Tsu Nii Waa Kɛha Owe lɛ Fɛɛ Yiwalaheremɔ

“Nyɛlɛa amɛ yɛ Nuŋtsɔ [Yehowa] tsɔsemɔ kɛ ŋaawoo lɛ mli.” —EFESOBII 6:4.

 1, 2. Mɛɛ shihilɛi ni mli wawai fɔlɔi kɛkpeɔ ŋmɛnɛ?

WOLO tɛtrɛɛ ko ni ehe gbɛi tsɛ lɛ tsakemɔ yɛ ekãa naa. Enɛ je kpo yɛ sane ko ni aŋma ni tsɔɔ tsakemɔi ni yɔɔ naakpɛɛ ni eba weku lɛ mli nyɛsɛɛ nɛɛ lɛ he. Akɛɛ enɛɛmɛi ji “nɔ ni ejɛ gbala-mlitsemɔ, gbalashihilɛ mlibotemɔ ekoŋŋ, gbala-mlitsemɔ ekoŋŋ, fɔmɔ ni tsɛ bɛ he, kɛ naagbai heei ni yɔɔ wekui ni mligbalako lɛ amli lɛ ahe tsɛŋemɔ-helai lɛ amli eba.” Nɛkɛ haomɔi kɛ nɔnyɛɛi nɛɛ bɛ naakpɛɛ ejaakɛ Biblia lɛ gba fɔ shi akɛ gbɔmɛi kɛ “jaramɔ bei” baakpe yɛ “naagbee gbii” lɛ amli.—2 Timoteo 3:1-5.

² No hewɔ lɛ fɔlɔi kɛ shihilɛi ni mli wawai ni tsutsu yinɔi lɛ leee kpeɔ ŋmɛnɛ. Eyɛ mli akɛ fɔlɔi ni yɔɔ wɔteŋ lɛ ateŋ mɛi komɛi enyɛ etsɔse amɛbii lɛ yɛ gbɛi ni Nyɔŋmɔ gbeyeishemɔ yɔɔ mli nɔ kɛjɛ “[amɛ]gbekɛbiiashi” moŋ, shi kpaako wekui pii eje ‘anɔkwale lɛ mli nyiɛmɔ’ shishi. (2 Timoteo 3:15; 3 Yohane 4) Ekolɛ beni fɔlɔi lɛ bɔi amɛ Nyɔŋmɔ gbɛ̀i lɛ tsɔɔmɔ lɛ no mli lɛ amɛbii lɛ edara. Kɛfata he lɛ, anaa fɔlɔ kome wekui kɛ wekui ni banumai yɔɔ mli lɛ ni amɛyi miifa babaoo yɛ wɔteŋ. Bɔ fɛɛ bɔ ni shihilɛ ni oyɔɔ mli lɛ ji lɛ, bɔfo Paulo ŋaawoo nɛɛ kɔɔ ohe: “Nyɛlɛa amɛ yɛ Nuŋtsɔ [Yehowa] tsɔsemɔ kɛ ŋaawoo lɛ mli.”—Efesobii 6:4.

Fɔlɔi Kristofoi kɛ Amɛ Nitsumɔi

 3, 4. (a) Mɛni nibii eha tsɛmɛi anitsumɔ eba shi? (b) Mɛni hewɔ esa akɛ tsɛmɛi Kristofoi lɛ afee mɛi ni fe mɛi ni lɛɔ weku lɛ kɛkɛ lɛ?

³ Kadimɔ akɛ Paulo wiemɔi ni yɔɔ Efesobii 6:4 lɛ kɔɔ “tsɛmɛi” lɛ ahe titri. Niŋmalɔ ko tsɔɔ mli akɛ, yɛ yinɔi ni eho lɛ amli lɛ, “tsɛmɛi lɛ ji mɛi ni amɛbii ajeŋba kɛ mumɔŋ tsɔsemɔ he gbɛnaa nii ka amɛnɔ; tsɛmɛi lɛ ji mɛi ni kwɛɔ koni akɛ woloŋ tsɔsemɔ aha amɛbii lɛ. . . . Shi tsɔnei ahe nitsumɔ kɛ guɔyeli nifeemɔ ni ba lɛ jie teemɔŋ tsakpaa nɛɛ kɛtee; tsɛmɛi shi amɛ ŋmɔji kɛ shwapoi, amɛshi amɛ shiai koni amɛyatsu nii yɛ guɔyeli nifeemɔ hei kɛ sɛɛ mli lɛ yɛ ɔfis sɔrɔtoi amli. Kɛkɛ ni nyɛmɛi lɛ bɔi nitsumɔi pii ni be ko lɛ tsɛmɛi lɛ tsuɔ he nii lɛ tsumɔ. Tsɛ gbɛhe lɛ bafee nɔ ko ni akɛ naabu tsiɔ ta babaoo kɛkɛ ni atsuuu he nii.”

