Nyɛnyaa Yɛ Maŋtsɛyeli Hiɛnɔkamɔ Mli!
“Nyɛnyaa yɛ hiɛnɔkamɔ mli; nyɛmiaa nyɛhiɛ yɛ amanehulu mli.”—ROMABII 12:12.
1. Mɛni hewɔ wɔbaanyɛ wɔna miishɛɛ yɛ Yehowa ni wɔkɛ lɛ bɔɔ lɛ mli lɛ, ni bɔfo Paulo wo Kristofoi ahewalɛ ni amɛfee mɛni?
“MIISHƐƐ Nyɔŋmɔ lɛ.” (1 Timoteo 1:11, New World Translation) Kwɛ bɔ ni enɛ tsɔɔ bɔ ni Yehowa ji lɛ mli jogbaŋŋ ehaa! Mɛni hewɔ? Ejaakɛ enitsumɔi fɛɛ kɛ miishɛɛ babaoo bahaa lɛ. Akɛni Yehowa ji nibii kpakpai kɛ nibii ni kɛ miishɛɛ baa fɛɛ jɛɛhe hewɔ lɛ, ebɔɔnii ni yɔɔ nilee lɛ fɛɛ baanyɛ ana miishɛɛ yɛ ekɛbɔɔ mli. Nilee gbɛ pɛ bɔfo Paulo tsɔ nɔ ekɛwo Kristofoi ahewalɛ ni amɛhiɛ asɔ amɛ hegbɛ ni miishɛɛ yɔɔ mli akɛ amɛbale Yehowa Nyɔŋmɔ lɛ, ni amɛda shi yɛ E-naakpɛɛ nikeenii ni ji ebɔɔnii lɛ fɛɛ he, ni amɛmii ashɛ amɛhe yɛ duromɔ ni E-jieɔ lɛ kpo etsɔɔ amɛ lɛ hewɔ. Paulo ŋma akɛ: “Nyɛmii ashɛa yɛ Nuŋtsɔ lɛ mli daa! Miisaa miikɛɛ: ‘Nyɛmii ashɛa!’”—Filipibii 4:4; Lala 104:31.
2. Mɛɛ hiɛnɔkamɔ kɛ miishɛɛ babaoo baa, ni awoɔ Kristofoi ahewalɛ ni amɛfee mɛni yɛ hiɛnɔkamɔ nɛɛ he?
2 Ani Kristofoi miibo ŋaawoo ni Paulo kɛha nɛɛ toi? Lɛlɛŋ amɛmiifee nakai! Yesu Kristo mumɔŋ nyɛmimɛi lɛ miinya yɛ anunyam hiɛnɔkamɔ ni Nyɔŋmɔ gbele nakai hegbɛ lɛ kɛha amɛ lɛ mli. (Romabii 8:19-21; Filipibii 3:20, 21) Hɛɛ, amɛle akɛ amɛbaana adesai awɔsɛɛ be hiɛnɔkamɔ kpeteŋkpele kɛha hiɛkalɔi kɛ gbohii fɛɛ lɛ mlibaa mli gbɛfaŋnɔ, kɛtsɔ Kristo ni amɛkɛ lɛ aaatsɔmɔ yɛ eŋwɛi Maŋtsɛyeli nɔyeli lɛ mli lɛ nɔ. Susumɔ miishɛɛ babaoo ni amɛbaana yɛ amɛhegbɛi akɛ nanemɛi niyelɔi, ni miisɔmɔ akɛ maŋtsɛmɛi kɛ osɔfoi lɛ he okwɛ! (Kpojiemɔ 20:6) Mɛɛ miishɛɛ baaji amɛnɔ nɛkɛ, yɛ be mli ni amɛyeɔ amɛbuaa adesai anɔkwafoi koni amɛshɛ emuuyeli he ni amɛyeɔ amɛbuaa yɛ Paradeiso ni akuɔ sɛɛ akɛbaa shikpɔŋ nɔ ekoŋŋ lɛ mli lɛ! Yɛ anɔkwale mli lɛ, Nyɔŋmɔ tsuji fɛɛ yɛ “naanɔ wala lɛ he hiɛnɔkamɔ . . . nɔ wala ni Nyɔŋmɔ ni maleee lɛ wo shi eha dani abɔ jeŋ bei lɛ.” (Tito 1:2) Yɛ hiɛnɔkamɔ kpeteŋkpele nɛɛ hewɔ lɛ, bɔfo Paulo woɔ Kristofoi fɛɛ hewalɛ akɛ: “Nyɛnyaa yɛ hiɛnɔkamɔ mli.”—Romabii 12:12.a
Anɔkwa Miishɛɛ—Eji Tsui Mli Su Ko
3, 4. (a) Mɛni wiemɔ “anya” lɛ tsɔɔ, ni shii enyiɛ esa akɛ Kristofoi anya? (b) Mɛni ji anɔkwa miishɛɛnamɔ, m edamɔ mɛni nɔ?
