Okɛ Ohiɛ Afɔ̃ Yehowa kɛ E-Wiemɔ lɛ Nɔ
“Mɛi ni le ogbɛi lɛ aaaŋɔ amɛhiɛ amɛaafɔ̃ onɔ.”—LALA 9:11.
1. Mɛni hewɔ wɔbaanyɛ wɔna hekɛnɔfɔɔ lolo yɛ Yehowa kɛ e-Wiemɔ lɛ mli yɛ wɔ ŋmɛnɛŋmɛnɛ gbii nɛɛ amli lɛ?
YƐ ŊMƐNƐŊMƐNƐ je nɛɛ mli lɛ, ekolɛ ninefɔ̃ɔ ni akɛhaa akɛ akɛ hiɛ afɔ̃ Nyɔŋmɔ kɛ e-Wiemɔ, ni ji Biblia lɛ nɔ lɛ baafee tamɔ nɔ ni ehiŋ feemɔ kɛ nɔ ni nilee bɛ mli. Kɛlɛ, Nyɔŋmɔ nilee lɛ enyɛ edamɔ shi akɛ anɔkwale yɛ afii abɔ ni eho lɛ fɛɛ mli. Nuu kɛ yoo Bɔlɔ lɛ ji gbalashihilɛ kɛ weku lɛ Shishitolɔ, ni ele wɔ hiamɔ nii jogbaŋŋ fe bɔ ni mɔ kroko le. Taakɛ bɔ ni adesai adaa gbi hiamɔ nii tsakeko lɛ, nakai nɔŋŋ shishijee gbɛi ni atsɔɔ nɔ atsuɔ nakai hiamɔ nii lɛ ahe nii lɛ hu kã he eyɛ nakai nɔŋŋ. Eyɛ mli akɛ aŋmala Biblia mli ŋaawoo ni nilee yɔɔ mli lɛ ashwie shi afii ohai abɔ ni eho nɛ moŋ, shi ekɛ gbɛtsɔɔmɔ ni hi fe fɛɛ kɛha omanyeyeli yɛ shihilɛ mli, kɛ naagbai anaa tsabaa namɔ haa. Nɔ ni jɛɔ etoiboo mli baa ji miishɛɛnamɔ babaoo—yɛ jeŋ ni wɔyɔɔ mli, ni emli shihilɛ wa, ni etee hiɛ yɛ jeŋ nilee gbɛfaŋ nɛɛ po mli!
2. (a) Mɛɛ yibii kpakpai Nyɔŋmɔ kitai atoiboo ewo yɛ Yehowa webii ashihilɛ mli? (b) Mɛɛ nɔ kroko hu Yehowa ewo shi kɛha mɛi ni boɔ lɛ kɛ e-Wiemɔ lɛ toi lɛ?
2 Yehowa ni akɛ hiɛ fɔ̃ɔ enɔ kɛ Biblia shishitoo mlai kɛ nitsumɔ kɛ daa gbi sɛɛnamɔi babaoo baa. Anaa enɛ he odaseyeli yɛ Yehowa Odasefoi akpekpei abɔ ni yɔɔ je lɛŋ fɛɛ, ni ena nɔmimaa kɛ ekaa akɛ amɛkɛ Biblia ŋaawoo baatsu nii lɛ ashihilɛi amli. Yɛ amɛ gbɛfaŋ lɛ, amɛhiɛ ni amɛkɛfɔ̃ɔ Bɔlɔ lɛ kɛ e-Wiemɔ lɛ nɔ lɛ efee hiɛnɔkamɔ ni ma shi shiŋŋ diɛŋtsɛ. (Lala 9:10, 11) Nyɔŋmɔ kitai atoiboo eha amɛtsɔmɔ gbɔmɛi kpakpai, yɛ hetsemɔ, anɔkwayeli, ekaa kɛ hiɛdɔɔ ni akɛtsuɔ nii, bulɛ ni ayɔɔ kɛha wala kɛ mɛi krokomɛi anibii ni amɛyɔɔ, kɛ hiɛshikamɔ ni akɛtsuɔ nii yɛ niyeli kɛ ninumɔ gbɛfaŋ. Nɔ ni ekɛba ji suɔmɔ kɛ tsɔsemɔ kpakpa yɛ weku kɔkrɔɔ lɛ mli—amɛjieɔ gbɔfeemɔ, tsuishitoo kɛ mɔbɔnalɛ kpo, ni amɛkɛ sane keɔ—kɛfata sui krokomɛi babaoo ni amɛjieɔ lɛ kpo lɛ ahe. Amɛnyɛ amɛtsi amɛhe kɛjɛ yibii fɔji ni ji mlifu, hetsɛ, gbɔmɔgbee, nyɛɛ, gbeyeishemɔ, anihaofeemɔ, henɔwomɔ, malemɔ, mɛi aheguɔgbee, ahoshwibɔɔ, kɛ jeŋba shara he. (Lala 32:10) Shi Nyɔŋmɔ feɔ babaoo fe nibii kpakpai ni ewo shi akɛ ebaajɛ mli eba kɛha mɛi ni yeɔ emlai anɔ lɛ kɛkɛ. Yesu wie akɛ mɛi ni nyiɛɔ Kristofoi agbɛ lɛ nɔ lɛ baaná “nyɛmɛi kɛ bii kɛ abɔɔi toi oha yɛ benɛ be nɛɛ mli beebe, kɛ yiwalɛ hu, ni jeŋ ni baaba lɛŋ hu eeená naanɔ wala.”—Marko 10:29, 30.