⁴ Hii Kristofoi: Nyɛtsui akanyɔa nyɛmli yɛ mɛi ni kɛ niyenii baa shia ni nyɛji kɛkɛ lɛ he, ni nyɛshi nyɛbii atsɔsemɔ kɛ lɛɛ lɛ fɛɛ nyɛha nyɛŋamɛi. Abɛi 24:27 wo blema tsɛmɛi lɛ hewalɛ akɛ: “Saamɔ onitsumɔ yɛ agbo naa, ni ofee lɛ klalo oha ohe yɛ ŋmɔshi; no sɛɛ dani oma otsu [oshiabii].” Nakai nɔŋŋ hu ŋmɛnɛ, akɛ nuu nitsulɔ lɛ, ehe baahia ni otsu nii dɛŋdɛŋ yɛ be kakadaŋŋ mli koni okɛna shihilɛ mli nibii. (1 Timoteo 5:8) Shi, yɛ no sɛɛ lɛ, ofainɛ ŋɔɔ be ni ‘okɛma otsu lɛ [oshiabii] oma shi’—yɛ henumɔŋ kɛ mumɔŋ.

 5. Te ŋamɛi Kristofoi aaafee tɛŋŋ atsu amɛ shiabii lɛ ayiwalaheremɔ he nii?

⁵ Ŋamɛi Kristofoi: Esa akɛ nyɛ hu nyɛtsu nii waa kɛha nyɛshiabii lɛ ayiwalaheremɔ. Abɛi 14:1 kɛɔ akɛ: “Yei anilee maa shia.” Ákɛ gbalashihilɛ mli hefatalɔi lɛ, nyɛshwiei lɛ atsɔsemɔ he gbɛnaa nii ka okɛ owu lɛ fɛɛ nɔ. (Abɛi 22:6; Maleaki 2:14) Enɛ baabi obii lɛ atsɔsemɔ loo kamɔ, amɛhesaamɔ kɛha Kristofoi akpeei kɛ sɔɔmɔ nitsumɔ lɛ, loo weku nikasemɔ ni ooofee beni owu lɛ nyɛɛɛ afee enɛ. Obaanyɛ ofee babaoo hu yɛ hesaa yɛ shia nitsumɔ ni oootsɔɔ obii, sui kpakpai, gbɔmɔtsoŋ hetsemɔ, kɛ nibii babaoo ni yeɔ buaa lɛ amli. (Tito 2:5) Kɛ wumɛi kɛ ŋamɛi tsu nii kutuu yɛ nɛkɛ gbɛ nɔ lɛ, amɛbaanyɛ amɛtsu amɛbii lɛ ahiamɔ nii ahe nii jogbaŋŋ. Shi mɛni ji nakai hiamɔ nii lɛ ekomɛi?

Amɛ Henumɔŋ Hiamɔ Nii ahe Nitsumɔ

 6. Mɛɛ nitsumɔ nyɛmɛi kɛ tsɛmɛi tsuɔ yɛ amɛbii lɛ adaramɔ yɛ henumɔŋ lɛ mli?

⁶ Kɛ “biianyɛ hiɛɔ lɛ diɛŋtsɛ ebii dɔdɔɔdɔ lɛ,” amɛnuɔ he akɛ amɛyɛ jogbaŋŋ, amɛyɛ shweshweeshwe, ni asumɔɔ amɛ. (1 Tesalonikabii 2:7; Lala 22:10) Nyɛmɛi fioo ko pɛ baanyɛ ate shi awo kanyamɔ ni haa amɛgbalaa amɛjwɛŋmɔ fɛɛ kɛyaa amɛ fufɔobii anɔ lɛ. Gbalɔ Yesaia bi akɛ: “Aso yoo hiɛ aaakpa ebi fufɔoo nɔ, aloo emusuŋ etsɔŋ lɛ yɛ emusuŋ bi hewɔ?” (Yesaia 49:15) No hewɔ lɛ nyɛmɛi lɛ tsuɔ nitsumɔ ni he hiaa waa yɛ amɛbii lɛ adaramɔ yɛ henumɔŋ lɛ mli. Ni kɛlɛ, tsɛmɛi hu tsuɔ nitsumɔ ko ni he hiaa yɛ enɛ gbɛfaŋ. Weku tsɔselɔ, Paul Lewis kɛɔ akɛ: “Mináko nitsulɔ kome po ni tsuɔ wekui ahilɛ-kɛhamɔ he nii ni enu ni gbekɛ fɔŋ ko miikɛɛ akɛ ekɛ amɛtsɛ teŋ wekukpaa hi da. Anaaa gbekɛ kome po yɛ oha mli.”

