Nyɔŋmɔ Oweletɔɔ Gbi Lɛ
TAAKƐ wɔna yɛ sane ni tsɔ hiɛ lɛ mli lɛ, yiŋtoi babaoo yɛ ni nomɛi ahewɔ ni ejaaa gbɛ akɛ wɔɔtɔ owele lɛ. Ejaaa, ejaakɛ yɛ naagbee lɛ, etsuuu naagba ko kwraa he nii. Ejaaa, ejaakɛ ehaa nyɛɛ ni ka shi lɛ mli waa moŋ fe ni eeeha naanyobɔɔ tsakpaa aya hiɛ. Ni ejaaa, ejaakɛ eyeɔ mɔ ni naa oweletɔɔ susumɔi yɛ ejwɛŋmɔ mli lɛ diɛŋtsɛ awui.
Shi kɛlɛ, anaa yiŋtoo ni he hiaa fe fɛɛ, nɔ hewɔ ni adesai oweletɔɔ ejaaa lɛ yɛ wiemɔ ni Mose kɛ Israel wie nɛɛ mli: “Mawu ni musuŋ tsɔɔ lɛ ji Yehowa o-Nyɔŋmɔ lɛ.” (5 Mose 4:31) Akɛni Nyɔŋmɔ naa mɔbɔ hewɔ lɛ, esa akɛ wɔjie mɔbɔnalɛ kpo tamɔ lɛ. Yesu kɛɛ esɛɛnyiɛlɔi lɛ akɛ: “No hewɔ lɛ nyɛnaa mɔbɔ, tamɔ bɔ ni nyɛ-Tsɛ lɛ hu naa mɔbɔ lɛ.”—Luka 6:36.
Shi yɛ fɛɛ sɛɛ lɛ, Biblia lɛ hu wieɔ Yehowa he akɛ “Mawu ni tɔɔ owele.” (Lala 94:1) Gbalɔ Yesaia hu wie “Yehowa duromɔ afi” kɛ agbɛnɛ “wɔ-Nyɔŋmɔ lɛ oweletɔɔ gbi” he. (Yesaia 61:2) Te aaafee tɛŋŋ ni Nyɔŋmɔ aaafee mɔbɔnalɔ ni nakai beaŋ nɔŋŋ lɛ etɔ owele hu? Ni kɛji esa akɛ wɔkase Nyɔŋmɔ mɔbɔnalɛ lɛ, mɛni hewɔ esaaa ni wɔkaseɔ lɛ yɛ oweletɔɔ hu mli?
Kɛ wɔɔha klɛŋklɛŋ sanebimɔ lɛ hetoo lɛ, Nyɔŋmɔ naa mɔbɔ ejaakɛ esumɔɔ adesai asane, ni ekɛ eshai keɔ shii abɔ ni eeenyɛ kɛyashi be ni eeenyɛ bɔni afee ni eha adesai hegbɛ ni amɛkɛtsake amɛgbɛi fɔji lɛ. Mɛi babaoo etsu hegbɛ ni nɛkɛ mɔbɔnalɛ nɛɛ haa amɛnaa lɛ he nii yɛ gbɛ kpakpa nɔ, taakɛ bɔfo Paulo fee lɛ. Shi Nyɔŋmɔ tɔɔ owele hu—kɛ shishinumɔ akɛ etsuɔ jalɛsaneyeli he nii—ejaakɛ nɛkɛ mɔbɔnalɛ nɛɛ yaa kɛyashiɔ be ko ni esɛɛ foɔ. Kɛji mɛi komɛi fee lɛ faŋŋ akɛ amɛtsakeŋ amɛgbɛ ni amɛkɔ lɛ, Nyɔŋmɔ baatsu kojomɔ he nii yɛ nɔ ni atsɛɔ lɛ akɛ e-oweletɔɔ gbi lɛ nɔ.