3 ‘Ni aaanya’ lɛ shishi ji ni anu mlifilimɔ he ni ajie lɛ kpo; etsɔɔɔ ni omii aaashɛ ohe be fɛɛ be kɛkɛ. Feemɔ-wiemɔi ni akɛdamɔɔ shi ahaa Hebri kɛ Hela wiemɔi ni akɛtsu nii yɛ Biblia lɛ mli aha “mlifilimɔ,” “nyamɔ,” kɛ “miishɛɛ ni anaa” lɛ tsɔɔ mligbɛ henumɔ kɛ mlifilimɔ kpojiemɔ yɛ kponɔgbɛ fɛɛ. Awoɔ Kristofoi fɛɛ hewalɛ akɛ “nyɛyaa nɔ nyɛnyaa,” “nyɛmii ashɛa daa.”—2 Korintobii 13:11; 1 Tesalonikabii 5:16, NW.
4 Shi te aaafee tɛŋŋ ni mɔ ko aaaya nɔ ana miishɛɛ daa? Enɛ baahi feemɔ, ejaakɛ anɔkwa miishɛɛ ji tsui mli su ko, mligbɛ su ko ni mli kwɔ, mumɔŋ nɔ. (5 Mose 28:47; Abɛi 15:13; 17:22) Eji Nyɔŋmɔ mumɔ lɛ yibii lɛ eko, ni Paulo to naa ekɛnyiɛ suɔmɔ sɛɛ. (Galatabii 5:22) Akɛ mligbɛ su lɛ, edamɔɔɔ kponɔgbɛ nibii anɔ, edamɔɔɔ wɔnyɛmimɛi lɛ po nɔ. Shi edamɔ Nyɔŋmɔ mumɔ krɔŋkrɔŋ lɛ nɔ. Ni ebaa kɛjɛɔ nakai mligbɛ tsui ni nyɔɔ mɔ mli ni mli kwɔ, yɛ le ni mɔ ko leɔ akɛ eyɔɔ anɔkwale lɛ, Maŋtsɛyeli hiɛnɔkamɔ lɛ hewɔ, ni akɛ eefee nɔ ni saa Yehowa hiɛ. No hewɔ lɛ miishɛɛ jeee subaŋ ko kɛkɛ ni akɛfɔɔ mɔ; eji “gbɔmɔ hee,” ni ji sui ni ha Yesu Kristo fee gbɔmɔ sɔrɔto ko lɛ anaabuamɔ yɛ hekome lɛ fa.—Efesobii 4:24; Kolosebii 3:10.
5. Mɛɛ be ni mɛɛ gbɛ nɔ miishɛɛ kpojiemɔi baanyɛ aje kpo yɛ?
5 Eyɛ mli akɛ miishɛɛ ji tsui mli su ko moŋ, shi kɛlɛ abaanyɛ ajie lɛ kpo yɛ be ko mli. Mɛni ji bei komɛi amli ni miishɛɛ jieɔ ehe kpo etsɔɔ nɛɛ? Ebaanyɛ efee nɔ fɛɛ nɔ kɛjɛ hiɛ ŋmlɔŋmlɔ kɛyashi tuumɔ diɛŋtsɛ po yɛ miishɛɛ hewɔ. (1 Maŋtsɛmɛi 1:40; Luka 1:44; Bɔfoi lɛ Asaji 3:8; 6:15) Ani enɛ tsɔɔ akɛ belɛ mɛi ni ewieee pii aloo amɛŋmɔɔɔ be fɛɛ be lɛ bɛ miishɛɛ ko kwraa? Dabi! Anɔkwa miishɛɛ ejieee ehe kpo yɛ wiemɔ blɛblɛ, ŋmɔlɔ muii, ŋmlɔ kwaa loo nyanyɔji ahe ni ajieɔ lɛ mli. Shihilɛi komɛi haa miishɛɛ jieɔ ehe kpo yɛ gbɛi sɔrɔtoi anɔ. Jeee miishɛɛ pɛ haa wɔfeɔ mɛi ni kɛ wɔhe kpaa gbee yɛ Maŋtsɛyeli Asa lɛ nɔ lɛ, shi moŋ wɔnyɛmimɛi ahedɔɔ kɛ suɔmɔ feɔ nakai.
6. Mɛni hewɔ Kristofoi baanyɛ ana miishɛɛ yɛ be fɛɛ mli kɛ amɛkɛ shihilɛi ni eŋɔɔɔ po miikpe lɛ?
6 Bɔ ni miishɛɛ feɔ nɔ ko ni yɔɔ daa lɛ jɛ bɔ ni ehiɔ shi daa yɛ mligbɛ akɛ Kristofonyo lɛ gbɔmɔ hee lɛ tsuiŋ shihilɛ ko lɛ hewɔ. Enɛ ji nɔ ni haa anyɛɔ anyaa yɛ be fɛɛ mli lɛ. Shi, yɛ bei komɛi amli lɛ nɔ ko baagba wɔnaa, aloo wɔkɛ shihilɛi ni eŋɔɔɔ baakpe. Shi wɔbaanyɛ wɔna miishɛɛ yɛ wɔtsuiŋ lolo. Mra be mli Kristofoi lɛ ateŋ mɛi komɛi ji nyɔji ni yɔɔ nuŋtsɔmɛi ni ewa akɛ aaasa amɛhiɛ. Ani Kristofoi ni tamɔ nɛkɛ baanyɛ anya loo ana miishɛɛ yɛ be fɛɛ mli? Hɛɛ, yɛ amɛ Maŋtsɛyeli hiɛnɔkamɔ lɛ kɛ miishɛɛ ni yɔɔ amɛtsuii amli lɛ hewɔ.—Yohane 15:11; 16:24; 17:13.
