Mɛni Hewɔ Esa Akɛ Wɔshe Nyɔŋmɔ Gbeyei?
NYƐSHEA Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ.” (Kpojiemɔ 14:7) Bɔfo Yohane ni egbɔ lɛ ji mɔ ni nu nɛkɛ wiemɔi ni kanyaa mɔ nɛɛ ahe klɛŋklɛŋ yɛ ninaa ko mli. Ŋwɛi bɔfo ko ni miifiliki yɛ ŋwɛi teŋ ji mɔ ni wie enɛ, ni awiɛ sane nɛɛ atsɔɔ gbɔmɛi pɔtɛɛ komɛi ni yɔɔ wala mli yɛ naagbee be nɛɛ mli. “Nuŋtsɔ lɛ gbi” lɛ shishijee mli—Kpojiemɔ 1:10.
Shi kwɛ bɔ ni nɛkɛ wiemɔi nɛɛ esaaa yɛ mɛi komɛi ahiɛ! Mɛi pii ayiŋ feɔ amɛ kɔshikɔshi po yɛ shihilɛ mli ni Nyɔŋmɔ yɔɔ lɛ he, aahu ni amɛaashe lɛ gbeyei. Kɛha mɛi pii ni kɛɔ akɛ amɛji Kristofoi lɛ, susumɔ akɛ aaashe Nyɔŋmɔ gbeyei lɛ tamɔ nɔ ni ebe eho. Amɛbaanyɛ amɛkpɛlɛ Nyɔŋmɔ suɔmɔ lɛ nɔ. Shi akɛ aaashe lɛ gbeyei lɛ tamɔ Teŋgbɛ Afii lɛ amli susumɔ. Ani nɛkɛ ji bɔ ni osusuɔ sane lɛ he?
Nyɔŋmɔ Gbeyeishemɔ ni Yesu Yɔɔ Lɛ
Kɛji nakai ni lɛ. susumɔ nɔ ni Kristofonyo ni mɔ ko ji lɛ tsɔɔ lɛ he. Taakɛ Biblia lɛ tsɔɔ lɛ,akɛ mɔ ko ji Kristofonyo lɛ tsɔɔ akɛ enyiɛ Yesu nanemaa hei asɛɛ kpaakpa (1 Petro 2:21) Agbɛnɛ, yɛ be mli ni ŋwanejee ko bɛ he akɛ Yesu sumɔɔ Nyɔŋmɔ lɛ, Biblia lɛ feɔ lɛ faŋŋ akɛ esheɔ lɛ gbeyei hu.Yɛ be mli ni Yesaia wieɔ Yesu he yɛ gbalɛ mli lɛ, ekɛɛ akɛ, “nilee kɛ Yehowa gbeyeishemɔ mumɔ lɛ” aaahi enɔ. (Yesaia 11:2) Nɔ ni yɔɔ miishɛɛ lɛ, nɛkɛ gbeyeishemɔ nɛɛ jeee jatsu ko ni ka Yesu nɔ. Esaaa akɛ wɔsusuɔ he yɛ gbɛ ni gbekɛ ko ni sheɔ etsɛ yiwalɔ lɛ gbeyei lɛ aaasusu he lɛ nɔ aloo bɔ ni nɔyelɔ yiwalɔ ko haoɔ maŋbii komɛi lɛ aaasusu he lɛ nɔ. Yɛ anɔkwale mli lɛ,Yesaia gba yɛ Yesu he akɛ: “Ni eeena Yehowa gbeyeishemɔ lɛ he miishɛɛ.” (Yesaia 11:3) Te ooofee tɛŋŋ ona mɔ ko gbeyeishemɔ he miishɛɛ hu?
Anɔkwa sane lɛ ji akɛ yɛ Biblia lɛ mli lɛ, wiemɔ “gbeyeishemɔ” lɛ yɛ shishinumɔi babaoo. Gbɔmɔtsoŋ gbeyeishemɔ ni wɔnaa loo wɔnuɔ he yɛ he mli ni mɔ ko taoɔ aye wɔ awui lɛ yɛ. No hewɔ lɛ Israel asraafoi lɛ “she gbeyei naakpa” yɛ Goliat hewɔ. (1 Samuel 17: 23, 24) Agbɛnɛ tsuifaa yɛ nii ni akpaaa gbɛ loo aleee taakɛ Zakaria nu he yɛ be mli ni Yehowa bɔfo lɛ kɛ lɛ bakpe yɛ sɔlemɔ we lɛ hu yɛ. (Luka 1:11, 12) Shi, gbeyei ni Yesu na kɛha e-Tsɛ lɛ tamɔɔɔ enɛɛmɛi amli eko kwraa.
