) Amɛsane lɛ toiŋjɔlɛ sane ni, ekɛ miishɛjemɔ bahaa mɛi ni ehao ni amɛyeɔ ŋkɔmɔ. Amɛshiɛɔ “sanekpakpa” lɛ akɛ etsɛŋ ni Nyɔŋmɔ maŋtsɛyeli lɛ baajie yiwalɔi fɛɛ kɛya ni ekɛ jalɛ gbɛjianɔtoo hee aba.—Mateo 6:10; Lala 37:10, 11.
9. Mɛɛ nitsumɔ nɛkɛ shitee kɛ wolɔi lɛ sumɔɔ ni wɔkpa lɛ, ni mɛni hewɔ?
9 Shi kɛ̃lɛ, “sanekpakpa” lɛ shiɛmɔ haa anaa Kristendom jamɔ mli hiɛnyiɛlɔi lɛ akɛ amɛbɛ hiɛnɔkamɔ sane ko kwraa kɛha gbɔmɛi lɛ. No hewɔ lɛ amɛbɔɔ mɔdɛŋ ni amɛmua mɛi ni shiɛɔ lɛ anaa! Yɛ be mli ni nɔyeli lɛ mli onukpai lɛ ateŋ mɛi komɛi hu ŋmɛɔ Yehowa webii lɛ agbɛ ni amɛhe nɔ ni amɛsumɔɔ lɛ amɛye lɛ, amɛtsiɔ amɛ gbɛ koni amɛkashiɛ kɛmiiha mɛi krokomɛi. Amɛtamɔ Yudafoi ajamɔ mli hiɛnyiɛlɔi lɛ ni kɛ mra be mli Kristofoi lɛ ni kɛ ekaa tsuɔ nii lɛ kpe lɛ, nɔ ni amɛkɛɔ ji akɛ: “Nyɛhaa wɔwoa amɛhe gbeyei, koni amɛkawie nɛkɛ [Yesu] gbɛi nɛɛ amli kɛmiitsɔɔ mɔ ko mɔ ko dɔŋŋ.” (Bɔfoi lɛ Asaji 4:17, 18) Hɛɛ, wɔ shiɛmɔ lɛ ji nɔ ni amɛsumɔɔ ni wɔkpa.—Kwɛmɔ Bɔfoi lɛ Asaji 5:28, 40 hu.
10. (a) Yɛ wɔshiɛmɔ nitsumɔ lɛ ni ebɔɔ mɔdɛŋ ni wɔkpa sɛɛ lɛ, mɛni hu Satan sumɔɔ ni efee? (b) Yɛ mɛɛ gbɛ nɔ anaa enɛ yɛ gbɛ ni atsɔɔ nɔ aguɔ wɔnitsumɔ lɛ mli?
10 Kaimɔ hu akɛ, mɔ krɛdɛɛ ni tsirɛɔ yiwaa lɛ sɛɛ ji Satan Abonsam. (1 Petro 5:8) Jeee akɛ eetao ni wɔkpa wɔ shiɛmɔ lɛ kɛkɛ, shi moŋ eetao ni egbɔjɔ wɔhemɔkɛyeli ni eha wɔku emuuyeli mli ni wɔhiɛ kɛha Nyɔŋmɔ lɛ mli, koni eha wɔlaaje naanɔ wala. No hewɔ lɛ oti kome ni fata yiwaa lɛ he ji ni efo wɔ kwraa kɛjɛ mumɔŋ niyenii kɛ wɔnyɛmimɛi ni wɔkɛ amɛaaabɔ yɛ kpeei ashishi lɛ he. No hewɔ lɛ kɛ agu wɔnitsumɔ lɛ, nɔ ni baa ji atsiɔ wɔshiɛmɔ nitsumɔ lɛ kɛ wɔkpeei anaa. Afɔɔ wɔ kɛɛmɔ akɛ, “Nyɛbaanyɛ nyɛfee Yehowa Odasefoi, shi nyɛkashiɛa aloo nyɛkakpea kwraa.” Shi kɛ̃lɛ kɛji akɛ wɔshiɛɛɛ ni asaŋ wɔkpeee hu lɛ, wɔnyɛŋ wɔfee Yehowa Nyɔŋmɔ loo Kristo Yesu odasefoi, ejaakɛ odasefonyo ni ewieee nɔ ko nɔ ko kwraa lɛ jeee odasefonyo kwraa. (Yesaia 43:10, 12; Bɔfoi lɛ Asaji 1:8) Ni mɛni baaba wɔhemɔkɛyeli nɔ kɛji akɛ wɔbooo Nyɔŋmɔ famɔ akɛ wɔ fɛɛ wɔkpe lɛ toi?—Hebribii 10:24, 25.
