Miishɛɛ Ji Mɛi Ni Aaana Akɛ Amɛmiishi Kpe!

“Miishɛɛ ji nakai tsuji lɛ ni beni Nuŋtsɔ lɛ aaaba lɛ ni eeebanina amɛ akɛ amɛmiishi kpe lɛ!”​—LUKA 12:​37, NW.

 1. Mɛni hewɔ Yehowa tsuji ‘ekwɛ lɛ gbɛ’ yɛ be fɛɛ mli Iɛ, shi mɛɛ sane abaanyɛ abi yɛ Kristendom sɔlemɔi lɛ ahe?

¹ “YEHOWA lɛ, kojomɔ Nyɔŋmɔ ni. Miishɛɛ ji mɛi fɛɛ ni kpaa lɛ gbɛ lɛ.” (Yesaia 30:​18, NW) Kɛjɛ be mli ni Yehowa tswa adafi akɛ abaakpata Onufu lɛ hiɛ ni akɛ kpɔmɔ atsɔ Shiwoo Seshi lɛ nɔ aba nɛɛ, etsuji anɔkwafoi lɛ ehi shi akɛ mɛi ni miikwɛ nakai shiwoo lɛ mlibaa gbɛ. (1 Mose 3:15) Shi ani Kristendom jamɔ he nilelɔi lɛ miiye kɛmiibua amɛ sɔlemɔi lɛ amlibii lɛ koni amɛshi nakai naagbee kpɔmɔ kɛmiijɛ Satan kɛ eseshi lɛ dɛŋ lɛ he kpe lo?

 2. Mɛni hewɔ esa akɛ “jeŋmaji” le akwɛ “Shilo” lɛ gbɛ lɛ?

² Yakob gba fɔ shi yɛ egbele saa nɔ akɛ Seshi ni awo shi yɛ ehe lɛ baaba kɛtsɔ Yuda akutso lɛ mli. Yɛ be mli ni ekɛ okadi gbɛi ko ni ji Shilo haa Seshi lɛ, Yakob jaje akɛ “ni lɛ toi majimaji lɛ aaabo.” Taakɛ Hela Septuagint Version lɛ tsɔɔ lɛ, Shilo “baafee mɔ ni jeŋmaji lɛ baakpa lɛ gbɛ.” (1 Mose 49:10) Esa akɛ “jeŋmaji” lɛ akpa Shilo lɛ gbɛ waa diɛŋtsɛ ejaakɛ Yehowa kɛɛ Yakob nii ni ji Abraham akɛ: “Ni oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ.” (1 Mose 22:18) Shi klɛŋklɛŋ lɛ esa akɛ nakai Seshi lɛ, Shilo aloo Mesia lɛ aba shikpɔŋ nɔ yɛ Abraham seshibii lɛ ateŋ ni afɔ lɛ awo Yuda akutso mli.

Shwɛɛnii Ko Ni Ji Yudafoi Ni Shiɔ Kpe

 3. Mɛni i nɔ ni Luka wie yɛ Yudafoi lɛ agbɛkwɛmɔ yɛ afi 29 D.B. lɛ he, ni ani yinɔsane yeɔ enɛ he odase?

³ Luka ni ji Yudanyo kɛ yinɔsaneŋmalɔ lɛ jaje akɛ, “Kaisare Tiberio maŋtsɛyeli afi ni ji nyɔŋma kɛ enumɔ [afi 29 Ŋ.B.] lɛ mli lɛ, maŋ lɛ hiɛ ka nɔ ni mɛi lɛ fɛɛ susuɔ he yɛ amɛtsuiŋ yɛ Yohane [Baptisilɔ] lɛ hewɔ akɛ benɛ lɛ ji Kristo [Hebri, Ma·shiʹach, Mesia] lɛ?” (Luka 3:​1, 15) Ani jeŋ yinɔsane yeɔ Luka wiemɔ nɛɛ he odase? Emil Sehurer wolo ni ji History of the Jewish People in the Age of Jesus Christ ni aŋma yɛ Ŋleshi wiemɔ mli ehee lɛ wie akɛ: “Ani nɛkɛ hiɛnɔkamɔ nɛɛ [Mesia lɛ gbɛkwɛmɔ] lɛ hi shi daa yɛ gbɔmɛi lɛ amli?” Yɛ hetoohamɔ mli lɛ ejaje akɛ: “Ebafee nɔ ko ni anyaa he babaoo shikome ekoŋŋ yɛ naagbee afii ohai ni tsɔ Kristofoi abe lɛ hiɛ lɛ mli kɛ agbɛnɛ titri lɛ yɛ A.D. klɛŋklɛŋ afii oha lɛ mli, taakɛ Pseudepigrapha [Yudafoi akpojiemɔ woji], Qumran [Ŋshɔ ni Egbo be mli niŋmaai], Josephus kɛ Sanekpakpai lɛ tsɔɔ yɛ faŋŋ mli kɛ nɔmimaa lɛ. . . . Daniel wolo lɛ mli ninaai . . . lɛ na hewalɛ waa yɛ mesia lɛ he jwɛŋmɔ ni aná yɛ nakai be lɛ mli lɛ nɔ.”

