Yuda Wolo Lɛ

1 Yuda, Yesu Kristo nyɔŋ ni ji Yakobo nyɛmi lɛ,+ kɛ wolo nɛɛ miimaje mɛi ni atsɛ amɛ+ ni Nyɔŋmɔ ni ji wɔ-Tsɛ lɛ sumɔɔ amɛ, ni abaa amɛyi ahã Yesu Kristo lɛ:+

2 Mɔbɔnalɛ kɛ toiŋjɔlɛ kɛ suɔmɔ aya nɔ afa ahã nyɛ.

3 Mɛi ni asumɔɔ, kulɛ miibɔ mɔdɛŋ waa akɛ maŋma nyɛ wɔ fɛɛ wɔyiwalaheremɔ lɛ he sane,+ shi mina akɛ ehe miihia waa ni maŋma nyɛ kɛwo nyɛ hewalɛ ni nyɛmia nyɛhiɛ waa kɛwu hemɔkɛyeli lɛ ni akɛhã mɛi krɔŋkrɔŋi lɛ shi kome nyɔŋlo lɛ he ta.+ 4 Nɔ hewɔ ji akɛ mɛi komɛi eju shi kɛbabote nyɛteŋ, mɛi ni Ŋmalɛ lɛ ejɛ jeeŋmɔ beebe ewie amɛhe akɛ abaakojo amɛ lɛ; amɛbuuu Nyɔŋmɔ, ni amɛkɛ Nyɔŋmɔ dromɔ lɛ jieɔ amɛnaa ni amɛkɛ amɛhe woɔ jeŋba gbonyo ni efeee mɔ hiɛgbele mli,*+ ni amɛyeee Yesu Kristo, mɔ ni nii ji wɔ, ni eji wɔ-Nuŋtsɔ kome pɛ lɛ anɔkwa.+

5 Eyɛ mli akɛ nyɛle enɛ fɛɛ moŋ, shi miisumɔ ni makai nyɛ akɛ Yehowa* here mɛi kɛje Ejipt shikpɔŋ lɛ nɔ,+ shi sɛɛ mli lɛ, ekpãtã amɛteŋ mɛi ni heee yeee* lɛ ahiɛ.+ 6 Ni ŋwɛibɔfoi ni eyaaa nɔ amɛhiii amɛgbɛhe ni akɛhã amɛ lɛ, shi moŋ amɛshi amɛ diɛŋtsɛ amɛshihilɛhe lɛ,+ ekɛ naanɔ kpãi efimɔ amɛ yɛ duŋ kpii mli kɛhã gbi wulu lɛ nɔ kojomɔ lɛ.+ 7 Nakai nɔŋŋ Sodom kɛ Gomora kɛ maji ni jwere amɛhewɔ lɛ hu kɛ amɛhe wo ajwamaŋbɔɔ* mli vii, ni amɛdi nibii ni heloo lɛ shweɔ ni kɛ adebɔɔ gbɛjianɔtoo eyaaa lɛ asɛɛ;+ akɛ naanɔ la* gbala amɛtoi, ni eji nɔkwɛmɔnɔ ni bɔɔ wɔ kɔkɔ.+

8 Enɛ fɛɛ sɛɛ lɛ, mɛi nɛɛ hu laa lamɔi, amɛbuleɔ heloo lɛ, amɛbuuu nɔyeli, ni amɛwieɔ amɛshiɔ anunyam gbɔmɛi.+ 9 Shi be ni ŋwɛibɔfonukpa+ Mikael+ kɛ Abonsam taa naa ni amɛpeleɔ Mose gbonyo lɛ he lɛ,+ ekaaa akɛ ebaakojo lɛ ni ejɛɛɛ lɛ hu,+ shi moŋ ekɛɛ akɛ: “Yehowa* akã ohiɛ.”+ 10 Shi mɛi nɛɛ gbeɔ nibii fɛɛ ni amɛnuuu shishi diɛŋtsɛ lɛ ahe guɔ.+ Ni yɛ nibii fɛɛ ni amɛnuɔ shishi yɛ amɛfɔmɔ su naa lɛ agbɛfaŋ lɛ, amɛtamɔ kooloi ni bɛ jwɛŋmɔ,+ ni amɛyaa nɔ amɛbuleɔ amɛhe yɛ nibii nɛɛ amli.

11 Kpoo hã amɛ, ejaakɛ amɛkɔ Kain gbɛ lɛ,+ ni amɛhe efee oya kɛkɔ Bileam gbɛ gbonyo+ lɛ yɛ sɛɛnamɔ hewɔ, ni amɛhiɛ ekpãtã akɛni amɛwieɔ atuatsemɔ wiemɔi+ tamɔ bɔ ni Kora fee lɛ hewɔ!+ 12 Mɛnɛɛmɛi kɛ nyɛ yeɔ nii yɛ nyɛsuɔmɔ okpɔlɔŋmɛi lɛ ashishi, shi amɛji tɛsai ni etee yɛ nu shishi,+ tookwɛlɔi ni lɛɔ amɛ diɛŋtsɛ amɛhe ni amɛsheee gbeyei;+ atatui ni nu bɛ amɛmli ni kɔɔyɔɔ kpalaa amɛ kɛyaa kɛbaa;+ tsei ni wooo yibii yɛ amɛyibiiwoo beiaŋ, ni amɛgboi shii enyɔ,* ni afãmɔ amɛ kɛ amɛshishifãi; 13 ŋshɔkei ni yɔɔ hamahama ni tswaa afui, ni jieɔ amɛ diɛŋtsɛ amɛhiɛgbejianii amɛshwieɔ;+ ŋulamii ni kpaa shi kɛkɛ, ni duŋ kpii lɛ mli amɛbaahi kɛya naanɔ.+