 7, 8. (a) Mɛɛ odaseyeli yɔɔ ni tsɔɔ tsakpaa ni mli wa ni ka Yehowa Nyɔŋmɔ kɛ e-Bi lɛ teŋ? (b) Te tsɛmɛi aaafee tɛŋŋ aha ekomefeemɔ kpaa ni suɔmɔ yɔɔ mli ahi amɛ kɛ amɛbii ateŋ?

⁷ No hewɔ lɛ ehe miihia ni tsɛmɛi ni ji Kristofoi lɛ akwɛ jogbaŋŋ ni amɛtɛo suɔmɔ tsakpaa yɛ amɛ kɛ amɛbii ateŋ. Akɛ nɔkwɛmɔ nɔ lɛ, susumɔ Yehowa Nyɔŋmɔ kɛ Yesu Kristo he. Beni abaptisiɔ Yesu lɛ, Yehowa jaje akɛ: “Bo ji misuɔmɔ Bi lɛ, bo ohe tsuijurɔ minaa.” (Luka 3:22) Atsɔɔ saji babaoo yɛ nakai wiemɔi fioo lɛ mli! Yehowa (1) eha ale akɛ e-Bi ni, (2) etsɔɔ suɔmɔ ni eyɔɔ kɛha Yesu yɛ faŋŋ mli, ni (3) eha ale akɛ ekpɛlɛɔ Yesu nɔ. Ni kɛlɛ jeee enɛ ji be kome pɛ mli ni Yehowa jie suɔmɔ ni eyɔɔ kɛha e-Bi lɛ kpo yɛ. Yesu kɛɛ e-Tsɛ lɛ yɛ sɛɛ mli akɛ: “Oosumɔ mi dani ato je lɛ shishi.” (Yohane 17:24) Ni kɛlɛ, ani nɔkpɛlɛmɔ, suɔmɔ, kɛ hiɛsɔɔ he ehiaaa bihii kɛ biyei fɛɛ ni feɔ toiboo lɛ kɛjɛɛɛ amɛtsɛmɛi adɛŋ?

⁸ Kɛ oji tsɛ lɛ, eeenyɛ eba akɛ ooonyɛ ofee babaoo koni oha suɔmɔ tsakpaa ahi bo kɛ obii ateŋ daa kɛtsɔ heloo naa kɛ wiemɔi ni sa ni okɛaatsɔɔ osuɔmɔ lɛ nɔ. Eji anɔkwale akɛ ewa akɛ hii komɛi aaajie amɛ hedɔɔ kpo, titri lɛ kɛ amɛnine shɛko hedɔɔ ni yɔɔ faŋŋ nɔ kɛjɛko amɛ diɛŋtsɛ amɛtsɛmɛi aŋɔɔ da. Shi kɛlɛ, mɔdɛŋ ni ooobɔ jabejabe ko po ni okɛjie suɔmɔ kpo otsɔɔ obii lɛ baanyɛ ana amɛnɔ hewalɛ waa. Fɛɛ sɛɛ lɛ, “suɔmɔ . . . haa mɔ nane mɔɔ shi.” (1 Korintobii 8:1) Kɛ obii lɛ nuɔ he akɛ amɛyɛ shweshweeshwe yɛ osuɔmɔ akɛ tsɛ lɛ hewɔ lɛ, amɛbaasumɔ babaoo akɛ amɛaafee ‘bihii kɛ biyei diɛŋtsɛ’ ni amɛaagbao amɛteemɔŋ sane yɛ heyeli mli.—Abɛi 4:3.

Amɛ Mumɔŋ Hiamɔ Nii Ahe Nitsumɔ

 9. (a) Mɛɛ gbɛ nɔ Israelbii ni sheɔ Nyɔŋmɔ gbeyei lɛ tsu amɛwekui lɛ amumɔŋ hiamɔ nii ahe nii yɛ? (b) Mɛɛ hegbɛi Kristofoi yɔɔ ni amɛkɛaatsɔɔ amɛbii anii trukaa?