Tsui Shi Ni Atoɔ Yɛ Yiwaa Shishi
11. Te Kristofoi anɔkwafoi efee amɛnii yɛ yiwaa ni akɛbaa amɛnɔ lɛ shishi amɛha tɛŋŋ?
11 Te Nyɔŋmɔ tsuji ni yɔɔ ŋmɛnɛŋmɛnɛ beaŋ lɛ efee amɛnii yɛ yiwaa ni akɛbaa amɛnɔ lɛ shishi amɛha tɛŋŋ? Amɛtamɔ klɛŋklɛŋ Kristofoi lɛ, amɛsheee gbeyei, shi moŋ amɛkɛ ekãa etee nɔ yɛ shiɛmɔ nitsumɔ lɛ mli yɛ nitsumɔ lɛ ni aguɔ kɛ hegbeyeiwoo lɛ fɛɛ sɛɛ. Amɛtamɔ Paulo, amɛyɛ nɔ ni amɛbaadamɔ nɔ “ni amɛnya ni amɛmli afili amɛ.” Shi ni amɛdamɔɔ shiŋŋ yɛ Yehowa gbɛfaŋ yɛ sane lɛ he lɛ miiha aana Abonsam akɛ amalelɔ. Mɛɛ hegbɛ po ji enɛ akɛ mɔ aaana hegbɛ ni ena Yehowa gbɛi ni ahaa ejijeɔ lɛ mli gbɛfaŋnɔ!—Filipibii 2:17, 18; 2 Tesalonikabii 1:4, NW.
12. Ani nɔ ko yɛ ni wɔɔdamɔ nɔ wɔshe nɔ ni yiwalɔi aaawo wɔhe gbeyei yɛ he akɛ amɛaafee wɔ lɛ gbeyei?
12 Nɔ ko diɛŋtsɛ bɛ ni wɔbaadɔmɔ nɔ wɔshe mɛi ni waa wɔ yi lɛ gbeyei. Paulo ŋma Filipibii lɛ akɛ: “Nyɛbaa nyɛjeŋ bɔ ni sa . . . sanekpakpa lɛ kɛkɛ . . . ni nyɛkahaa henyɛlɔi lɛ miiwoa nyɛhe gbeyei yɛ nɔ ko nɔ ko mli, no nɔŋŋ [akɛni nyɛsheee amɛ gbeyei lɛ] ji hiɛkpatamɔ okadi ha amɛ, shi nyɛ lɛ eji walaheremɔ okadi ha nyɛ, ni enɛ jɛ Nyɔŋmɔ dɛŋ.”—Filipibii 1:27, 28.
13, 14. (a) Mɛni ji nɔ ni maŋ ko mli onukpai ni teɔ shi woɔ wɔ lɛ bɔ mɔdɛŋ ni amɛfee ni amɛha Yehowa Odasefoi ashe gbeyei? (b) Mɛni ji nɔ ni nɛkɛ niiashikpamɔi nɛɛ tsɔɔ diɛŋtsɛ?
13 Yɛ nyɛsɛɛ nɛɛ, yɛ Europa maŋ ko ni mla ebuuu Yehowa Odasefoi anitsumɔ lɛ he lɛ ekome mli lɛ, amɔ̃ nyɛmi nuu ko akɛni eha Biblia mli miishɛjemɔ wiemɔ ko yɛ yarafeemɔ shishi lɛ hewɔ. Amɔ̃ nyɛmi nuu ni sɔle lɛ hu. Maŋ lɛ mli onukpai lɛ kɛɛ akɛ gbɔmɛi ni Maŋ lɛ kɛ hegbɛ eha amɛ lɛ pɛ yɔɔ hegbɛ akɛ amɛwieɔ yɛ yarafeemɔi ashishi, ni ákɛ agu sɔlemɔ “ejaakɛ abaanyɛ atsɔ sɔlemɔ nɔ akɛtsɔɔ nii.” Amɔ nyɛmi nuu kroko yɛ nakai maŋ lɛ nɔŋŋ mli ejaakɛ eekane Biblia lɛ kɛmiitsɔɔ lɛ diɛŋtsɛ eweku. Akɛ naafolɔmɔ ko efɔ̃ɔɔ amɛnɔ. Atsi amɛnaa be fioo ko ni no sɛɛ lɛ aŋmɛɛ amɛhe. Eka shi faŋŋ akɛ oti lɛ ji ni awo amɛhe gbeyei ni amɛkpa.