Shi moŋ shishijee Hebri kɛ Hela wiemɔi ni akɛtsu nii yɛ Biblia lɛ mli aha” gbeyeishemɔ” lɛ kɔɔ woo kɛ bulɛ ni Nyɔŋmɔ gbeyeishemɔ yɔɔ mli he titri. Enɛ ji Nyɔŋmɔ gbeyeishemɔ ni Yesu yɔɔ ni ŋwɛibɔfo lɛ hu woɔ mɔ fɛɛ mɔ hewalɛ ŋmɛnɛ akɛ ena. Nɛkɛ bulɛ loo gbeyeishemɔ nɛɛ heɔ shi yɛ wɔtsui mli kɛ wɔsusu Yehowa nyɛmɔ kɛ ehewalɛ lɛ he ni wɔkɛto wɔ diɛŋtsɛ fɛi ni wɔjeee lɛ he lɛ. Edaa kɛji akɛ wɔjwɛŋ enitsumɔi wuji lɛ ahe, ni eyaa hiɛ hu kɛtsɔɔ sɔlemɔ nɔ ni wɔtsɔɔ wɔkaiɔ anɔkwale ni eji akɛ lɛ ji Jeŋ Muu Fɛɛ Kojolɔ, ni eyɛ hewalɛ ni ekɛaaha wala ni agbɛnɛ ekɛ naanɔ gbele agbala wɔ toi.
Gbeyeishemɔ ni tamɔ nɛkɛ he miihia ejaakɛ etsiɔ wɔ gbɛ koni wɔkafee efɔŋ ni agbɛnɛ wɔkaku wɔhiɛ wɔshwie Nyɔŋmɔ nɔ. Eyeɔ ebuaa wɔ hu koni wɔkwa su ni tamɔ akɛ: ‘Nyɔŋmɔ kɛbaake mi. Ele akɛ mihe waaa,’ yɛ be mli ni wɔkɛ kaai miikpe ni ekolɛ eeeha ni wɔɔŋmɛɛ he moŋ fe ni wɔɔwuu wɔshi kaa lɛ. Taakɛ Abɛi 8:13 kɛɔ wɔ lɛ: “Yehowa gbeyeishemɔ ji akɛ anyɛ efɔŋ.” Ni Abɛi 16:6 kɛfataa he akɛ: “Yehowa gbeyeishemɔ haa mɔ jeɔ efɔŋ he.” Adam kɛ Hawa kɛ nɛkɛ Nyɔŋmɔ gbeyeishemɔ ni hi ni sa nɛɛ tsuuu nii yɛ be mli ni amɛbooo lɛ toi lɛ. Mɛni jɛ mli ba? Amɛnu gbeyeishemɔ kroko ni ehiii he ni amɛyatee amɛhe kɛjɛ ehiɛ. Adam kɛɛ: “Minu ogbee yɛ trom lɛ mli, ni mishe gbeyei.”—1 Mose 3:10.
Hiob ji nuu ko ni tamɔɔɔ Adam kɛ Hawa, shi moŋ ehi shi akɛ anɔkwafo eha Yehowa yɛ kaa ni mli wa fe fɛɛ shishi. Mɛni hewɔ? Yehowa diɛŋtsɛ wie Hiob he akɛ ‘eji nuu ko ni sheɔ lɛ gbeyei ni tsiɔ ehe kɛjɛɔ efɔŋ he.’ (Hiob 1:8; 2:3) Ŋmɛnɛ hu esa akɛ wɔna nɔmimaa akɛ Yehowa baanyɛ akɛɛ nakai nɔŋŋ yɛ wɔhe! Yehowa gbeyeishemɔ sa, ni esa akɛ efee wɔsusumɔ lɛ fa.
Nyɔŋmɔ Gbeyeishemɔ kɛ Gbɔmɔ Gbeyeishemɔ
Nyɔŋmɔ gbeyeishemɔ ji henumɔ ni wɔna kɛjɛ fɔmɔ mli ni haa wɔnuɔ he akɛ wɔyɛ shweshweeshwe taakɛ bɔ ni gbekɛ ko naa henumɔ ni tamɔ nakai kɛjɛɔ etsɛ ŋɔɔ lɛ. Gbeyeishemɔ ni tamɔ nɛkɛ yeɔ ebuaa wɔ ni ejieɔ gbɔmɔ gbeyeishemɔ ni esaaa ni yɛ bei komɛi amli lɛ etsɔɔ tsɔne lɛ kɛyaa. (Abɛi 29:25) Mɔ ko ni ekaseee nii ni tamɔ nɛkɛ ji Uria, Shemaia bi lɛ, ni kɛ Yeremia shiɛ yɛ Yerusalem dani afi 607 D.Ŋ.B. ba lɛ. Uria tamɔɔɔ Yeremia, ejaakɛ eha maŋtsɛ lɛ he gbeyeishemɔ tsɔ lɛ tsɔne. Ekpa shiɛmɔ ni ejo foi kɛjɛ enitsumɔ lɛ he. Yɛ naagbee lɛ, maŋtsɛ lɛ mɔ lɛ ni eha agbe lɛ. (Yeremia 26:20-23) Te aaafee tɛŋŋ ni Uria aaajo nii ni yɔɔ mɔbɔ ni ba enɔ nɛɛ naa foi? Kɛtsɔ Yehowa he gbeyeishemɔ ni eeena ni mli wa fe gbɔmɔ gbeyeishemɔ lɛ nɔ.
