Kwɛmɔ Jogbaŋŋ yɛ Hemɔkɛyeli Kwalɔi Ahe!
Yuda Wolo lɛ mli Saji Otii
ESA akɛ Yehowa tsuji ‘ahi efɔŋ kwraa ni amɛkpɛtɛ ekpakpa he.’ (Romabii 12:9) Bliblia mli niŋmalɔ Yuda ye ebua mɛi krokomɛi koni amɛfee nakai yɛ ewolo ni eŋma kɛjɛ Palestina aaafee afi 65 Ŋ.B. lɛ mli.
Yuda tsɛ ehe “Yesu Kristo tsulɔ kɛ Yakobo nyɛmi.” Eka shi faŋŋ akɛ Yakobo ni ale lɛ jogbaŋŋ nɛɛ ji Yesu Kristo nyɛ bi lɛ. (Marko 6:3; Bɔfoi lɛ Asaji 15:13-21; Galatabii 1:19) No hewɔ lɛ Yuda diɛŋtsɛ ji Yesu nyɛ bi. Shi ekolɛ esusu akɛ esaaa akɛ ekɛ nɛkɛ heloo naa tsakpaa nɛɛ tsuɔ nii, akɛni no mli lɛ Kristo ji mumɔŋ gbɔmɔ ni awo ehiɛ nyam yɛ ŋwɛi lɛ hewɔ. Yuda wolo lɛ wie tɛɛ yɛ ŋaawoo ni ekɛha ni baanyɛ aye abua wɔ ni ‘wɔkpɛtɛ ekpakpa he’ ni wɔkwɛ jogbaŋŋ yɛ hemɔkɛyeli kwalɔi ahe mli.
‘Nyɛpelea Hemɔkɛyeli Iɛ He Waa’
Eyɛ mli akɛ Yuda to eyiŋ akɛ ebaaŋma yɛ yiwalaheremɔ ni Kristofoi ahiɛ ka nɔ lɛ he moŋ, shi ena akɛ ehe miihia ni ewo mɛi ni kaneɔ ewolo lɛ hewalɛ ‘ni amɛpele hemɔkɛyeli lɛ he waa.’ (Yu Kukuji 1-4) Mɛni hewɔ? Ejaakɛ gbɔmɛi komɛi ni sheee Nyɔŋmɔ gbeyei eju shi amɛbabote osafo Iɛ mli ni amɛŋɔɔ “Nyɔŋmɔ duromɔ lɛ amɛbɔɔ nyenyeŋtswi.” Amɛsusu yɛ gbɛ ni ejaaa nɔ akɛ amɛbaanyɛ amɛku Nyɔŋmɔ mlai amli ni amɛhi Nyɔŋmɔ webii ateŋ yɛ nakai beaŋ nɔŋŋ. Ekaba kɔkɔɔkɔ akɛ wɔɔŋmɛɛ wɔhe wɔha susumɔ fɔŋ ni tamɔ nɛkɛ, shi moŋ wɔtiu jalɛ sɛɛ be fɛɛ be, ni wɔda shi akɛ Nyɔŋmɔ tsɔ Yesu la lɛ nɔ ekɛ mɔbɔnalɛ fɔ wɔhe eshai lɛ eshwie.—1 Korintobii 6:9-11; 1 Yohane 1:7.
Kɔkɔbɔɔi ni Akɛmamɔ Wɔhiɛ
Ehe miihia ni wɔkwɛ wɔhe nɔ jogbaŋŋ yɛ sui, jeŋbai kɛ gbɔmɛi komɛi ahe. (Kukuji 5-16) Akɛni Israelbii komɛi ni ahere amɛyiwala kɛjɛ Mizraim lɛ bɛ hemɔkɛyeli hewɔ lɛ, akpata amɛhiɛ. Akɛ “naanɔ kpai efimɔ” ŋwɛibɔfoi ni shi amɛgbɛhei ni sa lɛ, ni akɛ amɛ “eto (mumɔŋ] duŋ kpii mli eha gbi wulu lɛ nɔ kojomɔ lɛ.” Jeŋba shara ni ehiii kwraa kɛ “naanɔ la mli nyɔmɔwoo” ba Sodom kɛ Gomora nɔ. No hewɔ lɛ, nyɛhaa wɔsaa Nyɔŋmɔ hiɛ yɛ be fɛɛ mli, ni wɔkashi “wala gbɛ lɛ” kɔkɔɔkɔ.—Lala 16:11.
Ákɛ mɛi ni tamɔɔɔ bɔfonukpa Mikael, ni kɛ kojomɔ baŋ Abonsam nɔ yɛ jɛmɔ wiemɔi amli lɛ, gbɔmɛi ni sheee Nyɔŋmɔ gbeyei nɛɛ wieɔ “anunyambii’ ni eka shi faŋŋ akɛ amɛji mɛi ni Nyɔŋmɔ kɛ Kristo ewo amɛhiɛ nyam akɛ onukpai ni afɔ amɛ mu lɛ ahe musubɔɔ wiemɔi. Nyɛhaa wɔjiea bulɛ kpo wɔtsɔɔa hegbɛ ni Nyɔŋmɔ kɛha lɛ!
