Nyɔŋmɔ Gbeyeishemɔ—Ani Ehe Baanyɛ Aba Sɛɛnamɔ Aba Bo?
“She Nyɔŋmɔ gbeyei ni oye ekitai Iɛ anɔ! Shi enɛ ji gbɔmɛi fɛɛ agbɛnaa.”—JAJELƆ 12:13.
1, 2. (a) Mɛni nɔ esa akɛ wɔjamɔ kɛha Nyɔŋmɔ lɛ adamɔ? (b) Shi mɛni hu Nyɔŋmɔ biɔ? (5 Mose 10:12)
ANI wiemɔ “Nyɔŋmɔ gbeyeishemɔ” lɛ tamɔ wiemɔ ko ni yɔɔ naakpɛɛ kɛha bo? Mɛi pii nuɔ he akɛ kɛji akɛ amɛsumɔɔ Nyɔŋmɔ diɛŋtsɛ lɛ, belɛ ehe ehiaaa ni amɛshe lɛ gbeyei. Ani esa akɛ wɔfee enyɔ lɛ fɛɛ? Kɛji nakai lɛ, Nyɔŋmɔ gbeyeishemɔ he baa sɛɛnamɔ kɛhaa wɔ yɛ mɛɛ gbɛ nɔ?
2 Ŋmalɛi lɛ tsɔɔ akɛ esa akɛ jamɔ kɛ sɔɔmɔ ni wɔkɛhaa Nyɔŋmɔ lɛ adamɔ suɔmɔ nɔ. Yesu fee enɛ faŋŋ be mli ni ekɛɛ wɔ akɛ wɔsumɔ Yehowa kɛ wɔtsui muu lɛ fɛɛ, wɔsusuma, jwɛŋmɔ kɛ hewalɛ fɛɛ lɛ. (Marko 12:30) Shi bɔ ni ehe hiaa akɛ aaashe Nyɔŋmɔ gbeyei lɛ hu ji nɔ ko ni ama nɔ mi yɛ e-Wiemɔ lɛ mli. Akɛɔ wɔ yɛ faŋŋ mli yɛ Jajelɔ 12:13 akɛ: “She Nyɔŋmɔ gbeyei ni oye ekitai lɛ anɔ! Shi enɛ ji gbɔmɛi fɛɛ agbɛnaa.” Ani Yehowa kɛ ehe kpaaa gbee akɛni ebiɔ wɔ ni wɔshe lɛ gbeyei ni wɔsumɔ lɛ yɛ nakai beaŋ nɔŋŋ lɛ hewɔ?
3. Yɛ gbeyeishemɔ he lɛ, mɛni esa akɛ wɔha ahi wɔjwɛŋmɔ mli?
3 Jeee nakai—kɛ wɔha ehi wɔjwɛŋmɔ mli akɛ gbeyeishemɔi sɔrɔtoi yɔɔ lɛ, kɛ gbɔmɛi miijwɛŋ gbeyeishemɔ he lɛ, nɔ ni yɔɔ amɛjwɛŋmɔ mli ji hekpokpomɔ henumɔ ko ni fiteɔ hiɛnɔkamɔ ni jeɔ wɔnijiaŋ wui. Eka shi faŋŋ akɛ Yehowa haŋ wɔnu he nakai yɛ ehe! Wɔ-ŋwɛi Tsɛ lɛ miisumɔ ni wɔba eŋɔɔ taakɛ gbekɛ baaba etsɛ ŋɔɔ, kɛ hekɛnɔfɔɔ yɛ etsɛ lɛ suɔmɔ mli ni yɛ nakai beaŋ nɔŋŋ lɛ, eeeshe gbeyei akɛ eeefee nɔ ko ni esaŋ ehiɛ. Gbeyeishemɔ ni tamɔ nɛkɛ baaye abua wɔ ni wɔhi shi akɛ toibolɔi wɔha wɔŋwɛi Tsɛ lɛ kɛ aaka wɔ ni wɔfee efɔŋ. Enɛ ji ‘Nyɔŋmɔ gbeyeishemɔ’ diɛŋtsɛ ni esa akɛ Kristofoi ana.—Hebribii 5:7; 11:7.
