Amɛfee Yehowa Suɔmɔnaa Nii

Elia Wo Anɔkwa Nyɔŋmɔ lɛ Hiɛ Nyam

EJI nuu ni aatao lɛ waa fe mɔ fɛɛ mɔ yɛ Israel. Etamɔ nɔ ni bɔ fɛɛ bɔ ni ji lɛ, abaagbe lɛ, kɛ́ maŋtsɛ lɛ na lɛ. Namɔ ji nɛkɛ nuu ni agbɔbiɔ nɛɛ? Yehowa gbalɔ Elia.

Maŋtsɛ Ahab kɛ eŋa wɔŋjalɔ, Izebel eha Baal jamɔ eshwere yɛ Israel. Nɔ ni jɛ mli ba ji akɛ, Yehowa ha nuhɔmɔ ba shikpɔŋ lɛ nɔ, ni amrɔ nɛɛ ebote e-afii ejwɛ mli. Izebel ni mli ewo la lɛ ka koni eha agbe Yehowa gbalɔi lɛ, shi Ahab miitao Elia titri. Elia ji mɔ ni kɛɛ Ahab yɛ nɔ ni fe afii etɛ ni tsɔ hiɛ lɛ mli akɛ: “Kɛji bɔ́ loo nugbɔ aaanɛ yɛ afii nɛɛ amli fĩi, ja mi miwie!” (1 Maŋtsɛmɛi 17:1) Ni nuhɔmɔ ni jɛ mli ba lɛ tee nɔ lolo.

Yɛ nɛkɛ oshara be nɛɛ mli ni Yehowa kɛɛ Elia akɛ: “Yaa ni okɛ ohe ayatsɔɔ Ahab, ni maha nugbɔ abanɛ yɛ shikpɔŋ lɛ nɔ!” Elia bo Yehowa famɔ lɛ toi yɛ oshara kpeteŋkpele naa.—1 Maŋtsɛmɛi 18:1, 2.

Henyɛlɔi Enyɔ Kpe

Beni ena Elia lɛ, Ahab bi lɛ akɛ: “Bo Israel haolɔ lɛ, bo nɛ?” Elia kɛ ekãa ha hetoo akɛ: “Mihaoko Israel, shi moŋ bo kɛ otsɛ we lɛ ni, akɛ nɔ ni nyɛkwa Yehowa kitai lɛ, ni oyanyiɛ Baalim sɛɛ lɛ!” Kɛkɛ ni Elia tsɔɔ akɛ Israel fɛɛ abua amɛhe naa yɛ Karmel Gɔŋ lɛ nɔ, ni “Baal gbalɔi ohai ejwɛ kɛ nyɔŋmai enumɔ lɛ, kɛ Ashera gbalɔi ohai ejwɛ lɛ,” fata he. Kɛkɛ ni Elia kɛɛ asafo lɛ akɛ: “Mɛɛ beyinɔ nɔŋŋ nyɛdidãa yɛ saji enyɔ teŋ kɛyashi?a Kɛji Yehowa ji Nyɔŋmɔ lɛ, nyɛnyiɛa esɛɛ; shi kɛji Baal ni lɛ, no lɛ nyɛnyiɛa esɛɛ!”—1 Maŋtsɛmɛi 18:17-21.

Gbɔmɛi lɛ fee dioo. Ekolɛ amɛyɔse fɔ ni amɛye yɛ nyɛ ni amɛnyɛɛɛ amɛkɛ jamɔ mli hetuu-kɛhamɔ aha Yehowa lɛ hewɔ. (2 Mose 20:4, 5) Aloo ekolɛ amɛhenileei lɛ egbo aahu akɛ amɛnaaa esha ko yɛ amɛ anɔkwayeli mli ni amɛja amɛha Yehowa kɛ Baal lɛ hewɔ. Yɛ fɛɛ mli lɛ, Elia fã gbɔmɛi lɛ koni amɛkɛ tsina hii enyɔ aba—ekome kɛha Baal gbalɔi lɛ kɛ ekome kɛha lɛ. Abaagbe tsinai enyɔ lɛ fɛɛ ni akɛsha afɔle, shi esaaa akɛ akpɛɔ la. Elia kɛɛ akɛ: “Nyɛtsɛa nyɛnyɔŋmɔ lɛ gbɛi, ni mi hu matsɛ Yehowa gbɛi: ni aba mli akɛ Nyɔŋmɔ mɔ ni kɛ la aaahere nɔ lɛ, lɛ ji Nyɔŋmɔ!”—1 Maŋtsɛmɛi 18:23, 24.

Awo Yehowa Hiɛ Nyam

Baal gbalɔi lɛ je shishi “amɛtumɔ kɛbɔle afɔleshaalatɛ ni amɛfee lɛ.” Amɛbolɔ yɛ leebi muu fɛɛ akɛ: “Baal, heremɔ wɔ nɔ!” Shi Baal hereee nɔ. (1 Maŋtsɛmɛi 18:26) Kɛkɛ ni Elia bɔi amɛhefɛoyeli akɛ: “Nyɛbolɔa ni awaa, ejaakɛ nyɔŋmɔ ji lɛ!” (1 Maŋtsɛmɛi 18:27) Baal jalɔi lɛ po bɔi amɛhe kaklai kɛ akpɔlɔi folɔmɔ—nifeemɔ ni wɔŋjalɔi fɔɔ feemɔ kɛteeɔ amɛnyɔŋmɔi lɛ amɔbɔnalɛ shi.b—1 Maŋtsɛmɛi 18:28.

