Tsɔsemɔ Obi Koni Etu Ehe Eha Nyɔŋmɔ Jamɔ

“Tsɔɔmɔ gbekɛ gbɛ ni esa akɛ etsɔ nɔ, ni kɛ́ egbɔ hu lɛ, ejeŋ nɔ.”​—ABƐI 22:⁠6.

 1. Mɛni ji nɔ ni esa akɛ nine ashɛ nɔ koni anyɛ atsɔse gbekɛ Iɛ yɛ omanyeyeli mli, mɛni hewɔ?

YOO KO ni jieɔ mɛi ahiɛtserɛ yɛ shwɛmɔ he miitsɔɔ ebinuu bɔ ni ayeɔ odiŋ aloo atsotsoroɔ tso kɛ kpãa nɔ ahaa, kɛkɛ ni eyoo akɛ gbekɛ nuu Iɛ nyɛɛɛ atsɔ kpãi Iɛ ateŋ. Yoo nɛɛ wo ebinuu lɛ ŋaa akɛ, “Kɛji akɛ ooofɔ̃ otsui otsɔ̃ kpãi lɛ anɔ lɛ, egbɔmɔtso muu lɛ fɛɛ baanyiɛ sɛɛ.” Nakai nɔŋŋ hu esa akɛ mɛi ni ‘tsɔseɔ’ amɛbi koni etu ehe eha Nyɔŋmɔ jamɔ lɛ akanya tsui lɛ. Enɛ feemɔ wa titri yɛ amɛbalahiiaŋ gbii Iɛ amli.​—Abɛi 4:⁠23.

 2. Mɛni hewɔ obalaŋtaiaŋ afii lɛ ji nɔ ni mli wa waa lɛ, ni mɛɛ gbɛ fɔlɔi baanyɛ atsɔ nɔ aye abua yɛ?

² Tsɛ ko ni ji Kristofonyo ni yoo Germane lɛ wie akɛ: “Afii pii ho ni ewaaa akɛ male nɔ ni yaa nɔ yɛ mibihii lɛ amli. Shi enɛ tsake trukaa tamɔ sarawa gbamɔ ko beni amɛshɛ amɛbalaŋtaiaŋ Iɛ.” Yɛ be ni ajɛɔ mli atsɔɔ onukpa nɛɛ mli Iɛ, akɔnɔ hee kɛ suɔmɔnaa nii sɔrɔtoi ni yɔɔ miishɛɛ ni gbɔmɔtso lɛ mli nibii sɔrɔtoi atsakemɔ kɛbaa nɛɛ naa hewalɛ yɛ gbekɛ lɛ tsui nɔ. Ni kɛlɛ, nɔ ni fɔɔ nɛkɛ afii nɛɛ fitemɔ yɛ be babaoo mli ji tɔmɔi ni kɛ tsuiŋdɔlɛ baa. Hiob anɔkwafo lɛ po ye awerɛho yɛ ‘ebalahiaŋ tɔmɔi lɛ ahe.’ (Hiob 13:26) Henumɔŋ nɔnyɛɛi baanyɛ atee “gbɔmɔ tsui mli ŋkɔmɔyeli” shi yɛ obalanyo aloo obalayoo lɛ mli. Abɛi 12:25 kɛɔ akɛ enɛ haa gbɔmɔ tsui “dɔɔ kɔmɔɔ; shi wiemɔ kpakpa haa emii shɛɔ ehe.” Te ooofee tɛŋŋ ni okɛ sanegbaa kpakpa aye abua obi lɛ yɛ nɛkɛ jaramɔ afii nɛɛ amli?

Sanegbaa Ni Jɛ Tsuiŋ

 3, 4. (a) Gbɛ ni Elihu kɛ Hiob “nanemɛi” etɛ lɛ tsɔ nɔ amɛkɛ amɛŋaawoo lɛ ha lɛ yɛ sɔrɔto yɛ mɛɛ gbɛ nɔ? (b) Mɛni baatsi sanegbaa ni jɛ tsuiŋ lɛ naa?