 4, 5. (a) Mɛni hewɔ Yudafoi lɛ kwɛɔ Mesia lɛ gbɛ yɛ nakai be lɛ mli lɛ, ni ama enɛ nɔ mi yɛ mɛɛ gbɛ nɔ? (b) Mɛɛ Mesia ko Yudafoi pii kwa lɛ gbɛ lɛ, shi Yehowa jie anɔkwale Mesia ni baa lɛ kpo etsɔɔ namɛi?

⁴ Yɛ be mli ni ewieɔ Mateo 2:2 he lɛ, woloŋlɛlɔ ko ŋma akɛ: “No mli lɛ aakwɛ mɔ ko gbɛ waa yɛ nɛkɛ be nɛɛ mli, ákɛ anunyam gbɔmɔ ko miihe apue yɛ Yudea. Yudafoi lɛ kɛ hehiamɔ miikwɛ Mesia lɛ baa lɛ gbɛ. Kɛ amɛbu be ni Daniel tsi ta (yitso 9:​25-27) lɛ he akɔntaa lɛ, belɛ amɛle akɛ be ni esa akɛ Mesia lɛ apue lɛ ebɛŋkɛ.” Abaanyɛ awie hu akɛ Roma yinɔsaneŋmalɔi Suetonius kɛ Tacitus, kɛ agbɛnɛ Yuda yinɔsaneŋmalɔi Yosefus kɛ Philo tsi gbɛkwɛmɔ shihilɛ ni yɔɔ nɛɛ ta. French, Manuel Biblique, ni Bacuez kɛ Vigouroux ŋma lɛ, (Kpo 3, baafa 191) ma enɛ nɔ mi, ni ejaje akɛ: “Gbɔmɛi le akɛ otsii nyɔŋmai kpawo ni ji afii ni Daniel kɛma shi lɛ miibɛŋkɛ enaagbee; no hewɔ lɛ, ní amɛaanu akɛ Yohane Baptsilɔ lɛ miitswa adafi akɛ Nyɔŋmɔ maŋtsɛyeli lɛ ebɛŋkɛ lɛ efeee mɔ ko mɔ ko naakpɛɛ.”

⁵ No hewɔ lɛ, yinɔsane mli odaseyeli yɛ ni tsɔɔ akɛ Yudafoi lɛ miikwɛ Mesia lɛ, aloo Shiwoo Seshi lɛ gbɛ, ni ákɛ nɛkɛ gbɛkwɛmɔ nɛɛ hewɔ ni amɛtaoɔ ni amɛna gbalɛa be ko mlibaa lɛ. (Daniel 9:​24-27) Eji anɔkwale, Yudafoi pii ni hi shi yɛ klɛŋklɛŋ afii oha Iɛ mli ni yɔɔ Yudafoi ajamɔ kui sɔrɔtoi lɛ amli lɛ ahiɛ ka maŋkwramɔŋ Mesia ko ni taakɛ átsɔɔ mli yɛ The Concise Jewish Encyclopedia lɛ mli lɛ, “ebaakpata Israel henyɛlɔi fɛɛ ahiɛ koni eto toiŋjɔlɛ kɛ emuuyeli be ko ni hi kɛwula shi ema shi.” Shi shwɛɛnii ni ji Yudafoi anɔkwafoi komɛi miishi kpe kɛmiikwɛ anɔkwale Mesia lɛ gbɛ waa. Amɛteŋ mɛi komɛi ji Zakaria kɛ Elizabet, Yohane Baptisilɔ lɛ fɔlɔi, kɛ agbɛnɛ Simeon, Hana, Yosef kɛ Maria. (Mateo 1:​18-21; Luka 1:​5-17, 30, 31, 46, 54, 55; 2:​25, 26, 36-38) Mɛnɛɛmɛi ji mɛi ni Yehowa ema Daniel be he gbalɛ lɛ nɔ mi eha koni amɛnyɛ amɛshi kpe ni amɛkwɛ Shiwoo Seshi lɛ loo Mesia lɛ baa lɛ gbɛ, “kɛ be falɛ lɛ shɛ lɛ,” shi jeee Yudafoi ajamɔ mli hiɛnyiɛlɔi lɛ.​—Galatabii 4: 4.

Klɛŋklɛŋ Kristofoi Lɛ Akpeshii

 6. Mɛɛ gbɛ nɔ atsɔɔ aleɔ aloo etsɔseɔ gbekɛbii ni ji Yudafoi ni enɛ ye bua mɛi komɛi ni amɛbatsɔmɔ Yesu kaselɔi yɛ mɛɛ gbɛ nɔ?

