Blonya​—Mɛni hewɔ Ehe Gbɛi Waa Yɛ Japan Nakai Lɛ?

HEMƆKƐYELI ni ayɔɔ yɛ Father Christmas mli lɛ ehe shi waa yɛ gbekɛbii ni yɔɔ Buddha kɛ Shinto maŋ ni ji Japan lɛ mli. Yɛ 1989 mli lɛ, Japan gbekɛbii ŋmala Woji 160,000 amɛyaha Santa World yɛ Sweden. Maŋ ko bɛ ni amɛ nɔ̃ fa fe nakai. Amɛŋmala woji lɛ kɛ hiɛnɔkamɔ akɛ amɛnine baashɛ nɔ ni amɛshweɔ lɛ nɔ, kɛ eji “Graphic Computer” ni akɛshwɛɔ ni ejara ji yen 18,000 (₵51,680) loo video shwɛmɔ nii bibioo ko ni ejara ji yen 12,500 (₵36,100) lɛ.

Kɛha Japan gbekɛbii yei lɛ, kpojee kɛ gbekɛ nuu yɛ gbɛkɛ ni enɔ jetsɛremɔ ayeɔ Blonya lɛ tsɔɔ nɔ ko pɔtɛɛ kɛhaa lɛ. Mainichi Daily News lɛ kɛɛ: “Taakɛ obalayei komɛi ni abibii amɛ saji lɛ tsɔɔ lɛ, oha fɛɛ mli 38 kɛɛ amɛtsɔ hiɛ amɛto gbɛjianɔ aaafee nyɔŋ kome amɛha Blonya Gbɛkɛ lɛ.” Obalahii lɛ yɛ yiŋtoo ko hewɔ ni amɛtaoɔ amɛkɛ amɛnanemɛi obalayei lɛ aje kpo Blonya Gbɛkɛ lɛ. Obalahii awolo tɛtrɛɛ ko wo ŋaa akɛ, “jwɛŋmɔ ni hi ji ni okɛ onaanyo yoo lɛ asɔle yɛ teemɔŋ. Feemɔ nakai yɛ he ko ni sa jogbaŋŋ. Etsɛŋ ni nyɛ naanyobɔɔ lɛ baafee nɔ ni mli wa waa.”

Japan wumɛi hu hiɛ ka nɔ akɛ amɛbaanyɛ amɛtee ŋkunyaayeli hewalɛ ko shi kɛtsɔ amɛ Blonya kusum ko ni amɛfeɔ ni ji “keeki ko ni awula lɛ fɛfɛo” ni amɛaahe kɛya shia yɛ be mli ni amɛkpa nitsumɔ lɛ nɔ. Ebaafee tamɔ Santa Claus ni kɛ nikee miiba koni ekɛkpata weku lɛ yɛ ehiɛ ni eku eshwie amɛnɔ yɛ afi muu lɛ fɛɛ mli lɛ hewɔ.

Lɛlɛŋ, Blonya ehe shi waa yɛ Japanbii ni jeee Kristofoi lɛ ateŋ. Yɛ anɔkwale mli lɛ, mɛi ni shwapo ko ni hɔɔ guɔyeli nibii babaoo bibii amɛ saji lɛ ateŋ oha fɛɛ mli 78 kɛɛ akɛ amɛfeɔ nɔ ko krɛdɛɛ ko kɛha Blonya. Emlijaa lɛ da waa yɛ bɔ ni maŋ ni gbɔmɛi ni yɔɔ mli lɛ fɛɛ ayifalɛ mlijaa oha fɛɛ mli 1 pɛ kɛɔ akɛ amɛji Kristofoi lɛ hewɔ. Yɛ be mli ni amɛkɛɔ akɛ amɛji Buddhafoi loo Shintobii lɛ, kɛlɛ amɛnaa miishɛɛ yɛ “Kristofoi” agbijurɔ ni amɛyeɔ nɛɛ mli. Shinto Ise Gbatsu ni ehe gbɛi lɛ kɛ December 25 fata Japan gbijuji ni eto naa lɛ ahe ni etsɛ lɛ akɛ “Kristo fɔmɔ gbi.” Shi nibii ni jɛɛɛ Kristofoi anɔ mli ni anyaa he babaoo nɛkɛ yɛ Blonya be mli lɛ teeɔ nɛkɛ sanebimɔ nɛɛ shi:

Namɔ Gbijurɔ Ji Blonya?

Webster’s Ninth New Collegiate Dictionary tsɔɔ Blonya mli akɛ “Kristofoi aniyeli yɛ December 25 . . . ni akɛkaiɔ Kristo fɔmɔ.” Abuɔ enɛ akɛ be ni esa akɛ “Kristofoi kɛfee ekome yɛ amɛnyamɔ henumɔi amli yɛ Kristo fɔmɔ gbi lɛ nɔ.”

Mɛi ni yeɔ Blonya akɛ jamɔ gbijurɔ pɛ lɛ amli woɔ la amɛwoɔ mɛi ni kɛfee je lɛ nyamɔ kɛ nikee be lɛ ni amɛbuɔ lɛ musubɔɔ nii po. Amerikanyo ko ni hiɔ Japan ŋma akɛ: “Yɛ Japan lɛ, akɛ he woɔ jarayeli mli kwraa ni asusuuu nɔ ko he: Kristo sane ko bɛ mli.” Mɔ kroko hu ŋma yɛ Japan Blonya lɛ he akɛ: “Kɛha Anaigbɛnyo lɛ, jeee klakunu [ni afɔɔɔ namɔ yɛ Japanbii ajara nɔ] lɛ ji nɔ ni anaaa, shi nɔ ni he hiaa fe fɛɛ yɛ mli lɛ, Blonya mumɔ lɛ.”