4. Mɛɛ gbeyeishemɔ nɛkɛ suɔmɔ baajie kɛya lɛ?
4 Yehowa tamɔɔɔ kojolɔ ko ni nuuu nii ahe ni gbalaa etsuji atoi be fɛɛ be ni amɛbaatɔ pɛ kɛkɛ. Shi moŋ, esumɔɔ amɛ ni esumɔɔ ni amɛye omanye. No hewɔ lɛ, kɛ wɔtɔ loo wɔfee esha lɛ, esaaa akɛ Nyɔŋmɔ he gbeyeishemɔ tsiɔ wɔnaa koni wɔkawie he wɔtsɔɔ lɛ. (1 Yohane 1:9; 2:1) Bulɛ ni gbeyeishemɔ yɔɔ mli ni oyɔɔ kɛha Yehowa lɛ jeee shwiemɔ loo kamɔ ni aaakawɔ lɛ he gbeyeishemɔ. Yɛ be mli ni wɔkaneɔ yɛ 1 Yohane 4:18 lɛ, ekɛɔ akɛ: “Gbeyeishemɔ bɛ suɔmɔ mli, shi moŋ, suɔmɔ ni eye emuu lɛ shwieɔ gbeyeishemɔ, ejaakɛ gbeyeishemɔ mli yɛ piŋmɔ.” Shi “suɔmɔ ni eye emuu” lɛ ejie bulɛ ni mli kwɔ kɛ gbeyeishemɔ ni sa ni esa akɛ wɔna wɔha lɛ akɛ wɔ-Bɔlɔ kɛ Wala-Halɔ lɛ kɛya.—Lala 25:14.
Susumɔ Emli Sɛɛnamɔi lɛ Ahe
5. (a) Mɛɛ gbɛ pɛ nɔ wɔɔtsɔ wɔna nilee? (b) Mɛni tsirɛ mɔ ko ni tsutsu lɛ ekɛ tsofai fɔji tsuɔ nii lɛ koni etsake eshihilɛ gbɛ ni nilee bɛ mli lɛ?
5 Nyɛhaa wɔsusua sɛɛnamɔi komɛi ni baa kɛjɛɔ “Yehowa he gbeyeishemɔ” mli lɛ ekomɛi ahe. Akɛ nɔkwɛmɔ nɔ lɛ, ehaa wɔnaa anɔkwale nilee. Gbɔmɛi ebɔ mɔdɛŋ yɛ gbɛi sɔrɔtoi anɔ, amɛtsɔ gbɛ fɛɛ gbɛ ni amɛaanyɛ nɔ, ni amɛna nilee ni tamɔ nɛkɛ, shi amɛnine enyɛ shi ejaakɛ amɛkuɔ amɛhiɛ amɛshwieɔ shishijee taomɔ nii ko nɔ: “Yehowa gbeyeishemɔ ji nilee shishijee.” (Lala 111:10; Abɛi 9:10) Susuma bɔ ni gbeyeishemɔ ni tamɔ nɛkɛ ye ebua tsutsu mɔ ko ni kɛ tsofai fɔji tsuɔ nii lɛ koni etsu nii yɛ nilee mli lɛ he. Etsɔɔ mli akɛ: “Yɛ be mli ni miŋɔɔ Yehowa he nilee miwoɔ mimli lɛ, mina gbeyeishemɔ ko miha pilamɔ ni mapila lɛ loo nɔ ko ni mafee ni esaŋ ehiɛ lɛ. Mile akɛ eekwɛ mi, ni miishwe ni akpɛlɛ minɔ yɛ ehiɛ. Etsirɛ mi ni mifite tsofai fɔji ni mikɛtsuɔ nii lɛ fɛɛ kɛtsɔ tiafi mli ni miloo fɛɛ miwo ni mifɔ fɛɛ kɛtee lɛ nɔ. Nɛkɛ nuu nɛɛ ye enifeemɔi gbonyo lɛ anɔ kunim, ejɔɔ ewala nɔ eha Yehowa, ni amrɔ nɛɛ eji sɔɔlɔ yɛ Johannesburg, South Africa.
6. “Yehowa gbeyeishemɔ” baabu wɔhe kɛjɛ nibii gbohii ahe yɛ mɛɛ gbɛ nɔ, ni ebaanyiɛ wɔhiɛ kɛya mɛni he?