³ Susumɔ sɔrɔtofeemɔ ni yɔɔ Elihu kɛ Hiob “nanemɛi” etɛ lɛ aŋaawoo lɛ mli lɛ he okwɛ. Enɛ haa nɔ ni baaha aloo ehaŋ sanegbaa aya nɔ lɛ jeɔ kpo faŋŋ. Elihu ji toibolɔ kpakpa. Yɛ be mli ni mɛi krokomɛi lɛ hi shi ni amɛwieee ni amɛkpɛlɛɛɛ amɛ diɛŋtsɛ amɛ adesa fatɔɔi anɔ lɛ, ekɛɛ lɛ akɛ: “Naa, mikɛo ye egbɔ yɛ Mawu gbɛfaŋ; mi hu su nɔŋŋ akɛshɔ mi.” Ewo Hiob hewalɛ koni ‘eha hetoo,’ ejɛ etsuiŋ ewie ni ekashe gbeyei. (Hiob 33:​5-7) Shi yɛ gbɛ kroko nɔ lɛ, “nanemɛi” etɛ Iɛ kwa amɛfee amɛhe mɛi ni miina Hiob mɔbɔ ni amɛmiishɛje emii, amɛkɛ jwɛŋmɔ ni akpɛ mli momo aloo afee momo bo lɛ toi. Hiob kpa amɛfai akɛ, “Nyɛboa miyiyimɔ lɛ toi, ni nyɛkaa toi nyɛbaa naajiemɔ ni jɛɔ minaa lɛ,” shi nɔ ko jɛɛɛ mli baaa. (Hiob 13:⁠6) Hɛɛ, gbɛ ni amɛtsɔ nɔ lɛ tee gbɛtsii nii ko shi.

⁴ Kɛji akɛ fɔlɔ ko kwɛɛɛ jogbaŋŋ lɛ, ebaatee gbɛtsii nii komɛi ashi ni eleee. No hewɔ lɛ, bo obi lɛ toi. (Abɛi 18:13) Susumɔ hetoo ni aaajɛ onaa lɛ he jogbaŋŋ. “Mɔ ko yɛ ni wieɔ bambam, tamɔ adumɔɔ klante; shi nilelɔ lilɛi tsaa mɔ.” (Abɛi 12:18) Eji anɔkwale akɛ yɛ bei komɛi amli lɛ, gbekɛ lɛ subaŋ kɛ ewiemɔi baanyɛ awo omli la. Shi kaimɔ akɛ nɔ ni yɔɔ nɛkɛ “buului awiemɔ” nɛɛ sɛɛ ji tsui ni naagbai eyi lɛ obɔ. No hewɔ lɛ, okɛ olilɛi atsu nii yɛ nilee mli ni okɛtsa mɔ.​—Hiob 6:​2, 3.

 5. (a) Mɛni baaye abua fɔlɔ lɛ koni ele gbekɛ lɛ yiŋtoi ni yɔɔ etsui mli? (b) Yɛ mɛɛ gbɛ nɔ Asafo lɛ woji ni aaabote mli ekoŋŋ lɛ aaaye abua?

⁵ Toiboo kpakpa, ni sanebimɔi yɛ ŋaa mli fata he lɛ baaha gbekɛ lɛ ajie nɔ ni hɔ emli lɛ kpo ni ebaaha efee mlɛo kɛha lɛ akɛ eeewie nɔ ni gbaa enaa lɛ he. (Abɛi 20:⁠5) Nyɛ ko ni ebinuu eye afii 18 lɛ wie akɛ: “Yɛ be babaoo mli lɛ, mibinuu lɛ jeɔ sanegbaa shishi ni ewieɔ nibii ni etamɔ nɔ ni ehe ehiaaa yɛ nakai be lɛ mli lɛ ahe ni bei komɛi lɛ ewieɔ wiemɔ kome aloo enyɔ ko, ekolɛ yɛ sane ko ni eba yɛ skul lɛ he. Shi sane lɛ baka minɔ akɛ mitsɔ mlihilɛ gbɛ nɔ ‘migbala’ nɔ ni yɔɔ etsui mli lɛ ‘kɛje kpo’ kɛtsɔ sanebimɔi ni tamɔ nɛkɛ nɔ, ‘Kɛkɛ ni mɛni ba?’ aloo, ‘Te onuɔ he ohaa tɛŋŋ?’ aloo, ‘Mɛni ofee loo okɛɛ?’ Enɛ ji nɔ ni etaoɔ, kɛkɛ ni eje sanegbaa lɛ he wiemɔ shishi. Shi, enɛ he be babaoo!” Ŋɔɔ be ni tamɔ nɛkɛ oha obi lɛ! Ekolɛ yɛ be mli ni nyɛmiishara shi aloo yɛ be mli ni nyɛmiijɔɔ nyɛhe lɛ, bɔɔ mɔdɛŋ ni ole nɔ ni yɔɔ obi lɛ jwɛŋmɔ mli. Fɔlɔi pii ena akɛ kɛ́ amɛtee sɛɛ amɛkwɛ saji ni Buu Mɔɔ Asafo lɛ woji kɛ́ha yɛ afii ni eho lɛ amli lɛ, eyeɔ ebuaa amɛ ni amɛnuɔ amɛbii lɛ ashishi jogbaŋŋ ni amɛnyɛɔ amɛkɛ amɛ gbaa sane ni shishinumɔ yɔɔ mli. Nɔ ni ejɛ enɛ mli eba ji akɛ sanegbaa ni jɛ tsuiŋ tɔɔ etee hiɛ yɛ wekui pii amli. Shi, nɔ ni fe sanegbaa kpakpa he miihia dani ana hetuu kɛ Nyɔŋmɔ hamɔ aloo atu he aha Nyɔŋmɔjamɔ