14 Shi namɛi diɛŋtsɛ ji gbeyeishelɔi lɛ? Kɛji akɛ maŋ lɛ mli onukpai lɛ nuɔ he akɛ nuu kome ni miikane Biblia kɛmiitsɔɔ eweku aloo nyɛmi nuu kroko ni miiha maŋshiɛmɔ aloo eesɔle yɛ yarafeemɔ shishi lɛ miiwo amɛhe gbeyei lɛ, belɛ eji anɔkwale akɛ amɛmiishe Biblia mli sane lɛ kɛ mɛi ni shiɛɔ enɛ lɛ agbeyei waa diɛŋtsɛ! No hewɔ lɛ mɛni hewɔ esa akɛ wɔshe amɛ gbeyei? Taakɛ Paulo tsɔɔ lɛ, wɔ ekomefeemɔ kɛ ekãa lɛ “ji hiɛkpatamɔ okadi ha amɛ, shi nyɛ lɛ, eji walaheremɔ okadi hanyɛ.”—Filipibii 1:28.
15. Mɛɛ gbɛ nɔ bɔ ni wɔfeɔ wɔ nii yɛ hegbeyeiwoo shishi lɛ baanyɛ ana hewalɛ yɛ yiwaa ni aaaya nɔ lɛ nɔ?
15 Hei komɛi yɛ ni atsɛɔ “sanekpakpa” lɛ he shiɛlɔi lɛ kɛyaa polis station otsii komɛi amli koni awie atsɔɔ amɛ, ni akɛ toigbalamɔ ni mli wa woɔ amɛhe gbeyei kɛji akɛ amɛkpaaa Nyɔŋmɔ maŋtsɛyeli lɛ he shiɛmɔ. Shi yɛ be babaoo mli lɛ, kɛji akɛ nyɛmimɛi hii kɛ yei lɛ ku amɛhiɛ amɛshwie hegbeyeiwoo lɛ nɔ ni amɛkɛ ekãa tee nɔ yɛ amɛnitsumɔ lɛ mli lɛ, maŋ lɛ mli onukpai lɛ anijiaŋ jeɔ wui ni amɛshiɔ amɛ. Shi kɛji akɛ amɛna odaseyeli ko ni tsɔɔ gbɔjɔmɔ yɛ Maŋtsɛyeli lɛ he shiɛlɔi lɛ agbɛfaŋ lɛ, amɛyaa nɔ yɛ mɔdɛŋ ni amɛbɔɔ koni amɛwo amɛhe gbeyei lɛ mli.
Hekamɔ Yɛ Be Mli Ni Agu Nitsumɔ Lɛ
16, 17. (a) Mɛɛ mɔdɛŋ abɔɔ koni akɛ mumɔŋ niyenii ayaha nyɛmimɛi ni yɔɔ hei ni agu nitsumɔ lɛ yɛ lɛ, kɛ mɛi ni awo amɛ tsuŋ? (b) Mɛni hewɔ enɛ he hiaa lɛ?