6 Ani obaasumɔ ni okwa nɔ ni ehiii? “Yehowa gbeyeishemɔ ji akɛ anyɛ efɔŋ.” (Abɛi 8:13) Hɛɛ, nɛkɛ gbeyeishemɔ ni sa nɛɛ baanyɛ atsio gbɛ kɛjɛ sui gbohii babaoo ni ehiii ni Nyɔŋmɔ buɔ amɛ fɔ, tamɔ sigareti shɛremɔ, tsofai fɔji kɛ nitsumɔ, daatɔɔ, kɛ bɔlɛnamɔ mli jeŋba shara lɛ ahe. Kɛfata Yehowa ni wɔɔsa ehiɛ lɛ he lɛ, oobu ohe kɛmiijɛ nibii ni yɔɔ gbeyei ni baa gbɔmɛi anɔ ni helai ni asheɔ amɛ gbeyei ni amɛkɛ amɛhe haa lɛ fata he lɛ ahe. (Romabii 1:26, 27; 12:1, 2; 1 Korintobii 6:9, 10; 1 Tesalonikabii 4:3-8) Jeee akɛ Nyɔŋmɔ gbeyeishemɔ baaye abua bo ni ebu ohe kɛjɛ nɔ ni ehiii ni ekɔdɔ lɛ he pɛ kɛkɛ, shi moŋ, ebaanyiɛ ohiɛ kɛya nɔ ni he tse, ni ja gbɛ lɛ ahe, ejaakɛ akɛɔ wɔ akɛ “Yehowa gbeyeishemɔ lɛ he tse.”—Lala 19:10.
7, 8. (a) Mɛɛ gbɛ nɔ obalayoo fioo ko kpa shi ni eyoo akɛ “Yehowa gbeyeishemɔ” kɛ mɔ yaa miishɛɛ mli? (b) Tsii sɛɛnamɔi krokomɛi ni baa mɛi ni sheɔ Yehowa gbeyei lɛ anɔ lɛ ekomɛi ata.
7 Miishɛɛ ji oti kroko ni gbɔmɛi pii taoɔ. Te ooofee tɛŋŋ ona enɛ? Nyɔŋmɔ Wiemɔ lɛ kɛɔ akɛ: “Miishɛɛ ji gbɔmɔ ni sheɔ Yehowa gbeyei.” (Lala 112:1; 128:1, New World Translation.) Obalayoo fioo ko ni yeko afii nyɔŋmai enyɔ lɛ niiashikpamɔ yeɔ enɛ he odase. Ekɛ ehe ewo bɔlɛnamɔ ni ejaaa gbɛ lɛ mli yɛ gbɛi sɔrɔtoi anɔ, kɛ agbɛnɛ mumɔi atsɛmɔ kɛ juu. Kɛkɛ ni eje shishi ekase Biblia lɛ ni ena akɛ ehe miihia ni ebo Yehowa toi ni eshe lɛ gbeyei. Ekɛɛ: “Yehowa ni mina mile lɛ ji nɔ ni fe fɛɛ ni eba minɔ. Yehowa ye ebua mi babaoo ni mina anɔkwale lɛ ni mina miishɛɛ hu. Minuɔ he akɛ mihiɛ lɛ nyɔmɔ babaoo diɛŋtsɛ ejaakɛ egbele mihiŋmɛi ni eha mina hegbɛ koni majwɛŋ ni mana lɛ. Miisumɔ ni maye mabua mɛi krokomɛi ni amɛna miishɛɛ ni tamɔ nɛkɛ.”
8 Yehowa wo wɔ shi hu akɛ ebaawo ‘mɛi ni sheɔ egbɛi lɛ gbeyei’ lɛ nyɔmɔ. (Kpojiemɔ 11:18) Kɛfata he lɛ, “Yehowa gbeyeishemɔ kɛ mɔ yaa wala mli; mɔ ni nine eshɛ nɔ lɛ, eeetɔ kɛaawɔ, efɔŋ ebasaraŋ lɛ.” (Abɛi 19:23) Yɛ anɔkwale mli lɛ, “Yehowa gbeyeishemɔ” ji nɔ ni kɛ nii ni he baahia wɔ lɛ fɛɛ baaba abaha wɔ. Kɛ akɛ heshibaa fata he lɛ, nɔ ni jɛɔ mli baa ji “ninamɔ kɛ anunyam kɛ wala.”—Abɛi 22:4; 10:27.
