Kristo Mla Lɛ
“Miyɛ Kristo mla shishi.”—1 KORINTOBII 9:21.
1, 2. (a) Kulɛ abaanyɛ atsĩ adesai atɔmɔi lɛ amli babaoo naa yɛ mɛɛ gbɛ nɔ? (b) Mɛni Kristendom ekaseee kɛjɛɛɛ Yuda jamɔ yinɔsane mli?
“GBƆMƐI kɛ nɔyelii ekaseko nɔ ko kɛjɛko yinɔsane mli dã, aloo ni amɛaatsu shishitoo mlai ni anaa kɛjɛɔ mli lɛ ahe nii.” Nɛkɛ ji bɔ ni afii ohai 19 lɛ mli German woloŋlelɔ ko wie. Lɛlɛŋ, awieɔ bɔ ni adesai ayinɔsane etee nɔ eha lɛ he akɛ “hiɛyaa yɛ kwashia feemɔ mli,” ni ji tɔmɔi wuji ni yɔɔ gbeyei kɛ shihilɛi ni mli wawai ni etsara nɔ kɛba, ní eji adesai miisumɔ ni amɛkase nii kɛjɛ tsutsu tɔmɔi amli kulɛ, abaanyɛ atsĩ shihilɛi nɛɛ amli babaoo naa.
2 Afeɔ nɛkɛ kpɛlɛmɔ ni akpɛlɛɛɛ ni akaseɔ nii kɛjɛɔ tsutsu tɔmɔi amli nɛɛ he nɔkwɛmɔ nɔ yɛ ŋwɛi mla lɛ hesusumɔ nɛɛ mli. Yehowa Nyɔŋmɔ kɛ mla kpakpa—Kristo mla lɛ, ye Mose Mla lɛ najiaŋ. Shi kɛlɛ, Kristendom hiɛnyiɛlɔi lɛ, ni kɛɔ akɛ amɛtsɔɔ mla nɛɛ ni amɛhiɔ shi yɛ naa lɛ, ekaseee nii kɛjɛɛɛ Farisifoi lɛ anifeemɔi fɔji ni hiɛdɔɔ yɔɔ mli lɛ amli. No hewɔ lɛ, Kristendom etsɔ̃mɔ̃ Kristo mla lɛ, ni amɛkɛtsuɔ nii yɛ gbɛ fɔŋ nɔ tamɔ bɔ ni Yuda jamɔ fee Mose Mla lɛ pɛpɛɛpɛ. Mɛɛ gbɛ nɔ etsɔ eba lɛ nakai? Klɛŋklɛŋ lɛ, ha wɔsusu mla nɛɛ diɛŋtsɛ he wɔkwɛ—nɔ ni eji, mɛi ni ekudɔɔ kɛ gbɛ ni etsɔɔ nɔ ekudɔɔ amɛ, kɛ nɔ ni haa esoroɔ lɛ yɛ Mose Mla lɛ he. No sɛɛ lɛ, wɔbaakwɛ bɔ ni Kristendom kɛtsu nii yɛ gbɛ fɔŋ nɔ eha. Eba akɛ wɔɔtsɔ enɛ nɔ wɔkase nii kɛjɛ yinɔsane mli ni ehe aba sɛɛnamɔ kɛha wɔ!
Kpaŋmɔ Hee Lɛ
3. Mɛɛ shiwoo Yehowa kɛha yɛ kpaŋmɔ hee ko he?
3 Namɔ baanyɛ aha Mla ni eye emuu ahi fe bɔ ni eyɔɔ lɛ, akɛ ja Yehowa Nyɔŋmɔ? Mose Mla kpaŋmɔ lɛ eye emuu. (Lala 19:8) Shi yɛ enɛ fɛɛ sɛɛ lɛ, Yehowa wo shi akɛ: “Naa, gbii miiba, . . . ni mikɛ Israel we lɛ kɛ Yuda we lɛ aaakpaŋ kpaŋmɔ hee; etamɔɔɔ kpaŋmɔ ni mikɛ amɛtsɛmɛi lɛ kpaŋ” lɛ. Aŋmala Kitai Nyɔŋma lɛ—ni ji Mose Mla lɛ mli oti fe fɛɛ lɛ—yɛ tɛ taoi anɔ. Shi Yehowa wie yɛ kpaŋmɔ hee lɛ he akɛ: “Maŋɔ mimla lɛ mawo amɛmli ni maŋma yɛ amɛtsui nɔ.”—Yeremia 31:31-34.
4. (a) Mɛɛ Israel yɔɔ kpaŋmɔ hee lɛ mli? (b) Yɛ mumɔŋ Israelbii lɛ asɛɛ lɛ, namɛi hu yɔɔ Kristo mla lɛ shishi?
