Nyɛsaa Nyɛhe Ŋyɛtoa!
“No hewɔ lɛ, nyɛ hu nyɛsaa nyɛhe nyɛtoa, ejaakɛ ŋmlɛtswaa ni nyɛhiɛ kaaa nɔ lɛ nɔ gbɔmɔ Bi lɛ baaba.”—LUKA 12:40, NW.
1. Mɛni Yesu wie yɛ bɔ ni ehe hiaa akɛ aaahi kpe lɛ he?
YESU Kristo wo esɛɛnyiɛlɔi lɛ hewalɛ ni amɛshi kpe. Akɛ nɔkwɛmɔ nɔ lɛ, ekɛɛ: “Shi nyɛ lɛ, nyɛshia kpe; naa, mikɛɛnyɛ mito. . . . Kɛkɛ Iɛ aaana gbɔmɔ Bi lɛ akɛ eeba yɛ atatui lɛ amli kɛ hewalɛ kɛ anunyam babaoo. . . . Shi no gbi lɛ kɛ no ŋmlɛtswaa lɛ mɔ ko mɔ ko leee; ŋwɛibɔfoi lɛ hu leee, ni Bi Iɛ tete leee, ja Tsɛ lɛ kome kɛkɛ. Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be lɛ shɛɔ. Tamɔ nuu ko ni edom eshi ewe, ni eha etsuji lɛ hegbɛ kɛ mɔ fɛɛ mɔ nitsumɔ, ni efa agbonaakwɛlɔ lɛ akɛ ebu. No hewɔ lɛ, nyɛshia kpe; ejaakɛ nyɛleee beyinɔ ni shiatsɛ lɛ baa, ekolɛ gbɛkɛ, aloo nyɔɔŋteŋ, aloo wuɔgbɛɛmɔ, aloo leebi; koni ekaba trukaa ebaninanyɛ akɛ nyɛmiiwɔ. Shi nɔ ni mikɛɔ nyɛ nɛɛ, mɛi fɛɛ mikɛɔ, Nyɛshia kpe.”—Marko 13:23-37, NW.
2. Mɛni hewɔ sɔlemɔ nɔkwɛmɔ lɛ tsɔɔ kpe ni aaashi, shi Kristendom sɔlemɔi lɛ ejie hehiamɔ ni yɔɔ Maŋtsɛyeli gbɛkwɛmɔ lɛ mli lɛ kɛtee yɛ mɛɛ gbɛ nɔ?
2 Nikasemɔi ni etsɔ hiɛ lɛ kɛ odaseyelii babaoo ni jɛ hei krokomɛi eha ni tsɔɔ akɛ Kristendom sɔlemɔi lɛ ‘eshiko kpe.’ Taakɛ The Catholic Encyclopedia lɛ tsɔɔ lɛ, ámɛjie hewalɛ ni yɔɔ Maŋtsɛyeli gbɛkwɛmɔ lɛ mli lɛ kɛtee kɛtsɔ kɛɛmɔ ni amɛkɛɔ akɛ “Nyɔŋmɔ maŋtsɛyeli lɛ shishi ji . . . Nyɔŋmɔ ni yeɔ lumɔ yɛ wɔtsuii amli” lɛ nɔ, ni enɛ ejie shishinumɔ fɛɛ ni yɔɔ sɔlemɔ nɔkwɛmɔ aloo Nuŋtsɔ lɛ Sɔlemɔ lɛ mli lɛ kɛtee. Shi kɛlɛ, The New Encyclopaedia Britannica lɛ jaje akɛ: “Nuŋtsɔ lɛ Sɔlemɔ lɛ mli nibimɔi lɛ tsɔɔ hiɛ etsɔɔ shihilɛ ko ni haoɔ mɔ waa ni tsɔɔ akɛ aafite Nyɔŋmɔ gbɛi kɛ esuɔmɔnaa nii lɛ, ni akɛ emaŋtsɛyeli lɛ bako lolo.” Hɛɛ, sɔlemɔ nɔkwɛmɔ lɛ tsɔɔ hiɛ etsɔɔ kpeshii. Mɛni nibii pɔtɛɛ nɛkɛ esa akɛ Kristofoi ahiɛ aka nɔ ni amɛshi kpe yɛ he lɛ?
‘Amɛmiishi Kpe’—Kɛha Mɛni?