⁶ Yosef kɛ Maria le akɛ gbekɛ Yesu ni amɛtsɔseɔ lɛ lɛ baatsɔ Mesia lɛ yɛ be ni sa mli. Yɛ be mli ni ewieɔ elɛɛ kɛ tsɔsemɔ he lɛ, The New Encyclopaedia Britannica lɛ kɛɛ akɛ: “Eka shi faŋŋ akɛ Yesu da yɛ Nyɔŋmɔ gbeyeishemɔ ni ena yɛ shia kɛ agbɛnɛ kpeehe lɛ (ni Biblia lɛ kasemɔ, toiboo kɛha Mla lɛ, sɔlemɔ kɛ Mesia lɛ naagbee baa lɛ gbɛkwɛmɔ fata he lɛ mli) .” Atɛo Mesia Iɛ he hiɛnɔkamɔ lɛ awo gbekɛbii krokomɛi hu ni atsɔse amɛ yɛ shwɛɛnii ni ji Yudafoi anɔkwafoi lɛ ashiai amli lɛ amli, ni kɛ hoo lɛ nɛkɛ gbɛkwɛmɔ kpakpa nɛɛ ye bua amɛteŋ mɛi komɛi koni amɛbo tsɛmɔ akɛ amɛbatsɔmɔ Yesu kaselɔi lɛ atoi amrɔ nɔŋŋ.​—Marko 1:​17-20; Yohane 1:​35-37, 43, 49.

 7. (a) Ani Yesu tsɔɔ akɛ Maŋtsɛyeli lɛ yɛ mɔ aŋkro ni ji Kristofonyo lɛ tsui mli? (b) Mɛni ji nɔ ni esa akɛ Kristofoi ashi he kpe lɛ?

⁷ Kɛmiiya eshikpɔŋ nɔ sɔomɔ Iɛ naagbee lɛ, Yesu tsɔɔ ekaselɔi lɛ ni amɛshi kpe amɛkwɛ ‘beni eba’ lɛ kɛ e-Maŋtsɛyeli lɛ baa lɛ gbɛ. Britannica lɛ kɛɛ: “Nɛkɛ blemasaji amli nibii titrii ni kɔɔ je lɛ naagbee he, Naagbee Kojomɔ lɛ kɛ Nyɔŋmɔ jeŋ hee lɛ he lɛ jeee nibii ni bɛ Yesu wiemɔi ni aŋma afɔ shi yɛ Sanekpakpai lɛ amli lɛ mli. No hewɔ lɛ Yesu tsakeko Ŋwɛi Maŋtsɛyeli lɛ efeko lɛ jamɔ mli niiashikpamɔ ko pɛ ni gbɔmɔ aŋkro lɛ susuma lɛ naa, aloo ni ekɛ tsakemɔ wulu ko mli nifeemɔ ni ji su ni yɔɔ je lɛŋ lɛ aloo oti ko ni adesa nine aaashɛ nɔ kɛtsɔ emɔdɛŋbɔɔ nɔ aaatsake Yudafoi anaagbee nibii ahe gbɛkwɛmɔ lɛ yɛ gbɛ ko nɔ. . . . Ekɛ ehe wooo maŋ kome ko mesia ni baa lɛ he hiɛnɔkamɔ mli ni ewooo enɛ feemɔ he hewalɛ hu . . . ni asaŋ efiii mɔdɛŋ ni Yudafoi ni jamɔ eye amɛ sɛkɛ lɛ bɔɔ koni akɛ Nyɔŋmɔ Maŋtsɛyeli lɛ aba oya lɛ hu sɛɛ.” Dabi, ekɛ okadi ni nibii pii yɔɔ mli ha Kristofoi lɛ koni amɛtsɔ nɔ amɛyoo bɔ ni Yerusalem hiɛkpatamɔ ni baa lɛ ebɛŋkɛ eha, kɛ agbɛnɛ yɛ sɛɛ mli kwraa lɛ, koni amɛyoo ‘beni eba lɛ kɛ nibii agbɛjianɔtoo lɛ naagbee lɛ he okadi lɛ.’​—Mateo 24:3 kɛyashi 25:​46; Luka 21:​20-22.

 8. Mɛni tsɔɔ akɛ Yesu heee yeee akɛ ebaaba emaŋtsɛyeli lɛ mli yɛ be kuku ko sɛɛ, no hewɔ lɛ mɛɛ ŋaawoo ekɛha esɛɛnyiɛlɔi lɛ?