Ha Mumɔŋ Tsɔsemɔ Aya Hiɛ

 6, 7. Mɛni Timoteo nyɛ lɛ nyɛ etsu, ni mɛɛ gbɛ nɔ fɔlɔi aaanyɛ atsɔ nɔ akase Iɛ yɛ?

⁶ Timoteo nyɛ jeee mɔ ni kuɔ ehiɛ eshwieɔ mumɔŋ saji ni tsɔɔ wala kɛha ebinuu lɛ anɔ. Awie yɛ Timoteo he akɛ: “Ogbekɛbiiashi ojɛ ole ŋmalɛi krɔŋkrɔŋi lɛ, ni aaanyɛ aha ole nii . . . kɛya yiwalaheremɔ mli lɛ.” (2 Timoteo 3:15) Nakai nɔŋŋ hu ŋmɛnɛ, fɔlɔi ni amɛbii etu amɛhe amɛha Nyɔŋmɔjamɔ lɛ susuɔ amɛ. bii lɛ amumɔŋ tsɔsemɔ he waa. Amɛtsɔɔ amɛ ni amɛ diɛŋtsɛ lɛ amɛkase nii yɛ teemɔŋ kɛjɛ mra be mli beni amɛdara ko.

⁷ Ani okwɛ koni bo diɛŋtsɛ obi Iɛ ana wolo ni akɛkaseɔ Biblia lɛ koni esaa ehe kɛha asafoŋ kpeei? Ani owoɔ lɛ hewalɛ waa koni eto be eha lɛ diɛŋtsɛ ehe koni etsa shi kɛbote Nyɔŋmɔ Wiemɔ lɛŋ fiasei lɛ amli? (Abɛi 2:​1-5; 1 Yohane 2:14) Kɛ nyɛtee kpee lɛ, ani okɛ lɛ taa shi koni owo lɛ hewalɛ yɛ jwɛŋmɔŋ​—kɛ tsui mli​—koni nomɛi akakpa shi? Ani owoɔ lɛ hewalɛ koni ekɛ ehe awo mli? (Hebribii 10:​23-25) Ani nyɛhiɛɔ daa weku nikasemɔ ni kɛ nilee ni sa gbekɛ lɛ hiamɔ nibii krɛdɛɛi haa lɛ amli? Susumɔ nɛkɛ sanebimɔi nɛɛ ahe.​—Abɛi 24:⁠5.

‘Teemɔ Yehowa Mɔ Ni Yɔɔ Diɛŋtsɛ’

 8. Nɛgbɛ ji heni 5 Mose 11:​18, 19 tsɔɔ yɛ akɛ esa akɛ hetuu kɛ Nyɔŋmɔ hamɔ lɛ aje shishi kɛjɛ, ni mɛɛ gbɛ fɔlɔi aaanyɛ atsɔ nɔ amɛkɛ enɛ atsu gbekɛ Iɛ he nii ŋmɛnɛ yɛ?

⁸ Shi, ni akɛ anɔkwalei komɛi aaawo yitsoŋ obɔ̃ kɛkɛ lɛ baaha tsui lɛ kɛ henilee lɛ ashwɛ ni atako he kwraa. Kɛ́ obi lɛ aaana henilee kpakpa lɛ, esa akɛ ena akɛ Yehowa ji mɔ ni yɔɔ hewalɛ fe fɛɛ ni eyɛ lɛ kɛ nɔ ni efeɔ lɛ fɛɛ hu he miishɛɛ waa. Shi, klɛŋklɛŋ lɛ, esa akɛ suɔmɔ kɛha Yehowa ayimɔ bo diɛŋtsɛ otsui mli obɔ ni no atsirɛ bo koni owie esuɔmɔ kwɛmɔ kɛ egbojee lɛ he yɛ be fɛɛ mli. Esa akɛ osumɔ anɔkwale lɛ ni ohi shi yɛ naa. Beni abi nyɛ ko ni yɔɔ England bɔ ni fee ni ebii enyɔ, ni amɛ fɛɛ lɛ amɛji be fɛɛ sanekpakpa jajelɔi lɛ baná suɔmɔ ni mli wa nakai amɛha Nyɔŋmɔ lɛ, etsɔɔ mli akɛ: “Kɛtsɔ bɔ ni miwie Yehowa he akɛ mɔ ni yɔɔ diɛŋtsɛ lɛ nɔ. Eye ebua mi aahu akɛ minyɛŋ nɔ ko mafee akɛ ja miha Yehowa fee mɔ ni yɔɔ diɛŋtsɛ kɛha amɛ. Nɔ fɛɛ nɔ kɔɔ ehe.” Tsɔsemɔ obi lɛ, ni agbɛnɛ hu owie otsɔɔ Yehowa “kɛ sɔlemɔ kɛ faikpamɔ fɛɛ [nyɛsɔlea] daa yɛ mumɔ mli.” (Efesobii 6:18) Ha gbekɛ lɛ anu osɔlemɔi ni yɔɔ anɔkwale ni jɛ tsuiŋ tɔɔ lɛ, ni okɛ lɛ asusu nɔ ni yɔɔ lɛ diɛŋtsɛ enɔ lɛ mli lɛ he.​—5 Mose 11:​1, 2, 18, 19; Abɛi 20:⁠7.