Kwa Ohiɛ ni Okɛaafɔ̃ Je lɛŋ Nilee Nɔ
3. Beni amɛyaa nɔ amɛkɛ amɛhiɛ fɔ̃ɔ Yehowa kɛ e-Wiemɔ lɛ nɔ lɛ, mɛɛ naagbai Kristofoi kɛkpeɔ bei komɛi?
3 Naagba kome kɛha adesai ni yeee emuu nɛɛ ji akɛ, amɛbaa nɔ ni Nyɔŋmɔ taoɔ lɛ shi loo amɛhiɛ kpaa nɔ. Amɛbɔiɔ susumɔ yɛ gbɛ ni waaa kwraa nɔ akɛ amɛ nilee nɔ kwɔ fe fɛɛ, aloo ákɛ je nɛŋ woloŋlelɔi ni ale amɛ waa lɛ anilee lɛ nɔ kwɔ fe Nyɔŋmɔ nilee, ni no kɛ be ni wɔyɔɔ mli lɛ nyiɛɔ pɛpɛɛpɛ. Akɛni amɛyɛ je nɛɛ mli hewɔ lɛ, Nyɔŋmɔ tsuji hu baanyɛ ana nɛkɛ su nɛɛ. Enɛ hewɔ lɛ, beni ekpãa eninefɔɔ ni suɔmɔ yɔɔ mli lɛ mli ehaa wɔ akɛ wɔbo eŋaawoo toi lɛ, wɔ ŋwɛi Tsɛ lɛ kɛ kɔkɔbɔɔi ni sa fataa he ehaa wɔ akɛ: “Mibi, ohiɛ akakpa mimla lɛ nɔ, shi ha otsui ato mikitai lɛ! Ejaakɛ gbii asɛɛjekɛmɔ kɛ wala afii kɛ hejɔlɛ amɛaaŋɔfata he amɛhao. Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ! Kaabu ohe nilelɔ; she Yehowa gbeyei, ni oje efɔŋ he.”—Abɛi 3:1, 2, 5-7.
4. Te “je nɛŋ nilee lɛ” mli lɛɛ ni egbɛ eshwã hu eha tɛŋŋ, ni mɛni hewɔ eji “kwashiai asane yɛ Nyɔŋmɔ hiɛ” lɛ?
4 Je nɛŋ nilee lɛ fa babaoo bɔ ni nine baanyɛ ashɛ nɔ, ni ejɛɛhei hu fa pii. Ayɛ nikasemɔ hei babaoo, ni “woji babaoo feemɔ lɛ ebɛ naagbee.” (Jajelɔ 12:12) Amrɔ nɛɛ nɔ ni akɛɛ atsɛɔ lɛ je nɛŋ saji fɛɛ ni mɔ nine baanyɛ ashɛ nɔ kɛtsɔ kɔmpiuta kɛ nitsumɔ nɔ lɛ, haa mɛi ni yɔɔ eko lɛ naa hegbɛ amɛnine shɛɔ je nɛŋ nɔ fɛɛ nɔ he saji ni amɛtaoɔ lɛ nɔ. Shi nɛkɛ nilee babaoo ni yɔɔ, ni nine nyɛɔ shɛɔ nɔ nɛɛ hako je lɛ ale nii jogbaŋŋ aloo ni ena enaagbai anaa tsabaa. Shi moŋ, fitemɔ kɛkɛ je lɛŋ shihilɛ yaa nɔ efiteɔ daa gbi. Shishinumɔ yɛ he akɛ Biblia lɛ kɛɔ wɔ akɛ “je nɛŋ nilee lɛ ji kwashiai asane yɛ Nyɔŋmɔ hiɛ.”—1 Korintobii 3:19, 20.