⁹ Gbekɛbii hu yɛ mumɔŋ hiamɔ nii. (Mateo 5:3) Mose wo Israel fɔlɔi lɛ ŋaa akɛ: “Nɛkɛ wiemɔi nɛɛ ni miwoɔo he kita ŋmɛnɛ gbi nɛɛ aka otsui nɔ, ni ojwɛŋ nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni oka shi kɛ beni ote shi.” (5 Mose 6:6, 7) Kɛ oji Kristofonyo fɔlɔ lɛ, obaanyɛ otsu otsɔsemɔ lɛ he nii trukaa, tamɔ “beni onyiɛ gbɛ teŋ” nɛkɛ. Beni nyɛnyiɛ loo nyɛta tsɔne mli kutuu kɛyaa, nyɛyaa shwapo mli kɛha nihemɔ, loo nyɛkɛ nyɛbii nyiɛ kutuu kɛmiiya shia kɛ shia yɛ Kristofoi asɔɔmɔ nitsumɔ lɛ mli lɛ haa nyɛnaa hegbɛi kpakpai ni aaaha nyɛkɛ tsɔsemɔ aha nyɛbii lɛ yɛ hejɔlɛ shihilɛ mli. Niyeli bei ji be kpakpa kɛha wekui ni amɛkɛaagba sane. Fɔlɔ ko kɛɛ akɛ: “Wɔkɛ niyeli be gbaa nibii ni ba yɛ gbi lɛ mli ahe sane.”

10. Mɛni hewɔ weku nikasemɔ feɔ nɔ ni wa yɛ bei komɛi amli lɛ, ni mɛɛ faishitswaa esa akɛ fɔlɔi ana?

¹⁰ Shi kɛlɛ, tsɔsemɔ ni ato he gbɛjianɔ kɛtsɔ daa Biblia kasemɔ ni okɛ obii lɛ aaafee nɔ lɛ hu he miihia. Akpɛlɛɔ nɔ akɛ, “buulufeemɔ kpɛtɛ gbekɛ tsui he.” (Abɛi 22:15) Fɔlɔi komɛi kɛɔ akɛ amɛbii baanyɛ aje gbɛ afite weku nikasemɔ lɛ yɛ gbɛ ni waaa kwraa nɔ. Yɛ mɛɛ gbɛ nɔ? Amɛbaafee amɛnii tamɔ etɔ amɛ, amɛbaafee yeyeeye ni amɛgba mɛi anaa (tamɔ amɛnyɛmimɛi kɛ nɔmɔ) loo amɛnii ni amɛaafee tamɔ nɔ ni amɛleee Biblia mli shishijee anɔkwalei lɛ ahe nɔ ko kwraa. Kɛ enɛ tee nɔ aahu kɛyashɛ he ni esa akɛ ana mɔ ni esa akɛ afeɔ esuɔmɔnaa nii lɛ, esa akɛ fɔlɔ lɛ suɔmɔnaa nii afee nɔ ni he wa fe fɛɛ. Esaaa akɛ fɔlɔi Kristofoi ŋmɛɛɔ he koni amɛha amɛbii aye shia lɛ nɔ.—Okɛto Galatabii 6:9 he.

11. Mɛɛ gbɛ nɔ aaatsɔ ni aha weku nikasemɔ lɛ afee nɔ ni ŋɔɔ?

¹¹ Kɛ obii lɛ nyaaa weku nikasemɔ lɛ he lɛ, ekolɛ abaanyɛ afee tsakemɔi komɛi. Akɛ nɔkwɛmɔ nɔ lɛ, ani akɛ nikasemɔ lɛ tsuɔ nii akɛ nɔ ni akɛtiɔ gbekɛ lɛ fatɔɔi heei amli? Ekolɛ ebaahi moŋ akɛ nyɛaawie naagbai ni tamɔ nɛkɛ he yɛ teemɔŋ. Ani nyɛfeɔ nyɛ nikasemɔ lɛ daa? Kɛ nyɛfo mli kɛha tɛlivishin nɔ nifeemɔ ko loo akaŋshii he nɔ ko ni nyɛsumɔɔ waa lɛ, eka shi faŋŋ akɛ nyɛbii lɛ ebuŋ nikasemɔ lɛ akɛ ehe miihia waa. Ani gbɛ ni nyɛtsɔɔ nɔ nyɛfeɔ nikasemɔ lɛ tsɔɔ akɛ nyɛkɛ hiɛdɔɔ kɛ miishɛɛ woɔ mli? (Romabii 12:8) Hɛɛ, esa akɛ nikasemɔ afee nɔ ni ŋɔɔ. Bɔɔ mɔdɛŋ ni oha gbekɛbii lɛ fɛɛ ana mli gbɛfaŋnɔ. Feemɔ enɛ yɛ gbɛ kpakpa ni tswaa mɔ maa shi nɔ, ni okɛ miishɛɛ ajie obii lɛ ayi yɛ bɔ ni amɛkɛ amɛhe woɔ mli lɛ hewɔ. Nyɛkakasea kɛkɛ, bɔɔ mɔdɛŋ ni onine ashɛ tsuii lɛ anɔ.—Abɛi 23:15.