16 Odasefoi ni yɔɔ maji ni agu nitsumɔ lɛ yɛ jɛmɛ ni atsi amɛ woji ajaa lɛ naa lɛ ahiɛ sɔɔ bɔ ni ehe hiaa akɛ amɛaana mumɔŋ niyenii yɛ be fɛɛ mli lɛ waa. Akɛni anyɛŋ afee Buu-Mɔɔ lɛ kɛ Yehowa Odasefoi awoji krokomɛi yɛ mIa naa ni akɛmaje kɛtsɔ post office kɛya maji komɛi anɔ hewɔ lɛ, atoɔ gbɛjianɔ krokomɛi koni aha mumɔŋ niyenii lɛ ashɛ mɔ fɛɛ mɔ dɛŋ. Yɛ Germany nɛkɛ, yɛ yiwaa be lɛ mli yɛ Hitler nɔyeli lɛ shishi lɛ, akala nɔ ni abaakase lɛ yɛ woji bibii anɔ, ni hei komɛi po yɛ ni akɛ niji ŋmalaa. Afeɔ enɛ hu yɛ shikpɔji babaoo nɔ ŋmɛnɛ. Kɛji akɛ nɔ ni yɔɔ lɛ faaa bɔ ni mɔ fɛɛ mɔ aaana enɔ lɛ, akɛbɔleɔ shi koni mɔ fɛɛ mɔ ana hegbɛ akane emli saji lɛ. Nɔ ni he hiaa lɛ ji ni ana mumɔŋ niyenii daa nɛɛ.—Mateo 4:4.
17 Niiashikpamɔ etsɔɔ akɛ Yehowa kudɔɔ saji yɛ be fɛɛ mli bɔni afee ni mumɔŋ niyenii lɛ aya gbɔmɛi lɛ aŋɔɔ yɛ shihilɛi po ni mli wawai ashishi. Atsɔɔ gbɛi sɔrɔtoi anɔ akɛyaa tsuŋwoo hei kɛ gboklɛfoi aŋsraŋ yɛ teemɔŋ. Ni mɛɛ hewalɛ po ewo mɛi ni atsi amɛ naa yɛ jɛmɛ lɛ nɛkɛ!
18. Mɛni hewɔ ehe hiaa waa akɛ wɔkɛ mɛi krokomɛi aaabua wɔhe naa ni wɔye mumɔŋ niyenii daa lɛ, ni mɛɛ gbɛ nɔ aaatsɔ afee enɛ yɛ shihilɛi ni mli wawai ashishi?
18 Kɛ aaahi lɛ, Nyɔŋmɔ tsuji anɔkwafoi lɛ yɛɔ mumɔŋ niyenii nɛɛ kutuu daa nɛɛ—eyɛ mli akɛ agu kpeei po ni awoɔ amɛ tsuŋ hu. Biblia ŋmalɛ he susumɔ daa gbi kɛ mɛi krokomɛi, kɛ aaanyɛ afee lɛ, gbalaa jwɛŋmɔ lɛ kɛyaa mumɔŋ nibii anɔ. Nibii ahe susumɔ kuku daa gbi po woɔ mumɔŋ hewalɛ babaoo.—Lala 1:2; Bɔfoi lɛ Asaji 17:11.
Bɔ Ni Kpeei Ahe Hiaa Ha
19. (a) Mɛɛ niiashikpamɔ ni akpaaa gbɛ wɔnyɛmimɛi pii ni yɔɔ Liberia lɛ na? (p) Taakɛ 1977 Yearbook lɛ amaniɛbɔɔ lɛ tsɔɔ lɛ, mɛni ye bua anɔkwafoi lɛ ni amɛnyɛ amɛŋmɛ amɛtsui shi?
19 Yɛ March 1963 mli, ni amɔ̃mɔ̃ gbɔmɛi aaafee 400 yɛ Gbarnga, Liberia, ni miiya Yehowa Odasefoi a-Kpokpaa Wulu nɔ Kpee, ni atsi amɛ naa gbii ejwɛ ni niyenii bɛ mli, yɛ asraafoi ashihilɛ he ko. Bɔni afee ni anyɛ amɛ nɔ ni amɛŋmɛɛ amɛjamɔŋ hemɔkɛyelii ahe amɛkasaa ni amɛŋa Liberia aflaŋaa lɛ hewɔ lɛ, afee Odasefoi lɛ niseniianii babaoo ni ahá amɛ nibii fɛɛ. Yɛ be mli ni amɛteŋ mɛi babaoo ŋmɛɛ he yɛ hegbeyeiwoo hewɔ lɛ, amɛteŋ mɛi fioo ko mɔ̃ amɛ emuuyeli lɛ mli. Kadimɔ nɔ ni awie yɛ 1977 Yearbook of Jehovah’s Witnesses lɛ mli yɛ baafa 176 lɛ: “Amɛjɛ shihilɛi sɔrɔtoi amli, mɛi ni leee woloŋ kɛ mɛi ni le woloŋ waa. Mɛi ni yɔɔ anɔkwafoi akuu lɛ mli lɛ ji mɛi ni yaa kpei be fɛɛ mli yɛ anɔkwayeli mli.”
