Blonya​—Ani No Ji Gbɛ Ni Akɛnyaa Yesu He?

YIWALAHERELƆ lɛ, Mesia ni amɛ lɛ aahu lɛ fɔmɔ ji mlifilimɔ be lɛlɛŋ. Ŋwɛibɔfo ko tswa tookwɛlɔi komɛi ni bɛŋkɛ Betlehem lɛ adafi akɛ: “Naa, mibagba nyɛ miishɛɛ sane kpele ni ji maŋ fɛɛ nɔ; akɛ ŋmɛnɛ afɔ yiwalaherelɔ, ni ji Kristo, Nuŋtsɔ lɛ aha nyɛ.” Kɛkɛ ni ŋwɛibɔfoi asafoi babaoo bafata ehe, ni amɛjie Nyɔŋmɔ yi amɛkɛɛ: “Anunyam aha Nyɔŋmɔ yɛ ŋwɛi flooflo, ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ.” (Luka 2:​10-14) Mɛi komɛi baamu sane naa akɛ esa akɛ Kristofoi akase ŋwɛibɔfoi lɛ ni amɛjie miishɛɛ kpo yɛ Kristo ni ba shikpɔŋ nɔ yɛ nakai be ni eho lɛ mli lɛ hewɔ.

Enɛ jɛɛɛ klɛŋklɛŋ Biblia mli sane ni kɔɔ ŋwɛibɔfoi ni miila yijiemɔ lalai ahe. Beni ato shikpɔŋ lɛ shishi lɛ, “leebi ŋulamii lɛ fɛɛ la nyamɔ lala shikome, ni Nyɔŋmɔ bii lɛ fɛɛ kwa bɔ oshɛ.” (Hiob 38:​4-7) Aŋmaaa be pɔtɛɛ ni nii ni tamɔ nɛkɛ tee nɔ lɛ yɛ Biblia lɛ mli. (1 Mose 1:​1, 14-18) Shi, bɔ fɛɛ bɔ ni nakai be lɛ baafee miishɛɛ be aha lɛ, Kristofoi ewieko enɛ he akɛ, akɛni ŋwɛibɔfoi bɔ oshe hewɔ lɛ, belɛ esa akɛ daa afi lɛ amɛye shikpɔŋ lɛ bɔɔ akɛ gbijurɔ koni amɛtao wɔŋjalɔi agbijurɔ ko ni amɛkɛkai nakai be lɛ.

Ni kɛlɛ enɛ pɛpɛɛpɛ ji nɔ ni mɛi ni yeɔ Blonya lɛ feɔ Yesu Kristo fɔmɔ lɛ. Ensaiklopediai ni anyɛɔ akɛ he fɔɔ nɔ lɛ eko fɛɛ eko mli ni aaakwɛ yɛ “Christmas” loo Blonya shishi lɛ maa nɔ mi akɛ aleee Yesu fɔmɔ be lɛ. Biblia lɛ ewieee nɛkɛ be nɛɛ he nɔ ko kwraa.

“Kɛji Tɛtrɛmantrɛ Egbɛɛɛ Gbɛɛmɔ ni Yɔɔ Faŋŋ Lɛ”

Beni bɔfo Paulo jajeɔ basabasa-feemɔ ni yɔɔ blema Korinto asafo lɛ mli lɛ, eŋma akɛ, “Nyɔŋmɔ lɛ, ejeee sakasaka-feemɔ Nyɔŋmɔ, shi moŋ hejɔlɛ [toiŋjɔlɛ] Nyɔŋmɔ ni.” Ebi yɛ nakai wiemɔ lɛ nɔŋŋ mli akɛ: “Kɛji tɛtrɛmantrɛ egbɛɛɛ gbɛɛmɔ ni yɔɔ faŋŋ lɛ, namɔ aaasaa ehe ato ta?” (1 Korintobii 14:​8, 33) Agbɛnɛ, kɛji akɛ Nyɔŋmɔ ni bɛ sakasaka lɛ miisumɔ ni Kristofoi aye e-Bi lɛ fɔmɔ gbi akɛ gbijurɔ yɛ shikpɔŋ nɔ lɛ, ani E-baashi ewo adesai ni yeee emuu dɛŋ koni amɛjɛ amɛsuɔmɔ mli amɛto be ko kɛjɛ wɔŋjalɔi agbijurɔyeli mli ni amɛkpɛlɛ nifeemɔi ni Nyɔŋmɔ gbɛyeishemɔ bɛ mli lɛ anɔ?