5. Mɛɛ kɔkɔbɔɔi Biblia lɛ kɛhaa yɛ “je nɛŋ nilee lɛ” he?
5 Nɔ ni esa akɛ wɔkpa gbɛ yɛ nɛkɛ naagbee gbii nɛɛ anaagbee kwraa nɛɛ mli ji akɛ, shishiulɔ kpele fe fɛɛ, ni ji Satan Abonsam baajie amale babaoo kpo yɛ mɔdɛŋ ni ebɔɔ ni efite hekɛnɔfɔɔ ni ayɔɔ yɛ anɔkwale ni Biblia ji lɛ mli lɛ gbɛfaŋ. Jeŋ nilelɔi ni wieɔ shiɔ Biblia lɛ eŋmala woji babaoo ni amɛka amɛyiŋ amɛwie saji ni jeee anɔkwalei yɛ mli, ni teɔ shi woɔ anɔkwale ni Biblia lɛ ji kɛ bɔ ni anyɛɔ akɛ he fɔ̃ɔ nɔ lɛ. Paulo bɔ enaanyo Kristofonyo lɛ kɔkɔ akɛ: “Oo Timoteo, nii ni atuu awo odɛŋ lɛ baamɔ yi, ni okwa yakayaka sanegbaa ni buleɔ mɔ kɛ ŋwanejee wiemɔ ni jɛ apasa ‘nilee’ mli lɛ, nɔ ni mɛi komɛi tsɔɔ akɛ amɛyɔɔ ni amɛdu gbɛ kɛjɛ hemɔkɛyeli lɛ he lɛ.” (1 Timoteo 6:20, 21) Biblia lɛ yaa nɔ ebɔɔ kɔkɔ akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yaka shishiumɔ akaŋɔ nyɛ nom, yɛ gbɔmɛi ablema saji kɛ je nɛŋ shishijee nibii ni jeee Kristo lɛ anaa.”—Kolosebii 2:8.
Wuu Oshi Yiŋkɔshikɔshi Feemɔ Henumɔ
6. Mɛni hewɔ ehe hiaa ni wɔhiɛ ahi wɔhe nɔ jogbaŋŋ koni etsi yiŋkɔshikɔshi feemɔ ni aaahe shi yɛ wɔtsui mli lɛ naa lɛ?
6 Abonsam ŋaa gbɛ kroko hu ni yɔɔ nigii ji yiŋkɔshikɔshi feemɔ ni edũɔ ewoɔ jwɛŋmɔ lɛ mli. Ehiɛ yɛ ehe nɔ be fɛɛ be akɛ ebaana gbɔjɔmɔ ko yɛ wɔ hemɔkɛyeli mli ni ekɛ nakai hegbɛ lɛ atsu nii. Esa akɛ mɔ fɛɛ mɔ ni yiŋ feɔ lɛ kɔshikɔshi lɛ akai akɛ mɔ ni hɔ nakai yiŋkɔshikɔshi feemɔi lɛ asɛɛ ji mɔ ni kɛɛ Hawa akɛ: “Lɛlɛŋ Nyɔŋmɔ kɛɛ akɛ nyɛkaye trom lɛ mli tsei ayibii lɛ fɛɛ eko lɛ?” Ní Kaalɔ lɛ ná edũ yiŋkɔshikɔshi feemɔ ewo yoo lɛ jwɛŋmɔ mli lɛ, agbɛnɛ nɔ ni nyiɛ sɛɛ ji ni ekɛɛ lɛ amale, ni yoo lɛ hu he eye. (1 Mose 3:1, 4, 5) Kɛji wɔɔhi shi ni wɔhaŋ yiŋkɔshikɔshi feemɔ afite wɔ hemɔkɛyeli taakɛ efite Hawa nɔ lɛ, no lɛ esa akɛ wɔhiɛ ahi wɔhe nɔ jogbaŋŋ. Kɛji yiŋkɔshikɔshi feemɔ bibioo ko miije shishi yɛ otsui mli yɛ Yehowa, kɛ e-Wiemɔ lɛ, loo egbɛjianɔtoo lɛ he lɛ, no lɛ esa akɛ otsu he nii oya ni ojie kɛjɛ jɛmɛ dani efite ni etsɔ nɔ ni baanyɛ akpata ohemɔkɛyeli lɛ hiɛ kwraa.—Okɛto 1 Korintobii 10:12 he.