3. Mɛni hewɔ Kristofoi nyɛŋ aku amɛhiɛ amɛshwie he ni kɔɔ enɛ he lɛ nɔ lɛ?
3 Biblia mli gbalɛi ni kɔɔ “naagbee nibii” lɛ ahe lɛ amlitaomɔ jogbaŋŋ jieɔ nibii pɔtɛɛ ni esa akɛ Kristofoi ‘ashi he kpe’ lɛ kpo. Klɛŋklɛŋ lɛ, esaaa akɛ amɛhiɛ jeɔ be ni kɔɔ enɛ he lɛ nɔ, ejaakɛ Yesu Kristo wie “beyinɔ ni be lɛ shɛɔ” ni Tsɛ lɛ pɛ le lɛ he. (Marko 13:32, 33) Kɛfata he lɛ, Yesu kɛɛ ekaselɔi lɛ akɛ “ni jeŋmaji lɛ aaanaanaa Yerusalem nɔ kɛyashi beyinɔ ni jeŋmaji abe lɛ aaashɛ.” (Luka 21: 24) Eka shi faŋŋ akɛ Yesu kɛ amaniɛbɔɔ nɛɛ ha esɛɛnyiɛlɔi lɛ koni eye ebua amɛ ni amɛyoo naagbee be lɛ, ejaakɛ eji hetoo ko ni ekɛha sanebimɔ: “Tsɔɔlɔ, belɛ mɛɛ be mli nii nɛɛ aaaba mli? Ni mɛɛ okadi aaaba beni nii nɛɛ aaaba mli”? lɛ hetoo lɛ fa.—Luka 21:7
4. Mɛɛ “okadi” Kristofoi baaya nɔ ashi he kpe ni amɛtao?
4 Kɛfata be ni kɔɔ enɛ he ni abaagbala amɛ jwɛŋmɔ kɛya nɔ lɛ he lɛ, esa akɛ Kristofoi ashi kpe ni amɛtao “okadi” ni atsi ta yɛ Mateo 24:3 kɛ Marko 13:4 lɛ hu. Nɛkɛ okadi ni nibii pii feɔ nɛɛ—ni majimaji ateŋ tai, hɔmɔ, shikpɔŋhosomɔi, tsɛŋemɔ helai kɛ anɔkwale Kristofoi ayiwaa yɔɔ mli lɛ—kɛ gbalɛi ni kɔɔ be he lɛ baakpa gbee pɛpɛɛpɛ yɛ amɛmlibaa mli koni no aha ayoo “yinɔ” ni “hoŋ eyaŋ” ja nii nɛɛ fɛɛ ni esa akɛ aba mli yɛ naagbee be lɛ mli lɛ eba mli da lɛ.—Luka 21:10-12, 32.
5. Kristo kɛ esɛɛnyiɛlɔi anɔkwafoi lɛ baahi shi yɛ afii ohai abɔ lɛ fɛɛ mli yɛ mɛɛ agbɛ nɔ, shi ani enɛ fɛɛ ji nɔ ni etsɔɔ yɛ be mli ni ekɛ “ba ni eba” lɛ he okadi lɛ ha lɛ?
5 Mɛɛ saji ni he hiaa ni kɔɔ “nibii agbɛjianɔtoo lɛ naagbee” he nɛkɛ okadi nɛɛ baajaje atsɔɔ? Yesu kaselɔi lɛ bi lɛ akɛ: “Mɛni ji beni oba lɛ [Hela, parousia] . . . lɛ he okadi?” (Mateo 24:3, NW) Mɛni ji nɔ ni “ba ni” Kristo “eba” lɛ baatsɔɔ? Babaoo fe beni ekɛ enɔkwa sɛɛnyiɛlɔi lɛ yɔɔ yɛ mumɔŋ beni amɛkpe kutuu aloo amɛtsu nitsumɔ akɛ amɛfee kaselɔi lɛ he nii lɛ. Ebaafi esɛɛnyiɛlɔi lɛ asɛɛ yɛ nɛkɛ gbɛ nɔ aahu kɛtsɔ afii ohai abɔ lɛ fɛɛ mli. (Mateo 18:20; 28:18-20) Kristendom jamɔ he nilelɔi lɛ po kpɛlɛɔ nɔ akɛ wiemɔ “beni eba” lɛ naa shishinumɔ krɛdɛɛ ko. The New International Dictionary of New Testament Theology lɛ jaje akɛ: “Parousia lɛ he jwɛŋmɔ lɛ bafeɔ nɔ ni fata sɔlemɔ lɛ gbɛkwɛmɔ ni kɔɔ Kristo puemɔ yɛ yinɔ lɛ naagbee lɛ he agbɛnɛ.” Kristofoi a-Hela Ŋmalɛi lɛ woɔ Kristofoi aŋaa kɛjɛɔ shishijee kɛyashiɔ enaagbee ni amɛhi shi akɛ gbɔmɛi ni miikwɛ beni Kristo ebalɛ gbɛ.—Mateo 24:3, 27, 37, 39; Yakobo 5:7, 8; 2 Petro 3: 3, 4; 1 Yohane 2:28; Kpojiemɔ 1:7; 22:7
6. (a) Mɛni ji nɔ ni ba ni Kristo eba lɛ baatsɔɔ aha yiwalɛ ni ji agbɛjianɔtoo lɛ? (b) Ba ni Kristo eha lɛ baasa Kristofoi ni afɔ amɛ mu ni amɛ bɔi yɛ anɔkwayeli mli lɛ kɛ mɛi ni yɔɔ wala mli lolo yɛ shikpɔŋ nɔ lɛ ahe yɛ mɛɛ gbɛ nɔ?