 9. Te fɔlɔi aaafee tɛŋŋ ni amɛkɛ shihilɛ diɛŋtsɛ mli niiashikpamɔi atsu nii ni amɛkɛtsɔse gbekɛ lɛ henilee?

⁹ Nɔkwɛmɔ nii ni anaa yɛ shihilɛ mli diɛŋtsɛ lɛ baanyɛ ana gbekɛ lɛ henilee nɔ hewalɛ waa. (Okɛto 1 Korintobii 8:10 he.) Ye be kɛ bei amli lɛ obaanu aŋkroaŋkroi komɛi ni naa amane yɛ Nyɔŋmɔ mla mlikuu hewɔ lɛ ahe. Obaanyɛ okɛ obi lɛ asusu nibii ni tamɔ nɛkɛ he, eyɛ mli akɛ owieee oshiii mɔ ko moŋ, koni okɛye obua obi lɛ ni eyoo nɔ ni Paulo wiemɔi nɛɛ ji lɛ diɛŋtsɛ shishi: “Onyɛŋ oshishi Nyɔŋmɔ. Nɔ ni oduɔ lɛ no nɔɔ obaakpa.” (Galatabii 6:​7, Beck) Bɔni afee ni onɔkwɛmɔ nɔ lɛ afee nɔ ni hi lɛ, okɛ lɛ fɛɛ asusu Yesu shihilɛ yɛ saji ni yɔɔ Sanekpakpai lɛ amli lɛ he. Obaaye obua obi lɛ ni ena “Kristo jwɛŋmɔ.” (1 Korintobii 2:16) Shi esa akɛ oha saji lɛ afee nɔ ni ŋɔɔ diɛŋtsɛ! Wo gbekɛ lɛ hewalɛ ni efee nibii ni etee nɔ lɛ he mfoniri yɛ ejwɛŋmɔ mli ni esusu gbɛ ni Yesu tsɔ nɔ etsu saji ahe nii yɛ nilee mli lɛ he. Halamɔ saji ni jɛ woji ni adamɔ Biblia nɔ aŋmala lɛ mli ni kɔɔ Yesu shihilɛ kɛ lɛ diɛŋtsɛ esui lɛ ahe, ni bɔni afee ni sɔrɔtofeemɔ aba mli lɛ, obaanyɛ okɛ enɛ atsu nii yɛ nyɛweku nikasemɔ be mli.a