4 Namɛi akɛ amɛ baawo nɛkɛ kpaŋmɔ hee nɛɛ mli? Eka shi faŋŋ akɛ jeee “Israel we” lɛ diɛŋtsɛ, mɛi ni kpoo nɛkɛ kpaŋmɔ nɛɛ Teŋdamɔlɔ lɛ. (Hebribii 9:15) Dabi, nɛkɛ “Israel” hee nɛɛ baafee “Nyɔŋmɔ Israel,” ni ji mumɔŋ Israelbii amaŋ. (Galatabii 6:16; Romabii 2:28, 29) Sɛɛ mli lɛ, “asafo babaoo” ni jɛ jeŋmaji fɛɛ mli, ni amɛ hu amɛaatao akɛ amɛaaja Yehowa, baafata nɛkɛ Kristofoi ni akɛ mumɔ efɔ amɛ mu nɛɛ akuu bibioo lɛ he. (Kpojiemɔ 7:9, 10; Zakaria 8:23) Eyɛ mli akɛ amɛbɛ kpaŋmɔ hee lɛ mli moŋ, shi mɛnɛɛmɛi hu baahi mla shishi. (Okɛto 3 Mose 24:22; 4 Mose 15:15 he.) Ákɛ “kuu kome” yɛ “kwɛlɔ kome” shishi lɛ, amɛ fɛɛ amɛbaahi “Kristo mla shishi,” taakɛ bɔfo Paulo ŋma lɛ. (Yohane 10:16; 1 Korintobii 9:21) Paulo tsɛ nɛkɛ kpaŋmɔ hee nɛɛ akɛ “kpaŋmɔ ni hi fe tsutsu nɔ lɛ.” Mɛni hewɔ? Nɔ kome ji akɛ, edamɔ shiwooi ni eba mli anɔ, moŋ fe nibii ni baaba lɛ ahe susumai anɔ.—Hebribii 8:6; 9:11-14.
5. Mɛni ji yiŋtoo ni yɔɔ kpaŋmɔ hee lɛ sɛɛ, ni mɛni hewɔ ebaaye omanye lɛ?
5 Mɛni ji yiŋtoo ni yɔɔ kpaŋmɔ nɛɛ sɛɛ? No ji koni ajɛ mli ana maŋtsɛmɛi kɛ osɔfoi amaŋ ni baajɔɔ adesai fɛɛ. (2 Mose 19:6; 1 Petro 2:9; Kpojiemɔ 5:10) Mose Mla kpaŋmɔ lɛ haaa ana nɛkɛ jeŋmaŋ nɛɛ yɛ eshishinumɔ diɛŋtsɛ naa kɛmɔ shi, ejaakɛ akɛ maŋ muu lɛ, Israel tse atua ni amɛ hegbɛ nɛɛ je amɛdɛŋ. (Okɛto Romabii 11:17-21 he.) Shi, bɔ fɛɛ bɔ ni fee lɛ, kpaŋmɔ hee lɛ baaye omanye, ejaakɛ ekɔɔ mla sɔrɔto ko kwraa he. Sɔrɔto yɛ mɛɛ gbɛi anɔ?
Heyeli Mla Lɛ
6, 7. Kristo mla lɛ haa heyeli babaoo fe Mose Mla lɛ yɛ mɛɛ gbɛ nɔ?
6 Akɛ Kristo mla lɛ toɔ heyeli he shii abɔ. (Yohane 8:31, 32) Atsɛɔ lɛ akɛ ‘mɛi ni eye amɛhe lɛ amla’ kɛ “heyeli mla ni hi kɛwula shi.” (Yakobo 1:25; 2:12) Yɛ anɔkwale mli lɛ, husu yɛ heyelii ni yɔɔ adesai ateŋ lɛ fɛɛ he. Shi, nɛkɛ mla nɛɛ haa heyeli babaoo fe nɔ ni tsɔ̃ hiɛ, ni ji Mose Mla lɛ. Yɛ mɛɛ gbɛ nɔ?
7 Nɔ kome ji akɛ, afɔɔɔ mɔ ko kwraa yɛ Kristo mla lɛ shishi. Otii tamɔ hewolonɔ su kɛ he ni afɔ mɔ ko yɛ lɛ he ehiaaa. Anɔkwa Kristofoi jɛɔ amɛsuɔmɔ mli amɛhalaa yɛ amɛtsuii amli akɛ amɛaakpɛlɛ kɔŋtso ni ji mla nɛɛ toiboo nɔ. Yɛ nakai feemɔ mli lɛ, amɛnaa akɛ eji kɔŋtso ni teremɔ waaa, jatsu ni etsiii. (Mateo 11:28-30) Kɛji wɔɔkai lɛ, ato Mose Mla lɛ hu he gbɛjianɔ koni etsɔɔ gbɔmɔ akɛ eshafeelɔ ji lɛ, ni ehe miihia waa ni ena kpɔmɔ afɔleshaa koni ehere lɛ. (Galatabii 3:19) Shi Kristo mla lɛ tsɔɔ akɛ Mesia lɛ eba, ni ekɛ ewala ebawo kpɔmɔ nɔ lɛ jara lɛ, ni egbele gbɛ kɛha wɔ koni wɔye wɔhe kɛjɛ nɔnyɛɛ ni naa wa ni wɔyɔɔ shishi yɛ esha kɛ gbele shishi lɛ mli! (Romabii 5:20, 21) Esa akɛ ‘wɔna hemɔkɛyeli’ yɛ nakai afɔleshaa lɛ mli, bɔni afee ni wɔna he sɛɛ.—Yohane 3:16.