9. Mɛni hewɔ “Yehowa gbeyeishemɔ” kɛ mɔ yaa gbɛ kome pɛ ni yɔɔ shihilɛ mli ni tsɔɔ nilee lɛ nɔ lɛ? (Hiob 28:28; Mika 6:9)
9 Ani enɛ wooo wɔ hewalɛ ni wɔshe anɔkwale Nyɔŋmɔ lɛ gbeyei? Yɛ anɔkwale mli lɛ, “Yehowa gbeyeishemɔ’” ŋɔɔ waa diɛŋtsɛ. Ekɛ mɔ yaa nibii fɛɛ ni kɛ tsui ni nyɔɔ mɔ mli diɛŋtsɛ baaba abaha wɔ lɛ he—niiashikpamɔ ko ni afɔɔɔ namɔ ŋmɛnɛ. Kwɛ bɔ ni mumɔ naa wiemɔi nɛɛ woɔ mɔ hewalɛ ha: “Eyɛ mli akɛ eshafeelɔ feɔ efɔŋ shii oha ni etsɛɔ yɛ jeŋ moŋ, shi kɛlɛ, mile akɛ bɔ fɛɛ bɔ ni fee lɛ mɛi ni sheɔ Nyɔŋmɔ gbeyei, ni amɛsheɔ gbeyei yɛ ehiɛ lɛ, aaahi aha amɛ. Shi ehiŋ haŋ mɔ fɔŋ, ni etsɛŋ yɛ jeŋ, etamɔ hɔɔŋ, ejaakɛ esheee gbeyei yɛ Nyɔŋmɔ hiɛ.” (Jajelɔ 8:12, 13) Namɔ yɔɔ ni lɛ lɛ esumɔɔɔ ni nibii ‘hiɔ haa lɛ’? Mɛi ni sheɔ Nyɔŋmɔ gbeyei lɛ pɛ baana nɛkɛ miishɛɛ niiashikpamɔ nɛɛ mli gbɛfaŋnɔ.—Lala 145:19.
10. Mɛni ji yiŋtoi titrii komɛi ni esa akɛ etsirɛ wɔ ni wɔshe Nyɔŋmɔ gbeyei lɛ ekomɛi?
10 Ani esaaa akɛ enɛ haa wɔtswaa wɔfai shi akɛ wɔbaana gbeyeishemɔ diɛŋtsɛ wɔha wɔŋwɛi Tsɛ Yehowa, hɛɛ, ni wɔhe akpokpo yɛ ehiɛ? Yɛ anɔkwale mli lɛ, esa akɛ.wɔna ehiɛ ni wɔsaŋ lɛ he gbeyeishemɔ ni sa. Wɔhiɛ sɔɔ mlihilɛ kɛ ejurɔ fɛɛ ni efee wɔ lɛ. Nɔ fɛɛ nɔ ni wɔyɔɔ lɛ ba kɛjɛ eŋɔɔ. (Kpojiemɔ 4:11) Agbɛnɛ lɛ ji Jeŋ Muu Fɛɛ Kojolɔ, Ofe lɛ, ni yɔɔ hewalɛ ni ekɛaakpata mɛi ni booo lɛ toi lɛ ahiɛ. Bɔfo Paulo wo hewalɛ akɛ, “Nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛyiwalaheremɔ lɛ he nii.”—Filipibii 2:12; Hoshea 3:5; Luka 12:4, 5.
11. (a) Mɛɛ su esa akɛ Kristofoi akwa yɛ naagbee gbii nɛɛ amli? (b) Mɛɛ su loo mumɔ esa akɛ wɔna?
11 Nɔ ko bɛ ni tsɔɔ yɛ biɛ akɛ wɔbaanyɛ wɔna wala kɛ wɔjie su ni tsɔɔ miishɛɛ ni bɛ, ni wɔfee nibii bibii pɛ kɛ yiŋtoo akɛ nɔ ko kpakpa baajɛ mli aba aha wɔ. Enɛ jeee su ni esa akɛ Kristofoi ni yɔɔ naagbee gbii nɛɛ amli ni miibɔ mɔdɛŋ ni amɛhiɛ amɛkɛ Mɔ ni naa tsui mli tɛɛ ni le amɛteemɔŋ susumɔi kɛ yiŋtoi amli lɛ wekukpaa mli lɛ ajie lɛ kpo. (Yeremia 17:10) Mɛi pɛ ni le Yehowa yɛ gbɛ ni ja nɔ lɛ ji mɛi ni ebaakpɛlɛ amɛnɔ. Ekɛɔ akɛ: “Shi mɔ ni makwɛ nɛ: mɔ ni nii yɔɔ mɔbɔ ni emumɔ tswiaa shi kɛ dɔlɛ, ni ehe kpokpoɔ yɛ miwiemɔ lɛ naa lɛ.”—Yesaia 66:2.
Esa Akɛ Wɔkase Yehowa Gbeyeishemɔ
12. (a) Aduro Israel maŋ lɛ fe maji krokomɛi yɛ mɛɛ gbɛi sɔrɔtoi anɔ? (b) Mɛni ji nɔ ni Yehowa kpaa gbɛ kɛjɛɔ amɛdɛŋ yɛ enɛ hewɔ?