7. (a) Mɛni Yesu wie yɛ miishɛɛ loo nyamɔ he yɛ yiwaa shishi? (b) Mɛni yeɔ ebuaa wɔ koni wɔŋmɛ wɔtsui shi yɛ yiwaa shishi, ni namɔ to okadi kpakpa efɔ shi yɛ enɛ mli?
7 Beni bɔfo Paulo kɛɛ: “Nyɛnyaa yɛ hiɛnɔkamɔ mli” lɛ pɛ kɛkɛ ni ekɛfata he akɛ: “Nyɛmiaa nyɛhiɛ yɛ amanehulu mli.” (Romabii 12:12) Yesu hu wie miishɛɛ ni aaana yɛ amanehulu mli lɛ he beni ewie yɛ Mateo 5:11, 12 (NW) akɛ: “Miishɛɛ ji nyɛ, kɛji ajɛ nyɛ ni awa nyɛ yi . . . Nyɛnyaa ni nyɛtumɔa kɛ miishɛɛ, ejaakɛ nyɛnyɔmɔwoo da yɛ ŋwɛi.” Ehe ehiaaa ni nyamɔ kɛ miishɛɛ ni akɛaatumɔ yɛ biɛ lɛ afee kponɔgbɛ nifeemɔ diɛŋtsɛ; no ji mligbɛ tsui ni nyɔɔ mɔ mli ni mli kwɔ ni mɔ ko yɔɔ akɛ eesa Yehowa kɛ Yesu Kristo hiɛ yɛ be mli ni edamɔɔ shi shiŋŋ yɛ kaa mli lɛ. (Bɔfoi lɛ Asaji 5:41) Yɛ anɔkwale mli lɛ, miishɛɛ ji nɔ ni haa wɔŋmɛɔ wɔtsui shi yɛ amanehulu mli lɛ. (1 Tesalonikabii 1:6) Yesu to okadi ni hi fe fɛɛ efɔ shi yɛ enɛ mli. Ŋmalɛi lɛ kɛɔ wɔ akɛ: “Mɔ ni nyamɔ ni ka ehiɛ lɛ hewɔ lɛ, emia ehiɛ yɛ sɛŋmɔtso lɛ he amanehulu lɛ mli.”—Hebribii 12:2.
Ni Wɔɔnya yɛ Hiɛnɔkamɔ Mli yɛ Haomɔi Fɛɛ Sɛɛ
8. Mɛɛ naagbai loo haomɔi Kristofoi kɛbaakpe, shi mɛni hewɔ naagbai nɛɛ ejieee Kristofonyo lɛ miishɛɛ kɛyaaa lɛ?
8 Yehowa sɔɔlɔ ni mɔ ko ji lɛ haaa eye ehe kɛjɛ haomɔi amli. Weku mli naagbai, shika helɛtemɔ mli shihilɛi ni mli wawai, helai, loo suɔlɔ ko gbele baanyɛ aba. Yɛ be mli ni nibii ni tamɔ nɛkɛ baanyɛ aha aye awerɛho lɛ, amɛjieee wɔ nɔdaamɔ nɔ kɛha miishɛɛ yɛ Maŋtsɛyeli hiɛnɔkamɔ, ni ji mligbɛ nyamɔ ni wɔyɔɔ yɛ wɔtsui mli lɛ kɛyaaa.—1 Tesalonikabii 4:13.
9. Mɛɛ naagbai Abraham na, ni te wɔfeɔ tɛŋŋ wɔleɔ akɛ eyɛ miishɛɛ yɛ etsui mli?
9 Akɛ nɔkwɛmɔ nɔ lɛ, susumɔ Abraham he. Jeee be fɛɛ be shihilɛ feɔ nɔ ni ŋɔɔ kɛha lɛ. Eyɛ weku mli naagbai. Ehemɔ Hagar, kɛ eŋa Sara ehiii shi yɛ toiŋjɔlɛ mli. Bei yɛ amɛteŋ. (1 Mose 16:4, 5) Ishmael ye Isak he fɛo ni ewa lɛ yi. (1 Mose 21:8, .9; Galatabii 4:29) Yɛ naagbee lɛ, Abraham ŋa Sara ni esumɔɔ lɛ lɛ gbo. (1 Mose 23:2) Yɛ naagbai nɛɛ fɛɛ sɛɛ lɛ, ena miishɛɛ yɛ Maŋtsɛyeli Seshi, ni ji Abraham Seshi lɛ, mɔ ni shikpɔŋ nɔ wekui fɛɛ baatsɔ enɔ ana jɔɔmɔ lɛ he hiɛnɔkamɔ lɛ he. (1 Mose 22:15-18) Akɛni eyɔɔ miishɛɛ yɛ etsuiŋ hewɔ lɛ, eŋmɛ etsui shi yɛ Yehowa sɔɔmɔ mli afii oha, beni eshi emaŋ ni ji Ur lɛ mli lɛ sɛɛ. No hewɔ lɛ aŋma yɛ ehe akɛ: “Ekwɛ maŋ ni yɔɔ shishitoo ni wa ni etolɔ kɛ emalɔ ji Nyɔŋmɔ lɛ gbɛ.” Abraham hemɔkɛyeli ni eyɔɔ yɛ Mesia Maŋtsɛyeli ni baa lɛ mli lɛ hewɔ lɛ, Nuŋtsɔ Yesu, ni Nyɔŋmɔ eto lɛ Maŋtsɛ momo lɛ nyɛ ekɛɛ akɛ: “Abraham mli fili lɛ akɛ eeena migbi lɛ, ni ena ni emii shɛ.”—Hebribii 11:10; Yohane 8:56.