Biblia nɔkwɛmɔ nii fioo mlitaomɔ feɔ lɛ faŋŋ akɛ Yehowa Nyɔŋmɔ kɛ ewebii yeee yɛ nakai gbɛ nɔ. Beni ekɛɛ Israelbii lɛ akɛ amɛye daa afi gbijuji yɛ Mose Mla lɛ shishi lɛ, Nyɔŋmɔ tsɔɔ amɛ bei pɔtɛɛ ni etsɔɔ amɛ gbɛ ni amɛaatsɔ nɔ amɛye nakai gbijuji lɛ hu. (2 Mose 23:​14-17; 3 Mose 23:​34-43) Eyɛ mli akɛ Yesu Kristo faaa ni aye efɔmɔ lɛ akɛ kaimɔ moŋ, shi efa esɛɛnyiɛlɔi lɛ ni amɛye gbi kome ko akɛ gbijurɔ. “Nakai nyɔŋ lɛŋ nɔŋŋ ni atsɔɔ esɛɛgbɛ,” yɛ Nisan 14, afi 33 Ŋ.B. lɛ, Yesu to Nuŋtsɔ lɛ Gbɛkɛnaashi Niyenii lɛ shishi kɛ aboloo akpiti kɛ wein. Ni efa akɛ: “Nyɛfea enɛ ni nyɛŋɔ-kai mi.” (1 Korintobii 11:​23, 24) Tɛtrɛmantrɛ gbɛɛmɔ ni tsɔɔ be kɛ gbɛ ni esa akɛ amɛtsɔ nɔ amɛye Nuŋtsɔ lɛ Gbɛkɛnaashi Niyenii lɛ yɛ faŋŋ ni tɔmɔ ko bɛ he. Ni Blonya hu? He ko he ko bɛ Biblia lɛ mli ni wɔnaa famɔ yɛ akɛ aye Kristo fɔmɔ gbi, ni asaŋ ekɛɛɛ wɔ be kɛ bɔ ni esa akɛ wɔye lɛ wɔha.

‘Bɔni Afee ni Minine Ashɛ Gbɔmɛi Anɔ’

Osɔfo ko wieɔ yɛ Tokyo Zion Church lɛ mli akɛ: “Oh, mile akɛ Blonya jɛ wɔŋjamɔ mli, shi bei abɔ ni gbɔmɛi foji lɛ nyaa Kristojamɔ he yɛ December 25, ni amɛbaa amɛbakaseɔ Yesu ni Sa Woo lɛ tsɔɔmɔi lɛ, Blonya yɛ egbɛhe yɛ Kristojamɔ mli.” Mɛi pii kpɛlɛɔ susumɔ nɛɛ nɔ. Ani oheɔ oyeɔ akɛ sane he ni aŋmɛɛɔ akɛsaa nɛkɛ lɛ sa?

Mɛi komɛi wieɔ akɛ Paulo po ŋmɛɛ saji ahe koni enine ashɛ heyelilɔi anɔ. Eŋma akɛ, “Mifee mihe mɔ fɛɛ mɔ tsulɔ, koni minine ashɛ gbɔmɛi babaoo nɔ bɔ ni manyɛ . . . Kɛ mikɛ Jeŋmajiaŋbii miitsu nii lɛ, mihiɔ shi tamɔ Jeŋmajiaŋnyo, mɔ ni bɛ Yudafoi a-Mla shishi, koni minine ashɛ Jeŋmajiaŋbii anɔ. . . . Mifeɔ enɛɛmɛi fɛɛ yɛ sanekpakpa lɛ hewɔ, koni mana emli jɔɔmɔi lɛ eko.” (1 Korintobii 9:​19-23, Today’s English Version) Ani nɛkɛ wiemɔi nɛɛ tsɔɔ akɛ eja gbɛ akɛ aaaŋɔ wɔŋjalɔi agbijurɔyeli ko koni akɛgbala Jeŋmajiaŋbii kɛba Kristojamɔ he?