Kɛji wɔɔha sanebimɔ ni ji enyɔ lɛ hetoo lɛ, dabi, wɔsane ejaaa akɛ wɔɔtɔ owele akɛni Nyɔŋmɔ tɔɔ owele lɛ hewɔ. Yehowa yeɔ emuu yɛ jalɛsaneyeli mli. Adesai yeee emuu. Nyɔŋmɔ naa nibii sɔrɔtoi ni kɔɔ sane ko he lɛ fɛɛ ni ekpɛɔ eyiŋ yɛ jalɛ naa be fɛɛ be. Anyɛŋ akɛ he afɔ wɔnɔ ni wɔfee nakai. No hewɔ ni Paulo wo ŋaa akɛ: “Suɔlɔi, nyɛkatɔa nyɛ diɛŋtsɛ nyɛhe owele, shi moŋ nyɛŋmɛa mlifu lɛ gbɛ; ejaakɛ aŋma akɛ: ‘Minɔ ji oweletɔɔ, ni mato najiaŋ, Nuŋtsɔ lɛ [Yehowa] kɛɛ.’” (Romabii 12:19) Esa akɛ wɔshi oweletɔɔ lɛ wɔwo Yehowa dɛŋ, yɛ wɔ diɛŋtsɛ wɔhewɔ.
Mɛni Hewɔ Oweletɔɔ Gbi?
Shi yɛ fɛɛ sɛɛ lɛ, Biblia lɛ kpɛlɛɔ yɛ hei pii akɛ ehe hiaa ni aha efɔŋfeelɔi ni tsakeee amɛtsui lɛ abu amɛshihilɛ he akɔntaa. Akɛ nɔkwɛmɔ nɔ lɛ, bɔfo Paulo gba efɔ shi akɛ Nyɔŋmɔ “aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ” kɛtsɔ Yesu nɔ. (2 Tesalonikabii 1:8) Wɔyɛ yiŋtoi kpakpai ni wɔɔdamɔ nɔ wɔsusu nakai wiemɔi lɛ ahe kɛ hiɛdɔɔ. Mɛni hewɔ?
Yiŋtoo kome ji akɛ, akɛni gbɔmɛi ni yɔɔ ŋmɛnɛ lɛ ateŋ mɛi babaoo ji mɛi ni yaa nɔ amɛbuuu maŋtsɛ ni Bɔlɔ lɛ ji hewɔ lɛ, amɛbuuu ejalɛ mlai lɛ hu. Kɛji amɛkɛɔ akɛ amɛheɔ Nyɔŋmɔ amɛyeɔ jio amɛheee lɛ amɛyeee jio, amɛjeŋba tsɔɔ faŋŋ akɛ amɛnuuu he kwraa akɛ amɛbaabu amɛhe akɔntaa yɛ Nyɔŋmɔ hiɛ. Lalatsɛ lɛ wiemɔi nɛɛ kɔɔ gbɔmɛi fɛɛ ni tamɔ nakai lɛ ahe: “Mɛɛ hewɔ ni mɔ fɔŋ liɔ Nyɔŋmɔ, ni ekɛɔ yɛ etsui mli akɛ: ‘Odiŋ sɛɛ?’” (Lala 10:13) Eka shi faŋŋ akɛ, Yehowa eyaŋ nɔ eŋmɛŋ gbɛ ni abɔ lɛ ahora nakai sɔŋŋ kɛya naanɔ yɛ nɛkɛ gbɛ nɔ. Eyɛ mli akɛ eji Nyɔŋmɔ ni yɔɔ suɔmɔ moŋ, shi kɛlɛ eji Nyɔŋmɔ hu ni yeɔ jalɛsane. Ebaabɔ mɛi ni bolɔɔ yɛ anɔkwayeli mli yɛ jalɛsaneyeli hewɔ lɛ atoi kɛ̃: “Yehowa, wó ohe nɔ! Mawu, wó onine nɔ! Ohiɛ akakpa nɔnalɔi anɔ!”—Lala 10:12.