Agbɛnɛ je ebɔi namɔ ni Baal jálɔi lɛ kã he “amɛgbagbai”—wiemɔ kuku ko ni yɔɔ sane nɛɛ mli, ni hiɛ shishinumɔ ni tsɔɔ nɔ ko ni afeɔ tamɔ nɔ ni aye sɛkɛ, ní henɔyeli bɛ mli. Kɛmiiya gbɛkɛnaashi mli lɛ, Elia kɛɛ gbɔmɛi lɛ yɛ naagbee mli akɛ: “Nyɛtsia nyɛbɛŋkɛa mi!” Amɛ fɛɛ amɛkwɛ lɛ gaa yɛ be mli ni Elia ku esɛɛ ema Yehowa afɔleshaalatɛ lɛ ekoŋŋ, ni etsa bu ebɔle he, ni efolɔ tsinabi lɛ mli dukuduku, ni ekɛshwie afɔleshaalatɛ lɛ kɛ lai ni ekɛbaasha afɔle lɛ nɔ lɛ. Yɛ no sɛɛ lɛ, akɛ nu fɔ tsina lɛ, afɔleshaalatɛ lɛ, kɛ lai lɛ ahe fɛɛ, ni afo nu obɔ awo bu lɛ mli (ŋwanejee ko bɛ akɛ aná ŋshɔŋ nu kɛjɛ Mediterranean Ŋshɔ lɛ mli). Kɛkɛ ni Elia sɔle eha Yehowa akɛ: “Ŋmɛnɛ ha ni ana ale akɛ bo ji Nyɔŋmɔ ni yɔɔ Israel, ni akɛ mi ji otsulɔ, ni owiemɔ lɛ naa mifeɔ nii nɛɛ fɛɛ yɛ! Heremɔ mi nɔ, Yehowa, heremɔ mi nɔ, koni nɛkɛ maŋ nɛɛ ana ale akɛ bo Yehowa ji Nyɔŋmɔ, ni akɛ bo nɔŋŋ oha amɛtsui ekpale kɛba ekoŋŋ!”—1 Maŋtsɛmɛi 18:29-37.

Amrɔ nɔŋŋ lɛ, la jɛ ŋwɛi bayi shi “ni ebashã shãa afɔle lɛ kɛ lai lɛ kɛ tɛi lɛ kɛ su lɛ, ni nu lɛ ni yɔɔ bu lɛ mli lɛ tete elɛmɔ.” Oya nɔŋŋ ni gbɔmɛi ni kwɛɔ lɛ kɛ amɛhiɛiaŋ bumɔ shi amɛkɛɛ: “Yehowa lɛ, lɛ ji Nyɔŋmɔ! Yehowa lɛ, lɛ ji Nyɔŋmɔ!” Yɛ Elia famɔ naa lɛ, amɔmɔ Baal gbalɔi lɛ ni akɛ amɛ tee Kishon faa lɛ naa, ni jɛmɛ agbe amɛ yɛ.—1 Maŋtsɛmɛi 18:38-40.

Nikasemɔ Kɛha Wɔ

Elia jie nɔ ni baafee tamɔ ekãafeemɔ ni fe adesai anɔ kpo. Shi kɛlɛ, Biblia ŋmalɔ Yakobo maa nɔ mi ehaa wɔ akɛ “Elia ji gbɔmɔ adesa tamɔ wɔ nɔŋŋ.” (Yakobo 5:17) Eyeko ehe kɛjɛko gbeyeishemɔ kɛ yeyeeyefeemɔ he. Akɛ nɔkwɛmɔnɔ lɛ, beni yɛ sɛɛ mli lɛ Izebel kã kita akɛ ebaatɔ Baal gbalɔi lɛ ahiɛkpatamɔ lɛ he owele lɛ, Elia jo foi ni efo etsɛ Yehowa yɛ sɔlemɔ mli akɛ: “Agbɛnɛ efa! Yehowa, ŋɔɔ misusuma kɛya.”—1 Maŋtsɛmɛi 19:4.

Yehowa eŋɔɔɔ Elia susuma kɛyaaa yɛ gbele mli. Shi moŋ, eye ebua lɛ yɛ mɔbɔnalɛ mli. (1 Maŋtsɛmɛi 19:5-8) Nyɔŋmɔ tsuji ni yɔɔ ŋmɛnɛ lɛ baanyɛ aná nɔmimaa akɛ Yehowa baafee nakai nɔŋŋ kɛ amɛkɛ yeyeeyefeemɔ shihilɛ ni mli wa kpe, ekolɛ yɛ shitee-kɛ-woo hewɔ lɛ. Lɛɛlɛŋ, kɛ amɛsɔle amɛbi Yehowa yelikɛbuamɔ lɛ, ebaanyɛ eha amɛ “hewalɛ ni fa kɛteke nɔ,” bɔni afee ni kɛji ‘afifia’ amɛ “yɛ he fɛɛ he” lɛ, ‘amɛtsui akasu.’ Nɛkɛ gbɛ nɔ lɛ, abaaye abua amɛ koni amɛto amɛtsui shi, taakɛ Elia fee lɛ.—2 Korintobii 4:7, 8.

[Shishigbɛ niŋmai]