14 Hɛɛ, Henok,+ mɔ ni ji mɔ kpawo nɔ kɛjɛ Adam nɔ lɛ hu gba yɛ amɛhe be ni ekɛɛ akɛ: “Naa! Yehowa* kɛ ekrɔŋkrɔŋbii akpei nyɔŋmai abɔ lɛ ba+ 15 koni ebakojo mɛi fɛɛ,+ ni ebu mɛi fɛɛ ni ebuuu Nyɔŋmɔ lɛ fɔ yɛ amɛnishaianii fɛɛ ni amɛfee kɛtsɔɔ akɛ amɛsheee Nyɔŋmɔ gbeyei lɛ, kɛ wiemɔi ni wawai fɛɛ ni nɔshafeelɔi ni ebuuu Nyɔŋmɔ lɛ wie amɛshi lɛ lɛ hewɔ.”+

16 Mɛi nɛɛ wieɔ huhuuhu,+ amɛhiɛ esɔɔɔ shihilɛ mli ni amɛyɔɔ lɛ, amɛnyiɛɔ nibii ni amɛ diɛŋtsɛ amɛshweɔ lɛ asɛɛ,+ amɛnaabu wieɔ naafuu wiemɔi, ni yɛ nakai beiaŋ nɔŋŋ lɛ, amɛwoɔ mɛi ayiteŋ mulu* yɛ amɛ diɛŋtsɛ amɛsɛɛnamɔ hewɔ.+

17 Shi mɛi ni asumɔɔ, nyɛ lɛ, nyɛkaia wiemɔi ni wɔ-Nuŋtsɔ Yesu Kristo bɔfoi lɛ wie be ko ni eho* lɛ, 18 bɔ ni amɛfɔɔ nyɛ kɛɛmɔ akɛ: “Yɛ naagbee be lɛ mli lɛ, hefɛoyelɔi baaba, mɛi ni baanyiɛ nibii fɔji ni amɛ diɛŋtsɛ amɛshweɔ lɛ asɛɛ” lɛ.+ 19 Mɛnɛɛmɛi ji mɛi ni kɛ mligbálamɔi baa,+ mɛi ni feɔ amɛnii tamɔ kooloi,* mɛi ni mumɔ lɛ etsɔɔɔ amɛ gbɛ lɛ.* 20 Shi mɛi ni asumɔɔ, nyɛ lɛ, nyɛtswaa nyɛhe nyɛmaa nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ, ni nyɛsɔlea yɛ mumɔ krɔŋkrɔŋ lɛ kɛ gbeekpamɔ naa,+ 21 bɔ ni afee ni nyɛya nɔ nyɛhi Nyɔŋmɔ suɔmɔ lɛ mli,+ be mli ni nyɛmɛɔ wɔ-Nuŋtsɔ Yesu Kristo mɔbɔnalɛ ni baahã nyɛná naanɔ wala lɛ.+ 22 Agbɛnɛ hu, nyɛyaa nɔ nyɛnaa mɛi ni yiŋ feɔ amɛ enyɔnyɔɔnyɔ+ lɛ mɔbɔ;+ 23 nyɛsháa amɛ kɛjea la lɛ mli kɛherea amɛ.+ Shi nyɛyaa nɔ nyɛnaa mɛi krokomɛi hu mɔbɔ, ni nyɛkɛ gbeyeishemɔ afea nakai, ni yɛ nakai beiaŋ nɔŋŋ lɛ nyɛnyɛa atade ni akɛ heloo lɛ ewo lɛ muji lɛ po.+

24 Agbɛnɛ, lɛ mɔ ni eyɔɔ hewalɛ ni ekɛbaabu nyɛhe koni nyɛkatɛrɛ, ni ehã nyɛkɛ miishɛɛ babaoo adamɔ shi akɛ mɛi ni kpa ko bɛ amɛhe+ yɛ enunyam lɛ hiɛ, 25 Nyɔŋmɔ kome pɛ, ni ji wɔ-Yiwalaherelɔ kɛtsɔ Yesu Kristo, wɔ-Nuŋtsɔ lɛ nɔ lɛ, lɛ akɛ anunyam kɛ agbojee kɛ hewalɛ kɛ hegbɛ ahã kɛjɛ naanɔi anaanɔ, amrɔ nɛɛ, kɛ agbɛnɛ kɛmiiya naanɔi anaanɔ. Amen.