10. Te ooofee tɛŋŋ oye obaa obi lɛ koni “ele Kristo suɔmɔ” lɛ?

¹⁰ Esa akɛ obi lɛ abɔ mɔdɛŋ ni ekase Kristo nɔkwɛmɔ nɔ lɛ. Nɛkɛ gbɛ nɔ pɛ gbekɛ lɛ baatsɔ niiashikpamɔ diɛŋtsɛ nɔ “ele Kristo suɔmɔ ni ta nilee fɛɛ nɔ lɛ.” (Efesobii 3:19) No hewɔ lɛ, wo lɛ hewalɛ ni ekase bɔ ni Yesu nyɛɛɔ mlakwamɔ, esuɔmɔ kɛha gbɔmɛi lɛ, ekaa ni eyɔɔ kɛha e-Tsɛ lɛ jamɔ, kɛ emɔbɔnalɛ kɛ bɔ ni etsui mli lɛɛ ha, kɛ bɔ ni esumɔɔ akɛ eedamɔ hefɛoyeli fɛɛ naa lɛ jogbaŋŋ. (Hebribii 1:9; Marko 6:​34; Yohane 4:​34; Luka 23:​34; 1 Petro 2:23) Kɛ obi lɛ tsu nɔ ko ni tamɔ nakai lɛ, jiemɔ eyi waa. Esa akɛ eyoo akɛ eyɛ mli akɛ wɔyeee emuu moŋ, shi kɛ wɔnyiɛ Nuŋtsɔ lɛ nɔkwɛmɔ nɔ lɛ sɛɛ kpaakpa lɛ, wɔbaana miishɛɛ babaoo, ni wɔhenilee baafee ekpakpa. Wɔtsiɔ kɛbɛŋkɛɔ Nyɔŋmɔ he kpaakpa, ejaakɛ Yesu jieɔ e-Tsɛ lɛ su kɛ baŋ lɛ kpo. (Yohane 14:​6-10) Kaimɔ obi lɛ yɛ be fɛɛ mli ni ebu nɛkɛ wekukpaa nɛɛ akɛ nɔ ko ni jara wa. Taakɛ Kristofonyo nyɛ ko ni yɔɔ bii ejwɛ kɛɛ lɛ: “Miwu lɛ haaa gbi ko aho ni ekɛ enine efɔɔɔ amɛteŋ mɔ fɛɛ mɔ kuɛ ni ekɛɛ lɛ bɔ ni esumɔɔ nakai mɔ lɛ ehaa kɛ bɔ ni ele akɛ Yehowa hu hiɛ baasɔ amɛjeŋba lɛ jogbaŋŋ aha. Ekɛɔ akɛ ‘Yehowa sumɔɔ bo, kaaha enine miinyɛ shi.’”​—Abɛi 27:⁠11.

Bɔ Ni Tsɔsemɔ Ni Suɔmɔ Yɔɔ Mli He Hiaa Ha

11. Mɛni hewɔ tsɔsemɔ he hiaa gbekɛ fɛɛ gbekɛ Iɛ?

¹¹ Yɛ bɔ ni Nyɔŋmɔ tsɔɔ lɛ nii ‘kɛjɛ ebalahiiaŋ’ lɛ fɛɛ sɛɛ lɛ, David tee nɔ esɔle akɛ, “Kaakai mibalahiiaŋ eshai kɛ nɔtɔmɔi lɛ.” (Lala 71:​5, 17; 25:⁠7) Hɛɛ, ‘buulufeemɔ kpɛtɛ gbekɛ fɛɛ gbekɛ tsui he.’ Shi, tsɔsemɔ tso lɛ aaashwie lɛ kɛaajɛ he kɛaatee flooflo.” (Abɛi 22:15) Yɛ be babaoo mli lɛ nɛkɛ “tsɔsemɔ tso” ni ji fɔlɔi ahewalɛ nɛɛ baanyɛ afee wiemɔ ko ni jajeɔ mɔ aloo naatsii ko ni yɔɔ shiŋŋ. No hewɔ lɛ, kɛ gbekɛ lɛ kutumpɔo tsui lɛ miisumɔ akɛ efee nɔ ko ni ehiii lɛ, ehe hiaa ni ofee shiŋŋ, ni okɛɛ akɛ dabi!​—Yeremia 17:9; Abɛi 29:​17, 19, 21.

12, 13. Te ooofee tɛŋŋ oha tsɔsemɔ afee nɔ ni sɛɛnamɔ yɔɔ he?

¹² Yɛ tsɔsemɔ mli lɛ, titri lɛ be mli ni aagbala toi lɛ, nyiɛmɔ Yehowa, mɔ ni ‘jajeɔ yɛ nɔ ni ja naa lɛ’ nɔkwɛmɔ nɔ nɛɛ sɛɛ. Yesaia 28:​26-29 tsɔɔ akɛ etamɔ okwaafonyo ni kɛ nilee tsuɔ nii ni ekɛleɔ nɔ̃ dɛŋdadei loo tso ni ekɛbaatsu nii ni ekɛgbee eŋmaa sɔrɔtoi lɛ kɛ bei abɔ ni esa akɛ egbee, ‘ni jeee daa nɛɛ egbeeɔ ni egbalaa eshwiilii naji lɛ kɛ okpɔŋɔi lɛ kɛtsɔɔ nɔ.’ No hewɔ lɛ bi bo diɛŋtsɛ ohe akɛ: Ani jwɛŋmɔ yɛ naatsii lɛ mli yɛ afii abɔ ni mibi lɛ eye lɛ kɛ bɔ ni eyaa ehiɛ kɛshɛɔ dalɛ he lɛ hewɔ? Ani toigbalamɔ lɛ kɛ nɔfɔŋfeemɔ lɛ kpaa gbee ni agbɛnɛ eŋmɛɔ pɛpɛɛpɛ ni jeee ekolɛ mlifu mikɛfeɔ? Ni ani gbekɛ lɛ le nɔ hewɔ ni agbalaa etoi lɛ diɛŋtsɛ?​—Hiob 6:⁠24.

