‘Nyɛyɛ Miishɛɛ Kɛ Gbɔmɛi Wanyɛ Yi’
“Ajɔɔnyɛ, kɛji ajɛnyɛ ni awanyɛ yi ni amale awie nyɛhe efɔŋ fɛɛ efɔŋ yɛ mihewɔ lɛ, nyɛnyaa ni nyɛmli afilianyɛ; shi nyɛ nyɔmɔwoo fa yɛ ŋwɛi.”—Mateo 5:11, 12.
1-4. Mɛɛ niiashikpamɔ baanyɛ atee sanebimɔi ashi yɛ wɔjwɛŋmɔ mli yɛ wɔmli ni aaashɛ wɔhe yɛ yiwaa shishi lɛ he?
1 ANI obaanyɛ ona miishɛɛ diɛŋtsɛ yɛ be mli ni gbɔmɛi maleɔ ohe ni amɛbɔɔ mɔdɛŋ akɛ amɛaafee nibii sɔrɔtoi fɛɛ ni amɛkɛye bo awui lɛ? Susumɔ obalayoo ko ni yɔɔ Finland ni je shishi ekɛ Yehowa Odasefoi kase Biblia lɛ afii fioo ni eho nɛ lɛ sane lɛ he. Etsɛɛɛ ni emii shɛ ehe yɛ nibii kpakpai ni ekaseɔ ni kɔɔ Yehowa yiŋtoo kɛha adesa lɛ he, ni ehiɛ basɔ eduromɔ kɛ esuɔmɔ nɛɛ waa.
2 Shi ewu lɛ je shishi ete shi ewo Biblia ni ekaseɔ lɛ, ni be mli ni obalayoo lɛ kpoo akɛ eeekpa nakai feemɔ lɛ, nuu lɛ kɛ awuyeli te shi wo lɛ. Yɛ naagbee lɛ ewu lɛ kɛ gbalashihilɛ lɛ tee saneyeli he koni afo mli. Etsɛɛɛ ni obalayoo lɛ na ehe akɛ mɔ ni ashwie lɛ kɛjɛ eshia ni ányɛ enɔ ni eshi ebii bibii etɛ lɛ, ní ebi bibioo ni kpaako ena afi lɛ fata he, ejaakɛ saneyeli he lɛ kɛ gbekɛbii lɛ anɔkwɛmɔ wo tsɛ lɛ dɛŋ. Mɛni hewɔ? Ani obalayoo lɛ ku ehiɛ eshwie nii ni esa akɛ etsu yɛ gbekɛbii lɛ ahe lɛ nɔ? Dabi, ejaakɛ yɛ anɔkwale mli lɛ, e-Biblia lɛ kasemɔ moŋ miitsɔɔ lɛ gbɛ ni eeetsɔ nɔ ehi shi akɛ ŋa kɛ nyɛ kpakpa.
3 Otsii fioo ko sɛɛ lɛ, ewu lɛ ha enitsumɔ he lɛ gbala lɛ kɛtee helatsamɔ he ko bɔni afee ni ayakwɛ akɛ sɛkɛyeli gbaa enaa lɛ lo koni akɛ lɛ aya sɛkɛyelɔi atsamɔ he. Klɛŋklɛŋ lɛ tsofafeelɔ ni kwɛ Iɛ lɛ kpoo akɛ eeeha famɔ ni tamɔ nɛkɛ, shi yɛ sɛɛ mli lɛ, akɛni ewu lɛ nyɛ enɔ babaoo hewɔ lɛ, tsofafeelɔ nɛɛ ha wolo akɛ akɛ lɛ aya sɛkɛyelɔi atsamɔ he. No mli po lɛ obalayoo lɛ ni abaptisi lɛ akɛ Yehowa Odasefoi ateŋ mɔ kome lɛ eshi maŋ lɛ mli po kɛtee maŋ kroko mli, he ni eyana tsofafeelɔ kroko yɛ. Yɛ be mli ni ekwɛ lɛ jogbaŋŋ lɛ, tsofafeelɔ nɛɛ ha lɛ wolo ni ji odaseyeli ni tsɔɔ akɛ eyɛ hewalɛ ni ejeee mɔ ni eye sɛkɛ.