Susumɔ Paulo wiemɔ lɛ mli saji lɛ ahe jogbaŋŋ. Ekɛɛ yɛ 1Ko 9 kuku 21 akɛ: “Enɛ etsɔɔɔ akɛ mibooo Nyɔŋmɔ mla toi; miyɛ Kristo mla shishi diɛŋtsɛ.” (TEV) No hewɔ lɛ eŋmɛɛɛ saji ahe ni akɛsaa yɛ nibii ni tekeɔ Kristo mla lɛ mli, shi moŋ ‘ehi shi tamɔ Jeŋmajiaŋnyo’ kɛtsɔ bulɛ ni ekɛha maŋ lɛ mli kusum nibii kɛ sui lɛ nɔ, bei abɔ ni enɛɛmɛi eteee shi ewooo Kristofoi akitai lɛ.a

Yɛ be mli ni enɛ yɔɔ ojwɛŋmɔ mli lɛ, susumɔ bɔ ni wɔŋjalɔi agbijuji ni akɛaaba “Kristojamɔ” mli yɛ Blonya gbɛi ashishi lɛ baatamɔ aha kɛ asusu he yɛ Biblia mli famɔ ni nyiɛ sɛɛ nɛɛ naa lɛ he: “Nyɛkɛ mɛi ni heee yeee lɛ akagbalaa kɔŋtso kome ni yeee egbɔ! Ejaakɛ mɛɛ bɔɔ jalɛ kɛ mlatɔmɔ yɔɔ? . . . Aloo mɛɛ nijaa mɔ ni heɔ yeɔ kɛ mɔ ni heee yeee lɛ yɔɔ? . . . No hewɔ lɛ Yehowa kɛɛ, ‘Nyɛjea amɛteŋ, ni nyɛtsea nyɛhe, ni nyɛkataa muji nɔ ko he, ni mahere nyɛ atuu.’” (2 Korintobii 6:​14-17) Naajiemɔi ni aaaha lɛ kɔɔɔ he eko kwraa, Kristojamɔ ni akɛ wɔŋjalɔi agbijuji aaafutu lɛ lɛ jeee gbɛ ni akɛhereɔ Yesu akɛ Yiwalaherelɔ. Ebaafee nɔ ni esaaa yɛ klɛŋklɛŋ afii oha lɛ mli beni Yesu ba yɛ heloo mli lɛ, ni nakai nɔŋŋ eji nɔ ni esaaa yɛ ŋmɛnɛ, kɛ wɔsɛɛ be mli hu, beni Kristo baa akɛ Maŋtsɛ, koni ebatsu Nyɔŋmɔ fɔbuu kojomɔi ahe nii lɛ. (Kpojiemɔ 19:​11-16) Yɛ anɔkwale mli lɛ, mɛi ni sumɔɔ ni amɛye wɔŋjalɔi agbijuji yɛ “Kristofoi” ahiɛhaanɔ ko sɛɛ lɛ miikpoo Yesu Kristo yɛ nakai feemɔ mli.