7. Mɛni abaanyɛ afee ni akɛjie yiŋkɔshikɔshi feemɔi?
7 Mɛni obaanyɛ ofee? Shikome ekoŋŋ lɛ, hetoo lɛ ji ni okɛ ohe afɔ̃ Yehowa kɛ e-Wiemɔ lɛ nɔ. “Kɛ nilee eshwɛ nyɛteŋ mɔ ko lɛ, ekpa Nyɔŋmɔ ni haa mɛi fɛɛ faa ni ewieee mɔ ko hiɛ lɛ fai, ni aaaŋɔ hã lɛ. Shi ha ni ekpa fai yɛ hemɔkɛyeli mli, ni ekaje nɔ ko nɔ ko he ŋwane; ejaakɛ ŋwanejelɔ lɛ etamɔ ŋshɔke ni kɔɔyɔɔ tswaa kɛyaa kɛbaa.” (Yakobo 1:5, 6; 2 Petro 3:17, 18) No hewɔ lɛ ekaa ni okɛaasɔle oha Yehowa ji klɛŋklɛŋ nifeemɔ. (Lala 62:9) No sɛɛ lɛ, kaashashao shi akɛ ooobi yelikɛbuamɔ kɛjɛ asafo lɛ mli nɔkwɛlɔi ni yɔɔ suɔmɔ lɛ adɛŋ. (Bɔfoi lɛ Asaji 20:28; Yakobo 5:14, 15; Yuda 22) Amɛbaaye amɛbua bo ni ona oyiŋkɔshikɔshi feemɔ lɛ jɛɛhe, ni ekolɛ eeenyɛ efee henɔwomɔ loo susumɔ ko ni ejaaa.
8. Bei pii lɛ, te hemɔkɛyeli kwamɔ susumɔi jeɔ shishi ehaa tɛŋŋ, ni mɛni ji enaa tsabaa?
8 Ani hemɔkɛyeli kwalɔi asusumɔi loo jeŋ nilee ni aŋmala lɛ akanemɔ loo amɛwiemɔi atoiboo edũ ebɔɔ ni ji yiŋkɔshikɔshi feemɔi ewo ojwɛŋmɔ mli? Biblia lɛ woɔ ŋaa yɛ nilee mli akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ. Shi yakayaka sanegbaa ni buleɔ mɔ lɛ, tsi ohe kɛjɛ he; ejaakɛ amɛaatee hiɛ pii yɛ nɔ sha feemɔ mli, ni amɛwiemɔi lɛ aaatsɛŋe tamɔ hela fɔŋ ko kɛaakpe.” (2 Timoteo 2:15-17) Esa kadimɔ waa akɛ mɛi ni hemɔkɛyeli kwamɔ na amɛnɔ hewalɛ lɛ ateŋ mɛi pii je shishi amɛkɔ gbɛ ni ejaaa, klɛŋklɛŋ lɛ, kɛtsɔ wiemɔ ni amɛwieɔ bɔ ni amɛnuɔ he akɛ akɛ amɛ yeɔ yɛ Yehowa gbɛjianɔtoo lɛ mli lɛ he lɛ nɔ. (Yuda 16) Hemɔkɛyelii ahe tɔmɔi anamɔ baa yɛ sɛɛ mli. Taakɛ bɔ ni datrɛfonyo ni feɔ opireshɛn lɛ he feɔ oya ni efoɔ heloo lɛ fã ko ni miikpɔtɔ lɛ, nakai sa akɛ ohe afee oya ni ojie henumɔ ni onáa akɛ owie oshi nifeemɔ ko lɛ kɛjɛ ojwɛŋmɔ mli, ni omii ashɛ bɔ ni atsuɔ nibii ahe nii ahaa yɛ Kristofoi asafo lɛ mli lɛ he. (Kolosebii 3:13, 14) Jiemɔ nibii ni haa nakai yiŋkɔshikɔshi feemɔi lɛ baa lɛ fɛɛ.—Marko 9:43.
9. Teokrase gbɛjianɔtoo kpakpa baaye abua wɔ ni wɔhe awa daa yɛ hemɔkɛyeli lɛ mli yɛ mɛɛ gbɛ nɔ?
9 Okɛ ohe akpɛtɛ Yehowa kɛ egbɛjianɔtoo lɛ he gbagbalii. Okɛ anɔkwayeli akase Petro, mɔ ni kɛ faishitswaa jaje akɛ: “Nuntsɔ, namɔ ŋɔɔ wɔɔtee? Bo oyɔɔ naanɔ wala wiemɔi lɛ.” (Yohane 6:52, 60, 66-68) Ná Yehowa Wiemɔ lɛ kasemɔ he gbɛjianɔtoo kpakpa bɔni afee ni ohemɔkɛyeli lɛ he awa be fɛɛ be, tamɔ tsɛŋ agbo, ni nyɛɔ “mɔ fɔŋ lɛ gaimlibii ni tsoɔ lɛ fɛɛ [egbeɔ].” (Efesobii 6:16) Ná ekaa yɛ Kristofoi asɔɔmɔ nitsumɔ mli, ni ojɛ suɔmɔ mli okɛ mɛi krokomɛi awie Maŋtsɛyeli shɛɛ sane lɛ he. Okɛ hiɛsɔɔ ajwɛŋ bɔ ni Yehowa ejɔɔ bo eha lɛ nɔ daa gbi. Daa shi akɛ ona anɔkwale lɛ he nilee. Kɛji ofee nɔ fɛɛ nɔ yɛ Kristofoi agbɛjianɔtoo kpakpa naa lɛ, ebaaye abua bo ni ona miishɛɛ, ni onyɛ oŋmɛ otsui shi, ni otsi ohe kɛjɛ yiŋkɔshikɔshi feemɔi fɛɛ he.—Lala 40:5; Filipibii 3:15, 16; Hebribii 6:10-12.