10, 11. (a) Mɛɛ mple Kristofoi shiɔ, ni ajieɔ wɔ kɛjɛɔ mli yɛ mɛɛ gbɛ nɔ? (b) Mɛni yeɔ ebuaa wɔ yɛ nyɛ ni wɔnyɛɛɛ wɔwuu ta yɛ omanyeyeli mli wɔshi wɔheloo ni esha yɔɔ mli lɛ mli?
10 Akɛ adesai ni yeee emuu lɛ, wɔ hu wɔyɛ esha heloo lɛ ni wɔkɛshĩɔ mple, ni nɛkɛ mpleshii koni afee nɔ ni ja nɛɛ baanyɛ afee nɔ ni haoɔ mɔ waa. Shi, ta ni wɔwuɔ wɔshiɔ wɔfatɔɔi lɛ etsɔɔɔ akɛ wɔbɛ hiɛnɔkamɔ. Paulo nu he akɛ enii efee mɔbɔ yɛ nɛkɛ tawuu nɛɛ mli, ni ekɛɛ: “Namɔ aaajie mi kɛaajɛ nɛkɛ gbele gbɔmɔtso nɛɛ dɛŋ? Miitsɔ wɔ-Nuŋtsɔ Yesu Kristo nɔ miida Nyɔŋmɔ shi.” (Romabii 7:24, 25) No hewɔ lɛ, ajieɔ wɔ kɛtsɔɔ Yesu Kristo kɛ kpɔmɔ nɔ lɛ ni ekɛha hewɔ lɛ nɔ.—Romabii 5:19-21.
11 Kristo kpɔmɔ afɔleshaa lɛ yeɔ ebuaa wɔ yɛ nyɛ ni wɔnyɛɛɛ wɔwuu ta lɛ yɛ emuuyeli mli lɛ mli. Wɔmli baanyɛ afili wɔ yɛ nɛkɛ kpɔmɔ nɔ nɛɛ mli ejaakɛ ehaa wɔnaa henilee ni mli tse keŋkeŋ kɛ wɔhe eshai ni akɛkeɔ wɔ. Paulo wieɔ “Kristo la” ni yɔɔ hewalɛ ni ‘ekɛaatsumɔ’ “wɔhenilee lɛ he kɛjɛ . . . nitsumɔi gbohii amli” lɛ he yɛ Hebribii 9:14. No hewɔ lɛ, esaaa akɛ fɔbuu kɛ fɔyeli henumɔi tsɔɔ tamɔ jatsu ni ka Kristofoi ahenileei anɔ. Enɛ, kɛ hiɛnɔkamɔ ni wɔyɔɔ lɛ feɔ tamɔ hewalɛ kpele ko ni haa wɔnaa miishɛɛ. (Lala 103:8-14; Romabii 8:1, 2, 32) Kɛ wɔjwɛŋ wɔhiɛnɔkamɔ lɛ he lɛ, eeewo wɔ fɛɛ hewalɛ ni wɔwuu ta lɛ yɛ omanyeyeli mli.
Ni Wɔɔha Wɔhiɛnɔkamɔ lɛ Ahi Wɔjwɛŋmɔ Mli Diɛŋtsɛ
12. Mɛɛ hiɛnɔkamɔ Kristofoi ni afɔ amɛ mu lɛ baanyɛ ajwɛŋ he?
12 Ehe miihia ni shwɛɛnii ni akɛ mumɔ efɔ amɛ mu lɛ kɛ tooi krokomɛi lɛ fɛɛ aha amɛ “yiwalaheremɔ hiɛnɔkamɔ lɛ” ahi amɛjwɛŋmɔ mli, ni amɛwo loo amɛbumɔ enɛ tamɔ dadefai ni buɔ amɛyitsei ahe. (1 Tesalonikabii 5:8) Kristofoi ni afɔ amɛ mu lɛ baanyɛ ajwɛŋ hegbɛ ni yɔɔ naakpɛɛ ni ji shihilɛ ni gbele bɛ mli yɛ ŋwɛi ni amɛaana, ni amɛdamɔ Yehowa Nyɔŋmɔ hiɛ, ni amɛkɛ Yesu Kristo ni awo ehiɛ nyam lɛ kɛ bɔfoi lɛ kɛ 144,000 lɛ mlibii krokomɛi lɛ fɛɛ ni hiɛɔ amɛ emuuyeli mli yɛ afii ohai abɔ lɛ amli lɛ aaabɔ lɛ he. Mɛɛ naanyobɔɔ ni sɛɛnamɔ yɔɔ he waa ni anyɛŋ atsɔɔ mli po nɛ!