4 Shi enɛ fiteee klɛŋklɛŋ tsofafeelɔ lɛ famɔ lɛ. Ehe bahia ni etee ehe aahu otsii babaoo kɛyashi be mli ni famɔ ni nakai klɛŋklɛŋ tsofafeelɔ lɛ kɛha lɛ bafee nɔ ni egbo. Yɛ enɛ sɛɛ lɛ, tsofafeelɔ lɛ ekpɛlɛɛɛ nɔ akɛ eeeha wolo kroko ni tsɔɔ akɛ obalayoo lɛ eye sɛkɛ; no hewɔ lɛ nyɛmiyoo nɛɛ nyɛ eku esɛɛ etee emaŋ ekoŋŋ. Yɛ be ni sa mli lɛ ewu lɛ kɛ amɛgbalashihilɛ lɛ tee saneyeli he kɛ naafolɔmɔ akɛ yoo lɛ eshi lɛ, kɛkɛ ni saneyeli he lɛ kɛ gbekɛbii lɛ anɔkwɛmɔ ha tsɛ lɛ.
5, 6. (a) Ani enɛ loo niiashikpamɔ ko ni tamɔ nakai ji nɔ ko ni abaanyɛ adamɔ nɔ ana miishɛɛ? Mɛni hewɔ? (Marko 10:29, 30) (b) Taakɛ atsɔɔ yɛ ŋmalɛi ni atsɛ nɛɛ mli lɛ, mɛni nɔ Hiob baanyɛ adamɔ ana miishɛɛ yɛ eyiwaa lɛ sɛɛ?
5 Ani obaasusu nɛkɛ niiashikpamɔ nɛɛ he akɛ nɔ ko ni kɛ miishɛɛ baa? Eka shi faŋŋ akɛ ŋa loo nyɛ ko bɛ ni baana miishɛɛ akɛ aaanyɛ enɔ ni eshi eshia ni ashɔ̃ ebii kɛjɛ edɛŋ. Ni asaŋ efeŋ nɔ ni eeenya he kɛji akɛ mɛi ni esumɔɔ amɛ lɛ aaabɔ mɔdɛŋ ni aha atsi enaa yɛ mɛi ni hiɛ jwɛŋmɔŋ helai ashihilɛ he akɛni eesumɔ ni ekase Biblia lɛ ni ekɛ emli shishitoo mlai kpakpai lɛ atsu nii hewɔ. Shi kadimɔ yiŋtoo hewɔ ni Yesu kɛɛ akɛ anya yɛ shihilɛi ni tamɔ nɛkɛ he lɛ: “Nyɛnyaa ni nyɛmli afilianyɛ; shi nyɛnyɔmɔwoo fa yɛ ŋwɛi.”—Mateo 5:12.
6 Hɛɛ, kɛji akɛ yiwaa lɛ yiŋtoo diɛŋtsɛ ji, taakɛ Yesu kɛɛ yɛ kuku ni tsɔ hiɛ lɛ mli lɛ, “yɛ mihewɔ lɛ,” wɔbaanyɛ wɔnya akɛ wɔna hegbɛ koni wɔjie emuuyeli mli ni wɔhiɛɔ wɔhaa Yehowa lɛ kpo ni wɔna egbɛi lɛ bembuu lɛ mli gbɛfaŋnɔ taakɛ Yesu fee lɛ. Wɔtsɔɔ nɛkɛ gbɛ nɔ wɔhaa Abonsam feɔ amalelɔ yɛ kɛɛmɔ ni ekɛɔ akɛ eeenyɛ egbala gbɔmɛi fɛɛ kɛjɛ Nyɔŋmɔ he lɛ mli. Shidaamɔ ni tamɔ nɛkɛ yɛ Yehowa Nyɔŋmɔ masɛi saa ehiɛ, ni taakɛ atsɔɔ mli yɛ Hiob sane lɛ mli lɛ, ekwɛŋ kɛkɛ ni ewooo he nyɔmɔ.—Hiob 1:9, 10; 42:10-16;1 Petro 2:19, 20.