Kɛfata he lɛ, gbɔmɛi ni yeee mla nɔ lɛ miifite shikpɔŋ diɛŋtsɛ ni wɔyɔɔ nɔ nɛɛ hu. Amɛmiifite kɔɔyɔɔ, shikpɔŋ sũ, kɛ nu mli fɛɛ; amɛha jalɛsane ni ayeee kɛ yiwalɛ eyi shikpɔŋ lɛ nɔ obɔ. Ni amɛbua tsofai, nuklea, kɛ tawuu nibii krokomɛi ni kpataa nii ahiɛ waa lɛ babaoo naa, ni eewo adesai ashihilɛ diɛŋtsɛ he gbeyei. Ehe miihia ni Nyɔŋmɔ kɛ ehe awo sane lɛ mli bɔni afee ni akɛna wɔsɛɛ be ni yɔɔ shweshweeshwe kɛha adesai. (Kpojiemɔ 11:18) Nɛkɛ ehe ni ekɛbaawo sane lɛ mli nɛɛ ji nɔ ni Yesaia wie he akɛ oweletɔɔ gbi lɛ.
Mɛni Ji nɔ ni Nyɔŋmɔ Oweletɔɔ Gbi lɛ Baatsu?
Taakɛ Vine’s Expository Dictionary of Old and New Testament Words tsɔɔ lɛ, yɛ Hela Ŋmalɛi lɛ amli lɛ, kɛ akɛ wiemɔ ni akɛtsuɔ nii ahaa oweletɔɔ lɛ tsu nii yɛ Nyɔŋmɔ gbɛfaŋ lɛ, eshishitsɔɔmɔ diɛŋtsɛ ji, “‘nɔ ni jɛɔ jalɛsaneyeli mli baa,’ jeee nɔ ni jɛ dɔlɛ henumɔ aloo henumɔ ni tsɔɔ mlifu ni naa wa waa mli, tamɔ bɔ ni efɔɔ kaa yɛ adesai oweletɔɔ he lɛ.” Enɛ hewɔ lɛ, oweletɔɔ ni Nyɔŋmɔ kɛbaaba ehenyɛlɔi anɔ lɛ ebafeŋ lashishwiemɔ be ni husu bɛ he loo nɔ ni anyɛɛɛ nɔ aye, tamɔ mɔ aŋkro ko tɔɔ ehe owele yɛ blema béi ko hewɔ lɛ. Biblia lɛ kɛɔ wɔ akɛ: “Yehowa le bɔ ni efeɔ ejieɔ mɛi ni jieɔ Nyɔŋmɔ jamɔ hetuu-kɛhamɔ kpo lɛ yɛ kaa mli, kɛ bɔ ni efeɔ etoɔ mɛi fɔji lɛ kɛha kojomɔ gbi lɛ koni afolɔ amɛ ashwie.”—2 Petro 2:9, New World Translation.
Nyɔŋmɔ tsuji kwɛɔ Nyɔŋmɔ oweletɔɔ gbi lɛ gbɛ waa akɛ be mli ni abaabu jeŋba kpakpa bem ni abaajie jalɔi kɛjɛ mɛi fɔji anɔnyɛɛ shishi. Enɛ etsɔɔɔ akɛ amɛmli joɔ aloo amɛsumɔɔ ni amɛfee efɔŋ amɛto efɔŋ najiaŋ. Biblia lɛ bɔɔ kɔkɔ akɛ: “Mɔ ni naa miishɛɛ yɛ mɔ kroko amanehulu he lɛ, eyeŋ ehe.” (Abɛi 17:5) Nɔ ni tamɔɔɔ nakai lɛ, amɛjieɔ mɔbɔnalɛ kɛ mlihilɛ kpo, ni amɛshiɔ yiŋkpɛi ni kɔɔ oweletɔɔ he lɛ amɛhaa Nyɔŋmɔ.