20. Yɛ mɛɛ gbɛ nɔ mɛi pii miaa amɛhiɛ waa bɔni afee ni ‘amɛkakwa amɛhe naabuamɔ,’ yɛ mɛɛ osharai fɛɛ sɛɛ?
20 Nyɔŋmɔ Wiemɔ ni jɛ mumɔŋ lɛ woɔ wɔ ŋaa ni wɔkakwa wɔhenaabuamɔ. (Hebribii 10:24, 25) Bɔ ni enɛ he hiaa ha lɛ baaa shi yɛ yiwaa bei amli. Ehe baahia ni afee kpeei yɛ kui bibii amli yɛ mɛi ashiai amli; ehe baahia ni atsake hei kɛ bei ni ekolɛ ehiŋ kɛhaŋ mɛi komɛi, ni kpeei lɛ ekomɛi yɛ ni abaafee yɛ gbɛkɛ kwraa beni je ena waa. Shi kɛ̃lɛ, yɛ osharai nɛɛ fɛɛ asɛɛ lɛ, wɔnyɛmimɛi hii kɛ yei anɔkwafoi lɛ bɔɔ mɔdɛŋ ni amɛya kpeei nɛɛ fɛɛ. Ni nyɛmimɛi hii miisumɔ ni akɛ amɛshiai afee hei ni akpeɔ yɛ, eyɛ mli akɛ kɛ ana amɛ lɛ eeeha amɛlaaje amɛ heyeli.
21. (a) Mɛɛ hegbɛi yɔɔ ni aaaha wɔna mumɔŋ niyenii lɛ he sɛɛ babaoo yɛ shihilɛi ni tamɔ nɛkɛ shishi? (b) Mɛɛ ŋmaIɛi tsɔɔ bɔ ni ehe hiaa akɛ wɔɔya kpeei daa ni wɔkɛ wɔhe awo nɛkɛ kpeei nɛɛ amli?
21 Kpeei ni afeɔ yɛ kui bibii amli lɛ haŋ ni mɔ fɛɛ mɔ ana tsɔɔlɔi kpakpai ni yɔɔ asafo lɛ mli lɛ atsɔɔmɔ he sɛɛ, shi kɛ̃lɛ, hegbɛi babaoo baa ni mɔ fɛɛ mɔ baanyɛ ekɛ ehe awo kpeei nɛɛ amli ni ena kpeei lɛ ahe sɛɛ babaoo. Yɛ bei komɛi amli lɛ, kui ni dara baanyɛ akpe, ekolɛ yɛ hiɛtserɛjiemɔi komɛi ashishi, kpojee loo gbɛfaa kɛtsɔ nine ni afɔɔ atsɛɔ mɛi komɛi yɛ teemɔŋ lɛ nɔ. Kpeei nɛɛ ni aaaya yɛ be fɛɛ mli lɛ ji nɔ ko ni he hiaa yɛ ya ni amɛaaya nɔ ‘amɛmɔ amɛ hiɛnɔkamɔ ni amɛyɔɔ kɛjɛ shishijee lɛ mli kpɛŋŋ kɛyashi naagbee’ lɛ mli, bɔni afee ni amɛnyɛ amɛhiɛ amɛ emuuyeli mli ni amɛnine ashɛ shiwooi lɛ anɔ kɛtsɔ ‘amɛnijiaŋ ni ejeee wui’ lɛ nɔ.—Hebribii 3:14; 10:36; Galatabii 6:9.
Shiɛmɔ Yɛ Be Mli Ni Agu Nitsumɔ Lɛ
22. (a) Mɛni hewɔ ŋmɛnɛ Nyɔŋmɔ webii lɛ nyɛŋ amɛkpa nibii ni amɛna ni amɛnu lɛ ahe wiemɔ? (b) Te atsuɔ enɛ he nii yɛ hei krokomɛi ahaa tɛŋŋ?