Yiwaa Ni Abaakpa Gbɛ
7. (a) Mɛni hewɔ Kristofoi baanyɛ akpa gbɛ akɛ abaawa amɛ yi? (b) Ani enɛ kɔɔ Kristofoi fɛɛ he, aloo amɛteŋ mɛi komɛi pɛ?
7 Shi mɛni hewɔ esa akɛ awa mɔ ko yi, akɛni esumɔɔ akɛ ekase Nyɔŋmɔ Wiemɔ Biblia lɛ, ni etsɔ Kristofonyo? Yesu ha sanebimɔ lɛ hetoo yɛ nɛkɛ gbɛ nɔ: “Kɛji je lɛ miinyɛnyɛ lɛ, nyɛnaa nyɛlea akɛ mi tsutsu enyɛ. Eji je lɛŋ nyɛjɛ kulɛ, je lɛ aaasumɔ lɛ diɛŋtsɛ emɛi, shi akɛni nyɛjɛɛɛ je lɛŋ, shi mi moŋ mihalanyɛ kɛjɛ je lɛŋ lɛ, no hewɔ je lɛ nyɛɔnyɛ Iɛ. Nyɛhiɛ ahia wiemɔ ni minɔŋŋ mikɛɛnyɛ lɛ nɔ, akɛ: Nyɔŋ efeee enuŋtsɔ. Kɛ amɛwa mi yi lɛ, amɛaawa nyɛ hu yi; kɛ amɛye miwiemɔ nɔ lɛ, amɛaaye nyɛ hu nyɛnɔ nɔ. Shi amɛaaŋɔ enɛɛmɛi fɛɛ amɛfeenyɛ yɛ migbɛi hewɔ; ejaakɛ amɛleee mɔ ni tsu mi lɛ.” (Yohane 15:18-21) Taakɛ bɔfo Paulo tsɔɔ mli yɛ emumɔ naa wolo ni ji enyɔ ni eŋma eyaha Timoteo lɛ mli lɛ, Yiwaa ji nɔ ko ni esa akɛ Kristofoi akpa gbɛ. Eŋma akɛ: “Shi mɛi fɛɛ hu ni taoɔ akɛ amɛaahi shi yɛ Nyɔŋmɔjamɔ naa yɛ Kristo Yesu mli lɛ, aaawa amɛ yi.”—2 Timoteo 3:12.
8. Namɔ hɔ Kristofoi ayiwaa lɛ sɛɛ diɛŋtsɛ, ni mɛni ji eyiŋtoo?
8 Nyɛkahaa wɔhiɛ kpaa nɔ akɛ mɔ ni hɔ yiwaa lɛ sɛɛ jeee mɔ ko mɔ ko akɛ shitee kɛ wolɔ kpeteŋkpele, Satan Abonsam. Oshidaamɔ shiŋŋ akɛ Kristofonyo kɛ osuɔmɔ kɛha Yehowa Nyɔŋmɔ lɛ miiha aana Abonsam akɛ amalelɔ, ejaakɛ ekɛɔ akɛ mɔ ko mɔ ko bɛ ni yɔɔ suɔmɔ diɛŋtsɛ kɛha Nyɔŋmɔ, ni akɛ kɛji akɛ mɔ ko miija lɛ lɛ, belɛ ejɛ nɔ ni mɔ lɛ naa kɛjɛɔ mli kɛhaa lɛ diɛŋtsɛ ehe lɛ hewɔ. Satan tswa mpoa akɛ kɛji akɛ ena hegbɛ lɛ, kulɛ ebaanyɛ etsɔ Hiob, kɛ adesai krokomɛi fɛɛ hu kɛjɛ Nyɔŋmɔ he. (Hiob 1:8-11; 2:3-5) Eyɛ mli akɛ enyɛɛɛ ekumɔ emuuyeli mli ni Hiob hiɛ lɛ moŋ, shi Abonsam eŋmɛko he.—2 Korintobii 4:4.