⁸ Mɛi ni ekpɛlɛɛɛ jamɔ ko tsɔɔmɔ nɔ lɛ kɛ Kristendom jamɔ he tsɔɔlɔi lɛ ateŋ mɛi komɛi kɛɔ akɛ klɛŋklɛŋ Kristofoi lɛ he ye akɛ Kristo parousia, aloo ba ni eba lɛ miihe aba mli yɛ amɛgbii lɛ amli. Mɛi komɛi po kɛɔ akɛ Yesu diɛŋtsɛ he ye akɛ etsɛŋ ni ebaaba e-Maŋtsɛyeli lɛ mli. Shi Yesu tsɔɔ yɛ ebɛbuai loo enɔkwɛmɔ nii ni kɔɔ talentai lɛ kɛ minai lɛ amli akɛ “yɛ be kakadaŋŋ sɛɛ” ni ji akɛ ebaatsɛ dani ebaaku esɛɛ eba emaŋtsɛyeli hewalɛ mli ni ekɛ etsuji ni ekɛ nitsumɔ ewo amɛdɛŋ lɛ ababu akɔntaa. (Mateo 25:​14, 19; Luka 19:​11, 12, 15, NW) Ni ekpɛlɛ nɔ yɛ egbalɛ ni kɔɔ ‘beni eba lɛ kɛ nibii agbɛjianɔtoo lɛ naagbee lɛ he okadi’ lɛ mli akɛ “no gbi lɛ kɛ no ŋmlɛtswaa lɛ,” “bɔfoi ni yɔɔ ŋwɛi lɛ tete leee, ni Bi lɛ tete leee, ja Tsɛ lɛ kɛkɛ” le be mli ni naagbee lɛ aaaba. Ni ekɛfata he akɛ: “No hewɔ lɛ nyɛshia kpe [nyɛsraa], ejaakɛ nyɛleee nɔ gbi nɔ ni nyɛ Nuŋtsɔ lɛ baa.”​—Mateo 24:​3, 14, 36, 42.

 9. Ani bɔfo Paulo kɛ jwɛŋmɔ ko ha ni tsɔɔ akɛ esusuɔ akɛ Kristo baa lɛ ebɛŋkɛ yɛ egbii lɛ amli? Tsɔɔmɔ mli.

⁹ Yɛ klɛŋklɛŋ Kristofoi lɛ ahemɔkɛyeli ni kɔɔ beni Kristo eba lɛ ni bɛŋkɛɔ lɛ he lɛ, woloŋlelɔi anibii amlipɛimɔb ko tsɔɔ akɛ: “Sane ni haa asusuɔ akɛ Paulo kpa parousia lɛ gbɛ amrɔ nɔŋŋ yɛ 1 Tesalonika lɛ jeee nɔ ni amu naa kwraa. Mra be mli tɔ̃ɔ yɛ 1 Tesalonika 5:10 ni Paulo tsɔɔ akɛ ebaanyɛ egbo. Ni anyɛŋ aje anɔkwale ni eji akɛ beni ewie akɛ ‘wɔ’ taakɛ eyɔɔ 1 Tesalonikabii 4:16 kɛ 17 lɛ belɛ Paulo kɛ ehe miito naagbee yinɔ lɛ he yɛ be mli ní no hu etsɔɔɔ akɛ belɛ lɛ diɛŋtsɛ lɛ efata amɛhe lɛ he ŋwane.” Paulo jaje yɛ ewolo ni ji enyɔ ni eŋma eyaha Timoteo lɛ mli yɛ faŋŋ mli akɛ ehiɛ kaaa nɔ akɛ enine baashɛ enyɔmɔwoo lɛ nɔ kɛyashi “nakai gbi lɛ” aaashɛ, Kristo “puemɔ” gbi lɛ yɛ e-Maŋtsɛyeli lɛ mli, be mli ni “ebaakojo hiɛkalɔi kɛ gbohii” lɛ.​—2 Timoteo 4:​1, 8.