13. Te mɛi ni afɔ amɛ mu ni yɔɔ shikpɔŋ nɔ lolo lɛ nuɔ amɛhiɛnɔkamɔ lɛ he amɛhaa tɛŋŋ?
13 Te mɛi ni afɔ amɛ mu lɛ ateŋ mɛi fioo ko ni yɔɔ shikpɔŋ nɔ lolo lɛ nuɔ amɛ Maŋtsɛyeli hiɛnɔkamɔ lɛ he amɛhaa tɛŋŋ? Abaanyɛ amua enɛ naa yɛ F. W. Franz, Buu Mɔɔ Asafo lɛ sɛinɔtalɔ, ni abaptisi lɛ yɛ 1913 lɛ wiemɔi amli: “Wɔhiɛnɔkamɔ lɛ ji anɔkwale, ni ebaaba mli yɛ asafoku bibioo ni ji 144,000 lɛ mlibii lɛ ateŋ naagbee mɔ kwraa he kɛteke nɔ ni wɔsusu lɛ po. Wɔ shwɛɛnii lɛ amlibii, ni yɔɔ wala mli yɛ 1914, ni wɔ fɛɛ wɔkpa gbɛ akɛ wɔbaaya ŋwɛi lɛ, elajeko wɔhenumɔ ni kɔɔ bɔ ni nakai hiɛnɔkamɔ lɛ jara wa ha lɛ. Shi wɔkɛ hewalɛ esaa wɔhe kɛha enɛ taakɛ wɔji yɛ be fɛɛ mli lɛ, ni wɔhiɛ miisɔ enɛ babaoo bei abɔ ni ebiɔ ni wɔkɛ be kakadaŋŋ amɛ lɛ. Eji nɔ ko ni esa akɛ wɔmɛ, kɛ ebiɔ afii akpeiakpe po. Mibuɔ wɔhiɛnɔkamɔ lɛ waa bianɛ fe be fɛɛ, ni misumɔɔɔ ni malaaje hiɛsɔɔ ni miyɔɔ kɛha enɛ lɛ. Asafoku bibioo lɛ hiɛnɔkamɔ lɛ hu kɛ nɔmimaa haa akɛ, asafo babaoo ni ji tooi krokomɛi lɛ agbɛkpamɔ lɛ baaba mli kɛteke wɔsusumɔ ni fe fɛɛ, ni enyɛŋ efee efolo kɔkɔɔkɔ. No hewɔ ni wɔhiɛ mli kpɛŋŋ kɛbashi ŋmɛlɛtswaa nɛɛ nɔ lɛ, ni wɔbaaya nɔ wɔhiɛ mli kpɛŋŋ kɛyashi be mli ni Nyɔŋmɔ aaaye odase akɛ eyeɔ ‘eshiwooi wuji ni jara wawai lɛ’ anɔkwale.”—2 Petro 1:4; 4 Mose 23:19; Romabii 5:5.
Wɔmli ni Aaafili Wɔ Bianɛ yɛ Paradeiso Hiɛnɔkamɔ lɛ He
14. Mɛɛ hiɛnɔkamɔ ehe hiaa ni asafo babaoo lɛ aha ahi amɛjwɛŋmɔ mli?
14 Hemɔkɛyeli wiemɔi ni tsɔɔ kunimyeli nɛɛ kɛ yiŋtoi wuji kɛha mlifilimɔ woɔ asafo babaoo lɛ ni ji tooi krokomɛi lɛ amli. (Kpojiemɔ 7:15, 16) Esa akɛ mɛi ni tamɔ nɛkɛ lɛ aha Harmagedon mli ni amɛaaje lɛ he hiɛnɔkamɔ lɛ ahi amɛjwɛŋmɔ mli. Hɛɛ, amɛkwɛ gbɛ akɛ amɛbaana bɔ ni Nyɔŋmɔ Maŋtsɛyeli lɛ buɔ jeŋ muu fɛɛ Maŋtsɛ ni Yehowa Nyɔŋmɔ ji lɛ bem, ni etseɔ egbɛi lɛ he kɛtsɔɔ amanehulu kpeteŋkpele ni ekɛbaa ni baajie efɔŋfeelɔi ni Satan ji amɛ-nyɔŋmɔ lɛ fɛɛ kɛjɛ shikpɔŋ nɔ kɛya lɛ nɔ lɛ. Mɛɛ miishɛɛ enɛ aaaji akɛ aaaje nakai amanehulu kpeteŋkpele lɛ mli!—Daniel 2:44; Kpojiemɔ 7:14.
15. (a) Mɛɛ helatsamɔ nitsumɔ Yesu kɛ ehe wo mli beni eyɔɔ shikpɔŋ nɔ lɛ, ni mɛni hewɔ? (b) Mɛni baafee mɛi ni baaje Harmagedon mli lɛ agbɔmɔtsoŋ hewalɛnamɔ mli hiamɔ nii, ni mɛni hewɔ eyɔɔ sɔrɔto yɛ mɛi ni ateeɔ amɛ shi lɛ anɔ he lɛ?
