Taomɔ Mɛi ni Hiɛ Jwɛŋmɔ Kpakpa Lɛ
1 Shiɛmɔ nitsumɔ lɛ yiŋtoo kome ji ni wɔtao mɛi ni “hiɛ naanɔ wala he jwɛŋmɔ kpakpa lɛ.” (Bɔf. 13:48, NW) Buu-Mɔɔ kɛ Awake! woji tɛtrɛbii lɛ jaa lɛ efee gbɛ ni hi jogbaŋŋ ni atsɔɔ nɔ atsuɔ enɛ he nii, akɛni wɔwoji lɛ haa mɛi leɔ Maŋtsɛyeli hiɛnɔkamɔ lɛ hewɔ. Wɔbaawie woji tɛtrɛbii nɛɛ ashɛɛ he yɛ April. Wɔhiɛ kã nɔ akɛ, kɛ́ ana he miishɛɛ yɛ he ko lɛ, wɔbaanyɛ wɔkɛ Nilee Ni Kɛ Mɔ Yaa Naanɔ Wala Mli wolo lɛ aje Biblia mli nikasemɔi heei ashishi. Naa ŋaawoi komɛi ni obaanyɛ okɛtsu nii:
2 Kɛ okɛ April 1 “Buu-Mɔɔ” lɛ miitsu nii lɛ, obaanyɛ owie “Nyɛjiea Naanɔ Maŋtsɛ lɛ Yi!” lɛ ni gbalaa jwɛŋmɔ kɛyaa nyɛsɛɛ afi lɛ kpokpaa wulu nɔ kpee maŋshiɛmɔ krɛdɛɛ nɔ lɛ he, ni okɛɛ:
◼ “Mɛi babaoo ni wɔkɛ amɛ wieɔ lɛ yɛ Nyɔŋmɔ mli hemɔkɛyeli. Ewaa kɛhaa mɛi krokomɛi akɛ amɛaahe enɔ amɛaaye. Te onuɔ he tɛŋŋ? [Ŋmɛɛ gbɛ ni ewie.] Odaseyeli diɛŋtsɛ ebɔle wɔhe ni tsɔɔ akɛ Nyɔŋmɔ ko yɛ. [Kanemɔ Lala 104:24.] Kɛ wɔnà kamera loo kɔmpiuta ko lɛ, oya ni wɔkpɛlɛɔ nɔ akɛ nifeelɔ ko ni le nii jogbaŋŋ fee. Ani ebaafee nɔ ni nilee yɔɔ mli akɛ aaakɛɛ akɛ nibii ni yɔɔ hwanyaŋŋ kwraa tsɔ, tamɔ shikpɔŋ kɛ wɔ adesai lɛ, ba trukaa?” Okɛ sane lɛ mli kuku ko atsɔɔ yiŋtoo kpakpa ni baaha ahe Nyɔŋmɔ nɔ aye. Okɛ wolo tɛtrɛɛ lɛ aha ni otsɔɔ woloshɛɛ he gbɛjianɔtoo lɛ mli.
3 April 15 “Buu-Mɔɔ” lɛ wieɔ sane ni yitso ji “Nɔ Hewɔ ni Anɔkwa Jamɔ Nine Shɛɔ Nyɔŋmɔ Jɔɔmɔ Nɔ” lɛ he. Dani okɛaaha lɛ, obaanyɛ obi akɛ:
◼ “Akɛni jamɔi ohai abɔ yɔɔ je lɛŋ hewɔ lɛ, ani osusuɔ akɛ Nyɔŋmɔ baanyɛ akpɛlɛ fɛɛ nɔ? [Ŋmɛɛ gbɛ ni ejie naa.] Yesu gba efɔ shi akɛ, yɛ saji ni jamɔ mli bii babaoo lɛ jajeɔ lɛ fɛɛ sɛɛ lɛ, abaakpoo mɛi ni efeee Nyɔŋmɔ suɔmɔnaa nii lɛ. [Kanemɔ Mateo 7:21-23.] Ehe miihia ni wɔyɔse anɔkwa jamɔ ni Yesu tsɔɔ he nii lɛ.” Gbelemɔ saneyitso ni ji “Mɛɛ Yibii Esa akɛ Anɔkwa Jamɔ Awo?,” ni jeɔ shishi kɛjɛɔ baafa 16 lɛ, ni nyɛsusu nɔkwɛmɔ nɔ kome he ni nyɛkɛma sane lɛ nɔ mi.
4 Kɛ oowie saneyitso titri ni ji “Beni Tai Bɛ Dɔŋŋ” ni yɔɔ April 22 “Awake!” lɛ mli lɛ he lɛ, obaanyɛ osusu enɛ kɛɛmɔ he, akɛ:
◼ “Tai ohai abɔ etee nɔ yɛ afii oha nɛɛ mli, ni jeŋ tai enyɔ fata he. Ni kɛlɛ, etamɔ nɔ ni je lɛŋ hiɛnyiɛlɔi fɛɛ kɛɔ akɛ amɛmiitao toiŋjɔlɛ. Mɔ fɛɛ mɔ ni mile lɛ kɛɔ nakai nɔŋŋ. Kɛ mɔ fɛɛ mɔ miitao toiŋjɔlɛ lɛ, mɛni hewɔ ni amɛnine nyɛɛɛ ashɛ nɔ? [Ŋmɛɛ gbɛ ni ewie.] Mɛni osusuɔ akɛ ehe hiaa koni wɔna toiŋjɔlɛ diɛŋtsɛ yɛ shikpɔŋ nɔ?” Beni shiatsɛ lɛ ehere nɔ sɛɛ lɛ, gbelemɔ baafai 8 kɛ 9 ni okane ŋmalɛi tamɔ Lala 46:9, 10. Okɛ mfonirii kɛ ŋmalɛi ni aŋmala emli wiemɔi lɛ atsu nii, ni okɛtsɔɔ bɔ ni Nyɔŋmɔ Maŋtsɛyeli lɛ baafee ni ekɛ jeŋ fɛɛ toiŋjɔlɛ ni baahi shi kɛya naanɔ lɛ aba. Okɛ wolo tɛtrɛɛ lɛ aha, ni otsɔɔ bɔ ni afeɔ ashɛɔ. Too gbɛjianɔ ni oku osɛɛ oba.
5 Kɛ ona mɛi babaoo ni kɛɔ akɛ amɛbɛ dekã lɛ, obaanyɛ oka enɛ okwɛ:
◼ “Wɔyɛ miishɛɛ akɛ wɔɔye wɔbua mɛi ni bɛ dekã ni be fioo pɛ amɛnaa amɛkɛsusuɔ mumɔŋ saji ahe yɛ shihilɛ mli lɛ. Afee wɔwoji, Buu-Mɔɔ kɛ Awake! lɛ koni amɛkɛ saji ni he hiaa ni saa bo kɛ oweku lɛ he lɛ he saji kukuji aha. Masumɔ ni mashi enɛɛmɛi maha bo koni okane.”
6 Kwɛmɔ ni okɛ hegbɛ aha mɛi ni heɔ woji tɛtrɛbii lɛ koni amɛshɛ eko loo enyɔ lɛ fɛɛ. Eka shi faŋŋ akɛ amɛbaana Buu-Mɔɔ kɛ Awake! ni kɛ “nɔ ko kpakpa he sanekpakpa” baa lɛ kanemɔ daa lɛ he sɛɛ.—Yes. 52:7, NW.