8. Mɛni fata Kristo mla lɛ he, shi mɛni hewɔ shi ni aaahi yɛ naa lɛ biii ni akase mla naa akpɔi ohai abɔ awo yitsoŋ lɛ?
8 ‘Hemɔkɛyeli ni wɔɔna’ lɛ biɔ ni wɔhi shi yɛ Kristo mla lɛ naa. Nɔ ni fata he ji Kristo kitai fɛɛ atoi ni wɔɔbo. Ani enɛ tsɔɔ akɛ belɛ wɔbaakase mlai kɛ akpɔi ohai abɔ wɔwo wɔyitsoŋ? Dabi. Eyɛ mli akɛ Mose, ni ji kpaŋmɔ momo lɛ teŋdamɔlɔ lɛ, ŋma Mose Mla lɛ moŋ, shi Yesu, mɔ ni ji kpaŋmɔ hee lɛ Teŋdamɔlɔ lɛ, eŋmaaa mla kome folo po efɔɔɔ shi. Shi moŋ, ehi shi yɛ mla lɛ naa. Etsɔ ewala shihilɛ gbɛ ni eye emuu lɛ nɔ efee nɔkwɛmɔ nɔ efɔ̃ shi eha mɛi fɛɛ ni amɛnyiɛ sɛɛ. (1 Petro 2:21) Ekolɛ no hewɔ ni atsɛ mra be mli Kristofoi ajamɔ lɛ akɛ ‘Gbɛ Lɛ.’ (Bɔfoi lɛ Asaji 9:2; 19:9, 23; 22:4; 24:22) Kɛha amɛ lɛ, afee Kristo mla lɛ he mfoniri yɛ Kristo shihilɛ mli. Ní mɔ ko aaakase Yesu lɛ tsɔɔ akɛ ebaabo mla nɛɛ toi. Suɔmɔ ni mli wa ni amɛyɔɔ kɛha lɛ lɛ tsɔɔ akɛ aŋma mla nɛɛ yɛ amɛtsuii anɔ lɛlɛŋ, taakɛ agba afɔ̃ shi lɛ. (Yeremia 31:33; 1 Petro 4:8) Ni mɔ ko ni feɔ toiboo yɛ suɔmɔ ni eyɔɔ hewɔ lɛ nuuu he akɛ aanyɛ enɔ—enɛ ji yiŋtoo kroko hu hewɔ ni atsɛɔ Kristo mla lɛ akɛ ‘mɛi ni eye amɛhe lɛ amla’ lɛ.
9. Mɛni ji nɔ titri ni yɔɔ Kristo mla lɛ mli, ni kita hee fata nɛkɛ mla nɛɛ he yɛ mɛɛ gbɛ nɔ?
9 Kɛji suɔmɔ he miihia yɛ Mose Mla lɛ mli lɛ, no lɛ eji nɔ titri ni yɔɔ Kristofoi amla lɛ mli. Enɛ hewɔ lɛ, kita hee ko fata Kristo mla lɛ he—esa akɛ Kristofoi ana he-kɛ-afɔleshaa suɔmɔ amɛha amɛhe. Esa akɛ amɛjie suɔmɔ kpo tamɔ bɔ ni Yesu fee lɛ; ejɛ esuɔmɔ mli ekɛ ewala fɔ̃ shi eha eshieŋtsɛmɛi lɛ. (Yohane 13:34, 35; 15:13) No hewɔ lɛ abaanyɛ awie yɛ gbɛ ni ja nɔ akɛ, Kristo mla lɛ ji teokrase kpojiemɔ yɛ gbɛ ni nɔ kwɔ, fe bɔ ni Mose Mla lɛ ji nɔ. Taakɛ wolo tɛtrɛɛ nɛɛ etsɔɔ faŋŋ yɛ be ko ni eho lɛ: “Teokrase tsɔɔ Nyɔŋmɔ nɔyeli; Nyɔŋmɔ lɛ, suɔmɔ ni; no hewɔ lɛ teokrase tsɔɔ suɔmɔ nɔyeli.”