¹³ Naatsii ni shishinumɔ bɛ mli aloo tsɔsemɔ ni kɛ ehe kpaaa gbee lɛ baawo gbekɛ lɛ mli la.b (Efesobii 6:4; Kolosebii 3:21) Kɛlɛ suɔmɔ ni yɔɔ shiŋŋ lɛ baabu obi lɛ he kɛjɛ shihilɛi ni baaba ni baafite tsɔɔmɔi kpakpai fɛɛ ni okɛto etsui mli lɛ he. Enɛ he miihia titri lɛ yɛ enaanyobɔɔ hewɔ. (Abɛi 13:​20; 28:⁠7) Shi kɛji akɛ yɛ omɔdɛŋbɔɔ lɛ fɛɛ sɛɛ lɛ, gbekɛ lɛ yabote haomɔ diɛŋtsɛ mli hu?

Kɛ Sane Fɔŋ Ko Te Shi

14. Mɛni hewɔ esaaa akɛ fɔlɔ lɛ nijiaŋ jeɔ wui oya kɛ gbekɛ Iɛ kɛ ehe yawo naagba ko ni hiɛdɔɔ yɔɔ mli lɛ mli lɛ?

¹⁴ Nijiaŋwujee kɛ tsuiŋdɔlɛ eha fɔlɔi komɛi eŋmɛɛ amɛbi ni tɔ̃ɔ lɛ he oya. Yɛ be mli ni Yehowa kɛ toigbalamɔ kɛ kamɔ ni sa ha lɛ, eyeee oyai yɛ blema Israel maŋ lɛ ni be ko lɛ amɛtamɔ “binuu” kɛha lɛ lɛ heŋmɛɛmɔ mli. (Hoshea 11:1; 2 Kronika 36:​15, 16; Lala 78:​37, 38; Nehemia 9:​16, 17) Taakɛ bɔ ni blema tsɔselɔi nyɛɔ amɛtoɔ pilamɔi anɔ ni amɛjajeɔ wui yɛ be mli ni foidalɔ ko epila lɛ, nakai nɔŋŋ esa akɛ fɔlɔi abɔ mɔdɛŋ ni “amɛwaje niji ni mli eje wui kɛ nakutsei ni egbɔjɔ lɛ . . . koni akpaketsɛ lɛ akashane, shi moŋ, atsa lɛ.”​—Hebribii 12:​12, 13, NW.

15. Mɛɛ gbɛ fɔlɔ lɛ aaatsɔ nɔ ni ekɛ Galatabii 6:1 atsu nii ni ekɛsaa gbekɛ ni etɔ̃ lɛ?

¹⁵ Kɛ́ ooojaje gbekɛ ni eji “akpaketsɛ” yɛ mumɔŋ ni okaha shihilɛ ni eyɔɔ mli lɛ miifite lɛ, belɛ ebiɔ ni ojaje gbekɛ lɛ jwɛŋmɔ. Paulo wo ŋaa akɛ, “Kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ nyɛsaa nakai mɔ lɛ ekoŋŋ yɛ mlijɔlɛ mumɔ mli.” (Galatabii 6:⁠1) Hela wiemɔ kɛha “nyɛsaa” lɛ hiɛ tsofafeemɔ mli shishinumɔ ko ni akɛtsu nii yɛ Paulo gbii Iɛ amli ‘akɛjaje wui.’ Yɛ anɔkwale mli lɛ, nifeemɔ ni waa mɔ he nɛɛ biɔ hesaa ni fe fɛɛ koni akaha wu ko ni eku miihi shi nakai akɛ kpa ni aje. Nakai shishijee wiemɔ lɛ nɔŋŋ atsɔɔ shishi akɛ “miikpɛ” (yaai) ni “eye emuu.” (Marko 1:​19; 1 Tesalonikabii 3:10) Kɛ ‘oookpɛ’ gbekɛ lɛ tsui lɛ, belɛ, ebiɔ ni okɛ “nitsɔɔmɔ kɛ ŋaa” anina lɛ. Ni okɛ onaabu aaawu enɛ he ta Iɛ, nyiɛmɔ Biblia mli ŋaawoo ni he hiaa nɛɛ sɛɛ: “Tsulɔ lɛ, emli ajɔ mɔ ni toɔ etsui shi ehaa efɔŋ, mɔ ni kɛ mlijɔlɛ wieɔ tsɔɔ mɛi ni kuɔ enaa, akɛ aleenɔ Nyɔŋmɔ aaaha amɛ tsuitsakemɔ ni amɛle anɔkwale lɛ.”​—2 Timoteo 2:​24-26; 3:​16; 4:⁠2.