12 Kɛ wɔsusu bɔ ni Yehowa kɛ Israel ye ha lɛ he lɛ, eeenyɛ eye ebua wɔ ni bɔ ni ehe hiaa akɛ wɔshe lɛ gbeyei lɛ aka wɔjwɛŋmɔ mli. Maŋ ko bɛ ni na kwɛmɔ kɛ nɔjwɛŋmɔ kɛjɛ Jeŋ Muu Fɛɛ Maŋtsɛ lɛ ŋɔɔ tamɔ amɛ. (5 Mose 4:7, 8, 32-36; 1 Samuel 12:24) Israelbii lɛ kɛ amɛ diɛŋtsɛ amɛhiŋmɛi na nɔ ni Yehowa fee Mizraimbii lɛ, ni akɛni amɛbɛ gbeyeishemɔ kɛha lɛ hewɔ lɛ, amɛŋɔ ewebii lɛ nom ni amɛwa amɛyi. Mɛni ji nɔ ni ekpaa gbɛ yɛ enɛ sɛɛ? “Ha ni maŋ lɛ, hii kɛ yei kɛ gbekɛbii, kɛ ogbɔ ni yɔɔ ogboi lɛ amli lɛ abua amɛhe naa, koni amɛnu, ni amɛkase, ni amɛshe Yehowa nyɛ-Nyɔŋmɔ lɛ gbeyei, ni amɛjwɛŋ nɔ ni amɛye nɛkɛ mla nɛɛ mli wiemɔi lɛ fɛɛ nɔ, ni amɛbii ni leko lɛ hu anu ni amɛkase, koni amɛshe Yehowa, nyɛ-Nyɔŋmɔ lɛ gbeyei, gbii abɔ ni nyɛaahi shikpɔŋ ni nyɛaafo Yordan nyɛyaŋɔ lɛ nɔ lɛ.”—5 Mose 31:12, 13; 14:23.
13. Mɛni esa akɛ efee nɔ titri ni he hiaa fɔlɔi yɛ amɛbii ahe?
13 Taakɛ eji yɛ Israelbii lɛ agbɛfaŋ lɛ, esa akɛ ŋmɛnɛŋmɛnɛ beaŋ Nyɔŋmɔ tsuji hu “amɛkase ni amɛshe Yehowa . . . gbeyei.” Mɛɛ gbɛnaa nii enɛ kɛfɔɔ wɔ fɛɛ wɔ nɔ nɛkɛ —fɔlɔi lɛ titri! Fɔlɔi, nyɛbia nyɛ diɛŋtsɛ nyɛhe akɛ: ‘Te mafee tɛŋŋ maye mabua mibii ni amɛna tsui ni sheɔ Yehowa gbeyei?’ Gbi ko kɛ amɛdara ni amɛshi shia lɛ, mɛni baafee hebuu nɔ ni fe fɛɛ aha nyɛbii lɛ, yɛ mumɔŋ, jwɛŋmɔŋ loo yɛ heloo naa fe enɛ? Yehowa diɛŋtsɛ maa bɔ ni enɛ he hiaa lɛ nɔ mi beni ekɛ faikpamɔ fataa he lɛ akɛ: “Mina ni kulɛ amɛna nɛkɛ tsui daa, ni amɛkɛshe mi gbeyei, ni amɛye mikitai lɛ fɛɛ nɔ, koni ahi aha amɛ kɛ amɛbii kɛya naanɔ!”—5 Mose 5:29; 4:10.
14. Tsii nɔ kome ko ni esa akɛ fɔlɔi aha ahi amɛjwɛŋmɔ mli yɛ be mli ni amɛtsɔseɔ ni amɛlɛɔ amɛbii ni amɛshe Yehowa gbeyei lɛ ta, ni otsɔɔ gbɛ ni aaatsɔ nɔ akɛ enɛ atsu nii.