Yesu kɛ Farisifoi Lɛ
10. Yɛ mɛɛ gbɛ nɔ Yesu nitsɔɔmɔ yɔɔ sɔrɔto kɛji akɛto Farisifoi lɛ anɔ̃ he?
10 Belɛ, ebɛ naakpɛɛ akɛ Yesu te shi eshi Yudafoi ajamɔ mli hiɛnyiɛlɔi ni hi shi yɛ egbii lɛ amli lɛ. Woloŋmalɔi lɛ kɛ Farisifoi lɛ ejie “heyeli mla ni hi kɛwula shi lɛ” kwraa kɛjɛ amɛjwɛŋmɔ mli fe nɔ fɛɛ nɔ. Amɛbɔ mɔdɛŋ akɛ amɛaakudɔ gbɔmɛi lɛ kɛtsɔ adesai akpɔi ni amɛwo lɛ anɔ. Amɛ nitsɔɔmɔ bafee nɔ ni nyɛɔ gbɔmɛi lɛ anɔ, ebuɔ amɛ fɔ, ni ehiii. Nɔ ni tamɔɔɔ nakai kwraa lɛ, Yesu nitsɔɔmɔ tswaa mɔ emaa shi jogbaŋŋ ni ehe yɛ sɛɛnamɔ hu! Etsɔɔ nibii ni abaanyɛ akɛtsu nii diɛŋtsɛ, ni etsu gbɔmɛi lɛ ahiamɔ nii kɛ amɛ naagbai diɛŋtsɛ ahe nii. Etsɔɔ nii yɛ gbɛ ni yɔɔ mlɛo nɔ kɛ anɔkwa henumɔ hu, ni ekɛ daa gbi shihilɛ mli nɔkwɛmɔ nii tsu nii, ni eha Nyɔŋmɔ Wiemɔ lɛ fee esɛɛfimɔ nɔ. Enɛ hewɔ lɛ, “mɛi lɛ ahe jɔ̃ amɛhe yɛ enitsɔɔmɔ lɛ hewɔ.” (Mateo 7:28) Hɛɛ, Yesu nitsɔɔmɔ lɛ shɛ amɛtsuii amli!
11. Yesu tsɔɔ akɛ kulɛ esa akɛ akɛ Mose Mla lɛ atsu nii yɛ nilee kɛ mɔbɔnalɛ mli yɛ mɛɛ gbɛ nɔ?
11 Yɛ nɔ najiaŋ ni ekɛ akpɔi babaoo aaafata Mose Mla lɛ he lɛ, Yesu tsɔɔ bɔ ni kulɛ esa akɛ Yudafoi lɛ kɛ nakai Mla lɛ atsu nii aha kɛjɛ shishijee tɔ̃ɔ—ni ji akɛ, esa akɛ amɛkɛtsu nii yɛ nilee kɛ mɔbɔnalɛ mli. Akɛ nɔkwɛmɔ nɔ lɛ, kaimɔ be ko beni yoo ko ni lá eho lɛ aahu lɛ banina lɛ kɛ ehaomɔ lɛ. Taakɛ Mose Mla lɛ tsɔɔ lɛ, mɔ fɛɛ mɔ ni yoo nɛɛ baata ehe lɛ he tseee, no hewɔ lɛ eka shi faŋŋ akɛ esaaa ni efutuɔ mɛi babaoo ateŋ! (3 Mose 15:25-27) Shi ehe ni tswaa shi sɔŋŋ ni atsa lɛ hewɔ lɛ, etsɔ gbɔmɛi babaoo lɛ ateŋ ni eyata Yesu atade lɛ he. Kɛkɛ ni lá lɛ kpa hoo amrɔ nɔŋŋ. Ani Yesu kã ehiɛ yɛ Mla lɛ mli ni eku lɛ hewɔ? Dabi; shi moŋ enu haomɔ shihilɛ ni eyɔɔ mli lɛ shishi, ni ejie Mla lɛ taomɔ nii kpele fe fɛɛ—suɔmɔ kpo etsɔɔ lɛ. Ekɛ mlitsɔlɛ kɛɛ yoo lɛ akɛ: “Biyoo, ohemɔkɛyeli eha ohe ewao; yaa yɛ hejɔlɛ mli, ni ohela lɛ aaajɔo.”—Marko 5:25-34.
Ani Kristo Mla lɛ Ŋmɛɔ Nɔ Fɛɛ Nɔ Feemɔ Gbɛ?
12. (a) Mɛni hewɔ esaaa ni wɔsusuɔ akɛ Kristo ŋmɛɔ nɔ fɛɛ nɔ feemɔ gbɛ lɛ? (b) Mɛni tsɔɔ akɛ mlai babaoo afeemɔ haa anaa gbɛ̀i babaoo ni aaatsɔ nɔ akɛku mli?