“Kristofoi ni Amɛtee Amɛhe” lɛ Bako

Kasemɔ nii kɛjɛ nɔ ni ba Katolekbii ni yɔɔ Japan yɛ shogun be lɛ mli lɛ anɔ lɛ mli. Beni Katolek jamɔ lɛ nɔnyɛɛ je shishi yɛ 1614 lɛ, nibii etɛ bakã Katolekbii aaafee 300,000 lɛ ahiɛ ni amɛaahala emli ekome: ni amɛtsɔmɔ la odasefoi, amɛkwa amɛhemɔkɛyeli lɛ, loo amɛtao teemɔ he. Abatsɛ mɛi ni yatao teemɔ he lɛ akɛ Kristofoi ni amɛtee amɛhe. Bɔni afee ni amɛkɛ amɛhemɔkɛyeli lɛ atee lɛ, amɛkpɛlɛ Buddhafoi kɛ Shinto kusum nifeemɔi sɔrɔtoi anɔ. Amɛkɛ Maria Kannon, ni ji Maria ni atsake lɛ afee lɛ Buddhanyo bodhisattva kɛ esu akɛ nyɛ ni hiɛ abifao tsu nii yɛ amɛjamɔ gbɛjianɔtoo lɛ mli. Amɛgbijurɔyelii lɛ futu Buddha jamɔ kɛ Katolek jamɔ kɛ maŋbii ajamɔ. Shi kɛ aanyɛ amɛnɔ ni amɛya Buddhafoi ayarafeemɔi ashishi lɛ, amɛlaa sɔlemɔi ni Kristofoi kɛfee lala, ni amɛfeɔ modoshi lɛ, kusum nifeemɔ ko ni akɛhaa Buddhafoi asɔɔmɔ lɛ feɔ yaka. Mɛni eba nakai “Kristofoi” lɛ anɔ?

The Hidden Christians wolo lɛ tsɔɔ mli akɛ: “Yɛ Kirishitans [Kristofoi] lɛ ateŋ mɛi ni fa lɛ agbɛfaŋ lɛ, jamɔ henumɔ ko tee nɔ eda yɛ amɛmli ni ha ebawa akɛ amɛaaŋmɛɛ Shinto jamɔ kɛ Buddhafoi anyɔŋmɔi lɛ ahe.” Beni ajie naatsii lɛ ni Katolek maŋsɛɛ sanekpakpa shiɛlɔi ku amɛsɛɛ amɛba Japan lɛ, “Kristofoi ni amɛtse amɛhe” lɛ ateŋ mɛi ni fa kɛ amɛhe kpɛtɛ nakai amɛfutufutu jamɔ lɛ he kpɛŋŋ.

Shi, ani Katolek Sɔlemɔ lɛ baanyɛ awie ashi nakai “Kristofoi ni amɛtee amɛhe” lɛ ni kpoo akɛ amɛaaba Roma Katolek jamɔ mli ekoŋŋ lɛ yɛ gbɛ ni ja nɔ? Katolek Sɔlemɔ lɛ hu eŋɔ wɔŋjalɔi atsɔɔmɔi kɛ gbijurɔyelii babaoo ni Blonya fata he. Kɛ Katolekbii kɛ Protestantbii ni kɛɔ akɛ amɛji Kristofoi lɛ kɛ wɔŋjalɔi agbijurɔyelii ekpa amɛ “Kristojamɔ” he lɛ, ani jeee Yesu Kristo amɛ hu amɛkpooɔ lɛ lɛ?

Akɛ Amɛ Ba Anɔkwa Kristo Jamɔ He

Setsuko, ni kɛ afii 36 ehi shi akɛ Katoleknyo ni etuu ehe eha lɛ bayoo enɛ yɛ naagbee. Ebɔ mɔdɛŋ yɛ Jeŋ Ta II sɛɛ koni ekɛ nɔ ko awo bɔ ni efee shwɛm yɛ mumɔŋ lɛ mli kɛtsɔ Katolek sɔlemɔ ko ni ekɛ ehe yabɔ amɛhe lɛ nɔ. Esusu akɛ, ‘Kwɛ bɔ ni mitsui enyɔ mimli eha!’ beni etee Blonya Mass ni ena Blonyatsei ni awula amɛ fɛfɛo yɛ sɔlemɔtsu lɛ mli kɛ esɛɛ fɛɛ lɛ. Ekɛɛ: “Mimii shɛ nibii fɛfɛji ni wɔkɛsaa wɔtsu lɛ mli fe sɔlemɔi krokomɛi lɛ ahe.” Shi Setsuko bɛ Katolek tsɔɔmɔi ahe shishinumɔ diɛŋtsɛ ko, eyɛ mli akɛ etsɔɔ nii yɛ Hɔgbaa skul ko yɛ be ko mli. No hewɔ lɛ beni yoo nɛɛ taoɔ ni ekɛ ehe awo sɔlemɔ lɛ nitsumɔi amli babaoo lɛ, ebi esɔfo lɛ saji fioo ko. Ni eeeha yoo nɛɛ sanebimɔi lɛ ahetoo moŋ lɛ, osɔfo lɛ ye ehe fɛo. Akɛni enijiaŋ je wui hewɔ lɛ, eto eyiŋ akɛ ebaakase Biblia lɛ lɛ diɛŋtsɛ. No sɛɛ otsii enyɔ lɛ, Yehowa Odasefoi basara lɛ, ni ekpɛlɛ shia Biblia mli nikasemɔ nɔ.