14 Kristofonyo fɛɛ Kristofonyo ni baana weku lɛ baakpɛlɛ nɔ amrɔ nɔŋŋ akɛ enɛ jeee nitsumɔ ni yɔɔ mlɛo. Ni kɛlɛ, Nyɔŋmɔ mumɔ naa Wiemɔ lɛ gbalaa fɔlɔi lɛ ajwɛŋmɔ kɛyaa nibii sɔrɔtoi babaoo nɔ. Ekome ji ni amɛje shishi yɛ be mli ni gbekɛbii lɛ darako. Te esa akɛ amɛdaramɔ afee tɛŋŋ? Beni Israelbii lɛ bua amɛhe naa koni amɛbo famɔi ni jɛ Yehowa ŋɔɔ lɛ toi lɛ, “gbekɛbii fata he.” (5 Mose 29:10-13; 31:12, 13) Eka shi faŋŋ akɛ Israel yei kɛ amɛbii baa yɛ nɛkɛ bei nɛɛ amli, ejaakɛ aaabi ni amɛteŋ mɔ fɛɛ mɔ aba. Kɛjɛ “gbekɛbiiashi” tɔɔ amɛbihii kɛ amɛbiyei kaseɔ bɔ ni ehe hiaa akɛ amɛaafee dioo ni amɛbo toi yɛ nɛkɛ henaabuamɔi nɛɛ ashishi. (2 Timoteo 3:15) No hewɔ lɛ, nyɛkɛ nyɛ “gbekɛbii” lɛ ayaa kpeei ashishi. Nyɛhaa amɛkɛ amɛhe awoa shiɛmɔ lɛ mli kɛ amɛaanyɛ amɛfee nakai pɛ. Obalaŋtai pii ekase bɔ ni amɛaafee ni amɛkɛ woji tɛtrɛbii loo dɛhiɛmɔ woji aha, ni amɛfee nakai po dani amɛje skulyaa shishi. Jee shishi mra ni otsɔɔ “obii” lɛ “Yehowa gbeyeishemɔ” yɛ gbɛi bihii anɔ.
15. Mɛni ji nɔ ni ji enyɔ lɛ, ni mɛɛ gbɛ nɔ fɔlɔi aaatsɔ atsu enɛ he nii yɛ?
15 Nɔ kroko ji gbeekpamɔ ni aaahi onifeemɔi amli. Abaanyɛ afee enɛ kɛ wɔkɛ wɔhe kpɛtɛ Nyɔŋmɔ Wiemɔ lɛ he yɛ be fɛɛ mli yɛ tsɔsemɔ kɛ famɔ ni wɔkɛhaa wɔbii lɛ amli lɛ. Kɛ eji hejɔɔmɔ be aloo hiɛtserɛjiemɔ be po lɛ, hiɛmɔ Biblia shishitoo mlai lɛ nɔŋŋ mli ni okɛkudɔ nɔ ni esa akɛ aŋmɛ gbɛ yɛ nɛkɛ bei nɛɛ amli lɛ. (Efesobii 6:4) Enɛ baabi mɔdɛŋbɔɔ, taakɛ Nyɔŋmɔ Wiemɔ lɛ kɛɔ yɛ faŋŋ mli lɛ, beni ekɛɔ akɛ: “Ni nɛkɛ wiemɔi nɛɛ ni miwoɔo he kita ŋmɛnɛ gbi nɛɛ aka otsui nɔ, ni ojwɛŋ nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni oka shi kɛ beni ote shi.” (5 Mose 6:4-9; 4:9; 11:18-21) Gbeekpamɔ ni tamɔ nɛkɛ yɛ afii lɛ amli lɛ baaye abua babaoo koni obii lɛ ana tsui ni sheɔ Yehowa gbeyei.
16. (a) Mɛni ji nɔ ni ji etɛ lɛ, ni mɛni hewɔ enɛ he hiaa waa lɛ? (b) Mɛɛ saji esa akɛ fɔlɔi abi amɛ diɛŋtsɛ amɛhe?
16 Esa akɛ fɔlɔi hu abɔ mɔdɛŋ ni amɛha eka amɛbii lɛ ajwɛŋmɔi kɛ tsuii lɛ amli akɛ amɛ diɛŋtsɛ hu, akɛ fɔlɔi lɛ, amɛji “Yehowa gbeyeishelɔi.” (Lala 22:24) Gbɛ kome ni amɛaatsɔ nɔ amɛfee enɛ ji kɛtsɔ teokrase ŋaawoo kɛ nitsumɔ nɔ yɛ be mli ni amɛtsɔseɔ ni amɛlɛɔ amɛbii lɛ. Enɛ ji nɔ ni ji etɛ ni esa akɛ asusu he. Bi Bo diɛŋtsɛ ohe akɛ: ‘Ani mikɛ mibii lɛ feɔ Biblia mli nikasemɔ daa?’ ‘Ani mikɛ mibii bibii lɛ kaseɔ woji tamɔ My Book of Bible Stories kɛ Tsɔɔlɔ Kpeteŋkpele lɛ Toiboo?’ ‘Yɛ be mli ni amɛdaraa amɛtsɔmɔɔ onukpai lɛ, ani mikɛ wolo ni ji Your Youth—Getting the Best out of It lɛ kɛ “Obalaŋtai Biɔ Akɛ” ni yɔɔ Awake! lɛ mli lɛ tsuɔ nii?’ Ani mitoɔ hiɛtserɛjiemɔ kpakpa ni yeŋ mibii lɛ awui he gbɛjianɔ mihaa amɛ?’ ‘Ani mikpɛlɛ nɔ ni Yehowa gbɛjianɔtoo lɛ kɛɔ yɛ woloŋlee ni yaa hiɛ lɛ nɔ?’ ‘Ani mikɛ tsɔsemɔ nɛɛ miiha mibii lɛ yɛ gbɛ ni sa nɔ?’ ‘Ani otii ni mikɛmamɔ shi miha mibii lɛ ji nɔ ni baaye abua amɛ ni amɛna “Nyɔŋmɔ gbeyeishemɔ”?’—Hebribii 5:7.