Awa Klɛŋklɛŋ Kristofoi Ayi
9. Jɛɛ Ŋmalɛi lɛ amli ni okɛ yiwaa sɔrɔtoi ni klɛŋklɛŋ Kristofoi lɛ tsɔ mli lɛ ahe nɔkwɛmɔ nɔ aha.
9 Taakɛ ekɛ Yesu kɔkɔbɔɔ lɛ kpaa gbee lɛ, yiwaa ba klɛŋklɛŋ Kristofoi lɛ anɔ, ni eshɛɔ be ni emli waa diɛŋtsɛ. Ashwie mɛi pii kɛjɛ amɛshiai ni anyɛ amɛnɔ ni amɛjo foi kɛtee hei krokomɛi, taakɛ eji yɛ asafo ni yɔɔ Yerusalem lɛ gbɛfaŋ lɛ. (Bɔfoi lɛ Asaji 8:1) Atswa mɛi krokomɛi ananeshi tu, tamɔ bɔfo Yohane. (Kpojiemɔ 1:9) Atswia bɔfo Paulo kɛ mɛi ni fata ehe yɛ sɔɔmɔ nitsumɔ lɛ mli lɛ atɛi ni akɛ kpelebii yi amɛ. (Bɔfoi lɛ Asaji 14:19; 16:22) Awo klɛŋklɛŋ Kristofoi lɛ ateŋ mɛi pii tsuŋ, aha mɛi krokomɛi anibii ni agbe mɛi krokomɛi. (Kolosebii 4:3; Filemon 9, 10; Hebribii 10:34; 13:3; Bɔfoi lɛ Asaji 12:1, 2) Shi amɛmii shɛ amɛhe, ejaakɛ amɛnu nɔ hewɔ ni awaa amɛyi lɛ shishi jogbaŋŋ.
10. Mɛni tsɔɔ akɛ yiwaa wooo Kristo sɛɛnyiɛlɔi ni hi shi yɛ klɛŋklɛŋ afii oha lɛ mli lɛ ahe gbeyei?
10 Ani nɛkɛ yiwaa nɛɛ ha akpa aloo aba nitsumɔ ni kɔɔ ‘Nyɔŋmɔ he wiemɔ kɛ Yesu Odaseyeli lɛ he’ lɛ shi? Dabi, ejaakɛ klɛŋklɛŋ Kristofoi lɛ ebuuu hegbeyeiwoo. Sane ni yɔɔ Bɔfoi lɛ Asaji 5:40-42 lɛ kɛɔ wɔ akɛ Yudafoi Akwaashɔŋ lɛ “tsɛ bɔfoi lɛ kɛba, ni amɛyi amɛ, ni amɛwo amɛ kita akɛ amɛkawie yɛ Yesu gbɛi lɛ mli ni amɛŋmɛɛ amɛhe.” Mɛni ji nɔ ni nɛkɛ Kristofoi nɛɛ fee? “Kɛkɛ ni amɛje Akwaashɔŋ lɛ hiɛ amɛtee kɛ miishɛɛ, akɛ egbɛi lɛ ahewɔ lɛ abu amɛ mɛi ni sa akɛ abɔ amɛ ahora. Ni amɛfɔɔɔ nitsɔɔmɔ kɛ Yesu Kristo shiɛmɔ yɛ sɔlemɔ we lɛ kɛ shiai be fɛɛ be.”