10. Yɛ mɛɛ gbɛ nɔ Kristofoi akpeshii kpakpa fee nɔ ni here klɛŋklɛŋ afii oha lɛ mli Yudafoi ni ji Kristofoi lɛ ayiwala?

¹⁰ Yɛ be mli ni amɛmɛɔ beni Yesu Kristo eba lɛ kɛ e-Maŋtsɛyeli lɛ baa lɛ, esa akɛ Kristofoi ahi shi akɛ mɛi ni hiɛ ka ni shiɔ kpe. Kristofoi ni hiɛ yɔɔ amɛhe nɔ yɛ gbɛ ni ja nɔ lɛ ji nɔ ni ye bua Kristofoi ni ji Yudafoi lɛ ni amɛyoo okadi ni Yesu kɛha ni kɔɔ bɔ ni Yerusalem hiɛkpatamɔ lɛ ebɛŋkɛ eha lɛ. (Luka 21:​20-24) Beni Cestius Gallus batutua Yerusalem yɛ afi 66 Ŋ.B. lɛ, Kristofoi ni wɔɔɔ lɛ ŋɔ nakai hegbɛ ni ba beni egbala ehe shi trukaa kɛtee ni anuuu shishi lɛ, ni amɛjo foi kɛjɛ maŋ lɛ mli kɛ agbɛnɛ kɛjɛ shikpɔŋkukuji ni kamɔ Yudea he lɛ fɛɛ mli. Taakɛ mra be mli sɔlemɔ he yinɔsaneŋmalɔi Hegesippus, Eusebius kɛ Epiphanius tsɔɔ lɛ, Yudafoi ni ji Kristofoi lɛ fo Yordan ni amɛyatao abobaa he yɛ he ko ni atsɛɔ jɛi Pela. Akɛni amɛhiɛ ka yɛ mumɔŋ hewɔ lɛ, no here amɛyiwala kɛjɛ gbele loo nomŋɔɔ mli ni akɛ amɛ aaaya beni Roma asraafoi lɛ ku amɛsɛɛ amɛba yɛ afi 70 Ŋ.B. yɛ Tatsɛ Tito shishi ni amɛbakpata Yerusalem hiɛ lɛ. Kwɛ miishɛɛ ni nɛkɛ Kristofoi nɛɛ baaná akɛni amɛtee nɔ amɛshi kpe hewɔ!

Kristofoi Agbɛkwɛmɔ Yɛ Afi 70 Ŋ.B Sɛɛ

11, 12. Mɛni baafee Kristofoi asu ni ja yɛ Yerusalem hiɛkpatamɔ lɛ sɛɛ yɛ afi 70 Ŋ.B., ni enɛ baabu amɛhe yɛ mɛɛ gbɛ nɔ?

¹¹ Akɛni beni Yesu eba lɛ baaba mli yɛ “be kakadaŋŋ sɛɛ” hewɔ lɛ, mɛni esa akɛ efee Kristofoi asubaŋ ni sa yɛ Yerusalem hiɛkpatamɔ yɛ afi 70 Ŋ.B. lɛ sɛɛ kɛ agbɛnɛ yɛ afii ohai abɔ lɛ fɛɛ mli kɛyashi naagbee be lɛ mli? Ani Kristofoi agbɛkwɛmɔ lɛ he baajɔ, ŋanii? Dabi! Aŋmala bɔfo Yohane woji etɛ lɛ kɛ Kpojiemɔ loo Apokalips lɛ fɛɛ yɛ afi 70 Ŋ.B. sɛɛ. Yohane bɔ kɔkɔ eshi “antikristo” yɛ eklɛŋklɛŋ wolo lɛ mli, ni ekɛɛ Kristofoi lɛ ni amɛhi Kristo mli yɛ be mli ni amɛmɛɔ ‘beni eba’ lɛ kɛ E-puemɔ lɛ. (1 Yohane 2:​18, 28; 8:⁠2) Yohane bɔ kɔkɔ eshi hemɔkɛyeli kwamɔ yɛ ewoji ete lɛ fɛɛ mli. Yɛ Kpojiemɔ lɛ gbɛfaŋ lɛ, kɛjɛ eshishijee kɛyashi enaagbee fɛɛ kɔɔ j Kristo baa yɛ e-Maŋtsɛyeli anunyam mli lɛ he, ni enaagbee wiemɔ kwraa ji: “Amen! Hɛɛ, ba Nuŋtsɔ Yesu!”​—Kpojiemɔ 22:⁠20.

¹² Esa akɛ Kristofoi afee mɛi ni amɛjwɛŋmɔ yɔɔ parousia lɛ nɔ. Ni ji akɛ, esa akɛ amɛhi shi daa gbi akɛ mɛi ni miikwɛ “beni” Kristo “eba” lɛ gbɛ. Ernst Benz, sɔlemɔ yinɔsane he nilelɔ, ŋma akɛ: “‘Naagbee nibii’ lɛ ji klɛŋklɛŋ nii yɛ hehiamɔ mli kɛha klɛŋklɛŋ sɔlemɔ lɛ mli anɔkwafoi lɛ. Nɔ ni ji amɛhemɔkɛyeli kɛ amɛhiɛnɔkamɔ lɛ mli nɔ titri ji Nyɔŋmɔ Maŋtsɛyeli lɛ baa.” Kɛji akɛ Maŋtsɛyeli lɛ baŋ yɛ amɛwala be mli po lɛ, nɛkɛ su ni ja ni kɔɔ gbɛkwɛmɔ lɛ he lɛ baabaa Kristofoi ayi kɛjɛ mumɔŋ wɔdɔiwɔɔ kɛ amɛhe ni amɛkɛ aaawo Satan je nɛɛ mli lɛ he.​—1 Yohane 2:​15-17.

13, 14. Mɛɛ jwɛŋmɔi enyɔ ni eko fɛɛ eko yaa shɔŋŋ tsɔ sɔɔ Kristofoi ni ámɛkwa hemɔkɛyeli Iɛ ateŋ yɛ Ŋ.B. afii ohai enyɔ kɛ etɛ lɛ mli?