6 Nɔ ni ba ni Kristo eba lɛ baatsɔɔ nɔŋŋ ji “nibii agbɛjianɔtoo lɛ naagbee.” (Mateo 24: 3; Marko 13:4, NW) Ebaatsɔɔ akɛ ŋmɛnɛŋmɛnɛ yiwalɛ nibii agbɛjianɔtoo lɛ ebote ‘enaagbee be’ aloo “naagbee gbii” lɛ amli. (Daniel12:4, 9; 2 Timoteo 3:1-5) Ebaatsɔɔ akɛ Kristo nine eshɛ famɔ nɔ kɛjɛ e-Tsɛ lɛ dɛŋ akɛ eye lumɔ yɛ Maŋtsɛyeli lɛ mli yɛ shikpɔŋ lɛ nɔ ‘yɛ ehenyɛlɔi ateŋ.’ (Lala 110:2; 2:6-9; Kpojiemɔ 11:15-18) Dani eeekojo je muu lɛ fɛɛ lɛ, Kristo baasara lɛ diɛŋtsɛ esafo lɛ ni etee Kristofoi ni afɔ amɛ mu ni gboi yɛ anɔkwayeli mli lɛ ashi. (1 Korintobii 15:21, 23; 1 Tesalonikabii 2:19; 3:13; 4:13-17; 2 Tesalonikabii 2:1) Kristo baahala nakai Kristofoi ni afɔ amɛ mu ni yɔɔ wala mli lolo yɛ shikpɔŋ nɔ ni kɛ anɔkwayeli tsuɔ nii akɛ Kristo “tsulɔ” kɛtsɔɔ amɛhiɛ ni kãa yɛ mumɔŋ kɛ mumɔŋ “ŋmaa yɛ be ni sa nɔ” ni amɛkɛhaa hewɔ Iɛ nɔ “eto enii fɛɛ kwa nɔ,” aloo Maŋtsɛyeli lɛ he nibii ni yɔɔ shikpɔŋ nɔ lɛ nɔ. (Mateo 24:45-47; Luka 12:42-44) Ehe bahia ni nɛkɛ “tsulɔ anɔkwafo kɛ nilelɔ” nɛɛ kɛ ehe awo je muu fɛɛ shiɛmɔ nitsumɔ ni kɔɔ “maŋtsɛyeli lɛ he sanekpakpa” lɛ he lɛ mli ni ekwɛ nɔ, ni no ‘dani naagbee lɛ baaba.’—Mateo 24:14.
7. Mɛɛ okadi kroko Kristofoi baaya nɔ ashi he kpe ni amɛtao yɛ ba ni Kristo eba nɛɛ po mli, ni mɛni hewɔ amɛbaaya nɔ amɛsɔle amɛbi ni Nyɔŋmɔ Maŋtsɛyeli lɛ “aba” lɛ?
7 Esa akɛ anɔkwale Kristofoi ‘aya nɔ ashi’ nibii nɛɛ fɛɛ ni baaye odase akɛ Kristo ba ni eba lɛ kɛ “nibii agbɛjianɔtoo lɛ naagbee” lɛ mli amɛyɔɔ lɛ ‘he kpe.’ Ni yɛ “naagbee be” lɛ mli po lɛ, esa akɛ amɛya nɔ ni amɛshi kpe amɛtao “gbɔmɔ bi lɛ he okadi” lɛ, ‘ebaa’ ni ebakojo Satan yiwalɛ nibii agbɛjianɔtoo lɛ. (Mateo 24:30, 44; Marko 13:26, 35; Luka 12:40; 21:27; 2 Tesalonikabii 1:7-10) No hewɔ lɛ, eyɛ mli akɛ ‘eba’ ni ato e-Maŋtsɛyeli lɛ ama shi momo moŋ, shi esa akɛlɛ kɛ e-Maŋtsɛyeli lɛ fɛɛ ‘aba’ ni ‘ebajwara’ Satan je lɛŋ jeŋmaji kɛ maŋtsɛyelii lɛ fɛɛ ‘wɔtsɔwɔtsɔ.’ (Daniel 2:44) Enɛ tsɔɔ nɔ hewɔ ni yɛ be mli ni ekɛ beni eba lɛ he “okadi” lɛ mli nibii lɛ eha lɛ sɛɛ lɛ, Kristo kɛfata he akɛ: “Beni nyɛaana akɛ nibii nɛɛ etsɔ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ eta” lɛ. (Luka 21:31) Hɛɛ, yɛ beni Kristo eba nɛɛ mli po lɛ, Kristofoi baaya nɔ asɔle lolo ni Nyɔŋmɔ Maŋtsɛyeli lɛ aba, ni ehe baahia ni amɛya nɔ ‘amɛkwɛ jogbaŋŋ’ ni ‘amɛshi kpe’ kɛha “naagbee be” ni ato lɛ kɛ ‘amɛkpɔmɔ.’—Marko 13:7, 29, 32-37; Luka 21:9, 28.
Namɛi Ana Amɛ Akɛ ‘Amɛshi Kpe’?