Tsɔsemɔ yɛ Jalɛ Mli

12. Mɛni hewɔ jeee be fɛɛ be tsɔsemɔ bafeɔ heloo naa toigbalamɔ lɛ?

¹² Tsɔsemɔ he hiaa gbekɛbii hu jogbaŋŋ diɛŋtsɛ. Akɛ fɔlɔ lɛ, esa akɛ oto he ni amɛbaafee nii kɛyashi he gbɛjianɔ oha amɛ. Abɛi 13:24 kɛɔ akɛ: “Mɔ ni tsiɔ etso naa lɛ eenyɛ ebi lɛ; shi mɔ ni sumɔɔ lɛ lɛ, ejɛɔ mra etsɔseɔ lɛ.” Shi, Biblia lɛ etsɔɔɔ akɛ, esa akɛ akɛ heloo naa tsɔsemɔ aha be fɛɛ be. Abɛi 8:33 kɛɔ akɛ: “Nyɛboa tsɔsemɔ toi,” ni akɛɔ wɔ akɛ, “kamɔ boteɔ mɔ ni kɔɔ sane sɛɛ lɛ mli vii fe bɔ ni kpãai oha boteɔ kwashia mli.”—Abɛi 17:10.

13. Te esa akɛ atsu gbekɛ tsɔsemɔ he nii aha tɛŋŋ?

¹³ Heloo naa tsɔsemɔ baafee nɔ ni sa yɛ bei komɛi amli. Shi kɛ akɛ mlifu tsu enɛ he nii lɛ, ebaanyɛ efee nɔ ni baafa tsɔ ni sɛɛnamɔ baŋ he. Biblia lɛ bɔɔ kɔkɔ akɛ: “Nyɛ tsɛmɛi lɛ, nyɛkawoa nyɛbii amli la, koni amɛtsui akafa.” (Kolosebii 3:21) Yɛ anɔkwale mli lɛ, “nɔnyɛɛ kɛkɛ baanyɛ aha nilelɔ afee enii tamɔ mɔ ni eye sɛkɛ.” (Jajelɔ 7:7, NW) Obalaŋta ni sane edɔ lɛ lɛ baanyɛ atse jalɛ tɛi ni afolɔ ashwie shi lɛ hiɛ atua. No hewɔ lɛ, esa akɛ fɔlɔi kɛ Ŋmalɛi lɛ atsu nii ni amɛkɛtsɔse amɛbii yɛ jalɛ naa, yɛ gbɛ ni yɔɔ shiŋŋ, shi eŋmɛɔ pɛpɛɛpɛ nɔ. (2 Timoteo 3:16) Akɛ tsɔsemɔ ni Nyɔŋmɔ gbeyeishemɔ yɔɔ mli lɛ haa yɛ suɔmɔ kɛ mlijɔlɛ naa.—Okɛto 2 Timoteo 2:24, 25 he.a

14. Mɛni esa akɛ fɔlɔi afee kɛ amɛnuɔ he akɛ esa akɛ amɛmli afu lɛ?

¹⁴ Shi, “wɔ fɛɛ wɔtɔ̃ɔ babaoo.” (Yakobo 3:2) Fɔlɔ ni yɔɔ suɔmɔ lɛ po baanyɛ atɔ̃ yɛ nɔnyɛɛ ni baa enɔ yɛ nakai be lɛ mli lɛ hewɔ ni ebaakɛɛ nibii ni mlihilɛ bɛ mli loo ebaajie emlifu kpo. (Kolosebii 3:8) Kɛ eba lɛ nakai lɛ, kaaha hulu miinyɔ shi yɛ obi lɛ nɔ kɛ haomɔ babaoo loo eenyɔ shi yɛ onɔ ni omli efu lolo. (Efesobii 4:26, 27) Okɛ obi lɛ asaa nyɛteŋ bei lɛ, ni akpa fai kɛ etamɔ nɔ ni nakai feemɔ sa. (Okɛ Mateo 5:23, 24 ato he.) Heshibaa ni tamɔ nɛkɛ ni ajieɔ lɛ kpo lɛ baanyɛ agbala bo kɛ obi lɛ kɛbɛŋkɛ nyɛhe. Kɛ onuɔ he akɛ onyɛŋ oye omumɔ nɔ, ni obaaŋmɛɛ ohe oha mlifu lɛ, no lɛ taomɔ yelikɛbuamɔ kɛjɛ asafo lɛ mli onukpai ni ahala amɛ lɛ adɛŋ.