¹³ Abaanya akpɛlɛ nɔ akɛ, yɛ be mli ni hemɔkɛyeli kwamɔ lɛ tee nɔ eshwere yɛ bɔfoi lɛ agbele sɛɛ lɛ, eha amɛteŋ mɛi komɛi na susumɔ ko ni ejaaa yɛ bɔ ni Kristo baa yɛ e-Maŋtsɛyeli lɛ mli lɛ ebɛŋkɛ lɛ he. C. J. Cadoux: wie yɛ ewolo ni ji The Early Church and the World lɛ mli akɛ: “Irenaens [afii ohai enyɔ Ŋ.B.] kɛ Hippolytus [afii ohai enyɔ lɛ naagbee kɛ ohai etɛ lɛ shishijee Ŋ.B.] fɛɛ susu akɛ abaanyɛ abu akɔntaa ko ni baafee anɔkwale yɛ be mli ni naagbee lɛ baaba lɛ he.” Mɛi komɛi yɛ ni yɛ akɔntaabuu ni ejaaa hewɔ lɛ, amɛyasusu akɛ adesa yinɔsane be afii 6,000 miihe aba naagbee, ni akɛ afii akpei kpawo lɛ miihe aje shishi. Amɛ akɔntaabuu lɛ ejaaa moŋ, shi kɛ hoo lɛ amɛmiibɔ mɔdɛŋ ni amɛhi shi akɛ mɛi ni hiɛ ka yɛ mumɔŋ.

¹⁴ Yɛ gbɛ kroko nɔ lɛ, Kristofoi ni ji hemɔkɛyeli kwalɔi lɛ ateŋ mɛi pii laaje bɔ ni Maŋtsɛyeli lɛ he hiamɔ kɛ gbɛkwɛmɔ yɔɔ lɛ. Theological Dictionary of the New Testament lɛ kɛɔ wɔ akɛ: “Akɛni Plato jeŋ nilee ni kɔɔ anɔkwale kɛ nilee he lɛ kɛ Stoabii, ajeŋba he mlai lɛ ná Christian Apologist [sɔlemɔ lɛ “tsɛmɛi” ni hi shi yɛ afii ohai enyɔ lɛ kɛ ohai etɛ lɛ shishijee mli] lɛ anɔ hewalɛ hewɔ lɛ, amɛkɛ Nyɔŋmɔ maŋtsɛyeli lɛ he jwɛŋmɔ lɛ efeee nɔ ko. Bei abɔ ni amɛyɔɔ naagbee nibii ahe nilee nɛɛ, nɔ ni yeɔ enɛ nɔ ji emuu ni Kristofonyo mɔ aŋkro lɛ baaye. . . . Hela jwɛŋmɔ ni kɔɔ shihilɛ ni gbele bɛ mli, naanɔ wala kɛ nilee he lɛ he hiaa fe Biblia mli jwɛŋmɔ ni kɔɔ [Nyɔŋmɔ Maŋtsɛyeli], lɛ he lɛ. . . . Nakai nɔŋŋ hu Origen [ni hi shi aaafee 185-254 Ŋ.B.] gbɛfaŋ lɛ, gbɛhe ko kwraa be kɛha Biblia mli sane ni kɔɔ Nyɔŋmɔ maŋtsɛyeli lɛ he lɛ.”

15. Yɛ be mli ni hemɔkɛyeli kwamɔ lɛ yaa nɔ eshwereɔ lɛ, mɛɛ su ji nɔ ni sɔlemɔi wuji ni amɛhe shi lɛ ná yɛ “Naagbee Nibii” ahe tsɔɔmɔ lɛ he?

¹⁵ Titri lɛ, enɛ ji su ni hi shi kɛtsɔ afii ohai abɔ lɛ amli yɛ nɔ ni akɛɛ atsɛɔ lɛ Kristofoi asɔlemɔi lɛ amli. The Encyclopaedia Britannica lɛ jieɔ lɛ kpo akɛ: “Kɛjɛ Roma maŋtsɛ Konstantino (ni gbo 337) lɛ beaŋ kɛbaa nɛɛ, anu bɔ ni maŋkwramɔ ekpɛlɛ Kristo jamɔ nɔ lɛ shishi ákɛ hiɛnɔkamɔ ko ni eba mli yɛ Kristo Maŋtsɛyeli lɛ mli. Naagbee nibii ni baaba yɛ wɔsɛɛ be mli lɛ ahe nilee lɛ tee nɔ ehi shi yɛ jamɔ kui ni anyɛ amɛ nɔ ni no eha ámɛtee amɛhe lɛ amli.” “Kui ni atsɛɔ amɛ jamɔ he musubɔlɔi lɛ folɔ Roma Sɔlemɔ lɛ naa yɛ be ni,tsɔ afii ohai 16 Tsakemɔ be lɛ hiɛ lɛ mli akɛ amɛkwa shishijee naagbee nibii ahe gbɛkwɛmɔ ni ebɛŋkɛ lɛ he jwɛŋmɔ ni ayɔɔ lɛ.”