16. (a) Mɛɛ jajemɔ aloo saamɔ esa okɛ afee koni nine ashɛ gbekɛ ni etɔ̃ lɛ nɔ ekoŋŋ? (b) Mɛni esa akɛ aha efee faŋŋ aha gbekɛ lɛ?

¹⁶ Kɛ fɔlɔ Iɛ aaajaje gbekɛ lɛ susumɔi ni ejaaa lɛ, belɛ, ebiɔ mɔdɛŋbɔɔ diɛŋtsɛ yɛ etsɔsemɔ Iɛ mli. Ehe baahia ni fɔlɔ lɛ afee tsakemɔi yɛ eshihilɛ mli koni egbala ejwɛŋmɔ kɛya gbekɛ lɛ nɔ bɔ ni sa. Yɛ abɛbua ko ni tsɔɔ mɔdɛŋbɔɔ ni sa koni nine ashɛ “eshafeelɔ kome” nɔ ekoŋŋ lɛ mli lɛ, Yesu tsɔɔ bɔ ni yoo ko ŋmɛɛ nɔ fɛɛ nɔ he koni ekɛtao eshika ni laaje lɛ. (Luka 15:​7-10) Gbekɛ ni atsɔse lɛ yɛ Nyɔŋmɔ gbeyeishemɔ mli lɛ baanyɛ aha ehenumɔi akɛ ebafee mɔ ni sɛɛnamɔ ko bɛ ehe yɛ enɔtɔmɔ hewɔ, yɛ be mli ni efɔŋ ni efee lɛ eje kpo lɛ aye enɔ, no hewɔ lɛ ehe baahia ni fɔlɔ lɛ ama esuɔmɔ ni eyɔɔ kɛha ebi lɛ nɔ mi. Ye obua gbekɛ lɛ ni ena akɛ ejeŋba ji nɔ ni asumɔɔɔ shi jeee lɛ diɛŋtsɛ, ni akɛ abaanyɛ ajaje nɛkɛ jeŋba nɛɛ.​—Yuda 23.

17, 18. (a) Mɛɛ gbɛ tsɛ ko tsɔ nɔ esaa ebinuu ekoŋŋ? (b) Mɛni titri kɛ omanyeyeli baa?

¹⁷ Tsɛ ko ni asafo lɛ ka ebinuu hiɛ yɛ jeŋba shara ko hewɔ lɛ je shishi ekɛ gbekɛ lɛ bɔi shishɛramɔ yɛ be babaoo mli, shii abɔ yɛ otsi lɛ mli, ni ekɛ lɛ gbaa saji kakadaŋŋ yɛ miishɛɛ mli. Tsɛ lɛ hala woji ni adamɔ Biblia lɛ nɔ aŋmala ni wieɔ ebinuu lɛ hiamɔ nii krɛdɛɛi lɛ ahe. Tsɛ lɛ kɛ lɛ kase enɛɛmɛi kɛfata nikasemɔ ni tsɛ lɛ kɛ weku muu lɛ feɔ lɛ ni eha ebi lɛ fata he lɛ he. Bɔlɔ lɛ fee tsakemɔi yɛ enitsumɔ akɛ asafoŋ onukpa lɛ mli koni ena be babaoo eha ebinuu lɛ henumɔŋ kɛ jwɛŋmɔŋ nɔkwɛmɔ ni he hiaa lɛ. Anyɛ asaa gbekɛ nuu nɛɛ ekoŋŋ.

¹⁸ Shi yɛ bei komɛi amli lɛ binuu ko loo biyoo ko baanyɛ atsɔ atuatselɔ kwraa, mɔ ni ‘gbeɔ toiboo he guɔ.’c (Abɛi 30:17) Yɛ miishɛɛ mli lɛ, shihilɛi ni yɔɔ keketee nɛkɛ lɛ efɔɔɔ kaa yɛ Nyɔŋmɔ webii ateŋ. Kwɛ bɔ ni enɛ woɔ wɔ hewalɛ akɛ wɔɔle akɛ, yɛ shihilɛi babaoo mli lɛ, kɛji akɛ fɔlɔi lɛ fiii amɛbi lɛ nɔfɔŋfeemɔ lɛ sɛɛ moŋ​—ni amɛnijiaŋ ejeee wui hu yɛ gbekɛ lɛ yelikɛbuamɔ mli, shi amɛkɛ tsuishitoo bɔ mɔdɛŋ akɛ amɛnine aaashɛ enɔ lɛ, eyeɔ omanye babaoo!