Lɛlɛŋ, ebɛ mlɛo kɛha aŋkroaŋkroi ni mli efu waa lɛ akɛ amɛaafee amɛnii yɛ nɛkɛ gbɛ nɔ. Shi anyɛɔ afeɔ nakai, ni mɛi pii efee nakai. Akɛ nɔkwɛmɔ nɔ lɛ, Pedro naaa miishɛɛ kwraa yɛ egbekɛbiiashi ejaakɛ enyɛmi nukpa lɛ fɔɔ lɛ yii be fɛɛ be. No hewɔ lɛ eha eda ni ebatsɔ mɔ ko ni yitsoŋ wa, ni be fɛɛ be lɛ ekɛ polisifoi yɛ sane, ni ekɛ mlifu ni enaa yɛ enyɛminuu lɛ hewɔ lɛ yasharakeɔ eŋa kɛ ebii anɔ. Yɛ naagbee lɛ, ebo Yehowa Odasefoi lɛ ateŋ mɔ kome toi ni yɛ sɛɛ mli lɛ ebɔi Biblia lɛ kasemɔ. Egba akɛ: “Kɛtsɔ Yehowa yelikɛbuamɔ nɔ lɛ, mitsake kwraa agbɛnɛ, ni amrɔ nɛɛ, yɛ nɔ najiaŋ ni mikɛ mɛi aaanɔ lɛ, miyeɔ mibuaa amɛ akɛ Kristofonyo onukpa.” Kɛtsɔ Biblia lɛ kɛ mumɔ krɔŋkrɔŋ lɛ yelikɛbuamɔ nɔ lɛ, mɛi babaoo ni aleee amɛyibɔ hu etsake nakai nɔŋŋ kɛjɛ amɛ awuiyeli shihilɛ loo oweletɔɔ su ni amɛyɔɔ lɛ mli ni amɛtsɔmɔ mɛi ni jieɔ suɔmɔ kɛ tsuishitoo kpo amɛtsɔɔ mɛi krokomɛi.
Mɛni Obaafee?
Kɛji wɔha Nyɔŋmɔ oweletɔɔ gbi ni baa lɛ hi wɔjwɛŋmɔ mli lɛ, no lɛ ebaaye ebua wɔ ni wɔŋɔ hegbɛ ni Yehowa tsuishitoo lɛ kɛhaa wɔ lɛ ni wɔtsu he nii. Shi hegbɛ ni yɔɔ ni akɛaafee nakai lɛ sɛɛ baafo gbi ko kɛ̃. Etsɛŋ ni nakai gbi lɛ baaba. Bɔfo Petro tsɔɔ no hewɔ ni ebako lolo lɛ mli akɛ: “Jeee tsɛ Nuŋtsɔ lɛ [Yehowa] haa eshiwoo lɛ sɛɛ tsɛɔ, taakɛ bɔ ni mɛi komɛi buɔ akɛ esɛɛ etsɛ lɛ, shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.”—2 Petro 3:9.
Belɛ, ehe miihia waa akɛ wɔsaa wɔhe bianɛ kɛha Nyɔŋmɔ gbi ni akɛbaabu akɔntaa lɛ kɛtsɔ Ŋmalɛi lɛ akasemɔ kɛ emli ŋaawoo lɛ kɛ nitsumɔ nɔ. Enɛ baaye abua wɔ ni wɔnyiɛ lalatsɛ lɛ wiemɔi lɛ asɛɛ: “Ha mlifu sɛɛ afo ni oshɛ mlila ofɔ; kaawo otsui la hu, efɔŋfeemɔ mli kɛkɛ ekɛ mɔ yaa. Ejaakɛ efɔŋfeelɔi lɛ, aaafolɔ amɛ ashwie, shi mɛi ni kwɛɔ Yehowa gbɛ lɛ, shikpɔŋ lɛ aaatsɔ amɛnɔ.”—Lala 37:8, 9.
[Mfoniri ni yɔɔ baafa 7]
Nyɔŋmɔ oweletɔɔ gbi lɛ sɛɛ lɛ, ‘mɛi ni kwɛɔ Yehowa gbɛ lɛ aaahi shikpɔŋ Iɛ nɔ’