17. Who benefit when children learn to fear Jehovah? Illustrate.
17 Sɛɛnamɔi kɛ miishɛɛ baaba, jeee kɛha obii lɛ pɛ kɛkɛ shi moŋ, kɛha ho hu yɛ nɔ fɛɛ nɔ ni ofee ni okɛtsɔse obii lɛ yɛ “Yehowa gbeyeishemɔ” mli lɛ hewɔ. Akɛ nɔkwɛmɔ nɔ lɛ, Odasefonyo ko ni yɛ gbi lɛ naagbee lɛ enuɔ he, taakɛ ekɛɔ lɛ, akɛ ‘ehao lɛ’ buɔ nɔ fɛɛ nɔ akɛ esa jogbaŋŋ yɛ be mli ni yoo nɛɛ nuɔ ebiyoo ni eye afi kpawo lɛ sɔlemɔ ni efeɔ ehaa Yehowa lɛ he lɛ. Yaafonui baa ehiŋmɛi nɔ ni nɔ ko teɔ shi yɛ esɛŋ yɛ be mli ni eboɔ ebiyoo nɛɛ sɔlemɔ toi lɛ: “Suɔmɔ Yehowa, miidao shi kɛha nibii kpakpai fɛɛ ni ofee kɛha mi ŋmɛnɛ lɛ hewɔ. Ni miidao shi yɛ miniyenii lɛ hewɔ. Ye Obua nyɛmimɛi lɛ fɛɛ ni yɔɔ gbokɛlɛfoiatsuiaŋ kɛ ŋsaraŋ lɛ ni amɛna niyenii, Yehowa kɛ nyɛmimɛi hii kɛ nyɛmimɛi yei ni amɛtara loo yɛ shikpɔji krokomɛi anɔ lɛ. Ye obua amɛ hu ni amɛna niyenii ni sa, Yehowa. Kɛ mɛi ni he yeɔ lɛ, ye obua amɛ ni amɛhe awa amɛ koni amɛnyɛ amɛya kpeei. Ofainɛ ha obɔfoi lɛ akwɛ minɔ beni miwɔɔ gbɛkɛ nɛɛ, Yehowa, kɛ mimama kɛ midada, kɛ minyɛminuu kɛ minaa kɛ minii, kɛ nyɛmimɛi hii kɛ yei fɛɛ ni yɔɔ anɔkwale lɛ mli lɛ. Kɛtsɔ o-Bi Yesu nɔ, Amen.”
18. Wɔnaa mɛi krokomɛi anɔ hewalɛ yɛ sane ni kɔɔ Yehowa gbeyeishemɔ he nɛɛ mli yɛ mɛɛ gbɛ nɔ?
18 Yɛ sane ni kɔɔ Yehowa ni aaashe lɛ gbeyei nɛɛ mli lɛ, esa akɛ wɔkai akɛ wɔnaa mɛi krokomɛi anɔ hewalɛ kɛtsɔɔ wɔnɔkwɛmɔ nɔ ni wɔfeɔ lɛ nɔ. Fɔlɔi naa amɛbii anɔ hewalɛ. Onukpai kɛ asafoŋ sɔɔlɔi naa amɛ asafoi anɔ hewalɛ. Nɔkwɛlɔi gbɛfalɔi naa mɛi ni amɛsɔmɔɔ amɛ lɛ anɔ hewalɛ. Eka shi faŋŋ akɛ, enɛ hewɔ ni afa Israel maŋtsɛmɛi akɛ amɛkane Nyɔŋmɔ Mla lɛ yɛ amɛwala be fɛɛ mli bɔni afee ni “amɛkase Yehowa gbeyeishemɔ” lɛ. (5 Mose 17:18-20) Nɔkwɛmɔ nɔ ni maŋtsɛ lɛ aaafee yɛ Yehowa gbeyeishemɔ mli lɛ baasa maŋ muu lɛ fɛɛ he.