Nitsumɔ Ni Wa​—Shi Esa Nakai!

19. Mɛɛ gbɛ nɔ oootsɔ okase Maria nɔkwɛmɔ nɔ lɛ yɛ oweku lɛ kwɛmɔ mli?

¹⁹ Gbekɛbii atsɔsemɔ, titri lɛ yɛ “naagbee gbii” nɛɛ amli lɛ ji nitsumɔ ko ni jeee shwɛmɔ kwraa. Fɔlɔi ni kɛ hiɛdɔɔ tsuɔ gbɛnaa nii nɛɛ ahe nii lɛ sa yijiemɔ! Nyɛyaa nɔ nyɛŋmɛa nibii ni he hiaa nyɛ titri lɛ nyɛkwɛa. Kaaha “nibii babaoo” ni ji heloo gbɛfaŋ nibii ni ekɛaaha mɛi ni osumɔɔ amɛ lɛ he haomɔ miitsio gbɛ yɛ mumɔŋ hegbɛi ni onine shɛɔ nɔ lɛ ni okɛ amɛ aaaná mli gbɛfaŋnɔ lɛ mli. Kaimɔ akɛ, Yesu kɛɛ Marta akɛ “nibii fioo ko pɛ he hiaa, aloo ekolɛ ekome pɛ.” Hɛɛ, niyenii fioo ko kɛkɛ pɛ ji nɔ ni he hiaa. Feemɔ tamɔ Maria, mɔ ni kɛ Yesu na mumɔŋ be kpakpa mli ŋɔɔmɔ lɛ. Halamɔ “nɔ ni hi lɛ” oha oweku lɛ, kɛtsɔ nyɛhe ni nyɛkɛaawo mumɔŋ nitsumɔi amli akɛ weku lɛ nɔ.​—Luka 10:​38-42.

20. Mɛɛ nyɔmɔwoo mɛɔ fɔlɔi ni ji Kristofoi ni yeɔ omanye?

²⁰ Afii komɛi asɛɛ, yɛ be mli ni fɔlɔ ko eye omanye yɛ ebii ekpaa ni eye ebua amɛ koni amɛsumɔ Yehowa lɛ sɛɛ lɛ, enine shɛ wolo ko nɔ kɛjɛ amɛteŋ mɔ kome dɛŋ. Wolo lɛ mli fa ko kaneɔ nɛkɛ: “Awo, misumɔɔ bo naakpa, babaoo fe bɔ ni ooonyɛ osusu. Miidao shi akɛ ohami gbɛtsɔɔmɔ kɛ kudɔmɔ . . . Okɛ hiɛnɔkamɔ ni fe fɛɛ yɛ je lɛŋ he ha mi ni no ji anɔkwale lɛ. Miidao shi akɛ ohere miyiwala.” Kwɛ bɔ ni nyɛ nɛɛ mii aaashɛ ehɛ aahu aha! Taakɛ Abɛi 23:​24, 25 jaje lɛ: “Jalɔ tsɛ aaanya babaoo; ni mɔ ni fɔ bi nilelɔ lɛ, emii aaashɛ ehe yɛ ehewɔ. Ha onyɛ kɛ otsɛ mii ashɛ amɛhe ni mɔ ni fɔo hu anya.” Eba akɛ nɛkɛ miishɛɛ nɛɛ atsɔ onɔ, yɛ Yehowa yelikɛbuamɔ naa!d

[Shishigbɛ niŋmai]

Te Okɛɔ Tɛŋŋ?

◻ Te fɔlɔ ko aafee tɛŋŋ ni ekɛ ebi lɛ agba sane ni jɛ tsuiŋ tɔɔ?

◻ Mɛni baaye abua gbekɛ koni ena henilee kpakpa?

◻ Mɛni baaha tsɔsemɔ afee nɔ ni sɛɛnamɔ yɔɔ he?

◻ Te aaafee tɛŋŋ ajaje gbekɛ ni etɔ lɛ?

[Mfoniri ni yɔɔ baafa 5]

Toiboo kpakpa kɛ́ jeee yɛ be ni sa mli po lɛ, aaawo sanegbaa ni jɛ tsuiŋ tɔɔ lɛ hewalɛ

[Mfoniri ni yɔɔ baafa 7]

Eji kaa diɛŋtsɛ akɛ oooha gbekɛ lɛ anu akɛ asumɔɔ Iɛ koni oshɛ etsui mli yɛ be mli ni etɔ ni hiɛdɔɔ yɔɔ etɔmɔ lɛ mli lɛ