22 Taakɛ bɔfoi lɛ ji lɛ, ŋmɛnɛ hu Yehowa webii ‘nyɛŋ akpa nibii ni amɛna ni amɛnu lɛ ahe wiemɔ.’ (Bɔfoi lɛ Asaji 4:20) Yesu kɛɛ akɛ “ni ja ashiɛ sanekpakpa lɛ atsɔɔ jeŋmaji fɛɛ da,” ni adesa ko loo daimonio najiaŋdamɔlɔ ko nyɛŋ atsi enɛ naa. (Marko 13:10) Hei komɛi yɛ ni atsi Yehowa Odasefoi anitsumɔ lɛ naa moŋ, shi amɛnyɛɔ amɛyaa shia kɛ shia akɛ gbɔmɛi aŋkroi ni amɛkɛ Biblia lɛ pɛ tsuɔ nii.
23, 24. (a) Te atsuɔ nitsumɔ lɛ he nii ahaa tɛŋŋ yɛ hei ni shia kɛ shia nitsumɔ lɛ ehiii feemɔ yɛ lɛ? (b) Ani obaanyɛ ogba niiashikpamɔi ni tsɔɔ akɛ nibii kpakpai ejɛ mli eba yɛ nɛkɛ gbɛ nɔ?
23 He ni ebahiŋ akɛ aaaya shia kɛ shia lɛ, anyɛɔ atsɔɔ gbɛi krokomɛi anɔ ashiɛɔ “sane kpakpa” lɛ. Anyɛɔ ayaa shikpɔŋkuku lɛ mli hei ni yɔɔ banee yɛ bei kɛ bei amli koni amɛkatsu shiai komɛi amli nii kɛmiitsara nɔ. Shi ehe ehiaaa ni wɔmɛ ni gbɔmɛi abote amɛshiai amli da. Wɔnyɛmimɛi miiye omanye yɛ shikpɔji babaoo nɔ yɛ gbɔmɛi ni amɛkɛ amɛ kpeɔ yɛ he fɛɛ he lɛ ni amɛshiɛɔ amɛhaa amɛ lɛ hewɔ—yɛ gbɛjegbɛi anɔ, yɛ fũu hei kɛ abɔɔi amli, aloo be mli ni aafagbɛ. Mɛi komɛi po efa gbɛ kɛtee hei ni Odasefoi bɛ akɛ mɛi ni jieɔ amɛhiɛtserɛ, ni amɛkɛ gbɔmɛi ni yɔɔ jɛmɛ lɛ jeɔ sanegbaa shishi kɛ hegbɛ lɛ ba. Gbɛ ko kwraa bɛ ni henyɛlɔ lɛ baanyɛ atsi wɔnaa ni wɔkawie yɛ nɛkɛ gbɛi sɔrɔtoi nɛɛ anɔ bei abɔ ni wɔyɔɔ wala mli ni gbɔmɛi hu ni wɔbaawie wɔtsɔɔ amɛ lɛ yɔɔ nɛɛ.
24 Hekamɔ eha Yehowa webii ahe esa yɛ sanegbaa ni ajeɔ shishi yɛ naanyobɔɔ su mli ni haa agbaa nibii sɔrɔtoi ahe sane lɛ mli, ni amɛtsɔɔ sanegbaa nɛɛ nɔ kɛyaboteɔ Biblia lɛ he susumɔ mli. Odasefonyo ko ni yɔɔ maŋ ko nɔ tsi bɛŋkɛ obalanyo kɛ obalayoo ko yɛ abɔɔ ko mli yɛ be mli ni amɛmiinu nu kɛmiijɛ faa ni ka abɔɔ lɛ mli lɛ. Odasefonyo lɛ bi amɛ kɛji akɛ amɛsumɔŋ ni amɛaale he ni nu ni hi fe nɔ ni amɛnuɔ lɛ yɔɔ. Kɛkɛ ni eje shishi egba amɛ wala nu yɛ Paradeiso lɛ he sane, ni amɛná sanegbaa ni tee nɔ aaafee ŋmlɛtswaai etɛ lɛ he sɛɛ. Nɔ ni jɛ mli ba ji Biblia mli nikasemɔ, ni nyɔji etɛ sɛɛ lɛ, obalanyo kɛ obalayoo nɛɛ je shishi amɛkɛ amɛhe wo sɔɔmɔ nitsumɔ lɛ mli. Abaptisi amɛ yɛ no sɛɛ afi mli, ni yɛ no sɛɛ lɛ nuu lɛ sɔmɔ akɛ asafoŋ sɔɔlɔ yɛ asafo lɛ mli.—Okɛto Yohane 4:7-15 he.