8. Tsii nibii ni Kristofoi baaya nɔ ashi he kpe lɛ ata.
8 Wɔtsɔ hiɛ wɔna akɛ esa akɛ Kristofoi ahi shi akɛ mɛi ni miikpa “jeŋmaji abei ni ato” lɛ gbɛ. Esa akɛ amɛshi ‘beni Kristo eba lɛ kɛ nibii agbɛjianɔtoo lɛ naagbee lɛ he okadi’ lɛ he kpe. Esa akɛ amɛkwɛ Kristofoi ni afɔ amɛ mu ni amɛye anɔkwale lɛ ashitee lɛ gbɛ, kɛ mɔ ni “tsulɔ anɔkwafo kɛ nilelɔ” kuu ni abaahala lɛ ni ekwɛ Kristo Maŋtsɛyeli lɛ he nibii ni yɔɔ shikpɔŋ nɔ lɛ fɛɛ nɔ Iɛ ji yɛ faŋŋ mli lɛ yoomɔ. Yɛ naagbee lɛ, nɛkɛ “tsulɔ” nɛɛ baaya nɔ ni ekɛ mumɔŋ niyenii aha, yɛ be mli ni etoɔ okadi yɛ “maŋtsɛyeli lɛ he sanekpakpa” lɛ shiɛmɔ mli “yɛ shikpɔŋ ni ayɔɔ nɔ lɛ fɛɛ nɔ” dani “naagbee” Iɛ aba lɛ. “Gbɔmɔ Bi lɛ okadi” lɛ baapue kɛtsɔ ‘ebaa’ koni ebakpata Satan yiwalɛ nibii agbɛjianɔtoo lɛ hiɛ lɛ nɔ.
9. Namɔ ana akɛ eeshi kpe kɛmiikwɛ “jeŋmaji abei ni ato” lɛ naagbee gbɛ, ni Zion’s Watch Tower lɛ ye bua Kristofoi koni amɛhiɛ ahi amɛhe nɔ yɛ mumɔŋ yɛ mɛɛ gbɛ nɔ?
9 Namɛi ana amɛ akɛ ‘amɛshi’ nɛkɛ nibii nɛɛ fɛɛ ‘he kpe’ lɛ? Afi 1876 mli tɔɔ ni Charles T. Russell ni jɛ Pittsburgh, yɛ Pennusylvania lɛ tɛ̃je ehiɛ akɛ eeshi “jeŋmaji abei ni ato,” aloo “jeŋmaji abe” lɛ he kpe. Nakai afi lɛ mli eŋma wolo ko ni egbɛi ji “Gentile Times: When Do They End?” (Jeŋmaji Abei: Mɛɛ Be Amɛbaa Naagbee?) lɛ. Emli ni ejaje yɛ akɛ “bei kpawo lɛ baaba naagbee yɛ A.D. 1914.” Kɛjɛ afi 1880 kɛbaa lɛ, aŋma nakai sane lɛ nɔŋŋ yɛ Zion’s Watch Tower lɛ baafai amli. March 1880 nɔ̃ lɛ jaje akɛ: “‘Jeŋmaji Abei’ lɛ yaa nɔ aahu kɛyashiɔ 1914, ni ŋwɛi maŋtsɛyeli lɛ yeŋ nɔ kwraa ja be nɛɛ eshɛ da.” Yɛ anɔkwale mli lɛ, Biblia kaselɔi ni ŋma nakai saji lɛ yɛ nakai he lɛ mli lɛ nuuu Biblia lɛ kɛ nɔ ni nakai “jeŋmaji abei” lɛ ahe yinɔsane diɛŋtsɛ baaji lɛ shishi jogbaŋŋ, tamɔ bɔ ni wɔnuɔ nibii nɛɛ ashishi ŋmɛnɛ lɛ.a Shi sane ni he hiaa lɛ ji akɛ, “amɛmiishi kpe” ni amɛyeɔ amɛbuaa amɛnanemɛi Kristofoi lɛ koni amɛhiɛ aka yɛ mumɔŋ.
10. Mɛɛ gbɛ nɔ atsɔ aha shishinumɔ diɛŋtsɛ ni kɔɔ “ba ni” Kristo “eba” lɛ he lɛ fee faŋŋ yɛ?
10 Nakai Biblia kaselɔi akuu lɛ nɔŋŋ ni kɛ amɛhe ebɔ Charles Russell kɛ wolo tɛtrɛɛ, Zion’s Watch Tower lɛ he lɛ ye bua anɔkwale Kristofoi lɛ koni amɛyoo akɛ esa akɛ amɛnu ‘ba ni’ Kristo ‘eba’ lɛ shishi akɛ nɔ ko ni anaaa, ni akɛ ekuŋ esɛɛ ebaŋ shikpɔŋ nɔ koni ebaye nɔ akɛ maŋtsɛ yɛ heloo mli. Amɛtee nɔ amɛgbala Nuŋtsɔ lɛ “webii” lɛ ajwɛŋmɔ kɛtee jeŋ saji ni kɔɔ ba ni Kristo eba lɛ he “okadi” lɛ kɛ “naagbee be” lɛ nɔ.