Shiai ni Fɔlɔ Kome Yɔɔ Mli kɛ Banuma-Wekui

15. Mɛɛ gbɛ nɔ aaatsɔ aye abua gbekɛbii ni yɔɔ fɔlɔ kome wekui amli lɛ?

¹⁵ Shi, jeee gbekɛbii fɛɛ naa yelikɛbuamɔ kɛjɛɔ fɔlɔi enyɔ adɛŋ. Fɔlɔ kome miitsɔse gbekɛ 1 yɛ gbekɛbii 4 fɛɛ 4 mli yɛ U.S. Amerika. Asɛɛɛ ‘awusai’ ahe yɛ Biblia bei amli, ni atsiɔ bɔ ni esa akɛ ajwɛŋ amɛhe lɛ ta shii abɔ yɛ Ŋmalɛi lɛ amli. (2 Mose 22:22) Ŋmɛnɛ, Kristofoi ashiai ni fɔlɔ kome yɔɔ mli lɛ hu kɛ nɔnyɛɛi kɛ naagbai kpeɔ, shi amɛmii shɛɔ amɛhe yɛ le ni amɛle akɛ Yehowa ji “awusai atsɛ kɛ okulafoi asaneyelɔ” lɛ hewɔ. (Lala 68:6) Awoɔ Kristofoi ahewalɛ ni amɛkwɛ “awusai kɛ okulafoi yɛ amɛmanehulu lɛ mli.” (Yakobo 1:27) Nanemɛi heyelilɔi baanyɛ afee babaoo ni amɛkɛye amɛbua wekui ni fɔlɔ kome yɔɔ mli lɛ.b

16. (a) Mɛni esa akɛ fɔlɔi ni amɛkome amɛkwɛɔ amɛbii lɛ afee aha amɛ diɛŋtsɛ amɛshia mlibii lɛ? (b) Mɛni hewɔ tsɔsemɔ baanyɛ afee nɔ ni wa lɛ, shi mɛni hewɔ esa akɛ akɛha?

¹⁶ Kɛ oji fɔlɔ kome lɛ, mɛni bo diɛŋtsɛ lɛ obaanyɛ ofee koni ehe aba sɛɛnamɔ aha oshiabii lɛ? Ehe miihia ni okã weku Biblia kasemɔ, kpeeiyaa, kɛ sɔɔmɔ nitsumɔ lɛ he daa. Tsɔsemɔ baanyɛ afee nitsumɔ ni wa titri moŋ. Ekolɛ ooye awerɛho yɛ ohefatalɔ ni osumɔɔ lɛ lɛ gbele he lolo. Aloo ekolɛ okɛ fɔyeli loo mlifu henumɔi ni kɔɔ gbala-mlitsemɔ he lɛ miipele lolo. Kɛ okɛ mɔ ni okɛ lɛ tse gbala mli lɛ fɛɛ yɛ mla naa hegbɛ yɛ nyɛbii akwɛmɔ mli lɛ, ekolɛ ooshe gbeyei akɛ obi lɛ baasumɔ ni ehi mɔ ni okɛ lɛ egbala mli loo okɛ lɛ etse gbala mli lɛ ŋɔɔ. Shihilɛi ni tamɔ nɛkɛ baanyɛ afee nɔ ni wa yɛ henumɔŋ akɛ okɛ tsɔsemɔ ni ŋmɛɔ pɛpɛɛpɛ aaaha. Shi, Biblia lɛ kɛɔ wɔ akɛ, “gbekɛ ni akpoo ejeŋ afɔ enɔ lɛ, ewoɔ enyɛ hiɛgbele.” (Abɛi 29:15) No hewɔ lɛ, kaaŋmɛɛ ohe oha fɔyeli henumɔ, heshwamɔ, loo henumɔŋ nɔnyɛɛ ni otsutsu gbalashihilɛ mli hefatalɔ lɛ kɛaaba onɔ lɛ. Okɛ taomɔ nii ni kɛ amɛhe kpaa gbee ni shishinumɔ yɔɔ mli amamɔ shi oha ohe. Kaaŋmɛɛ Biblia mli shishitoo mlai ahe okɛsaa.—Abɛi 13:24.

17. Nitsumɔi ni weku lɛ mlibii lɛ tsuɔ lɛ ahiɛ baanyɛ aha yɛ weku-kome shia mli yɛ mɛɛ gbɛ nɔ, ni mɛni abaanyɛ afee ni akɛtsi enɛ naa?

