Roma Asafoiatsɛ Ni Mli Hi Lɛ
ROMA asafoiatsɛmɛi bɛ gbɛi akɛ mɛi ni mli hi. Akɛni akɛ asraafoi oha ni tawuu eha amɛkpilim lɛ ahiɛnyiɛmɔ ewo edɛŋ hewɔ lɛ, esa akɛ asafoiatsɛ lɛ afee keketee yɛ ŋsarabɔɔ mli, tsɔselɔ, ni yɛ bei komɛi amli lɛ, blafo po. Ni kɛlɛ, Biblia lɛ gbaa wɔ Roma asafoiatsɛ ko ni jɛ Augusto asafo lɛ mli ni jie mlihilɛ kɛ mɔbɔnalɛ kpo diɛŋtsɛ etsɔɔ bɔfo Paulo he sane. Ni mɛni ji egbɛi? Yulio.
Biblia lɛ haa wɔleɔ nɛkɛ gbɔmɔ nɛɛ yɛ Bɔfoi lɛ Asaji yitso 27. Bɔfo Paulo ebi ni Kaisare abo esane lɛ toi yɛ Roma. No hewɔ lɛ, akɛ Paulo kɛ gboklɛfoi krokomɛi babaoo wo “asafoiatsɛ ni atsɛɔ lɛ Yulio ni jɛ Augusto asafo lɛ mli lɛ dɛŋ.” Kɛkɛ ni amɛlɛlɛ lɛ fa kɛjɛ Kaisarea, lɛjiadaamɔ he ko ni yɔɔ Yerusalem kooyi-anaigbɛ ni bafee Roma asraafoi lɛ amaŋtiase lɛ mli. Yinɔsane-ŋmalɔ Luka kɛɛ: “Ni jetsɛrenɔ lɛ wɔyadamɔ Zidon, ni akɛni Yulio hiɛ Paulo dɔdɔɔdɔ hewɔ lɛ, eŋmɛ lɛ gbɛ akɛ eya eshieŋtsɛmɛi lɛ aŋɔɔ ni eyajɔɔ ehe.”—Bɔfoi lɛ Asaji 27:1-3.
Atsɔɔɔ nɔ ni tsirɛ Yulio ni ha ejie mlihilɛ ni tamɔ nɛkɛ kpo lɛ yɛ Biblia lɛ mli. Ekolɛ Amralo Festo fa lɛ akɛ eje gbɛ ekwɛ Paulo nɔ jogbaŋŋ. Aloo ekolɛ akɛni ebale nɔ ni ha amɔ Paulo hewɔ lɛ, ekolɛ Paulo ekaafeemɔ kɛ emuuyeli mlihiɛmɔ lɛ baaha Yulio naa akpɛ ehe. Yɛ fɛɛ sɛɛ lɛ, etamɔ nɔ ni Yulio le akɛ Paulo jeee gboklɛfonyo ko kɛkɛ.
Ni kɛlɛ, Yulio booo Paulo kɔkɔbɔɔ akɛ amɛkashi Lɛjiatoo He Fɛfɛo lɛ toi. Shi etsɛɛɛ ni lɛlɛ lɛ yabote ahum kpeteŋkpele ko ni miihe ni ekɛ amɛ ayasha shi yɛ Afrika kooyigbɛ ŋshɔ mli shia futufutu ko mli lɛ mli. (Bɔfoi lɛ Asaji 27:8-17) Paulo te shi edamɔ shi yɛ nɛkɛ ahum nɛɛ mli ni eha mɛi ni yɔɔ lɛlɛ mli ni miishe gbeyei lɛ tsui akɛ ‘amɛteŋ mɔ ko mɔ ko susuma hiɛ kpataŋ, ja lɛlɛ lɛ pɛ.’ Ni kɛlɛ, amlakui lɛ ateŋ mɛi komɛi ka foijee yɛ sɛɛ mli. Kɛkɛ ni Paulo kɛɛ Yulio akɛ: “Kɛji mɛnɛɛmɛi ehiii lɛlɛ lɛ mli lɛ, no lɛ nyɛyi naŋ wala.”—Bɔfoi lɛ Asaji 27:21, 22, 30, 31.
Yulio bo Paulo toi yɛ enɛ mli, ni atsi amlakui lɛ afoijee lɛ naa. Nɔ ni Paulo gba fɔ shi lɛ ba mli, lɛlɛ lɛ yasha shi yɛ shia nɔ ni ejwara. Akɛni asraafoi lɛ miishe gbeyei akɛ gboklɛfoi lɛ baajo foi hewɔ lɛ, asraafoi ni yɔɔ lɛlɛ lɛ mli lɛ tswa amɛfai shi akɛ amɛbaagbe amɛ fɛɛ. Yulio kɛ ehe wo mli shikome ekoŋŋ ni etsi egbɔmɛi lɛ anaa, ni ekɛhere Paulo yiwala.—Bɔfoi lɛ Asaji 27:32, 41-44.
Biblia lɛ ekɛɛɛ wɔ nɔ ni ba asafoiatsɛ ni mli hi nɛɛ nɔ, aloo akɛ emɔ Kristofoi ahemɔkɛyeli lɛ mli yɛ be ko mli. Kɛ aaakwɛ mlihilɛ ni ejie lɛ kpo lɛ yɛ gbɛ ni hi nɔ lɛ, eji henilee ni Nyɔŋmɔ kɛha lɛ he nitsumɔi ni ajieɔ lɛ kpo. (Romabii 2:14, 15) Shi Kristofoi yaa shɔŋŋ fe adesa mlihilɛ kɛkɛ, amɛjieɔ mlihilɛ ni Nyɔŋmɔ gbeyeishemɔ yɔɔ mli ni jɛ Nyɔŋmɔ mumɔ lɛ ni mɔ ko yɔɔ hewɔ lɛ kpo. (Galatabii 5:22) Eka shi faŋŋ akɛ kɛji akɛ asraafonyo wɔŋjalɔ ni leee Nyɔŋmɔ aaanyɛ ajie mlihilɛ kpo lɛ, enyiɛ nɔŋŋ ni esaaa akɛ etsirɛɔ Nyɔŋmɔ webii koni amɛfee nakai!