11. (a) Mɛni ji nɔ ni anuuu shishi jogbaŋŋ yɛ shikpɔŋ nɔ maŋtsɛyelii lɛ kɛ agbɛnɛ Kristofoi ni afɔ amɛ mu ni ‘aaasha amɛ kɛya’ lɛ ahe yɛ no be lɛŋ? (b) Mɛɛ shishinumɔ kpakpa wɔyɔɔ ŋmɛnɛ yɛ Daniel 2:44 kɛ 1 Tesalonikabii 4:16-17 he?
11 Wɔkpɛlɛɔ nɔ moŋ akɛ, asusu akɛ Maŋtsɛyeli lɛ ni aaato ama shi yɛ ŋwɛi lɛ baatsɔɔ shikpɔŋ nɔ maŋtsɛyelii lɛ ahiɛkpatamɔ amrɔ nɔŋŋ, ni ákɛ “abaashã.” Kristofoi ni afɔ amɛ mu lɛ ni amɛyafata Kristofoi ni afɔ amɛ mu ni ámɛgboi ni be eshɛ ni abaatee amɛ shi yɛ beni Kristo eba lɛ mli lɛ ahe. (2 Tesalonikabii 2:1) Shi namɔ baanyɛ ashwa amɛ yɛ naabuamɔ nitsumɔ kpeteŋkpele ni esa akɛ eba yɛ Daniel 2:44 lɛ mlibaa shishijee kɛ enaagbee lɛ teŋ lɛ aloo ákɛ ‘sha ni aaasha amɛ kɛya’ ni atsi ta yɛ 1 Tesalonikabii 4:15-17 lɛ kɔɔ mɛi ni afɔ amɛ mu lɛ ni gboiɔ yɛ klɛŋklɛŋ shitee lɛ shishijee lɛ sɛɛ lɛ ashitee amrɔ nɔŋŋ lɛ he lɛ shishi ni amɛyanuuu héwɔ?—1 Korintobii 15:36, 42-44; Romabii 6:3.
12. (a) Mɛni ji nɔ ni Kristo kwɛ gbɛ akɛ ebaana ni ‘etsulɔ’ anɔkwafo lɛ miifee kɛ eba ni ebasara eshiabii lɛ, ni namɛi ena ni amɛmiifee nakai? (b) Mɛni ji nɔ ni “tsulɔ” anɔkwafo kuu Iɛ etee nɔ efee kɛjɛ nakai be lɛ mli?
12 Wɔnuɔ nibii nɛɛ ashishi ŋmɛnɛ, ni wɔmiida “‘tsulɔ anɔkwafo kɛ nilelɔ” kuu lɛ shi yɛ la ni fa ni eha ekpɛ eshwie Nyɔŋmɔ Wiemɔ lɛ nɔ lɛ hewɔ. (Abɛi 4:18) Yesu wie nakai “tsulɔ” lɛ he akɛ: “Belɛ namɔ ji tsulɔ anɔkwafo kɛ nilelɔ, mɔ ni enuŋtsɔ lɛ ŋɔlɛ eto ewebii lɛ anɔ, koni eha amɛ amɛŋmaa yɛ be ni sa nɔ lɛ? Ajɔɔ nakai tsulɔ lɛ, mɔ ni beni enuŋtsɔ baa lɛ ni eeebanina lɛ akɛ eefee nakai lɛ. Lɛlɛŋ, miikɛɛnyɛ akɛ, eeeŋɔ lɛ eto enii fɛɛ kwa nɔ.” (Mateo 24:45-47) Beni Nuŋtsɔ Yesu ni akɛ lɛ eta maŋtsɛsɛi nɔ lɛ basara ewebii lɛ yɛ 1919 mli lɛ, ebana Kristofoi akuu ko ni amɛkɛ Buu-Mɔɔ wolo tɛtrɛɛ lɛ tsuɔ nii lɛ akɛ amɛkɛ anɔkwayeli miibɔ mɔdɛŋ ni ‘amɛya nɔ amɛshi kpe’ yɛ mumɔŋ “ŋmaa yɛ be ni sa nɔ” lɛ ni yeɔ buaa amɛ lɛ hewɔ. Nakai “tsulɔ” kuu lɛ etee nɔ kɛbashi ŋmɛnɛ, yɛ anɔkwayeli mli amɛkɛ mumɔŋ niyenii eha koni no aha amɛ-Nuŋtsɔ lɛ “webii” lɛ kɛ amɛ hefatalɔi lɛ ‘aya nɔ ni amɛkwɛ jogbaŋŋ, ni amɛshi kpe.’—Marko 13:33.
Hiɛ Ni hiɔ he nɔ aloo Hejɔfeemɔ?