15 Kpojiemɔ 1:17 kɛɔ yɛ asafo babaoo lɛ ahe akɛ: “Toobi lɛ . . . aaalɛ amɛ, ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” Eyɛ mli akɛ gbalɛ nɛɛ ena emlibaa yɛ mumɔŋ bianɛ moŋ, shi mɛi ni baaje Harmagedon mli lɛ baana emlibaa diɛŋtsɛ lɛ kɛ amɛhiŋmɛi. Yɛ mɛɛ gbɛ nɔ? Ojogbaŋŋ, mɛni Yesu fee beni eyɔɔ shikpɔŋ nɔ lɛ? Etsa kpajelɔi, ni eha obubuafoi nyiɛ, egbele toimulɔi atoii kɛ shwilafoi ahiŋmɛii, ni etsa kpiti, kuumɔ hela, ni “etsaa hela fɛɛ hela kɛ hejaramɔ fɛɛ hejaramɔ.” (Mateo 9:35; 15:30, 31) Ani jeee enɛ he hiaa Kristofoi ŋmɛnɛ? Asafo babaoo lɛ kɛ jeŋ momo nɛɛ mli kpajeei kɛ hejaramɔi fɛɛ baaya jeŋ hee lɛ mli. Mɛni wɔkpaa gbɛ akɛ Toobi lɛ baafee yɛ enɛ he? Mɛi ni eje Harmagedon mli lɛ ahiamɔ nii baafee nɔ ni yɔɔ sɔrɔto yɛ mɛi ni abaatee amɛ shi lɛ anɔ he. Eeenyɛ eba akɛ abaaku sɛɛ abɔ mɛi ni atee amɛ shi lɛ ekoŋŋ kɛ gbɔmɔtsei ni kpa ko bɛ he ni yɔɔ hewalɛ, eyɛ mli akɛ amɛnine shɛko adesa emuuyeli nɔ. Yɛ naakpɛɛ nii ni ji gbohiiashitee lɛ hewɔ lɛ, eka shi faŋŋ akɛ ehe ehiaŋ ni atsɔ naakpɛɛ tsamɔ ko nɔ atsa amɛtsutsu helai. Shi yɛ gbɛ kroko nɔ lɛ, yɛ amɛ niiashikpamɔ krɛdɛɛ akɛ mɛi ni eje Harmagedon mli lɛ hewɔ lɛ, naakpɛɛ tsamɔ ji nɔ ni he baahia asafo babaoo lɛ ateŋ mɛi pii, ni amɛnine baashɛ nɔ hu. Eka shi faŋŋ akɛ, yiŋtoo titri ni yɔɔ Yesu helatsamɔi lɛ asɛɛ ji ni akɛwo asafo babaoo lɛ hewalɛ yɛ miishɛɛ gbɛkpamɔ mli akɛ jeee yibaamɔ kɛkɛ amɛbaana, shi moŋ abaatsa amɛ hu yɛ no sɛɛ.
16. (a) Mɛɛ be mɛi ni baaje Harmagedon mli lɛ atsamɔ yɛ naakpɛɛ gbɛ nɔ lɛ baaba, ni mɛni baajɛ mli aba? (b) Mɛɛ hiɛnɔkamɔ mli wɔbaaya nɔ wɔnya yɛ yɛ Afii Akpe be lɛ mli?
16 Naakpɛɛ helatsamɔi ni tamɔ nɛkɛ lɛ baaje shishi yɛ mɛi ni baaje Harmagedom mli lɛ ateŋ yɛ Harmagedon sɛɛ nɔŋŋ, dani gbohiiashitee lɛ aje shishi. (Yesaia 33:24; 35:5, 6; Kpojiemɔ 21:4; okɛto Marko 5:25-29 he.) No mli lɛ gbɔmɛi baashɛrɛ hiŋmɛi glasei, gbɛtsɔɔmɔ tsei, akpaketsei, obubuafoi ashwiilii, nyanyɔji ni asɔsɔi awo daaŋ, tsɔnei ni yeɔ buaa toimulɔi koni amɛnu nii kɛ ekrokomɛi fɛɛ ashwie. Mɛni po baaha ana miishɛɛ nɛkɛ! Kwɛ bɔ ni mra mli nibii asaamɔ ni Yesu kɛbaaba nɛɛ kɛ nɔ ni mɛi ni eje Harmagedon mli lɛ baatsu akɛ shikpɔŋ hee lɛ shishitoo lɛ kpaa gbee ha! Abaajie helai ni kumɔɔ mɔ lɛ fɛɛ kɛya, bɔni afee ni mɛi ni amɛje mli nɛɛ kɛ miishɛɛ aya amɛhiɛ, ni amɛkɛ he ni tswaa shi miikpa Afii Akpe ni ka amɛhiɛ lɛ mli nitsumɔi ni yɔɔ naakpɛɛ lɛ gbɛ, ni awui ni ekolɛ jeŋ momo lɛ ye amɛ lɛ haaa amɛfee shɔ̃ɔ. Ni yɛ Afii Akpe lɛ mli fɛɛ lɛ, amɛbaaya nɔ amɛna miishɛɛ yɛ hiɛnɔkamɔ ni ji adesa shihilɛ yɛ emuuyeli mli ni amɛnine aaashɛ nɔ beni nakai afii akpe lɛ baa naagbee lɛ mli.