12 Belɛ, ani esa akɛ wɔmu sane naa akɛ, akɛni Kristo mla lɛ ji “heyeli mla” hewɔ lɛ, eŋmɛɔ nɔ fɛɛ nɔ feemɔ gbɛ, yɛ be mli ni, kɛ hoo lɛ, Farisifoi lɛ kɛ amɛ blema saji babaoo lɛ fɛɛ ha gbɔmɛi lɛ ajeŋba hi husui ni yɔɔ kpɛŋŋ mli lɛ? Dabi. Mla gbɛjianɔtoi ni yɔɔ ŋmɛnɛ lɛ tsɔɔ faŋŋ akɛ, bei pii lɛ, kɛji mlai fa babaoo lɛ, nakai nɔŋŋ gbɔmɛi taoɔ ehe gbɛ̀i ni amɛkɛaaku mli.a Yɛ Yesu gbii lɛ amli lɛ, bɔ ni Farisifoi lɛ amlai fa babaoo lɛ wo hewalɛ ni atao ehe gbɛ̀i ni akɛaaku mli, nitsumɔ ni atsuɔ lɛ jabejabe ni suɔmɔ bɛ mli, kɛ subaŋ ni ji bu ni mɔ buɔ ehe jalɔ yɛ kponɔgbɛ nifeemɔi amli koni ekɛtsimɔ mligbɛ fitemɔ nɔ.—Mateo 23:23, 24.
13. Mɛni hewɔ Kristo mla lɛ kɛ jeŋba he tɛ ni nɔ kwɔ baa fe mla gbɛjianɔtoi fɛɛ ni aŋmala ashwie shi lɛ?
13 Sɔrɔto feemɔ ni anaa ji akɛ, Kristo mla lɛ wooo sui ni tamɔ nɛkɛ he hewalɛ. Yɛ anɔkwale mli lɛ, toiboo ni afeɔ ahaa mla ni damɔ suɔmɔ kɛha Yehowa nɔ, ni aboɔ toi kɛtsɔɔ he-kɛ-afɔleshaa suɔmɔ ni Kristo yɔɔ kɛha mɛi krokomɛi lɛ kasemɔ nɔ lɛ, haa anaa jeŋba he tɛ ni nɔ kwɔ, fe ni aaanyiɛ mla he gbɛjianɔ ni ato afɔ̃ shi sɛɛ. Suɔmɔ taooo mla he gbɛ̀i ni ekɛaaku mli; ehaa wɔtsiɔ wɔhe kɛjɛɔ nifeemɔi ni yeɔ awui, ni ekolɛ mla ni awo lɛ eguko yɛ faŋŋ mli lɛ ahe. (Kwɛmɔ Mateo 5:27, 28.) Enɛ hewɔ lɛ, Kristo mla lɛ baatsirɛ wɔ ni wɔfee nii wɔha mɛi krokomɛi—ni wɔjie nihamɔ, gbɔfeemɔ, kɛ suɔmɔ kpo—yɛ gbɛi ni mlai ni awo lɛ nyɛŋ eha wɔfee nakai lɛ anɔ.—Bɔfoi lɛ Asaji 20:35; 2 Korintobii 9:7; Hebribii 13:16.
14. Mɛɛ hewalɛ Kristo mla lɛ naa ni ahiɔ shi yɛ lɛ ná yɛ klɛŋklɛŋ afii oha lɛ mli Kristofoi asafo lɛ nɔ?
14 Bɔ ni emli bii lɛ hi shi yɛ Kristo mla lɛ naa jogbaŋŋ hewɔ lɛ, mra be mli Kristofoi asafo lɛ ná shihilɛ ni miishɛɛ kɛ suɔmɔ yɔɔ mli, ni kpɛŋŋ feemɔ, mɛi krokomɛi akojomɔ, kɛ osatofeemɔ sui ni fa babaoo yɛ nakai beaŋ kpeehei lɛ amli lɛ bɛ mli lɛ mli ŋɔɔmɔ. Eka shi faŋŋ akɛ nɛkɛ asafoi heei nɛɛ amli bii lɛ nu he akɛ amɛmiihi shi yɛ ‘mɛi ni eye amɛhe lɛ amla’ lɛ naa lɛlɛŋ!
15. Mɛni ji Satan shishijee mɔdɛŋbɔi ni kulɛ etaoɔ ekɛfite Kristofoi asafo lɛ ekomɛi?
15 Shi kɛlɛ, Satan miibɔ mɔdɛŋ ni efite Kristofoi asafo lɛ kɛjɛ mligbɛ, tamɔ bɔ ni efite Israel maŋ lɛ. Bɔfo Paulo bɔ kɔkɔ yɛ hii ni tamɔ klaji, ni “wieɔ nii ni ejaaa,” ni amɛnyɛɔ Nyɔŋmɔ tooiku lɛ nɔ lɛ ahe. (Bɔfoi lɛ Asaji 20:29, 30) Ehe bahia ni ete shi eshi Yuda jalɔi, ní bɔ mɔdɛŋ akɛ amɛkɛ nyɔŋyeli kɛha Mose Mla lɛ, ní aha eba mli yɛ Kristo mli lɛ, aaaye heyeli ni husu yɔɔ he, ní Kristo mla lɛ kɛhaa lɛ najiaŋ lɛ. (Mateo 5:17; Bɔfoi lɛ Asaji 15:1; Romabii 10:4) Yɛ bɔfoi lɛ ateŋ naagbee mɔ lɛ gbele sɛɛ lɛ, agbɛnɛ nɔ ko bɛ ni tsĩɔ nɛkɛ hemɔkɛyeli kwamɔ nɛɛ naa dɔŋŋ. No hewɔ lɛ fitemɔ bagbɛ eshwã babaoo.—2 Tesalonikabii 2:6, 7.