13. Mɛɛ sanebimɔi esa akɛ mɛi ni wieɔ shiɔ Yehowa Odasefoi lɛ abi amɛ diɛŋtsɛ amɛhe?
13 Ewaaa akɛ Kristendom sɔlemɔi ni amɛhe shi lɛ kɛ mɛi krokomɛi aaawie ashi Yehowa Odasefoi ejaakɛ amɛ woji lɛ ewie yɛ bei komɛi amli akɛ nibii komɛi baanyɛ aba yɛ bei komɛi amli. Shi ani nifeemɔ ni tamɔ nɛkɛ lɛ kɛ Kristo famɔ akɛ “nyɛyaa nɔ nyɛshia kpe” lɛ kpaaa gbee? (Marko 13:37, NW) Yɛ gbɛ kroko nɔ lɛ, ani Kristendom sɔlemɔi lɛ ewo hewalɛ yɛ Kristofoi akpeshii he kɛtsɔ tsɔɔmɔ ni etsɔɔ akɛ Maŋtsɛyeli lɛ “miiye lumɔ yɛ gbɔmɛi atsuii amli” lɛ nɔ? Ani jeee mumɔŋ hejɔfeemɔ moŋ he hewalɛ ámɛwo yɛ bɔ ni amɛbu “naagbee be” lɛ he gbɛkwɛmɔ lɛ akɛ “shishinumɔ bɛ he” aloo “eji blema adesa ni he ehiaaa” lɛ hewɔ? Ani hemɔkɛyeli kwalɔi lɛ ni kɛɔ akɛ “naagbee be” lɛ je shishi yɛ Pentekoste ni eji Kristofoi Abe lɛ fɛɛ lɛ eha Kristofoi ahiɛ ehi amɛhe nɔ? Ani jeee mumɔŋ wɔdɔiwɔɔ moŋ ji nɔ ni ámɛkɛba?
14. Mɛɛ Yehowa tsuji ni hi shi yɛ bei ni eho lɛ amli lɛ ahe nɔkwɛmɔ nii wɔyɔɔ ni tsɔɔ bɔ ni amɛhe tswa shi kɛ yeyeeye-feemɔ akɛ amɛaana ni Nyɔŋmɔ yiŋtooi eba mli?
14 Eji anɔkwale moŋ akɛ, gbɛkwɛmɔi komɛi ni tamɔ nɔ ni Biblia mli be-buu fiɔ sɛɛ lɛ baaa mli yɛ be ni akpaa gbɛ lɛ mli. Shi ani ejeee nɔ ni asumɔɔ waa moŋ akɛ aaatɔ̃ yɛ gbɛ ko nɔ yɛ he ni tswaa shi babaoo akɛ aaana ni Nyɔŋmɔ yiŋtooi eba mli moŋ lɛ mli fe ni aaafee mɛi ni ewɔ yɛ Biblia gbalɛ mlibaa he? Ani Mose tɔɔɔ yɛ afii 40 he akɔntaa ko ni ebu lɛ mli yɛ be mli ni ebɔɔ mɔdɛŋ ni etsɔ hiɛ yɛ be naa ejie Israel piŋmɔ lɛ kɛya lɛ? (1 Mose 15: 13; Bɔfoi lɛ Asaji 7:6, 17, 23, 25, 30, 34) Ani Kristo bɔfoi lɛ ahe etswaaa shi akɛ amɛaana ni ato Maŋtsɛyeli lɛ ama shi, yɛ shishinumɔ ni amɛbɛ kwraa yɛ nɔ ni Maŋtsɛyeli lɛ diɛŋtsɛ ji lɛ hewɔ? (Bɔfoi lɛ Asaji 1:6; okɛto Luka 19:11; 24:21 he.) Ani Kristofoi ni afɔ amɛ mu ni yɔɔ Tesalonika lɛ atsui yeee yɛ bɔ ni amɛsumɔɔ ni amɛna “beni Nuŋtsɔ Yesu Kristo eba” lɛ kɛ “Yehowa gbi” lɛ hewɔ?—2 Tesalonikabii 2:1, 2, NW.
15. Mɛɛ nɔkwɛmɔ nii tsɔɔ akɛ ejeee nɔ ni ŋmalɛ fiii sɛɛ ákɛ aka be he akɔntaabuu aaatsu nii ni akɛbɔ mɔdɛŋ akɛ aaale be mli ni Nyɔŋmɔ yiŋtooi baaba mli ni Yehowa tsuji anɔkwafoi babaoo ni hi shi yɛ blema kɛ ŋmɛnɛŋmɛnɛ beaŋ fɛɛ lɛ ebolɔ akɛ mɛni?
