Wɔkɛ Shidaa Haa yɛ Nɔ ni Wɔyɔɔ lɛ Hewɔ
1 “Nyɔŋmɔ jieɔ lɛ diɛŋtsɛ esuɔmɔ ni ekɛsumɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ.” (Rom. 5:8) Kwɛ bɔ ni esa akɛ wɔ fɛɛ wɔkɛ shidaa aha afɔle ni nɔ kwɔ fe fɛɛ ni Yehowa Nyɔŋmɔ kɛ e-Bi lɛ sha yɛ wɔ hewɔ lɛ! Yɛ Kristo lá ni efɔse eshwie shi lɛ hewɔ lɛ, aha wɔ hegbɛ kɛha naanɔ wala, nɔ ko ni adesa ko nyɛŋ ekɛha wɔ.
2 Te wɔɔfee tɛŋŋ wɔtsɔɔ hiɛsɔɔ? Mɛi babaoo yɛ ni anɔkwa nilee ni abaanyɛ ana yɛ Nyɔŋmɔ Wiemɔ Krɔŋkrɔŋ lɛ pɛ mli lɛ he kumai miiye amɛ. Eji Yehowa suɔmɔnaa nii akɛ amɛbana anɔkwale lɛ he nilee. (1 Tim. 2:4) Wɔtsɔɔ hiɛsɔɔ ni wɔyɔɔ kɛha anɔkwale lɛ kɛtsɔ ‘Nyɔŋmɔ Maŋtsɛyeli lɛ he sanekpakpa lɛ jajemɔ’ nɔ. (Luka 4:43) Nitsumɔ nɛɛ mli ni wɔkɛ wɔtsui fɛɛ woɔ lɛ tsɔɔ akɛ wɔhiɛ sɔɔ akɛ Kristo gbo kɛha wɔ ni akɛ wɔmiisumɔ ni wɔkase lɛ kɛtsɔ efamɔ akɛ afee mɛi krokomɛi kaselɔi lɛ toiboo yɛ anɔkwayeli mli lɛ nɔ.—Mat. 28:19, 20.
3 Mɛɛ gbɛi komɛi ni atsɔɔ nɔ ashiɛɔ yɔɔ kɛha wɔ? Ani wɔbaanyɛ wɔkɛ wɔhe awo gbɛgbalɔi awalɔi anitsumɔ lɛ mli be kɛ beaŋ? Beni abu he akɔntaa akwɛ agbe naa lɛ, mɛi komɛi baanyɛ ni amɛkɛ amɛhe awo daa gbɛgbamɔ nitsumɔ lɛ mli. Kɛ wɔtsu hegbɛi fɛfɛji nɛɛ ahe nii lɛ, wɔbaanyɛ wɔha be ni wɔkɛwoɔ Maŋtsɛyeli sanekpakpa lɛ gbɛɛ-kɛ-shwamɔ mli lɛ aya hiɛ. Ekolɛ osusu ohe ni okɛaawo mli lɛ he yɛ be ko ni eho lɛ mli, shi nibii batsĩ onaa. Ekolɛ oshihilɛi etsake. Kɛ nakai ni lɛ, ani okɛ hiɛdɔɔ esusu ohe ni okɛaawo gbɛgbamɔ sɔɔmɔ lɛ mli, loo ni ooosɔmɔ akɛ gbɛgbalɔi awalɔ yɛ be kɛ beaŋ lɛ he?
4 Wɔ shidaa lɛ mli bawaa jogbaŋŋ, kɛ wɔkwɛ nɔ ni yaa nɔ kɛbɔleɔ wɔ lɛ. Awuiyeli, hetsɛ̃, kɛ béi miiya hiɛ waa yɛ jeŋ fɛɛ. Paulo tsɔɔ wɔbei nɛɛ amli jogbaŋŋ akɛ “jaramɔ bei” “ni mli wa waa.” (2 Tim. 3:1, New World Translation) Wɔyɛ saji kpakpai babaoo ni wɔbaagba mɛi krokomɛi yɛ shihilɛi ni haoɔ mɔ waa nɛɛ amli. Wɔyɛ woji tɛtrɛbii fɛfɛji enyɔ, Buu-Mɔɔ kɛ Awake! lɛ. Wɔbaanyɛ wɔkɛ ekomekomei aha yɛ nyɔŋ nɛɛ nɔ loo ni wɔha ashɛ. Wɔyɛ woji bibii hu ni wieɔ saji sɔrɔtoi ahe. Woji nɛɛ baanyɛ ekɛ anɔkwa hejɔɔmɔ aha mɛi ni kaneɔ lɛ. Esa akɛ shidaa kɛha nɔ ni wɔyɔɔ lɛ atsirɛ wɔ koni wɔgba mɛi krokomɛi enɛɛmɛi amli saji.—Heb. 13:16.
5 Eeenyɛ efee akɛ miishɛɛ fioo ko pɛ mɛi tsɔɔ yɛ mumɔŋ nibii ahe, yɛ akutsoŋ ni oyɔɔ lɛ. Nɔ ni tamɔɔɔ nakai lɛ, shikpɔŋkukuji yɛ ni woɔ yibii. Aana mɛi ni jieɔ miishɛɛ babaoo kpo yɛ shikpɔŋkuku ni akɛwoko mɔ ko dɛŋ lɛ amli. Ani eeenyɛ eba akɛ ooonyɛ oyasɔmɔ yɛ maŋ nɛɛ mli he ko ni oyelikɛbuamɔ he baahia waa diɛŋtsɛ yɛ? Ekolɛ nyɛ kpokpaa nɔkwɛlɔ lɛ baanyɛ aha ŋaawoi komɛi yɛ enɛ he, loo nyɛbaanyɛ nyɛŋma kɛyaha Asafo lɛ.—Kwɛmɔ May 1992 Wɔ Maŋtsɛyeli Sɔɔmɔ lɛ baafa 1.
6 Wɔyɛ yiŋtoi babaoo ni wɔɔdamɔ nɔ wɔda shi yɛ nɔ ni wɔyɔɔ lɛ hewɔ, ni amɛji nibii kpakpai babaoo lɛlɛŋ. Wɔbaanyɛ wɔda Yehowa shi yɛ gbɛ ni hi fe fɛɛ nɔ kɛtsɔ egbɛi kɛ eyiŋtoi ni wɔɔha mɛi krokomɛi ale lɛ nɔ.—Yes. 12:4, 5.