19. Yinɔsane yeɔ mɛni he odase yɛ Israelbii lɛ ahe?
19 Yinɔsane yeɔ anɔkwale ni eji akɛ Israel, akɛ maŋ lɛ laaje Yehowa gbeyeishemɔ ni amɛyɔɔ lɛ. Amɛsusu akɛ sɔlemɔtsu ni amɛyɔɔ yɛ Yerusalem lɛ baatsɔ hebuu nɔ aha amɛ, tamɔ “shade” ko, kɛ amɛbo emlai atoi jio, amɛbooo toi jio. (Yeremia 7:1-4; Mika 3:11, 12) Shi amɛsane lɛ ejaaa. Akpata Yerusalem kɛ esɔlemɔtsu lɛ hiɛ. Yɛ sɛɛ mli lɛ, beni akusɛɛ ato amɛ akɛ maŋ ekoŋŋ lɛ, amɛtee nɔ amɛfee mɛi ni ejieee gbeyeishemɔ ni sa kpo amɛtsɔɔɔ Yehowa. (Maleaki 1:6) Babaoo yɛ ni wɔbaakase kɛjɛ nɛkɛ niiashikpamɔ ni wɔbaasusu he yɛ nikasemɔ ni baanyiɛ sɛɛ aba lɛ mli lɛ mli.
20. Te wɔbaamua nɔ hewɔ ni esa akɛ wɔshe Yehowa gbeyei lɛ naa wɔha tɛŋŋ?
20 No hewɔ lɛ, kaimɔ akɛ, Yehowa gbeyeishemɔ gbɔjɔɔɔ suɔmɔ ni wɔyɔɔ kɛha lɛ lɛ; shi moŋ, ewajeɔ ni ewoɔ mli hewalɛ. Toiboo ni wɔɔfee wɔha ekitai fɛɛ lɛ baatsɔɔ akɛ jeee Yehowa gbeyei kɛkɛ wɔsheɔ, shi moŋ, wɔsumɔɔ lɛ hu. Enyɔ lɛ fɛɛ he miihia. Anyɛŋ ana ekome ni ekroko lɛ bɛ mli. No hewɔ lɛ kwɛ bɔ ni ehe hiaa akɛ fɔlɔi aaatɛo Yehowa gbeyeishemɔ kɛ suɔmɔ yɛ amɛbii amli! Ni mɛɛ miishɛɛ kpele enɛ kɛbahaa onukpai kɛ obalaŋtai fɛɛ! Eba akɛ wɔhu wɔɔnu he nakai nɔŋŋ taakɛ lalatsɛ lɛ nu he beni ekɛɛ akɛ: “Feemɔ mitsui ekome, ni mashe ogbɛi lɛ gbeyei!” lɛ.—Lala 86:11.a
[Shishigbɛ niŋmai]
a Ajie kɛjɛ December 1, 1987 Watchtower lɛ mli.
Saji Otii Ni Esa Akɛ Asusu He
◻ Te wɔɔfee tɛŋŋ wɔsumɔ Yehowa ni wɔshe Iɛ gbeyei?
◻ Mɛni ji Yehowa gbeyeishemɔ mli sɛɛnamɔi lɛ ekomɛi?
◻ Mɛɛ saji otii etɛ baaye abua fɔlɔi ni amɛye amɛbua amɛbii ni amɛna tsui ni sheɔ Yehowa gbeyei?
◻ Wɔnaa mɛi krokomɛi anɔ hewalɛ yɛ Yehowa gbeyeishemɔ he sane nɛɛ mli yɛ mɛɛ gbɛ nɔ?
[Mfoniri ni yɔɔ baafa 10]
Yehowa gbeyeishemɔ baaye abua obalaŋtai ni amɛkpoo kaai ni baa amɛnɔ ni amɛfee efɔŋ lɛ
[Mfoniri ni yɔɔ baafa 12]
Esa akɛ fɔlɔi aye abua amɛbii ni amɛna Yehowa gbeyeishemɔ ni ja
[Mfoniri ni yɔɔ baafa 15]
“Mɛi ni sheɔ Nyɔŋmɔ gbeyei, ni amɛsheɔ gbeyei yɛ ehiɛ lɛ, aaahi aha amɛ”—Jajelɔ 8:12
[He ni Sane lɛ Jɛ]
By courtesy of Hartebeespoort Snake and Animal Park