Yoo lɛ tsɔɔ mli akɛ: “Eji dɔlɛ sane akɛ mikɛ Biblia mli anɔkwalei ni kuɔ mitsutsu hemɔkɛyelii anaa aaakpe. Mina alopecia neurotica, yitsɔi ni famɔɔ, yɛ bɔ ni mihao miha lɛ hewɔ. Shi anɔkwale lɛ mli la lɛ kpɛ shwie mitsui nɔ fiofio. Mihe jɔ̃ mihe beni mikase ni mile akɛ anyɛŋ afɔ Yesu yɛ fɛi kɛ nugbɔnɛmɔ be ni ji December mli, beni tookwɛlɔi nyɛŋ akwɛ amɛtooi yɛ ŋa nɔ gbɛkɛ lɛ. (Luka 2:​8-12) Ekumɔ bɔ ni misusuɔ Kristo fɔmɔ akɛ abifao lɛ he mihaa lɛ kwraa, ejaakɛ wɔkɛ odonti efee snoo ni wɔkɛfee tooi kɛ tooi akwɛlɔi ahe mfoniri.”

Yɛ be mli ni ena nɔ ni Biblia lɛ diɛŋtsɛ tsɔɔ lɛ, Setsuko kpɛ eyiŋ akɛ ebaakpa Blonya yeli. Ebɛ daa afi “Blonya mumɔ lɛ” dɔŋŋ, shi moŋ ejieɔ miishɛɛ mumɔ ni ji Kristofoi adaa gbi shihilɛ lɛ kpo.

Kɛ oheɔ Kristo oyeɔ yɛ anɔkwale mli lɛ, belɛ kɛ ona ni wɔŋjalɔi miibule Blonya lɛ, kaaha omli miiwo la. Amɛmiijie bɔ ni eji yɛ tsutsu lɛ kpo kɛkɛ amɛmiitsɔɔ​—wɔŋjalɔi agbijurɔyeli. Blonya enyiɛɛɛ mɔ ko hiɛ koni mɔ lɛ anya Yesu Kristo, ni eku esɛɛ eba yɛ mumɔŋ akɛ ŋwɛi Maŋtsɛ lɛ he. (Mateo, yitsei 24 kɛ 25; Marko, yitso 13; Luka, yitso 21) Shi moŋ, anɔkwa Kristofoi jieɔ su ni tamɔ Kristo nɔ lɛ kpo afi muu lɛ fɛɛ, ni amɛjajeɔ Maŋtsɛyeli, ni Yesu ebatsɔ Maŋtsɛ yɛ mli lɛ he sanekpakpa lɛ. Nakai ji bɔ ni Nyɔŋmɔ taoɔ ni wɔnya Yesu Kristo he akɛ wɔ Yiwalaherelɔ kɛ Maŋtsɛyeli lɛ nɔ Maŋtsɛ.​—Lala 2:​6-12.

[Shishigbɛ niŋmai]

[Mfoniri ni yɔɔ baafa 7]

Anɔkwa Kristofoi kɛ woo haa Yesu afi muu Iɛ fɛɛ