Kristendom Wo Kristo Mla lɛ He Muji
16, 17. (a) Mɛɛ sui amli fitemɔ je kpo yɛ, yɛ Kristendom? (b) Katolik Sɔlemɔ lɛ mlai ha abaná bɔlɛnamɔ he susumɔi ni ejaaa yɛ mɛɛ gbɛ nɔ?
16 Taakɛ eji yɛ Yuda jamɔ gbɛfaŋ lɛ, fitemɔ ba yɛ gbɛi sɔrɔtoi babaoo nɔ yɛ Kristendom. Lɛ hu eŋmɛɛ ehe eha amale tsɔɔmɔi kɛ jeŋba shara. Ni bei pii lɛ, mɔdɛŋ ni ebɔɔ ni ekɛbu etooiku lɛ he kɛjɛ hewalɛi ni jɛɔ sɛɛ lɛ ahe lɛ fiteɔ jamɔ krɔŋŋ he kadimɔ nii fioo ni ekolɛ eshwɛ yɛ emli lɛ kwraa. Mlai ni yɔɔ kpɛŋŋ ni damɔɔɔ ŋmalɛ nɔ tee nɔ efa oyayaayai.
17 Katolik Sɔlemɔ lɛ ji klɛŋklɛŋ nɔ ni ale fe fɛɛ yɛ sɔlemɔ mlai babaoo ni awoɔ lɛ mli. Aje gbɛ atsɔ̃mɔ̃ nɛkɛ mlai nɛɛ yɛ saji ni kɔɔ bɔlɛnamɔ he lɛ gbɛfaŋ titri. Taakɛ wolo ko ni gbɛi ji Sexuality and Catholicism lɛ tsɔɔ lɛ, sɔlemɔ lɛ kpɛlɛ Helabii ajeŋ nilee ni ji Stoabii atsɔɔmɔ, ni wieɔ eshiɔ miishɛɛnamɔi sɔrɔtoi fɛɛ lɛ nɔ. Sɔlemɔ lɛ batsɔɔ akɛ bɔlɛnamɔ mli miishɛɛnamɔi fɛɛ, ni gbalashihilɛ mli nii ni afeɔ daa lɛ hu fata he lɛ, ji esha. (Okɛ Abɛi 5:18, 19 ato he.) Amɛkɛɛ akɛ ato bɔlɛnamɔ kɛha fɔmɔ pɛ, ni nɔ ko kwraa fataaa he. Enɛ hewɔ lɛ, sɔlemɔ lɛ mla bu gbɛ fɛɛ gbɛ ni atsɔɔ nɔ atsĩɔ musunamɔ naa lɛ fɔ akɛ eji esha ni hiɛdɔɔ yɔɔ mli waa, ni bei komɛi po lɛ, ebiɔ heshwamɔ piŋmɔ afii babaoo. Kɛfata he lɛ, aŋmɛɛɛ osɔfoi agbɛ ni amɛbote gbalashihilɛ mli, ni enɛ ji mla ni eha bɔlɛnamɔ fɔŋ, ni gbekɛbii aniseniianifeemɔ fata he lɛ efa babaoo lɛ.—1 Timoteo 4:1-3.
18. Mɛni jɛ sɔlemɔ mlai babaoo ni awo lɛ mli kɛba?
18 Beni sɔlemɔ lɛ mlai faa babaoo lɛ, ato gbɛjianɔ ni afee mlai lɛ woji. Nɛkɛ woji nɛɛ batsimɔ Biblia lɛ nɔ, ni eba lɛ shi kwraa. (Okɛto Mateo 15:3, 9 he.) Taakɛ Yuda jamɔ ji lɛ, Katolik jamɔ yiŋ etɛɛɛ lɛ yɛ je lɛŋ woji ahe, ni ebu emli babaoo akɛ oshara yɛ he. Etsɛɛɛ ni susumɔ nɛɛ tee nɔ kɛteke ŋaawoo ni nilee yɔɔ mli ni Biblia lɛ kɛha yɛ sane nɛɛ he lɛ. (Jajelɔ 12:12; Kolosebii 2:8) Jerome, sɔlemɔ niŋmalɔ ko ni hi shi yɛ afii ohai ejwɛ Ŋ.B. lɛ wie waa akɛ: “O Nuntsɔ, kɛji minine shɛ je lɛŋ woji anɔ loo mikane ekoŋŋ lɛ, no lɛ mikwa bo kwraa.” Yɛ be ko sɛɛ lɛ, sɔlemɔ lɛ bɔi mɛi awoji amli kwɛmɔ koni atsĩmɔ nibii ni amɛsusuɔ akɛ ehiii lɛ anɔ loo ajie kɛjɛ mli—ni amɛkwɛɔ woji ni wieɔ je lɛŋ saji ahe po mli. Enɛ hewɔ lɛ, abu afii ohai 17 lɛ mli ŋulamii ahe nilelɔ Galileo fɔ akɛ eŋma akɛ shikpɔŋ lɛ bɔleɔ hulu lɛ. Yɛ naagbee lɛ, bɔ ni sɔlemɔ lɛ kɛɔ doo akɛ eyɛ hegbɛ ni nɔ kwɔ fe fɛɛ yɛ nɔ fɛɛ nɔ mli—ni ŋulamii ahe nilee po fata he lɛ—bafite Biblia mli hemɔkɛyeli namɔ kwraa.