11. Te Petro kɛ Yohane fee amɛnii amɛha tɛŋŋ yɛ amɛhe gbeyei ni awoɔ lɛ shishi?
11 Dani enɛ aaaba lɛ, no mli lɛ bɔfo Petro kɛ Yohane eyapue yɛ Akwaashɔŋ lɛ hiɛ akɛni amɛtsa nuu obubuafo ko ni amɛtsɔɔ nii yɛ Yesu gbɛi amli hewɔ. Sane lɛ kɛɔ wɔ akɛ: “Ni [nɔyelɔi lɛ kɛ onukpai lɛ] amɛtsɛ amɛ kɛba, ni amɛwo amɛ kita akɛ amɛkatsi ta ni amɛkatsɔɔ nii yɛ Yesu gbɛi amli kwraa dɔŋŋ. Shi Petro kɛ Yohane here nɔ ni amɛkɛɛ amɛ akɛ: Kɛ eja gbɛ yɛ Nyɔŋmɔ hiɛ akɛ abo nyɛ moŋ toi fe Nyɔŋmɔ lɛ, nyɛkojoa ejaakɛ wɔ lɛ wɔnyɛŋ akɛ ja wɔwie nii ni wɔna kɛ nii ni wɔnu lɛ. Shi amɛ Iɛ beni amɛsaa amɛwo amɛhe gbeyei Iɛ, amɛŋmɛɛ amɛhe, ejaakɛ amɛnaaa bɔ ni amɛaafee ni amɛpiŋ amɛ yɛ maŋ lɛ hewɔ.”—Bɔfoi lɛ Asaji 4:18-21.
12. Mɛɛ yelikɛbuamɔ ni jɛ Yehowa ŋɔɔ bɔfoi lɛ kɛ kaselɔi lɛ sɔle amɛbi yɛ be mli ni amɛyɔɔ yiwaa shishi lɛ?
12 Hegbeyeiwoo lɛ wooo amɛhe gbeyei. Nɔ ni aŋma afɔ shi lɛ tsɔɔ akɛ bɔfoi lɛ kɛ kaselɔi lɛ sɔle yɛ gbɛ ni ja nɔ amɛha Yehowa, shi jeee ni ejie yiwaa lɛ kɛjɛ amɛnɔ, shi moŋ ni eha amɛ hewalɛ kɛtsɔ emumɔ lɛ nɔ ni amɛya nɔ amɛwie ewiemɔ lɛ kɛ ekaa. Ni efee nakai hu.—Bɔfoi lɛ Asaji 4:29, 31.
13. Taakɛ Paulo ŋma eyaha Filipibii lɛ, mɛɛ sɛɛnamɔi jɛ etsuŋwoo yɛ Roma lɛ mli ba?
13 PauIo tsuŋwoo yɛ Roma lɛ kɛ sɛɛnamɔi ba, taakɛ etsɔɔ mli yɛ wolo ni eŋma yaha Filipibii lɛ mli lɛ: “Shi, anyɛmimɛi, miisumɔ akɛ nyɛle akɛ saji ni ba minɔ lɛ eha sanekpakpa lɛ eshwere moŋ, ni eha mikpaai lɛ eje shi faŋŋ yɛ Kristo mli yɛ Pretorio (Kaisare asraafoi amɔɔ) lɛ mli fɛɛ kɛ mɛi ni eshwɛ lɛ fɛɛ ateŋ, ni nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo etsɔ mikpaai lɛ anɔ ena ekaa babaoo fe tsutsu lɛ kɛmiijaje Nyɔŋmɔ wiemɔ lɛ ni amɛsheee gbeyei.” (Filipibii 1:12-14) Hɛɛ, yiwaa ni ba Paulo nɔ lɛ ha aye odase babaoo, jeee yɛ maŋbii ateŋ kɛ hegbɛi ni ena akɛ eye odase etsɔɔ saneyeli he lɛ onukpai lɛ kɛkɛ, shi moŋ, eha Kristofoi krokomɛi hu na ekaa ni amɛtee nɔ amɛtsu amɛsɔɔmɔ lɛ he nii babaoo.