Beni atee Yesu shi ni ekwɔ kɛtee ŋwɛi sɛɛ lɛ, ewo esɛɛnyiɛlɔi lɛ ŋaa akɛ “Kaashe amanehulu ni Obaana lɛ eko eko gbeyei.” (Kpojiemɔ 2:10) Yinɔsane feɔ bɔ ni nakai ŋaawoo lɛ he hiaa ha lɛ he nɔkwɛmɔ nɔ, ejaakɛ Kristofoi—kɛjɛ Roma shwɛmɔ hei lɛ kɛyashi Nazi gbokɛlɛfoi aŋsraiaŋ—kɛ shihilɛi ni mli wawai ni yɔɔ gbeyei ekpe. Te fee tɛŋŋ ni amɛnyɛ amɛyɛ gbeyeishemɔ ni amɛhenyɛlɔi lɛ bɔ mɔdɛŋ ni amɛdu amɛwo amɛmli lɛ nɔ kunim? Kɛtsɔ Yesu wiemɔi nɛɛ kɛ nitsumɔ nɔ: “Nyɛkashea mɛi ni gbeɔ gbɔmɔtso lɛ ni no sɛɛ lɛ amɛbɛ nɔ ko ni amɛaanyɛ amɛfee dɔŋŋ lɛ. Shi matsɔɔ nyɛ mɔ gbeyei ni nyɛshe: Nyɛshea mɔ ni kɛ egbe sɛɛ ni eyɔɔ hegbɛ akɛ eeeshɛ efɔ Gehena mli lɛ.”—Luka 12:4, 5.
Atsɔɔ wɔ yɛ Lala 19:10 akɛ: “Yehowa gbeyeishemɔ lɛ he tse, ehiɔ shi kɛyaa naanɔ. Yehowa kojomɔi lɛ anɔkwale ni, fɛɛ ja kwraa.” No hewɔ lɛ nɔ ko bɛ ni ehiii yɛ Yehowa gbeyeishemɔ he. Eyɛ krɔŋŋ ni ebuɔ mɔ he ni ehaa Nyɔŋmɔ tsulɔ lɛ he waa fe ehenyɛlɔi Taakɛ Yesu ji lɛ, Kristofonyo lɛ tsui nyɔɔ emli yɛ nɛkɛ gbeyeishemɔ nɛɛ mli ni enine shɛɔ jɔɔmɔi krokomɛi anɔ kɛjɛɔ Yehowa ŋɔɔ nakai nɔŋŋ.—Yesaia 11:3.
No hewɔ lɛ, eja kwraa akɛ ŋwɛibɔfo lɛ aaawo adesai fɛɛ hewalɛ ŋmɛnɛ akɛ amɛshe Nyɔŋmɔ gbeyei. Kɛ wɔbɛ Nyɔŋmɔ gbeyeishemɔ ni ja lɛ, wɔbaaŋmɛɛ wɔhe wɔha henumɔi gbohii aloo wɔba wɔhe shi wɔha gbɔmɔ gbeyeishemɔ. Kɛ wɔna gbeyeishemɔ ni ja lɛ, ebaaye ebua wɔ ni wɔfee nii yɛ nilee mli. “Yehowa gbeyeishemɔ ji nilee shishijee.” (Abɛi 9:10; Lala 111:10) Lɛlɛŋ, esa akɛ wɔkɛ wɔtsui, wɔsusuma, wɔjwɛŋmɔ kɛ wɔhewalɛ fɛɛ asɔmɔ Nyɔŋmɔ. (Marko 12:30) Esa akɛ wɔkɛ woo kɛ bulɛ aha lɛ aloo, yɛ ŋwɛibɔfo lɛ wiemɔi amli lɛ, “nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ.”—Kpojiemɔ 14:7.
[Mfoniri ni yɔɔ baafa 30]
Eji Uria na Yehowa gbeyeishemɔ ni mli kwɔ kulɛ, gbɔmɔ gbeyeishemɔ etsɔŋ Iɛ tsɔne.