‘Miishɛɛ Ji Mɛi Ni Aaana Ni Amɛmiishi Kpe’

16. Mɛɛ kui pue yɛ afii ohai 19 lɛ mli, ni mɛni ji nɔ ni amɛteŋ mɛi komɛi heɔ yeɔ?

¹⁶ Akɛni “Kristofoi asɔlemɔi ni amɛhe shi jogbaŋŋ” lɛ eshiii beni Kristo eba lɛ kɛ Maŋtsɛyeli hewalɛ ni enine aaashɛ nɔ lɛ he kpe dɔŋŋ hewɔ lɛ, ashi enɛ aha mɛi ni nakai sɔlemɔi lɛ tsɛɔ amɛ “jamɔ he musubɔlɔi akui” lɛ koni amɛfee nakai. Kui sɔrɔtoi pii ni tamɔ nɛkɛ pue yɛ shikpɔji ni Biblia lɛ yɔɔ jɛmɛ ni gbɔmɛi foji lɛ anine shɛɔ nɔ ni amɛkaseɔ lɛ anɔ yɛ afii ohai 19 lɛ mli. Sɔlemɔi wuji ni amɛhe shi lɛ ni tsɔɔmɔ fɛɛ tsɔɔmɔ ni kɔɔ “Naagbee Nibii” ahe lɛ ebafee nɔ ko ni shishinumɔ bɛ he dɔŋŋ kɛha amɛ lɛ kɛ heguɔgbee tsɛ nɛkɛ kui nɛɛ akɛ adventists aloo millennialists, ejaakɛ nɛkɛ kui nɛɛ miishi Kristo baa ni ji enyɔ lɛ he kpe, ni amɛhe amɛyɛ akɛ bɛ eshɛ ni Kristo baaye maŋtsɛ afii akpe. Kui nɛɛ pii kpa gbɛ akɛ Kristo baaku esɛɛ aba shikpɔŋ nɔ ni ebato e-Maŋtsɛyeli ni baaye afii akpe lɛ ema shi. Mɛi komɛi bu Kristo baa ni ji enyɔ lɛ he akɔntaa akɛ ebaa mli yɛ afi 1835 (Irvingites, yɛ England) , 1836 (Bengel sɛɛnyiɛlɔi, yɛ Germane) , 1843 (Miller sɛɛnyiɛlɔi, yɛ U.S. Amerika) kɛ 1899 (Mennon kuu lɛ yɛ Rusia) .

17, 18. Te Kristendom sɔlemɔi ni amɛhe shi lɛ fee emɛ nii amɛba tɛŋŋ, shi mɛni ji nɔ ni Yesu kɛɛ akɛ ebaatao kɛ ‘eshɛ shi’?

¹⁷ Taakɛ wɔbaakpa gbɛ lɛ, “Kristofoi asɔlemɔi ni amɛhe shi” lɛ nya waa beni nɛkɛ gbalɛi nɛɛ baaa mli ni ana ake eji tɔmɔ lɛ. Yɛ anɔkwale mli Iɛ, Katolek, Ortodɔks ke Protestant Sɔlemɔi lɛ tɔɔɔ yɛ enɛ mli. Ejaakɛ kɛha amɛ lɛ, “Naagbee Nibii” lɛ he tsɔɔmɔ lɛ ji nɔ ko ni “shishinumɔ bɛ mli.” Jeeŋmɔ beebe amɛjɛ amɛkpa ‘kpe ni amɛaashi’ lɛ.​—Marko 13:​37, NW.

¹⁸ Shi Yesu kɛɛ ekaselɔi lɛ akɛ: “Miishɛɛ ji nakai tsuji ni beni Nuŋtsɔ lɛ aaaba lɛ ni eeebanina amɛ akɛ amɛmiishi kpe lɛ! . . . Shi namɔ mɔ ji tsulɔ nukpa anɔkwafo kɛ nilelɔ, ni Nuŋtsɔ lɛ aaawo lɛ onukpa yɛ ewebii anɔ, koni eha amɛ amɛniyenii yɛ be ni sa mli lɛ? Miishɛɛ ji nakai tsulɔ lɛ, mɔ ni kɛ e-Nuŋtsɔ lɛ ba ni eeebanina lɛ akɛ eefee nakai lɛ!”​—Luka 12:​37-43, NW.