17. Mɛɛ nyamɔi loo miishɛɛ baahi shi yɛ be mli ni Paradeiso saamɔ lɛ yaa nɔ lɛ?
17 Kɛ enɛ ji ohiɛnɔkamɔ lɛ, belɛ susumɔ miishɛɛ ni ooona yɛ be mli ni onaa Paradeiso ni akɛbaa shikpɔŋ nɔ ekoŋŋ lɛ mli gbɛfaŋnɔ lɛ he okwɛ. (Luka 23:42, 43) Ŋwanejee ko bɛ he akɛ mɛi ni eje Harmagedon mli lɛ baaye abua ni akɛsaa shikpɔŋ muu lɛ fɛɛ nɔ ni ana hei ni tse kɛha gbohii ni abaatee amɛ shi lɛ. Nɔ ni akɛbaato yarafeemɔi anajiaŋ ji bei ni akɛhereɔ mɛi ni ateeɔ amɛ shi kɛbaa lɛ atuu, ni wɔ diɛŋtsɛ wɔmɛi ni egboi hu fata he. Ni susumɔ naanyobɔɔ ni ŋɔɔ ni akɛ hii kɛ yei anɔkwafoi ni hi shi yɛ afii ohai abɔ ni eho lɛ amli lɛ baana lɛ he okwɛ. Amɛteŋ namɛi obaasumɔ ni okɛ amɛ awie? Ani Habel, Henok, Noa, Hiob, Abraham, Sara, Isak, Yakob, Yosef, Mose, Yoshua, Rahab, Debora, Samson, David, Elia, Elisha, Yeremia, Ezekiel, Daniel, loo Yohane Baptisilɔ lɛ? Ojogbaŋŋ, no lɛ nɛkɛ gbɛkpamɔ ni ŋɔɔ nɛɛ hu ji ohiɛnɔkamɔ lɛ fa. Obaanyɛ okɛ amɛ agba sane, okase nɔ ko kɛjɛ amɛŋɔɔ, ni okɛ amɛ atsu nii yɛ ekomefeemɔ mli kɛfee shikpɔŋ muu lɛ fɛɛ paradeiso.
18. Mɛɛ miishɛɛ nibii krokomɛi lolo wɔbaanyɛ wɔsusu he?
18 Agbɛnɛ hu susumɔ niyenii kpakpa, nu ni yɔɔ krɔŋŋ, kɛ kɔɔyɔɔ ni mli tse keŋkeŋ, kɛ wɔ shikpɔŋ lɛ ni asaa—nɔ ni aha ehewɔ nibii fɛɛ eye emuu taakɛ Yehowa bɔ akɛ efee lɛ he okwɛ. No mli lɛ wala efeŋ emuuyeli mli ŋɔɔmɔyeli ni hoɔ eyaa kɛkɛ ni nɔ ko bɛ mli, shi moŋ ebaafee nitsumɔi kɛ he ni akɛwoɔ nifeemɔi ni yiŋtoi kpakpai yɔɔ mli lɛ amli. Susumɔ jeŋ muu fɛɛ gbɔmɛi asafo ko ni amɛye amɛhe kɛjɛ awuiyeli, hewoo, awuŋayeli, kɛ béi ahe—nyɛmifeemɔ ko ni mɔ fɛɛ mɔ woɔ Nyɔŋmɔ mumɔ lɛ yibii lɛ he okwɛ. Kwɛ miishɛɛ ni eeeji!—Galatabii 5:22, 23.
Hiɛnɔkamɔ ni Haa Wala Shihilɛ Feɔ nɔ ni Sa
19. (a) Mɛɛ be mli nine baashɛ nyamɔ ni atsi ta yɛ Romabii 12:12 lɛ nɔ? (b) Mɛni hewɔ esa akɛ wɔtswa wɔfai shi akɛ wɔŋmɛŋ gbɛ ni shihilɛ mli naagbai atsi wɔhiɛnɔkamɔ lɛ ama afa lɛ?
19 Gbɛkpamɔ ni eba mli lɛ jeee hiɛnɔkamɔ dɔŋŋ, no hewɔ lɛ nine baashɛ nyamɔ ni Paulo wo hewalɛ yɛ he yɛ Romabii 12:12 lɛ nɔ bianɛ. (Romabii 8:24) Ni wɔɔsusu wɔsɛɛ be mli jɔɔmɔi ni Nyɔŋmɔ Maŋtsɛyeli lɛ kɛbaaba lɛ he lɛ ji nɔ ko ni haa wɔnyaa nakai hiɛnɔkamɔ lɛ he bianɛ. No hewɔ lɛ tswaa ofai shi akɛ oŋmɛŋ gbɛ ni jeŋ ni ekpɔtɔ nɛɛ mli shihilɛ mli naagbai lɛ atsi enunyam hiɛnɔkamɔ lɛ ema afa. Kaafee mɔ ni etɔo, onijiaŋ akaje wui, ni hiɛnɔkamɔ ni ka ohiɛ lɛ miilajeo. (Hebribii 12:3) Kristofoi agbɛ lɛ ni oookpoo lɛ haŋ ona onaagbai anaa tsabaa. Kaimɔ akɛ, kɛji akɛ mɔ ko kpa Nyɔŋmɔ sɔɔmɔ yɛ shihilɛ mli naagbai fɛɛ ni yaa nɔ bianɛ lɛ ahewɔ lɛ, eyaa nɔ ehiɔ nakai enaagbai lɛ amli lolo, shi elaajeɔ ehiɛnɔkamɔ lɛ ni elaajeɔ hegbɛ ni eeena akɛ eeena miishɛɛ yɛ gbɛkpamɔi ni yɔɔ naakpɛɛ ni ka ehiɛ lɛ mli lɛ hu.