15 Nɔ ko bɛ ni ejaaa yɛ ŋmalɛ naa yɛ be he akɔntaabuu ni akɛtsuɔ nii koni akɛbɔ mɔdɛŋ ni ale “be ni áto” ni aaaha Nyɔŋmɔ yiŋtooi aba mli lɛ he. (Habakuk 2:3) Daniel bu be mli ni Yerusalem amaŋfɔfeemɔ lɛ baaba naagbee. (Daniel 9:1, 2) Klɛŋklɛŋ afii oha lɛ mli shwɛɛnii ni ji Yudafoi anɔkwafoi lɛ miikwɛ Mesia lɛ baa gbɛ ejaakɛ amɛbu naagbee be ni damɔ gbalɛ nɔ lɛ he akɔntaa. (Daniel 9:25; Luka 3:15) Aye abua afii ohai 19 lɛ naagbee mli kɛ afii ohai 20 lɛ shishijee mli Kristofoi lɛ ni amɛnyɛ amɛhi shi akɛ mɛi ni miikwɛ Nyɔŋmɔ Maŋtsɛyeli lɛ nɔyeli lɛ gbɛ kwraa dani 1914 shɛ, ejaakɛ amɛbu be mli ni “jeŋmaji abei ni ato” lɛ baaba naagbee lɛ he akɔntaa. (Luka 21:24; Daniel 4:16, 17, NW) No hewɔ lɛ, shishinumɔ yɛ nɔ hewɔ ni amɛbɔ mɔdɛŋ ákɛ akɛ Biblia be-buu krokomɛi aaatsu nii ni amɛkɛtao akɛ amɛaale be mli ni hiɛnɔkamɔi ni ámɛmɛ yɛ he yɛ be kakadaŋŋ mli lɛ aaaba mli diɛŋtsɛ lɛ mli. Nyɔŋmɔ tsuji anɔkwafoi ni hi shi yɛ bei ni eho lɛ amli lɛ bolɔ akɛ: “Mɛɛ beyinɔ nɔŋŋ, O Yehowa?”—Yesaia 6: 11; Lala 74:10; 94:3, NW.
Mɛni Hewɔ ‘Asaa He Ato’ Lɛ?
16. (a.) Ani esa akɛ anu Marko 13:32 shishi akɛ etsɔɔ akɛ esaaa akɛ wɔjieɔ miishɛɛ kpo yɛ be mli ni naagbee lɛ aaaba lɛ he? (b) Mɛɛ “okadi” kroko yɔɔ ni wɔnaa, Shi mɛɛ “okadi” kroko wɔmɛɔ?
16 Akɛni Yesu wie yɛ faŋŋ mli akɛ gbɔmɔ ko gbɔmɔ ko nyɛŋ ale “no gbi lɛ” aloo “no ŋmlɛtswaa lɛ” ni Tsɛ lɛ baafa Bi lɛ ni ‘eba’ ni ebate shi ewo Satan yiwalɛ nibii agbɛjianɔtoo lɛ hewɔ lɛ, mɛi komɛi baabi akɛ: ‘Belɛ mɛni hewɔ ehe hiaa waa akɛ wɔɔhi shi akɛ mɛi ni miikwɛ naagbee lɛ gbɛ lɛ?’ Ehe miihia waa ejaakɛ nakai wiemɔ lɛ nɔŋŋ mli ni Yesu kɛfata he akɛ: “Nyɛkwɛa jogbaŋŋ, nyɛshia kpe . . . nyɛsaraa.” (Marko 13:32-35) Yesu parousia lɛ he “okadi” lɛ ji nɔ ko ni ehi shi aahu kɛjɛ 1914. Agbɛnɛ wɔmiimɛ “Nyɔŋmɔ Bi lɛ okadi lɛ,” beni ‘eeeba’ akɛ Yehowa Blafo lɛ.
17, 18. (a) Mɛni hewɔ Yesu fa klɛŋklɛŋ afii oha lɛ mli Kristofoi lɛ ni amɛjo foi kɛjɛ Yerusalem kɛ amɛna ehiɛkpatamɔ ni baa lɛ he okadi lɛ amrɔ nɔŋŋ lɛ? (b) Mɛni hewɔ ebaafee nɔ ni oshara yɔɔ mli ákɛ wɔkɛ shishinumɔ kroko aaaha bɔ ni wɔbe nɛɛ he hiɛɔ ha lɛ?
17 Beni Yesu kɛ okadi ni baaha klɛŋklɛŋ afii oha Iɛ mli Kristofoi ni yɔɔ Yudea lɛ ale akɛ be eshɛ ni esa akɛ amɛjo foi kɛjɛ Yerusalem lɛ haa amɛ lɛ, ema nɔ mi akɛ ehe baahia ni amɛtsu he nii amrɔ nɔŋŋ. (Luka 21:20-23) Mɛni hewɔ hehiamɔ babaoo nɛkɛ, akɛni afii ejwɛ ho, kɛjɛ be mli ni amɛna okadi lɛ yɛ afi 66 Ŋ.B., kɛyashi be mli ni Yerusalem hiɛkpatamɔ lɛ diɛŋtsɛ ba yɛ afi 70 Ŋ.B. lɛ? Ejaakɛ Yesu le akɛ kɛji akɛ amɛshashao shi lɛ, amɛbaatsi amɛfoijee lɛ amɛto ni yɛ naagbee lɛ Roma asraafoi lɛ baaba abanina amɛ.
