Sanekpakpa Lɛ Kɛhamɔ—Yɛ Shikpɔŋkuku Ni Afɔɔ Mli Nitsumɔ Mli
1 Mɛni hewɔ ehe hiaa ni akɛ Maŋtsɛyeli lɛ he sane lɛ aha mɔ fɛɛ mɔ lɛ? Ejaakɛ amɛwala kɛ wɔ diɛŋtsɛ wɔwala hu ka oshara mli.(Ezek. 3:17-19; 33:6; 1 Tim. 4:16) Shi mɛɛ gbɛ nɔ wɔtsɔɔ wɔhaa wɔsane lɛ feɔ ehee daa ni ŋɔɔ wɔ shiatsɛmɛi lɛ anaa hu, titri lɛ yɛ shikpɔŋkukuji ni afɔɔ nitsumɔ yɛ mli lɛ amli? Mɛɛ gbɛ esa akɛ atsɔ nɔ aya mɛi ni tamɔ mɛi ni amɛjie amɛhe kpo akɛ amɛbɛ wiemɔ lɛ he miishɛɛ kwraa lɛ aŋɔɔ? Saji otii komɛi yɛ kukuji ni nyiɛ sɛɛ nɛɛ amli ni abaanyɛ atsu he nii amrɔ nɔŋŋ ni ekomɛi hu yɛ sɛɛ mli, yɛ be mli ni ajie naatsii lɛ.
Na Jwɛŋmɔ Kpakpa
2 Nɔ ni tamɔɔɔ bɔ ni mɛi komɛi baanyɛ asusu lɛ, shikpɔŋkuku ni afɔɔ mli nitsumɔ yɛ gbɛ ni mɔɔ shi nɔ lɛ woɔ yibii babaoo fe nɔ ni afɔɔɔ mli nitsumɔ. No hewɔ lɛ gbɛtsii nii ni esa akɛ aye nɔ kunim lɛ ateŋ ekome ji jwɛŋmɔ gbonyo ni aaana yɛ shiai ni afɔɔ mli botemɔ lɛ ahe lɛ. Ehe miihia ni aha gbɔmɛi ana hegbɛ ni amɛbo Maŋtsɛyeli shɛɛ sane lɛ toi. Ebaafee tɔmɔ yɛ wɔgbɛfaŋ akɛ wɔɔmu sane naa akɛ Yehowa ekojo mɛi ni booo sane lɛ toi yɛ shii abɔ ni wɔtee amɛŋɔɔ lɛ fɛɛ sɛɛ lɛ akɛ amɛsaaa.
3 Esa ni wɔnu he wɔha mɛi ni yɔɔ shikpɔŋkuku ni afɔɔ mli nitsumɔ lɛ mli lɛ titri. Kɛ wɔyɛ shɛɛ sane pɔtɛɛ ko ni tsuɔ gbɔmɛi ni yɔɔ akutso ko mli lɛ ahiamɔ nii ahe nii lɛ, eeeha mɛi komɛi ni kulɛ amɛboŋ toi lɛ abo wɔ toi. Ani ole saji ni yaa nɔ yɛ je lɛŋ bianɛ lɛ, ni ani osaa ohe akɛ oootsɔɔ gbɔmɛi lɛ bɔ ni Biblia miishɛɛ sane lɛ baanyɛ aye abua gbɔmɛi lɛ ni amɛtsu naagbai ni amɛkɛkpeɔ lɛ ahe nii?
Tsakemɔ Gbɛ ni Otsɔɔ nɔ Oshiɛɔ lɛ mli
4 Tsakemɔ gbɛ ni otsɔɔ nɔ oshiɛɔ lɛ mli yɛ shikpɔŋkuku ni afɔɔ mli nitsumɔ lɛ mli. Yɛ bei komɛi amli lɛ obaanyɛ okɛ dɛhiɛmɔ wolo atsu nii akɛ ohiɛkpamɔ wiemɔ lɛ fa. Yɛ he kroko hu mli lɛ obaanyɛ okɛ hiɛkpamɔ wiemɔi fe 40 ni akɛha yɛ Reasoning wolo lɛ mli yɛ baafai 9-15 lɛ atsu nii ni okɛtsu shikpɔŋkuku lɛ mli hiamɔ nii ahe nii. Obaagbala jwɛŋmɔ po kɛya be ko ni oba akutso lɛ mli lɛ nɔ koni okɛba kpoomɔ ni aaakpoo bo lɛ shi. Kɛ okaiɔ sane ko ni shishinumɔ yɔɔ mli ni shiatsɛ lɛ wie yɛ be mli ni oba eŋɔɔ yɛ be ko ni eho mli lɛ, obaanyɛ okɛ enɛ atsu nii ni okɛtee emiishɛɛ shi kɛha sanegbaa.
5 Susumɔ gbɔmɛi ahe taakɛ Yehowa feɔ lɛ, ni ona oha mɛi ni ekolɛ amɛkɛɛ wɔ akɛ amɛbɛ wiemɔ lɛ he miishɛɛ kwaaa lɛ. Yehowa tee nɔ etsɛ eblema webii lɛ shii abɔ yɛ shikpilikpii ni amɛfee yɛ ebɔfoi lɛ ashɛɛ saji lɛ ahe lɛ fɛɛ sɛɛ. (2 Kron. 36:15; Yer. 7:13) Mɛi pii ni be ko lɛ amɛkɛɛ amɛbɛ wiemɔ lɛ he miishɛɛ lɛ etsɔmɔ wɔnyɛmimɛi hii kɛ yei bianɛ. Aye mɛi ni teɔ shi woɔ anɔkwale lɛ waa po lɛ anɔ kunim kɛba anɔkwale lɛ mli. Amɛmiida shi agbɛnɛ akɛ mɔ ko to etsui shi eha amɛ ni akɛ sanekpakpa lɛ ba amɛŋɔɔ shii abɔ.
Ŋmalamɔ Amɛhe Saji Oshwie Shi Jogbaŋŋ
6 Ehe miihia waa akɛ ooona shia kɛ shia kadimɔ wolo. Kɛ otsɔ nɔ otee mɛi ni bɛ shia lɛ aŋɔɔ lɛ, eeeha onyɛ otsu shikpɔŋkuku lɛ mli nii kɛmɔ shi ni eeeha be ni okɛyaa mɛi aŋɔɔ yɛ amɛshiai amli lɛ ata. Mɛi komɛi hu ena akɛ ehi akɛ amɛkɛ mɛi ni bɛ shia lɛ ahe nibii ni aŋmala beni amɛtsu nii yɛ otsi lɛ teŋ sɛɛ aaaha mɛi ni yaa shiɛmɔ yɛ otsi lɛ naagbee lɛ. Enɛ haa ayaa shiatsɛmɛi lɛ aŋɔɔ yɛ be sɔrɔtoi amli ni ehaa nine shɛɔ mɛi ni efɔɔɔ shia hilɛ yɛ gbi lɛ mli bei komɛi kɛ otsi lɛ mli gbii komɛi amli lɛ anɔ. Abaanyɛ ana ŋaawoi krokomɛi yɛ September 1, 1988 Buu-Mɔɔ lɛ baafai 13-18.
7 Yehowa le be mli ni ábɔ mɔdɛŋ bɔ ni sa koni nine ashɛ mɛi fɛɛ ni baanu lɛ anɔ lɛ. Wɔbaaya nɔ wɔbo lɛ toi, yɛ Kristo hiɛnyiɛmɔ shishi, kɛ hekɛnɔfɔɔ akɛ abaagbe nitsumɔ lɛ naa yɛ be ni akɛha lɛ naa.—Ezek. 9:11.