Sanekpakpa Lɛ Kɛhamɔ—Yɛ Shikpɔŋkuku Ni Afɔɔ Mli Nitsumɔ Mli
1 Shii enyiɛ otsuɔ oshikpɔŋkuku lɛ mli nii? Kɛji otsuɔ shikpɔŋkuku lɛ mli nii daa lɛ, ajɔɔ bo waa diɛŋtsɛ. Mɛni hewɔ? Ejaakɛ asafoi ni fɔɔ amɛshikpɔŋkuku mli nitsumɔ daa lɛ naa shweremɔ oyayaayai. Akɛ nɔkwɛmɔ nɔ lɛ, yɛ maŋ bibioo ko ni ji Teshie, ni bɛŋkɛ Ga, he ni afɔɔ shikpɔŋkuku lɛ mli nitsumɔ daa lɛ mli lɛ, amrɔ nɛɛ ayɛ asafoi 11 yɛ jɛmɛ, yɛ be mli ni afii enumɔ ni eho nɛ lɛ asafoi 6 pɛ yɔɔ jɛmɛ.
2 Yɛ be mli ni etsuɔ nii yɛ shikpɔŋkuku ko ni atsuɔ mli nii daa otsi lɛ mli lɛ, nyɛminuu ko kɛ yoo ko ni ekɛɛ abako eŋɔɔ da lɛ kpe. Ekɛ miishɛɛ kɛ oyaiyeli he wolo ni eŋɔɔ enaa waa akɛ mɔ ko ena lɛ. No hewɔ lɛ mɛi komɛi yɛ shikpɔŋkuku ni tamɔ nakai lɛ mli ni amɛnako hegbɛ amɛbo sanekpakpa lɛ toi. (Okɛto 2 Petro 3:9b he.) Ehe miihia ni atsu shikpɔŋkuku ni afɔɔ mli nitsumɔ lɛ mli nii jogbaŋŋ koni akɛtao mɛi ni tamɔ gwaŋtɛŋi lɛ.—Mat. 10:11.
Bɔ Ni Ooofee Okpee Shihilɛ Lɛ Naa
3 Yɛ he ni afɔɔ shikpɔŋkuku lɛ mli nitsumɔ daa lɛ, ehe miihia waa ni ato shia-kɛ-shia kadimɔ wolo ni aŋmala mli jogbaŋŋ. Abaanyɛ akɛ mɛi ni bɛ shia lɛ agbɛi ni aŋmala lɛ atsu nii ni eha kui lɛ kɛ amɛhe awo shiɛmɔ mli be fɛɛ be kɛ shikpɔŋkuku kroko ko bɛ ni abaatsu mli nii. Mɛni hewɔ ni okɛ gbɛkɛnaashi odaseyeli be lɛ tsuuu nii ni okɛyasara mɛi ni bɛ shia yɛ leebi mli lɛ? Kaimɔ akɛ mɛi ni bɛ shia yɛ leebi mli loo yɛ otsi lɛ naagbee lɛ hiɔ shia yɛ gbɛkɛnaashi.
4 Kɛji okɛ Saneyitso Kɛha Sanegbaa kome tsu oshikpɔŋkuku lɛ mli nii shii abɔ lɛ, ehe baaba sɛɛnamɔ akɛ oootsake ohiɛkpamɔ wiemɔ lɛ. Obaana hiɛkpamɔ wiemɔi ni sa lɛ ekomɛi yɛ Reasoning wolo lɛ baafai 9-15. Okɛ enɛɛmɛi atsu nii koni eye ebua bo koni onyɛ okɛ mɛi ni okɛkpeɔ yɛ shiɛmɔ mli lɛ aje sanegbaa shishi.—Abɛi 1:5.
5 Gbɛ kroko hu ni obaanyɛ otsɔ nɔ otsake ohiɛkpamɔ lɛ ji ni okɛ dɛhiɛmɔ woji lɛ eko aha. Okɛ dɛhiɛmɔ wolo lɛ saneyitso lɛ atsa Saneyitso Kɛha Sanegbaa lɛ. Agbɛnɛ hu, okɛ adafitswaa mli saji hee ni eba lɛ hu atsu nii. Kɛ obi saji yɛ nibii ni tamɔ nɛkɛ lɛ ahe lɛ, ebaatee shiatsɛ lɛ niiahesusumɔ shi ni ebaafee nɔdaamɔ nɔ kɛha sanegbaa.
Ye Mɛi Fɛɛ Odase
6 Ani okɛ bei abɔ ni okɛsɔmɔɔ lɛ mli fa feɔ sɛɛsaramɔi kɛ Biblia mli nikasemɔi? Kɛ okɛ shia-kɛ-shia kadimɔ wolo kroko tsu nii ni oŋmala mɛi ni yɔɔ wiemɔ lɛ he miishɛɛ lɛ agbɛi yɛ nɔ lɛ, obaanyɛ okɛ mɛi ni bɛ shia ni oŋmala amɛgbɛi lɛ aha mɔ ni tsuɔ shikpɔŋkuku lɛ mli nii lɛ. Kwɛmɔ koni oya mɛi ni heɔ woji lɛ kɛ mɛi krokomɛi fɛɛ ni naa Maŋtsɛyeli sane lɛ he miishɛɛ lɛ aŋɔɔ mra.
7 Kɛ wɔha wɔhiɛ hi wɔhe nɔ yɛ hegbɛi ni wɔnaa ni wɔkɛaaye odase lɛ ahe lɛ, no lɛ wɔbaanyɛ wɔkɛ sanekpakpa lɛ ashɛ mɛi babaoo aŋɔɔ. Akɛ nɔkwɛmɔ nɔ lɛ, yɛ be mli ni wɔtsuɔ wɔshikpɔŋkuku lɛ mli nii lɛ, wɔfɔɔ mɛi ni amɛmiishi shia kɛmiiya he ko lɛ namɔ. Kɛ ebaahi lɛ, mɛni hewɔ okɛ wolo tɛtrɛɛ loo dɛhiɛmɔ wolo ko haaa amɛ?
8 Kɛ atsuɔ shikpɔŋkuku lɛ mli nii daa otsi po lɛ, ha ahi ojwɛŋmɔ mli akɛ ekolɛ mɛi ni hiɛ tsui krɔŋŋ lɛ ateŋ mɛi komɛi yɛ ni wɔnako amɛ lolo, eyɛ mli akɛ wɔtee jɛmɛ shii abɔ koni wɔnine ashɛ amɛnɔ. Ni eyɛ mli akɛ oye odase yɛ shinaa ko naa yɛ be ko ni eho mli moŋ, shi ekolɛ okɛ mɔ kroko baakpe. No hewɔ lɛ, nyɛhaa wɔyea odase ni emɔ shi jogbaŋŋ yɛ wɔshikpɔŋkuku lɛ mli, taakɛ bɔfoi lɛ fee lɛ.—Bɔfɔi 8:14, 25; 20:20, 21.