Yiwaa Yɛ “Naagbee Gbii” Lɛ Amli
14. Mɛni ji yiŋtoo ni Yesu tsɔɔ akɛ no baaha awa wɔ yi ŋmɛnɛ lɛ?
14 Bɔ ni Nyɔŋmɔ gbalɔi ni hi shi yɛ blema beebe kɛ agbɛnɛ Yesu Kristo kɛ ebɔfoi kɛ kaselɔi ni hi shi yɛ klɛŋklɛŋ afii oha lɛ mli lɛ kɛ yiwaa kpe lɛ, nakai nɔŋŋ hu Kristofoi ni yɔɔ nibii agbɛjianɔtoo nɛɛ “naagbee gbii” lɛ amli lɛ baanyɛ akpa gbɛ akɛ ehe baahia ni amɛto amɛtsui shi hu yɛ yiwaa mli. Yesu gba enɛ efɔ shi akɛ eji nibii agbɛjianɔtoo nɛɛ naagbee lɛ he “okadi” ni nibii pii yɔɔ mli lɛ fa. Ekɛɛ akɛ: “No be lɛ mli lɛ amɛaajie nyɛ amɛwo amanehulu mli, ni agbe nyɛ, ni migbɛi lɛ hewɔ lɛ, jeŋmaji fɛɛ aaanyɛnyɛ.”—Mateo 24:9.
15, 16. (a) Mɛɛ gbalɛ kroko ni kɔɔ wɔbe nɛɛ he tsɔɔ akɛ wɔbaanyɛ wɔkpa yiwaa gbɛ yɛ wɔ odaseyeli lɛ hewɔ? (b) Mɛɛ saji ateeɔ amɛ shi agbɛnɛ koni wɔsusu he?
15 Yɛ sɛɛ mli lɛ, Yesu tsɔɔ bɔfo Yohane nɔ ni E-sɛɛnyiɛlɔi ni yɔɔ shikpɔŋ nɔ lɛ baakpa gbɛ yɛ ŋwɛi maŋtsɛyeli lɛ fɔmɔ sɛɛ. Yɛ be mli ni ekɛ okadi wiemɔi wieɔ lɛ, ekɛɛ akɛ: “Ni beni drako [mɔ ni ayoo lɛ yɛ kuku 9 akɛ “blema onufu lɛ ni atsɛɔ lɛ abonsam kɛ Satan”] lɛ na akɛ ashɛ lɛ afɔ shikpɔŋ lɛ, etiu yoo [Nyɔŋmɔ jeŋ muu fɛɛ gbɛjianɔtoo] lɛ ni fɔ binuu [maŋtsɛyeli lɛ ni Kristo ji Maŋtsɛ] lɛ . . . Ni drako lɛ mli fu yoo lɛ, ni eyiŋ etee ni ekɛ yoo lɛ seshibii ni eshwɛ ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ ayawuu.”—Kpojiemɔi 12:13, 15-17.
16 Ani enɛ eba mli yɛ nɛkɛ “naagbee gbii” nɛɛ amli? Mɛɛ gbɛi anɔ nɛkɛ anɔkwale Kristofoi eto amɛtsui shi yɛ yiwaa mli yɛ wɔbe nɛɛ mli yɛ? Ni yɛ mɛɛ gbɛ nɔ amɛmii eshɛ amɛhe yɛ enɛɛmɛi fɛɛ sɛɛ? Mɛɛ hewalɛ yiwaa lɛ ena yɛ amɛ kɛ mɛi pii ni naa enɛ lɛ anɔ? Abaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.a
[Shishigbɛ niŋmai]
a Ajie kɛjɛ April 15, 1982 Blɔfo Buu-Mɔɔ lɛ mli
[Mfoniri ni yɔɔ baafa 6]
Mɛi ni haa Abonsam feɔ amalelɔ, taakɛ Hiob fee lɛ, efeŋ mɛi ni aaashi amɛ ni awoŋ amɛ nyɔmɔ
[Mfoniri ni yɔɔ baafa 7]
Petro, Yohane kɛ klɛŋklɛŋ Kristofoi lɛ eŋmɛɛɛ gbɛ ni maŋ lɛ mli onukpai ni teɔ shi woɔ nitsumɔ ni Nyɔŋmɔ kɛwo amɛdɛŋ lɛ awo amɛhe gbeyei
[Mfonirii ni yɔɔ baafa 8]
‘Ni drako lɛ mli fu, ni etee ni eyawuu eshi mɛi ni yeɔ Yesu he odase lɛ.’—Kpojiemɔ 12:15-17