¹⁷ Shihilɛi ni mli wawai baanyɛ ate shi, kɛ nyɛ ni ji fɔlɔ kome lɛ fee ebinuu lɛ tamɔ mɔ ni yeɔ ehefatalɔ lɛ sɛɛ—nuu ni yɔɔ shia lɛ mli—aloo efee ebiyoo mɔ ni ekɛ lɛ gbaa eteemɔŋ saji, ni elooɔ eteemɔŋ naagbai fɛɛ eshwieɔ enɔ. Nakai feemɔ esaaa ni efutuɔ gbekɛ yiŋ. Kɛ anaaa fɔlɔ kɛ bi nitsumɔ loo gbɛnaa nii anaa jogbaŋŋ lɛ, tsɔsemɔ baanyɛ alaaje. Ha ale akɛ bo ji fɔlɔ lɛ. Kɛ oji nyɛ ni ŋaawoo ni damɔ Biblia lɛ nɔ he miihia bo lɛ, taomɔ enɛ kɛjɛ onukpai lɛ loo nyɛmiyoo ko ni eda yɛ mumɔŋ kɛ heloo naa fɛɛ lɛ dɛŋ.—Okɛto Tito 2:3-5 he.

18, 19. (a) Mɛni ji saji ni mli wawai ni banuma wekui kɛkpeɔ lɛ ekomɛi? (b) Te fɔlɔi kɛ gbekɛbii ni yɔɔ banuma wekui amli lɛ aaafee tɛŋŋ ajie nilee kɛ sanesɛɛkɔmɔ kpo?

¹⁸ Banuma-wekui hu kɛ naagbai kpeɔ. Fɔlɔi ni ŋɔɔ banumai lɛ naa shii abɔ akɛ “amrɔ hedɔɔ ni jɛɔ banumɔ lɛ ŋɔɔ baa” lɛ efɔɔɔ kaa. Akɛ nɔkwɛmɔ nɔ lɛ, banumai baanyɛ anu nɔ ni tamɔ suɔmɔ ni ajieɔ lɛ kpo atsɔɔ fɔlɔ lɛ musuŋbii diɛŋtsɛ fe amɛ lɛ he waa. (Okɛto 1 Mose 37:3, 4 he.) Yɛ anɔkwale mli lɛ, banumai baanyɛ aye amɛfɔlɔ ni egbo lɛ he awerɛho, ni amɛbaashe gbeyei akɛ ni amɛaana suɔmɔ amɛha mɔ ni ŋɔɔ amɛ akɛ ebanumai lɛ baatsɔɔ yɛ gbɛ ko nɔ akɛ amɛyeee tsɛ loo nyɛ ni fɔ amɛ diɛŋtsɛ lɛ anɔkwale. Akɛ kaimɔ ni mli wa baakpee mɔdɛŋ ni aaabɔ akɛ akɛ tsɔsemɔ aaaha lɛ naa, akɛ, ‘Jeee bo ofɔ mi!’

¹⁹ Abɛi 24:3 kɛɔ akɛ: “Nilee akɛmaa tsu, ni sanesɛɛkɔmɔ akɛhaa edamɔɔ shi.” Hɛɛ, ebiɔ nilee kɛ sanesɛɛkɔmɔ yɛ mɔ fɛɛ mɔ gbɛfaŋ dani banuma-weku aye omanye. Be shɛɔ, ni esa akɛ gbekɛbii lɛ akpɛlɛ anɔkwalei ni baa yɛ bei pii amli kɛ dɔlɛ lɛ nɔ akɛ nibii etsake. Ehe baahia ni mɛi ni hiɛ banumai lɛ hu akase bɔ ni atoɔ tsui shi ni ajieɔ musuŋtsɔlɛ kpo, ni akaye oyai kɛ mlifu kɛ akɛ shihilɛ ni tamɔ akɛ aakpoo amɛ miikpe lɛ. (Abɛi 19:11; Jajelɔ 7:9) Tsu naanyobɔɔ ni aaaka okɛ banuma lɛ teŋ lɛ he nii dani otsu hegbɛ akɛ tsɔselɔ lɛ he nii. Mɛi komɛi susuɔ akɛ ebaahi akɛ aaaŋmɛ fɔlɔ lɛ diɛŋtsɛ gbɛ koni etsu tsɔsemɔ lɛ he nii, kɛyashi be mli ni aaato tsakpaa ni tamɔ nɛkɛ shishi. Kɛ bei te shi lɛ, esa akɛ abɔ mɔdɛŋ ni akɛ he awie. Abɛi 13:10c kɛɔ akɛ: “Mɛi ni boɔ ŋaawoo toi lɛ, amɛle nii.”

Nyɛyaa nɔ Nyɛtsua Nyɛ Shiabii lɛ Ayiwalaheremɔ he Nii!