18 Nakai nɔŋŋ hu ŋmɛnɛ ebaafee nɔ ni eshara yɔɔ mli teɔ aha Kristofoi lɛ akɛ amɛaabɔ mɔdɛŋ ni amɛkɛ shishinumɔ kroko aha bɔ ni wɔbe nɛɛ he hiaa waa ha lɛ ni no aha amɛna ‘shishɛramɔ’ su ko ni tsɔɔ yiŋkɔshikɔshifeemɔ yɛ bɔ ni naagbee be lɛ ebɛŋkɛ eha lɛ he.
19. Mɛɛ kɔkɔbɔɔ Petro kɛ Yesu kɛha?
19 Kristo parousia aloo ba ni eba lɛ ená afii 70 ni “ebaa” kɛha “Yehowa gbi” ni no mli ni ebaatsu kojomɔ he nii eshi Satan je lɛ miiba kɛ foi. Bɔfo Petro kɛɔ akɛ nɛkɛ gbi nɛɛ “baaba tamɔ julɔ,” ni ekɛfata he akɛ esa akɛ ‘wɔmɛ ni wɔha ba ni Yehowa gbi lɛ eba lɛ ahi wɔjwɛŋmɔ mli.’ (2 Petro 3:10-12) Yesu hu bɔ wɔ kɔkɔ akɛ: “Shi nyɛhiɛ ahia nyɛhe nɔ, koni fufeemɔ kɛ daatɔɔ kɛ daaŋ maa he haomɔi akahe nyɛtsuii, ni nakai gbi lɛ miibatinyɛ shi trukaa . . . tamɔ tsɔne. No hewɔ lɛ nyɛsraa be fɛɛ be.”—Luka 21:34-36.
20. Esa akɛ wɔda shi yɛ mɛni he, ni Kristofoi agbɛkwɛmɔ kpakpa baabu wɔhe yɛ mɛɛ gbɛ nɔ?
20 Kwɛ miishɛɛ ni Yehowa Odasefoi yɔɔ kɛ bɔ ni esa akɛ amɛda shi yɛ enɛ he akɛ “’tsulɔ” anɔkwafo kuu lɛ ni hiɛ ka ehe nɔ lɛ eha amɛtee nɔ amɛshi kpe yɛ mumɔŋ! Kristofoi agbɛkwɛmɔ kpakpa baabu wɔhe yɛ nɛkɛ “naagbee gbii” ni ji jaramɔ gbii nɛɛ amli, ni ebaakanya wɔ koni wɔkɛ wɔhe awo “maŋtsɛyeli lɛ he sanekpakpa” lɛ shiɛmɔ mii yɛ ekãa naa. Kɛkɛ lɛ wɔbaaye wɔbua mɛi krokomɛi ni amɛshi kpe ni amɛje mli kɛyabote nibii agbɛjianɔtoo hee ni “jalɛ hiɔ mli” lɛ mli.—2 Timoteo 3:1-5; Mateo 24:14; 2 Petro 3:13.b
[Shishigbɛ niŋmaa]
a Kwɛmɔ wolo, “Let Your Kingdom Come,” yitso 14, kɛ naagbee nibii, amlitaomɔ ni afee ni aŋmala ni kɔɔ yitso nɛɛ he ni yɔɔ wolo lɛ naagbee lɛ.
b Ajie kɛjɛ December 1, 1984 Watchtower lɛ mli.
Ani Obaanyɛ Okai?
◻ Mɛni hewɔ esaaa akɛ Kristofoi kuɔ amɛhiɛ amɛshwieɔ be ni kɔɔ Biblia akɔntaabuu he nɔ lɛ?
◻ Mɛɛ shishinumɔ krɛdɛɛ ko wiemɔ “ba ni eba” lɛ baná?
◻ Mɛni hewɔ ni eja gbɛ lolo akɛ aaasɔle akɛ Nyɔŋmɔ Maŋtsɛyeli lɛ aba lɛ?
◻ Te esa akɛ oha mɛi ni wieɔ shiɔ Yehowa Odasefoi yɛ be he akɔntaabuu he lɛ hetoo oha tɛŋŋ?
◻ Mɛni hewɔ oshara yɔɔ shishinumɔ kroko ni akɛaaha bɔ ni wɔbe nɛɛ he hiaa ha lɛ mli lɛ?
[Akrabatsa ni yɔɔ baafa 18]
Nibii ni Esa Akɛ Kristofoi Aya nɔ Ashi he kpe
“Jeŋmaji abe” lɛ naagbee—Luka 21:24.
Ba ni Kristo eba lɛ kɛ ‘nibii agbɛjianɔtoo lɛ naagbee’ lɛ he “okadi.”—Mateo 24:3–25:46
Mɔ ni “tsulɔ anɔkwafo kɛ nilelɔ” kuu lɛ ji yɛ faŋŋ mli.—Mateo 24:45-47.
“Gbɔmɔ Bi lɛ okadi” beni ‘ebaa’ ni ebatsu Yehowa kojomɔi ahe nii.—Mateo 24:30
[Mfoniri ni yɔɔ baafa 17]
C. T. Russell kɛ ehefatalɔi lɛ tee nɔ amɛshi kpe