20. Te Maŋtsɛyeli hiɛnɔkamɔ lɛ saa mɛi ni mɔɔ mli lɛ ahe ehaa tɛŋŋ, ni mɛni hewɔ?
20 Yehowa webii yɛ nɔ fɛɛ nɔ ni amɛaadamɔ nɔ amɛha amɛshihilɛ afee nɔ ni miishɛɛ yɔɔ mli. Amɛhiɛnɔkamɔ ni tsɔɔ nɔ kpakpa ni kanyaa mɔ lɛ haa shihilɛ feɔ nɔ ni sa. Ni amɛhaaa amɛhiɛnɔkamɔ ni miishɛɛ yɔɔ mli lɛ afee amɛ pɛ amɛnɔ. Dabi, amɛyɛ he miishɛɛ akɛ amɛaagba mɛi krokomɛi. (2 Korintobii 3:12) Nakai ni eji hewɔ lɛ, mɛi ni mɔɔ Maŋtsɛyeli hiɛnɔkamɔ lɛ mli lɛ ji gbɔmɛi ni yɔɔ hekɛnɔfɔɔ, ni amɛtaoɔ akɛ amɛaawo mɛi krokomɛi hewalɛ kɛtsɔ sanekpakpa ni jɛ Nyɔŋmɔ ŋɔɔ lɛ ni amɛaagba amɛ lɛ nɔ. Enɛ kɛ hiɛnɔkamɔ ni yɔɔ naakpɛɛ fe fɛɛ eko ni akɛha adesai fɛɛ pɛŋ woɔ mɛi ni kpɛlɛɔ sane lɛ nɔ lɛ ashihilɛ mli obɔ—Maŋtsɛyeli ni baaku sɛɛ ekɛ Paradeiso aba shikpɔŋ nɔ ekoŋŋ lɛ he hiɛnɔkamɔ lɛ. Kɛ gbɔmɛi ekpɛlɛɛɛ nɔ lɛ, wɔ lɛ wɔɔya nɔ wɔnya lolo ejaakɛ wɔyɛ hiɛnɔkamɔ. Mɛi ni booo toi lɛ ji mɛi ni laajeɔ nii lɛ; jeee wɔ.—2 Korintobii 4:3, 4.
21. Mɛni ebɛŋkɛ kpaakpa, ni te esa akɛ wɔbu wɔhiɛnɔkamɔ lɛ wɔha tɛŋŋ?
21 Nyɔŋmɔ shiwoo lɛ ji: “Naa! Miifee nii fɛɛ ehee.” (Kpojiemɔ 21:5) Jeŋ hee lɛ kɛ emiishɛɛ henumɔi kɛ jɔɔmɔi ni bɛ naagbee lɛ fɛɛ ebɛŋkɛ. Wɔhiɛnɔkamɔ—kɛha wala yɛ ŋwɛi loo paradeiso shikpɔŋ nɔ lɛ—jara wa babaoo; mɔ mli. Buu lɛ akɛ “wɔsusuma sɛkɛ ni tseee ni efi shi shiŋŋ” fe be fɛɛ yɛ naagbee gbii ni ji jaramɔ bei nɛɛ amli. Akɛni wɔhiɛnɔkamɔ lɛ efee tamɔ sɛkɛ yɛ Yehowa, “naanɔ tɛsaa—blema Tɛsaa lɛ” mli hewɔ lɛ, wɔyɛ yiŋtoo ni miishɛɛ ni mli wa yɔɔ mli bianɛ akɛ ‘wɔɔnya yɛ hiɛnɔkamɔ’ ni akɛma wɔhiɛ lɛ mli.—Hebribii 6:19; Yesaia 26:4, The Amplified Bible.
[Shishigbɛ niŋmai]
a Yɛ afi 1992 mli lɛ, Yehowa Odasefoi ni yɔɔ jeŋ fɛɛ lɛ afi ŋmalɛ lɛ baafee: “Nyɛnyaa yɛ hiɛnɔkamɔ mli. . . . Nyɛhiɛa sɔlemɔ mli daa.”—Romabii 12:12.
Sanebimɔi Ni Akɛtiɔ Mli
◻ Mɛni ji adesai ahiɛnɔkamɔ ni da fe fɛɛ?
◻ Mɛni ji anɔkwa miishɛɛ?
◻ Mɛɛ be mli eeenyɛ eba akɛ mɛi ni baaje Harmagedon mli Iɛ atsamɔ yɛ naakpɛɛ gbɛ nɔ Iɛ baaba?
◻ Mɛni hewɔ esaaa akɛ wɔhaa shihilɛ mli naagbai tsiɔ wɔhiɛnɔkamɔ lɛ emaa afa Iɛ?
◻ Mɛɛ miishɛɛi okpaa gbɛ yɛ jeŋ hee Iɛ mli?
[Mfoniri ni yɔɔ baafa 9]
Ani miishɛɛ yiŋ otsuiŋ obɔ akɛ ooona nɔ helatsamɔi ni Yesu tsu he nii Iɛ eko?
[Mfoniri ni yɔɔ baafa 10]
Mɛi ni nyaa Maŋtsɛyeli Iɛ he lɛ woɔ mɛi krokomɛi hewalɛ kɛtsɔɔ amɛhiɛnɔkamɔ Iɛ ni amɛgbaa amɛ lɛ nɔ