Gbɔmɛi ni sheee Nyɔŋmɔ gbeyei lɛ nyiɛɔ Kain, Bileam, kɛ Kora nɔkwɛmɔ nɔ fɔŋ lɛ sɛɛ. Amɛhe yɛ gbeyei yɛ mumɔŋ tamɔ tɛsaai ni etee amɛhe yɛ nu shishi kɛ atatui ni nu bɛ mli kɛ tsei ni egboi ni afamɔ amɛshishifai ni wooo yibii ko kwraa. Nakai hemɔkɛyeli kwalɔi lɛ hu tamɔ krɔlɔi, huhuuhuwielɔi, kɛ ‘gbɔmɛi ni kwɛɔ mɛi ahiɛŋtsei anɔ yɛ amɛ diɛŋtsɛ amɛsɛɛnamɔ hewɔ.’
Nyɛyaa nɔ Nyɛtea Shi Nyɛwoa Amɛ
Yɛ no sɛɛ lɛ Yuda kɛ ŋaawoo ha yɛ bɔ ni aaafee ate shi awo hewalɛ fɔŋ ni amɛnaa yɛ mɛi anɔ lɛ. (Kukuji 17-25) Hefɛoyelɔi baaba yɛ “naagbee be lɛ mli,” ni esa akɛ anɔkwa Kristofoi aŋmɛ amɛtsui shi yɛ enɛ kɛ amɛhefɛoyeli wiemɔi lɛ amli ŋmɛnɛ. Kɛ wɔɔnyɛ wɔte shi wɔwo hewalɛ fɔŋ ni tamɔ nɛkɛ lɛ, belɛ esa akɛ wɔtswa wɔhe wɔma shi yɛ wɔ “hemɔkɛyeli ni yɔɔ krɔŋkrɔŋ fe fɛɛ lɛ nɔ,” ni wɔkɛ mumɔ krɔŋkrɔŋ asɔle, ni wɔhi Nyɔŋmɔ suɔmɔ lɛ mli, yɛ be mli ni wɔmɛɔ ni ajie Yesu mɔbɔnalɛ lɛ kpo lɛ.
Eka shi faŋŋ akɛ, akɛ apasa tsɔɔlɔi lɛ, gbɔmɛi ni sheee Nyɔŋmɔ gbeyei lɛ ha mɛi komɛi ayiŋ fee amɛ kɔshikɔshi (Okɛto 2 Petro 2:1-3 he.) Ni mɛni he hiaa mɛi ni amɛyiŋ feɔ amɛ kɔshikɔshi lɛ? Mumɔŋ yelikɛbuamɔ koni asha amɛ kɛjɛ “la” ni ji naanɔ hiɛkpatamɔ lɛ mli! (Mateo 18:8, 9) Shi ehe ehiaaa ni mɛi ni sheɔ Nyɔŋmɔ gbeyei lɛ ashe nɔ ni baa amɛnɔ nɛɛ gbeyei, ejaakɛ Yehowa baabu amɛhe koni ‘amɛkatɛrɛ’ kɛmiibote esha kɛ hiɛkpatamɔ ni mɛɔ hemɔkɛyeli kwalɔi lɛ mli.
[Akrabatsa ni yɔɔ baafa 31]
Tɛsaai ni Etee Amɛhe: Yuda bɔ enanemɛi Kristofoi lɛ kɔkɔ yɛ ‘tɛsaai ni etee amɛhe yɛ nui ashishi yɛ amɛ suɔmɔ niyenii lɛ ashishi’ lɛ he. (Yuda 12, New World Translation) Akɛni amɛkwa amɛfeɔ amɛhe mɛi ni yɔɔ suɔmɔ kɛha heyelilɔi lɛ hewɔ lɛ, hemɔkɛyeli kwalɔi ni tamɔ nɛkɛ lɛ tamɔ nui ashishi tesaai ni naa ba ni baanya abutu lɛji loo egba ni egbe mɛi ni sereɔ loo amɛwuɔ faa. Suɔmɔ niyenii lɛ baanyɛ afee okpɔlɔŋmɛɛ ni Kristofoi ni yɔɔ nii lɛ tsɛɔ amɛnanemɛi ohiafoi lɛ kɛbaa shishi. Sɔlemɔ Onukpa Chrysostom (347?-407 Ŋ.B.) kɛɛ: “Amɛ fɛɛ amɛkpeɔ yɛ okpɔlɔŋmɛɛ kome shishi: mɛi ni yɔɔ nii lɛ kɛ nibii baa, ni afɔɔ nine atsɛɔ ohiafoi kɛ mɛi ni bɛ nɔ ko lɛ kɛbaa shishi, ni amɛ fɛɛ amɛyeɔ nii kutuu.” Bɔ fɛɛ bɔ ni mra be mli suɔmɔ niyenii nɛɛ ji ha lɛ, Yuda kɔkɔbɔɔ lɛ ye bua anɔkwafoi lɛ koni amɛhiɛ ahi amɛhe nɔ yɛ hemɔkɛyeli kwalɔi, ‘tɛsaai ni etee amɛhe’ ni baanyɛ ni amɛkɛ mumɔŋ gbele aba nɛɛ ahe. Eyɛ mli ákɛ akɛ famɔ haaa Kristofoi akɛ amɛto suɔmɔ niyenii ahe gbɛjianɔ, ni amɛfeee nakai ŋmɛnɛ moŋ, shi kɛlɛ Yehowa webii yeɔ buaa amɛhe yɛ heloo naa yɛ fimɔ bei amli ni amɛkɛ amɛhe bɔɔ yɛ miishɛɛ mli.