Yehowa Gbɛtsɔɔmɔ yɛ Gbalashihilɛ He lɛ Sɛɛnyiɛmɔ
10. Mɛni hewɔ ehe hiaa waa titri akɛ wɔkwɛ Yehowa gbɛ kɛha gbɛtsɔɔmɔ yɛ Kristofoi agbalashihilɛ mli lɛ?
10 Beni etoɔ gbɛjianɔ ni nuu kɛ yoo ahi shi yɛ hekome akɛ gbalashihilɛ mli hefatalɔi lɛ, Yehowa to eyiŋ akɛ jeee akɛ awo shikpɔŋ lɛ obɔ yɛ hejɔlɛ mli kɛkɛ, shi moŋ ni no aha amɛ miishɛɛnamɔ hu aya hiɛ. Shi, esha kɛ emuu ni ayeee kɛ naagbai ni mli wa waa eba gbalashihilɛ wekukpaa lɛ mli. Kristofoi yeee amɛhe kɛjɛɛɛ enɛ mli, ejaakɛ amɛ hu amɛyeee emuu, ni amɛnuɔ ŋmɛnɛŋmɛnɛ beaŋ shihilɛ mli nɔnyɛɛ lɛ he nakai nɔŋŋ. Ni kɛlɛ, kɛ Kristofoi kɛ amɛhe fɔ̃ Yehowa kɛ e-Wiemɔ lɛ nɔ babaoo lɛ, amɛbaanyɛ amɛye omanye babaoo yɛ gbalashihilɛ kɛ amɛbii atsɔsemɔ mli. Je lɛŋ bii anifeemɔi kɛ amɛ subaŋi bɛ gbɛhe ko kwraa yɛ Kristofoi agbalashihilɛ mli. Nyɔŋmɔ Wiemɔ lɛ woɔ wɔ ŋaa akɛ: “Awo gbala hiɛ nyam yɛ nyɛ fɛɛ nyɛteŋ, ni akabule gbala saa hu; shi ajwamaŋbɔlɔi kɛ gbalamlikulɔi lɛ, Nyɔŋmɔ baakojo amɛ.”—Hebribii 13:4.
11. Kɛ aatsu gbalashihilɛ mli naagbai ahe nii lɛ, mɛni esa akɛ hefatalɔi enyɔ lɛ fɛɛ ayoo?
11 Gbalashihilɛ ni atsuɔ he nii yɛ Biblia ŋaawoo naa lɛ haa suɔmɔ, he-kɛhamɔ, kɛ shweshweeshwe feemɔ hiɔ mli. Wu kɛ ŋa fɛɛ nuɔ yitsoyeli gbɛjianɔtoo lɛ shishi ni amɛjieɔ bulɛ kpo yɛ he. Kɛ naagbai te shi lɛ, bei pii lɛ, amɛjɛɔ Biblia ŋaawoo ni akuɔ hiɛ afɔ̃ɔ ekɛ nitsumɔ nɔ lɛ hewɔ. Kɛ aatsu naagba ni sɛɛ etsɛ he nii lɛ, ehe miihia ni mɛi enyɔ lɛ fɛɛ aha amɛjwɛŋmɔ ahi nɔ ni ji naagba lɛ diɛŋtsɛ nɔ yɛ anɔkwayeli mli, ni amɛtsu nibii ni kɛbaa lɛ ahe nii moŋ fe ehe okadii ni anaa. Kɛ gbeekpamɔ bibioo pɛ jɛ sane ni hefatalɔi lɛ gba etsɛko tsɔ̃ lɛ mli ba, loo gbeekpamɔ ko baaa lɛ, no lɛ amɛbaanyɛ amɛbi yelikɛbuamɔ ni hiɛaŋkwɛmɔ bɛ mli kɛjɛ nɔkwɛlɔ ni yɔɔ suɔmɔ dɛŋ.
12. (a) Mɛɛ naagbai ni fɔɔ baa yɛ gbalashihilɛ mli Biblia lɛ kɛ ŋaawoo haa yɛ he? (b) Mɛni hewɔ ehe hiaa ni hefatalɔi enyɔ lɛ fɛɛ afee nii yɛ Yehowa gbɛ nɔ lɛ?