25. Mɛni esa akɛ wɔkwa, titri lɛ yɛ he ni agu wɔshiɛmɔ nitsumɔ lɛ yɛ lɛ?
25 Jwɛŋmɔ yɛ mli akɛ aaakwa ŋwane ni akɛ shitee kɛ wolɔi aaaje yɛ nitsumɔ nɛɛ mli. Agbɛnɛ hu esa akɛ wɔkwɛ wɔhe nɔ jogbaŋŋ koni wɔkajie teemɔŋ sane ko kpo wɔha henyɛlɔ lɛ akɛni amɛaabɔ mɔdɛŋ ni amɛnine ashɛ wɔnɔ kɛtsɔ naanyobɔɔ wiemɔ kɛ lakamɔ nɔ lɛ hewɔ. Wɔmiisumɔ ni wɔha Yesu ŋaawoo nɛɛ ahi wɔjwɛŋmɔ mli: “Naa, miitsunyɛ tamɔ too gwantɛŋi yɛ klaji ateŋ; no hewɔ lɛ nyɛhiɛ atɛ̃a tamɔ onufui, ni nyɛfea kpoo tamɔ okpoi.” (Mateo 10:16) Paulo hu wo ŋaa akɛ: “Kɛ aaahi lɛ, nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.”—Romabii 12:18.
Nibii Kpakpai Ni Ejɛ Emuuyeli Mli Hiɛmɔ Mli Eba
26. Mɛni ji nibii kpakpai ni ejɛ emuuyeli mli hiɛmɔ mli eba lɛ ekomɛi yɛ yiwaa ni mli wa lɛ fɛɛ sɛɛ?
26 Mɛɛ odaseyeli ni yɔɔ naakpɛɛ po mɛi fɛɛ ni amɛhiɛ amɛ emuuyeli mli, yɛ yiwaa ni mli wa lɛ fɛɛ sɛɛ eye kɛtsɔ yinɔi lɛ amli fɛfɛo nɛkɛ! Mɔdɛŋ ni Abonsam kɛ esamaŋfoi lɛ bɔɔ koni amɛtsi odaseyeli lɛ naa lɛ haa ayeɔ odase kpeteŋkpele moŋ akɛwoɔ Yehowa gbɛi lɛ hiɛ nyam. Ni mɛɛ gbɛfaŋnɔ ni yɔɔ naakpɛɛ akpei babaoo, hɛɛ, akpekpei abɔ ni amɛhiɛ amɛ emuuyeli mli yɛ yiwaa shishi, (ni amɛka he amɛhiɛ mli) lɛ ena nɛkɛ, koni amɛkɛtsɔɔ akɛ amalelɔ ji Abonsam, ni amɛkɛye hemɔkɛyeli ni amɛyɔɔ yɛ Yehowa mli ni amɛfoŋ mli lɛ kɛ suɔmɔ ni amɛyɔɔ kɛha lɛ lɛ he odase!
27. Mɛɛ sɛɛ wɔ diɛŋtsɛ lɛ wɔnaa kɛjɛɔ anɔkwayeli mli ni wɔŋmɛɔ wɔtsui shi yɛ kaai kɛ yiwaai amli lɛ mli?
27 Kɛ wɔŋmɛ wɔtsui shi yɛ anɔkwayeli mli lɛ, wɔnaa henilee kpakpa, ejaakɛ wɔle akɛ wɔfee nɔ ni ja ni akɛ wɔyɛ Yehowa hiɛ nɔkpɛlɛmɔ. Enɛ wajeɔ wɔhiɛnɔkamɔ, ni no hu haa wɔnaa miishɛɛ babaoo. Áka wɔhemɔkɛyeli akwɛ, ni akɛni wɔkpaleee kɛyaaa sɛɛ loo wɔjooo foi kɛjɛɛɛ yiwaa mli hewɔ lɛ, Yehowa ye ebua wɔ ni wɔŋmɛ wɔtsui shi. Nɔ ni ejɛ mli eba ji akɛ, wɔhemɔkɛyeli mli ewa fe tsutsu. Nɛkɛ ‘wɔhemɔkɛyeli ni aka akwɛ’ nɛɛ haa wɔnyɛɔ wɔkpeeɔ wɔsɛɛ be kaai anaa jogbaŋŋ.—1 Petro 1:6, 7.