Belɛ mɛni ji Blonya mumɔ lɛ? Ani no ji sɔlemɔtsu mli sɔɔmɔ kɛ Blonya lalai, baaŋmɔŋ kɛ kɛnɛrɛi, ni no mɛi pii kɛtsuɔ nii yɛ amɛ daa afi jamɔ gbɛfaa ni kɛ amɛ yaa sɔlemɔtsu mli lɛ? Aloo no ji suɔmɔ, mlifilimɔ, kɛ nikee ni kanyaa mɛi pii koni amɛfee ejurɔ lɛ? Ani no ji dioo-feemɔ ni baa tawuu he yɛ be mli ni asraafoi kɛ gbii fioo yeɔ “toiŋjɔlɛ yɛ shikpɔŋ nɔ” lɛ?

Nɔ ni yɔɔ naakpɛɛ ji akɛ, bei babaoo lɛ Blonya mumɔ lɛ kɛ toiŋjɔlɛ baaa shia po. Taakɛ sane-mlipɛimɔ ko ni afee yɛ England yɛ 1987 mli lɛ tsɔɔ lɛ, abu naa akɛ shĩa mli béi 70, yɛ oha fɛɛ mli, baafɛ yɛ Ŋleshi shiai amli yɛ nakai afi lɛ Blonya gbi lɛ nɔ. Ta ni awuɔ yɛ shika he ji nɔ titri. Daa ni wa ni abaanu babaoo, kɛ mɔ ko gbɛnaanii ni etsuŋ he nii yɛ shia hu kɛ nɔmɔ baa.

Anaigbɛnyo ko ni yɔɔ Japan ni basara shia yɛ nyɛsɛɛ afi lɛ Blonya lɛ ŋma akɛ: “Misusuɔ he akɛ ani jeee laajemɔ bɔ ni Blonya shishinumɔ diɛŋtsɛ ji lɛ laajeɔ wɔ nɛɛ. Kɛ eshɛ daa Dec. 25 lɛ, mishweɔ akɛ maku sɛɛ maya tsutsu Blonya be ni ayeɔ jeeŋmɔ lɛ mli ekoŋŋ​—wɔŋjalɔi agbijurɔ ni akɛyeɔ snoo-nɛmɔ be kɛtsɔ tsei ajamɔ kɛ ninumɔ kɛ niyeli babaoo lɛ nɔ. Wɔyɛ wɔŋjalɔi awulamɔ nibii lɛ lolo​—tsonɔtsei, baaŋmɔŋ ni alo, blonyatsei kɛ ekrokomɛi lɛ​—shi, kɛjɛ be mli ni Kristofoi shɔ̃ enɛ ni amɛfee, lɛ jamɔ gbijurɔ nɛɛ, Blonya tamɔko bɔ ni eji yɛ tsutsu lɛ dɔŋŋ.”

Ŋwanejee ko bɛ he akɛ Blonya ji wɔŋjalɔi agbijurɔ. Klɛŋklɛŋ Kristofoi lɛ yeee enɛ, ni taakɛ The World Book Encyclopedia lɛ tsɔɔ lɛ, “ejaakɛ amɛbuɔ mɔ fɔmɔ gbi yeli akɛ wɔŋjalɔi akusum nifeemɔ.” Wɔŋjalɔi agbijurɔ ni ji Saturnalia lɛ ji be ni akɛnaa miishɛɛ babaoo ni akɛkekeɔ he nii.

Kɛ Blonya jɛ wɔŋjamɔ mli lɛlɛŋ lɛ, belɛ esa akɛ anɔkwa Kristofoi abi sane nɛɛ, Ani Blonya yɛ kɛha Kristofoi? Nyɛhaa wɔkwɛa nɔ ni Biblia lɛ kɛɔ yɛ Kristo fɔmɔ gbi ni ayeɔ lɛ gbijurɔ lɛ he.

[Akrabatsa ni yɔɔ baafa 4]

Blonya Gbijurɔyeli lɛ Shishijee

Eyɛ mli akɛ emlitsɔɔmɔ fitsofitso lɛ elaaje kɛjɛ blema moŋ, shi nibii yɛ ni tsɔɔ akɛ beni shɛɔ afi 336 Ŋ.B. lɛ, no mli lɛ Roma sɔlemɔ lɛ miiye Blonya ko. The New Encyclopedia Britannica lɛ tsɔɔ mli akɛ, “Aje gbɛ ato December 25 lɛ ama shi akɛ Blonya gbi koni akɛtsi hulu nyɔŋmɔ lɛ gbijurɔyeli kpeteŋkpele lɛ naa.” No ji be mli ni wɔŋjalɔi kɛ amɛhe woɔ niyeli kɛ ninumɔ mli babaoo kɛtekeɔ nɔ yɛ Roma Saturnalia lɛ kɛ Celtbii kɛ Germanbii asnoo be mli gbijurɔyeli shishi lɛ. The New Caxton Encyclopedia lɛ kɛɔ akɛ, “Sɔlemɔ lɛ ŋɔ hegbɛ lɛ ni amɛkɛfee nɛkɛ gbijurɔyelii nɛɛ Kristofoi anɔ̃.”