12 Ani naagba lɛ kɔɔ sanegbaa, bulɛ ni aaana aha mɔ kroko lɛ henumɔi, bulɛ ni aaana aha yitsoyeli, aloo bɔ ni afeɔ yiŋkpɛi ahaa lɛ he? Ani ekɔɔ bii akwɛmɔ, loo bɔlɛnamɔ mli hiamɔ nii ni aaaha eŋmɛ pɛpɛɛpɛ he? Aloo ani eji weku lɛ shika saji, hiɛtserɛjiemɔ, naanyobɔɔ, kɛji esa akɛ ŋa lɛ atao nitsumɔ ni etsu, aloo he ni nyɛbaahi he? Nɔ fɛɛ nɔ ni naagba lɛ ji lɛ, Biblia lɛ kɛ ŋaawoo ni anyɛɔ akɛtsuɔ nii haa, ekolɛ tɛɛ kɛtsɔ mlai anɔ, aloo nɔ ni bɛ tɛɛ kɛtsɔ tɛi ni efolɔ eshwie shi nɔ. (Mateo 19:4, 5, 9; 1 Korintobii 7:1-40; Efesobii 5:21-23, 28-33; 6:1-4; Kolosebii 3:18-21; Tito 2:4, 5; 1 Petro 3:1-7) Kɛ hefatalɔi enyɔ lɛ fɛɛ tsi amɛhe kɛjɛ pɛsɛmkunya taomɔ nii ahe ni amɛha suɔmɔ jie ehe kpo jogbaŋŋ kɛmɔ shi yɛ amɛ gbalashihilɛ lɛ mli lɛ, ekɛ miishɛɛnamɔ babaoo baa. Esa akɛ gbalashihilɛ mli hefatalɔi enyɔ lɛ fɛɛ asumɔ waa akɛ amɛaafee tsakemɔi ni he hiaa, ni amɛfee nibii yɛ Yehowa gbɛ nɔ. “Mɔ ni jwɛŋɔ wiemɔ lɛ nɔ lɛ, aaahi aha lɛ; ni mɔ ni kɛ ehiɔ fɔ̃ɔ Yehowa nɔ lɛ, ajɔɔ lɛ!”—Abɛi 16:20.
Gbekɛbii—Nyɛboa Nyɔŋmɔ Wiemɔ lɛ Toi
13. Mɛni hewɔ ebɛ mlɛo kɛha Kristofoi gbekɛbii akɛ amɛaadara kɛ hemɔkɛyeli ni mli wa yɛ Yehowa kɛ e-Wiemɔ lɛ mli lɛ?
13 Ebɛ mlɛo kɛha gbekɛbii Kristofoi akɛ amɛaadara akɛ mɛi ni he wa yɛ hemɔkɛyeli lɛ mli, beni jeŋ fɔŋ nɛɛ ebɔle amɛ kɛkpe nɛɛ. Nɔ hewɔ ji akɛ “jeŋ muu lɛ fɛɛ ka mɔ fɔŋ lɛ,” ni ji Satan Abonsam “mli.” (1 Yohane 5:19) Gbekɛbii yɛ nɛkɛ henyɛlɔ fɔŋ ni baanyɛ aha efɔŋ afee tamɔ nɔ kpakpa nɛɛ tutuamɔ shishi. Mi-klɛŋklɛŋ subaŋi, pɛsɛmkunya hiɛnyam taomɔ, bɔlɛnamɔ kɛ yiwalɛ nifeemɔi ahe akɔnɔi ni anaa, kɛ hiɛtserɛjiemɔ sɛɛdii shɛii—enɛɛmɛi fɛɛ feɔ ekome kɛfeɔ susumɔ ko ni ehe shi waa ni ale yɛ he fɛɛ he, ni awieɔ he yɛ Biblia lɛ mli akɛ “mumɔ ni tsuɔ nii ŋmɛnɛŋmɛnɛ yɛ toigbele bii amli lɛ.” (Efesobii 2:1-3) Satan etsɔ ŋaa gbɛ ni yɔɔ nigii nɔ eha “mumɔ” nɛɛ ehe shi waa yɛ skul woji amli, yɛ lalai ni yɔɔ lɛ babaoo mli, yɛ kpɔiaŋ-gbɔlemɔ, kɛ hiɛtserɛjiemɔi krokomɛi amli. Esa akɛ fɔlɔi ahiɛ ahi amɛhe nɔ ni amɛwuu amɛshi nɛkɛ hewalɛi nɛɛ kɛtsɔ yelikɛbuamɔ ni amɛkɛaaha amɛbii ni amɛdara ni amɛkɛ amɛhiɛ afɔ̃ Yehowa kɛ e-Wiemɔ lɛ nɔ lɛ nɔ.