28. (a) Mɛni hewɔ wɔnyɛmi yoo ni jɛ Finland lɛ baanyɛ ana miishɛɛ agbɛnɛ lɛ? (b) Mɛni baaya nɔ afee ehiɛnɔkamɔ?
28 Nyɛmi yoo ni atsi eta yɛ nikasemɔ ni tsɔ hiɛ lɛ shishijee mli lɛ na akɛ enɛ ji anɔkwale. Etee eyahi lɛ diɛŋtsɛ emaŋ ekoŋŋ, he ni eesɔmɔ yɛ akɛ daa gbɛgbalɔ (Maŋtsɛyeli shiɛlɔ ni kɛ ebe fɛɛ sɔmɔɔ) yɛ be ko mli nɛ. Eyɛ mli akɛ ebii lɛ bɛ ehewalɛ shishi dɔŋŋ, shi aŋmɛɔ lɛ gbɛ ni eyasara amɛ shii etɛ yɛ nyɔŋ kome mli, ni enyɛ ekɛ “sanekpakpa” lɛ eha amɛ ni nɔ ni jɛɔ mli baa lɛ woɔ mɔ hewalɛ. Ni namɔ le nɔ ni baajɛ mli aba yɛ naagbee? Odaseyelii babaoo diɛŋtsɛ yɛ ni tsɔɔ bɔ ni shi ni wɔnyɛmimɛi hii kɛ yei lɛ edamɔ yɛ anɔkwayeli mli lɛ efee shitee kɛ wolɔi kɛ yiwalɔi ni ehiii kwraa lɛ fɛo aahu akɛ no etsirɛ amɛ ni amɛkwɛ Biblia lɛ mli, ni yɛ naagbee lɛ amɛteŋ mɛi komɛi ebatsɔmɔ Yehowa jálɔi.
29. Mɛɛ hewalɛwoo kroko wɔ fɛɛ wɔyɔɔ ni no hewɔ esa akɛ wɔ fɛɛ wɔya nɔ wɔhi shi akɛ anɔkwafoi ni wɔmii ashɛ wɔhe yɛ yiwaa fɛɛ sɛɛ?
29 Yakobo ŋma akɛ: “Minyɛmimɛi, nyɛŋɔa gbalɔi ni wie yɛ Nuŋtsɔ lɛ gbɛi amli lɛ nyɛfea amanehulu kɛ tsuishiŋmɛɛ he okadi. Naa, wɔjɔɔ mɛi ni ŋmɛɔ amɛtsui shi lɛ.” (Yakobo 5:10, 11) Ni kɛ akɛ Kristofoi ni hi shi yɛ klɛŋklɛŋ afii oha lɛ mli lɛ kɛ mɛi ni yɔɔ ŋmɛnɛŋmɛnɛ beaŋ lɛ anɔkwɛmɔ nii kpakpai lɛ fata he lɛ, ewoɔ wɔ fɛɛ hewalɛ babaoo koni wɔnya yɛ yiwaa shishi.a
[Shishigbɛ niŋmai]
a Ajie kɛjɛ April 15, 1982 Blɔfo Buu-Mɔɔ lɛ mli
[Wiemɔ ni akɔ ni akɛmiitsu nii ni yɔɔ baafa 15]
“Naa, miitsunyɛ tamɔ too gwantɛŋi yɛ klaji ateŋ; no hewɔ lɛ nyɛhiɛ atɛ̃a tamɔ onufui, ni nyɛfea kpoo tamɔ okpoi” “Kɛ aaahi lɛ, nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.”—Mateo 10:16; Romabii 12:18.
[Mfonirii ni yɔɔ baafa 10]
Yesu kɛɛ akɛ: “Mɔ diɛŋtsɛ shiateŋbii aaatsɔmɔ ehenyɛlɔi”
[Mfoniri ni yɔɔ baafa 12]
Yehowa Odasefoi kpaaa shiɛmɔ beni agu nitsumɔ lɛ po