19. Mɔ kome shihilɔi ashihilɛ hei ha gbɔmɛi anɔnyɛɛ mlai ni yɔɔ kpɛŋŋ bafa babaoo yɛ mɛɛ gbɛ nɔ?
19 Sɔlemɔ lɛ mlai afeemɔ lɛ tee hiɛ waa yɛ mɔ kome shihilɔi ashihilɛ hei, he ni mɔ kome shihilɔi tsi amɛhe kɛjɛ je nɛɛ he ní amɛyahi yɛ hekwamɔ shihilɛ mli lɛ. Katolik mɔ kome shihilɔi ashihilɛ hei pii hi shi yɛ “St. Benedict Mla Lɛ” naa. Hii mɔ kome shihilɔi lɛ anɔkwɛlɔ, abbot, (ni ji gbɛi ni ana kɛjɛ Aramaik wiemɔ kɛha “tsɛ” mli lɛ), yeɔ nɔ kɛ hegbɛ ni husu bɛ he. (Okɛto Mateo 23:9 he.) Kɛji mɔ kome shihilɔi lɛ eko nine shɛ nikeenii nɔ kɛjɛ efɔlɔi aŋɔɔ lɛ, amɛ nɔkwɛlɔ lɛ ji mɔ ni baatsɔɔ kɛji esa akɛ akɛha nakai mɔ kome shihilɔ lɛ loo mɔ kroko. Kɛfata wiemɔ shara ni ebuɔ lɛ fɔ lɛ he lɛ, mla ko guɔ sanegbaai bibii kɛ fɛoyelii fɛɛ, ni ekɛɔ akɛ: “Esaaa ni kaselɔ ko wieɔ wiemɔi ni tamɔ nakai.”
20. Mɛni tsɔɔ akɛ Protestant jamɔ hu he basa waa yɛ gbɔmɛi anɔnyɛɛ ni damɔɔɔ ŋmalɛ nɔ lɛ mli?
20 Etsɛɛɛ ni Protestant jamɔ, ni ka akɛ ebaatsake nibii ni damɔɔɔ ŋmalɛ nɔ, ni Katolik jamɔ lɛ fee kɛteke nɔ lɛ, hu he basa waa kɛ mlai ni akɛnyɛɔ mɔ nɔ, ni bɛ nɔdaamɔ nɔ ko kwraa yɛ Kristo mla lɛ mli lɛ feemɔ. Akɛ nɔkwɛmɔ nɔ lɛ, abale John Calvin ni ji jamɔ tsakemɔ hiɛnyiɛlɔ lɛ akɛ “Sɔlemɔ ni asaa lɛ jogbaŋŋ lɛ mlawolɔ.” Eye sɔlemɔ lɛ nɔ yɛ Geneva kɛ mlai babaoo ni yɔɔ kpɛŋŋ, ni “Onukpai” ji mɛi ni kwɛɔ ni aye mlai nɛɛ anɔ, ni amɛ “nitsumɔ,” taakɛ Calvin kɛɛ lɛ, “ji ni amɛkwɛ mɔ fɛɛ mɔ shihilɛ nɔ.” (Okɛ 2 Korintobii 1:24 ato he.) Sɔlemɔ lɛ kwɛɔ gbɔi atoohei anɔ, ni amɛ amɛkudɔɔ saneyitsei ni aŋmɛɔ gbɛ kɛha sanegbaa. Ayɛ toigbalamɔi ni mli wa waa ni akɛhaa yɛ tɔmɔi tamɔ lalai gbohii alamɔ kɛ joo he.b
Nii ni Wɔkaseɔ Kɛjɛɔ Kristendom Tɔmɔi lɛ Amli
21. Mɛni ejɛ mɔdɛŋ ni Kristendom bɔ akɛ ‘eeejwɛŋ kɛteke nɔ ni aŋma lɛ’ mli kɛba?
21 Ani nɛkɛ mlai kɛ akpɔi ni awo nɛɛ fɛɛ etsu nii kɛbu Kristendom he kɛjɛ fitemɔ mli? Nɔ ni tamɔɔɔ nakai moŋ ejɛ mli eba! Ŋmɛnɛ, Kristendom mli egbala ni ana jamɔ kui ohai babaoo kɛjɛ mli, kɛjɛ nɔ ni yɔɔ kpɛŋŋ aahu fe nine nɔ, kɛyashi nɔ ni ŋmɛɔ nɔ fɛɛ nɔ feemɔ gbɛ lɛ anɔ. Yɛ gbɛ kome loo gbɛ kroko nɔ lɛ, amɛ fɛɛ ‘amɛjwɛŋ kɛteke nɔ ni aŋma lɛ,’ ni amɛŋmɛ gbɛ ni adesai asusumɔi miikudɔ tooiku lɛ, ni eteɔ shi ewoɔ ŋwɛi mla.—1 Korintobii 4:6.