14. Gbekɛbii baanyɛ ‘ajo obalahiiaŋ sɛɛdii nii anaa foi’ yɛ mɛɛ gbɛ nɔ?
14 Paulo kɛ ŋaawoo ni tamɔ tsɛ nɔ̃ ha ehefatalɔ obalanyo Timoteo akɛ: “Obalahiaŋ sɛɛdii lɛ hu, joo naa foi, shi moŋ okɛ mɛi ni tsɛɔ Nuntsɔ lɛ kɛjɛɔ tsui ni mli tse mli lɛ atiu jalɛ, hemɔkɛyeli, suɔmɔ kɛ hejɔlɛ.” (2 Timoteo 2:22) Eyɛ mli akɛ jeee “obalahiaŋ sɛɛdii lɛ” fɛɛ ji nibii fɔji diɛŋtsɛ moŋ, shi esa akɛ obalahii “ajo [amɛnaa] foi” kɛ shishinumɔ akɛ esaaa ni amɛhaa nibii nɛɛ heɔ amɛbe fɛɛ, ni eshiɔ be bibioo pɛ ehaa amɛ, kɛji amɛnaa be lɛ eko po kɛhaa Nyɔŋmɔ jamɔ nifeemɔi asɛɛtiumɔ. Eyɛ mli akɛ kpɔiaŋ-kpamɔ koni gbɔmɔtso lɛ asa, kɛ kpɔiaŋ-gbɔlemɔ, lala, hiɛtserɛjiemɔ, nibii ni osumɔɔ feemɔ, kɛ gbɛfaa jeee efɔŋ diɛŋtsɛ moŋ, shi amɛbaanyɛ amɛtsɔ tsɔne kɛji amɛtsɔ nibii ni he hiaa fe fɛɛ yɛ shihilɛ mli. Joo sanegbaa ni sɛɛnamɔ bɛ he, kɛ be ni afiteɔ yakatswaa, kɛ bɔlɛnamɔ he miishɛɛ ni anaa yɛ gbɛ fɔŋ nɔ, kɛ shi ni ataa ni afeee nɔ ko, ni ehaa shihilɛ jeɔ mɔ tsine, kɛ wiemɔ ni ooowie oshi ofɔlɔi akɛ amɛnuuu bo shishi lɛ fɛɛ naa foi.
15. Mɛɛ nibii baanyɛ aba yɛ shia shihilɛ mli ni baanyɛ aha gbekɛbii ahi jeŋbai enyɔ shihilɛ mli?
15 Oshara baanyɛ awo gbekɛbii antɛo yɛ amɛ shia shihilɛ po mli. Kɛji akwɛɔ TV kɛ video nɔ nibii ni jieɔ bɔlɛnamɔ loo yiwalɛ nifeemɔi lɛ, no lɛ ebaanyɛ edũ efɔŋ feemɔ he akɔnɔ ewo amɛ mli. (Yakobo 1:14, 15) Biblia lɛ woɔ ŋaa akɛ: “Nyɛ mɛi ni nyɛsumɔɔ Yehowa lɛ, nyɛnyɛa efɔŋ!” (Lala 97:10; 115:11) Kɛ mɔ ko miika akɛ ehiɛ jeŋbai enyɔ lɛ, Yehowa le. (Abɛi 15:3) Kristofoi gbekɛbii, nyɛkwɛa nyɛtsu mli kɛkpea. Ani nyɛkɛ mɛi ni ehe gbɛi yɛ kpɔiaŋ-gbɔlemɔ loo lalai amli, ni amɛkɛ amɛhe woɔ jeŋba shara mli lɛ mfonirii ekpɛtɛ gbogboi lɛ ahe, aloo ani nyɛkɛ nibii ni sa ni baafee kaimɔi kpakpai aha nyɛ ekpɛtɛ shi? (Lala 101:3) Ani atadei ni yɔɔ otadei adeka mli lɛ tsɔɔ hiɛshikamɔ, aloo ani otadei lɛ ekomɛi jieɔ je nɛŋ hesaamɔ ni bɛ hiŋmɛi nɔ lɛ kpo? Kɛ oŋmɛɛ ohe oha kaa ni akaa bo ni oka nɔ fɔŋ feemɔ okwɛ lɛ, no lɛ Abonsam baanyɛ atsɔ bo tsɔne yɛ gbɛ ni yɔɔ nigii nɔ. Biblia lɛ kɛ nilee woɔ wɔ ŋaa akɛ: “Nyɛhiɛ akãa shi, nyɛsaraa; ejaakɛ nyɛhenyɛlɔ, Abonsam lɛ, nyiɛ tamɔ jata ni hũuɔ eetao mɔ ni eeemi.”—1 Petro 5:8.