20. Mɛni esa akɛ weku yitsei ni ji Kristofoi aya nɔ afee?

²⁰ Kristofoi awekui ni mli wawai baaa trukaa. Esa akɛ nyɛ weku yitsei lɛ aya nɔ atsu nii waa kɛha nyɛ shiabii lɛ ayiwalaheremɔ. Nyɛhiɛ ahia nyɛhe nɔ, ni nyɛkadia je lɛ sui ni ejaaa lɛ oya. Nyɛtoa okadi kpakpa yɛ wiemɔ, jeŋba, suɔmɔ, hemɔkɛyeli, kɛ hetsemɔ mli. (1 Timoteo 4:12) Nyɛjiea Nyɔŋmɔ mumɔ lɛ yibii lɛ kpo. (Galatabii 5:22, 23) Tsuishitoo, mɔ hesusumɔ, eshaifaa, kɛ mlijɔlɛ baawaje mɔdɛŋ ni obɔɔ koni otsɔɔ obii lɛ Nyɔŋmɔ gbɛ̀i lɛ.—Kolosebii 3:12-14.

21. Mɛɛ gbɛ nɔ mɔ ko aaatsɔ aha miishɛɛ shihilɛ ahi lɛ diɛŋtsɛ eshia?

²¹ Bɔɔ mɔdɛŋ ni ohiɛ miishɛɛ mumɔ mli yɛ Nyɔŋmɔ yelikɛbuamɔ naa yɛ oshia. Nyɛhia shi kutuu akɛ weku, ni nyɛbɔ mɔdɛŋ ni kɛ hoo lɛ nyɛ fɛɛ nyɛye nii kutuu shikome daa gbi. Kristofoi akpeei, sɔɔmɔ nitsumɔ lɛ, kɛ weku nikasemɔ he miihia. Ni kɛlɛ, “ŋmɔlɔ be yɛ, . . . ni joo be yɛ.” (Jajelɔ 3:1, 4) Hɛɛ, nyɛtoa bei ni akɛnaa hiɛtserɛjiemɔ ni tswaa mɔ maa shi mli ŋɔɔmɔ nyɛmaa shi. Nyɛyaa nyɛsaraa hei ni akɛ blema nibii toɔ, kooloi akwɛmɔ hei, kɛ hei ni tamɔ nakai ni haa weku muu lɛ fɛɛ naa miishɛɛ. Aloo ekolɛ nyɛbaanyɛ nyɛgbe TV lɛ ni nyɛkɛla lalai, nyɛbo lalai atoi, nyɛshwɛ shwɛmɔi sɔrɔtoi ni nyɛgba sane. Enɛ baaye abua weku lɛ ni amɛbɛŋkɛ amɛhe.

22. Mɛni hewɔ esa akɛ otsu nii waa kɛha oshiabii lɛ ayiwalaheremɔ?

²² Eba akɛ nyɛ fɔlɔi ni ji Kristofoi lɛ fɛɛ aaaya nɔ atsu nii ni nyɛkɛsa Yehowa hiɛ, “ni nyɛwo yibii yɛ nitsumɔ kpakpa fɛɛ nitsumɔ kpakpa mli, ni nyɛshwere yɛ Nyɔŋmɔ he nilee mli.” (Kolosebii 1:10, 11) Nyɛtswaa nyɛ weku lɛ nyɛmaa shishitoo ni wa ni ji toiboo ni afeɔ ahaa Nyɔŋmɔ Wiemɔ lɛ nɔ. (Mateo 7:24-27) Ni na nɔmimaa akɛ ebaakpɛlɛ omɔdɛŋbɔɔ koni “nyɛlɛ amɛ yɛ Nuŋtsɔ [Yehowa] tsɔsemɔ kɛ ŋaawoo lɛ mli” lɛ nɔ.—Efesobii 6:4.

[Shishigbɛ niŋmai]

Te Obaaha Hetoo Oha Tɛŋŋ?

◻ Mɛɛ gbɛ nɔ wu kɛ ŋa aaatsɔ afee ekome yɛ amɛweku lɛ tswaa kɛ shimaa mli?

◻ Mɛni ji gbekɛbii ahenumɔŋ hiamɔ nii komɛi, ni te aaafee tɛŋŋ atsu enɛɛmɛi ahe nii?

◻ Te weku yitsei aaafee tɛŋŋ atsɔɔ amɛbii anii diɛŋtsɛ kɛ agbɛnɛ yɛ trukaa gbɛ nɔ?

◻ Mɛɛ gbɛ nɔ fɔlɔi aaatsɔ atsɔse amɛbii yɛ jalɛ mli?

◻ Mɛni abaanyɛ afee ni ehe aba sɛɛnamɔ aha fɔlɔ kome wekui kɛ banuma wekui lɛ?

[Mfoniri ni yɔɔ baafa 16]

Tsɛ lɛ suɔmɔ kɛ nɔkpɛlɛmɔ he hiaa kɛha gbekɛ lɛ dalɛ yɛ henumɔŋ