22. Mɛni hewɔ afã ni Kristendom egba lɛ etsɔɔɔ Kristo mla lɛ naagbee lɛ?
22 Shi kɛlɛ, Kristo mla lɛ yinɔsane baŋ naagbee yɛ amanehulu mli. Yehowa Nyɔŋmɔ eŋmɛŋ adesai foji agbɛ ni amɛjie ŋwɛi mla lɛ kɛjɛ shihilɛ mli kɔkɔɔkɔ. Kristofoi amla miitsu nii jogbaŋŋ ŋmɛnɛ yɛ anɔkwa Kristofoi ateŋ, ni mɛnɛɛmɛi ena hegbɛ kpele akɛ amɛaahi shi yɛ naa. Shi yɛ be mli ni wɔsusu nɔ ni Yuda jamɔ kɛ Kristendom efee mla lɛ he lɛ sɛɛ lɛ, ekolɛ wɔɔsusu yɛ gbɛ ni ja nɔ akɛ, ‘Mɛɛ gbɛ nɔ wɔhiɔ shi yɛ Kristo mla lɛ naa, yɛ be mli ni wɔtsiɔ wɔhe kɛjɛɔ tsɔne ni ji Nyɔŋmɔ Wiemɔ lɛ ni wɔkɛ adesa susumɔi kɛ mlai ni fiteɔ yiŋtoo diɛŋtsɛ ni yɔɔ ŋwɛi mla lɛ sɛɛ lɛ aaafite lɛ lɛ he lɛ? Mɛɛ susumɔ ni ŋmɛɔ pɛpɛɛpɛ esa akɛ Kristo mla lɛ kɛwo wɔmli ŋmɛnɛ?’ Nikasemɔ ni nyiɛ sɛɛ lɛ baaha sanebimɔi nɛɛ ahetoo.
[Shishigbɛ niŋmai]
a Farisifoi lɛ ji mɛi titri ni kɛ Yuda jamɔ ni yɔɔ ŋmɛnɛ lɛ ba, no hewɔ lɛ ebɛ naakpɛɛ akɛ Yuda jamɔ miiya nɔ eetao gbɛ̀i komɛi ni ekɛbaatsu nii yɛ naatsii babaoo ni ekɛfata Hejɔɔmɔ Gbi lɛ he lɛ mli lolo. Akɛ nɔkwɛmɔ nɔ lɛ, gbɔ ni baaya ortodɔks Yudafoi ahelatsamɔ hei lɛ eko yɛ Hejɔɔmɔ Gbi nɔ lɛ baana akɛ tsɔne ni holeɔ mɛi kɛyaa ŋwɛitsu nɔ lɛ diɛŋtsɛ waa yɛ nsɔɔdo fɛɛ nsɔɔdo nɔ, koni ekaba akɛ mɛi ni yɔɔ mli ni ekɛ amɛ yaa lɛ eko aaatsu esha “nitsumɔ” ni ji tsɔne lɛ bɔtun nɔ ni eeenyɛ koni ewa. Ortodɔks datrɛfoi komɛi kɛ inki ni baalaaje yɛ gbii fioo sɛɛ ŋmaa tsofai amɛhaa mɛi lɛ. Mɛni hewɔ? Mishnah lɛ buɔ niŋmaa akɛ “nitsumɔ,” shi etsɔɔ “niŋmaa” shishi akɛ okadi ni ashi ni baahi shi daa.
b Ashã Servetus, ni te shi ewo Calvin jamɔ mli susumɔi lɛ ekomɛi lɛ yɛ tso he akɛ musubɔlɔ.
Te Obaaha Hetoo Tɛŋŋ?
◻Mɛni ji nɔ titri ni yɔɔ Kristo mla lɛ mli?
◻Esoro bɔ ni Yesu tsɔɔ nii ehaa, yɛ Farisifoi lɛ anɔ̃ he yɛ mɛɛ gbɛ nɔ?
◻Satan kɛ mla-feemɔ henumɔ ni yɔɔ kpɛŋŋ tsu nii ni akɛfite Kristendom yɛ mɛɛ gbɛ nɔ?
◻Mɛɛ nibii kpakpai komɛi ejɛ Kristo mla lɛ naa ni ahiɔ shi yɛ lɛ mli eba?
[Mfoniri ni yɔɔ baafa 16]
Yesu kɛ Mose Mla lɛ tsu nii yɛ nilee kɛ mɔbɔnalɛ mli