16. Mɛɛ gbɛ nɔ Biblia ŋaawoo baanyɛ aye abua gbekɛ ni eha mɛi ni he hiaa waa lɛ fɛɛ ana ehe miishɛɛ waa?
16 Biblia lɛ kɛɔ bo ni okwɛ onaanyobɔɔ hu. (1 Korintobii 15:33) Esa akɛ ohefatalɔi afee mɛi ni sheɔ Yehowa gbeyei. Kaaŋmɛɛ ohe oha tipɛŋfoi anɔnyɛɛ. (Lala 56:12; Abɛi 29:25) Bo ofɔlɔi ni sheɔ Nyɔŋmɔ gbeyei lɛ atoi. (Abɛi 6:20-22; Efesobii 6:1-3) Yaa onukpai lɛ aŋɔɔ kɛha gbɛtsɔɔmɔ kɛ hewalɛwoo. (Yesaia 32:1, 2) Ha ni ojwɛŋmɔ ko ohiŋmɛii ahi mumɔŋ nibii kpakpai kɛ otii anɔ. Taomɔ hegbɛi ni okɛaatsu nii kɛha mumɔŋ hiɛyaa, ni okɛ ohe awo asafo lɛ nitsumɔi amli. Kasemɔ bɔ ni akɛ niji tsuɔ nii ahaa. Daa akɛ mɔ ni yɔɔ ekaa kɛ hewalɛ yɛ hemɔkɛyeli lɛ mli, ni no okɛaama nɔ mi akɛ mɔ ko ji bo lɛlɛŋ—mɔ ko ni sa wala yɛ Yehowa jeŋ hee lɛ mli! Wɔ ŋwɛi Tsɛ lɛ baana ohe miishɛɛ waa, ni oshikpɔŋ nɔ fɔlɔi hu amli baafili amɛ yɛ ohe, ni obaawo onyɛmimɛi hii kɛ yei Kristofoi lɛ hewalɛ babaoo. No ji nɔ ni he hiaa!—Abɛi 4:1, 2, 7, 8.
17. Mɛɛ sɛɛnamɔi mɛi ni kɛ amɛhiɛ fɔ̃ɔ Yehowa kɛ e-Wiemɔ lɛ nɔ lɛ naa?
17 Akɛ mumɔ tsirɛ lalatsɛ lɛ ni ekɛ lalafoo wiemɔi ŋma akɛ: “Mɛi ni nyiɛɔ emuuyeli mli lɛ, [Yehowa] kamaaa amɛ nɔ kpakpa ko nɔ kpakpa ko. Yehowa Zebaot, ajɔɔ gbɔmɔ ni ŋɔɔ ehiɛ efɔ̃ɔ onɔ lɛ!” (Lala 84:12, 13) Hɛɛ, miishɛɛ namɔ kɛ omanyeyeli ji nɔ ni baaba mɛi fɛɛ ni kɛ amɛhiɛ fɔ̃ɔ Yehowa kɛ e-Wiemɔ, ni ji Biblia lɛ nɔ lɛ agbɛfaŋ, shi jeee nijiaŋwujee kɛ nine ni enyɛ shi.—2 Timoteo 3:14, 16, 17.
Te Obaaha Hetoo Tɛŋŋ?
◻ Mɛni hewɔ esaaa ni Kristofoi kɛ amɛhiɛ fɔ̃ɔ “je nɛŋ nilee lɛ” nɔ lɛ?
◻ Kɛ mɔ ko miiná yiŋkɔshikɔshi feemɔi lɛ, mɛni esa akɛ efee?
◻ Nibii ni afeɔ yɛ Yehowa gbɛ nɔ lɛ kɛ omanyeyeli kɛ miishɛɛ baa gbalashihilɛ mli yɛ mɛɛ gbɛ nɔ?
◻ Biblia lɛ yeɔ ebuaa gbekɛbii ni ‘amɛjo obalahiaŋ sɛɛdii nii anaa foi’ yɛ mɛɛ gbɛ nɔ?
[Mfoniri ni yɔɔ baafa 23]
Kristofoi kɛ amɛhiɛ fɔ̃ɔ Yehowa kɛ e-Wiemɔ lɛ nɔ, ni amɛkpooɔ “je nɛŋ nilee lɛ” akɛ kwashiai asane
[Mfoniri ni yɔɔ baafa 25]
Wekui ni kɛ amɛhiɛ fɔ̃ɔ Yehowa kɛ e-Wiemɔ lɛ nɔ lɛ yeɔ omanye ni amɛnaa miishɛɛ babaoo