19, 20. (a) Mɛɛ kuu pue yɛ 1870 afii lɛ amli, ni mɛni hewɔ amɛtse amɛhe kɛjɛ kui krokomɛi lɛ ahe lɛ? (b) Mɛɛ wolo tɛtrɛɛ bafee kuu nɛɛ wolo titri ni nɛkɛ wolo tɛtrɛɛ nɛɛ etee nɔ eye ebua anɔkwale Kristofoi ni amɛyi faa babaoo lɛ yɛ mɛɛ gbɛ nɔ?

¹⁹ Mɛi ni fata mɛi ni akɛɛ atsɛɔ amɛ jamɔ he musubɔlɔi akui ni miishi kpe kɛmiikwɛ Kristo sɛɛkuu lɛ he ekadi lɛ gbɛ yɛ afii ohai 19 lɛ naagbee mlijaa etɛ mli ekome lɛ mli ji Biblia kasemɔ kuu ko ni Charles Russell ni jɛ Pittsburgh, United States, Amerika lɛ kwɛɔ nɔ lɛ. Russell ŋma akɛ: “Afi 1870 kɛbashi 1875 lɛ ji be ko ni atee nɔ adara yɛ Nyɔŋmɔ kɛ e-Wiemɔ lɛ he duromɔ kɛ nilee kɛ suɔmɔ mli. . . . Shi no mli lɛ kpaako wɔnine shɛɔ bɔ ni Nyɔŋmɔ gbɛjianɔtoo lɛ diɛŋtsɛ yɔɔ lɛ nɔ, ni wɔmiikwa blema tɔmɔi babaoo ni wɔtia wɔha wɔhe lɛ. . . . Eji dɔlɛ sane waa kɛha wɔ yɛ Second Adventists lɛ tɔmɔ lɛ hewɔ, akɛni amɛmiikpa Kristo baa lɛ gbɛ yɛ heloo mli lɛ hewɔ.”

²⁰ Russell kɛ enanemɛi lɛ nu shishi oya akɛ Kristo ba ni eba lɛ baafee nɔ ni akɛ hiŋmɛi enaaa. Amɛtse amɛhe kɛjɛ kui krokomɛi lɛ ahe, ni yɛ afi 1879 lɛ amɛje mumɔŋ niyenii kɛhamɔ shishi yɛ Zion’s Watch Tower and Herald of Christ’s Presence ni amɛbɔi feemɔ lɛ mli. Kɛjɛ klɛŋklɛŋ afi ni abɔi wolo nɛɛ feemɔ lɛ mli tɔ̃ɔ wolo tɛtrɛɛ nɛɛ kɛ enine tsɔɔ kɛtsɔ Ŋmalɛ mli akɔntaabuu nɔ akɛ, be ni ji 1914 baafee be hee ko shishijee yɛ Biblia be he akɔntaabuu mli. No hewɔ Iɛ beni Kristo ba ni eba ni anaaa lɛ lɛ je shishi yɛ 1914 lɛ, nɛkɛ Kristofoi nɛɛ na miishɛɛ waa akɛ ana amɛ akɛ amɛmiishi kpe! Nɔ ni fe afii oha nɛ, ni nɛkɛ wolo tɛtrɛɛ nɛɛ ni agbɛnɛ atsɛɔ lɛ Buu-Mɔɔ​—Eetswa Yehowa Maŋtsɛyeli lɛ he Adafi lɛ etee nɔ eye ebua anɔkwale Kristofoi ni amɛyi faa babaoo lɛ, koni ‘amɛkwɛ jogbaŋŋ’ ni ‘amɛshi kpe.’ (Marko 13:33) Abaasusu bɔ ni áfee nakai aha lɛ he yɛ nikasemɔ ni nyiɛ sɛɛ nɛɛ mlic.

[Shishigbɛ niŋmai]

Sanebimɔi Komɛi ni Akɛtiɔ Mli

◻ Mɛni yeɔ odase akɛ Yudafoi lɛ miikwɛ Mesia lɛ baa gbɛ yɛ klɛŋklɛŋ afii oha lɛ mli?

◻ Kpe ni ashiɔ yɛ enɛ he lɛ ye bua Yudafoi ni ji Kristofoi lɛ yɛ mɛɛ gbɛ nɔ?

◻ Hemɔkɛyeli kwamɔ lɛ na mɛɛ hewalɛ yɛ Kristofoi agbɛkwɛmɔ lɛ nɔ?

◻ Mɛɛ tsulɔ nɛkɛ Kristo baatao yɛ be mli ni naagbee lɛ bɛŋkɛɔ lɛ?

◻ Mɛɛ Kristofoi akuu ko anaa nɛkɛ taomɔ nii nɛɛ yɛ amɛhe, ni kɛ mɛɛ wolo tɛtrɛɛ ko yelikɛbuamɔ?

[Mfoniri ni yɔɔ baafa 12]

Mɛi ni ŋmaa nɛkɛ wolo tɛtrɛɛ nɛɛ etee nɔ amɛfee mɛi ni shiɔ kpe yɛ be fɛɛ mli